Ka Nupepa Kuokoa, Volume LIX, Number 51, 23 December 1921 — Page 5

Ka Nupepa Kuokoa

 

 

He Moolelo no

P I T A   N I K O L A

a  i  ole

Ke Duke i Haalele Aku i Kona Kulana Hanohano a Lawe Mai i ke Kulana Makaninana

 

            Ma kela haalele ana aku a Nikola i ke keena o Kelekona, hele pololei aku la oia no ka halawai pu an me Dike Kelekona, kona hoaloha no ka mea iloko o kona noonoo ua aie nui loa oia i kela kanaka opio, ka mea nana i haawi mai i keia hana hou nana, ka mea hoi ana i moeuhane mua ole ai, e loaa ana he hana nui o ked ala elike me keia ana e hele aku nei e hooko.

            I ka hale no ua kanaka opio nei kahi i noho ai, nolaila i ka halawai ana ae o na hoaloha i kahi hookahi, aole o Nikola i hoohakalia iho i ka haawi ana aku i kona mahalo kiekie ia Dike, me ka hoike pu ana aku no hoi i ka nui maoli o kona hauoli, no ka loaa ana o kela hana maikai loa iaia;  a ma ka aoao hoi o Dike, aole ana mau olelo ano nui, koe wale no ka hooia ana mai, ua makaukau mau oia i na Manawa apau, e haawi mai i kana mau kokua ana ina e komo ua o Nikola iloko o ka pilikia, me ke kono pu ana mai no hoi, aole e hoopoina ka hele ana aku e ike i kekahi manawa ana e hoea ai no Nu Ioka.

            Haalele aku la ua o Nikola i kona hoaloha, a hoi pololei ae la no kona hale hoolimalima, me ka hookomo awiwi ana aku i kona maul ole maloko o kona paiki, a mahope o ka uku ana aku i kona bila, o ka noho ana ma kela hale, o kona puka aku la no ia nowaho o ke alanui, i ke kaalo ana ae o kekahi kaa, kau aku la oia oia ka pahuhopu no ka hale hoolulu kaaahi.

            O ka mea nana i hookahaha loa mai i ka manao o ke Duke Nikola, i kona hoea ana aku i ka hale hoolulu, ike aku la oia i kekahi hale kiekie, o elua papahele, eia ka o kela ka hale hoolulu kaaahi, ina ma kona aina kela hale, e kuhihewa ana na kanaka he halepule, ke mahalo la oia i ka nani o kela hale, i kupono ole e kapaia he wahi no ua ohua e hoolulu ai.

            Komo aku la oia maloko o ua hale nei he nani wale no kona mau keena apau, a ke hi-o la hoi na kanaka iloko a iwaho; me kona hele ana aku no hoi e kuai i tikiki nona, e holo ai ahiki i kona wahi e lele ai; aka nae o ka mea nana i hooi loa niai i ke kahaha o kona noonoo, o ia no ka ike ana aku i kekahi kanaka, e kahea mau ana me ka leo nui i ke alahele a na kaaahi like ole e holo ai.

            O keia mau mea apau i malihini i kona mau maka, a ke Duke Nikola e ike nei, he mau mea hoohauoli wale mai no ia i kona noonoo, mamuli o kona hoomaopopo ana iho, o na hiona aku ana keia o kona noho ana ma ka aina hookama, he mau mea ano nui loa hoi iaia e pono loa ai oia e makaala.

            Aole loa ona wahi kanalua iki, no ka hiki iaia ke lawelawe i na hana apau o kona kulana hou, no ka mea mawaho ae o kona hoohala ana i kona mau manawa kaawale o ka la, ma ka hookani piano ana ame ka himeni ana no hoi, e hele ana oia maloko o ka ululaau me na kanaka i hoonohoia no ka nana ana i na kumulaau, me kona komo pu aku ma ke kokua ana me lakou, ma ke oki ana i ua laau, a pela hoi ka haawi ana aku i na a’o ana i kela poe kanaka ua manaoio no oia ua lawa ka ike ame ka makaukau i loaa iaia e hookahahaia aku ai ka manao o kona haku, ke ike mai i kana hookele ana i na hana i makemakeia mai ai oia e noho hana aku ma kela wahi hou.

            Ma kela la ua kuai oia helelua mau buke e pili ana i ke ano o ka malama ana i na ululaau he mau buke i kakauia e kekahi poe kanaka loea a Amerika; no ke koena aku o kekahi mau buke ana o ke kuai ana pela me na kii, o na kanaka hana ma na wahi oki laau, ua haawi aku oia i ke kauoha i ka halekuai buke, e hoouna ae ma ke ekeleka, no kahi ana e hele nei.

            Oiai nae ua o Nikola e hele aku ana a pii ma na anuu o ke alapii o ka hale hoolulu no kahi kuai tikiki, ike aku la oia i ka nana pono loa mai o kekahi kanaka iaia nei;  ma kana hoomaopopo aku aole oia i ike mua i kela kanaka na kahikoia no hoi oia me kekahi paalole ahiehie, me ka papale kaleponi palupalu, a he umiumi eleele kona ma ka lehelehe maluna.

            No ka malihini loa o kela kanaka iaia, aole o Nikola i hooka’ulua iho i kana hele ana, aka nae no kekahi mau kaina wawae kela hele ana aku ana, hoomanao mai la oia malia paha he kanaka kela i ike mua iaia, a he pono iaia nei ke ninau aku i ua kanaka nei, nolaila ku iho la oia me ka hoi hou ana mai ihope, i ka wa nae a kela kanaka malihini i ike aku ui i ka hoi hou mai o Nikola, o ke kulou iho la no ia o kona poo ilalo, a hoomaka aku la e hele, me ka hoomamao ana iaia iho, mai kona loaa ana aku ia Nikola.

            Ina paha he nui kona Manawa, ina ua hoomau aku no oia i ka hele ana ahiki i ka loaa ana o kela kanaka iaia, aole nae pela, he mau minuke helu wale no koe, alaila haalele iho ke k@ahi i ka hale hoolulu, nolaila awiwi aku la oia a ka puka aniani e kuaiia ai ke tikiki, o kona oi aku la no ia i kona tikiki, a iloko o na minuke helu wale no aia oia maluna o ke kaaahi.

            Hele pololei aku la ua o Nikola, noloko o ke kaa puhipaka, noho iho la oia, me ka nui ae o na ohua, o ke kani mai la no ia o ka bele hoailona, a iloko o na sekona helu wale no, aia ke kaahi ke holo la, ma kappa o ka Muliwai Hukona, e hele aku ai ma na kula palahalaha o Nu Jese.

            Oiai ke kaaahi e holo la, aia wale no na maka o ke Duke Nikola iwaho kahi i nana ai i ka aina, a ke ike la hoi oia, i ka nui o na ululaau, me ka hoomaopopo ole ia, no ka mea e ku mai ana na kumulaau ua maloo, a he puukiuki hoi ka ulu ana o na kumulaau ma kekahi mau wahi, e hoike mai ana kela mau hiona, aole he poe na lakou e malama ana i kela mau ululaau, aole hoi he hanaia o na kumulaau, no na hana e pomaikai ai ka poe i kuleana i na eka aina nunui.

            Ke ike pu la no hoi oia i ke kulana nele a pilikia maoli o na kanaka e noho ana ma na palena mawaho o ke kulanakauhale, a hoomanao ae la oia i na kanaka o kona aupuni, i like aku ke kulana me ko kela poe ana e hoomaopopo aku la.  Oiai nae kela mau hiona e halawai mai la me ka ike a kona mau maka, ia wa i ala mai ai kana noonoo ana, no kona mau maka, ia wa i ala mai ai kana noonoo ana, no kona home aloha, ma ia wahi la, hiki ole aku la iaia ke ike i na mea mawaho o ke kaaahi, a i ka hala ana o kekahi mau minuke o kela noho mumule ana o ke Duke Nikola puana ae la oia ma ka olelo Beritania:

            “Ke noonoo nei au no kuu home ma ka aina mamao, me kuu ike no nae, aole o’u home i koe malaila, nolaila e hoolilo ana ua ia Amerika nei i home no’u.”

            No na hora loihi kela holo ana o ke kaaahi, a no ka loaa ole paha hoi kekahi o kona hoa olelo oluna o ke kaaahi lulumi mai la kona mau maka o ka pili iho la no ia me ke ku ana mai o na hihi’o lehulehu imua o kona noonoo.

            O ka mua, o ia no kona ike ana aku i na mea no i kamaaina iaia ma Ruisia a ma Pelekane o ia no na hale kakela nani na kanaka hanohano a ko’iko’i o ka aina me ko lakou mau kahiko o ke kulana like ole na lako hoonani kumukuai pipii ana i ike mau ai maloko o na halealii na kakela no hoi pela me ke gula am eke daimana, a i ke auhee ana aku o kela hihi’o ua ku mai la he hiona hou o ia na pualikoa, e hele ana iloko o na wahi pohopoho oiai kekuaua e haule ana me ka ikaika, me he mea la ke lohe okoa aku la oia i ke kani paapaaina o nap u kuniahi e haku’i nakolokolo ana i ka lewa na leo uwe kumakena no hoi o na koa:  ke ike pu la no hoi oia i kona kaikuaana hoahanau maluna o kona lio me ka ihe ma kona lima a kelohe la oia i na leo uwe o na kanaka no ko lakou mau makuahine no ka nele i na manaolana no ka ike hou aku i ko lakou mau maka.

            Oiai kela mau hiona o ka wa i hala, e kau mai la imua o kona noonoo, oili pu mai la he hihi’o no kekahi kanaka kino uuku, ka mea i kiolaia mai iloko o ka pa, me ka hele o kona lole e komo ana a ula pu i ke koko a iloko o ke kuaua e haule ana me ka ikaika, i ike aku ai oia i ka moe loihi mai o kona kino me he mea la he mea i hookuuia mailuna iho o ka laau ke’a o na hana hoomainoino.

            He ku maoli kela mau hiona i ka weliweli i ka Nikola nana aku nolaila kikookoo ae la kona mau wawae i o a ia nei paa ae la hoi kekahi lima, ma kona lae, o ke kaakaa ae la no ia o kona mau maka eia ka he hihi’o wale no aole hoi he mau mea oiaio.

            Iloko o kona naau ke haawi la oia i na hoomaikai ana i ke Akua no kona kaawale loa ana mai kona aina mai; a ke hoomaikai pu la hoi oia no kona koho ana o Amerika kona home no ka mea eia oia ma ke alahele, e ike ole ai oia i ka pilikia ame ka nele.  Ina oia i hoolohe aku i na a’o ana a Kimo Koka, kona kokoolua o ka lele pu ana mailuna mai o ka moku no Nu Ioka ina aia oia iwaena o na kanaka ino o ke kulana haahaa aka iaia i hoole aku ai i ka manao o kela kanaka, pela iho la oia i komo ai iloko o ka pohai o ka poe hanohano a kiekie, a o ka mea oi loa aku, ua loaa iaia kekahi kulana, me ka nui o kona uku mahina mamua paha o kekahi hana e ae, e loaa ana iaia, ina me Kimo Koka oia e hele pu ai.

            He elua manawa a ke Duke Nikola o ka hoololiloli kaaahi ana, o ka lua o kona manawa o ka hoololi ana i kona kaaahi, ma ka hooku'i ana no ia o na alahao elua i kahi hookahi, ma kahi kokoke i na kauhale me na uinihapa.

            He iwakalua ka nui o na ohua o ka lele ana ma kela wahi, me ka helewawae o na ohua mai kahi i ku ai o ke kaaahi, ahiki i ka hale hoolulu, a e hookokoke aku ana nae oia e hoea i ka hale hoolulu, ike aku la oia i ka nalowale ana aku o kekahi kanaka me ka paalole ahiehie ma ke kihi o ua hale nei, aole no nae ona noonoo aku no kela kanaka aka ke awiwi loa la oia, aia ka pono o ke kau aku maluna o ke kaaahi.

            O keia kaaahi a ke Duke Nikola o ke kau ana aku, o ke ano kaa ia o Rusia, he kaa o kela au kahiko loa, me ma nui o ka nakeke o ka holo ana iluna o ke alahao, aole hoi elike me kela kaa ana i haalele aku ai, he kaa ia o keia au hou, me ka nehe o kona holo ana i ke alahao, aka nae, aohe no a ianei kamawae ana ae, aia ka pono o kona hoea aku no kahi o kona hakuhana hou me ka maalahi.

            Ma kela wahi aku o ke alahele e honi mau ana ua o Nikola i ke ea o na laau paina, no ka mea o ka laau nui hookahi ia e ulu ana ma kela aina! Ke ike la no hoi oia i na kahawai, mai ke nui a ka liilii, e hulalali mai ana ko lakou mau wai aliali iloko o na kumulaau paina:

            No na mile lehulehu kela holo ana o ke kaaahi, hoea aku la i kekahi wahi hale hoolulu uuku; alaila kahea ae la ka mea ohi tikiki oluna o ke kaaahi i ka inoa o kela wahi eia ka o ka hale hoolulu ia e lele aku ai o Nikola, o kona ku ae la no ia iluna lalau aku la i kona paiki, o ka hemo aku la no ia iwaho o ke kaa, a ku ana iluna o ka honua.

            O Nikola hookahi wale no ka ohua o kela wahi a mawaho ae ona, he ope nupepa me hookahi ekeleka ka ke kanaka ohi tikiki o ke kiola ana mai ilalo, o ka hoomau aku la no ia o ke kaaahi ma kona alahele.

            Aole he hookahi mea ma kela hale hoolulu, ua paa ka puka i ke kiia a iaia i kiei aku ai iloko he hookahi wale no noho kahiko e waiho mai ana a he mikini kelekalapa ame kakahi mau pepa kahiko a noonoo iho la oia, mamuli paha o ka hoea ole ana o ke kanaka malama kelekalapa i kela hale hoolulu, pela iho la i hoea ole mai ai ke kaa otomobile, a Mr. Kelekona i hoike mai ai iaia, e kelekalapa mai ana oia ia Ionakana Makuaia, no ke kii ana mai iaia nei.

            Ke nana la oia ma o a maanei, aole he wahi mea a ikeiki ia aku o kekahi kino kanaka i ka maaloalo mai, o kana mea wale no e ike la, he mau manu maluna o ke kumulaau, e noke ana i ke kani.  Ina no kona noho malie ma kela hale hoolulu, aohe no mea e loaa mai ana iaia, nolaila hooholo iho la oia i kona manao, he oi loa aku ka pono e helewawae no oia, o kahi mea hookakanalua wale no i kona noonoo, o ia ke kaumaha o kona paiki.

            He hookahi wale no alanui, e moe pololei ana mai ka hale hoolulu aku ke ike la no oia, i ka momoe o na huila kaa, eia nae he alanui pohopoho i ke one, nolaila, mahope o ka hoomaha liilii ana no kekahi mau minuke, o ka hopu iho la no ia i kana paiki, hoomaka aku la e hele.

            Aia ke moe la ke alanui iloko o ka ululaau, me kikeekee ana i o a ia nei, elike me ke ano o ka moe iliwai ana o ka aina, e iho ana no hoi kekahi wahi ilalo a e pii ana no hoi iluna; ua lilo no nae kela alanui i mea hauoli i ko Nikola manao o ka mea wale no nana i hookaumaha mai iaia o ia ke ko'iko o kona paiki.

            He mehameha oloko o ka ululaau ana e hele la, aole no nae ia i lilo i kumu nona e maka'u ai.  Ina paha o ke alanui pololei kela ana e hele nei, aole paha he hookahi ona manao paa, e hoea aku ana oia no kekahi wahi i nohoia e na kanaka, o ka mea pohihihi loa nae iaia, aole he maopopo iki o ka loihi o kana wahi e hele ai, a hoea aku i kahi i nohoia e na kanaka, aole nae kela he manawa no ka noonoo no ia mea, aka o ka hoomau wale no i ka hele ana imua.

            Elike me ka loihi aku o na mile a ke Duke Nikola e hele ai, pela iho la ka oi loa mai o ke ko'iko'i o ka paiki, me ka hele maoli o na lima o ua kanaka opio nei, a maopaopa no ia maopaopa, i waiho okoa iho ai oia i ka paiki ilalo, a noho iho la hoomaha, oiai hoi ka hou e kahe ana ma kona mau papalina.

            Oiai oia e hoomaha la, komo mai la kekahi manao iloko ona malia paha aole loa he kanaka ma ka inoa o Ionakana Makuaia, a he mau hana kolohe wale no ka Mr. Kelekona ame kana keiki, i wahi no ia nei e kaawale ai mai Nu Ioka mai, a mihi loa iho la oia, no kona wikiwiki loa, o ka ae ana aku e hele mai, no keia aina malihini, me kona huli mua ole i ka oiaio.

            Oiai no nae oia e hoomaha la, lohe koli'uli'u aku la oia i kekahi leo himeni i kahi mamao, he leo no kekahi wahine, aole nae he lohe ponoia aku o ke ano o kela leo, ame kana himeni no ka mea ke huikau pu la me ka nakeke o ka lau o na laau.

            Ku ino ae la o Nikola iluna, me ka hoolohe ana i kela leo himeni, aia iloko ona ka olioli, no ka maikai maoli o ka mea nona kela leo himeni, o ka mea apiki nae, aole he maopopo iaia, o kahi o kela leo e oiliili mai la, eia nae e hookokoke mau mai ana iaia i kela ame keia manawa.

            No ka hapaha hora paha kela noho malie ana a Nikola e kakali, oili aku la he kino, no kekahi mea ana i kuhihewa loa aku ai i konohi, he keikikane, no ka mea e komo ana oia he lolewawae epani, me kekahi papale laulau nui ma kona poo, i ke kokoke loa ana mai me iaia nei, eia ka he kaikamahine, no ka mea e luhe ana kona lauoho mahope o kona kua, a ma kona mau poohiwi no hoi.

            I ka ike ana mai o kela kaikamahine i ka noho o keia kanaka ma ke alanui, pau honua iho la kana himeni ana a ku iho la no hoi oia i kahi hookahi, o ka wa ia i ku ae ai ke Duke Nikola iluna, a pane aku la ma ke ano hoolauna:

            "O ke aloha auwina la no kou," wahi ana me ke kunou ana aku ma ke ano paa rula.

 

M O K U N A  III

 

            "E hiki ana anei ia oe ke hoike mai ia'u, ina paha o ke alanui pololei keia e hele ai a hoea no ka Pohaku Eleele?" wahi ana me ka leo oluolu, i piha hoi me kona kulana paa rula.

            "Ma ke ano o kau alahele e hele nei, e maopopo ai kou hoea ilaila ame ka ole," i pane mai ai ke kaikamahine opio me ka pau ole no nae o kona pohihihi no ke ano o ka mea e kamailio pu nei me ia:

            "He kanaka malihini loa au ma keia aina, o ko'u hoea ana mai nei no ia ma ke kaaahi o keia auwina la, a ma ka hale hoolulu ma kahi i kapaia o ka Muliwai Pikela, malaila ko'u wahi o ka lele ana mai, a hele pololei mai la ma keia alanui, a no ka maopaopa o ko'u mau wawae, pela au i noho iho nei ma keia wahi e hoomaha ai a hoea wale mai la no oe."

            "Ua maopopo no anei ia oe, he makemake kou e hele i'o no kela wahi?"

            "Ae, nolaila ka'u huakai e hele nei o keia la."

            "Malia paha, no kou hoea mua ole ana no kela wahi, o ke kumu ia au i makemake ai e hoea'ilaila?"

            "Ae, aole i'o no au i ike mua i kela wahi, a o keia no ka manawa mua loa o ko'u hoea ana ma keia aina malihini."

            Kulou iho la ke kaikamahine opio ilalo, no ka hopu ana i kekahi lau laau, alaila pane mai la:

            "Ina oe e manaoio mai ana i ka'u mau olelo ea, alaila maanei no la, ua ike iho la no ia Pohaku Eleele, a ma ke alanui no au i hele mai la, malaila no oe e hoi hou aku ai, me ka hoomau hou ole aku i ka hele ana nomua."

            "Heaha iho la hoi ka pilikia o ko'u hele ana aku a hoea no ka Pohaku Eleele?"

            "Aole no he pilikia maoli, aka nae, aole he mea maikai nou ka hele ana no kela wahi."

            "Ina hoi ha aole he pilikia ea, alaila e hoomau aku ana no au i ka hele ana ahiki ilaila.  Pehea, he loa no nae paha kahi aku i koe a hoea ilaila?"

            "Ma kahi paha o ka hookahi mile me ka hapa, alaila hoea i ka Pohaku Eleele, pehea, aole anei i hoea aku ke kaa leka, no ka hale hoolulu, ma ka wa i ku mai nei o ke kaaahi?"

            "Aole he kaa a'u i ike, a ua hookahahaia no hoi ko'u manao, no ka ike ole ana i kekahi mea ma ka hale hoolulu, no ka mea, ua kauka'i mai au o ka hoea ae o kekahi kaa, no ke kii ana ia'u, no ka lawe ana aku no ka home o Mr. Ionakana Makuaia."

            "Alaila no kahi ka o Mr. Makuia kau huaka'i e hele nei?" wahi a ke kaikamahine opio, me na manao hoohuoi, no ka hana a keia kanaka malihini.

            "Ae, e hele aku ana au no kahi o kela keonimana, ina hoi paha e loaa ana ke alanui pololei e hele aku ai a hoea ilaila!"

            “Alaila, o oe anei kekahi o na makaikiu hou, i kauohaia aku e Mr. Makuaia e hele mai?”

            “Aole au he makaikiu, a aole no i maopopo mua ia’u, he kanaka kekahi o kela ano i makemakeia e Mr. Makuaia, aka e hele aku ana au, no ka lawe ana ae i ke kulana lunanui, no kana mau hana, a no ka nana ana hoi i kona aina i paa i ka ululaau.”

            “No ke kulana lunanui, aole au i manao he mea kekahi i makemakeia, no ka mea, ua nui no na kanaka e noho hana nei ma kahi o kela kanaka, a no ka nana ana hoi i na ululaau, aole o’u manao, he kanaka kekahi i makemakeia, oiai na na kumulaau no e ulu mai no lakou iho, me ka makaala ole ia aku e kekahi mea, koe wale no ka waiho ana aku ahiki i ko lakou nui kupono ana, alaila kii aku e oki me ke koi, a i ole pahiolo paha.”

            “Aole he pololei, o ka hookuu ana aku i na kumulaau e ulu no lakou iho, no keia kumu, e hele aku ana au e kuhikuhi pono i na kanaka hana o Mr. Makuaia i ke ano o ka malama ana i na kumulaau, i oi ae ai ka maikai o ko lakou ulu ana.”

            He mau mea malihini loa keia a Nikola e kamailio aku nei, i maopopo mua ole i ke kaikamahine opio, nolaila nana mai la oia ia Nikola ma kea no hoohuoi, malia paha e hoohenehene aku ana keia kanaka iaia, a i ole, e kamilio aku ana i kekahi mea oiaio ole.

            Ma kela Manawa a ua kaikamahine nei e ku mai ana, ua wehe oia i kona papale a paa ma kona lima, a ke luhe la hoi kona lauoho ehuehu ma kona mau poohiwi, a ke ike aku la keia i na manamanalima o kela kaikamahine, he keu aku ka palupalu, a he kulana kilakila hoi kona, eia nae, aole e hiki iaia ke nana loa aku i ua kaikamahine nei, a i ole noke aku paha i ka niele, no kona komo ana i ka lole o na kane, o kapa mai auanei kela kaikamahine iaia i ka paa rula ole.

            “Ea ma ko’u manao, aole o oukou noonoo nui, ka poe e noho ana ma ke kulanakauhale no ouikou iho.  Pela nei ka mea oiaio?”

            “Ua hoopohihihi loa mai kena ninau iau, e hiki pono ole ai ia’u ke pane aku i ka haina pololei.”

            “Eia no ka manao o ka’u mea i kamailio aku la ia oe, o ia ko oukou manao ana e kokua aku i ka ulu ana o keia mau kumulaau.”

            “O na kumulaau no ke ulu ana no lakou iho, aka e kokua wale aku ana no au, i mea e hiki ai ia lakou ke kokua ia lakou iho.”

            “He hana ia na ke Akua, o k ahooulu ana i na kumulaau amen a meaulu apau.”

            Minoaka iho la o Nikola, no ka pane a ke kaikamahine iaia, me kona ike ana iho no hoi, he mea makehewa wale no kona noke ana aku i ka hoakaka iaia, no ke ano a hikiwawe ai, a e maikai ai ka ulu ana o na kumulaau; no kela minoaka paha hoi, manao mai la ke kaikamahine opio, e hoohenehene aku ana paha keia iaia, o ke kau ae la no ia o ua kaikamahine nei i kona papale iluna o kona poo me ka iho ana ae a hoea i ke alanui, alaila pane mai la:

            “E hele ana au no ka Pohaku Eleele, nolaila e hahai mai oe mahope o’u,” o ke kaha aku la no ia o ua kaikamahine nei hele mamua, me na kainawawae mama o ka hele ana.

            Ku awiwi ae la o Nikola iluna, me ke ka’ika’i ana i kona paiki, a ukali aku la mahope o ke kaikamahine e hele la, eia nae, mamuli o ke kaumaha o kona paiki, a hui pu iho no hoi me ka maopaopa o kona mau wawae, aole e hiki iaia ke hahani aku mahope o kela kaikamahine, ahiki i kona kahea okoa ana aku.

            “Ea, he keu aku maoli ka mama o kau hele ana aohe o’u wahi mea a pilipili aku mahope ou e ae mai ana anei oe e hele pu aku au ma kou aoao, aole hoi maope aku nei ou e hahai ai?”

            “Aohe a’u ku-e ana aku no ia mea, ua hiki no ia o eke hele mai ma kuu aoao nei, a i hookahi ko kaua hele like ana.”

            Awiwi i’o aku la ua o Nikola ahiki i kona kaulike ana me kona hoa olelo o kela la o kana mea nae e ha’oha’o la aole he minoaka hou mai o kela kaikamahine iaia, ua lilo paha kona noke mau aku i ke kamailio no kona lilo i mea kokua i ka ulu ana o na kumulaau a hui pu hoi me kona minoaka ana, i ka wa o ua kaikamahine nei i olelo mai ai o ke Akua ka mea kuleana i ka hooulu ana i na kumulaau ua lilo ia i mea e nunuha ai kela kaikamahine a ke kaumaha loa la oia, no kela ano o ke kaikamahine opio oiai ua kauka’i aku oia, e lilo kela kaikamahine i hoaloha nona i loaa ai no hoi ke kamaaina o ka noho ana aku ma ka Pohaku Eleele.

            No @ hoomau ana nae i ko laua kamilio ana, hoololi ae la o Nikola i kana mea e kamailio aku ai ma ka pane ana ae:  “Malia paha, ole oe e ku-e mai ana ia’u ina e hoike aku ana au i ka mea oiaio maoli o ia hoi o kou leo kekahi leo u’i a nani maoli i ka himeni.”

            Ma kahi o ke kuoo o ke kaikamahine opio ike aku la o Nikola i ka pii ana ae o ka ula ma kona mau papalina alaila pane mai la iaia nei:

            “Alaila, na lohe mai ka paha oe i ko’u himeni iloko o ka ululaau ae?”

            “Ae, ua lohe au i kou leo himeni, mai kahi mamao mai ahiki wale i kou kokoke ana ae i kuu wahi e hoomaha ana a ua hoohalike aku au i kela leo me he leo la no na anela.”

            “Ua like anei ko’u leo me ko na anela?  Aole i maopopo mua ia’u he mea e ae kekahi mawaho o’u maloko nei o ka ululaau; a no ka pau ana mai o ka’u hana a oiai au e hoi ana no ko’u wahi, pela au i pono himeni wale ae ai no.”

            “Alaila i ka hana aku nei ka paha oe i keia la ea?”

            “Ae, i ka hana aku nei au, maloko o ka pa waina o Mr. Kakila.”

            “Pela i’o ka!  Pehea, he makemake no anei oe i kela ano hana?”

            “Aole o’u makemake i kela ano hana, aka i hele wale no au i ka hana, no ka malama ana i ko’u ola kino.  Pehea, aole anei he ano maikai  ole ko’u au e ike mai la?”

            Aole o  Nkola i maa i ke pahenehene mai o na kanaka iaia.  Ma kona Manawa e noho kuene ana maluna o ka mokuahi, e malama mau ana no oia i kona kulana keonimana me ka makukau mau i na pane kupono i na Manawa apau; no keia ninau hoi a ke kaikamahine minoaka iho la oia, a pane aku la:

            “No kou hele ana i ka hana ua lilo ia i mea hookahaha loa mai i ko’u noonoo, heaha la ka hana a na kane o keia wahi e noho nei?”

            “He nui no na kanaka ma keia wahi e noho nei, o ka pilikia nui nae, e hele mau ana lakou mai kekahi wahi a i kekahi no ka nana ana i kahi nui ae o ka ukuhana e loaa aku ana ia lakou.”

            “Akahi no a maopopo mai la ia’u a pehea he hana paakiki anei na Ionakaua Makuaiai ka huli ana i na kanaka na lakou e lawelawe i kana mau hana?”

            “O ka hapanui o na kanaka e noho nei me Mr. Makuaia, mai kahi e mai lakou, elike no hoi me oe i hele mai nei.  E aho iki mamua aku nei he loihi ka noho ana mai o na kanaka e hana malalo ona aka mahope mai nei, aole e emo, o ka pau no ia, a noho mai ana he poe kanaka hou.”

            No kela ninau, hele malie iho la ke kaikamahine opio, me ka nana ana mai hoi ma na maka o Nikola a pane ae ia:

            “E olelo mai ana anei oe, aole i maopopo ia oe ke ano o kau hana e noho aku ana malalo o kela kanaka?”

            “Eia no ka’u mea e hoomaopopo nei, o ia ka makaala ana aku i ka ulu maikai ana o na kumulaau a mawaho ae o kela hana o ia no ka noho luna ana aku maluna o na kanaka hana a pela hoi ka hooko ana aku i na kauoha apau a ko’u haku e kauoha mai ai ia’u.”

            “Ea, e kala mai oe, ina e ninau aku au i kou inoa ke kamilio wale nei no kaua, me ka maopopo ole ia’u o ka inoa e kahea aku ai ia oe.”

            “O Pita Nikola ko’u inoa,”

            “Eia no ko’u manao maoli e Mr. Pita Nikola e ike aku ana oe aole he maalahi o ka noho hana ana aku malalo o Mr. Makuaia, aka me ka hoomanawanui wale no e pono ai a o keia ke kumu loihi ole o ka noho ana o na kanaka e hana malalo o kela haku.”

            “O kena anei ka mea pololei e kuu hoaloha?”  wahi a Nikola ma kea no hoomaoe.

            No kela mau olelo a Nikola, ku honua iho la ke kaikamahine opio paa ae la no hoi i kona mau lima ma ka puhaka alaila noke ae la i ka akaaka me ka leo nui me ka huli ana aku nana iluna, a ua like aku no ka maikai o kona leo akaaka, elike me kona wa i himeni mai ai aia hoi o Nikola ke nana mai la i ua kaikamahine nei me na manao kahaha no ke kumu o kona noke ana i ka akaaka, a ia nana ana mai a ke kaikamahine opio ia Nikola pane mai la:

            “Ea, he kanaka Pelekane anei oe?”  wahi ana me kela mua no i ka akaaka.

            “Ae, he kanaka Pelekane au, aka pehea i hiki ai ia o eke koho mai i ko’u lahui pololei?”

            “O ka’u no ia i noonoo ai no ka mea ua ike au i kekahi kanaka Pelekane ma ka hale hana omole e hoopahenehene mau ana oia i na kaikamahine hoopepe.”

            “Alaila, ua noho hana ka paha oe maloko o ka hale hana omole ea?”

            “Ae, iloko o ka hooilo, ua noho hana au maloko o ka hale hana, i na omole bia, na omole kini ame wisako aka ua kapu nae ka waiona i keia Manawa, nolaila he hana paha i na omole kele, na omole waiu o na bebe, na mea e hana aku ai ma kela halehana ma keia mua aku.”

            “Heaha kau hana ma kela halehana?”

            “Maloko o ke keena ko’u wahi e hana ai; ua hiki ia’u ke kakaupokole, a e kikokiko no hoi maluna o ka mikini?”

            “Aole no hoi e nele kou hauoli i ka hala ana aku o ka hooilo a hoea mai ke kau mehana aole anei pela?”

            “Ae, no ka mea iloko o ka hooilo aole e hiki ia’u ke huli ae, me ka naha ole o kekahi mea.  E ike mai oe, o na mea apau e naha ana ia oe, e koiia mai ana oe e uku, he ku maoli i ka hoonaukiuki ke noonoo ae.”

            “Alaila, o ke kumu ka paha ia o kou noke ana i ka himeni, no ka naha ole ana o kekahi mea ia oe ea?”

            “Malia paha pela i’o, aka he makemake mau au i ka hele i kahi akea.  Aole loa he hana maikai, ka noho ana iloko o kekahi wahi paa.”

            Ke hoomau la o Nikola ma i ka hele ana imua, ua akakuu mai la hoi ka hele ana a ke kaikamahine opio, a no ko laua nanea maoli i ke kamailio, aole he ike iho o ua o Nikola i ke kaumaha o kona paiki.,

            “Owau ka i hoike aku nei ia oe i ko’u inoa, nolaila e oluolu ana anei oe e hoike mai i kou inoa ia’u?”

            “Ke manao nei au, aole he mau kumu maikai ole a’u e hooko ole aku ai i kau noi, he mea maikai no ka maopopo ana o ka inoa o kekahi i kekahi.  O Beka Kamerona ko’u inoa.”

            “O kou kekahi o na inoa maikai loa, ua kulike maoli no kou inoa me kou ano.  Pehea, e ae mai ana no anei oe e hele aku au no kou wahi i kekahi manawa?”

            “O ka poe o ke kulanakauhale, aole o lakou maa i ka hoopau wale i ko lakou Manawa.  Ua kapaia mai makou, ka poe o kuaaina nei, he poe kuaaina, aole no o makou noonoo no ia mea; o ko makou ano iho la no ia; aole no o makou pilii wale aku, me ka poe o ke kulanakauhale.  Ma ka’u koho aku, aole ou nana i ke ano o kau poe e launa aku ai.”

            “Nou e ke kaikamahine opio, ke hauoli loa nei au, e lilo oe i hoaloha no’u.”

(Aole i pau.)