Ka Nupepa Kuokoa, Volume LIX, Number 50, 16 December 1921 — Page 4

Page PDF (1.44 MB)

This text was transcribed by:  Tapi Koahou
This work is dedicated to:  Tapi Koahou

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA HONOLULU, T.H., POALIMA, DEKEMABA 16, 1921

NUPEPA KUOKOA

SOLOMON HANOHANO, LUNAHOOPONOPONO    HOOPUKAIA I NA KAKAHIAAKA POALIMA APAU

  POALIMA                                                                                       DEKEMABA 16,1921

E HOOKOIA KE KANAWAI

HELEPO E PONO AI.

            Aole loa he kuleana o na keikikane ame na kaikamahine e hele ai ma na alanui o ke kulanakauhale nei i ka po, pela hoi ko lakou noho ana ma na halekuai, a maloko o na hale kiionioni, ke hele pu ole lakou me na makua.  Ke ku nei he kanawai o kela ano, no na kamalii, aka nae, aole he hookoia, pela i nui ai na hana ino e lawelawe mau ia mai nei ma na wahi like ole o keia kulanakauhale.

            Ma ka po o ka Poakolu aku nei o ka pule i hala, i hoopilikia aku ai kekahi poe kaikikane e noho ana ma Moanalua ae nei, i ka halekuai o kekahi Kepani malaila, ma ka lawe kolohe ana i akana pahu apala, eia nae, e ioaa aku ana he haawina a’o kuopno ia lakou, mamuli o ko lakou laweia ana ae imua o ka oihana makai, a mamuli wale no o na hooponopono maikai ana, i hookunia aku ai kela poe keiki.

            He ehia nae, poe keiki opiopio o keia ano, i hoolilo i na hora o ke ahiahi ame ka po, i manawa no ka lakou mau hana ino, a hoopilikia aku ia ha’i?  Ma ka manaoio o keia pepa, ua puni ke kulanakauhale nei, i na keiki kolohe o kela ano, ua hooliloia aku na keiki liilii, i mau meapaahana na na keiki nunui, me ka lohe mau ia o na hoohalahala, no na hana ino ame na hana kolohe a na kamalii, nokeaha mai nae ke kumu o keia mau hana kolohe?  No ka hooko ole ia o ke kanawai hele-po, me ka ikaika, e wiwo ai na kamalii.

            Aia kahi o na keikikane ame na kaikamahine ma ko lakou mau home, ma na manawa o ka po, e hoopaa ana i ka lakou mau haawina; e lawelawe ana paha i kekahi mau hana o na home, aole hoi o ka maauhele ana na alanui, a maloko o na hale kiionioni.

            Aole nae e hookau wale ia aku no na ahewa ana maluna o na kamalii, no ko lakou hele me na alanui i ka po. a lawelawe aku paha i nha hana kolohe, a hakihaki kanawai, aka maluna pu kekahi o ko lakou mau makua, no ka hookuukuu wale i ka lakou mau keikik aole he a’o me ka ikaika, e noho ma na home, e hooppaa ai i na haawina; mamuli iho la o keia kumu, e hoeueu nei keia pepa, he mea pono loa e hookoia aku ke kanawai, me ke kui’o, i loaa ai ka palekana, ame ka maluhiak o kekahi mmau wahi, mai na keiki kolohe mai; a i’lilo ai no hoi na keikikane ame na kaikamahine, i mau makaainana maikai makeia mua aku.

            O na hale kiionioni na halekula e hoonaauaoia nei na keiki, i na hana ino o na ano like ole; o na ike e loaa mai ana ia lakou, mailoko mai o kela mau hale kiionioni, o ka lakou ia e hoohana aku nei, me ke kui’o maoli, e lilo ai lakou i poe keiki hakihaki kanawai; a e lilo pu8 aku ai i poe hana karanna, i ko lakou wa e kanaka makua ae ai @aka ina e papa loa ia ka hele ana o na keiki i ka po, o ka oi loa aku maloko o na hale kiionioni, e hapa loa ana, ka ikeia a na hana kolohe ma na wahi, i hoopilikia mau ia e na kamalii.

            Ma na mea oiaio i loaa mai i keia pepa, aia ma Moanalua kahi o kekahimau hana kolohe a hakihaki kanawai, i lawelawe mau ia e na keiki o kela apana, a no ka hoolilo ana ia kalou i mau makaainana maikai ma keia hope aku, he mea pono no i na makua, ke a’o me ka ikaika ia lakau, e hoopau i kela mau hana ino, o i uuku, a e hoonoho ia lakou ma na home, o hoea mai auanei ka manawa, e hiki hou ole aku ai ke a’o ia lakou, a o ka hopena e oili mai ana, he hopena ia, e ili aku ai na hookaumaha ana, aole wale i kela poe keike, aka maluna pu kekahi o ko lakou mau ohana.

            O ka keia pepa nae e iini nui nei, a e hoeueu pu aku nei hoi, e hookoia ke kanawai, i hanaia no ka hele ana o na kamalii i ka po, e ka oihana makai; aole hoi o ka lilo o ke kanawai, i mea hoonani wale no maloko o na buke kanawai; aka e ikeia ka waiwai o ke kanawai, a e hookloia hoi ko kakou iini, e lilo na keiki, i pio makaainana maikai, a hoolohe i ke kanawai, ma keia hope aku.

 

NA HOOKOHU LUNAKANAWAI HOU.

 

            Ua hoouna ae ka Peresidena-Harding, i ka inoa o Frank Andrade ame John R. Desha, i mau lanakanawai, no ka aha kaapuni o, Honolulu nei; i hakalia wale no ko laua lawe ae i ko laua mau kulana oihana pakahi, i ke apono mai o ka aha senate o ka ahaolelo lahui.  E haawiiana hoomaikai ana, no keia mau loio o Hawaii nei,” no ke kiloo ana mai la o ka Peresidena o Amerika Huipuia ia laua, i mau lunakanawai kaapuni.

            No Frank Andrade, ua kamaaina loa oia ma ka oihana loio, oia kekahi o na loio i mahalo nui ia, no kona makaukau, a no kona hoopono; ua paa oia i kekahi mau kulana oihana, me ka hooko ana i na hana apau i pili ia mau oihana me ka maemae, a i kona waeia ana ae, maiwaena mai o ka lehulehu o na loio ma keia kulanakauhale, i pani ma kahi o ka Lunakanawai Franklin, aole i kuhihewa ia waeia ana, aka ua nanaia aku oia, mamuli o ka moolelo o kana mau hana i lawelawe ai o ka wa i hala, he moolelo hoi no kona mahaloia, ma ia ano iho la, aole i makehewa na hilimai ana i hookauia aku maluna ona, uo keia kulana oihana hou.

            No John R. Desha, he kanaka opio oia, e lawelawe mai nei i ka oihana loio ma Hilo, a he lunakanawai elua no ka aha apana ma Hilo, i kona hookohuia ana mai nei e ka Peresidena Harding, i lunakanawai kaapuni, no ka aha hookolokolo hou, i kukuluia ae, e ka ahoaolelo kuloko, o ia hoi, ka aha hookolokolo i pili i na hihia o ka noho ohana ana, e haawi aku kakou i na hoomaikai ana iaia, a ie loaa pu hoi ka manaolana ia kakou, e hiki ana iaia, ke hoopiha i kela kulana oihana, me ka mahalo nui ia.

            Aole nae he kumu e ae, o ka hookohu ana mai o ka Peresidena i keia mau keonimana, ma ko laua mau kulana oihana pakahi, aka mamuli no ia o ka hooia ana aku, ame ke apono ana a ke komit kuwaena Repubalika maanei nei; nolaila e ike mai kakou, aia he mana iloko o ke kalaiaina; ina aole pela, ina ua hookohuia mai kainoa a ka papa loio Hawaii, i kakoo aku ai, a pela hoi ka inoa a na ahahui o na wahine o keia kulanakauhale i kakoo aku ai no ka aha hookolokolo hou.

            Malia paha, e eha ana na wahine i kakoo aku i ka inoa o Miss Ashford, no ka hookohu ole ia ana mai o ka lakou inoa; he eha nae ia e ola ai, mamuli o ka hookaakaaia ana ae o ko lakou mau maka, he mea pono, e komo mai lakou iloko o ke kalaiaina, aole hoi o ke kauka’i maluna o ko lakou heluna, a kulana ko’iko’i paha iloko nei o ka aina.

 

E LOAA HE HAAWINA A’O KUPONO

 

            Ma ka pule aku nei i hala, ua hoike aku keia pepa, i ka hana kupono loa e hookauia aku maluna o na kiakaa holonui, me ka nana ole i ka pono o ha’i, o ia no ka hookau ana aku i na hoopa’i hoopaahao maluna o lakou.  Ma ke Sabaati koke aku la no, i haawai ai he Kepani me ka make, a pakele mahunehune mai ke ola o kekahi poe e ae, mamuli o ka ulia i loaa i ke kaa oto kalaka; no ka holonui mai no ke kumu; nolaila i wahi e hoemiia mai ai na ulia, ame na poino, pela keia pepa e hoeueu hou aku nei he hana kupono loa ka haawi ana aku i mau haawina a’o i na kiakaa otomobile, i loaa ai ka palekana o ka poe e kau ana maluna o na laa otomobile.

            Ua nui ke kamailioia o ke kumuhana pili i na ulia kaa otomobile, i ike mau ia ma na huli kuaaina aku nei o ka aina, me ka hoala pu ia ana ae o kekahi manao, e hoonoho i mau makai, no ke kiai ana i ka poe hakihaki kanawai.  He hana maikai no keia, malia paha, he mea no ia e hoemiia mai ai na ulia ame na poino; aka nae, ke manaolo nei keia pepa, ina e hookauia na hoopa’i ko’iko’i loa, maluna o ka poe kiakaa e ikeia ana ko lakou holonui; e laa ka hoopa’i dala me ka hoopaahao pu, ua lawa ia no ka haawi ana i kekahi haawina a’o, e wiwo ai na kiakaa otomobile apau.  me ke kauka’i ole aku no ka makaala mai o na makai.

            Eia ponoi maloko nei o keia kulanakauhale, na kiakaa i noonoo ole aku no ka ha’i pono, a i hoolilo i ke kanawai pili i na kaa otomobile i mea ole; na ka poe o keia ano, ua ku a maka’u maoli ka lehulehu, mai ka poe helewawae, a ka poe no e hookele ansa i na kaa otomobile;’ i wahi nae e palekana ai ka lehulehu, a e palekana pu ai na ohua e kau ana maluna o na kaa, o kela mau kiakaa, e lilo na hoopa’i ikaika, i mea no lakou e wiwo ai, a e akahele mai ai ka hooholoana i ko lakou mau kaa.

            Nui na make o na manawa ae nei i hala i na kaa otomobile, nui pu no hoe ka poe i eha, a i pakele mahunehune mai ko lakou mau ola, mai na ulia kaa otomobile mai; malalo o ka holonui o na kiakaa; ua lawa loa keia mau pilikia ame na poino maopopo, e konoia aku ai na luna oihaina, ia lakou ke kuleana ame ka mana hoopa’i, e kau mai ai i na hoopa’i ko’iko’i, ma ke ano i mea e a’oia ai, ka poe hakihaki kanawai, me ka manao hookiekie.

 

E HOOMANAO MAI I KE OLA O KA NUPEPA.

 

            He elua helu i koe o ke Kuokoa nei e puka aku ai, o ka pau no ia o keia makahiki, a komo aku kakou i ka makahiki hou.  O ka poe e noho aie nei, no keia hapa hope o ka makahiki e pau ana, e pono lakou e hoomanao mai i ko lakou aei, a no ka poe hoi i uku i ka lakou pepa, a ka la hope o keia mahina, o lakou kekahi e nonoua aku nei, e hoomanao mai i ka uku o ka nupepa, no keia makahiki ae.

            Ke manao nei makou, aole he mau pohihihi i koe, no ka auhau o ka nupepa no ka-makahiki hookahi; o ia hoi he eha dala me ka hapalua ($2.50), a he hookahi hoi dala me ka hapaha (%1.25), no eono mahina; ua hoomaka mai keia hoopii hou ana ae i ka uku o ka nupepa mai ka la i mai nei o ka mahina o Augate.

            I ka hoouna ana mai no hoi i na hookaa dala ana, e hoakaka pono mai i ka inoa, elike me ia i kauia mawaho o ka wa-hi o ka nupepa; i pololei ai ka hana ana aku i ka likiki hookaa, o ka oi loa ae nae, o ia no ka hoouna hou ana mai i ka pepa hoike aie, he hoomaalahi ana mai hoi ia ma ko makou aoao, me ka luhi ole i ka huli ana aku i ka inoa maloko o na buke, oiai ua maopopo mua ka inoa, maluna o na pepa hoike aie, i hoouna hou ia mai i keia keena.

            I ka manao ana no hoi o kekahi, e hoololi i kahi o kana nupepa e hoouna aku ai, he mea pono, e hoike mai, i kahi mua o ka nupepa e hoounaia ana, i pololei ai ka huli ana aku maloko o na buke i ka inoa, aole o ke kauoha wale mai no e hoounaia aku ka nupepa ma kahi hou, ma kela ano, he hana pohihihi loa, ka huli ana aku i kahi mua e hele ana o ka nupepa.

            Ina aole he hoea pololei aku o ka nupepa, mai hoohakalia i ka hoike koke ana mai i keia keena, i hiki ai ke hulua aku kahi i hele lalau ai o ka nupepa.

 

Nuhou

Kuloko

 

            Ma keia Poakahi ae e waeia ai na kiure, no na ahoa kaapuni, no keia makahiki e hoea mai ana.

           

Ua hoopaneeia ka hoopuka ana aku i kekahi mau palapala a na makamaka, a loaa kahi kaawale o ka pepa.

            Ma ka hora ekahi o ka auwina la o keia Poakahi ae, e noho mai ai ka halawai a ka papa o na lunakiai.

            No ka ike mau ia i ka ona o na koa ua hoomahuahuaia ae kahi i hookapuia no na koa, maloko nei o keia kulanakauhale.

            Ua hoopii koi pohoia ae ka Hui Honolulu Gas Co., e John N. Keola no ka make ana o na i’a maloko o ka lokoi’a ma Iwilei i ka huina o $4000.

            He aha hulahula nui ka ka Hoomana Naauao o Hawaii e haawi ana oialoko o ka hale o ka Outrigger Club ona Waikiki ma ka po o Dekemaba 17, o ia ka la apopo.

            Mahope iho o ke keawa’i ana no kekahi mau mahina lehulehu ae nei i hale, i panaho mai ai o Mrs. Solomon Mahelona i keia ola ana maloko o ka Leahi Home, ma ka Poakahi iho nei.

            Ma ka Poalahi iho nei, i hookomoia ae ai he palapala noi, no ka aeia aku e kukulu o Harold K. L. Castle i hale nona naluna o Mokapu, Koolaupoko, i hiki aku ke kumukuai ma kahi o ka $7920.

            No ke kikoo ana o Nicol i na dala iloko o ka banako a oi aku mamua o ka huina o na dala e waiho ana maloko o ka banako i paa ae ai oia i ka hopuia ma ka Poalua nei e ka Makai Nui Rose.

            Ma ka huli Koolau aku nei, ka ikaika loa o ka ae, o ka haule ana iho ma ka Poakahi ame ka Poalua nei, elike me na hoike i loaa mai i kola kulanakauhale, me ka nui ole me o na poino i loaa.

            Ma ka Poakolu iho nei, i wehe hamamaia ai ka hale hou o ka hui o Davies ma, no ka makaikai ana o ka lehulehu, ma kona mau koena apau.  O keia kekahi o na hale oihana nui loa, me ke ku hoi i ka nani, maloko nei o keia kulanakauhale.

            He hookahi mea i paa ae i na makai i ka hopuia ma ka Poalua aku la i hala, malalo o na kumu hoohuoi, no ka aihue, i hanaia maloko o ka halekuai lolo o Makanani, a lilo aku na kaukuni dala ma ka po o ka Poaono aku nei i hala.

            Ma ka Mauna Kea o ka Poakolu nei i kau aku ai ke Kakauolelo Komisina o na Home Hoopulapula Hawaii Geo. P. Cooke no ka holo ana aku e hui me na hunakiai o ke Kalana o Maui no na mea e pilo ana i na alanui o Molokai.

Ma ka hoike i loaa mai ma ka Poakahi iho nei i keia kulanakauhale, mailoko mai o ka huina o $125,00 ma ke gula, o ka aihueia ana maluna o ka mokuahi Sonoma, he umi wale no dala i koe, i loaa ole mai, o ka nui ae o na dala, na pau loa i ka loaa.

            Ma ke ku ana mai o ka mokoahi Sonoma no Honolulu nei, hookahi ona kuhoe i kau ole mai maluna o kela moku, ua hoohuoiia, oia ka meanana i aihue i na dala mailoko aku o kela mokuahi, a ua hoopukaia ae hoi he palapala hou nona.  Ua pau loa ua dala i ka loaa, malalo o ka huli ana a na makaikiu.

            Ma ka huakai aku nei a ke Kakauolelo Cooke o ke Komisina Home Hawaii ame ke Komisina Kalanianaole no Hawaii, no ka nana ana i na aina o Keaukaha ame Panaewa, i ikeia ai ka nui maole o ka pohaku o kela mao aina, aka nae ua kupono no kekahi mau wahi e liloi i mau home no a Hawaii e noho ai.

            Mamuli o ka nui o no uila kaa otomobile e ike mau ia nei, ma ke alanui holopuni mawaena o Honolulu nei, ame Waialua, ua manaoia, he ekolu mau makai kau mokokaikala, e hoonohoia aku ana ma na wahi like ole o ke alanui, no ka makaala ana i ka poe holonui i ko lakou mau kaa otomobile.

            Mamuli o ka oi loa aku o na hoolilo mamua o na loaa, o ka oihana wai, o ke Kulanakauhale a Kalana o Honolulu nei i hooholo ae ai ka papa lunakiai, e hoomahuahua hou ae i ka nuhau wai, me ka waihoia ana aku i ae o ka noonoo ana mai i kela hana. iloko o ka lima, o ke komite o ka oihana wai.

            O na heihei moku liilii, i manaoia ai, e malama no ka hoomanao ana i ka la hanau o ka Moi Kalakaua, e mallamaia ana ia ma keia Sabati iho, maloko ae nei o ke awa, elike me ia i hoikeia mai i keia keena.  Aohe hewa o ka hele ae e mana i kela heihei.

 

Nuhou

Kuwaho

 

            WAKINEKONA,Dec. 8.-----He huina o 222 mau moku kalepa Amerika no lakou ka huina nui o na tona 122,397 i make iloko o ka moana iloko o na mahine he 12 e pau ana ma ka la 30 o Iune i hala, elike me ia i ikeia maloko o ka hoike makahiki i hoolahaia ae i keia la.  Ma kekahi mau ulia e ae he 555 ka nui o na moku i poino ma ka manawa o ke piholo ana o ehiku mau moku lawe ohua iloko o ka makahiki he 306 mau ohua i make a o ka huina nui o na poho mamuli o na ulia maloko o ke kai iloko o na mahina he 12 ua hiki aku ka huina i ka $32,932,031.

            KIKAKO,Dec. 9----Ua hookapuia na wahine aole e puhipaka maloko o na rumimoe o ka halekula nui o Kikako mamuli o kekahi kauoha i hoopukaia mai e ka peresidena o ke kula Henry P. Judson.

            LITTLE ROCK, Dec. 10.----Ua loaqa aku ke kino o Tom Slaughter i kekahi mau makai i keia la, ka paahao i kaulana i keia la, ka paahao i kaulana i ke ino, a i kiia ai a make o kekahi paahao ana i hookuu ai mai ka halepaahao mai, ma ka po nei, mahope o kona noho mana ana maluna o ka halepaahao no elima hora me ka hoomakaukau aku i na paahao ame na ieai o ka halepaahao me ka waha o ka pu panapana i hookomo malu ia aku iloko o ka halepaahao a loaa iaia.

            WAKINEKONA, Dec. 9.------E hoakaka ana ka lono kelakalapa o ka loaa ana ae i ke keena Kanikela Kepani mai Tokio mai, he olai ikaika i ike ole ia iloko o na makahiki he iwakalua i hala ka i ikeia maloko o Tokio ma ka la 8 o Dekemaba.  I kulike me ka hoakaka a ia lono lehulehu na hale i hoopoinoia o ia olai.

            Lehulehu na kanaka i eha i na hale i hiolo, wahi hou a ia lono, a mai na kumu like ole mai, oia nae aole mea i make i hoikeia saku i ka oihana makai mamuli o ia olai.

            WAKENEKONA, Dec. 9.----- Ua loaa i na Elele Pake ame Kepani i hoea mai i ka ahaolelo hoemi lako kaua ma kekahi ahakuka i keia la kekahi aelike no ka hooponopono ana i ka ninau e pili ana ia Kiao Chow, ma ia aelike e hoihoi aku o Iapana ia Kina i na aina aupuni apau i hoopaaia maloko o ke kuleana hoolimalima.  No Kina hoi ma kekahi aoao ua ae oia e hoihoi aku i na lilo a pau o Iapana no na hana hou apau i hanaia maloko o ia apana.  Ua hooholoia o na halekula, na pailina ame na halepule i kaawale mai na ano ae i maa ia Iapana a e ku ana maloko o Kiao Chow e pili no me Iapana.

 

NA MARE.

 

            Joe De Silva ia Clara Gregory, Dec., 3.

            Amoka L. Kauahi ia Makaooka Wikoli, Dec., 3.

            Manuel Kapaki ia Mary E. Kaia, Dec., 7.

 

NA HANAU.

 

            Na Frank Vanghan ame Rebecca Lam Lung, he kaikamahine, Nov., 22.

            Na S. B. Cummings ame Philemina Kamak, he kaikamahine, Dec., 3.

            Na Jos. Kaina ame Sarah Kahoilua, he keikikane, Dec., 3.

            Na Benj. M. Kane ame Annie Crowell, he keikikane, Dec. 9.

            Na Benj. T. Sills ame Mary Alan Yuck, he keikane, Dec. 11.

            Na Samuel W. Yuan ame Emma Ai Chang, He keikikane, Dec. 11.

            Na Mr. ame Mrs. Abraham Ahakuelo, he kaikamahine, Dec. 13.

 

NA MAKE

 

            Kaahaaina K. Hoopii, ma ka Halema’i Moiwahine, Dec. 5.

            Puali Keawe, ma ke alanui Laimi, Dec. 7.

            David K. Daaihue, ma ke alanui Paku’i, Dec. 7.

            Esther Palakiko, ma ke alanui Alapai, Dec. 8.

            Kick K. Richard, ma ka Pua Lane Dec. 8.

            Thelma Anna, ma ka Halema’i o na Kamalii, Dec. 9

            Sam F. A. Kahaulelio, ma ke Awawa o Pauoa, Dec. 9.

            Margaret Sun, ma kauhale o Yamane, Kalihi, Dec. 10.

William Kalama, Jr., ma ke alanui Ohua, Waikiki, Dec. 11.

Antone Moses, ma ka Home Leahi, Dec. 11.

Mrs. Nancy, A. Mahelona, ma ka Home Leahi, Dec. 12.

Kaluahine Kalawaianui, ma ka Home Lunalilo, Dec. 12.

A. P. Kelekoma, ma ka Lakimanu Tract, Dec. 12.

Akit Akana, ma ka Home Leahi, Dec. 13.

Becky Kahele, ma ka Halema’i Moiwahine, Dec. 14.

 

HALE O NA ALII O HAWAII

 

           

E malamaia ana ka halawai kumau o ka Hale o na Alii o Hawaii (Ahahui Poo) ma kela Sabati, Dekemaba 18, ma ka Phoenix Hall, hora 2 p.m.  He hoolaa mamo hou kekahi.

Ma ke kauoha a ke Iku Hai.

WM. J. OOELHO,

Iko Kam@

6482----Dec. 16.

 

NEW PALAMA THEATER

“KA HALEKEAKA NANI MAWAHO AKU O HONOLULU”

Hoikeike auwina la meke ahiahi.

Sabati---Harry Oarey iloko o “THE WALLOP”

Poakahi---Louise Lovely iloko o “PARTNERS OF FATE.”

Poalua---Alice Lake iloko o”OVER THE WIRE.”

UKUMOKU:10, 15,20,30 keneka.

 

EMPIRE

Heikeike mau i na la apau.

Poaono---10 a.m. a 10:15 p.m.

Paani Hou---“THE WHITE MOLL,”Pearl White Starring.

Hoomaka i ke Sabati---“LAND OF JAZZ,” starring, Eileen Percy.

Hoomaka ma ka Poakolu---“William Farnum” iloko o DRAG

HARLAN.”

UKIKOMO---15, 25, 40 keneka; ukuia ka auhau kaua.

 

HAWAII

Hoikeike ao, Poakolu, Poalima 12 m. a 4:30. Ahiahi, 6:30 a 10:15.

Hoikeiki mau ma ka Poakahi, Poulua Poaha, 12m. a 10:15

Hoikeike mau ma ka Poaono, 10:30 a.m. a 10:15 p.m.

Elua hoikeike ma ke Sabati, 6:30 ame 8:30.

Paani Hou---May Allison iloko o “BIG GAME.”

            Hoomaka i ka Poalua---J. Warren Kerrigan iloko o “WHITE MAN’S CHANCE.”

UKUKOMO: 15, 25, 40 Keneka; ukuia ka auhau kaua.

 

LIBERTY

Hoikeike ao i na la apau, koe ke Sabati hora 2:45; Ahiahi 7:45.

Elua hoikeike ma na Poaono, Sabati me na la kulaia, 6:30 ame 8:30.

Paani Hou ---“FOOLISH MATRONS,” he Hoikeike Hookuku Maurice.

Hoomaka i ke Sabat5i---Wallace Reid iloko o “THE HELL DIGGERS,”

            Hoomaka i ka Poaha---Elsie Ferguson iloko o “FOOTLIGHTS.”

Okulomo; 25, 40 keneka, Noho i hookaawaieia 60c.  Kelepona 5000.

           

O NA HAWAII

            i makemake i ka pomaikai o ke Kanawai Hoopulapula o Molokai e hoolako ia lakou iho no ka holomua ma ka loaa ana ia lakou o na Iako Mahiai me Hanai Holoholona ma keia hui kamaaina.  Ke malama nei makou i na Iako hana maikai loa, pela hoi me ka Pena Sherwin-Williams, ka mikini uwi waiu De Leval ame na lako pili i ka home o na ano apau.  Maloko o ko makou Keena o na Lako Paani e loaa no he ahua o na pu liilii ame na raifela maikai.

E. O. Hall & Son, Ltd.

 

O ko lakou ano ka mea nana i hoololi i ke kumukuai o na Cigarita

BEECH NUT

CIGARETTES

Aole e nele kou makemake ia lakou!

20 no 15c

Lanilaird Co.