Ka Nupepa Kuokoa, Volume LIX, Number 50, 16 December 1921 — Page 3
| This text was transcribed by: | Tapi Koahou |
| This work is dedicated to: | Lauren Taito |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, HONOLULU, T.H., POALIMA
HE 60 PAKENEKA ALEKOHOLA ILOKO O KA OKOLEHAO.
Ma ke ainaia ana o ka ikaika o ka okolehao maloko o ka halema’i ma ka Papu o Kahauiki e na kauka akeakamai, i loaa ai ka ike ia lakou he 60 pakenaeka alekohola iloko o ka okolehao a he uuku loa ka aila hoohehee.
O kela ka hoike i hoopukaia ae e ka Lukanela Konela
S. O. Fuqua, ke poo o na kanaka akeakamai o ka oihana koa ma Hawaii nei.
Aole i pau ka huli pono ia ana no na mea e pili ana i ka okolehao. Elua mahina i hala aku nei eono mau omole okolehao i loaa a i laweia aku iloko o ka halehana o na kauka ma ka halema’i o ka Papu Kahauiki e kekahi o na makai o ka oihana koa. He mau omole i kailiia mai kekahi mau koa aku i hoiuia maluna o na alanui o Honolulu no ka ona.
O ka hoike i hoakakaia ae la maluna o ka hua ia o ka huli a anaia ana o elua mau omole okolehao o eono mau omole i hopuia ai. Ma ka hoakaka a Lukanela Fuqua he liilii loa ka aila iloko e ka okolehao ma ka manawa i anaia ai, eia nae, aole no i oi aku mamua o ka aila i ikeia maloko o ka waiseke i bonaia.
Ma ka hoaoia ana o ka ikaika o ka okolehao ua ikeia aia mawaena o ke 50 ame ke 60 pakeneka alekohola, dke pakeneka kiekie loa i oi aku mamua o na waiona maikai loa i hanaia ina na aina e.
Ma ka hoakaka a ke Kapena Z. E. Bolin, ke kauka iaia ka mana o ka hookele ana i na hana maloko o ka rumi kauka o ka halema’i o ka Papu Kahuiki, o ke kumu mai o ka hikiwawe loa o ka ona o ka poe inu i ka okolehao no ka ikaika loa o ka alekohola iloko, a wahi hou ana o ka okolehao e inuia mai nei aole i hoomaemaeia a ua nele no hoi i na hunahuna maikai loa iloko ona elike me ia e hanaia ai e ka poe hana waiona akamai loa.
O ka like ole wale no i loaa i ke Kapena Bolin ma kana ana ana i ka okolehao o na omole elua ana o ke ana ana oia ka lenalena o ka wai, ma ka ikaika a pela hoi me ke degere o ke ano o ka wai aneane no elike loa. O ka aila hoohehee iloko o ka okolehao aole ia he mea hoopoino elike me ia a kekahi poe i manaoio ai, pela ka oleloia.
KOHOLA O BIGELOW I KOMISINA NO NA HANA HOU.
Ma ka halawai a ke komisina no na hana hou o ka apana o Waikiki o ka noho ana ma ka Poakahi nei, o ka lunahoohana o na hana hou o ke Teritore Lyman H. Bigelow ka i kohoia i lunahoomalu no ke komisina. O na hoa e ae oia ka Meia John H. Wilson, Fred Orht, ka enekinia kulanakauhale, A. A. Young ame George P. Denison.
O ke kumuhana a ke komisina o ke kaheaia ana e noho ma ka auwina la o ka Poakahi nei no ka noonoo a koho ana no ia i lunahoomalu no ia komisina, ame ke kukakuka ana maluna o kekahi mau, hana hoolala mua no ka pono o ka hana nui e hookeleia aku ana ma Waikiki ma nei mua aku.
O ka hana nui a ke komisina o ka noonoo ana o ia no na mea e pili ana i na alahaka ame na alanui maloko o ka apana e hookeleia aku ana o na hana hou.
O ka $12,000 i koe mailoko ae o ka huina o $20,000 i hookaawaleia ai e ka ahaolelo no ke komisina mua ke hoohanaia aku ana no na hoolilo o ke komisina.
HE HOOMAIKAI.
No na hana i ku i ke aloha hoahanau ame ka mahaloia, ke ku kiai ana i ke kino wailua o ka makou mea i aloha nui ia, na hoohiwahiwa ana hoi ame ka lawe ana aku i ke kino o Mrs. Mele Kaholi, Lovell a hoomoe me ka maikai ma ka ilina, ame na kokua manawalea a ka ahahui i ka ohana o ka mea i haalele mai la i keia ola ana, ke haawi aku nei ka ohana o Mrs. Mele Kaholi’i na hoomaikai kiekie i ka Ahahui Ka Hale o na Alii, a pela hoi i na makamaka ame na hoaloha i kumakena pu a i haawi mai i ka lakou mau makana pua nani no ka hoohiwahiwa ana iho i ke kino wailua o ka makou mea aloha i haalele mai i keia ola ana, a na ka mana ame ka malu mai ka lokomaikai mai o na lani e kiai a e hoomalu mai ia kakou i na la apau o ko kakou ola ana ma keia ao inea.
NA KA OHANA,
MARQNETTE Dec. 12.--- Iloko o ka manawa o ka ulu ana ae o kekahi haunaele maloko o ka halepaahao maanei i nehinei, ua oki a houia mai o T. B. Catlin, ka lunapaahao me ka pahi no eiwa manawa, a hahauia mai me na panku lapu ka hope lunapaahao o Fred Menhennit ame kana keikikane, a o Arhtur ka i houia mai ma ke akemama, o keia ke mea i ikeia ma keia la. He kulana nawaliwali loa ko ka lunapaahao Catlin, eliki me ka hoike, a ua kauohaia na komisina o ka halepaahao ka hili ana i na alakai o na paahao me ka huipa.
MAKEMAKEIA.
Elua kaikamahine no na hana o ka home me ke kuke mana.
LUKANELA CASSIDY.
Fort Ruger.
PAA HE OPIO I KA HOPUIAME KA OPIUMA.
He opio Kepani o K. Osaki ka inoa, a nona hoi na makahiki he 18, ka i ka’ihuluhuluia ae i ka halewai ma ka auwina la o ka Poaha aku nei i hala, no ka loaa ana aku o kekahi opiuma i hoomakaukauia malalo o kona malu.
I ka manawa i hoea aku ai o C. R. Frazier, ka luna o na loaa kuloko, a komo aku la iloko o ka hale o A. Band ma ke alanui Hawaii, ilaila i loaa aku ai ka opio me ka opiuma i hoomakaukauia no ka ha’uha’u ana aku me kekahi mau opiuma iloko o kekahi kini. O ia mau no ka wela o ka ipapaka puhi
opiuma, wahi a Frazier o ka hoike ana ae. Ua paa o Band i ka hopuia a lawe pu ia ae me ka opio no ke kaena hana o Allen, a malaila o Osaki i ninaninauia ai a ua hoike ae oia i na mea apau o ke kolu ia o kona manawa o ke puhi opiuma ana maloko o ka hale o Band.
Wahi a na luna aupuni hopuhopu opiuma o ka hoike ana ae, ua ninaninauia o Band e lakou, a ua hoike ae oia i ke puhi opiuma ana o ka opio, ua hoole nae oia i ko ke keike puhi opiuma ana mamua aku. O na opiuma apau i hoomakaukauia ua pau loa i ka hapukuia mai e na makai hopuhopu opiuma.
Ua haawiia ae keia mau paahao elua i ka aha hookolokolo teritore a malaila i kauia mai ai na bona malun o laua, he $100 no Band a he $25 no Osaki.
O Osaki ka lawehala opiopio loa i hopuia e Mr. Allen no ke puhi opiuma.
E HAMAMA ANA KA PUKA AHIKI I KA HORA 10 O KA PO.
Ua lilo ke komoia ana e aihue o ka halekuai o Makanani a lilo he mau kaukani kala ma ka po Poaono a ma ka po Sabati iho nei paha, a iloko hoi o keia kikiua Kalikimaka ka manawa a na kanaka mea halekuai e hana ana me ka puapuahulu a hookomo aku i ka lakou mau dala o ka ohi ana mai ma ka po Poaono iloko o napahu hao waiho dala, i kumu na ka Banako o Hawaii i noonoo a i hooholo ai e wehe hamama i kona mau ipuka ma na ahiahi apau ahiki i ke Kalikimakai i hiki ai i ka poe mea halekuai ke hoihoi aku i ka lakou mau dala malaila e waihe ai, kahi o ka maluhia.,
Mai ka hora 8:30 o kela ame keia ahiahi e wehe hamama ai ia banako i kona mau puka ahiki i ka hora 10 o ka po.
He hana keia i hooholoia no ka pomaikai o ka poe e hoihoi mau aku ana i ka lakou mau dala iloko o ia banako a pela hoi me kekahi poe e ae e makemake ana e hoihoi aku i l ka lakou mau dala malaila e hoahu ai kahi o ka maluhia, no ka mea he makemake no kekahi poe e hoihoi aku i ka lakou mau dala o ka ohi ana mai ma ke ahiahi Poaano, a oiai ua paa mua na hale banako pela i waiho ai i na dala maloko o na pahuhao, maloko o ko lakou mau halehana iho,k o ke komoia ana e aihue o ka halekuai o Makanani a lilo aku he mau kaukani dala lehulehu ka mea hoike oiaio no ke kupono ole o ka waiho ana i ke dala maloko o na halekuai maloko o ka lakou mau pahuhao.
Ma keia hoohamama ana o ka banako Hawaii i kona mau puka ahiki i ka hora 10 o ka po ua loaa he manawa no ka mea dala e hoihoi ai e hoahu i ka lakou mau dala maloko o ia banako no ka malamaia ana mai me ka maluhia, a ma ka manawa e hemo ai ka banako ma ke kakahiaka Poakahi ua hiki ia mau dala i hoihoiia aku ilaila ke kiiia aku a lawe mai.
UA HAALELE MAI O MRS. S. M. MAHELONA I KEIA OLA NA.
Ma ke kakahiaka o ka Poakahi nei i pauaho mai ai i keia ola ana o Mrs. Nancy Ahia Mahelona, ka wahinekanemake a Solomon M. Mahelona o ke alanui Waiakamilo, maloko o ka Home Leahi, Kaimuki, mahope o ke kaa ma’i ana no kekahi mau mahina lehulehu, a maloko o ka halekupapau o Mr. Silva ma ke alanui Kukui i malamaia ai kona anaina hoolewa ma ka hora 3 o ka auwina la Polua nei.
O kekahi oia o na makuahine Hawaii maikai iloko o kona mau la e ola ana, nui kana mau hana maikai i na opio. He wahine oia i hoonaauao maikai ia. Mamua aku o kona lilo ana i makuahine nana e malama na keiki makuaole o Kalihi me ke Kula Kaikamahine o Kamahameha oia i hana mua ai. He lala oia no ka ahahui Kamehameha Alumnae a no ka Hui Oiwi. Ma keia kulanakauhale no oia i hanauia ai a iaia i moe aku la ua piha iaia na makahiki he 50. Ua haalele iho oia i kana mau mea aloha ma keia ao e hoomanao poina ole aku nona, o ia hoi kana mau keiki eha, kona mau kaikunane elu, ke Senatoa William A. Ahia ame Samuel Ahia, a me kona mau kaikaina oia o Mrs. Charles B. Wilson ame Mrs. Lizzie Aki.
He hoahanau oia no ka ekalesia o Kawaiahao, a oiai oia e ola ana oia kekahi o na limahana a kokua ikaika i ka ekalesia o Kawaiahao i ka manawa e noho kahu ana ka Rev. H. H. Paleka.
KA EMPIRE.
E hoomaka ana ma keia Sabati iho, e hoikeikeia aku ana ke kiionioni a William Fox i kapaia “Ka Aina o Jazz” me Eileen Percy, ka heke. E lilo ana ka hiona nani ma kekahi mokupuni mehameha, i mea e hoohialaaiia ai ka lehulehu. Ua Ioaa i ka mea nana i kaksau i keia moolelo kekahi manao hou, a ma ke ano o ka hanaia ana o keia kiionioni, e hiki ole ai ke uumiia iho ka akaaka, e noke ai a mamae ka iwiaoao.
Ua hele aku o Miss Percy ma ke ano o Nina Dumbarton i kela mokupuni, kahi a Kauka Canruthers e nana ana i kekahi mau ma’i inoino o ka noonoo. Ua hele mua ana ina paha e hiki ana iaia, ke hana ahiki i ke kuikahi ana o ka noonoo o kana ipo me kona. O ka mea ma’i mua loa ana o ka hoomaopopo ana, ua nana mai oia iaia mei, ma ke ano oia ka pilikua “Keakaame ke Kumu Papapa.” a he ai i ke kanaka. I ka manao aku hoi o kekahi kanaka okoa, oia nei kekahi o na kaikamahine hulahula akamai loa ma ke ao nei, me kona hoomaka okao ana mai e hulahula, ahiki i ka hulahula like ana o na ma’i e ae, me ke komo pu aku o ke kauka ame Miss Percy.
KA LIBERTY.
E haalele ana sanei oe i kekahi hana nui, ina e ku-e mai ana ke kaikamahine au i aloha ai i kau mau hana?
O keia ka ninau a Wallace Reid, e hooholo ai, ma kana kaa hou, “The Hell Diggers,” e hoomaka ana ma ka Halekeaka Liberty, i keia Sabati iho.
O Lois Wilson ka inoa o ke kaikamahine, a na nana aku kona makuakane maluna o ke kanaka opio ame kona mau hakuhana, ma ke ano he mau enemi ino loa nona. Ua komohia aku la nae ka noonoo iloko o ke koa opio, a hui pu aku la me lakou, a o ka hopena, o ia no ka hakoko ana me kekahi ahahui kalaiaina wikani. He ku i ka nani ka hiona, no kela paio ana, ma ke ano kalaiaina.
Maloko o keia kii, e ikeia ana o Frank Leigh, Lucien Littleveld, Clarence Geldart ame Bud Post.
HAWAII
E hoomaka ana ma keia Sabati iho ma ka Halekiionioni Hawaii, e hoikeike aku ana ke kii i kapaia “Na Iliohae o ka Akau.” O keia kekahi o na kii ku i ka pihoihoi.
He kii keia e pili ana no kekahi kaikamahine kumukula ma Alaska i haulehia ai he elua mau kanaka i ke aloha iaia. O kekahi o keia mau kanaka, he kino ikaika kona. No ka elua hoi o na kanaka, he noho malie oia, me ka loaa ole o na manao uilani iloko ona, elike me ke ano o ka moolelo. Oiai na hiona e ikeia ana ma kela kii, aole loa he moapopo iki o ke kanaka a kela kaikamahine e mare aku ai, aka nae, ma ka hopena, ua ikeia ke kupono o kana mea i koho ai.
HE INOA NO KAHULUALII.
He inoa he aloha no Kahulualii i maule i ke kai,
He kai auau na ka hoaloha, a aloha au, a o aha i-na.
He pua lele e oe no ka hikina,
No Moaula hale o Olopana i Kahiki.
Elua olua, alo hookahi au,
Kookolu i ka leo nahenahe o ka hanehane,
E i iho ana e u hoi kaua,
Ua kau ka la i Makaanoni,
Aloha wale kolaila kini,
O ka miloholu o Waiakaea.
Eia Ma-ui e ku nei,
O kuluehu o na waimaka o Pe’ape’a
Ame na pua o Kaumakani.
MRS. KAUKEANO MAMA PUA TRIPP.
He kanaka malama buke waiwai no ka halekuai ma Lihue, Kauai, nona ka inoa o C. V. Ittner ka i hoopaa iaia maloko o ka rumi a ma ka Poalua nei ka piha ana iaia o na la he 17 o ka hookeai ana, he o ia mau no kona ikaika, koe wale no ke emi mai o kona kino, o keia iho la ka ka lua o kona hookeai ana, ma kana manawa mua o ka hookeai ana he 20 la i hala a hoomaka hou e ai i ka ai.
Ka Fea a ka
Ahahui Malu Phoenix
MA AALA PAKA
DEKEMABA 24 AHIKI I IANUARI 2
HE UMI LA NO KA HOOHAUOLI ANA
NA ILIO HOOKANI PILA
E hele mai e ike i keia mau ilio i loaa ka naauao me ko ke kanaka ma ka hookani pila. He hoikeike keia i ike mua ole ia ma Hawaii nei.
NA KAA HOLO MALUNA O NA UWEA
He mau mea ano hou keia i ike mua ole ia ma Hawaii nei.
KA WAHINE AULII O KE AO NEI
He iwakalua wale no iniha kona kiekie. Ua hiki ia oe ke lawe iaia maloko o ke eke o ke kuka, a i ole, maloko o kekahi eke paalima.
He nui na mea Hoakaaka i ike mua ole ia. E hele mai e ike nou iho mamua o ka lohe pepeiao wale no
Hamama na ipuka ma ka hora 7 o ke ahiahi o ka la 24 o
Dekemaba
E WEHEIA ANA HE FEA MA AALA PAKA
Ma ka la 24 o keia mahina e weheia ai he Fea ma Aala Paka e ka Ahahui malu Phoenix, a eia na lala o ia ahahui ke hoomakaukau mai nei i keia mau la no ka holomua o ia hana. O keia ana kekahi o na hoikeike Fea nui i loaa ole kona lua i na Aha Fea i malamaia malaila i na manawa i hala ae nei.
Ma ke ku ana mai o ka mokuahi Manoa ma ke kakahiaka nui o ka Poakolu nei, i huli hoi mai ai o Edwin Fernandez, ke keiki kiionioni, mai kana huakai kaapuni ia Amerika Huipuia, me kekahi mau hui hanakeaka kaulana, no ka wehe ana mai i kekahi mau hana hoikeike aiwaiwa a hoakaaka ma ia kahua ma ka manawa e weheia ai kela Fea.
O kekahi o kana mau mea hoikeike i lawe mai nei, o ia no kekahi mau ilio laeula i ka hookani pila. O kela mau ilio, o ia kekahi o na holoholona i loaa ka naauao i like aku me ko ke kanaka, a o ka mea wale no i koe o ia ke kamailio ana mai elike me kakou ke kanaka. O kekahi o na holoholona ana i lawe pu mai nei. o ia no kekahi mau iole i a’oia a laeula ma kekahi mau hana keaka, he mea hoi i ike mua ole ia ma Hawaii nei i na manawa i hala ae nei.
Iwaena o na hui hana keaka, ua lawe mai nei oia i ka hui hana keaka hooikaika kino a Warner, kekahi o na hui kaulana loa ma Amerika. O ka lakou mau hana hoikeike, o ia no na hoikeike ano hou loa i kaokoa loa mai na hoikeike e ae apau i ikeia ma Hawaii nei, i na manawa i hala ae nei. Eia pu mai nei me ia kekahi kanaka ukulii a he menehune paha ma kekahi olelo ana, a no ka mea aohe keia he ukulii a lohe mai i ke a’o. He kanakolu ka nui o na makahiki o keia wahi kanaka, a o kona kiekie he 20 ½ wale no iniha a maloko oia o ka paiki lole o ka hoihoia ana.
O kekahi mea ano nui loa o ka hoea ana mai nei o kela hoikeike, o ia no kekahi mokulele i kapaia ke “Giant Seaplane”. O keia mokulele, o ia kekahi o na mea hialaai loa ia e ko Amerika mau kini, a e piha mau ia ana hoi i kela ame keia la, a nolaila ua hoea mai nei keia mau mea i Hawaii nei, a e loaa ana he manawa nui i kela ame keia, e hele ai e makaikai ia mea ma kela kahua, mai ka la 24 mai o keia mahina ahiki i ka la 2 o Ianuari e hoea mai ana.
Ma kekahi mau mea i loheloheia mai, eia pu ka
Ahahui Kamehameha Alumnae, ahahui o na kaikamahine kahiko o ke kula o Kamehameha ke hoolala mai nei, no ka wehe ana ae i kekahi mau hana hoikeike malaila, ma ka manawa e weheia ai o kela fea, no ka hoomahuahua ana ae i ka loaa no ke kukulu ana i kekahi home, ma ke ano he kiahoomanao no ke pookumu o ke kula o na kaikamahine, oia o Miss Ida M. Pope i hala, elike me ka lakou e hooikaika pauaho ole nei, i keia mau la ma ka wehe ana i kekahi mau hana o keia ano.
O ka Ahahui Ma lu Phoenix, o ia kekahi o na ahahui ikaika ma keia kulanakauhale nei, he ahahui hoi i kukuluia no ke kokua ana i kona mau hoahanau iloko o ka wa pilikia, a o ka hapanui o kona mau lala he poe keike Hawaii.
Ka Pila
GRAFONOLA COLUMBIA
Maopopo ka Wa e Pau Ai.
Na ka mea hoopaa nona iho e
makaala ia mea nou. Ua hiki
ia oe ke hulahula ahiki i ka huamele hope loa.
Uku Liilii ke Makemakeia
Thayer Piano Co.
LIMITED.
148-150 ALANUI HOKELE
NO WAHI I HOOKAPU HOU IA AE
NO NA KOA.
O ka apana a ka oihana koa i kaupalena ai no na koa elolu mahina mamua aku nei ua hoonui hou ia aku a komo iloko o ke kulanakauhale. Ma ka po Poaono aku la i hala ua hookapuia na koa mai ka hele ana aku ma ka aoao Ewa o ke alanui Nuuanu, na aoao elua o ke alanui Berihania ahiki i ke alaui Papu, a ma na aoao elua hoi o ke alanui Hokele ahiki i ke alanui Nuuanu. Ua hookapu pu ia ke alanui Liliha ma kekahi hapa ame ke alanui Muli, wai. O kahi wale no i hookapu ole ia no na koa e hele ai ma na wahi e hoopuni ana i ka hale hoolulu kaaahi.
Mahope iho o ka hookapuia ana ae o keia mau wahi i na koa, he lono hauwawa i hiki ole nae ke hooiaioia dka i holopuni ae, e waihoia ae ana ka kekahi hoohalahala e na kanaka kalepa o Honolulu imua o ka oihana kalepa no keia hookapuia ana eia nae, ua hooleia ae e ka oihana kalepa ka loaa ana aku o kekahi ike ia kino no ia mea.
O na wahi i hookapuia mamua ua komo pu ke alanui Kauluwela ke Tin Can Alley ame kekahi hapa o ka apana o Kakaako, a ma keia hoi ke palahalaha loa aku nei na wahi i hookapuia i na koa aole e hele ma ia mau wahi, o ia na wahi i hoikeia ae la maluna.
Na Kii Paani! Na Kii Paani!
Ma ke Kuai Hoemi
Ma ka makou kuai Karisimaka i keia wa e haawi
ana makou i na
Kii Paani Apau
me kekahi kumukuai hooemi kuikawa o
10 PAKENEKA
Eia maanei na mea apau e hoohauoliia ai na kamaiki, e laa na pahu hookani, na kii pepe, na kii bea nunulu, na kii mikini, na meapaani, na pu ame na mea no apau e hoohauoliia ai na kamaiki, a oiai lakou e kuaiia ana, e loaa no ma ke kumukuai hoemi kuikawa o 10 pakeneka.
E hele mai e ohi i kau mau mea i keia wa
HAWAII SALES CO., LTD.
NUUANU, KOKOKE I KE ALANUI MOI. KELEPONA 1933
Ka pipi o ka Aina Hanai Holoholona o Parker
O keia i’o pipi momona, ka pipi maikai hookahi ma ka makeke, a ke kuai hoolilo nei makou, ma ke kumukuai haahaa, me ka hoopono maoli.
Eia keia mau kumukuai malalo loa iho o ko na makeke e ae, a hui pu iho me na kulana maemae e hoohanaia nei e makou ma ka lawelawe ame ka hoahu ana i na i’o pipi, he mea pono e lilo ko makou makeke i makeke nou.
Pipi Ku Mokupuni---------------------------------------------------------------15c o ka lb.
Kulana Aoao o ka Pipi----------------------------------------------------------15c o ka lb.
Ku’eku’e Pipi----------------------------------------------------------------------12 1/2c o ka lb.
Pipi Palai Iwi Hoehoe-----------------------------------------------------------15c o ka lb.
Pipi Palai Uha---------------------------------------------------------------------15c o ka lb.
Kulana Aoao Koala--------------------------------------------------------------12 1/2c o ka lb.
I’o Hipa Ku-------------------------------------------------------------------------10c o ka lb.
I’o Hipa Ku’eku’e Wawae------------------------------------------------------10c o ka lb.
I’o Umauma o ka Hipa----------------------------------------------------------10c o ka lb.
Waiubaka Maile------------------------------------------------------------------55c o ka lb.
METROPOLITAN. MEAT MARKET
Alanui Moi
Kopa Moi Keokeo No Ka
Mikini Holoi
He Kopa maikai loa i hiki ke hoohanaia no
na ano hana apau i pili i ka home. Hiki ke
holoi i na lole nahenahe loa me ka pilikia
ole. O kona oi loa aku o ka maikai no na
mikini holoi-No ka holoi i na pa ame holoi
hale.
KUAI I PUOLO MAI KOU HALEKUAI MEAAI MAI
____________
T. H. Davies & Co., Ltd.
Na Akena Wale no no ka Paeaina Hawaii.