Ka Nupepa Kuokoa, Volume LIX, Number 47, 25 Nowemapa 1921 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

He Moolelo no

WILEBA DANUBA

a i ole

Mai ke Kulana Haahaa a i ka Hanohano

He Moolelo i Piha me na Hana

Hoopahaohao

 

"Mamuli o kela nuhou no ka make ana o ke kaikunane o mama, ua konoia mai makou, e hele aku no kona wahi i noho ai ; he hele kahiko ko makou he mau la ae nei i hala, aka mamuli o kou hoi mai me mama e noho ai, pela i hoopaneeia ai a hoea mai oe, nolaila aole he mea hou aku nana e hoopaneenee i keia huakai, aka ke ole au e kuhihewa, he mau la kakaikahi wale no koe, e hele ana kakou apau loa, no kekahi huakai i ka aina mamao."

"O, he keu aku a ka mea hauoli !" i hooho ae ai o Eta, no kona ake e ike hou aku i na wahi i malihini iaia.

MOKUNA XXXI

Pela iki mai kaua e ka makamaka heluhelu. Ua haalele aku kaua ia Dane e ku ana me he anela luku ka, maluna o ke kino o Rumefoda e waiho ana me ka oni ole.

O Venuka hookahi wale no ka mea i ike i ke ano o na mea i hanaia maloko o kela rumi, oiai oia e hoekepue mai ana ma kona wahi i pee ai malalo o ka moe o Dane; oili mai la ua wahine nei a ku aku la imua o Dane, me ka pane ana mai:

"Ea, heaha kau mea i hoeha aku nei iaia? Aole me ka pahi, no ka mea ke waiho maile mai la no ka pahi, me ka maikai, a aole no au i ike mai nei i kou hou ana ia Rumefoda i ka pahi. Ua hiki no ka make ana o keia kanaka ino, aka o ka mea wale no nae a'u e kaumaha nei, o ia ka loaa ole he manawa nona e mihi ai i kona mau hewa. Ua hiki nae, o keia wale no ke alahele e pakele ai oe mai iaia mai. Ina no kou laweia aku imua o kekahi aha hookolokolo, owau no ka hoike ma kou aoao, nolaila mai maka'u oe e kuu hone !

"Ea, aole oe i hoike mai nei i kau mea i hahau aku nei maluna o keia kanaka!" alaila alawa ae la ka nana a Venuka mai ke kino ae Rumefoda, a i ka helehelena o Dane, one kona hoopiha koke ia a," a mai i ka weliweli, no ka mea, aole he wahi onioni ae o ua kaikamahine opio nei, aia kona mau lima, ke kuhikuhi la iluna, ke luhe la hoi kona mau lauoho mahope o kona kua, a ke aa pono iho la kona mau maka i ke kino o Rumefoda e waho oni ole ae ana.

"Aole anei e hiki ia oe e kuu hone ke pane mai? Ea, e Zora! E Mrs. Gawila, owau no keia o Venuka kou hoaloha! Heaha ka pilikia i loaa ia oe?"

Ke noke la o Venuka i ke kahea me ka leo nui ma na ano apau, e pane aku ai o Dane iaia, aole nae he wahi mea, a loli ae kela ano o Dane e ku la, a no ka manao loa o ua o Dane, ua lele paha ke aho mailoko aku o Rumefoda, a he kino kupapa'u kela e ku ana iluna, hoomaka aku la oia e holo. me ke kahea ana me ka leo nui i lohe mai ai ka nui o na kauwa e noho ana ma kela wahi.

No kona piha loa i ke pihoihoi, aole maopopo iki o kana mea e hana ai, i ka wa e hoea aku ai no kekahi puka, o ka hamohamo wale aku no i ka laka, aka nae mahope o ka puauu aua no kekahi manawa ia wa i haumama ae ai kekahi puka, o kona holo aku la no ia nokahi i waiho ai o ka bele, noke aku la i ka hookani, he bele no kela i hanaia, no ka wa o kekahi hana nui i makemakeia ai.

Ua maamaama loa i kela manawa, a ke ike aku la ua o Venuka i ka holo mai o na Paele mai na wahi like ole mai, o kekahi poe o lakou, mai na mala mai o na meakanu.

Ua hele na Paele a piha me na manao pihoihoi, ma kela hoea ana mai no ka hale, a o ka luna hana o na Paele, i hele pololei mai a loaa o Venuka, pane mai la :

"Heaha ka pilikia, i kani ae nei ka bele kahea?" wahi ana, me kona papa ana aku i na Paele e noho maile, me ka walaau ole.

"Heaha mai auanei ka'u ua pepehiia o Rumefoda e Zora, a ua lilo kela kaikamahine i kino uahane ole."

"O Zora anei ka mea nana i pepeki ia Rumefoda a make, a ke kamailio mai nei oe i ka mea oiaio?" wahi hou a ka luna hana o na Paele, me kona hoopuniia ana ae e na kauwa, me ko lakou piha i ke kahaha ame ka pihoihoi pu.

"O keia ka mea oiaio loa a'u e kamailio aku nei, a ua lilo kela kaikamahine i kino kupapau, me kona ku malie no nae iluna, aohe wahi mea a onioni ae."

No kekahi mau minuke, aole he maopopo iki i ka luna hana, kana mea e hana ai, aka nana pono loa mai la oia ma na maka o Venuka, a ninau mai la :

"Aia mahea kahi i waiho ai o kela mau kino make? E lawe koke aku oe ia'u imua o laua !"

"E ukali mai mahope o'u, na'u e alakai aku ia oe, i kahi e waiho mai la o na kino elua, aole e hiki ia'u ke hele hookahi, ua piha loa ia au me ka maka'u no kela mau kino make," wahi a Venuka, me kona kakali ana mai, o ke hele aku o ka luna hana.

"Ke makemake nei au ia oukou apau e na Paele, e noho maile loa, a mai hoao kekahi mea e ukali ae mahope o'u koe wale no ka poe a'u e kahea aku ana i ko lakou mau inoa, o lakou wale no ke hele pu me a'u," alaila kahea mai la ua luna nei i na inoa, o ka poe ana i makemake ai, he eha ko lakou nui o Venuka ka eha o ka poe i hele pu aku me kela kanaka.

I ke komo ana aku, na mea apau maloko o ka rumi e waiho mai ana ke kino o Rumefoda, a ike aku la hoi i ke ku o Dane iluna, me ka oni ole, aole e hiki i ka luna hana o na paele, ke hana aku i kekahi mea, ua hele oia a piha me ka maka'u ame ka ilihia, aka i ka manawa i hoao mai ai kekahi o na Paele e hookokoke i na kino elua, akahi no oia a pane mai :

"Aole loa o'u makemake e hoopa kekahi mea i keia kino aka e holo koke oe e Kamuela e kii ia Kauka Hakima, oia ka mea kupono loa e hoea mai i keia manawa, no ka mea nawaho ae o kana oihana he kauka, oia pu no ka lunakanawai, a he hoaloha kahiko no hoi oia no Rumefoda."

Hakalia no a pau kela mau hoakaka ana a ka lna, o ka oili aku la no ia o Kamuela iwaho, a iloko o na minuke helu wale no, aia kela Paele, maluna o ka lio, ke holo la no ke kii ana i ke kauka : a iloko o ka hapalua hora wale no, ua hoea mai la o Kauka Hakima, me kona laweia ana mai noloko o ka rumi e waiho ana o na kino elua i manaoia ua make.

I kela ike ana aku no o ke kauka, i ke ku pololei o ke kino o Dane iluna, pane ae la oia i ka i ana mai i na Paele : "Aole i make keia kaikamahine, aka ua hele kona kino a laau, hoomoe aku iaia maluna o kahi moe!"

Hele mai la o Venuka, me ka wahine kuke, a hopu aku la i ke kino o Dane, i kela pa ana aku no o ko laua lima, o ka hina mai la no ia o Dane imua, aole kela ano aau on a, aka ua malule iho la ke kino, me ka hapai ana aku o na wahine Paele a hoomoe iluna o ka moe, alaila upo'i iho la na maka o Dane.

Kukuli iho la hoi ke kauka ma ka aoao o ke kino o Rumefoda, me ka haha ana i ka pana o kona lima, a hooho ae la : "Ua loaa ka haku o oukou i ka ma'i kuhewa, aole oia i make, ke kamau nei no ke ola iloko o kona kino, a ke makemake nei au, e hoihoiia aku oia noloko o kona rumi moe!"

Hapaiia aku la ke kino o Rumefoda e na Paele elua noloko o kona rumi, me ka weheweheia ana ae o kona mau lole, a hoomoeia maluna o kona moe, alaila hana aku la ke kauka i kona ike, ma ke oki anai i kekahi mau aakoko o Rumefoda, a iaia i ike ai, i ka hanu maikai o kela kanaka. waiho aku la iaia, malalo o ke kiai ana a na Pele elua, o kona hoi hou mai la no ia noloko o ka rumi e waiho ana o Dane.

Iaia i hoea aku ai ma ka aoao o ka moe a Dane e waiho ana, ike iho la oia, ua pa'uhia loa kela kaikamahine i ka hiamoe, ke ano mau o ka poe i loohia i kela ano haawina, alaila haawi aku la i na kuhikuhi in a wahine Paele elua, i ka laua mea e hana aku ai i ka wa e ala mai ai ke kaikamahine opio, mai ka hiamoe mai.

Maloko o ke keena hookipa, i loaa mai ai i ke kauka, na kauwa apau e akoakoa ana, a e noke nui ana no hoi i ke kamailio, no kela nohou hoolelehauli, a o ia ka ua kauka nei o ka i ana mai :

"Aole he kumu e ae o ka pilikia o ka haku o oukou: aka no kona paakiki maoli no i ka hana i na paina, me ke ala ahiki i na hora o ka wanaao, nolaila mai ke kumu i loaa ai i ka ma'i kuhewa. He mau manawa ka'i hoikeike aku ai iaia, i ka pilikia e hoea mai ana maluna on a, aohe nae wahi mea a hoolohe mai, a o keia iho la ka hopena i loaa iaia."

"Pehea, he manaolana anei kekahi, no kona palekana mai keia pilikia mai i loaa iaia ?" i ninau aku ai ka luna hana o na Paele.

"He maikai kona hanu ana i keia manawa, a oiai ka hanu iloko o ke kino, aia no he ola, a oiai e mau ana ke ola, aia no he manaolana ! O ka'u wale no e makemake nei ia oe e Kivini, in a ua maopopo ia oe kekahi ohana pili loa ia Rumefoda e ola mai nei, alaila o keia ka manawa kupono loa, e hoikeia aku ai ka lohe, no keia pilikia !"

"E hele koke aku au i ke kulanakauhale, a hoouna aku i kelekalapa no ka hoea mai o kona ohana."

"Eia hou keia, in a aole i hoponoponoia kona mau waiwai, alaila e hoike koke aku oe i ka lohe i kona loio ie hoea mai, a e noho oia maloko o keia hale, no ke kakali ana, o ka pohala mai o Mr. Rumefoda, malia paha ua makemake oia e hanaia kana palapala kauoha, e hooili ana i kona mau waiwai maluna o kana poe i manao ai, e hopomikai aku."

"Ua pono kena mau hoakaka aku e Kauka Hakima, e hele au i keia manawa me ka hohakalia ole," wahi a ka luna, me kona haalele koke ana iho i ka hale, aka iaia i hoea mai ai no ka lanai, e iho aku ai nolalo o ke kahua manienie, ua puni koke ae la oia i na kauwa Paele, a o ia kana o ka pane ana aku ia lakou, me ka loaa ole he manawa i kela poe kauwa, e ninau mai ai no ke kulana o ko lakou haku :

"Ke makemake nei au ia oukou apau loa, e huli hoi no ka oukou mau hana, ma kela mala nui ma ka hikina, a nou e Kamuela, e hele koke oe e hookomo i ka lio i ke kaa, a lawe mai mamua o ka hale nei, no ka mea ua makemake au e lawe oe ia'u no ke kulanakauhale."

Naholo aku la na kauwa no ka hooko ana i ke kauoha a ko lakou luna, a huli ahoui aku la no hoi o Kivini no kona hale, no ke komo ana mai i kona paalole kupono no ka hele ana aku i ke kulanakauhale, oiai hoi ke kauka i hoi hou mai ai no ke kiai makaala ana i kana mau ma'i.

He o ia mau no ke kulana o kela mau ma'i mai ka manawa i hoea mai ai ke kauka, ahiki i na hora o ka auwina la, ua huli hoi mai la no hoi o Kivini, me kona ukali pu ia ana mai e ka loio o Mr. Rumefoda ame kekahi kahunapule.

Moloko o ke keena hookipa, i halawai aku ai o Kauka Hakima, me kela mau malihini, alaila hoakaka aku la imua o laua, i ke kulana o ka pilikia i loaa ia Mr. Rumefoda, elike me kana i ike ai alaila alakai aku la oia ia laua, noloko o ka rumi moe e waiho mai ana ke kino nawaliwali o Rumefoda.

No kekahi manawa loihi, ke kakali maile ana o kela poe, no na hoailona o ka hoi mai o ka ikaika o ke kino o Rumefoda, aole nae he wahi mea a ike iki ia aku o kekahi hoailona o kela ano, eia nae aole no lakou i paupauaho i ke kakali ana, no ka mea aia ke kau aku la ka manao o ka loio, in a e hoi mai ana ka noonoo maikai iloko o Rumefoda, aole ana e nele kona hoike mai i kona manao, no na mea pono e hana aku ai i kona mau waiwai.

Ua hele no hoi a na hora o ka ahiahi, akahi no, a ikeia aku ka onioni ana ae o ua kanaka nei, owaka ae la kona mau maka, me ka nana ana mai i ka poe e hoopuni ana ma ka aoao o kona moe, alaila kunou mai la kona poo i ke kauka, e kulou aku a pili ma kona poo, hawanawana mai la i kela mau olelo.

"Auhea oe e kauka, aole he loihi o ko'u wa i koe e ola ai !" "Aole pela, e loaa ana ia oe ka oluolu maikai ma keia hope aku,"alaila kamalio mai la ke kauka, i na olelo hoolana elike me ka hana mau a na kauka i na ma'i pilikia apau.

Luliuli wale ae la no ke poo o Rumefoda, no ka mea ua ike oia, aole loa e hoi mai ana ka ikaika maikai iloko o kona kino, alaila hooikaika wale ae la no oia, ma ke ani ana mai o kona lima, i na keonimana elua e noho aku ana, e nee aku a kokoke iaia; a i ka akoakoa ana mai o kela poe ekolu ma kona aoao pane mai la :

"Ke makemake nei au e lohe oukou apau i ko'u manao, e hookuu lanakila ia aku kela wahine opio o Zora!"

"Pehea, aole anei he mea pono ia oe ke hoakaka mai i kou manao, no ke ano o ka palapala kauoha hooilina a'u e hana aku ai no kou mau waiwai?" i ninau mai ai ka loio.

Luliuli wale ae la no ke poo o Rumefoda, me ka pua'i leo ole mai, aka o ke kauka nae, ka i pane ae i ka loio: "He hapalua hora wale no koe, o Rumefoda e ola ai, o kona haalele mai no ia ia kakou, nolaila he manawa keia no ka malama ana i kekahi anaina haipule, mamua o kona hele ana."

Kaakaa ae la nae na maka o Rumefoda i kela manawa, me ka nana pono ana mai maluna o ke kahunapule, a no ka manao o ke kahunapule, he mea paha ka ka mea ma'i i makemake ai e kamailio ae iaia, kulou iho la kona poo ilalo, a pili ma ke poo o Rumefoda, ia wa i pane ae ai ua kanaka nei me ka leo nawaliwali :

"Owau kekahi kanaka hewa loa, ke ike nei au i ka ehaeha o kuu uhane, no ke ano o ko'u ola ana, nolaila heaha la ka ke Akua mea e hana mai ai no'u, no ka mea hewa?"

Lalau mai la ke kahunapule i na lima o Rumefoda me ka pane ana mai i na olelo hoolana, no ka nui o ko ke Akua aloha, ua makaukau mau oia, e huikala mai i ka mea hewa o mihi ana me ka oiaio, me ka hoikeike ana mai, i ka mea a Iesu i hana aku ai, no ke kanaka powa, i kau pu ia ai me ia maluna o ka laau ke'a.

No kela mau olelo hoolana a ke kahunapule, halo'ilo'i mai la na waimaka ma na lihilihi o Rumefoda, alaila kukuli iho la ke kahunaapule ma ka aoao o ka moe, a waiho aku la he mau leo pule imua o ke Akua, e nonoi aku ana i Kana huikala ana mai i ka mea hewa, a e hokipa aku hoi i kona uhane, ma kahi i hookaawaleia no ka poe pono, a iaia i hooko iho ai i kana pule ana, a nana mai la maluna o Rumefoda, aole he ola i koe iloko o kona kino eia nae aia no kona mau lima ke puliki la, me na wamaka hoi maluna o kona mau papalina.

"Aole he ola i koe iloko o ke kino o ko kakou hoaloha." pane ae ai ke kauka, mahope iho o kona nana ana i ka pana o na lima o Rumefoda.

"E kau mai ke aloha ame ka malu o ka Makua ma ka iani maluna on a," wahi a ke kahunapule, me ke kau ana mai hoi o kona mau lima, maluna o ke kino o ka mea make.

"Auhea olua e o'u mau hoaloha, he mau hoike olua, no na olelo i makailioia mai nei e Mr. Rumefoda, no ka hookuu lanakila ana aku ia Zora, nolaila e hooko aku ana au i kona makemake," wahi a ka loio, me ke kuana ae, a haalele iho la i kela rumi, no ka hoomakaukau ana i na mea e pili ana i ka hoolewa o ka mea i make, oiai ma kela aina wela, aole he loihi o ka manawa i aeia, no ka waiho ana o na kino make aka e kanu koke ia aku ia iloko o ka manawa kupono.

MOKUNA XXXII.

Ma ke kakahiaka o kekahi la mai, no na kumu hoakakaia ae nei mamua, ua malamaia ke anaina hoolewa o Rumefoda : o kela kekahi o na kakahiaka kala'e maikai, a oiai he kanaka o Rumefoda, i kamaaina i na kanaka apau o na wahi e pili kokoke mai ana, ua hoea mai lakou apau no kela hoolewa, a he laina kaa loihi i ukali aku mahope o ke kaa kupapau, no ka ilina ma kahi he hookahi mile ka mamao mai ka home aku o Rumefoda.

Mahope o ka hoomoeia ana aku o Rumefoda no kona home lua, ua huli hoi mai la ka lehulehu no ka hale, me ko lakou noho ana maluna o na pakaukau i hoolakoia i na meaai, ma ke kauoha a ka loio, mahope o ka ai ana, i huliia ai oloko o ka hale, me ka loaa ole nae o kekahi palapala kauoha hooilina, alaila huli hoi aku la na mea apau no ko lakou mau home, a koe hookahi o Kauka Hakima, mamuli o ka au'a ana aku o Cibele, ka wahine Paele kuke iaia, me ka i ana aku :

"Auhea oe e ke kauka maikai, ke makemake nei au e hele ae oe e nana ia Zora aole on a ai iki i kekahi meaai, aole hoi he inu wai; a aole loa oia i kamailio he hookahi huaolelo, mai kela manawa mai o kona hoomoeia ana aku iluna o ka moe. I kekahi manawa e kaakaa ae ana no kona mau maka, a pili iho ana, me ke kaapa wale ana no iluna o ka uluna, a me he mea la nae i kekahi manawa, e lohe aku ana au i kona namunamu, e kamailio ana paha me na uhane, a i ole me ke diabalo, a ua hele maoli au a piha i ka maka'u, i ka noho maloko o ka rumi o kela kaikamahine."

Oiai ka wahine Paele e kamailio mai la i ke kauka, no ke ano o Dane, ke hele la no kona mau wawae, no ke alakai ana i ke kauka no ka rumi o ke kaikamahine ma'i, me ke kamailio ole aku nae o ke kauka iaia, aka lalau aku la ke kauka i ka lima o ke kaikamahine opio, no ka nana ana i ka pana, me ke kilohi ana aku no hoi maluna o ka helehelena o ke kaikamahine opio, alaila pane mai la i ka wahine Paele:

"Ua hoohia ka wahine opio i kekahi ma'i piva ikaika loa ma kona poo, a o ka mea wale no e hoopakeleia ai kona ola, o ia ka ako ana i kona mau lauoho, pehea he mea makaukau no nae paha kekahi i ka ako lauoho maanei nei ea?"

"Ae, he akamai loa o Kamuele i ka ako lauoho, nana no e kahi i ka umiumi o ka haku o makou, a e ako no hoi i kona lauoho."

"Ina pela, e hele koke aku oe e kii ia Kamuele, a hoike aku iaia i ka hana a'u i makemake ai, a e lawe pu mai me kana pahiumiumi!"

I kela hala ana aku o ka wahine Paele, no ke kii ana i ka mea nana e ako i ka lauoho o Dane, wehe ae la ke kauka he poho huaale mailoko ae o ka pakeke o kona puliki, me ka haawi ana aku ia Dane he elua mau huaale, aole no hoi i emo iho, komo ana no o Cibele me Kamuela me ka lawe ana mai o kela Paele, i kona makaukau apau o ka hana ako lauoho a kahi umiumi.

Hoalaia ae la o Dane iluna, me ka noho ana o Cibele mahope o ke kua e paa ai, o ka hoomaka aku la no ia o Kamuela e ako i ka lauoho, imua ponoi o na maka o ke kauka e nana mai ana.

Lalau aku la ke kauka i na lauoho mua loa o ka moku ana i ka upa, a nana iho la, alaila hooho ae la ma ke ano hikilele: "Ea, he keu aku maoli keia a ka mea kupaianaha, he haulaula ka lauoho o keia wahine opio, ma ke kumu o ka lauoho, oiai nae he eleele ka lauoho holookoa ke nanaia iho!"

No keia mau olelo a ke kauka, hoopau ae la o Kamuela i kana ako ana i ka lauoho, a hopu aku la i na lauoho e waiho ana iluna o ka papahele, a pela pu no hoi o Cibele i nana like iho ai, he mea oiaio, aole he hoohewahewa ana i koe, ua kulike ka ike a kela mau Paele elua, me ka ke kauka, o ua lauoho apau loa, he hauliuli ma kahi o ke kumu me ka maopopo ole noe i kekahi o lakou, ke kumu o ke ano e o ka lauoho o kela kaikamahine.

"Ma ko'u manaoio, he haulaula ka lauoho o keia kaikamahine i kinohi a me he mea la, nana no i hooluu a eleele, eia nae, o ka mea kupaianaha, aole he kulike o kona lauoho me kona ili," i pane ae ai ke kauka, no ka hoakaka ana i kona manao no ke ano o ka lauoho a lakou e nana la.

"E hoomau aku oe e Kamuela i kau hana, aohe a kakou noonoo ana no keia lauoho, o ka palekana wale no o ke ola o keia wahine opio, ka mea nui," i hoomau hou mai ai ke kauka i kana kamailio ana, o ka holo ae la no ia o ka upa a Kamuela, aia ka pono o ka nemonemo o ke poo o Dane.

I ka hele loa ana a pau ka lauoho o ke poo o Dane i ka akoia, ike iho la ke kauka, ua oi aku ke aiai o ka ili o ke poo, mamua o ka ili o no papalina, nolaila ke hoopohihihi hou ia la no kona noonoo, in a paha o Venuka kekahi me lakou, in a ua hiki iaia ke hoakaka pono mai, i ka mea nana i hookahaha i ko lakou mau noonoo.

Hooma-uia aku la kekahi kawele i ka wai hau, a wa-hiia ae la ke poo o Dane, malalo o na kuhikuhi a ke kauka, a no ka lauoho keia, ua hoakoakoaia ae la e Kamuela, a laweia aku la eia e malama, me kona manao, e loaa ana iaia kekahi kumukuai maikai loa, ke hoea aku oia imua o na kanaka ako lauoho o ke kulanakauhale, no ke kuai ana i kela lauoho, i kekahi poe o lakou.

"Ua kahiko loa oe e Cibele, e hiki ole ai ke kiai makaala no ka pono o keia wahine opio, no ka mea he hana nui, ka makaala mau ana, i ka manawa e haawi ai i ka laau. Aole e hiki ia oe ke ala i ka po, e hiamoe e ana oe, mamua ae o ka manawa e hanai ai i ka laau, aka eia kela wahine a'u i ike ai i nehinei, he opiopio oia, a ua hiki iaia ka makaala i ka mea ma'i me ka holopono loa."

"Aia kela wahine, ke hooponopono mai la i na pakaukau a na malihini i ai mai nei a he nui no na hana e ae, e hooponopono aku ai i ka hale nei, oiai ua hele maoli a mokaki na ponohale ma kela ame keia wahi, a o kekahi no hoi, he mau la hoea mai paha keia no ka ohana o Mr. Rumefoda."

"O oe o olua ka mea nana e lawelawe i kela mau hana, a e hoouna mai oe i kela wahine, no ke kiai ana i ka mea ma'i," wahi a ke kauka.

He leo mana o ke kauka, ke kauoha aku i kana mau mea apau e makemake ai, nolaila haalele koke mai la o Cibele ialoko o kela rumi, aole no hoi i loihi iho, komo ana no o Venuka, me ka haawi ana mai i kona kunou imua o ke kauka a pane mai la :

"Ke haawi aku nei au i ko'u mahalo nui ia oe e ke kauka, no kou kauoha ana ae nei ia'u e hele mai e kiai i keia wahine opio, nuo ka mea ua noho pu au me ia no I makahiki a ua maopopo loa ia'u kona mau ano apau, me he mea la owau kona makuahine : nolaila owau ka mea kupono loa nana e malama iaia."

"Ke olelo mai nei oe, ua maopopo ia oe na ano o keia wahine opio pehea oia ponoi no anei ka mea nana i hooluu i kona lauoho a eleele?"

"Heaha ke kumu o kou ninau ana mai la ia'u i keia mea?"

"NO ka mea ma ka'u ike, ma ke kumu o kona lauoho he haulaula, a mawaena ae ahiki i ka welelau he eleele, pela au i manao ai, ua hooluuia ke kumu i eleele ai o kona lauoho."

"Aole o'u manao, nana no i hooluu i kona lauoho!" i pane ai o Venuka, me ka hoomanao ana mai i na mea a Dane i hoike aku ai iaia, me ka papa pu ana aku, aole loa e kamailio i kekahi mea e aku, ahiki i kona ae ana mai iaia e hana pela, nolaila pane hoolalau hou aku la ua wahine nei:

"Aole loa keia kaikamahine, e aa ana e hooluu i kona i kona lauoho nani, no kekahi waihooluu e ae."

"Ua like no ko'u manna me kou e kuu wahine maikai, aka nae, ua hoopohihihi loa ia mai ko'u noonoo, no ke kumu i hooluuia ai kona lauoho, aka ae, auhea oe e kuu wahine maikai, ke makemake nei au e haawi aku ia oe i na kuhikuhi ana no kau mea e hana aku ai no keia wahine opio, i na hora o ka po, no ka mea me ka makaala wale no e pono ai ka mea ma'i," wahi a ke kauka, me kona hoakaka pono ana mai i na mea a Venuka e hana aku ai, a ke hoolohe pono loa la hoi o Venuka, i ole ai oia e kuhihewa, ma kekahi mea.

"Ua maopopo pono aku la anei ia oe, kau mea e hana ai?" wahi hou a ke kauka, me ke ku ana ae iluna, no ka haalele ana iho i ke keena o ka mea ma'i.

"Ae, ua baopopo ia'u na mea apau, aka e ninau aku ana au i oe, i ka wa hea e hoea mai ai ka ohana o Mr. Rumefoda?"

"Ina ua haalele aku lakou, ma ka manawa i hoea aku ai ka lohe no ka make ana o ka haku o oukou, a ma ka aina lakou e kaahele mai ai a, laila iloko o na la ehiku, a ewalu paha lakou e hoea mai ai; aka in a ma ke alahele moana mai lakou, alaila, iloko o na pule ekolu, alaila hoea mai kela poe ianei; aka hoi, in a aole lakou i haalele i keia manawa, alaila he mea maopopo ole ia'u, ka olelo ana ae, no ka manawa oiaio loa a lakou e hoea mai ai."

Me kela mau hoakaka mai ke kauka aku, ua loaa aku la ka maha i ka noonoo no Venuka, oiai aole oia i makemake e hoea koke mai kela mau malihini, i ka wa e waiho ana o Dane i ka ma'i.

i loaa ia Dane, iloko o na la ewalu mahope mai, e hakoko

Ma ka mea oiaio ke olelo ae, ua ko'iko'i maoli ka ma'i ana oia mawaena o ka make ame ke ola, e olohewa wale ana no kana olelo, a i kekahi manawa, e maule ana oia, aka nae, aole no i pauaho ke kauka nana e lapaau ana iaia, e hoao ana kela kauka ma no ano apau elike me ka ke kona hoea mau he elua manawa o ka la.

i loaa iaia, e hoopakele i ke ola o kela kaikamahine, me

No Venuka hoi, ma ka aono mau oia o ka moe o Dane, i na hora apau o ka po, me ka pili ole o kona mau maka, aka ma na hora o ke ao, ua kaa aku la ke kiai ana ia Cibele, o kona manawa ia e hooluolu ai, no kekahi mau hora wale no noae a hoi mai la no oia, no ke kiai ana ia Dane.

Ma ke ahiahi nae o ka ewalu o na la, oiai ke kauka e ku ana ma ka aoao o ka moe, a e nana aku ana hoi maluna o ka helehelena o Dane, pane ae la oia i ka ana mai :

"Ma keia po e maopopo ai ka hopena maluna o ka mea ma'i, he elua no haawina e loaa ana iaia, o ka mua, o ia kona puoho ana mai, me ka hoi pono ana mai o kona mau noonoo maikai me ia, a o ka lua o ia no kona nawaliwali loa aku, e kokoke loa mai ai ka make e kii mai i kona uhane a lawe ae mai kona kino aku."

Haawi mai la no ke kauka i na kuhikuhi ana ia Venuka, i ke ano o kana mea e hana aku ai no ka mea ma'i; ma kela po iho; oiai o Venuka e kiai ana ma ka aoao o ka moe o Dane, aia wale no kona mau maka, ma ka helehelena o ka wahine opio i na manawa apau, no ka mea ua like maoli no o Dane, me he kaikamahine ponoi la nana o ke aloha o ka makuahine, aia ia iloko o Venuka, o ke kumu hoi nana i kona ikaika mai iaia, e ala e kiai makaala no ka pono o ka wahine opio.

Ua hele no hoi a ka hapalua like o kela po, ike aku la o Venuka, i ke kahe mai o ka hou ma ka lae o Dane, a lana ae la kona manao, no ka palekana o ka wahine opio, eia nae iloko o kela manaolana, oili mai la kekahi hoomanao ana iloko on a, o kela no kekahi hoailona hiki mua, no ka poe i aneane loa aku i kahi o ka make, malia paha o ke ano ia o kela hou e kahe mai la, a emi pu wale iho la no kona manaolana, me ka halii ana iho o ka hopohopo, ame ke kaumaha iloko ona.

Kulou aku la nae ua o Venuka imua, no ka hoolohe ana i ke ano o ka hanu ana o Dane, he maikai ke ano o kana hanu ana, o ia no oe o ka mea ma'i ole, haha iho la hoi i ka pana ma kona lima, he like pu no ka maikai nolaila auhee aku la na manao hopohopo mai iaia aku me ka mau no nae o kona haawi ana i ka laau, i kela ame keia manawa, elike me ke kuhikuhi a ke kauka.

Ke nee awiwi mau la ka manawa o ka po, a i ka manawa i auhee aku ai ka pouli o ka po, a phoa mai la hoi ka malamalama iloko o ka rumi o Dane, owaka ae la no lihilihimaka o ua kaikamahine nei, a nana mai la ia Venuka.

Ua piha loa o Venuka me ka pihoihoi, e hiki ole ai iaia ke hoopuka ae he hookahi huaolelo, ke hoomanawanui wale la no nae oia i kela ano pihoihoi on a, aia hoi ka hopohopo, o lilo auanei kona kamailio aku ia Dane, i kumu e maule hou aku ai kela kaikamahine, no laila, aole ana mea e ae e hana aku ai, o ka noho malie wale no.

No kekahi manawa loihi kela nana ana mai a Dane ia Venuka, akahi no a oili mai ka leo o ke kaikamahine opio, me ka nawaliwali nae, i ka pane ana ae;

"O oe no anei keia e Venuka?"

"Ae, owau no keia, e hoomaikaiia ke Akua, no ka hoihoi hou ana mai i ke ola iloko ou e kuu Dane."

"E Venuka, pehea au i hoea mai ai maloko nei o keia rumi, a maluna hoi o keia moe? O oe no anei ka mea nana i wehewehe i ko'u mau lole, a hoomoe maanei?"

"Ae, owau ka mea nana i hoomoe ia oe maanei nei?"

"Alaila ma ka aoao mau a nei oe o keia moe, kahi i kiai ai ia'u iloko o ko'u manawa e waiho ana i ka ma'i?"

"Ae, o na minuke apau o ke ao ame ka po, au i waiho ai maanei nei, ma ka aoao mau au o keia moe, ahiki i keia manawa au e ike mai la ia'u."

"Auhea oe e Venuka, he keu maoli a ko'u nawaliwali! Ua aneane e hiki maikai ole ia'u ke hanu, a oi loa aku hoi ko'u nawaliwali, e hiki pono ole ai ke kamailio aku. Me he mea la ma ka'u hoomaopopo iho, eia ko'u hanu ke emi liilii nei, elike me ke emi ana o ka a o ka ihoiho kukui."

"E hoomau i ka hooikaika ana i kou hanu, e kii ae au i kekahi mea, a kokua aku ai i kou hanu ana," e kii ae au i kekahi mea, e kokua aku ai i kou hanu ana," wahi a Venuka, me ke ninini koke ana iho i kekahi omole laau iloko o ke puna, a hoohainu aku la ia Dane.

I kela komo ana aku no o ke puna laau iloko o ka waha o Dane, o ka moni aku la no ia, a he mau minuke mahope iho, o kona haule hou aku la no ia hiamoe, me ka maikai o kona hanu ana : na kela ano i loaa ia Dane, i konoia mai ai o Venuka e kukuli iho ma ka aoao o ka moe, a hoomaikai aku la i ke Akua, no ka hoihoi hou ana mai i ke ola iloko o ke kaikamahine opio, eia nae ua poina loa oia, i ka mihi ana aku i kona mau hewa, no na mea ana i kokua aku ai, no ka holopono, o ka hana ino, a ke kanaka nana i hoolimalima iaia, e lilo i wahine lawelawe no Dane maluna o ka moku.

Ma kela kakahiaka nui no hoi, ua hoea mai la ke kauka no ka mea ua makemake loa oia e ike i ka hopena o ka mea ma'i, a iaia i ike aku ai, i ka hanu maikai o Dane a lohe hoi i na hoakaka mai ia Venuka aku, no ko laua kamailio pu ana no kekahi mau minuke, ua hoohauoli loa ia aku oia, me ka hoike akea ana ae i kona manaoio, ua auhee aku ka poino mai ke kaikamahine opio aku, a e hoi hou mai ana ka ikaika i kona kino, ke hala kekahi mau la e hoomaluia ai, malalo o na kiai makaala ana.

(Aole i pau.)