Ka Nupepa Kuokoa, Volume LIX, Number 47, 25 November 1921 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

Lilo na Hooikaika Ana a ka Loio o John Bright e

Hoopakele i Kona Haku i Mea Nana Ole Ia e

na Kiure -- Ahewaia Oia no ke Apuka

 

            Mahope iho o ka hooloheia ana o kona hihia no kekahi mau la o ka pule aku nei i hala, i hoopuka mai ai ke kiune i ka lakou olelo hooholo, e ahewa ana ia John Bright, no kona pili i ka hewa apuka, o ia ka hoopuka ana i kekahi kikoo dala waiwai ole, ma ke ano he hapa no ke kumukuai o ke kaa otomobile ana i kuai ai nona.

            Ua hoao ka loio o John Bright, oia o Oliver P. Soares, e hoopakele i kona haku, ma ka waiho ana aku i kekahi kumu imua o ka aha, no ka nawaliwali o ko John Bright noonoo, ma ia ano, o kahi kupono loa nona e hoopaaia ai, muloko no ia o kahi o ka poe@nawa hiwali o ka noonoo, na kapae nae na kiure i kela kumu, a hoopuka mai la i ka lakou olelo hooholo, e ahewa ana

i ka mea i hoopiiia.

            Mamuli o kela olelo hooholo a na kiure, i kau mai ai ka Lunakanawai @@@@, i ka hoopa'i maluna o ka lawhala, e noho oiamaloko o ka halepaahao, no ka manawa aole e emi iho malalo o elima makahiki, a aole hoi e oi aku i na makahiki h@ umi, me ka lawelawe ana i na hana oole'a, me kona uku pu i ka hoopa'i o ka@alima dala.

            Aole keia o ka manawa mua loa, i ahewaia ai keia kanaka opio, no ka hewa apuka, aka he mau manawa lehulehu, a ua lilo maoli ka ha@@ apuka, i mea kamaaina loa iaia, hakalia no a hookuuia mailoko mai o ka halepaahao, o ka lawelawe aku la no ia i na hana kolohe, me ka paa mau no nae i ka hopuia.

            @ kulike ai me na mea i huli@@ maloko o ka moolelo o na hihia, i pili ia John Bright, na ahewa, mua ia oia, ma ka la 17 o Okatoba, o ka 1913, no ka hewa, lawe aihue i ka waiwai i haawiia aku nana e malama. He hookahi makahiki hoopaahaa ma ka hana @ole'a ka hoopa'i i k@uia aku maluna ona e ka aha.

            He manawa pokole wale no, mahope iho o kela hemo ana mailoko mai o ka halepaahao, ua pao hou oia i ka hopuia, no ka hewa apuka, a ma ka la 26 o Okatoba, o ka 1914, i ahewaia ai oia, a hoopa'iia he ekolu mahina hoopaahao.

            Hakalia no a pau kona hoopa'i hoopaahao, a loaa hou ka lanakila laia, ua pa@ hou no i ka hopula, no keapuka uo, he elua on a mau hihia, o ka hookolokoloia ana, no kela ano hewa hookahi no, a ahewaia ma ka la 23 o Aperila, 1915, e noho oia maloko o ka halepaahao no ka manawa o hookahi makahiki.

            Ma ka la 25 o Maraki o ka 1916, mahope o ka hemo ana mailoko mai o ka halepaahao, ua hopu hou ia oia, a ahewaia, no ka hewa apuka, malalo o na kumu hoopii ehiku. Ua ahewuia oia malalo o na kumu hoopii elua, me ka hoopau wale ia o na kumu hoopii e ae, a o kona hoopa'i o ia no ka noho ana maloko o ka halepaahao no na mahina @ono.

            He @ha makahiki ka noho ana o John Bright maloko @o ka halepaahao ma kela mau hoopa'i ae la, aka ma ka la 27 o Maraki, 1920, ua ahewa hou ia no oia, a hoopa'iia, no ka hoopuka ana he ehiku mau kikoo dala apuka; he hookahi wale no nae kumu hoopii i hookolokoloia ai oia, a hoopa'iia he umi-kumamawalu mahina e noho ai ma ka hale paahao, me ka hoopau wale ia o na kumu hoopii e ae.

            Hakalia no nae a hookuuia mai oia, a oiai e hele lanakila ana, kelepona mai la oia mai kekahi mai o na hokele i ka hui kaa kuai otomobile, me ke kauo@@ pu ana mai, e hele aku kekahi mea e hui pu me ia.

            He Poaono kela la a John Bright o ke kelepona ana mai, a i ka hoea ana aku o ke kanaka o ka hui kuai kaa otomobile, a kukakuka no ke kaa @ kuai ai, hele mai la ke kokoolua o Bright, ka mea i kapa iai@ iho he kakauolelo na Bright no ke koho ana i kekahi kaa maikai, a uku mai la i ka huina o elua oaukani me elima haneri dala, ma kekahi kikoo apuka, i kakauinoaia e John Bright, ma ka inoa nae, o William C. Kauhane.

            Aole e hiki e maopopo, he kikoo dala apuka paha keia, aole paha, oini ua paa e na banako ma kela ahiahi Poaono nolaila ua kakali ka poe no lakou ke kaa ahiki i ka Poakahi ana ae, i ka wa i kikoo aku ai i ke dala i ka hanako, ia wa i kiolaia mai ai kela kikoo, me ka oleloia ana mai, aole he waiwai, oiai nae, ua hala okoa kekahi mau hora, o ka holoholo ana o John Bright, maluna o kona kaa otomobile hou a maikai.

            Ma na manawa apau a John Bright e hele lanakila ai, e hoi ana oia a noho ma na hokele o keia kulanakauhale, me ka hookohukohu ana, ma ke ano he keiki oia na kekahi kanaka waiwai a kuonoono o Hawaii nei.

            Ma kekahi manawa, e kapa ana oia iaia iho, ke keiki na Samuel Parker, a i kekahi wa hoi, oia ka Makai Nui Sam Pua, a o ka Makaikiu McDuffie hoi i kekahi manawa, eia nae, aole loa he loihi o kona pulapu ana i ka lehulehu, me kona paa koke ole i ka hopuia.

           

Pukalaki Ka Makani Ke Kumu Hihia O Na Uwea Uwila

 

            Mamuli o ka pukalaki o ka pa ana a ka makani i keia mau la iho nei a i lilo ai hoi ia kumu no na uwea uwila a na hui kelepona ame na hui hana uwila kukui i nui ai ka hana a na kanaka o ia mau hui ma ka hooponopono ana ae i na uwea, a mamuli o ia mau uwea uwila ua holapu ae he mau @@mahi liilii lehulehu ma kekahi mau wahi o ke kulanakauhale, eia nae ua koa koke no ia mau pauahi malalo o ka hoomalu ana.

            Ma ke kakahiaka Poakahi nei he @@ mile ka ikaika lelo o ka makani i @@ @ora hookahi, a no elima minuke ka ikaika loa o ia pa ana; o ka ave@@ke ikaika o ka lele ana o ka makani i ka hora he 18.7 mile i ka horn. Ma ka auwina la o ka Poaono aku he 11.5 mile ka mama lele o ka makani i ka @@@@, a ma ke Sabati mai he 19.5 a u@ hoomahuahua loa ia mai ka ikaika o ka pa ana a ka makani @@@hope mai ahiki i ka loaa ana he 27 mile i ka  hora, a ke hookualiilii loa aku nei nae ka pa ana a ka makani, i keia mau @a a ke ikaika mau nei ka pa ana. O na la makamua no keia o ka hooilo, pela no paha e hoomaka mai nei o Kiaimakani i kana hana. Oa ka makani e ikeia nea, elika me na makahiki i kaahope aku pau na hale i ka ulaaia ke pili a hina kekahi mau ku@@@laau nunui i ka makani, a ina o keia makani i pa iho la me ka ikaika a he mau pauahi nui elike me mamua oneanea kahi mau wahi o ke kulanakauhale me ka hiki ole i ka oihana kinaiahi ke hoopio.

 

Hemo Na Apana Aniani Mai Ka Papalina Mai O Ka Makai Nui

 

            Mamuli o ka eha mau a i lilo ai hoi ka eha ma kona papalina i mea hoouluhua mau iaia i noi ae ai ka Makai Nui Charles h. Rose i ke Kauka Ayers o ka halema'i o na poino ulia e huli i ke kumu o ia eha, nolaila i okiia ai ka papalina o ka Makai Nui Rose, a ma ia okiia ana i loaa ai ke kumu o ia ehu mau ana eia ka he apana aniani, a ua kap@ ka makai nui ia apana aniani he daimana.

            Ma ka manawa i powaia ai ka Makai Nui Rose mawaho ae nei o Waikiki ma kekahi manawa i hala aku nei ua holo aku ke kaa oto ana e kau ana a hookui i kekahi kumu hau iloko o ka pahale o Mr. Beekely, elike me ka moolelo, a ma ia hookui ana aku o ke kaa i ke kumu hau i nahaha ai ke aniani pale makani omua o ke kaa a me he mea la no ia aniani i nahaha ai keia apana aniani i paa ai ma kona papaiana a i weheia iho la e ke Kauka Ayers, mamlui o ka ike o ka makai nui i k hu'i mau o kona papalina. Ina paha ma kahi o ka maka he lele maoli ko ka onohimaka.

           

            KIKAKO, Nov. 19.-- He hana nui ka i hoolalaia e kipe i na luna aupuni me $50,000 no ka hoopuka aua mai i mau palapala ae no 187,000 galani rama, waiseke, nona ka waiwaiio $2,100,00 e na akena o ke aupuni federala i keia la, elike me ia a lakou o ka hoike ana ae. Ua komo pu iloko o keia hana na inoa o kekahi poe kiekie o Nu Ioka ame Kikako, wahi a na luna aupuni.

 

Powaia Kekahi Kiakaa Kepani e Elua Kanaka

Nakiikiiia Kela Kepani i ke Kaula Mahope o ka Laweia Ana Elima Dala Mai Iaia Aku

HOLO KELA MAU POWA ME KE KAA OTOMOBILE

Koe Nae na Bila Dala Mahuahua a Kela Kepani Aole i Lilo i Kela Mau Kanaka Powa

 

            Ke hana mau ia mai nei ka powaia o na kalaiwa kaa otomobile Kepani i keia mau la a he keu aku no hoi ke kanawai ole o na kalaiwa i ka lawe i ka poe maluna o ka lakou mau kaa i ka po.

            Ma ka po Poakahi nei, nakiikiiia na lima o Toichi Takata, he kalaiwa kaa otomobile hoolimalima e kekahi mau kanaka elua i maopopo ole ko laua mau inoa, a kiolaia mailuna aku o ke kaa otomobile mahope o ka laweia ana ae o elima dala mai ka pakeke ae o ke kalaiwa. O kahi i laki ai, he mau bila dala lehulehu kekahi iloko o kekahipakeko o ke kalaiwa Kepani e lawe pu ana ia manawa aohe nae i huli aku na kauaka powa i na pakeke apau o ke kalaiwa, ina la ua hele lako na kanaka powa. Me he mea la ua piha laua i ka maka'u ia manawa ke kumu o ka huli hou @l@ ana aku.

            I kulike me ka moolelo a na makai o ka hoihoi ana ae elua mau kanaka i hoea aku i ka halekaa otomobile a hoolimalima aku la ia Takata e lawe ia laua i Kapahulu, a me ka manao no, hoi paha o ke kalaiwa he mau kanaka maikai la laua, ua haawi mai la oia i kona ae a hoomaka aku la ka holo ana no Kapahulu. I ka hoea ana aku o ko kaa ma@kahi mehameha o ke alanui, a i ka ike ana o na kanaka @olohe o kahi @naikai loa ia e hana ai laua i ka laua hana powa, ia manawa i huki ae ai kekahi o na kanaka i kana pu panapana a kau aku la imua o ke kalaiwa, me ke kauoha pu aku iaia e ku iho ke ka@. Ia manawa i hoomaka aku ai ua mau kanaka la e huli i ke kino o Takata, me ka nakinakiia ana aku la o kona mau lima a paa a kiolaia aku la iluna o ke alanui, a hoomaka aku la na kanaka powa e holo maluna o ke kaa otomobile. I na kanaka powa i hala aku ai au hono iho la ke kalaiwa @ hemo ke kaula i nakinakiia i kona mau lima ahiki i ka hemo i'o ana, a kahea aku la'i kekahi kaa otomobile e holo ae ana ia manawa, a na ia kaa ana o ke kahea ana aku i ke kalaiwa i hoihoi mai iaia i ke kaona nei a hele ae la e hoike i ka oihana makai. Ua hoomaka koke aku na makai e huli i na kanaka powa, ahiki mai nae i ka Poalua ana ae aohe i loaa iki na powa.

 

HE $500,00 KA OI AKU O NA HOOLILO.

 

            I kulike me na huahelu o ka waihoia ana ae i ka lunanana hale Louis S. Cain, e hiki aku ana ma kahi o $1,335,000 na hoolilo apau ahiki i ka pau ana o na hana o kela hale hou o ka Hui o Davies and Co. e ku nei mawaena o na alanui Kalepa ame Moiwahine, a mawaena hoi a no alanui Bihopa ame Alakea, o ia hoi he $550,000 ka oi aku o na hoolilo mamua o ka mea i kohoia Mamuli o ka ikeia ana i ka oi aku o na hoolilo mamua o ka mea i kohoia e uku hou ae ana ka hui o Davis and Co. i ke aupuni kuhinakauhale ame kalana i ka huina o $275, he uku paku'i no ka laikini.

            Ua paa ia hale i nei manawa a na makaukau no ka nohoia ana ae. O ka halekuai no na meaai ua weheia a ua hoomaka ke kuaiia ana aku maloko o kona @umi hou, a no ka halekuai lole a pela aku, e hala ana paha kekahi mau pule ma ke halihali ana mai i na ukana apau mamua o ka hiki ana ke wehe a hoomaka ke kuai ana mai i kana mau waiwai.

            He mau han@ri o na limahana mai na kamana, na kanaka pena ame na kanaka ma na hana hoonani hale, e mau mai nei no ko lakou hana ana. O ka eleweka nana e halihali i na kanaka iluna i na papahele elua a ekolue aole i makaukau i nei manawa no ka hana, a no ia pau pono ole o na hemahema i ka hoomakaukauia i nei manawa i hooholo ole ai ia hui i ka la e konoia mai ai ka lehulehu no ka hele ana aku e makaikai ia hale ma na wahi apau.

 

Hopuia Malalo o Kekahi Mau Kumu Hoohuoi

Komo Aihueia ka Home o Harry Spicer me ka Lilo o na Waiwai he Nui i ke Komohewa

LOAA KEKAHI MAU WAIWAI I AIHUEIA

He Mea no i Noho Hana Mua me Kela Haole ke Kanaka o ka Hopuia Ana e na Makaikiu

 

            Mamuli o na kumu hoohuoi i paa ae ai o Joe Souze i ka hopuia ma ka Poalima aku nei i hala, ma ke ano, oia ka mea nana i aihue i na waiwai mailoko aku o ka home o Harry Spicer, i hiki aku ka waiwaiiio ma kahi o ka elua kaukani dala.

            O ka hapanui o na waiwai i lilo i ka aihueia mailoko aku o kela home, o ia no na lako gula ame na lako dala, a wahi o ka ho@kaka a Kakiana Makaikiu Kellett, ma ka manawa a na makaikiu i hoea  aku ai no ka rumi o Joe Souze e noho ana, au loaa aku la ie lakou kekahi mau waiwai o ka aihueia ana, au hunaia maloko o na kamaa.

            Ua komo aihueia kela home i ka manawa i kaawale mai ai o Mr. Spicer mai ka hale mai, a i kona hoi ana aku, ike aku la oia i ka mokaki o na ukana oloko o ka hale, me ka nalowale ana hoi o kekahi mau waiwai lehulehu.

            Ua kau koke na manao hoohuoi maluna o Joe Souze, olai ua noho hana mua oia me Mr. Spicer, aka nae ua hoopauia mai ka hana aku, he hookahi pule mamua aku o ka h@naia ana o ka aihue.

            Wahi a Mr. Spicer, o Jou Souze wale no ka mea i kamaaina i na ilio, a i hiki hoi ke hoomalielie, me ka huhu ole o na ilio iaia, a oia no hoi ka mea i kamaaina i na keena apau oloko o kela hale, e maalahi ai kona komo ana iloko a pela hoi ka huli aua aku i na waiwai like ole.

 

WEHEWEHE OULI O KA MANAWA NO KA MAHINA O NOVEMABA

 

            O ka poe apau i hanauia mai ka la 23 o Novemaba ahiki i ka la 22 o Dekemabe, komo pu ia mau la, ua hanauia iloko o Saggitarius (ke kanaka pana pua), kekahi o na hoailona ma ka poiuiulani ma ke alahele o ka la. He ikaika ma ka manao, he hoopono, he oiaio ma ka olelo me ka huna ole, he makau ole, he ake i ka hakaka, he lokomaikai, he hoomakamaka, he piha aloha i ka hoakanaka a he hoike i ka manao me ka oiaio, he hoowahawaha i ka hoopunipuni; he hikiwawe ka huhu a he hooko koke i ka mano e ulu ae ana me ka hoohakalia ole. E makaala loa oe ma ke kinai ana i kou huhu. He pinepine ma ke hana kuhihewa ana. E hoomaau pinepine mau ia mai ana. E lilo ana i mea punahele nui i na kanaka he nui, a o ka oi aku he makemake nui i na anaina nui  a i na ahahui e hauoli ana iloko o ka manawa e mare ai, mahope o ke koho ana i kekahi kokoolua maikai no ke ola ana. E hoowahawaha oe i ka launa ana me ka poe haukae a e hooikaika mau oe e ola i ke ola ana o ka poe Kristiano, e holomua ana ma na hana me ka loaa o ka hanohano ame ka waiwai. He holoholona hihiu ke hooweliweli mai ana i kou ola; a malia e oha ana no oe mamuli o ia holoholona; e lilo ana oe i mea punahele i ka poe hanohano a waiwai; aole e holomua ana ka hana ana ma kou wahi i hanu ai, aka e holomua ana nae ma ke aina malihini, mai ae iki e hoowalewaleia mai me ka waiona, he luamimilo ia no k poino; elua ana manawa e mare ai; e pono e mare i ka manawa mua i ka 25 o na makahiki; e oi aku ana na keikikane e loaa mamua o na kaikamahine; he oi aku ka maikai ke mare i ka poe i hanauia iloko o na mahina o Okatoba ame Novemabe. Ina e ola ana a piha na makahiki he 70 a oi. E makaala loa i palekana mai ka ulia pauahi mai mamuli o ka hoohemahema a makaala ole; e loaa mau ka ikaika o na mea paahana o ke kino, pela wale no e palekana ai mai na ma'i mai he nui e hiki mai ana; o na ma'i kiai mau o ia ka eha ma ke poo ame ka hu'i o ka niho. Iloko o na makahiki hope loa o ke ola ana e loaa ana i kekahi ma'i ikaika loa a mamua o ka ike ana o ka ohana no ia pilikia, e hala e aku ana oia iloko o ke aupuni o ke Akua.

 

Loheloheia ka Inoa o Jarrett i Elele Lahui

Nui na Wa Olelo o Keia Mau La no na Moho Elele Lahui a na Demokarata e Holo Ana

O McCANDLESS AME JARRETT NA MOHO

Paa Nae ka Manao o ka Hapanui o na Demokarata o Jarrett ka Inoa Hiki e Lanakili

 

            Elike me ka hookokoke mau aku, i ka wa kalaiaina, pela iho la e oiliili liilii mai nei, na wa olelo, e pili ana i na moho, e holo aku ana no ke kulana elele lahui i Wakinekona, no ke pani ana ae i ka makalua, e hoohakahakaia iho ana, ma o ka waiho ana mai o ka Elele Lahui Kalanianaole, i kela kulana, i keia kau ae.

            Iloko o keia mau la e nee nei, o ka inoa o W. P. Jarrett ame L. L. McCandless na mea loheloheia iwaena o na alakai Demokarate, ma ke ano, o kekahi o laua ka moho ikaika, a kela aoao kalaiaina e kau aku nei na manaolana, no ka hoouka kaua kalaiaina i keia kau, no kela kulana.

            Ma ka ma@aoia o kekahi poe Demokarata, ina no ka paa o ka manao o Mr. Jarrett e alualu i ke kulana elele lahui, he hana paakiki loa, na kekahi moho o ka aoao Repubalika, ka paio ana aku me ia.

            Me kela manaoio nae no ka lanakila o ka moho elele lahui a na Demokarata, ma o Mr. Jarrett la, aole i hoopau na kakoo o L.L. McCandless i ke lakou mau manaolana, no ke kukulu hou mai i ka mea paahae kahiko o kela aoao, a o Mr. McCandless ana no @@ lakou moho i keia kau e hoea mai ana.

            O kekahi manao i hoolalaia, no ka hookuu hookahi mai ia L. L. McCandless i ke kahua mokomoko, o ia no ka haawi ana aku o Mr. Jarrett, i kana mau kakoo ana ia Mr. McCandless, a ma ka manawa e pau ai kona hookohu, no ke kulana makai kiekie no ke Teritore, e haawiia aku ana iaia kekahi kulana oihana, he hope maki nui, no kekahi o na apana o Oahu nei.

            O kekahi kumu nui i manaoia, no ka hoonee ana aku i keia papahana imua, o ia no ka loaa o ke kulana ikaika, i ka Makai Nui Rose, i ka wa @ hoea mai ai i ke kau koho o na luna oihana o ke Kulanakauhale a Kalana o Honolulu nei.

            Ua olelo ae hoi na Repubalika, o ke kumu o ko Jarrett makemake e hoomau aku i ka paa ana i ke kulana makai kiekie no ke Teritore, ahiki i ka pau ana o kona manawa, no ka waele ana no ia i ke alahele a malaelae nona, e holo aku ai no ke kulana elele lahui,  no ka mea, pela wale no e hoomauia ai na Demokarata he nui e noho hana nei malalo ona, i ka lakou mau oihana, a ua loaa hoi ka ike iaia, ina he Repubalika ae ana ka mea e pani ma kona makalua, e pau loa ana na Demokarata i ka hoopauia, a he p@@ Repubalika ae ana ke noho ma ia mau oihana.

            He ekolu mau moho i maopopo loa i keia manawa e alualu ana no keia kulana elele lahui, oia o John H. Wise, H. L. Holstein ame R. H. Makekau, eia nae, ke noho hamau nei kekahi mau moho kupono loa i manaoia, me he mea la, e kakali ana lakou a kokoke aku i ka wa hoouka kalaiaina, a i ole, a maopopo paha ko lakou kulana ikaika, o ka wa ia e oili okoa ae ai a ku iwaho. Na keia mau la aku nae e hoike mai i ka mea oiaio.

 

HE $30,000 KE KOHO I LILO AI KA APANA AINA O J. F. COLBURN

 

            O kela apana aina o John F. Colburn ma Pearl City nona ka nui he 68.7 eka, na ke Trent Trust Co. Ltd. i koho no na hooilina ahiki i ka lilo ana no ke $30,000 ma ke kuai kudalaia ana ma ke a@akea o ka Poaono aku la i hala maloko o ke keena kudala o J. H. Fisher and Co., ma ke alanui Bihopa.

            O kela apana aina komo pu me kekahi lokoi'a a i hoolimalimaia aku no ka $500 o ka makahiki, he aina kapu laiki a i hoolimalimaia aku no ka $200 o ka makahiki, he mau kahuahale maikai no ke kukulu ana aku i kekahi kauhale liilii ame elua mau hale, he $19,375 ka waiwaiio i kohoia e ka poe na lakou i koho i ka waiwaiio mahope koke iho o ka make ana aku o John F. Colburn.

 

O Ka Inoa o Miss Ashford ka i Noi no ke Kulana Lunakahawai

Loaa ka Pane a ke Keena Loio Kuhina o Amerika o ka Inoa Wale no a ka Aoao Repubalika e Kakoo Aku Ai Oia ke Hookohuia Mai

 

            I kulike ai me ka leka a Konela C. J. McCarthy, ke kiaaina mua o Hawaii nei, e noho hana mai la ma Wakinekona, no ka ahanui kalepa o Honolulu nei,  o ka hoouna ana mai i ka ahahui kalepa, o ka inoa wale no o Miss Ashford, ke mea i waiho aku i kana palapala noi, no ka hookohuia mai i kunakanawai eha, no ka aha kaapuni ma Honolulu nei, aole hoi he mau inoa e ae, i waiho aku i na noi, no ia kulana.

            Ua loaa mai keia ike ia Konela C. J. McCarthy, i kona wa i hoea aku ai no ke keen o ka loio kuhina, a noke ia mai la oia i ka niele, i ke kumu o ka makemakeia ana e loaa he lunakanawai kappuni hou, ia wa i hoakaka aku ai oia, elike me ia a ka ahaolelo kuloko o ka hooholo ana, me ke kokuaia aku hoi o kana mau hoakako e Mr. Dwight, ke kakauolelo a ka elele lahui o Hawaii nei.

            O ka pane a ka loio kuhina, o ka hoakaka ana mai imua ona ame ke kakauolelo a ka elele lahui o Hawaii nei, o ka inoa wale no o Miss Ashford, kana i ike ai maloko o kona keena @ihana, i waiho aku i kana palapala noi, no ka hookohuia mai i lunakanawai kappuni eha, aka nae, ua hooholo oia i kona manao, aole e hanaia kekahi hookohu oihana, ahiki i ke kakoo ana aku o ka aoao Repubalika o Hawaii nei i kekahi inoa.

            O ka lunakanawai James J. Banks, ka ka papa loio o Honolulu nei, i haawi ai i na kakoo piha ana, e hookohuia mai no kela kulana, aia oia ma Amerika i keia wa, no ka hoomaha ana no na mahina ekolu.

            He ekolu mau inoa i noonooia ae @ ka papa loio, no ka hoopiha ana i keia kulana oihana hou, i hookumuia e ka ahaolelo kuloko, oia ka Lunakanawai Banks, Miss Ashford ame Noa Aluli. O ka inoa mua ame ka inoa hope, he Demokarata ko laua aoao kalulaina, a o Miss Ashford wale no ka repubalika; me ka haawi ana nae o ka papa loio i na kakoo ana i ka Lunakanawai Banks; aka nae no Miss Ashford, ua kakooia kona inoa, e na ahahui o na wahine o keia kulanakauhale.

            Mamuli nae o kela leka a Konela C. J. McCarthy, o ka hoouna ana mai nei i ka ahahui kalepa, ua maopopo loa, aia wale no a haawi aku ka aoao Republika maanei nei, i na kakoo ana i kekahi inoa, alaila hiki i ke keena o ka loio kuhina, ke noonoo mai, a waiho aku imua o ka Peresidena, no ka hookohu naa mai iaia, no keia kulana hou.

 

UA HOI MAI O MR. C. S. CRANE

 

            Ma ka mokuahi Maui o ke ku ana mai ma ke kakahiaka Poalua nei i huli hoi mai ai ka lunahoohana nui C. S. Crane o ka Advertiser Publishing Co. mai kana huakai hoomaha aku nei i ka aina makua, mahope o ka hala ana o na mahina ekolu, ka mua loa hoi o ka loaa ana he manawa hoomaha loihi no na makahiki lehulehu i hala. He maikai kona ola kino, ohaha kona heleholena, a elike no me kona ano mau ka hoihoi ame ka eleu, pela no ma kono manwa i hoi mai ai. O kana hana mua loa mamua o kona hoi ana aku no kona home, o ia no ke kipa ana mai @ ike i na limahana apau maloko o ka halehana o ka Advertiser ame ko ke Kuokoa a lululima pu me lakou.

            Ma ka makalii o ekolu mahina i hala aku nei kona haalele ana mai i na kaiaulu o Hawaii a au aku i ke kai loa no ka aina makua, ka makamua loa hoi o kana huaka'i makaikai i ka aina makua mai kona hanauia ana mai ma Hawaii nei. Ma Hawaii nei no ola i hanuia ai a nui a kanaka makua no hoi, aole ona manawa i kaawale aku ai mai na kaiaulu aku o ke onehanau, o keia iho la no ka makamua loa. O ka manao nui o kana huakai i holo aku ai no ka aina makua no na mea no ia e pili ana i kana hana, a ia manawa hookahi ua loaa pu iaia he manawa e hoomaha ai mai na haawe nui ae o ka hana. Ua kipa aku oia i na kulanakauhale nui ma Amerika, ua kipa aku me makaikai i na halepa'i nupepa like ole, na halehana mikini pa'i nupepa, a ua ikemaka aku no hoi i na hana ano hou o keia au e pili ana i ka hoohana ame ke pa'iia ana o na nupepa ma na kaona like ole.

            Iaia ma ka Hikina ua hookomo aku oia i kana keikikane i ke kula nui ma Wisconsin, kahi e a'ola ai na keiki a e hoomakaukauia ai hoi no ka hana e pili ana i ka nupepa, a pela aku.

 

LILO KAHI O RIKEKE I HALEKULA A'O KUMU

 

            Ua hoikeia ae e ka Hawaiian Trust Co., ka lilo ana aku o ka home o Theodore Richards e ku nei ma na alanui Kapiolani, Kinau ame Lunalilo i ke kuai i ka Papa Hoonaauao no $35,000. O ia hale i lilo aku la, he pakui no ke Kula a'o kumu.

            O ka apana aina o Weedon ma ke alanui Alexander, a i maheleheleia ai i mau apana pahale, ua pau loa i ka lilo eha la mahope iho o ka waihoia ana aku i ka makeke no ke kuaiia ana aku. O ka huina o na dala i loaa mai no ia mau apana he $14,250.

            Ua kuai pu ia aku e ka Hawaiian Trust Co., ka apana aina o Archibald S. Guild i homaemae ole ia ma Puualakaha, ma ke alanui Manoa, ia Francis R. Heath no $6000.

 

            Mai poina i ka alawa ana ae i na hoolaha lehulehu e puka aku nei ma keia helu o ke Kuokoa!

 

HOOKUUIA EONO MAU MA'I O KALIHI

 

            Ma ka noho ana o ka halawai kuikawa a na luna oihana o ka papa ola, ma ka Poakolu aku nei o ka pule i hala, i hooholoia no ai, @ hooku@ aku i eono mau ma'i lepera mauka @@ nei o Kalihi, ma ke ano he poe i hoolaia; a pela pu hoi me kekahi mea ma'i i noho ma Kalihi, ua hookuu @@ ia aku oia, ma ke ano, aole oia i loaa i ka ma'i lepera.

            O na ma'i nae eono i hookuuia mai, au konoia lakou, e hele mau aku e hoike ia lakou iho, i na pule apau i na kauka, o ka halema'i ma Kalihi, ina paha he o ia mau ko lakou kulana maikai, a i ole, uua hoike hou mai pah@ ko lakou mau ano, i na hiohiona o ka ma'i.

            O kela mau ma'i apau he eono o ka hookuuia ana mai, he poe wale no i lapaauia me ka aila chaulmooogra, @ elike no me ke kulana maikai, i ikeia me na ma'i o ka hookuuia ana mai Kalihi mai, o ka haawina hookahi no ia i kau aku maluna o keia poe eono.

            O ke kumu nae o ke apono ana o na luna oihana o ka papa ola, @ hookuu i kela mau ma'i, mamuli no ia, o na hooiaio ana a na Kauka c. B. Cooper, E. D. Kilbourne ame H. E. Hasseltine, he poe kauka, i hookohuia aku e ka peresidena o ka papa ola, no ka nana ana i na ma'i, i kupono @ hookuuia.

 

HULI HOI MAI NEI KA MAUNA KEA

 

            Mahope iho o ka hoohale ana ma Kapalakiko no ka manawa i aneane @ piha ka elua mahina, i hoea hou mai ai ka mokuahi Mauna Kea no Honolulu nei, ma ka hor eiwa o ka po o ku Poaono aku nei i hala, a ma ke kaka hiaka ae o ka la Sabati i hookomo mai ai noloko nei o k@ awa, me ka @@@a ukana, no ka hui mokuahi Matson Navigation Co.

            He o ia mau no ke kulana o ka Mauna Kea, elike me ia i kamaaina ai i ko Hawaii nei poe, eia nae, maloko @ kono kino, malaila kekahi mau hoololiloli i hanaia mai nei ma Kapalakiko, me ka hookomoia ana mai i mau mea hou, ma kahi o na mea i inoino o kona enekini.

            O ka pilikia ano nui loa i hooponoponoia mai nei o keia mokuahi, o ia no kona enekini, eia nae ua pau kela pilikia, a e holoholo aku ana oia ma kona mau awa maamau.

            Ua haalele aku ka Mauna Kea ia Kapalakiko ma ka @@@@ eono o ke ahiahi o ka Poaono, ka la 12 o kela mahina, a ku mai no Honolulu nei ma ka hora eiwa o ka po o ka Poaono i hala aku la, he ehiku la me na hora ke@ ekolu.

            Ua lawe pu mai nei oia he 250 tona ukana, peia hoi me kekahi mau ohua kakaikahi.