Ka Nupepa Kuokoa, Volume LIX, Number 45, 11 November 1921 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

He Moolelo no ko

Helena Simoa Lanakila Ana

A I OLE

Ka Hoowalewaleia Ana o Halebatona

            Leha iki mai la oia e nana ia Robaka.

            Aohe mea iki a Robaka i lohe no na olelo a Miss Lamasona no Helena. nolaila oia mau no kona noho me ka maikai ole nae o ka nanaina a ka makuakane e ike mai ana, me he mea la, he mea kekahi a Robaka i ehaeha nui ai 'ma kona naau.

            "Wahi au i olelo mai nei mai Nu loka kela mau lede o ka holo ana mai, o ia anei ka mea oiaio?" i hoomaopopo hou aku ai ka Mr. Lanakasa ninau ana ia Miss Lamasona. no ka mea, au ike iho la oia i ka maopopo lao o ka lede i ka mea e pili ana no Helena am kona makuahine, me he mea la, ua kamaaina wale oia ia laua.

            "Ae, he mea oiaio ia; ua noho pu laua me a'u maloko o ka hale hoolimalima like no kekahi manawa loihi i hala ahiki - ma ia wahi aku ea, na kekahi poe okoa aku e hoike mai ia oe, a e lohe aku ana no oe i ko laua moolelo mai a lakou mai, in a aole au e hoike aku ana, a mamuli o ke ala ana ae o kekahi mokuahana mawaena o laua me ka mea nona ka hale e paa nei i nei manawa, pela laua i nee aku ai a noho ma kekahi hale okoa aku.

            "Ma keia la iho la me ka ohana Walaka a'u i hoike mua aku nei ia oe o Mrs. Simoa ame kana kaikamahine e noho nei; oia ma ke kolu o ka pahu ma ka hema ae o ke kiaaina, a e ike pono aku ana oe iaia. ke hala ae kela kaa ni e hele ae la," wahi a Miss Lamasona o ka pane ana mai, me ka hooeoe ana ae i kona ai, i hiki ai iaia ke ike pono aku i ka helehelena o ka wahine ana i lili loa ai.

            I ka hala ana ae o ke kaa nui nana i huna ae i ka ikeia ana aku o Mrs. Simoa, alaila hoolele pau aku la Mrs. Lanakasa i ka ike o kona mau maka maluna o ka helehelena o ka wahine ana i makemake loa ai e ike maopopo aku. ma ka aoao hem ae o ke kiaaina maloko o ke kolu o na pahu. kahi a Mrs. Walaka ame Mr. R. S. Walaka pu e noho mai ana.

            "O ka lede hea o Mrs. Simoa o kela mau lede ekolu e noho pu mai la?" wahi a Mr. Lanakasa o ka ninau hou ana mai i ua o Miss Lamasona.

            "O ka wahine e noho mai la me ka lole kilika ahiahia he papale lihilihi eleele ke kau mai la maluna o kona poo. me na lipine waiina." wahi a ka Miss Lamasona pane.

            Oia pu kekahi i makehehi aku i ka ui o Mrs. Simoa iloko o kona kahiko nani e komo mai ana. no ak mea. he wahine kulana hiehie maoli i'o no o Mrs. Simoa ke kahiko mai oia iaia iho, a ua kupono maoli no hoi ka oleloia he wahine kulana hanohano oia i aneane like aku me na kamaliiwahine. eia nae, aole oia i ike i ka manao o ka Mr. Lanakasa mea e ninau aku ana iaia no Mrs. Simoa, oiai ke keonimana e noho ana ia manawa me ka haikea loa ae la o kona helehelena. me ka oni ole hoi elike me ka pohaku.

            I ua o Mr. Lanakasa e noho la ke puliki la kona mau lima me ka hoahewa kiekie loa iaia iho, a no kekahi mau la lehulehu ma ia hope mai, elike ma ka hoakaka a ka moolelo. oia mau u ke kohu o ka mikiao o kona lima ma kahi o kona mikiao o ka pili ana ma ka poho o kona, me ka aaki hoi o kona mau ku'i ame ka upiki o kona mau lehelehe. i ka ua ema o ka piha ukiuki iaia iho.

            "He wahine kulana hiehie a huapala pu kela," wahi hou a ka wahine holoholo olelo o ka pai ana mai me ka noho no nae o ka manaoino iloko. ua like oia, i kona manawa e kahiko mai ai, me kekahi o na moiwahine, eia nae, iloko o kela nani nui on a ke nana aku he moolelo ekaeka kona iloko o na la i hala, he moolelo pohihihi loa i hoeekeia ai ko noonoo o na mea apau i lohe ia moolelo on a.

            "Ma ka olelo e wa nei nona ame kana kaikamahine aohe o laua kuleana iki i ka inoa e heaia nei maluna o laua i nei manawa, he inoa hoonalonalo wale no ka ia a laua i kau iho ai maluna o laua, i mea paha e nolo ai ka hilahila a laua o ka hana ana i na la i hala, a o ka makuakane ka o ke kaikamahine ua make mua oia mamua o ka hanauia ana mai o kela kaikamahine. a ma kekahi oleloia he kaikamahine pooole kela a he wahine hoi o Mrs. Simoa i mare kane ole.

            "Ea, ikaika maoli ka hoi ka makani e pa mai nei! Me ia malie wale no ka hoi mai keia kakahiaka mai! Ke nana aku me he mea la he makani hele uluulu maoli ke pa mai ana. E nana aku paha oe i ka lewa la ke lele ino mai la ke ao! Ma ko'u manao iho e ulaaia ae ana ka uhi oluna o kela kahua e nohoia mai la e kela poe e ka makani," a hooki iho la kana kamailio ana me ka eu pu ana ae mai kona noho ae ma ka manao e holo.

            He kumy maikai i'o no kana maka'u ana ka mea, ua hoomaikaika loa mai la ka pa ana a ka makani a i ka nana aku me he mea la e lilo aku ana i makani hele uluulu elike me ke taifuni; o ka uhi keia oluna o ke kahua i hanaia ai ua upohoia ae la e lele i ka lewa kekahi aoao, a o na pou i hoopaaia ai ka anini ua loheia aku la ka uiui mai me ka hi-o a kapakahi, a  o na kanaka apau e noho ana maluna o ka noho maluna loa ua haalele aku lakou i wahi a holo mai la me ka awiwi loa noalalo o kahua ma kahi kaawale mai kahi mai o ka poino.

            O ka põe e noho ana maloko o ka pahu aohe o lakou eueu ae e holo i kinohi, aka nae, i ka manawa keia i puhua ae ai ka anini a lele kekahi aoao i ka makani, a lohe pu ia aku la hoi ka uiui mai o na laau loloa i kukuluia ae ai i mau pou e kakoo ae ai i ka anini, akahi no a ikeia aku ko lakou hoike mai i na manao o ka makua nui, eia nae, i ka hoea ana mai o na makai e kiai ana i ka maluhia o ke alanui, ua papa mai la lakou i ka poe e noho ana aole e holo, aohe pilikia, e hoomau iho uo lakou i ka noho ana maluna o ko lakou noho. oiai kokoke loa e hoea mai ka hope loa o ka huaka'i ia manawa.

            Eia nae, ia manawa koke no ua pa mai la kekahi kikiao makani a puhiia ae ka anini e uhi iho ana maluna o kahi e noho ai ka poe makaikai a lele ana i kahi e, a o na aau lolole keia i kukuluia ae ai i mau pou no ke koo ana ae ia anini, ua haki mai la waiho ana iluna o na noho malalo iho.

            Ma ka-aoao keia o kahi a ke kiaaina e noho ana, a no ia haule ana mai la o ka laau i haki ai, ua puhee aku la na mea apau mai ia wahi aku.

            Aohe manawa iki a Mr. Lanakasa i hookaawale ae ai i ka haka pono ana aku a kina mau maka maluna o ka wahine u'i a haupala e noho mai ana ma ka pahu, kahi o ka ohana Walaka e noho mai aua, nolaila, i keia ulepeia ana ae o ke anini e uhiia ana, ame ka hiki ana mai hoi o ka laau a haule iluna o kahi a ka poe e noho ana. aole mea hookahi e noho pu ana me Mr. Lanakasa i ike mai i ka nui o ka ehaeha ame ke kaumaha i kau iho maluna on a, no kela ike anu aku ana i kela pilikia, a i kana nana iho iaia ia manawa me he mea la na kekahi anela no paha i hoouna ai iaia malaila ia la i mea nona e ikemaka aku ai i kana wahine ame ka pilikia e aneane mai ana e hoopilikia i kona ola.

            I ka manawa i ulepaia ae ai o ka uhi a loheia aku la hoi ke poha o ka laau i ka manawa i haki mai ai i ka makani, ua ku koke ae la o Mr. Lanakasa iluna ma kona mau wawae, a me ka leo o ka mea i piha me ka ehaeha hooho ae la

            "O, e Mkaleka!"

`Ua eu pu ae la o Miss Lamasona me kona mau hoaloha mai ka noho ae ana e noho ana a hoomaka aku la ka holo ana. me ka hooho ana ae i na leo o ka pilikia.

            "O, e Makaleka! O, e kuu Akua! Heaha ka'u i hana ai?" ameane loa oia e uwe iho ia manawa. O Mr. Lanakasa keia i hooho ae la.

            Aole hiki ia Robaka ke noho hou iho, o kona ku ae la no ia a holo aku la ma kahi o ka pilikia i ikeia aku ai me kona mama apau. pakele wale iho no oia i na huila o na kaa e hele ae ana no ia manawa o ka huaka'i a pololei aku la no kana holo ana a ma kahi o ka pahu e noho mai ana o ka ohana Walaka, kahi o Mr. Walaka me kona helehelena haikea e hoka wale ana no me ka maopopo ole i kana mea e hana ai. a e hoao mau aku ana hoi i kona ohana i piha i ka maka'u ia manawa, e hoomama ae i ko lakou noonoo, no ka mea, aohe pilikia i koe.

            Ua hoea pu aku la o Mr. Lanakasa ma kahi o ka ohana Walaka e oili mai ana me ka piha i na manao pihoihoi, a haawi aku la i kona lima ia Mrs. Simoa o kona ku ana ae no ia iluna mai ka noho ae, a e nana mai ana nae no kahi kupono ana e oili mai ai iwaho i kahi o ka palekana.

            "E Makaleka, e hele mai! Haawi mai i ko lima ia'u, a na'u e kokua aku ia oe ahiki i kou kaawale ana aku! E manaoio mai oe maluna o'u, a na'u e alakai aku ia oe i kahi o ka palekana!" wahi ana o ke noi ana aku i ka whine i hoopihaia me na manao pihoihoi.

            I ka lohe pono an amai o Mrs. Simoa i ka hoopukaia ana aku la o kona inoa pololei, huli mai la oia e nana i ka mea no ia ke leo o ka pae ana aku la, a i kona ike ana mai i ka helhelena o Mr. Lanakasa. a hoomaopopo mai la no hoi i ka leo i kamaaina mau iaia, alaila i mai la:

            "O, e Hale! O oe anei ia?" Ua hoopuka ia mai ia mau huaolelo ma ke ano ua pahemo wale mai kona mau leelehe mai mamuli o kona piha loa i ke pahoahao ame ke kahaha.

            "Hele mai!" wahi hou a Mr. Lanakasa o ke kahea ana aku, a ia manawa ua pa hou mai la kekahi kikiao makani ikaika a upai ae la i ka uhi e lewalewa ana mahope aku o na noho loloa.

            Eia nae, aohe hele koke mai o ka wahine, ke ku la no oia me ka nana pono mai me ka kahaha loa, me ka huli ana aku o kona alo i kahi e. a i mai la:

            "Aole loa au e hele aku ana me oe! O kona hehee iho la no ia ilalo me he mea la ua haalele mai la kona ikaika iaia, a haule hou iho la iluna o ka noho ana o ka haalele ana iho he mau sekona wale no mamua iho.

            Ua ike mai la o Mr. Walaka i ke keonimana e makemake ana e haawi aku i ke kokua ia Mrs. Simoa, aka nae, i kona ike ana mai i ka hehee ana iho o Mrs. Simoa iluna o ka noho me ka maule, ike iho la oia he kumu anoe paha ko ka wahine i maule ai mamuli o ko ke keonimana hoea ana aku malaila, a no kona lilo loa i ka hoomaopopo i ka pono o kana wahine ame kana mau keiki, no ka lawe ana aku ia lakou no kahi o ka palekana, no ia kumu i hoomaopopo koke ole mai ai oia ia Mrs. Simoa.

            Oiai o ka oihana kinaiahi kekahi i komo pu mai ma kela ka'ihuaka'i hookahakaha. eleu koke mai la na kanaka kinaiahi. ma ka holokiki ana ae e wehewehe i ka uhi e kilepalepa ana i ka makani, a hookaawale aku la mai ka ahakanaka aku e hookaawale ana ia lakou iho a manwa mai kahi aku o ka piikia.

            I ka pau ana o ka Mr. Walaka hana me kona ohana. hoi hou mai la oia e nana ia Mrs. Simoa, me ka hoainu ana iho i ke kahi kulu laau a Mrs. Simoa no e lawe pu ana me ia, a he laau no hoi i kamaaina ia Mr. Walaka i ka lawe pu me ia i na makahiki mamua aku.

            "E Makaleka. e ala ae, e hooikaika ae ia oe, a e ae mai e lawe aku au ia oe i kahi o ka palekana aole no i mamoa loa mai nei aku." i hawanawana iho ai o Mr. Lanakasa ma na pepeiao o Makaleka.

            Peapeahi aku la oia i na maka o Makaleka me kekahi lima, oiai hoi oia e paa aku ana iaia me kekahi lima, a hiki i ka hoea ana aku a kekahi mea, a haawi aku la i kekahi kiaha wai.

            Hopu koke mai la oia a ninini iho la i kekahi mau kuluwai maluna o ka hainaka o Makaleka, a hooma-u aku la i na maka ame ke poo.

Me ke koena iho o ka wai iloko o ke kiaha hoainu aku la oia ia Makaleka, me ke kamailio pu ana aku me ka leo oluolu loa, e koi aku ana i ka wahine e inu aku, a ua hooloheia mai no hoi kana noi.

            Ua lilo kela kiaha wai hu'ihu'i o ka hoainuia ana aku la i mea hoomaha loa ae la ia Makaleka, a o Mrs. Simoa hoi; noho pono ae la oia iluna, a haka pono mai la kona mau maka ia Mr. Lanakasa e ku papu aku ana mauna on a a i mai la:

            "Hele aku oe! Waiho malie mai ia'u!" me kahi leo nawali nae, me ka pale pu ana mai o kona lima iaia i pane mai ai.

            "O, aole au e hele ana a haalele iho ia oe, e kuu Makaleka," wahi a Mr. Lanakasa i pane aku ai me ka leo haahaa a kui. "Ua huli hele au ma ke ao apuni ia oe i na makahiki lehulehu i hala aku me kuu manao e loaa oe ia'u, eia nae, ua lilo ia manawa loihi a'u o ka huli ana i mea hoopau manawa wale me ka waiwai ole, a oiai hoi ua loaa iho nei oe ia'u i keia manawa hope loa. aole loa au e haalele ana ia oe ahiki i kou huikala ana mai ia'u no ka hewa a'w i hana aku ai ia oe. a in a e olelo mai ana oe ia'u e hele me kou huikala ole mai i kuu hewa, alaila aole loa au e hele hou mai ana imua ou a hoouluhua hou aku ia oe.

            "E oluolu oe e hele pu mai me a'u a lawe aku au ia oe i ka Hokele Anetala, kahi a'u e noho nei i nei manawa, ahiki i ka loaa ana ae o ka ikaika maikai ia oe, a, in a he makemake kou e hoi aku i kahi au e noho nei i nei manawa, me oe aku ia. E hiki ana no anei ia oe ke helewawae aku me ko'u paa mau aku ia oe? Aohe no he mamoa loa o kahi a kaua e hele aku ai a hoea aku kaua i kela hokele," a hooki iho la o Mr. Lanakasa i kana kamailio ana me ke kakali aku o ka pane ae o ka wahine.

            "Ina pela e hoao aku au," i pane ae ai o Makaleka me ka pokole loa.

Mokuna XLIL- Hoopihaia o Miss Lamasona me ke Kahaha.

            I ka puka ana mai o ka huaolelo "e hoao aku au," alaila hopu iho la o Mr. Lanadasa a hapai ae la ia Makaleka mai ka noho ae, me ka makemake nui iloko on a e kaawale koke aku laua mai ka ahakanaka aku e hoomaka aku ana e lulumi mahai o laua ia manawa, a i ke kaawale ana mai o laua mai kahi mai o na noho, a mai kahi mai hoi o ka ahakanaka e hoopuni aku ana ia laua, kuiee mai la oia i ka lima o Makaleka iloko o kona, a ka'i aku la me ka hele mailie ana maluna o ke alanui e hoea aku ai i ka Hokele Anetala.

            Aohe pale hou mai o ua o Makaleka i ka lima o Lanakasa, ke mau la ko laua hele ana me ka maikai, eia nae, na like ke keokeo pu o kona helehelena me kekahi lole keokeo loa i hoopiliia aku ma kona mau papalina, me ka haalulu pu o kona mau lala.

            O Mr. Lanakasa pu kekahi e naka wale la no mamuli o ka mau no o kela manao pihoihoi iloko on a no kana mea o ka ike ana i na minuke mamua aku, a no na pane hoi kekahi ana e noonoo la iloko on a e puka mai ana mai ko Makaleka waha mai no kona huikala mai iaia ame ak ole, he mau ninau paakiki loa ana e noonoo ana ia manawa e hiki pono ole ai iaia ke wehewehe a moakaka nona iho, a ke ulu mau la ka hopohopo iloko on a no kona huikalaia mai e Makaleka, no ka mea ua lilo kana hewa i hana ai, a e ku mau mai ana hoi mamua o kona mau maka. i mau mea hoahewa a hoohaahaa iaia iho ia manawa.

            Ua ike maopopo iho oia i kona hewa ia manawa, mawaho ae o na hewa e ao ana i hana ai: ua hoino oia i ke kaikamahine ana i aloha ai iloko o na la apau o kona ola ana, ma o ka haawi ana aku iaia e mare me ka kanaka okoa ame ka haawi ana aku i ke dala kipe ia Habati Alekona, i mea o mare aku ai o Helena ia kanaka.

            Ua hoohaahaa pu oie ia Helena ma o kona olelo ana aohe i kupono kana keiki o Robaka e mare me kekahi wahine haahaa a ilihune. Ua hoao pu oia e hoomare ia Robaka, kana keiki, me Makoli, ke kaikamahine a Mrs. Elawoka, i mea no Robaka e kaawale loa ai mai ka noonoo hou ana aku o Robaka ia Helena, a o ka hope loa, uo hoino mau aku oia ia Makaleka ma o kona olelo mau ana he wahine haahaa a he kelalole kana hana.

            O keia mau hewa apau ana i hana aku ai i kana wahine ponoi ua ala mai la a ku mamea o kona mau maka me he mea la he mau mea kino lakou ana e nana aku ana. a no ia mau hewa ana i hana ai, ua walania loa kona naau ia manawa, me kona noonoo mau iho iloko on a aole paha o Makaleka, kana wahine mare, e huikala mai ana iaia.

            Heaha ana la ka Makaleka e noonoo mai ai nona, in a loaa aku ana ka ike iaia no ka hoao ana o ua o Mr. Lanakasa e hoolala a e hana aku i kekahi hana i mea e o'uia ae ai kona hauoli. a pela hoi me ka hauoli o Helena, kana kaikamahine?

            Pehea ana la ko Robaka manao ame kana mea e kamailio mai ai, ina e loaa aku ana ka ike iaia no ke kipe ana ona ia  ona ia Habati me ka umi kaukani dala i mea nona e mare aku ai ia Helena, he hana hoi e hookaawale loa ia aku ai o Helena mai ka lilo ana aku iaia?

            Ina no ka huaiia ae o nei mau hana lapuwale apau a ua o Lanakasa ma keia manawa ana e halawai nei me Makaleka e huikala iaia, ka hana hoi ana e iini loa ana ia Makaleka e hikala iaia, a ina hoi no ka huaiia ae o nei mau hana ana i ku-e aku ai ia Helena, a pela me Robaka, e loaa mai ana anei kekahi huikala ana iaia mai la laua mai?

            Ia laua e hele la ma ke alanui hookahi wale no ana manawa o ke kamailio ana iho ia Makaleka. a ma kahi hoi ia e aneane aku ana laua e komo iloko o ka hokele.

            "E Makaleka, kuu mea aloha nana i hooniua kuu noonoo no na makahiki lehulehu i hala aku," wahi ana me ka leo haahaa loa, "ke ike nei au ua lilo ko'u hoea ana mai ianei a ike mai la oe ia'u i mea hookaumaha loa aku i kou noonoo, aka e oluolu oe e hoolohe mai i ka'u mau olelo me ka hoomanawanui loa no kekahi mau minuke. a i ka manawa e pau ai ea, nau ia e noonoo iho a e hana aku elike me kau i ike ai he pono," a hooki iho la kana kamailia ana. me ak manaolana poho no nae no ka maliu hou aku o ka wahine iaia.

            Alaila huli ae la o Makaleka iluna a nana ae la i na maka o ua o Mr. Lanakasa, me na waimaka e haale mai ana ma kona mau lihilihi. a pane ae la:

            "Ke ae aku nei au e hoolohe i kau mau mea apau e kamailio mai ai ia'u a no ka mea, ua ike iho no au ahole au i hana aku i ka mea maikai ia oe."

            He mau huaolelo hoolana loa  ae la keia i ko Mr. Lanakasa manao; ua lilo ia mau huaolelo i mau mea hoolilo iaia ia minuke i kanaka hanau hou ia ma ka manao, a ma kona mau maka a manawa he hiohiona o ka hauoli ke naholo ae ana. lamalama ae la kona nanaina. a pololei kana hele ana ia manawa, ke ano o ke kanaka i huikalaia mai kekahi hewa nui mai ana o ka hana ana. Ua loaa koke iaia ka ike ia minuke mamui o ka Makaleka mau olelo o ia pane ana ae la. e huikalaia mai ana oia no na hewa nui ana i hana ai o ka wa i hala.

            Alaila me kela manaolana hauoli e holo la iloko o kona puuwai, huki mai la oia i ka lima o Makaleka a paa loa iloko o kona lima, a me ia ano i ka'i aku ai oia i ka wahine ahiki i ke komo ana aku iloko o ka hokele. a alakai aku la hoi a komo ana iloko o kekahi wahi rumi hookipa uuku ana i manaolana ai e loaa aku ana ia rumi ia laua me kekahi poo ole malaila.

            Eia nae, ua hookokaia ia manao ana on a. no ka mea ia laua i komo aku ai e noho mai ana o Miss Lamasona iloko me kekahi poe maloko o ka Hale "Villa Hoaka," ka hokele a ua o Miss Lamasona e noho ana ia manawa. ua akoakoa ae ia poe a maloko o ia rumi no ke kamaiio ana ma na mea e pili ana i ka huaka'i hookahakaha o ia la, me kekahi o na malihini e noho pu ana maloko o ia hokele.

            O ka hapanui o ia poe e noho mai ana he poe wale no a Mrs. Simoa i ike ai a kamaaina mamua, a iaia i komo pu aku ai me Mr. Lanakasa, haka pono mai la ko lakou mau maka maluna on a, no kona komo pu ana aku me kekahi kanaka i kaulana i ka waiwai ame ka hanohano. me ko lakou hookahahaia aku.

            " O, aole pono kaua ke noho maloko o keia rumi, eia ka hoi ua piha mua mai nei i kela poe," iaia i alakai aku ai ia Mrs. SImoa a hoonoho aku la maluna o kekahi noho ma ke kihi o ka rumi, a pane hou iho la, "aole hiki ia kaua ke kamailio maanei, o lohe mai ananei kela poe i ka kaua mau mea e kamailio ai. E noho iki iho oe maanei. e hele ae au i ke keena oihana o ka hokele, a ninau aku in a he rumi kaawale aku kekahi e hiki ana ia kaua ke noho o kaua wale no, a malaila kaua e kamailio ai."

            Haawi iho la oia i kekahi kunou haahaa ia Makaleka iaia i kaha aku ai e hele a haalele iho la iaia, a i ka ike ana mai o Miss Lamasona i ka hele ana aku o Mr. Lanakasa, hele mai la oia a noho ma ko Makaleka aoao, a hoolauna mai la mai la iaia ma ke ano e manaoia aku ai he hoaloha oiaio oia no Makaleka. eia nae, oia ka wahine nana e lawe hele ana a hoolaha aku i na kee e pili ana ia Makaleka, a iaia e nana aku ana i ko Makaleka helehelena, ua piha koke oia i ke kahaha no ka loli hikiwawe loa o ko Makaleka helehelena mai kela hiohiona nani ana o ka ike ana mamua a i ka hele ae la a haikea loa ia manawa.

            "Ua halawai anei oe me kekahi ulia, i loli hikiwawe loa ai hoi kou helehelena e Mrs. Simoa? Ua eha anei oe? Akahi maoli ka hoi ka loli ano-e hikiwawe loa o kou helehelena?" i ninau aku ai ua o Miss Holoholo Olelo.

            "Aohe au i eha, he piha wale no ko'u i ka maka'u, me ka hoopuiwa pu ia no kela hiolo ana mai nei o ka uhi o ke kahua e noho ai na makaikai i ka makani, a no na hoikeike nani no hoi o keia la," i pane mai ai o Mrs. Simoa . me ka mailie. me kona makemake ole e hoomau aku i kana kamailio ana me Miss Lamasona

            No ke ano hoihoi ole mai o ka Makaleka kamailio ana ua hookuhauiao Miss Lamasona a ke ike iho la no oia iloko iho on a aohe on a hoihoiia i ka hoomau aku i kana kamailio ana, oiai nae aia iloko on a ia manawa ka makemake e ike aku i kekahi mau mea mai a Mrs. Simoa aku e pili ana no ka huaka'i maikai, a pela aku, a o ka hope loa, no ke kumu o kona hele pu ana aku me Mr. Lanakasa, ke kanaka waiwai a hanohano e kupono ole ai o Mrs. Simoa e pili aku me ia.

            He lili mau o Miss Lamasona i ka u'i o Mrs. Simoa,. a pela me ko Mrs. Simoa mau aahu, oiai nae aole no i oi aku ka pii o ke kumukuai o ko Mrs. Simoa mau aahu i ko ua o Miss Lamasona mau aahu e komo ai, koe wale no he kualana paikuolo kona ke komo lole a he kulana hiehie hoi a ma-lo maikai ko Mrs. Simoa ke kahiko mai, a no ka u'i o ko Mrs. Simoa helehelena, a hui pu me kona u'i ke kahiko mai i lilo ai ia i mea huahuwa a lili loa nana me ke kohu ole, he kulana hiki ole hoi iaia ke hoohalike aku. Aole o keia mau ano maikai wale ae la no o Mrs. Simoa kana o ka lili ana, aka no ko Mrs. Simoa naauao a paa rua maoli no kekahi ma ka hoolauna ana a ma ka noho ana hoi iwaena o ka poai o ka poe hanohano o ka aina.

            "He huaka'i hookahakaha a nani maoli nokela i koikeia mai i keia la, aole anei ou manao pela?" i ninau aku ai na o Miss Lamasona, me kona nana ole ae i ke ano ohaoha ole o kana kamailio ana aku e hoihoiia mai ai: "o kela ka makamua loa o na hoikeike nani i ike oleia mamua, a mai ka hoomaka ana mai no hoi o ka huaka'i e ka'i ahiki i ka hope loa. ua ike au i na mea apau i maalo ae mamua o ko'u mau maka Ua hoohauoli ia no anei oe no kau mea apau o ka ike ana ma keia la iho la?" wahi a Miss Lamasona.

            "Ae; a ke manao nei au pela no me na mea apau i ikemaka i ka huakai o keia la." wahi a ka Mrs. Simoa pane pokole.

"Ae, pela no ko'u manao. He mau mea hoikeike ano hou loa kekahi a'u i ike i keia la me ke ano hou loa o ka hoohiwa hiwaia ana. E nana aku i kela wahi kaalio a ka ohana walaka. he nani maoli ka hoohiwahiwaia ana. a ma ka lohe hoikeia mai ia'y o oe pu ka kekahi komo aku e kokua ma ka hoohiwahiwa ana ia wahi kaa, na lio a pela me na aalm kela mau kaikamahine. a i ko'u lohe ana ame ka'u mau mea i ike aku i keia la na hooiaio ae au i ko'u lohe, no ka mea elike me ko'u kamaaina i ke ano o kau hana, pela no au i ike aku u ma keia la ma kela wahi kaalio; o kela wahi kaalio ka oi aku o ka nani mamua o na kaalio e ae a'u i ike ai. a ua ike no hoi au i na kaa apau mai ka mua loa a i ka hope loa."

            "Pela anei?" i ninau mai ai o Mrs. Simoa me ka haawi nui ole mai i kona noonoo ma na mea a Miss Lamassona e kamailio aku ana.

            "Ae; he mau ano hou o ka hoohiwahiwaia ana ka'u mau mea i ike aku ma kela wahi kaalio o ka ohana Walaka i ike ole ia mamua, a elike me ia a'u i hoakaka mua aku nei ia oe nau ka i hoohiwahiwa i kela wahi kaalio. O, he ku maoli no i ka nani ka hoohiwahiwaia ana o kela wahi kaa." wahi a Miss Lamasona. He hoopunipuni wale no nei olelo ana. aohe mea mnana oia i hoike mai. nana ponoi no ia manao o ka haku ana iho, o kona manaoio maoli no i kumu e huai aku ai o Mrs. Simoa i na mea apau a loaa kana mea e kamailio aku a i kekahi poe.

            "He mahalo i'o anei kou?" i ninau mai ai o Mrs. Simoa, he ninau i hulili ae ai na maka o ka wahine holoholo olelo me ka piha loa i ka huhu. a no kona ike ana iho paha aohe i mamaoioia aku ia mau olelo pai ana. hooki koke iho la i kana kamailio ana.

            A hala paha he minuke o kona hamau ana i hou mai la: "O na kaikamahine e kau ana maluua o kela wahi kaalio kekahi mea mahalo nui a'u; o kela mau aahu keokeo o laua me na papale eleele, me na lau uliuli e kau mai ana mahope o laua he ku mauli i ka nani ke nana aku. Aka eia ka'u mea i kahaha iho ai. pehea la oe e Mrs. Simoa i ae aku ai ia Helena e kau pu me Miss Walaka mahope o ka."

            "Mahope o ke aha e Miss Lamasona?" i ninau koke aku ai o Mrs. Simoa, me ka pii ae la o kona kai ia manawa, he ninau hoi i hiki ole ia Miss Lamasona ke pane aku a huli aku la oia i kahi o kekahi poe wahine e kuku mai ana.

            I kela manawa ua hoi mai o Mr. Lanakasa mai ka hee ana aku e huli i rumi no laua e kukakuka ai o laua wale no, a e ku ana oia ma ka puka; ua ike aku la ua o Miss Lamasona i ka pupuku o na maka o Mr. Lanakasa oiai oia e ku mai ana nana pono iaia.

            Aole hiki ia Mr. Lanakasa ke komo koke mai mahope o ka hoi ana mai a ku ma ka puka. mamuli o ke alaiia aku o ka puka e kekahi mau wahine e ku ana malaila a e kamailio ana i kekahi mea e pili ana no Mrs. Simoa, aole nae lakou i ike aku ia Mr. Lanakasa aia oia malaiia kahi i ku mai ai hoolohe ka lakou mau mea e kamailio ana i ka loheia aku la eia. he mau olelo hoi nana i hoopii ae la ike ula ma kona mau papalina me ka piha pu i ka inaina no na olelo hoohenehene a ia mau wahine ia Mrs. Simoa, o keia malalo nei na olelu ana o ka lohe ana mai:

            "Ae." wahi a ka wahine e kamailio ana o kela mau wahine. "Wahi a Mrs. Lamasona o ka olelo ana mai ua ike o Mr Elawoka ia Mrs. Simoa mai kona manawa mai he kaikamahine wale no, a o kela inoa ka la e kapaia nei maluna o kela wahine he inoa kapakapa wale iho no ia no ka huna ana iaia iho, o ka mea oiaio hewahne kela me ka ino maikai ole."

            "A , orau pu no kekahi i lohe i kena mea au e kamailio mai la,'i kahamaha koke mai ai kekahi o na wahine e kuku ana ma kahi kokoke aku ia Mr. Lamasona, "eia nae ea. o kela kekahi o na wahine helehelena u'i i ka'u nana aku, aole oia wale, aka, he wahine pu oia i hoonaauao maikai ia a h lede oiaio oia ma na ano apau, a no ia mau ano maikai on a a'u i ike aku ai i hiki ole ai ia'u ke manaoio i na olelo e hoinoimoia nei nona, ma ko'u manao ua ala mai kena mau olelo mamuli o kekahi manao ino, lili, a imihaa, aole ma ke ano maikai nei."

            "Pela paha. aka nae o keia ka'u mau mea o ka lohe ana o pili ana nona, a ke manaoio nei au he oiaio ia mau mea apau i kamailoia mai ai ia'u," wahi a ka wahine nana na olelo mui o ka hoopuka ana ae, "no ka mea, ma ka Mrs. Elawoka olelo. aole ka o Mrs. Simoa kona inoa oiaio, a o kela kaikamahineana, he kaikamahine poo ole, aohe on a makuakane. A eia nae, oia kekahi i kau pu mai la me Miss Walaka ma ke kaa lio i hoohiwahiwaia a oi aku ka nani mamua o na kaalia o ae ma keia la, he kaikamahine i kupono ole e kau pu me Miss Walake, e lilo aku ai oia i mea hoowaia i ka inoa mai wai o kela ohana."

            Aole hiki ia Mr. Lanakasa ke kakali hou iho me ka luki ole iaia ke hoomanawanui i ka ehaeha no nei mau olelo a na wahine, ua like ka hulili o kona mau maka ia manawa me ko ke kahi tiga wahine, o kona helehelena ia manawa ua like ke keokeo me kona lauoho; o kona komo mai la no ia manawaena o na wahine a hele pololei mai la no kahi a Mrs. Simoa o noho ana, me ka pii no hoi o ka ula ma kona mau papalina a kakali ana o ka paue hou aku o Miss Lamasona no kana ninau.

            "Kupanaha, ke manao nei au aohe waiwai o kou ninau ana mai mahope o kou lohe ana i na mea apau i kamailioia nou ame Helena," wahi a Miss Lamasona, he mau huaolelo lohe pono ia aku e Mr. Lanakasa i kona manawa o ka hele ana aku a kokoke loa ma kahi a laua e noho ana. Ua ike mai la ua o Miss Lamasona ia hele ana aku o Mr. Lanakasa a ku malaila, a ma ka helehelena o ke keonimana ana o ka ike ana mai aia kekahi hiohiona ana o ka ike ana mai i wiwo iho ai oia me ke ano hilahila pu.

            "E Mr. Lanakasa," wahi a ua o Miss Lamasona o ka pane ana mai ma ke ano hookanaaho i ka manawa i ike mai ai i ke ku aku o Mr. Lanakasa, "alaila, ua kamaaina mua no ka paha oe ia Mrs. Simoa nei, e Mr. Lanakasa Ua ike aku au i kou hele ana aku e kokua iaia nei a lawe mai la iaia maiwaena mai o ka ahakanaka e pioo ana ia manawa, aole nae au i manao ua ike mua oe iaia nei. ua manao wale iho no au i hele wale aku no la oe e kokua iaia nei."

            Ua wehe o Mr. Lanakasa i kona papale iaia i komo mau ai iloko o ka rumi, a ia manawa aia oia ma ka aoao o ka wahine ana i huli ai no na makahiki lehulehu i hala, me ka paa o kekahi lima on a i kona papale me ka pololei i kona kinno. a e hoike ana hoi i kona kulana ua helu pu ia oia mawaena o na kaukani o ka poe waiwai a hanohano maloko o ke kulana kauhale o Nu Ioka.

            "Ae," i pane ak uai oia i ka wahine e nana mai ana iaia me ka helehelona wiwo. me ka nui hoi o ka leo e lohe mai ai na wahine apau e noho ana maloko o ia rumi, a i ko lakou ohe ana mai ia leo o Mr. Lanakasa o ka pane ana aku, oki iho la ka lakou kamailio ana.

            "Ua ike a ua kamaaina loa au i keia lede no ka iwakalua a oi aku makahiki i hala, a o kou lohe pono aku keia, o ka'u wahinemare ponoi keia,"

(Aole i pau.)