Ka Nupepa Kuokoa, Volume LIX, Number 38, 23 September 1921 — Page 5

Ka Nupepa Kuokoa

 

 

 

He Moolelo no

KONARADI KENEKONA

a i ole

Ka Hiena o na Awawa Kuhoho ame Demona ka Lio Eleele Kupaianaha

 

Oiai nae lakou nei e hoomaha ana ike aku la lakou i kekahi kanaka. e hele mai ana maluna o kona lio, ma kahi mamao loa mai ia lakou aku, e pii mai ana iluna o ka mauna, ma ke alahele pololei e loaa mai ai lakou nei.

I kinohi o ka ikeia ana aku o ua kanaka la, ma kahi mamao aohe wahi mea o onioni iki o Mr. Dukona, pela no hoi me Felipe, aka i ke kokoke ana mai o ua kanaka nei. e hiki ai ke hoomaopopoia aku kona ano, ia wa i ku ino ae ai o Mr. Dukona iluna, a ninau mai la ia Felipe:

“E hiki ana anei ia oe ke hoomaopopo aku i kela kanaka e hele mai la?”

“Ma ka’u nana aku, me he mea la, ua kamaaina no kaua iaia, alia nae hoi a kokoke loa mai, hiki pono ia’u ke ike aku i kona helehelena” eia nae, oiai no ua o Felipe e nana la, ia wa i hooho hou ae ai, mamuli o kona ike ana aku, aole oia i hoohewahewa i kana mea i manao mua ai:

“Auwe!   O Keaka Bilika ae keia!  Heaha la keia hana ana e hele mai nei?”

Ike i’o aku la o Mr. Dukona, ua pololei ka ike a Felipe, ia wa i hoike okoa ae ai ua kanaka nei i kona piha me ka pihoihoi, me ke ku ana ae iluna, a nana aku na me namanao nauki, e hoike okoa mai ana kona ano, i kona iini loa, e hoea koke mai kela kanaka imua ona.

Aole no i loihi loa kela kakali ana, hoea mai la ua kanaka nei, eia ka o o Keaka Bilika i’o no, a iaia i ike mai ai i ko lakou nei noho aku, pane mai la oia me ka piha i ke kahaha:

“Auwe, eia ka oe e Mr. Dukona ma keia wahi, aole loa au i moeuhane mua, e loaa mai ana oe ia’u!”

“Ea, heaha keia hana nui au e hele nei e Keaka?” wahi a Mr. Dukona, ke kanaka ino, o lakou apau.

“E kakali malie iho oe pela, a loaa ia’u ka maha, he keu aku maoli ka hoi ka ikiki o kela piina.”

Me ke kakali hou ole iho, haalele mai la o Mr. Dukona i kona wahi e hoho ana a holo aku la imua o ke kanaka malihini, me kona ninau koke ana aku:

“Heaha ka nuhou e Keaka Bilika?”

“Heaha mai auanei kau, ua lele ka manu mai kona punana aku!”

“E olelo mai ana anei oe ua pakele o Mr. Kenekona?”

“Ae, ua pakele ka manu mai kona punana aku!”

I kela lohe pono ana no o Mr. Dukona, i na olelo, no ka pakele ana o kana pio, noke ae la oia i ke kamailio i na olelo kuamuamu a ninau hou mai la:

“Pehea i pakele ai ke pio? Ua poho anei ko kaou mau manaolana?”

“Aole he wahi manaolana iki i koe e Mr. Dukona, a eia au ke holo mahuka nei no ke kaawale koke aku mai keia aina aku, elike ma ka hikiwawe e loaa ana ia’u, o ke alahele wale no e pakele ai kakou apau, o ia ka haalele ana iho ia Amerika Hema nei, a imi aku i mau wahi okoa loa e pee ai.

No kela mau hoakaka a Keaka Bilika, ua kulana mai la o Mr. Dukona, o ia no oe o kekahi mea i loaa pono mai i kekahi puupuu mahanhana mamua o kona umauma, no kona ike ana iho, ua weluwelu liilii kana papahana. Aia hoi o Konaradi ke hoolohe malie mai la i ke kamailio o kela mau kanaka, a ua hoopiha loa ia aku oia me ka olioli, iaia i lohe mai ai ua pakele kona makuakane, a ua pahu’a hoi ka papahana, a ka poe kolohe i hoolala ai, no ka aihue, i na waiwai o kona makuakane, a mamuli wale no o ka hiki ana iaia ke hoomanawanui, i noke ole ae ai oia i ka uwa, ma ke ano e hoohoka aku ana i kona mau enemi.

“e hoike pono mai oe, i ke ano o ka pakele ana o ke pio! Ua huli ku-e mai anei o Juana ia’u? Ina pela ea, e kau aku ana maluna ona ko’u inaina.”

“Aohe au mea e hana aku ai no kela kanaka, no ka mea ua make oia.”

“Auwe no ka hoi e ! Pehea oia i halawai ai me ka make?”

“Ma kekahi o na huakai powa a Juana i hele ai, ua make iaia kekahi o na luna oihana kiekie o ke aupuni, i ka wa i ikeia mai ai o kana mau hana kolohe, a no ka make ana o kela luna oihana, i hoounaia mai ai na pualikoa o ke aupuni, me ka hookoloia ana mai o Juana, ahiki i ka loaa ana, a kiia oia a make, a no kona mau hoa, ua pau loa lakou i ka paa. Ma keia ano iho la i loaa mai ai o Mr. Kenekona, e noho pio ana, a hookuuia aku oia e hele lanakila.”

“Eia oia iheai keia manawa?”

“Aia oia maloko o Sanatiego. Ma ka ulia laki wale no i pakele mai ai ‘au, ina nei no kona ike lihi mai ia’u, ina aole kaua e halawai pu i keia la.”

Me kela mau hoakaka mai ia Keaka Bilika mai, noho mumule loa iho la o Mr. Dukona, no kona piha hoonaukiuki, no ka pahu’a ana o kana mau mea apau i hoolala ai, e maopopo ole ai iaia kana mea e hana hou aku ai.

Iloko o keia manawa e kamailioia nei na olelo maluna ae, ke noho kukule wale mai la no o Felipe, eia nae, ua like no kona hoonaukiuki me ko Mr. Dukona, no ko lakou hoohokaia ana, ma na mea apau a lakou i hoolala ai, no ka ohi i kekahi pomaikai nui.

“O ka’u a’o wale no ia oe e Mr. Dukona, o ia kou hoi hou ana ihope, o keia ka leo o ke ola,” i hoomau hou mai ai o Keaka Bilika i ke kamailio ana: “O kou kaawale loa mai Kili aku nei, e lilo ia i moto nou mai keia wa aku, no ka mea i lohe oe i ka wa’auanei a Mr. Kenekona, e hoike ae ai i na inoa, o ka poe na lakou i hookau aku i na poino maluna ona, a i hoolala e aihue aku i kona mau waiwai, aia ma ilio hanu meheu o ke aupuani mahope o ko kakou meheuia ina aole ana e nele ko kakou paa mai i ka hopuia.”

Hiki hou ole aku la ia Felipe ke noho malie, aka ku okoa mai la oia iluna, me ka hookeke ana mai i kona mau niho, a pane ae la me ka leo okalakala, o ka mea i piha me na inaina:

“Ina i hoolohe kahiko mai o Mr. Dukona i ka’u mau mea i a’o aku ai iaia i kinohi, ina aole loa e hoea mai keia hopena maluna o kakou.”

“Ke makemake nei au e ninau aku ia oe e Felipe, heaha kau mea i a’o mai ai ia’u?” i huli mai ai o Mr. Dukona, me ka hulili o kona mau maka, i ka huhu.

“He keu no hoi, ua olelo aku au ia oe, e pepehi ia Mr. Dukona a make, i ole ai oia e hoopilikia mai ia kakou. Ina e kanuia kona kino ma kekahi wahi nalo loa, aole e loaa i ka poe huli noke i ka imi, a ina no paha e loaa ana ia lakou, aole e hiki iaia ke kamailio mai i kekahi mea.”

“Auhea ae e Felipe, ua paa ko makou manao, aole loa e hookahea ke koko o ka mea hala ole, me keia hana.” i pane mai ai o Keaka Bilika, me kona hoomamao ana aku iaia iho mai ia Felipe mai.

“Pehea, ua holopono anei kau mau hana me kela hui Pelekane?” i ninau mai ai o Mr. Dukona ia Bilika, me he mea la o kahi manaolana hope loa ia no ko lakou ohi mai i kekahi pomaikai.”

“Aole i holopono, ina nei no ko’u hoonohonoho hou aku a hala kekahi mau la, malia he mea ia e holopono ai, aka nae, no ka nui o ko’u maka’u, o paa mai auanei i ka hopuia, o ko’u haalele aku nei no ia i ka noho ana ma kela wahi, a holo mahuka mai nei, eia ka e halawai pu ana kaua.”

“Heaha ka mea i ulolohi loa ai kau hana me kela poe, a hala okoa keia mau mahina loihi?”

“E ike mai hoi paha oe, he elua mau manawa a na akena o kela hui, i hoouna ai i na palapala i Pelekane, no na a’o ana mai ka hui mai, nolaila he hana apa maoli kela, o keia iho la ke kumu o ka holopono ole.

Aia no o Konaradi ame Kakeo ke noho la ma ko laua wahi, me ke kamailio ole aku o kekahi i kekahi, a i ka maopopo loa ana i na opio na mea e kamailioia ana mawaena o kela poe kanaka, ia wa i neenee loa aku ai o Konaradi a pili ma ka aoao o Kakeo, a hawanawana aku la iaia:

“Aohe au hopohopo ana e kuu hoaloha, no ka mea ke manaoio loa nei au, e haalele mai ana keia poe kanaka ia kaua. a e holo mahuka ana lakou, i pakele mai ka paa ana mai ka hopuia. Ua pomaikai maoli kaua, ua ikeia na hana kolohe a keia poe kanaka.”

Ua hoakoakoa ae la na kanaka ekolu ma kahi hookahi, e kukakuka nui ana i ka lakou mea e hana ai, he hookahi no nae manao nui, a na opio e koho aku la, o ia no ko lakou hooholo ana e hoi hou ihope, o ke alahele wale no ia o ko lakou palekana, a iloko o ka nanea o na opio, lohe aku la laua i ka pane ana mai o Felipe me ka leo nui, me kona ku okoa ana ae no hoi iluna:

“Mamua o kuu ae ana aku i ko olua mau manao ea, ke makemake nei au, e inu mua ka poka o kuu pu raifela i ke koko o kela ilio kawa-u.” me ke kuhikuhi ana mai no kahi a Konaradi e noho aku ana.

Kauoha mai la o Mr. Dukona ia Felipe e noho iho ilalo. aole nae he maliu aku o ua kanaka ino nei, aka unuhi ae la oia i kana pahi a paa iloko o kona lima akau. o ka hele mai la no ia imua, me ka manao e hookau mai i ka make maluna o ke kanaka opio.

Ua hele o Konaradi a piha loa me ka maka’u, no kona ike iho, aole ana mea eha, a ke hoomaopopo aku la no hoi oia, i ka manao ku’io iloko o Felipe no ka hookau ana mai i ka make maluna ona, oiai aole he nanawa hou aku i koe a kela kanaka, e kakali ai no ka hooko ana mai i kona manao hoomauhala maluna o ke kanaka opio.

No Kakeo hoi, iaia i ike aku ai i ka hele mai o Felipe me ka pahi loihi iloko o kona lima, ua uwe koke ae la oia, me ka moe palaha ana iho o kona alo ilalo.

Ke nana la o Konaradi, o ka ike aku i kekahi pohaku, o ka mea apiki nae, he pohaku paa wale no ko kela wahi, aole ana mea e manao ae ae e lalau aku no ke kupale ana iaia iho, aole hoi e hiki iaia ke holo. oiai he haiki loa ke alanui, ina no e kapeke kana hehi ana, o kona haule no ia i ka pali, he make wale no ka hopena e kau mai ana maluna ona.

iloko o ko Konaradi ola ana, aole he manawa e ae ana i ike ai ia mea he maka’’u elike me keia, aia hoi o Felipe ke hookokoke loa mai a iaia, a ke ike aku la kona mau maka, i ka hulali mai o ka oi o ka pahi a ua kanaka hapa Paniolo nei, a ina nei no kona makemake ole e inu mai ka maka o kela pahi i kona koko, alaila o ke alahele wale no e hookoia ai ia manao, o ia kona lele okoa aku i ka pali, a haule aku ilalo, a make loa.

Ua palaka loa ko Konaradi manao, no kona lio punahele iloko o keia mau minuke o kona poino, iloko o kona nanea, he kapalulu ana kana mea i lohe aku, aia hoi oloio ana o Demona mamua o kona alo, me ke kihelu ana aku o kona mau wawae mua ia Felipe, a oiai ua ike mai la kela kanaka i kona poino, alo ae la oia. a hala aku la na wawae mua o Demona ma kekahi aoao ona, eie nae, ua hele aku la oia a ku ma kahi nihinihi loa o ka pali.

No kela hoohokaia ana aku paha hoi o Demona, no ka loaa ole ana o kona enemi, ua hooi loa ia ae ka hhu o ua lio nei, o ka huli hou mai la no ia, a hoohuli ae la i kona mau wawae hope, no kahi a felipe e ku mai ana me ka pahi nui, a mamua o ka hiki ana i ua hapa Paniolo nei, ke hana mai i kekahi mea, no ka hoopakele ana ae i kona ola, o ka wa no ia i haawi aku ai o Demona, i kekahi peku mahanahana loa, a loaa pono aku la ka umauma o ua o Felipe, o ka lele koheoheo aku la no ia i ka pali kuhoho, me ka nana ole aku o Konaradi i kona hopena, he hookah nae mea maopopo loa, ua hakihaki liilii kona kino, in a apanapana liilii.

I kela ike ana o Konaradi. ua kaawale loa oia mai ka poino mai, kii mai la oia a huki ae la ia Kakeo iluna, oiai no ua keiki nei e palaha ana kea lo ilalo, e kakali ana paha. o ka hou ia aku o kona kua i ka pahi. a’o ia ka Konaradi o ka pane ana iho ma kea no hoolana i kona hoaloha:

“Aole a kaua hoahakalia hou ana iho ma keia wahi, e kau koke oe maluna o kou hoki, a hoomau kaua i ka hele ana imua, me ka nana ole aku in a mea a ko kaua mau enemi e hana mai ana!”

Me ka hakalia ole no hoi, i kau koke ae ai o Kakeo maluna o kona hoki, pela no hoi me Konaradi maluna o Demona, a mamua o ka maopopo ana ia Mr. Dukona ame kona kokoolua, ka manao o na kanaka opio, o ko laua nei iho aku la no ia, a haule ana i kahi haahaa,. me ka awiwi ana aku i ka laua hele ana, ke noke mai la ua mau kanaka ne ii ke kahea ia laua e ku aku, aole nae he hooloheia aku o ia mau olelo, a o kahi no hoi o ka laki. aole he ki mai o kela mau kanaka i ka laua mau pu, nolaila ua palekana loa na opio.

 

MOKUNA XXXL

 

Ma ka hora umi-kumamalua o kela la, hoea aku la na kanaka opio no kekahi wahi kauhale uuku, malaila i hoomaha iho la laua, no ke kuai ana i mau meaai na laua, a no ka hanai ana no hoi i ko laua mau holoholona.

He mau hora helu wale no ko laua o ka hoomaha ana ma kela wahi, alaila hoomau aku la i ka hele ana nomua, ua hele no hoi a ahiahi, hoea aku la laua no kekahi kulanakauhale, malaila i loaa ai ia laua he hale hookipa, me ko laua nei hookipaia ana aku maloko o kekahi rumi maikai, me ke emi loa a he kupono no hoi na meaai i haawiia mai ia laua ma kela wahi.

Ma kela po, iloko o ko laua hele a luhi, me ka makehiamoe pu. aole laua i hoi koke e hiamoe, ahiki in a hora o ke aumoe, mamuli o ko laua noonoo me ke kamailio ana, no kea no o ka laua mea e hana aku ai. no ko laua pono.

“Heaha kau mea i noonoo ai e hana aku e Konaradi i keia manawa?” i ninau mai ai o Kakeo i kona hoa, oiai laua maloko o ko laua rumi. “Ua lohe aku nei no kaua i ka hoike a kela kanaka malihini, ua pakele kou makuakane, aia oia ma Sanatiego, nolaila pehea e loaa ai ua makuakane nei ou?”

“Aia kaua a hoea aku no Sana Rosa, mailaila au e holo pololei aku ai no Sanatiego. O ke alahele e hiki ai, maluna o ke kaaahi, o keia ka’u mea i hoomaopopo.”

“I kou hoea ana no Sanatiego, he kulanakauhale nui loa kela, o ke kulanakauhale poo ia o Kili, pehea iho la oe i manao ai e loaa kou makuakane me ka maalahi ma kela kulanakauhale?”

“Ma kuu manaoio maoli, i ko’u wa e hoea ai ma kahi nui o na kanaka akamai i ka olelo Beritania, he hana maalahi na’u ka noke ana aku i ka ninau ia lakou, malia paha, aole no i ike ka hapanui o na kanaka o kela wahi i kuu makuakane, aka e loaa ana no nae kekahi poe, i ike iaia, pela au e kau aku ne ii ko’u mau manaolana no ka hui hou me kuu makuakane me ka maalahi loa.”

Me kela mau kamakamailio ana no ke ano o ka laua mea e hana aku ai, no ka huli ana ia Mr. Kenekona, haule aku la ua mau keiki nei hiamoe, a ma ke kakahiaka nui o kekahi la ae, i puoho mai ai laua, ua hele a oluolu maoli ko laua mau maka, a mahope o ka ai awiawi ana i ko laua aina kakahiaka, o ke kau ae la no ia maluna o ko laua mau holoholona, hoomaka aku la ka hele ana, ma ke alahele e hoea aku ai no Sana Rosa.

No ke kakahiaka nui loa paha hoi o kela haalele ana iho a ua mau kanaka opio nei, ke honi la laua, i ka moani aala o na pua, oiai he pua wale no ka laua e ike aku la ma kela ame keia aoao o ke alanui, a he kumulaau huaai kekahi e ku mai ana, i hele no hoi a lulu i ka hua, a ua pala memele kekahi mau hua, a o ia ka Kakeo o ke kamailio ana ae i aKonradi:

“Helae mai la ka hoi au a ono i kela huaai pala memele iluna o ke kumu laau,” me kona kuhikuhi ana aku i kahi o ke kumulaau e ku mai ana.

“O ko’u manao maoli ea, mai kii aku oe e a ii kekahi o kela mau huaai, aole kaua i ike, eia ka auanei, he huaai kupono ole kela, o ko kaua noho pouliuli, he poino ka mea e ukali mai ana, mamuli o kekahi hana hawawa. O ka palekana no ea, o ia ka waiho malie ana i kela mau huaai, aole e hoopa aku ia lakou.”

Oiai no ua mau opio nei e hoomau la i ka hele, me ko laua mamao mai ke kuahiwi mai, ike aku la laua i kekahi hale e ku mai ana ma kahi mamao, a he nani no hoi ka hiona o ka aina ke nana aku ma kela wahi.

Ma ka hoomau ana no i ka hele imua me ka hoomaha ole, hoea aku la laua no kekahi wahi kulanakauhale uuku i kapaia ka inoa o Loka Loi, he akea maikai ke alanui ma ia wahi, e hiki ai ke kaa ke holo, no ka mea he palahalaha maikai ka waiho ana o ka aina.

Oiai ua ku haiki ka la, hooholo iho la na opio e hoaumoe malaila, me ka loaa o kekahi wahi kupono no laua e hiamoe ai, a ma ka auwina la o kekahi la mai, i hoomau aku ai laua i ka hele ana nomua, a hele no hoi a ahiahi ma kela la, hiki aku la laua no Sana Rosa, he hokele ko kela wahi nolaila hoi aku la laua ma ka hokele e noho ai, no ia koena la, ame ka po ana iho.

O ka Konaradi hana mua loa, i ka hoea ana aku no kela kulanakauhale, o la no ka hui pu ana aku me kekahi poe, no ke kuai ana mai i kona hoki, ua holopono loa kana mau hooikaika ana, no ke me ua lilo aku la ka hoki, no kekahi kumukuai makepono, a ua hoohauoliia mai no hoi ke kanaka ipio, no kela kokua nu ii loaa mai la ia laua.

Oiai ua hele na kanaka opio a piha me ka lepo, o ko laua hele aku la no ia e auau ma kekahi wahi i hanaia no na malihini, a ia laua i komo mai a ii ko laua maul ole, ua maikai maoli ko laua mau kino; a oiai no hoi ua hele laua a polloi, o ka hele aku la no ia e ai maloko o ka hokele, a i ka maona ana, hoonanea liilii iho la, ahiki i ka lulumi ana mai o ka makehiamoe, o ko laua hoi aku la no ia e hooluolu.

Ma ke kakahiaka ae o kekahi la, ua hele hou o Konaradi e hooikaika, ma ka imi ana i kekahi mea e ae mai ana e malama i kona lio, no ka mea aole oia i makemake e lawe pu ia Demona ma kela wahi aku o ka laua huakai, a aole no hoi ona makemake e haalele iho i kona lio punahele mahope, koe wale no a loaa iaia kekahi kanaka e ae mai ana e malama pono i kona lio me ka maikai.

Ma kela hooikaika ana, ua loaa i’o aku la iaia kekahi keonimana, i ae mai e malama ia Demona. ke ukuia aku oia me kekahi uku maikai, nolaila ua hoomama loa ia ae la ko Konaradi manao.

Aole he ku i ka hoihoi ke nana aku i kela kulanakauhale, mamuli paha hoi o ke ano o ke kukuluia ana o na kauhale o kela wahi, pela hoi me ke ano o na kanaka, ke nauki wale la no na kanaka opio, o ke ku loke mai o ke kaaahi, i haalele iho ai laua ia Sana Rosa, a hoomau aku i ka hele ana e huli ia Kimo Kenekona.

Mahope nae o ke kakali ana me ka hoomanawanui, ua ku mai la kekahi kaaahi, o ko laua nei kau aku la no ia, aole no he kupono loa o kela ano kaa, eia nae, aole he nana ana ae iloko o ka wa o ka pilikia, aia ka pono o ka hoea aku no kahi a laua i lohe mai ai, aia o Kimo Kenekona ilaila.

Holo aku la keia kaaahi, ahiki i kekahi kulanakauhale okoa aku. ilaila e ku mai ana kekahi kaaahi, i like loa me na kaaahi o Amerika, ua lilo keia i mea hoohauoli loa mai i ka manao o na kanaka opio, o ko laua kau koke aku la no ia maluna o kela kaaahi, me ka loaa he mau noho oluolu no laua.

O ka mea nae nana i hookahaha loa aku i ko laua noonoo, o ia no ko laua lohe ana aku in a kanaka o kela wahi, e kamailio ana i ka olelo Beritania, a o ka olelo Paniolo no hoi ka kekahi poe, e kamailio ai.

Ke ike la laua in a keiki hapa-Ilikini, e kahea ana me ka leo nui, in a meakuai, elike me na keiki kuai nupepa ma Amerika.

No ka hapaha hora paha kela kakali ana o ke kaaahi, ma kela wahi, ua kani ae la ke oeoe, o ka hoomaka aku la no ia o ke kaa e holo. Ke ike la ua mau kanaka opio nei, he he nui na kanaka Pelekane amen a kanaka Amerika maluna o ke kaaahi, ua kahikoia hoi lakou apau me na lole maemae, a ke hookukuia mai me ko laua nei maul ole e komo ana, he ku maoli i ka hilahila.

He nanea maoli ko laua nein oho ana maluna o ke kaaahi, e holo la no Sanatiego, a i ka hoea ana o ke kaaahi no ka hale hoolulu ma kela kulanakauhale, o ko laua nei lele aku la no ia ilalo, me ka maopopo ole nae o ka laua wahi e hele aku ai. Mamuli nae o ke akamai o na kanaka o kela wahi i ke kamailio i ka olelo Beritania, nolaila aole he hana paakiki na laua nei, ka hele ana aku e ninau, ma kela ame keia wahi, i ka laua mau mea apau e makemake ai.

O ka laua hana mua loa, mahope iho o ka haalele ana aku i ka hale hoolulu kaaahi, o ia no ka hele ana aku maloko o na hokele, e huli ai ina paha aia o Kimo Kenekona maloko o kekahi o kela mau hokele kahi in oho ai, iloko nae o ia mau hooikaika ana apau, ua poho wale ko laua mau manaolana, oiai aole laua i ike iki i ka inoa o Kimo Kenekona, moloko o na bukeinoa o ka poe apau e noho ana ma na hokele.

I na kanaka ipio nae e hele nei ma na alanui o kela kulanakauhale, he nui na hiona malihini i halawai mai me ka ike a ko laua mau maka. Ike aku la laua i ke kaa hapaumi. i ka holo ma na alanui. me ka piha oloko o ke kaa. a kau iho na kanaka maluna o ka hale i hanaia maluna o ke kaa, a o kekahi mea nana i hookahaha loa mai i ko laua noonoo, o ia no ka ike ana aku, he poe wahine ka poe ohi dala aole hoi he poe kane.

Ua hele na alanui a piha me na kaa like ole, e hukiia ana e na lio amen a hoki, pela hoi me na kaa pipi halihali ukana. O na Paniolo no ka hapanui o na kanaka o keia kulanakauhale, me ka nui no nae o kekahi mau lahui e ae.

Ma keia la holookoa. aole he hana e ae a na kanaka opio, o ka hele huli wale no maloko o na hokele, ia Kimo Kenekona, a no ka hoea e ana in a hora o ke ahiahi, hoopau okoa ae la laua i ka huli ana, me ke kaumaha maoli o Konaradi, no ka loaa ole o kona makuakane iaia.

Ua nui no ka laua nei poe i ninau aku ai ina paha ua ike lakou i kekahi kanaka ma ka inoa o Kimo Kenekona. he hookah no a lakou pane. e haawi mai ai ia laua nei, aole he kanaka ma kela inoa, a lakou i ike ai.

Ua hoopilikia loa ia mai ko Konaradi noonoo. no kela loaa ole o kona makuakane iaia, no ka mea ina pela iho la kona hoaa, alaila e halawai ana oia me kekahi haina maikai ole, no ka mea aole he nui o kana mau dala i koe. e hikik ai ia ia ke hoomau aku i ka huli ana i kona makuakane.

Ma kekahi hokele o ke kulana haahaa, i hooholo iho ai na opio, malaila laua e hiamoe ai ma ia po, a mahope o ko laua ai ana i ko laua aina ahiahi, hoi aku la ua mau opio nei noloko o ko laua rumi, a ia ka Kakeo Wilikona o ka ninau ana mai i kona kokoolua;

“Ina no ka loaa ole o kou makuakane ia kaua, pehea iho la ko kaua pono?”

“He hookah wale no hana ma ko kaua aoao, o ia ka hele aku e huli i kekahi hana na kaua e lawelawe ai, i hiki ai ke loaa mai ka kaua mau meaai. He mau kanaka Amerika kaua, me na kino ikaika, a ke manao nei au, aole he hana paakiki ka loaa ana o kekahi mau hana na kaua, oiai o na lahui e, ka poe na lakou e lawelawe nei i ka hapanui o na oihana ma kela wahi.”

“He keu aku ka keia o ka mea maikai ole, i ko’u hele aku e hooikaika i ka hana, ka mea i maa ole ia’u. i ka wa e noho ana me ko’u mau makua,” wahi a Kakeo me ka luliluli anan iho o kona poo.

“Aia oe a hele i ka hana, e hooikaika ana, i wahi e loaa mai ai kau mau mea e ai ai. alaila kupono kou ola ana ma keia honua, he mea ia e makepono ai ke ola e ke Akua i haawi mai ai ia oe. Heaha auanei ka like ole kou hele aku i ka hana, mai kela noho kauwa kuapaa ana aku ou, malalo o ka haku o ka hui hana keaka? Auhea oe e Kakeo, ina he maka’u kou mau lima i ka hana, ke a’o ikaika aku nei au ia oe, e hoopau loa la noonoo, a e hoolilo ia oe i kanaka makua.”

“Aole o’u noonoo iki, e hoea mai ana i ka manawa e konoia mai ai au e hele kino i ka hana.”

“Aole keia he manawa no ke kunana ana, no ka mea o ka pilikia auanei ka mea nana e koi mai, he hookah wale no alahele, e komo ole ai iloko o ka poino, o ia ka hooikaika ana ma na ano apau, i wahi e loaa mai ai na mea apau au i makemake ai. Ua hiki ia kaua a elua, ke komo ma kekahi oihana kalepa, e liko ai kaua i mau kanaka waiwai i kekahi la, a ia kaua auanei e huli hoi aku ai no Nu Ioka e ikeia mai ana kaua, oia ke kanaka kupono loa e mare aku me Zona Kanakoa, kela kaikamahine huapala no hoi au e hoopipili mau aku ana ma kona aoao.”

“Ua mare kahiko aku nei paha kela kaikamahine i ke kane, aka nae ina aole oia i mare, ke manao nei au aole oia ka’u wahine e mare ai. He kaikamahine u’i no kela, me ka piha hoihoi mau, aka nae no kona makuakane. oia kekahi kanaka haahaa loa, me ka nele i kekahi kulana hanohano, koe wale no kela oihana lunaleka.”

“Aole o ke kulana oihana a kekahi kanaka e lawelawe ana, ka mea nana e hoohaahaa iho iaia, aka o ke ano o kana mau mea e hana ai, a ke i aku nei au ia oe e Kakeo, o kena kekahi o na manao lapuwale loa, e pono ai oe, e kiola mailoko aku o kou poo. Ke olelo mai nei oe, aohe ou makemake o Zora kau wahine e mare aku ai, ma ko’u manao nae, o kela kaikamahine, ka makemake ole e mare mai mae oe mamuli o kona ike i kou ano lapuwale.”

Ma kela wahi o na kamailio mawaena o na opio no Zora Kanakona, ua noi aku la o Konaradi i kona hoa, e hoopau loa ko laua kamailio ana no kela kaikamahine, me ke koi ana aku no hoi o Konaradi ia Kakeo, e hele laua i ka holoholo, no ka makaikai ana i ke kulanakauhale.

Ua kauluwela na alanui in a kukui, he malamalama wale no na wahi apau, aka nae, ma na wahi e kokoke ana i ka hokele aole he nui o na kukui malaila. nolaila haalele iho la o Konaradi ma i ko laua hokele a ia laua e nanea ana i ka hele, hopu aku la o Konaradi i ka lima o Kakeo, a huki mai la ihope, me ko laua nee ana ae malalo o ke aka o kekahi hale, o kahi pouliuli ia e ike ole ia mai ai laua e kakahi mea.

“E nana aku paha oe la aia o Habaki Dukona ke ku mai la! Ua hookolo mai kela kanaka ino mahope o ko kaua meheu,” me ke kuhikuhi ana aku o Konaradi i kekahi kanaka e ku ana ma kahi mamao mai ai laua nei aku, a ma ka malamalama o ke kukui e pa pono aku la a kona helehelena, i hiki ole ai ia Konaradi ke hoohewahewa aku iaia, o Dukona no kela, koe wale no nae, ka hele o kona mau papalina a hohoma ke nana aku.

E ku malie ana ua kanaka nei i kahi hookahi, me ke kulou hoi o kona poo ilalo, me he mea la he hana nui kana e noonoo la. Oiai enana aku ana me ka piha maka’u no ke kanaka a laua i kau ai ka weli, ia manawa i oili ae ai kekahi kanaka, a laua nei i ike maopopo loa aku ai, he Paniolo kona lahui, aia hoi iloko o kona lima akau, e paa ana oia i kekahi pahi loihi, a ma ke ano o kona hele ana. ua hiki loa ke kohoia aku kana hana. no ka hoopoino no ia i ke ola o ka mea a laua nei i koho aku ai o Habaki Dukona.

 

MOKUNA XXXII

 

Me ke kakali hou ole iho, a i ole, hoike aku paha ia Kakeo i kana mea e hana ai, o ka holo aku la no ia o Konaradi me ka mama apau i loaa i kona mau wawae, a mamua o ka hooko ana aku o ka mea puuwai eleele, i kana hana powa, ua pa’i aku la o Konaradi i ka lima e paa ana i ka pahi, a lele ana ka pahi ikahi e, mamua o ka hookoia ana aku o ka manao lapuwale o kela kanaka ino.

I ka manawa i lele aku ai ka pahi i kahi e, ua noke ae la, ka mea pepehikanaka i ke kamailio i kekahi mau olelo hailiili, ma ka olelo Paniolo, me ka hoomaka ana aku e holo a nalowale iloko o ka pouli, no ka mea i manaoia e pepehi, i ka ike ana mai i ke ku aku o kekahi keiki opio imua ona. pela hoi kona ike ana mai, i ka holo ana aku o kekahi mea a nalowale iloko o ka pouli, nolaila hooholo iho la kona lima, mahope o ka pakeke o kona lolewaewae, a pane mai la:

“Heaha keia. wahi ana, me kona maopopo ole, i ka pakele mahuehane ana mai o kona oia mamuli o ka hoea ana aku o ka hoopakele i ka wa kupono loa.

Aole o Konaradi i pane aku no ka ninau a kela kanaka, aka i aku la oia i ka pane ana aku:

“O oe no anei o Kimo Kenekona?”

“Aole, o ko’u inoa ia, aka no kou helehelena. me he mea la ua kamaaiana mua no au. Owai oe?”

“Owau no keia o kau keiki!” i pane aku ai o Konaradi. No kela pane a Konaradi, ua kuemi aku la o Kimo Kenekona ihope, no ka mea ua aneane e hiki ole iaia ke manaoio mai i kela mau olelo, a hooho ae la:

“O oe anei ka’u keiki? Ma na ano apau, ke kanalua loa nei au, eia nae o kou helehelena, kou mau maka. o na ano no ia apau o kuu wahine aloha.”

Ma kela mau hoakaka, i hiki hou ole aku ai ia Kimo Kenekona ke kanalua no kona halawai pu ana me kana keiki. a iloko no hoi o ia manawa hookahi. ua hoopihaia aku oia me ka hauoli loa, no ke koa ame ka wiwoole o kana keiki, ma ka hoohoka ana, i na kanaka i hoao mai ma na ano apakee apau, i wahi e lilo aku ai na waiwai ia laua.

I ka lohe ana o Kimo Kenekona, no ka hopena i kau aku maluna o kana wahine, ua hoopiha loa ia oia me ke kaumaha, o ka mea wale no nae nana i hoomama ae ia manao kaumaha ona, o ia no ka pakele ana mai o kana keiki mai ka make mai

(Aole i pau.)