Ka Nupepa Kuokoa, Volume LIX, Number 35, 2 Kepakemapa 1921 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, HONOLULU. T. H. POALIMA, SEPATEMABA 2, 1921.

 

NUPEPA KUOKOA

SOLOMON HANOHANO, LUNAHOOPONOPONO      HOOPUKAIA I NA KAKAHIAKA POALIAM APAU

POALIMA     SEPATEMABA 2, 1921

E ALA AE A HOOKANAKA.

            He mea ehaeha a kaumaha no no ka naau ka olelo mauia o na kanaka Hawaii i ka holomua ole ma na hana a pau, ka molowa, ka palaualelo, ka hoopilimeaai malalo aku o hai, ka noho hoopili wale, ka hoopau manawa wale iho no ma na hana waiwai ole, ka uhauha, a nui wale aku, he mai olelo hoonaukiuki mailo ke noonoo iho i kekahi poe, ka poe i ike maoli io ia no ka pololei o keia mau olelo, aka nae, i ka poe e noonoo ana he mau olelo a e koi aku ana e oni ae, e hooikaika ae ala ae e lanakila malina o keia mau ano laikai ole, apau e nee imua a lanakila, he olelo e ola ai, he olelo e a'o mai ana e kaawale aku keia mau ano maikai ole a pau mai kekahi aku, a mai kekahi lahui aku, a e ala ae, i lanakila ole mai ia mau olelo hailuku.

            I ole ai e hoohalikeia na Hawaii me ka pipipi ka nee malie loa, ka pii ae no a ka pohaku malaila iho la no e ou ai a hoi iho no i ka poopoo e noho ai, aohe oni aku ma o a maanei, oia ma kahi hana liilii wale iho la no na Hawaii e kokolo ai a hoi iho la no iloko o ka hale e noho ai, me ka oni ole o ka noonoo a hana aku i kekahi hana nui a holomua e nui mai ai ka pomaikai; a i ole, me ka pioeo paha, ka pipili ma ka aoao o ka moku a i ole i kekahi pauku laau e lana ana iloko o ke kai; a i ole kekahi pou paha e ku ana iloko o ke kai, a na ke kai e hanai mai iaia, oia hoi, ka noho wale iho no o na kanaka Hawaii, ma ka hoohalike ana, hoopau wale i ka manawa ma ka noho palaualelo ana, ma ka hoopau wale ana i ka manawa ma na hana e loaa ole ai o kekahi pomaikai, a kaukai aku e na hai e hanai mai, elike me ke kaukai o ka pioeoe i kona ola na ke kai e hanai mai; a i ole me ka heepali paha, ka lalama wale no ma o a maanei o ka lae kahakai a hoi iho la no a ka lua noho me ke kaukai na ka papai no e hele aku i kona lua, pela ka mea e lalama wale ana no i o a ianei me ka maopopo ole o ka loaa mai o kekahi hana a mau mea e pono ai ke ola ana; a i ole me ka paoo paha, ka lekei mai kekahi kaheka aku a i kekahi i ka manawa e ike mai ai i ke kanaka, pela ka mea e holoke ana i o a ianei me ka loaa ole o kekahi kahua paa e ikeia aku ai kana hana i ka holomua, a i ole kona kupaa ma ka mea hookahi aole hoi e panau wale aku i o a ianei me ka maopopo ole o ke onipaa o kona manao ma kekahi mea, a i ole, me ka wana paha, ka loloa wale iho no o ke kukuna, nana aku nui ke kino mawaho, eia nae, ka wahi ae he olohaka wale no oloko, pela na ka hoohalike ia ana o kekahi poe, he maikai ka nanaina mawaho, ke nana aku me he mea la ua piha i ka ike ame ka naauao, ka lako ame ke kuanoono, aka nae, i ka haha ana aku ma na aoao apau, he olohaka wale no oloko, oia hoi ma ka hoohalikeia ana he lawe poo wale no he hakahaka nae oloko, a ina e ku mai i na kui e eha ana.

            Ea, e ka lahui Hawaii, he makemake no anei oe e kapaia aku me keia mau mea i hoohalikeia ae la? Ina aole, alaia pehea oe e hana ai e pakele ae ai mai ke kapaia ana aku elike me kahi o keia mau mea ae la? Ua hoohalike kekahi mea i na kanaka Hawaii elike la me na mea i hoikeia ae la oia hoi ka pipipi, ka pioeoe, ka heepali, ka paoo lekei ame ka wana.

            Me ka maopopo loa ke nana aku aole makemake o na Hawaii e hoohalikeia lakou me kekahi o keia mau mea ae la, aka e hoohalikeia lakou me kekahi o na mea uhane a ke Akua i hana ai e oni ana, e hana ana, e imi ana i na mea e pono ai keia kino, e huli ana i ka waiwai, e hooikaika ana e holomua ma na hana hiki ke hana aku, a e hooikaika pu ana e loaa ka naauao a pela aku. E pono e loaa ka manao nini i na kana Hawaii no keia mau olelo kupono ole ae la, a e hooikaika e lanakila maluna o na olelo hooiloilo, a no ia manao e ae mai e hoakaka aku keia pepa i kekahi mau alahele i manaoia he mau alahele e lanakila ai, e lawe aku, ke kupono a mai lawe ke ku ole i ka ii.

            Ka mua, e malama pono loa i ke ola kino, ke kumupaa e loaa ai na pono ame na pomaikai apau; ka lua, e hana kela ame keia, kane a wahine, elike me na lahui e noho nei iwaena o kakou; ke kolu, e pakiko ma na mea apau; e hooikaika e hoahu dala, elike me ka kekahi poe Hawaii kakaikahi e hana mau mai nei; e hooikaika e loaa i home ponoi, i ole e noho hoopili wale aku malalo o hai me ka nui o na hoolilo i na uku hoolimalima o na hale; ina e hiki ana o ka hoohuihui i ka ikaika, ka manao lokahi, ame ke dala kekahi hana e holomua ai ma o ke kuai aina ana, alaila mahele ia apana aina mawaena o na kanaka Hawaii e huihui ana; e kukulu i kekahi hana i mea e hiki ai e hoolawaia aku na kana Hawaii me ka hana, o ke kahua e holopono ai o keia hana oia no ka hoopono ame ke aloha i ka hoakanaka, o ke koena aku o na hana e manaoia ana he mea ia e holomua ai kekahi kanaka a mau kanaka a lahui paha, na kela ame keia e noonoo akahele nona iho.

            Ua kaulana na kanaka Hawaii i ke aloha, ka heahea, ka puuawai hamana, ame ka lokomaikai; ma keia hana e ikeia ai ke aloha, ka loomaikai a pela aku, o na Hawaii, oia hoi, ma ke kokua ana iaia iho a ma ke kokua ana i kekahi puulu a i ole ka lahui holokoa paha. He mea pono a ku i ka mahaloia ke ku ana mai o ka poe Hawaii kuonoono o ka aina a hapai mai i kekahi hana no ka pono o ka lahui, ua ikeia ka ke Keikialii Kuhio hana aloha, aole oia wale no ka mea i alo ha i ka aina ame ka lahui he nui hou ae, aka nae aohe lakou ikeia aku,

            O kekahi o na hana naauao loa a na kanaka Hawaii e hana ai oia no ka hui ana a kuai i kekahi apana aina nui, alaila mahele mawaena o lakou, a maluna o ia apana ama lakou e noho ai a mahiai ma na ano mea kanu e hiki ana e hoouluia malina o ia aina. Aole na aina mahi laiki i nei manawa i onaia e na Pake apau loa, he mau aina hoolimalima ka hapanui o na aina e mahiia nai nei e lakou i ka laiki, kakaikahi na aina i ona ponoiia e lakou, ina ua hiki i na Pake ame na Kepani ke hana ia hana, no ke aha la e hiki ole ai i na Hawaii ke hoohalike me ia? Eia no ka haina, no ke dala ole a na Hawaii, aka nae, ina e hui ana na Hawaii e loaa ana kekahi huina dala nui, a me ia huina dala e kuai a e hoolimalima ai paha i kekahi aina nui, o ka loaa no ia o ka aina nui kupono i ka mahiai. No keia hana, a i mea e loaa ai kekahi aina nui i na Hawaii he mea pono a he hana aloha hoi na ka poe Hawaii i lako i ke dala ke kuai, a i ole ka hoolimalima ana i kekahi aina nui kupono i ka mahiai, a e hoonoho aku i na kanaka Hawaii ake aina maluna o ia mau aina me ka uku hoolimalima kupono, ma ia ano e loaa ana ka hana a kekahi mau kanaka Hawaii a e hoowaiwai pu ia aku ana ka mea nana ke dala a ona paha o kekahi aina, o ka lua, o ka mea e hoopomaikaiia aku ana oia ke aupuni ame ka lehulehu, e loaa ana i ke aupuni ke dala no ka auhau, a e loaa pu ana hoi i ka lehulehu na meaai mai na kanaka Hawaii mahiai a i ole hanai holoholona paha.

            He nui aku na hana i koe i kupono na na Hawaii e hana ai, aka, ua lawa keia mau hoomaikeike ana aku i kekahi mau alahele e hoaloia ae ai na olelo hailuku mai na Hawaii ae, a na kela ame keia e nini ana i na olelo hailuku e noonoo e a ala mai ka hiamoe ae a hookanaka iho.

            E a'o ia na keiki kane a wahine i ka hana, a no ka mea o na keiki o keia la o lakou aku ana na makua o keia mua aku, ina aole e hoomaheleia ana na keiki i ka hana ahiki i ka@ @ni @anai e@lilo ana lakou i poe molowa@a palaualelo@@@ kai hope e lilo ana lakou i poe haihai kanawai piliwaiwai@ aihue aku, a o ka hopena loa e lilo ana i poe powa a o ka halepaahao a i ole oluna o ka amanalika naka kahi e uku ai i kona hoopa i he hopena ino loa mamuli o ka hookuukuu wale ana o na makua me ka hooikaika ole e a'o aku i ke keiki i ka hanaame ka malama ana i ke dala. Ke molowa loa mai nei na keiki o keia au i ka hoomau i ka he@o i ke kula, makemake e hele koke i ka hana i loaa koke ke dala, a i ka loaa ana o ke dala he lala ka hana ame na hana piliwaiwai e ae, a e lilo aku ana lakou i mau pioeoe a i ole i mau pipipi, a i ole i mau heepali lalama wale no a hoi aku no a loko o la lua noho, o ka niho ke hookeke mai a iluna no o ka makua ke koikoi e hookau mai ai elike me ka malama ana iaia i ka wa bebe. Ea, e na makua Hawaii, makemake no anei oukou me keia mau ano ae la ka oukou mau keiki ma nei hope aku? Aole, oia ka pane maopopo loa. No laila i hala ae ai nei ale nui e uhi mai ana maluna o ka lahui Hawaii e lilo ka holomua o na lahui e e noho nei mawaena o kakou i kumu alakai a i kumu hoohalike no kakou; aole no i nui loa ka naauao o kekahi poe o na lahui e e noho mai nei, aka nae, ma ka hoomau i ka hana, ka pakiko, ka hoomakaulii, ka hoao e hookuonoono ame ke kokua o kekahi i kekahi ua holomua loa lakou, a ma ia ano ua oi aku ko lakou naauao i ko kekahi hapa o na Hawaii, he hana hiki wale no ia e hana ia, hookahi wale no kumu i hiki ole ai, he lahui lili a huahuwa ka lahui Hawaii, aole makemake i kekahi e pii ae, o ka makemake no ea e hoi iho no a ka iliwai like hookahi ka noho ana ilalo, ilalo a ilalo. Ua lehulehu no na Hawaii i hapai i kekahi mau hana i manaoia he mea ia e holomua ai ka waiwai, aka, mamuli o keia mau kumu popo i hoikeia ae la, a hui pu me ka loaa ole o ia mea he lokahi, ua haule wale me ka hoea ole aku i ka pahuhopu i makemakeia, no ia kumu mau no ka noho o na Hawaii i ka noho mahope loa. a nana aku i ka holokiki o na lahui e, ua akea a molaelae ke alahele no na Hawaii e nee ai imua o ka hana ole nae ka pilikia, nolaila mau no ka hooheneheneia mai. E pau na hooheneheneaia mai e pono ai. E ala a e hookanaka.

 

KU KULA HANALIMA UKU OLE.

            Ma ka la 12 Sepatemaba e hiki mai ana, ka manawa e hoomaka hou ai na kula aupuni, e weheia ana he kula a'o hanalima maloko o ka Y. M. C. A. no na keikikane, he kula keia e haawi wale ia mai ana o ka ike i na keiki, a he pomaikai nui hoi no na keikikane e iini ana e loaa ka ike hana, nolaila ke hoolalelaleia aku nei ka manao o na makua mea keiki e hooikaika aku i ka lakou mau keiki e hele ae i keia kula haawi waleia mai o ke ike me ka auhau ole.

            Ma ka po keia kula e aoia mai ai i na keiki, ha manawa kaawale loa no lakou e hiki ai ke hele ae no ke a'oia mai no kekahi mau po o ka pule, a oiai eia keia pomaikai nui no ka pono o na keiki no nei mua aku ke hoolakoia mai nei, he pono i na keiki e makaala mau ae i ka hele ana i keia kula, aole o na keiki wale makeia haawina makaala, aka o na makua pu kekahi ina e ike ana lakou i ka hoolohe a hoolalau a makemake ole paha o ke keiki, e a'o aku ia me ka manao maikai o ka hana ia e loaa ai ia lakou ka ike hana ma nei mua aku ke lilo ae lakou i mau kanaka makua.

 

Nuhou Kuloko

            Na ka Professor Henri Bergar, ke kumu mua o ka Bana Hawaii, e alakai ana i ka bana ma Kapiolani Paka ma keia Sabati iho.

            O ke ana keikei loa o ka wale @naloko o Honolulu iloko o na hora he iwakalua ikumamaha i pau ma ke awakea o nehinei he 86 degee, o ka haahaa loa he 76.

            Ehiku iniha ke anapuni o kekahi ko nui o ka laweia ana mai i Honolulu nei no ka hoikeike ana mai kekahi aina kanu ko mai o Kekaha, Kauai, i palau oleia.

            E noho ana ka halawai a ka poe i kuleana i ka Pa Ilina o Puuomao, Moanalua, ma keia Sabati iho, Sept. 4 ma kahi maa mau, ma ka halekula o Moanalua.

            He aha hulahula nui ke haawiia ana maloko o ka Hale halawai o Holokahana, Poola Hall, ma ka hora 7:30 o keia ahiahi malalo o na hooponopono ana a ka Kilohana Jazz Club.

            O kekahi o na bebe i hanauia mai maloko o Honolulu nona na paona he 13 ua kapaia ma ka inoa o ka Peresidena Harding, o kona inoa piha o Warren Harding Downing.

            Ma ka hoomaopopo aku i nei manawa e aneane ana no e holo pono ole ka bila hoopae mai i na limahana Pake i Hawaii nei mamuli o ke ku e ikaika mai o ka ahahui uniona a na limahana.

            He luina kai loaa aku i ka makai e waiho ana ma Papiolani Paka ma ke ahiahi Sabati iho nei ua kupouli loa kona noonoo i ka alehohola ana o ka inu ana a hoihoiia aku i ka halema 'i ma Puuloa nona ka inoa o Wilkinson.

            No ka eha mamuli o ka hooku'i ana aku a ke kaa otomobile a hina ilalo a i nana maka wale iho no ke kalaiwa i laweia ae ai o Aame@ne i ka halema'i o na@poino ulia no ka lapaauia ana mai ma ke Sabati nei.

            O ka halawai a ka Ahahui Kokua a Manawalea o na Poola o keia Poakahi oe Sepatemaba 5, na hoopaneeia aku a ka halawai k@hau, Poakahi ekolu, Sepatemaba 19 hora 7:30 p. m.

            He onawaliwali ko ka Lunahooponopono o ke Kuokoa i keia mau la a ua mama ae a malia e ikaika kupono ana o@a no ka hana ma keia pule ae, ma kona pakaukau hana i maa mau laia.

            Ke ike ole ia iho kekahi mau manao o kekahi poe i kakau mai nei no ka Hoop@@@@@lana ak@ e noonoo iho i ua pihakuialoa ka l@a ukana o ka moku i nei pule, hoomanawanui iho a oili aku.

            He kaa kalaka i piha me na buke moolelo kaao ame na buke o na ano e ae ka i hoounaia aku e ka Advertiser i ka halepaahao e Kawa e ku mai la ma Kalihi-kai no ka pomaikai o na paahao e noho mai la malaila.

            Ma ka lono i loaa mai i keia kulanakauhale e hoakaka ana ia i ka holopono o ka hana haawi ahamele a na haumana mua o ke kula Kamehameha e kaahelo mai la ma na mokupuni mawaho o ka hooikaika ana e loaa kekahi huina dala no ke kiahoomanao o Miss Ida Pope.

            I kulike me ia a ka Elele Jonah Kuhio Kalanianaole o ka hoike ana ae maluna o ka Mokuahi Maui, a ma kona home no hoi ma Waikiki, o keia kona kau hope e noho ai ma Vakinekona ma ke ano he elele, mahope o kona hana ana no ka lehulehu nana makahiki he 20 i hala.

            Ma ka home ae o ke Ke@alii Jonah Kuhio Kalanianaole ka Alanui Mamakakaua ma ke ahiahi Poala nei no ka ika ana i ke keikialii a @ ka hoike ana ae hoi i ko lakou mai manao maikai no ka hoi hou ana ma @ ke Keikialii me ke ola maikai a @ ka haawi ana he i ka mahalo no @ holopono o ka ke keikialii hooikaik ana a hooholoia ke kanawai Kon@ina o na Home Hawaii e ka aha@@lo.

 

NA LUNANUI NO KEA NEE ANA AKU.

            Ua malama pu ia ka halawai hana o na C. E. mahope iho o k@pau ana o ka hoolohe an i ka mana@ o ka Hope Peresidena Nui o na Mokupuni o Maui Molokai, ame Lanai. N@ ke koho ana i na luna nui no keia nee ana aku, penei na mea i hoohol@:

            Mr. Makea peresidena Jonah Kawaiaea, hope peresideno; Jonah Kawaiaea, puuku; Aliee Kapai, k@kauolelo; Julia Naone, hope kakanoleloa apono loa ia.

            Na J. W. Kawaakoa he leka hoakaka noi na kekahi o na ala o ka ahahui C. E. o Wananalua, o na kokua, a noonoo ia, a ma ka noonoo ana, ua noi mai ka mea nana ka leka, e hoopau loa ia a apono loaa. A hoopanee ka halawai hana m@ka himeni ame kapule maa mau.

S. K. KAAILUA,

            Kakauolelo o ka h@awai hana o na C. E.

            Kipahulu, Auh. @ 1921.

 

Nuhou Kuwaho

            PARISA, Aug. 30.-Hookahi kaukani hale i lukuia e ke ahi ma Scutari Legino. He rumi no 1000 kanaka ke ke aoao Asia ke kulanakauhale o kona tinopela wahi o kekahi lono i loa ae i ka nupepa Journal. Ua hui pu ake na pualikoa o na aupuni huuia i hoonohoia maloko o Konatinopela me na kanaka kinaiahi ma ke kinai ana i ke ahi ahiki i ka pio ana.

            NU IOKA, Aug. 30.-Ua koho waleia aia ma kahi o $4,500, 000 i ukuia aku i na poe make i inisuaia no na koi no ka poe make, i na ulia kaa otomobile i ka makahiki aku la i hala. Ma na huahelu i hoolahaia ae ma keia la e hoike ana ia he 12,000 poe i make a he 1,500,000 poe i ola mahunahuna mai.

            SANAHAI, Aug. 30.-He lono ka i loaa mai ianei e olelo ana o na hooikaika ana apau e loaa ke kino o Rev. W. C. Hooker, i piholo ai iloko o ka Mulewai Iehang ma ka la 28 o Iune ua waiwai ole. Ma ka manawa o ko Hooker make ana me ia pu kana mau keikikane elua, he 12 a he 14 makahiki pakahi o laua, e huli hoi mai ana lakou ma ke alahele no Amerika mahope o ka pau ana o kana misionari ne na makahiki he 30 maloko o na aina oloko loa o Kina.

 

HOUHOUIA KE KINO O KEKAHI WAHINE PILIPINO ME KA PAHI

            Na ka lili i hapai mai i ka inaina no ka hoolalao o Ewa me kekahi kanaka okoa aku a hoohanaia ka pahi no kahooko ana i ka inaina. He Pilipino nona ka inoa o Dayamen ka i paa ae i ka hopuia ma ka po Poakolu nei, mahope iho o ka paee ana me Floreneia Kaneda, he wahine Pilipino, a houhouia ka wahine Pilipino me ka pahi pelu no umikumamalua manawa.

            I kulike me ka moolelo a ka Makai George o ka hoike ana ae, o ke kumu o ke ala ana mai o nei hou pahi ua piha inaina o Dayamen i ka wahine no ka hoolalao me kekahi Pilipino e aku a no kona piha loa i ka lili me ka hiki ole hoi ke umi i kona inaina, ua hooko aku ia oia i kona inaina me ka manao e make ka wahine ma ka houhou ana aku iaia me ka pahi ma kona poo, ma ka ai a ma ka nui kino, a no ia eha o ka wahine i laweia mai ai oia noloko o ka halema'i o na poino ulia no ke kamana ana aku i kona mau wahi i nahaha, a o ka mea pepehikanaka hoi no ka halepaahao no ke kali ana no ka hopena o ka wahine.

            Aohe i nui loa ka hana a na makaikiu ma ka huli ana ia Dayamen, ka Pilipino pepehikanaka, no ka mea, ua loaa koke no oia mahope iho, a kai huluhuluia mai no ka halepaahao. Hana mai no nei lahui i nei ano kaaima, he keu aku nae a ka lahui pinili loa ia e na kaikamahi Hawaii.

 

HE HOOMAIKAI I KE KULA SABATI O KIPAHULU

            Ma o ko makou kakauolelo ke haawi aku nei makou i na hoomaikai piha no ka oukou mea i hana mai ai, oia hoi no na mea e oluolu ai ke kino ame kahi e moe ai o na haipule. Ua ai alawa i ka lokomaikai ou e Kipahulu, pela pu hoi me na keiki o ka hui mahiko o Kipahulu, ke haawi pu aku nei makou i na hoomaikai no na hana manawalea a lakou, kaa kalaka nana i halihali mai i na haipule mai Hana mai ame na makana Lauoliwa pu kekahi. Nolaila oluolu e lawe aku i neia mau hoomaikai a na no ko kakou Haku aloha, e hoopiha mai i ko oukou waihona pakahi.

            Owau iho no me ka haahaa.

                                    M. K. Reuter,

            Hanaia ma Kaupo, Maui, Aug. 22, 1921

 

NA MARE

            George Lokai ia Georgina Wright Aug. 26

 

NA HANAU

            Na James Poe ame Jennie Kaahaaina he keikikane Aug. 7

            Na Mr. ame Mrs. Thomas Kanahelo he keikikane Aug. 16

            Na Mr. ame Mrs. Kahani ke kaikamahine Aug. 19

            Na Fred Wm. Kaleionohi ame May Lani he kaikamahine Aug. 28

            Na Jos. K. Apana ame Maria Burningham he keikikane Aug. 29

 

NA MAKe

            He hepe na Mr. ame Mrs. Lino, ma ke alanui Moi Aug. 18

            Heleu Kaleikini, ma ke alanui Moiwahine Aug. 20

            Stephen Umauma, ma ka halema'i Moiwahine Aug. 24

            Peter Louis Bunker , ma ke alanui Colburn Aug. 25

            Kalani Kihei, ma ke alanui Manoa Aug. 26

            Mr. Mi, ma ka Home Lunalilo Aug. 28

 

NA LEKA KII OLE IA MAI AHIKI AUGATE 27, 1921.

Ahuena, Harry                        Kali, D.

Akimo, Peter               Kamalu, Robt.

Anahi, H. A.               Kaninai, Hattie

Losia, Car.                   Kapela, Jno.

Kaa, Jos.                      Ke, Jno.

Kaeo, David                Kekoowai, J. K.

Kaeo, Dinah                Keawe, Jno.

Kaia, Lukia                 Keawehaku G. K.

Kauhi, Joa.                  Lukela, Eliz.

Kahani Jos.                  Malailua, Joe

Kahunaui, Jos              Makanui, Mrs.

   Mary                                   Naale, Mr.

Kaimi, Dora                Poepoe Ed.

Kaimi, Ed.                   Pio, Mele

Kau, Wm.                       Piko, Kaeleloo (2)

Kahoe, Lani                Piko, Hele Mrs.

 

…OIA MAU NO NA KUHINIA O KA UANOE O KOLOA.

            Ma ka la 17 o ka mahina i hala oiai o James Kimokeo, ame Jacob Mahu, e hoi mai ana mai ka lawai'a mai maluna o ko laua waapa aila, a ike kupono ana mawaho pono aku o Lawai, ike aku la laua i kekahi mea i kahi manao loa, o ka laua hoomaopopo i kela manawa, he hoailona ia no kekahi waapa iloko o ka pilikia.

            Nolaila, ua hoohuli ae la laua i ko laua waapa no kahi o ka waapa poino, oiai i ka laua hoomaopopo iho i kela manawa, me he la he 8 mile a oi aku, ka mamao mai ia laua aku, aka, he mea ole ia loa i keia mau keiki ua lawa, oiai ia manawa koke no, ua kulai pau ia mai la ke ki nui o ak Biku ana no ka hooi hou ana aku i ka holo imua, aia ka pono ahiki koke aku, i kahi o ka waapa poino.

            I ko laua hookokoke loa ana aku, i kahi o ka waapa poino, ua ike aku la laua, ua hukiia ae kekahi mea iluna o ke kia, ma ke ano he hoailona no ka poino. I ka pili ana aku o laua, ma ka aoao o ka waapa pono, he elua wale no Kepani maluna o keia waapa, he nui ka laua mau i @ i loha aole a laua ai i koe, a ua poino kekahi wahi o ka mikini, o ko laua waapa, nolaila, ua hoopaa ia mai la ke kaula, mahope o ko laua nei waapa, a hoomaka mai la laua e huki i keia waapa poino, a hiki i ke komo ana ma na ae kai, o Kukuila me ke palekana.

            Ua hanai aku la laua i ka poi, ame ka i'a maka, nui ka hoonuu oiai ua hele a polola haawi mai la i na hoomaikai he @@@ ia balala ma, no ka hoopakele ana i ko laua mau ola, me ka uku ole, a huli hoi niai la na keiki o ka Uanoe.

            Ma ka la 22 mai i hele aku ai keia pae i ka lawa'ia. Amaama, Ahole, ame ka Opae, ma ke kahawai o Kawailoa, no, lakou iho keia mau inoa; James Kimokeo, Jacob Mahu Kaili, Mrs. Solomon Naleielua, Mrs. Kapa, ka makuahine maikai Mrs. J. S. Chandler, a o kahi e@ no hoi o Makahuena kekahi; nui ka makou Amaama, oopu, opae, ua hele no hoi ka piko o keia mau i'a like ole, a he kelekele wale no, ke nahu iho oe paki liilii ka momona.

            Maluna o ka pahoehoe keokeo, i paina iho ai makou, i ko makou aina awakea, me keia mau ono, poi palaoa, poi me ka pia, na oopu momona, Amaama, Ahole, Opae, uioi akaakai Oopu pulehu, auwe no hoi ka ono e! Le moni wale mai la no paha kou kaae la, no ke iho la i ka hoonuu o Keoni Bulu, ua loaa pono aku la i ka pikuana; halale ke kai i ko lehelehe.

            Me ka Lunahooponopono ko'u mahalo nui, ame na keiki oniuhua kepau o kou papapa'i ko'u Adieu.

                        PETER KAMANO SR.

            Koloa, Kauai.

 

ANOAI O KA MAKANI KOLOLIO

            Mr. Solomon Hanohano Lunahooponopono o ke Kilohana Pookela o ka Lahui Hawaii; Aloha kaua:-E noi aku ana au i kou oluolu no'u hoi kau wahi rumi kaawale o ka hiwahiwa o Hawaii nei no kahi Poomanao e kau ae la maluna, oia hoi keia:

            Ma ke kakahiaka Poaono hora 8 a. m. Augate la 13, 1921. I hoohuiia ae ai kekahi mau opio u'i nohea ma ka berita maemae o ka materemonio o ka mare e ka Makua Rev. Father Bruno, ma ka Malu Ulu o Lele Lahaina, oia hoi o William Kupahu Maxwell, ame Miss Elizabeth Hiilei Seabury. O na paa mare i hoohuiia ae la he mau moopuna na ka mea kakau, a o laua no hoi a elua he mau keiki hanau no ka makani kokololio nei.

            I ka pau ana o na hana mare malaila ua haawi ae no na makua hanai o ka wahine he paina mama, no na paamare ame na hoaloha, malaila oiai hoi na makua o ke kane e hoomakaukau ana i kekahi paina nui ma ko laua home ma Waikapu nei, oia no o Mr. ame Mrs. George Maxwell, a i ka hoea ana mai o na paamare, ua hoholaia mai la he mau pakaukau i luluu pono i na ono a ka Hawaii ame ka na haole oia keia, poi uouo kaohi puu, palaoa lawalu ono a Kaehu, puaa momona pii i ke kumu pepeiao na i'a maka hou o Maalaea, opihi moe kehau o ka lae o Papawai, limu pahee o Koholaiki, @@@ eleele moani ke ala o ke kai o Hauola, meaono, waimomona, a pela wale aku, ua hiki pu mai no hoi na poe apau i konoia, iwaena o lakou o ka L@nohooia o ke Kalana o Maui nei, Chas. Wilcox, Mrs. G. Cumming wahine a ka hope makai nui; Wm Coekett, hope luna auahu, ame Rather Bruno. Malaila pu ae na moho kaulana o ke ao nei, oia o Hanale ame Keoni Bulu, hookahi no pa'i a Keoni Bulu ma ke poo, mama ana ka wawae o ke kolohe i ka holo ua ai a lawa i na mea i hooomakaukauia, aohe hoohalahala.

            A ka ua naulu i ke kula maluhia na mea apau, a hookuu ia i na hora o ke aumoe, a ke kalokalo ae nei ka'u leo pule i na lani e hoopihaia na paamare opio me na pomaikai mai luna mai ame ka noho hauoli ana.

            Ke hooki nei au maanei me ka mahalo nui i ka Lunahooponopono ame na keiki ulelehua mekala.

            Ko'u a mau.

                        MRS. KAAILAAU MALAI,

 

PAHU AE KEKAHI MEA ME KA LOA OLE O KA POINO.

            Mamuli o ke pahu ana o kekahi mea, ma ka nuku o ke awa mawaho aku o ka Papu Armstrong ma ke kakahiaka nui Sabati i lilo ai i mea hoopoino i ka Uwapo Helu 2 o ka Papu Armstrong ame ka hale o ka oihana hoopaelimahana Amerika a lele io a ianei na mamala hao e lilo ai i mea e make loa ai kekahi poe i na no ka loaa pono aku, oiai ka mokukuna lawe papa a Kakela & Kuke e hu e ana i ka laau ma ke awa o Kewalo.

            Ma kahi he 50 kapuai ka mamao mai kekahi kao nui mai i piha i na haneri poka 7 iniha e kali ana no ka halihaliia aku i ke awa o Puuloa, i pahu ae ai kela omole nitroglyeerine elike me kekahi maine e hoomoeia ai i ka hohonu. O kahi i laki loa ai aohe kino kanaka i eha, nohe no hoi kekahi moku a waiwai e ae i hoopoinoia aku e kela pahu ana. O ka poe wale no i make oia na ia he nui mamuli o ka ikaika o kela hooneia ana.

            Ua hoonohoia aku kekahi mau koa e hoomaemae i ka hale hoahu ukana ma ka Papu Armstrong, elike me ia a na aliikoa o ka hoike ana ae, a maloko o ia hale i loaa aku ai i na koa elua omole nitroglyrine i hoomakaukauia no ka hoomaamaa ana e hoopahu i na maina. Ma ke ano e hoopakele ae i ole e loaa kekahi poino ua hookuukuu aku la kekahi o na koa i kekahi omole iloko o ke kai a hoopa aku la ia omole me kekahi o na uwea uwila. O keia ke kumu o ke pahu ana ae a lele liilii aku na mamalo hao i kahi e ku mai ana o ka mokukuna Robert @ewers e hueia ana i na laaua ma ke awa o Kewalo. No ka piha loa o na koa i ka maka'u ua kiola ia aku la ka omole nitorglyeerine i koe iloko o ke kai, no ka maka'u mai kela hana ana pela, eia nae, ua oi loa aku ka pilikia o ia hana ana no ka mea, ina e pahe ae ana ia omole i ka manawa e hookokoke mai ana o kekahi moku, e poino ana ka moku. Ahiki mai i keia la aole i loaa iki kela omole nitor., i kiolaia ai iloko o ke kai.

 

UA HOIKEIA AE KA MAIKAI O NA KEIKI I HOOKUUIA MAI.

            Anaenae e pau loa na keikikane i hookuuia mai ai mai ke kula mai o Waialee malalo o ka hoomalu ke hoike mai nei i ko lakou mau ano maikai.

            Maloko o ka hoike makahiki a ka Makai F. L. Akana, o na keiki kolohe malalo o ka hoomalu ana no ka makahiki e pau ana ma ka la 30 o Iune, 1921, he 80 mau keiki i hookuuia mai ke kula mai o Waialee no ko lakou hoolohe a malama pono i na rula o ke kula, i ka piha ana ia o 171 mau keiki i hookuuia mai ia kula mau ka la 1 mai o Iulai o ka 1919.

            Ua hui mau aku ka Makai Akana me ia mau keiki i kela ame keia manawa a ma ia kumu i maopopo ai iaia anaene e pau loa ia huina i ka paa mau i ka hana a ke hoike mau mai nei i ko lakou makemake i ka hana.

            Ua hoike ae o Akana i kona manaoio, ina e ano e hou ana na keiki i hookuuia mai ai malalo o ka hoomalu, a i hoi mai i ko lakou mau home e loaa hou ana ia ano maikai ole ia lakou mamuli o ka maikai ole o ka malama ana aku a na makua, oia hoi, ko lakou hui pu ole me na keiki a alakai ia lakou ma na hana e pono ai lakou.

            Wahi a ka Makai Akana o ka hoike ana ae, o na keiki i hookuuia mai ke kula mai malalo o ka hoomalu ana, ua lilo lakou i poe keiki maikai i ka manawa e hui pu ai ko lakou mau makua me lakou ame na luna aupuni, koe kekahi poe keiki kakaikahi, ma ke a'o a makaala ana i ka hoomalu aku ia lakou.

            O kela ame keia mea kupono e hanaia aku i na keiki no ka hoohoihoi ana aku ia lakou, no na keiki uuku keia, ua hanaia aku ia mo ka hookomo ana aku ia lakou i ke kula. No na keikikane nunui ua hookomoia aku lakou ma kekahi mau hana i kupono ia lakou. No ka nui loa o na limahana i haalele aku i na mahiko ke kumu o ka pilikia ame ka nele ana o kekahi poe keiki i ka hana, eia nae, ma kekahi ano hana i hiki i ke keiki ke hana ua hookomo kokeia aku oia a ke paa mau mai nei i ka hana. O na hakuhana o na limahana kekahi e hui pu mai nei a hana pu ma na ano apau i mea e loaa ai ka hana na na keiki, wahi a Akana.

            O ka hoahu dala ana kekahi mea i hoohoihoiia aku i na keiki a he 38 mau keiki i hoihoi ae i ka lakou mau dala o ka hana ana a hoahu ma na banako na lakou hoi ka huina o $509.30. Ua papaia na keiki aole e kii e huki i kela mau dala, aia wale no a he mau pilikia koikoi loa ko lakou e hiki ole ai ke alo ae, alaila kii e huki. O kekahi keia o na alakai naauao no ka pono o na haumana hou e pii mai nei, ke kahua wale no hoi o ko lakou kuonoono a palekana mailoko mai o na pilikia ma nei mua aku.

 

            KAPALAKIKO, Aug. 30.-He umikumamahiku mau Pake holo maiu i loaa aku i na makai o ka oihana kukeawa maloko o kekahi pahuwai mawaena o na oneki o ka mokuahu Nile i ka manawa o ka Nile i komo mai ai i keia awa. Ua paaia lakou maanei no ka hoihoi hou ana aku ia lakou no Kina. Pehea la i paa ole ai i na makai o ka oihana kukeawa ma Honolulu nei.