Ka Nupepa Kuokoa, Volume LIX, Number 34, 26 August 1921 — Page 7

Ka Nupepa Kuokoa

 

 

He Moolelo no

WILEBA DANUBA

a i ole

Mai ke Kulana Haahaa a i ka Hanohano-

He Moolelo i Piha me na Hana

Hoopahaohao

 

MOKUNA XIV

 

E waiho iki aku kakou ia Dane, e laweia la no kahi ana i maopopo ole ai, a e hoi hou ae hoi kakou ihope ia Konela Gawila.

Ma kela manawa o kona laweia ana aku a hoopaa maloko o ka halepaahao, o kana mea mua loa o ke noi ana aku, i ka lunapaahao, o ia no ka hawiia mai iaia o na lako kakau, oiai ua makemake nui oia e hoouna ku i kekahi leka i kona makuakane ia Kapena Fula.

I ka laweia ana mai o na lako kakau. aole eia i lalau koke aku, no ke kakau ana i kekahi leka , aka hoohala iho la oia i kekahi manawa nui, ma ka noonoo ana, i ke ano maikai a kupono loa ana e kakau aku ai. Ke hoomanao la oia, he kanaka o Kapena Fula i hele a elamakule, a ua lilo no hoi ua o Konela Gawila ame Dane, i mau mea nui loa iloko o ka noonoo o kela kanaka, nolaila o kona hoakaka ana aku, no ka pepehiia ana o Dane he mea ia e komo koke aku ai oia iloko o ka lua kupapau.

Mahope o ka noonoo akahelel ana, hooholo iho la oia i kana mea e kakau aku ai i kona makuakane hanauna, e kau ana hoi i kahi o kana leka ma ka Mokupuni Fula, me ka hoakaka ole aku no kona hopuia ana, a hoopaaia maloko o ka halepaahao, aka e kauoha awiwi aku ana iaia, e hoi mai no kona kakela, me ka hoakaka ole aku i na kumu, o kela kauoha awiwi ana.

Hoolimalima aku la oia i kekahi mea no ka lawe ana i kela leka, a hookomo ma ka haleleka maa e hookomoia ai o ka lakou mau leka, i ole ai e loaa aku ka manao hoohuoi ia Kapena Fula, aia oia i kahi okoa loa kahi i hoho ai.

Kakau pu iho la no hoi oia i leka na ka Mekia Buna, maloko o kela leka, e kauoha aku ana oia i ka mekia, e holo aku no ka hui pu aku no ka hui pu ana me Kapena Fula. a e hoakaka aku imua ona, i na mea apau e pili ana i ka nalowale ana o Dane, pela hoi kona hopuia ana a hoopaaia maloko o ka halepaahao.

Ma kekahi kakahiaka ae, oiai no o Kapena Fula e noho ana maloko o kona rumi, e ai ana hoi i kona aina kakahiaka, me ka noonoo nui ana no, no kana mau keiki, komo ana no ke kuene iloko, a haawi aku la i ka leka a Konela Puluka o ka hoouna ana mai iaia.

Me ka eleu i lalau mai ai o Kapena Fula i ka leka a wehe ae la e heluhelu, aole no he loihi loa o na manao i kakauia, a i ka maopopo pono ana iaia o ka manao maloko, noke okoa ae la oia i ka akaaka, me ke kamailio ana ae iaia wale iho no:

“Pehea la i hiki ole ai i kela mau opio ke noho o laua wale no iloko o hookahi pule, no ka hoohauoli ana ia laua iho? Aole no he mea e aku la nana kela koi ia’u e hoi aku na Dane no oiai ua pippilipaa kona noonoo no kona kupunakane, me ka nana ole ina paha he kane a kane ole paha kana.

“E hele aku oe e kauoha i kekahi kaa, no ka lawe ana aku ia’u no ka hale hoolulu kaaahi, ke makemake loa nei au e loaa ka mokuahi e haalele iho ana, no ka Mokupuni Fula; a e olelo pu aku i ke kakauolelo o ka hokele nei, e hoomakaukau mai i ko’u bila aie, o ka noho ana iloko o keia mau la.”

Hakalia no a hala aku ke kuene no ka hooko ana i na kauoha a Kapena Fula, o ka hoomakaukau koke iho la no ia o ua kapena nei, i kona mau ukana, no ka hookomo ana maloko o kona mau pahu lole. aole oia i like me kekahi poe kanaka, ka pupuahulu, i ka pono hookomo no i na lole iloko o ka pahu, aka me ka malie wale no oia e hana la, e opiopi pono ana hoi i na lole apau, a hookomo ma ko lakou mau wahi kupono i hookaawaleia, ua hele no hoi a pau kona mau lole iloko o na pahu elua, ku hou ana no ke kuene, me kekahi pepa inoa, a onou mai la imua o ua kapena nei, me ka pane ana mai:

“Aia he keonimana ke kakali mai la i makemake e ike ia oe,” wahi ana me ke kunou ana mai:

“Aole e hiki ia’u ke ike i kekahi mea, (he iwakalua wale no minuke i koe, o ka holo u oia o ke kaaahi, nolaila e olelo aku oe i kela keonimana, ua paa loa au i ka hoomakaukau i ko’u mau ukana, no kekahi huakai awiwi.”

“Ua makemake loa kela keonimana ia oe, a ke pii mai nei oia no ka hui pu ana me oe maloko nei o kou rumi.”

“O, aole o’u nana iaia, e kipaku aku oe e hele, aole e hoouluhua mai ia’u” o ka manawa no nae ia i komo mai ai kekahi kanaka opio kino loihi iloko, me ke kunou ana mai imua o ke kapena elemakule.

I kinohi, ua hele o Kapena Fula a piha loa i ka hoonaukiuki, aka iaia i ike aku ai i ke ku mai o ke kanaka opio, ia wa i holo mai ai oia imua, me ka hopu ana aku ma ka lima o ke keonimana opio, a pane mai la:

“O ko’u makaukau keia la no ka hoi aku, mamuli o kau leka o ka loaa ana mai nei i keia kakahiaka, e hoi awiwi aku, eia ka e hoea koke mai ana no oe. Pehea la i hiki ole ai ia oe ke noho malie aku, he nani nae ia, ua hoea mai la oe a hui pu kaua, pehea, o Dane mai nei no anei i kekahi me oe?”

“Ke ninau mai nei anei oe no Dane?” wahi a ke keonimana malihini, ma ka maopopo ole o na mea a Kapena Fula e kamailio aku nei iaia.

“Owai aku auanei ka’u mea nui, o oe ame Dane. nolaila o olua pu mai neino ma keia huakai, me he mea la, ua kau mai nei olua ma ka mokuahi hookahi, me kau leka. pela oukou apau i hoea like mai ai i ka manawa hookahi.”

“Ke ike nei au, aia kekahi kuhihewa nui: aka nae e ninau mua aku ana au ia oe eia anei au ke kamailio pu nei me Kapena Fula?” i pane mai ai ke kanaka malihini.

“Me ko kamaaina iho no ka i kou makuakane, kohu ole hoi kou ninau mai, me he mea la, aole oe i ike mua ia’u. Ua opulepuleia anei oe, a i ole ua haalele mai kou noonoo maikai i kou poo, i hoohewahewa mai ai oe i kou makuakane nei?”

“Auhea oe e Kapena Fula, o ka Mokupuni Fula, aia kekahi kuhihewa nui ma kou aoao, no ka mea o keia ka makamua loa o ko’u halawai pu ana me oe.” wahi a ke keonimana malihini me ka leo kuoo.

Aohe nae he wahi mea a manaoio aku o Kapena Fula, i kela mau olelo, aka pane aku la ua kapena nei i ka i ana aku:

“Auhea oe e kuu keiki, ina he mau hana pulapu keia ia’u alaila aole loa e hookoia ana aku mau manao kolohe: a mamuli o keia mau hana hoolalau au. ke hala loa nei ka manawa kupono no’u, e hele aku ai e ike i kuu Dane,” wahi a kapena aoo, me ka noonoo ana iho, ke hookamalii ia aku nei oia.

Ma keia manawa, i hoi hou mai ai ke kuene a hoike mai la ia’a Kapena Fula, ua hoea mai ke kaa, no ka halihali ana aku iaia no ka hale hoolulu kaaahi.

“Ua pau ae la no ko’u makemake no kela kaa, e kauoha aku oe i ke kaiaiwa, e hoi hou no kona wahi i hele mai nei, oiai ua hoea mai nei no kuu mau keiki, na mea a’u i ake nui ai e halawai pu me laua.”

Me kela mau hoakaka, i huli aku ai ke kuene hele, no ka hoike ana aku i ke kalaiwa o ke kaa, ua pau ae la no kona makemakeia, a i kela noho kokklua ana iho o ke keonimana opio i ka i ana mai:

“Auhea oe e kuu kapena maikai, ina ua nana mai oe ia’u, ua kulike loa me kekahi kanaka okoa loa au i kamaaina ai, alaila o oe o kaua ka i opulepule. E nonoi aku ana au ia oe e nana iho i kuu pepa inoa, ina aole oe i nana mua!”

“He pepa inoa kekahi a ke kuene o ka lawe ana mai nei e haawi ia’u, oiai nae ua paa loa au i ka hana, aole o’u manawa e hana ai i kela pepa inoa, o ka noonoo nui wale no iloko o’u, o ia ka pau o ko’u mau ukana i ka hooponopono, alaila holo aku au no ke kau ana maluna o ke kaaahi, elike me kau leka, kauolha awiwi, o ka loaa ana mai nei i keia kakahiaka. Eia la ihea ka ona nona kela pepa inoa?”

“Owai ka mea nana i hoouna mai i kela pepa inoa imua au,” wahi a ke kanaka milihini, me kena lalau ana iho i ka pepa inoa e waiho ana maluna o ke pakaukau, a haawi aku la ia Kapena Fula.

Lalau aku la ke kapena aoo i ka pepa inoa, a heluhelu ae la me ka leo nui i ka inoa e kau ana: “Mr. Wileba Danuba.”

Ke nana la ua kapena nei i ke kanaka opio e ku aku ana, a nana iho la i ka pepa inoa, me ka ninau ana mai:

“Alaila e olelo mai ana anei oe, o kou inoa keia e kau nei?” wahi ana me kona hele a piha loa me ke kanalua.

Kunou aku la o Mr. Wileba Danuba, no ke mea, o ua keonimana i’o nei no kela, ka mea hoi i kulike loa me Puluka gawila, a o ka manawa no ia a Kapena Fula i kiola aku ai i ka pepa iluna o ka papahele, a pane ae la:

“Aole loa au e puni i kau mau hana pulapu e kuu keiki, aka e nana aku au i ka pana o kou lima,” alaila hopu aku la oia i ka lima hema o ke kanaka opio, a paa iho la ma ka peahilima, me ka hooho ana ae:

“He maikai maoli kou pana, aole he wahi ano pihoihoi, a oki loa aku hoi ke opulepule. E nana ae nae au i ka pana o ko’u lima ponoi.” me ka paa iho i kona lima hema. ua like no me ka pana o ka lima o ke kanaka malihini, alaila hookuu hou ae la oia i kona paa ana i ka lima, kuhikuhi aku la i kekahi noho, me ka i ana aku:

“E oluolu oe e noho iho ilalo!” alaila minoaka aku la o Wileba Danuba, me ka noho ana aku, ma ka noho a kona kokoolua i kuhikuhi mai ai, oiai hoi o Kapena Fula, i hakilo pono mai ana iaia,me ke kalele ana o kona mau lima a elua ma kona mau kuli.

“Eia ko’u manao e Puluka Gawila: ina aole oe e hoike mai ana ia’u i ka mea oiaio loa, alaila e kauoha aku ana au i kekahi kauka e hele mai, a nana e hoike mai i ko kaua ano, owai la ka i opulepule, o oe paha, a i ole owau paha? No’u iho nae, aole loa o’u wahi opulepule iki, o ka’u wale no e nauki nei, o ia ko’u ike ole aku ia Dane. Ina aole oe e hoike mai ana no kuu Dane, alaila ua hamama na ipuka o ka halepaahao imua ou, i na manawa apau.”

“Ua maopopo loa ia’u. ua kuhihewa mai oe ia’u e Kapena Fula, no kekahi kanaka opio, i kulike loa paha kona mau ano me ko’u: aka nae. he mea makehewa wale no ko kaua lilo ana i ka hoopaapaa ma keia ninau hiki wale no ke hoopauia ae na pohihihi. Ua hiki loa ia’u ke hooiaio aku, o Wileba Danuba ko’u inoa. o ko’u hoea ana mai nei no ia i keia kakahiaka, me ko kakou kulana mai Parisa mai, ke hoomanao nei no paha oe, no ke kauohaia ana aku o ke Kuhina Amerika, e hoi mai, mamuli o na ninau kalaiaina.

“No na mile i oi aku i ka ekolu kaukani ko makou kaahele like ana, a aia no oia ma kona home, a oia auanei ka mea nana e hooiaio mai imua ou, i ka oiaio o ka’u mau mea apau i hoakaka aku nei imua ou, aole au he mea okoa aku, aka o Wileba Danuba ko’u inoa, he mea me kekahi kulana haahaa. i like ole aku me kou e kuu kapena maikai.”

Oiai o Wileba Danuba e hoakaka mai ana i na mea e pili ana iaia iho, ke haka pono loa aku la ka nana ana iho o kana kamilio ana mai, o kalalau aku la no ia i ka lima o Danuba. me ka iniki ana iho me ka ikaika, aole nae ia he wahi mea e kaili aku ai o ke kanaka opio i kona lima, alaila luliuli ae la ke poo o ua kapena nei, a pane mai la ia.

“He moeuhne i’o no keia a’u e ike nei. e hele mai oe e hooluliluli ae ia’u! E kahea mai ma kuu pepeiao, e hana mai ma na ano apau, e hiki ai ia’u ke ike aku i ka mea oiaio loa!”

Minoaka iho la o Wileba Danuba, a kamailio mai la:

“Aole mea hiki ia’u ke hana aku nou, no ka mea, eia no kaua a elua ke ala nei, a ke ike mai nei no oe ia’u, pela no hoi au e ike aku la ia oe e Kapena Fula. (Ina ua kuhihewa loa oe. no ke kulike o ko’u heleheleena, me kekahi mea au i kamaaina loa ai, alaila he mea hookahaha loa mai keia ia’u, a ia oe pu nop hoi, aka e hopoina loa kaua i na mea e ae apau, a mai hoolilo i kou mau noonoo maikai, i mea e kapa iho ai oe ia oe iho ua opulepuleia, mamuli o ka like ana o na helehelena o kekahi mau kanaka opio elua.

“Ua hoakaka mua aku nei au ia oe. ua hiki loa ke hooiaioia, ko’u mau ano apau, me ko’u inoa pu, o wileba Danuba au, aole he mea e aku, a he kulana ko’u i like ole aku me kou.”

“He keu aku keia a ka mea kupaianaha a’u i ike ole ai mamua. i ke kulike loa o ka helehelena o kekahi mau kanaka elua. Ma ka helehelena. ke kino. ke ano o ka leo. ame ka mino ma kou lehelehe, ua kulike loa me ka’u mea i kamaaina ai. Ina aole ko olelo ana mai nei, o ke kuhina. Amerika ka mea nana e hooiaio mai i ka oiaio no kou inoa, aole loa au e manaoio aku ia oe.

“Ua kamaaina loa au i ke Kuhina Amerika, ua kaahele like maua i ko’u wa i Parisa: a ke manaoio nei au, o Kileba Danuba i’o kou inoa, aole oe o kuu keiki o Puluka Gawila: o ka’u nonoi wale no ia oe, o ia ka hele mai e hui pu me a’u. a nana oe e hoolauna mai: a ia oe hoi e hala aku ai, e kahi aku au i ko’u lauoho, a e hooponopono i ko’u lole. i ole ai hoi au e hilahila, ke hui pu aku me ia.”

No kela mau olelo a Kapena Fula, e hoike okoa aku ana i kona kuhihewa. ua noke okoa ae la o Wileba Danuba i ka akaaka, lalau aku la i kona papale, o ka haalele iho la no ia i ke kapena aoo, a hele aku la no ka hui pu ana me keknikela Amerika.

“He keu aku maoli ko’u pakalaki i ka hoea ana mai nei o kela kanaka opio, aole ka hoi e hiki ana ia’u. ke huki hoi aku no ko’u kakela: o ka mea oi loa aku o ka pilikia, aole he moku e loaa ia’u, a hala na la eha,” i hooho ae ai o Kapena Fula, me ka awiwi ana iho e hoomakaukau iaia iho. no ka hoea mai o ke kuhina Amerika. aole oia i makaukau pono, komo ana no o Wileba Danuba, a mahope pono aku hoi ona, e ukali mai ana ke kuhina Amerika.

“Auwe, he keu aku a ka nui o ko’u hauoli. no keia halawai hou ana o kaua, mahope, o ke kaawale ana no keia mau la loihi.” wahi a Kapena Fula me ka nee ana mai imau, a hopu mai la i ka lima o ke kuhina Amerika.

“Ke haawi aku nei au i ko’u mahalo a nui ia oe, no ko mahamaha ana mai la ia’u: e ae mai oe. e hoolauna aku au imua ou i keia keonimana opio, o Wileba Danuba keia, he keonimana Pelekane, o ka huli hoi like ana mai nei me a’u mai Parisa mai.

Hopu aku la o Kapena Fula, i ka lima o ke kanaka opio, me he mea la, o kela no ka mua loa o ko laua halawai ana: aole no i maopopo i ke kuhina Amerika, ua hoea mua o Wileba Danuba imua o Kapena Fula.

Mohape iho o ke kuka’i olelo ana no kekahi mau minuke, ua noi aku la ke kuhina. e hookunia aku oia, oiai he mau hana lehulehu kana, a koe hookahi iho la o Wileba Danuba ame Kapena Fula, a o ia ka ke kapena aoo o ka pane ana aku:

“E noi aku ana au, i kau huikala ana mai, no ka’u mau olelo ikaika i kamailio aku ai ia oe, no ko’u kuhihewa maoili no i ke kulike loa o kou helehelena me ka’u keiki, ua hele maoli au a piha me ka kaumaha no ia mau olelo, me ke kapa ana aku ia oe, i kou pulapu mai ia’u.”

“Aohe a’u mea e huikala aku ai ia oe e kuu kapena maikai, o ka mea i hala aku la, ua hoopoina au ia mau mea apau, aole loa he wahi manao maikai ole iloko o’u nou, wahi a Wileba Danuba, me ke kunou pu ana aku imua o kona kokoolua.

“Ke hoomanao nei au, ma kela manawa o kou hoea mua ana mai nei imua o’u, ua olelo mai oe, he hana nui loa kau i makemake ai e ike ia’u, e oluolu ana anei oe e hoike mai ia hana?”

“Manao au, ua hiki no ia hana ke hoopaneeia no kekahi wa okoa aku, no ka mea ua hoea mai au, i ka wa kupono ole loa o ai oe e liuliu hoomakukau ana, no kekahi hua ka loihi.”

“Aole a’u manao ana aku e hele ma kau hukai no ka mea ua hala ke kaaahi a’u i makemake loa ai e kau. no ka hoea aku i ka wa kupono loa e haalele iho ai he mokuahi,” e holo pololei ana no ka Mokupuni Fula, kahi o ka’u mau keiki e kakali mai la o ko’u hoea aku; nolaila i ko’u liaule ana iho nei, e hala okoa ana he eha mau la a’u e kakali aku ai, alaila loaa he mokuahi e holo pololei ana no kela mokupuni.”

“Ke kaumaha loa nei au, no ko’u lilo ana i mea nana e hoohaule ia oe mai kau huakai mai, aka nae e kala mai no oe ia’u, oiai he hana ano nui i’o ka’u i ake loa ai e halawai pu kaua.”

“Ma ke ola ana o na lani, ke mahalo nui aku nei au, no kou po’i o’i ole iho i kekahi mea ma kou aoao. Aohe a kaua hoolauwili wale ana. e hoike koke mai i ka hana nui au i makemake ai e ike ia’u!”

“I hoea mai la au imua ou, ma ka aoao o ka Madame, ka Makuika De Galacia, a i ikeia hoi ma kekahi inoa, ke Kamaliiwahine Ake Karaciolo,” wahi a Wileba Danuba me ka leo malie.”

“Mai hoolalau mai oe. aka e hoakaka maoli mai, i ka makemake o kela lede a’u e hana aku ai nona?”

“Ke maopopo aku la ia’u ke ano o kau miaiona, o ka’u no keia i haupu mau ai i na manawa apau, e hoea mai ana kekahi mea o keia ano!” wahi a ke kapena aoo, me ka hilinai ana mai ihope o kona noho, me ka hauoli, i owili pu ia me ke kaumaha, he hauoli ma kekahi ano, no ka maopopo ana o ka ohana o kana Dane, a he kaumaha hoi, no ka hoea mai i ka wa e kaawal;e loa aku ai kana kikamahine hanai mai iaia aku.

“Ua loaa mau ka noonoo iloko o’u. o kela wahi kaikamahine uuku, o ka hoea ana mai ma na ipuka o ko’u home, aole oia he mea i nele i ka inoa ame ka hanohano. Ua hoomaopopo kela kaikamahine, oiai no oia iloko o kona wahi kino uuku, i na ano maikai ole e hoopuni ana i kona ola ana malalo iho la o ia kumu. i hooikaika loa ai oia e haalele aku i na mea na laua e malama ana iaia. me he mau makua ponoi la, a hele mai la oia no ka halawai pu ana me a’u. Me na olelo hooku’iku’i ma ka olelo Beritania ame ka olelo Palani. i hoakaka mai ai oia. no kona noho ana maloko o kekahi kakela nani, a e hoomanao mau ana oia no kekahi pou hae kiekie e ku ana ma kela kakela.

“Ua apo aku au iaia, a hookipa mai maloko o ko’u home, me ka lawe ana mai iaia me he keiki ponoi loa ia mailoko aku o’u. Ma kela noho ana o maua. ua lilo oia i malamalama no ko’u mau maka, i ola hoi no kuu puuwai, a i anela no ko’u home. Ua kapaia kona inoa o Dane. ka inoa a kona mau makua hookama i hookau aku ai maluna ona. Ma ke ano ulia nae, i loaa ai ia’u kekahi inou hou, a o loa ka’u inoa ia i hookau aku ai maluna ona. Maloko o ka home i noho ai o na makua hookama o kela kaikamahine. i loaa aku ai ia’u kekahi papaa keleawe me ka inoa Ake De Galacia, a i ka wa i bapetisoia ai kuu Dane kapa aku la au i keia inoa hou maluna ona, ina paha aole nona pono ia inoa, aka e lilo ia i moali, no ka hookolo ana aku ahiki i ka loaa ana o kona ohana oiaio loa.”

“Ua hookoia kau mau mea i manaoio ai. pela i hiki ai ia u ke hookolo mai ahiki i kou loaa ana iho la e kuu kapena maikai, o ka mea nae nana i hookahaha loa mai ia’u, pehea la ka poe na lakou i aihue malu i keia kaikamahine, i hoao ole ai, e huna aku i na hoike apau, e hiki ole ai ke huliia aku ahiki i ka loaa ana o keia kaikamahine.

“Ua hoao no ka poe kolohe e huna i ka lakou mea i hana ai, ma ke kapa ana aku i ka inoa o kela kaikamahine o Jenai me ka olelo pu ana. o ka laua keiki ponoi no ia. Me kela inoa hou nae i kapaia aku maluna ona aole loa keia kaikamahine i ae aku, e o i kela inoa koe wale no ka inoa o Dane a he inoa punahele no hoi ia ona, ahiki i keia manawa a kaua e kamailio nei. E hoike mai e kuu hoaloha opio pahea i lilo ai ka inoa o Ake de Galacia, i mea nana e alakai mai i kona mau hoaloha imua o’u?”

“Mamua o ko’u pane pololei ana aku i kau ninau e ninau aku ana au ia oe, ina paha ma Parisa kou wahi i hoohala ai i kekahi manawa o ka makahiki aku nei i hala, aole ane pela?”

“Ma Parisa i’o au kahi i hoohala ai i kekahi manawa nui o ka makahiki i hala, me ko’u lawe pu ana aku i kuu kaikamahine hanai ilaila. e hoolauna ana iaia i ka pohai o ka pohanohano a kiekie o Palani. ma ka inoa Ake De Galacia me kuu manao, ina he ohana kekahi e ola ana ma keia inoa. alaila e ike mai ana lakou. he kaikamahine keia i kuleana i kela ohana.”

“Ke hoomanao pu nei no oe. ma kela noho anaa olua ma Parisa. ua ku’i aku ke kaulana o kau kaikamahine hanai. no ka nui o kona u’i me ka huapala, a ma ia nao, i penaia ai kona kii, me ke kuai nui ia e na mea apau ma Psrisa. i makee i na kii o na wahine u’i. Aole ka Madame De Galacia ma Parisa i kela manawa. aka maloko oia o Italia aka iaia o ka huli hoi ana mai no Parisa. a iaia e hele, ana ma ke alanui, me ka kaalo ana ae mawaho o kekahi halekua kii, ua hoohikilele loa ia mai kona manao, i ka wa i ike aku ai i ke kii o kekahi wahine opio, i kulike loa na ano apau me kona helehelna. koe wale no, ma ka lole o ka wahine opio nona kela kii e komo ana.

“A poapo koke ae la koua oili. me kona hele a piha i ke pihoihoi, o kona komo aku la no ia iloko o kela halekuai, a ninau aku la i ka inoa, o ka wahine opio nona ke kii apa e kilohi aku ana me na manao hialaai, a o keia ka pane a ka ona nona ka halekuai:

“He kii keia no ka Mademosele Ake Galacia, ka wahine opio nana i ume aku i na manao hoohihi o ka Parisa nei nona i ke kau hooilo aku nei i hala. Ua makemake anei oe e loaa kekahi kii nau o keia wahine opio. He nui na kii e waiho nei ma keia halekuai, no ka hoolilo ana aku, i ka poe apau e makemake mai ana?”

“I ka lohe ana o ka madame i ka inoa o Ake Galacia u aneane maoli oia e maule. me ka hiki ole hoi iaia ke pane aku po ka ninau a ka ona nona ka halekuai no ka mea. o ka inoa kela o kana kaikamahine, ka hooilina hoi o kona mau waiwai nui hewahewa ma Italia a ma Parisa, a o ka mea ho i aihueia aku e ka poe kolohe mai iaia aku, he umi-kuma makolu makahiki i hala.

“No kela noho mumule loa o ka madame, a hui pu iho la me ka hele o kona helehelena a haikea, lawe. okoa mai ka ona nona ka halekuai i kekahi noho. a hoonoho iho iaia ilalo. alaila kii aku la i kekahi kiaha wai, a hoohai ne la iaia, a i ka hoi pono ana mai o kona noonoo maikai ia wa i ninau aku ai ka madame:

“E oluolu ana anei oe e hoakaka pono mai ia’u i na m@ e pili ana no ka Mademosele Ade De Galacia?”

“He kaikamahine hanai oia na kekahi keonimana Amerika, o ka’u wahi mea wale no ia i maopopo, aka i makemake oe e madame e ike i na mea apau ea, he hookahi wale no wahie maopopo ai, o ia no kou hele pololei ana i kuhina Amerika. He hookahi nae a’u mea i ike, o ia ka nui o ka poe hoohihi i ka u’i maoli o kela wahine opio.”

“No kela mau hoakaka a ka ona nona ka halekuai, haa@ aku la ka madame i kana mau hoomaikai ana, me ke ku ana aku iho hookahi kakini kii o ka wahine opio, alaila ka oha aku la i ka ona o ka halekuai, e kii aku i kaa nona, a i hoea ana mai o ke kaa, o kona kau aku ia uo ia. a holo pololei aku la no kahi i noho ai o ke kuhina Amerika.

“O kahi o ka laki, ua loaa aku la no ke kuhina Amerika i ka hale, a mai kela kanaka ko’iko’i mai, i hoakaka mai ola, o ka wahine opio nona ke kii a ka madame o ke ku ana, he kii ia no ke kaikamahine hanai a Kapena Fula ka Mokupuni Fula, maloko o ka Makuaina o Merela Amerika Huipuia, hoakaka pu mai la no hoi ke kuhina ia ma kana mau mea o ka lohe ana he ohana Palani ko ka wahine opio, ai ka manawa a Kapena Fula e noho ana no Parisa, ua hooikaika loa oia ma ka ninau ana no ka oha De Galacia, eia nae. aole he mea nana i hoopau aku i ko@ pohihihi, ahiki wale no i kona huli hoi ana aku no Amerika Huipuia.

“Hoakaka aku la no hoi ka madame imua o ke kuhina i ke kumu o kona makemake ana e ike i ka moolele o wahine opio. o ia no kona manaoio loa, o kana kaikamahine ponoi kela, ka mea i aihueia mai iaia aku, he umi-kumamakolu makahiki i kaahope ae, e kekahi poe kolohe.

“Me na manao hialaai, i hoolohe loa mai ai ke kuhi Amerika, i kela mau hoakaka a ka madame, alaila ninau mai la, mahope o ka hooki ana iho o na olelo a ka madame?

“Aole loa he wahi mea i maopopo iki ia’u! He oia mahope iho o ka lawe aihueia ana aku o kuu kaikamahine ua hoomaka aku na makaikiu e hookolo mahope o ka m@ heu o ka poe kolohe, e kaahele ana mai kekahi wahi a kekahi, ahiki wale no i ka hoea ana no Ladana, ilaila i nalowale ai, na hoailona apau, e maopopo ai o kahi o ka pu aihue i hele hou aku ai.

“Ua hoolimalimaia na makaikiu kaulana o Ladana ame Parisa, ua hookomoia aku no hoi na hoolaha maloko o na @ pepa like ole, me ka haawiia ana o na makana kiekie, no loaa aku i ka poe apau e hoike mai ana i kahi i noho ai o ke kaikamahine. aole nae he mea i lohe iki he wahi moali no ke keiki nalowale.

“He ekolu makahiki okoa keia noke ana i ka huli me poho o na manaolana, alaila haalelei aku ia au i ka home kuu haouli ame kuu kaumaha, he mau pule wale aku no make ana o ka’u mea aloha he kane, o ka aihueia iho la no o ka’u kaikamahine, a huli hoi ae la au no Italia, kahi a’u holoholo ai i ko’u mau la kamalii, no ka hoomama ana i ko@ mau manao kaumaha he nui.

“He iwakalua-kumamalima o’u makahiki ma ka manawa kaihiia aku ai ka’u mau mea aloha mai ia’u aku. He umi-kumamakolu makahiki, mai ka nalowale ana aku o ka’u kaikamahine, aole au i hehi hou i ka lepo o Parisa nei, a mamua o kekahi mau hana ano nui loa, i pili aku i ko’u mau waiwai maanei, pela wale no au i konoia ai e hoea mai, a hehi hou wawae ma ka lepo aloha o Parisa. I keia la, ia’u e hele a ma ke alanui, heaha la ia alawa ana aku a’u ma ka halekuai na kii, halawai aku la au me ke kii o kuu kaikamahine e kau mai ana ma ka puka aniani, o ko’u hele aku la no ia komo iloko o kela halekuai, a o ka mea i hooikeia mai ia’u, @ kela no Ake De Galacia, akahi a pau loa ko’u pohihihi, a kela he kii no ka mea e ae, aka no kuu kaikamahine no a’u i kanikau mau ai no na makahiki he umi-kumamakolu.”

“Ke manaoio loa nei au, ua pololei kau mea i koho ai, kela i’o no kau kaikamahine,” i pane mai ai ke kuhina.

“Eia ihea o Kapena Fula i keia manawa?” wahi a ka ma@ o ka ninau ana aku.

“Ua huli hoi aku no oia no Amerika.”

“Auwe no ka hoi e!” i hooho ae ai ka madame, me he m@ la ua aneane e pau kona manaolaua no ka loaa hou o ka kaikamahine iaia. “Ua aneane e haalele mai ka ikaika i kou kino. i keia wa, mamuli o ka nui o na haaawina o ke kaumaha a’u i auamo ai me ka hoomanawanui iloko o keia mau maahiki loihi. Pehea la e hiki ai ia’u ke hana aku i kekahi mea loaa ai kuu keiki ia’u, aole au i kamaaina i na loio o keia wahi alaila hoomaka iho la ka madame e hookahe i kona mau wai maka o ka ehaeha.

“Aohe au mea e kaumaha hou ai e ka madame! E ola ai oe iloko o ka hauoli no ka nuhou au i lohe ai. eia no kau kaikamahine ke ola nei, a o ka hauoli oi aku. o ia no ka maemae ke kilakila ame ka u’i o ua kaikamahine nei au, ua kulike @ kona helehelena me kou: e manaoio mai oe oe i keia mea a e hoakaka aku nei imua ou e ka madame, no ka mea iloko o kona mau la apau e noho ana maanei, ua kamaaina loa au ia ame kona mau hoaloha.”

“Heha la ka’u mea mua loa e hana ai, e oluolu anei oe a’o mai ia’u?”

“Ea no ka’u a’o ia oe e ka madame, ma ka mokuahi mau@ haalele iho ana ia Parisa nei no Amerika, e kau koke oe maluna o kela moku. a i ka wa e ku aku ai i ka aina, mai ho@ hakalia oe, i ka hele koke ana aku e hui pu me Kapena Fula pela wale no e hiki ai e loaa koke aku kau kaikamahine ia @ Malia paha he keonimana no hoi kekahi iloko o kou oha@ kou kokoolua ia e pono ai e hele pu ma keia huakai huli kau kaikamahine.”

“Aole o’u ohana e ae e ola nei, koe wale no ke kaikaina o k@ i make, oia ka Makaikiu De Galacia i keia manawa. @ holo aku ka inoa ame na waiwai apau o kuu kane maluna o@ ina nae aole i nalowale kuu kaikamahine, ka mea hoi i manao, ia, ua make kahiko loa, oia ka mea kuleana i kela m@ waiwai apau o kona makuakane. Mawaena o Makuika De Galacia ame a’u, he mau enemi ko maua kulana, nolaila, ao a hiki ia’u ke noi aku iaia, e hele pu mai me a’u ma keia @ kai, a e ike mai no hoi oe, aole loa he wahi lihi hoihoi ik@ kela kanaka no ka’u kaikamahine, he mea ia e hoonele a@ ana iaia i na waiwai ana e noho uahuha mai nei.

“Ke mau nei no kela manao mua o’u, e holo koke oe no Amerika ma ka mokuahi mua loa e haalele iho ana ia Parisa no aka e hele pu oe me kekahi loio, ma ke ano, he akena ia no makaukau i na kanawai o Palani nei, ame na kanawai Amerika.”

“O ka mea apiki paha ia, aole a’u loio i kamaaina. ua ku kamaaina maoli au ia Parisa nei.”

“Ke manao nei au, e hiki ana ia’u ke kokua, aku ia oe na keia mea. Ua kamaaina au i kekahi loio opiopio, i puka po@ mailoko mai o kekahi o na kula loio kaulana ma ke ao nei. ia ke kula kiekie o Camabiriki; ua hoohala no hoi oia he m@ makahiki ma Amerika, ma ka hoomaaamaa kanawai ana, a pono ma Parisa nei, iloko o na mahina lehulehu a e nei i hala.”

“Ma kela wahi o na hoakaka a Wileba Danuba. i hoike ole aku ai oia i ke kaa ana mai o ka noho akena ana no ka Madame De Galacia maluna ona, me ka hoomau hou ana aku kana mau hoakaka ana:

(Aole i pau.)