Ka Nupepa Kuokoa, Volume LIX, Number 31, 5 August 1921 — KA ELELE KUHIO MA KA PAPA KOMISINA [ARTICLE]

KA ELELE KUHIO MA KA PAPA KOMISINA

Ma ka wae ana ae o Kiaaina W. R. Farrington i ka Elele Kuhio, i hoa no ka papa komisina Home Hawaii; me ke apono ana mai hoi o ka Elele Kuhio, ia kulana oihana, aole he kanalua ana, no ka hoea mai i ka manawa e hooiaio ai ka elele lahui, i kana mea i iini nui ai, e loaa i na Hawaii ka pomakai malalo o ka bila hoopulapula Hawaii. Ua kupono loa kela hookohuia ana aku la o ka Elele Kuhio i hoa no ka papa komisina, no ka mea, oia ka i ike ma ke ano laula i na aoao apau o ka bila hoopulapula, pela hoi kona lilo ana mai, i mea kokua, no ka pono o na Hawaii, e makemake ana, e hoi maluna o na aina i hookaawaleia, ma keia bila, no ka hookuonoono ana. O ka holopono o ka manao hoopulapula maloko o kela bila, no na Hawaii, aia no ia iloko o ka lima o ka papa komisina home Hawaii; aka nae, o ka holopono oi aku, aia no ia maluna o na Hawaii ponoi, ka poe e hoi aku ana a noho maluna o na aina hookuonoono. He mau Hawaii no koe, e hoopiha aku ai i ke koena aku o na hoa o ka papa elike me ia i koiia mai ai e kela kanawai hoopulapula, o ka keia pepa e iini hei, e hoopihaia kela mau makalua, e na Hawaii, i komo pu, iloko na hooikaika ana no ka holopono o kela bila; a i ole he poe i loaa ia lakou na manao makee, no ka holomua ame ka pomaikai o na Hawaii. Ua nui na mea a makou i hoakaka aku ai maluna o keia bila hoopulapula, a ua hoopukaia aku no hoi ka bila no ka pomaikai o na Hawaii, ke manao nei makou, ua lawa loa ka ike ame ka hoomaopopo ana i ka lehulehu, e hooholo koke ai no i na mea pono e hana aku ai no keia manawa, mamua ae o ka wa e koiia mai ai na kanaka e waiho aku i ka lakou mau noi i mau apana aina hookuonoono no lakou.