Ka Nupepa Kuokoa, Volume LIX, Number 28, 15 July 1921 — KUU WAHINE ALOHA EDA KALUA UA HALA. [ARTICLE+ILLUSTRATION]

KUU WAHINE ALOHA EDA KALUA UA HALA.

Mr. Solomon Hanohano, Aloha oe:— E oluolu e hookomo iho ma kahi kaawale o na kolamu o ka hiwahiwa a ka lahui Hawaii, ka Nupepa Kuokoa, ka uwea kelepona hoi nana e ha'i aku i ka lohe ma na kihi eha o ka honua, i ike mai ai na kaikuaana, na kaikaina, na kaikunane ame na makua e noho ana mai ka la puka ae ma Kumukahi, a ka welona a ka la i ka ilikai o Lehua, i kahi puolo waimaka a ke aloha e kau ae la maluna. Me he anapu ana la na ka uwila i holopuni ae ai ka lohe o ka makani Lupua o Wainiha ame ka Poli Lauae o Makana ahiki aku i lea Ualoku o Hanalei, a pahola loa aku i ka makani Moeahua o Kekaha, a ka Waiulailiahi o Waimea, i ka- lono kaumaha o ka make ana o ka'u mea aloha he wahine. He nawaliwali no kona kino ame ka hapai keiki pu, a i ka Poaha, la 23 o Iune, i hala aku nei, ma ka hora ekahi, ua hanau mai la oia he keikikane, a mai kela Poaha mai o kona hanau ana, ahiki mai i ka Poakahi, Iune 27, ua komo mai la ka anela o ka make, a lawe aku la i kona hanu hope, i ka hapalua o ka hora eono o ke kakahiaka poniponi wale o kela kakahiaka Poakahi. Maluna no oia o na lima o kona makuakane hanai, ahiki wale no i ka lele loa ana ae o kona aho hope loa. Ua hanauia kuu mea aloha he wahine ma Wainiha nei, i ka la 13 o Iune, 1902, mai ka puhaka mai o Malia (w) ame Tai Fook (Pake), ua piha iaia na makahiki he umi kumamaiwa o ka hanu ana i na ea hu'ihu'i o keia ao, ame na pule keu, a hoi aku la oia i kahi mau o na mea ola apau. Aloha wale kuu wahine, kuu hoapili hoi, ua waiho iho oia ia'u, he kane wahine make, a he keiki hanau hou hoi, i hooneleia i ka makuahine; na maua ame na makua, ame na kaikunane ame na kaikaina e u aku me ka luuluu ame ke kaumaha, ma keia ao o ka muliwai eleele o ka make. Ua hoohuiia maua ma ka berita mare, ma Waimea, Kauai e ka Rev. Samuel Nagata, i ka la eha o Sepatemaba, 1920, nolaila ua piha ia maua he umi mahina a oi o ka noho pu ana, a haalele mai la oia ia'u. E ka papapaha lei o Polihale, ua pau ka lei ana o kuu aloha i kou mau nani; e ke onekani o Nohili, ua pau ka lohe ana o kuu aloha, i kou kani mai me he waiolina la ke hone mai. E ka makani Puukapele o Mana, ua pau kou pa kolonahe ana ma na papalina nohea o kuu aloha; e na niu o Kaunalewa, ua pau ka ike ana o kuu aloha, i ka holu nape mai i ka makani. E ka makani Moeahua o Kekaha, ua pau ka lohe ana o kuu aloha i ka halulu i na ululaau Kiawe o ka aina hanau o kona haku hanai J. P. Kaapuwai. E ka Waiulailiahi o Waimea ame ka Waikea o Makaweli, ua pau ka auau ana o kuu aloha i ko olua mau wai hu'ihu'i; e ka makani anu he Waipao, ua pau kou hoeha ana i ka ili o kuu aloha, e Wahiawa i ka makani anu he Puukolu, ua pau kou pa kololio ana ma ka helehelena o kuu mea aloha he wahine. E ka Uanoe o Koloa, ua pau kou hoopulu ana i ka nui kino o kuu aloha; e ka Uakenikeni o Lihue, ua pau kou hoopulupe ana i ka ili o kuu aloha; e ka ulupaina o Nuhou, ua pau ka ike ana o kuu aloha, i kou mau lau e ani peahi ana i ka makani anu he Kiu, kahi o kuu aloha, i hanaiia ai a nui; aloha no ia wahi a kuu aloha i luakaha ai, i walea ai hoi i na luhiehu o ia mau awawa. Aloha no na makua ame na kaikua ana me na kaikunane ame na hoaloha o kuu mea aloha o kuu wahine, e noho ana i ka la'i o Kawailoa. E Kuaihelemoku e, ka mama aloha o kuu wahine i lei aloha ia e oukou, ua pau kou ike hou ana iaia, ua nalo na maka, pau ka ikena, ua hele i ke ala polikua a Kane, ua hu-na na maka la nalo! E Ahukini e, ka home a'u i noho ai me kuu aloha no ka huli ana i na mea e pono ai keia noho ana, aole oe e ike hou ana iaia. E ke Kalukaluokewa ame Kealia i ka i'a inamai, ua

pau ka maalo hou ana o kuu aloha, ma kou mau alanui, maluna o ke kaa otomobile. E Kalalea; puukani o Anahola, ua pau ka ike ana o kuu aloha, i kou mau kualono uliuli; e ka ulukukui o Koolau, ua pau ka hoomaha ana o kuu aloha, i kou malumalu; e na Kalihi elua ame Puupoa i Hanalei i ke one o Mahamoku, ua pau ka ike ana o kuu aloha, i ko olua mau aekai aloha. E ka Ualoku o Hanalei, ua pau ka loku ana o kou mau pakaua maluna o ke kino o kuu aloha; e ke one o Kealahula ame ka wai o Lumaha'i, ua pau ka maalo ana o kuu aloha ma ko olua mau aekai i ka lawai'a. E ka makani Lupua o Wainiha, e nounou nei ia Luluupali, ua pau kou pa hu'ihu'i ana i ka ili o kuu aloha. E na hala o Naue i ke kai, ua pau ka hele ana o kuu aloha, ma kou mau alanui; e ke one wela i ka la o Maninihola, ua pau ka hele ana o kuu aloha ma kou mau aekai. E ka Poli Lauae o Makana, ua pau ka honi ana o kuu aloha, i ke ala anuhea o ka Lauae; e ka wai o Kanaloa ame Kapalae, ua pau kona kiei hou ana e ike i ko olua mau wahi lipolipo. No ka hoopau ana ae i keia kanaenae aloha, ke hoomaikai aku nei au i ka poe i lawe mai i ka lakou mau bo-ke pua, no ka hoohiwahiwa ana iho i ka he o kuu mea aloha he wahine. Ia Mrs. K. Kanehe, Mrs. Minehaha, Mr. M. M. Puulei, Mrs. Kaala, Mrs. H. Kalei ame Mrs. Kakina ame ka ohana. Ke nonoi aku nei au ia oukou apau, e oluolu e lawe aku i keia mau hoomaikai, a na ke Akua e kokua mai ia kakou apau me ke aloha, no ka mea Nana no i haawi mai, a Nana no i lawe aku, e hoomaikaiia Kona inoa. Owau no me ke kaumaha. D. KALUA. Me ka ohana.

MRS. EDA KALUA.