Ka Nupepa Kuokoa, Volume LIX, Number 26, 1 July 1921 — HE PAINA LUAU NUI MA KA POLI LAUAE O MAKANA. [ARTICLE]

HE PAINA LUAU NUI MA KA POLI LAUAE O MAKANA.

E Mr. Lunahooponopono o ka Nupepa Kuokoa, Aloha pumehana pu kaua: E oluolu mai oe i kou ahonui ame kou lokomaikai, e haawi mai hoi oe i kekahi wahi rumi kaawale o kekahi kolamu o ke kino lahilahi o ka hiwahiwa a ka lahui, no ka'u wahi poomanao e kau ae la maluna, i ike mai ai na kini makua ame na kini kupuna, i ka la nui paina o kahi kamaiki, i hoomakaukauia hoi e kona mau makua no ke aloha keiki. I ka la 11 o Mei, 1921, i hoomakaukau ae ai o Mr. Kaala ame Mrs. Kaala i kekahi paina luau hoomanao no ka piha makahiki o ka laua bebe wahine; elua puaa nunui momona e pii ai ka manene i na kumu pepeiao, ame hoo kahi bipi nui momona i hana laulauia a hooluaia iloko o ka imu, i hana maiauia a i laulima pu ia e na lima kokua o na hoaloha o keia mau makua aloha keiki. Nui na i'a i hoomakaukauia no keia paina, o ia hoi ka nenue piko momona o ka poli lauae o Makana, ka amaama momona o ka waihu'i i ka ili o ka makani lupua o Wainiha, na opae kalaole mahikihiki noho palai o Limahuli, na limukohu ula i ke kai o Koolau, na hee ono loa i wili pu ia me na i'o wana o na kai hanupanupa o Paweoaka i na wai elua o Haena, a hui pu ia me ka poi uouo Piialii kaohi puu, a ka maka ame ka manao e hoohihi ai, e hoonuu iho ai na kamahele a eha ia Keoni Bulu, a na hoaai hoi e hoomanao iho ai i wahi lau oliwa a ke aloha no ka mea nona ka la. Ua hiki mai na mea apau i keia paina, mai ka Waiulailiahi o Waimea, i ka makani anu he Waipao, a Kalahea i ka puukani o Anehola, a Koolau i ka ulukukui o Wehekaolu, a na Kalihi elua, a ka Ualoku o Hanalei i ka puahala ai a ke Kinau, a Lumahai i na hau o Maihi au i ke kai ame na ulu o Wehi noho i ke anu, a Wainiha i ka makani anu he Lupua, a ke Pahelehala o Naue i ke kai, Haena no hoi i na pali o ahi o Makana ame ka Iwikui.

Ua piha no hoi keia paina i na makamaka ame na hoaloha, a ka meakakau nei i ike aku ai, ahiki ke koho ia aku, aia ma kahi o ka ekolu haneri a oi aku, ke hui pu ia na makua ame na keiki. He mali maikai ka la hanau o ke kamaiki aole i ka ua, aole hoi kekahi mau hoopilikia e ae, he maluhia no hoi me ka haunaele ole, e kani ana na kaula eono o uwehone, e wali ana na kikala o na kaikamahine a anapau i ka papahele o ka Hall o Haena nei, o na luahine ame na elemakule he like wale no me na opio, ka anapau i ke kula o Mailehuna, e hoonanea a e hoolealea ana i ka ai ana a ke kapena makainui o Hanalei ame kona mau hoa hele, ke hele ia e mamae na iwiaoao i kau a mea o ka aka, i ka le'ale'a, he ui mai hoi kau. Nui ka mahalo i keia mau makua mea keiki, i ko laua hanai ana i na makamaka ame na hoaloha, i ka ai ame ka i'a, na kulolo laiki, i hana maiauia, na palena i hoomo'aia, i wili pu ia me ka waiu, e kaohi ai i ka puu moniai, maikai ka la hanau o ka bebe me ka maluhia. Ke kalokalo ae nei ka'u leo pule i ke Akua, e hoomauia ke ola o ka bebe. Owau no me ka haahaa. J. P. K. Nawaielua o Haena, May, 13, 1921, Hanalei Kauai.