Ka Nupepa Kuokoa, Volume LIX, Number 26, 1 July 1921 — KUU KANE ALOHA KALAHOOLEWA D. HAO UA HALA. [ARTICLE]

KUU KANE ALOHA KALAHOOLEWA D. HAO UA HALA.

Ma ko Icsu mau lima, Ma kona poli no, Malaila au e malu, A maha maikai pu. Mr. Lunahooponopono o ke Kuokoa, Aloha oe:—E oluolu mai kou ahonui i kekahi wahi kaawale o ke keena o kou moku, no'u hoi ia rumi, no kela puolo waimaka o ke aloha e kau ae la maluna, nau hoi ia e hookomo iho maloko o ka kaua hiwahiwa, i ike mai ai ko maua mau kini makamaka ame na hoaloha o kuu kane e noho mai la mai kela pe'a o ka aina a i keia pe'a e ka aina, mai ka la puka ae ma Kumukahi i Hawaii ahiki aku i ka Mokupuni Kailila o Kauaiomanokalanipo. Ua haalele mai kuu kane ia'u ame ka leialoha a maua he keiki, a niau kolonahe aku la ma ka polikua a Kane. Ua hanauia mai kuu kane aloha mai ka puhaka mai o Mrs. Nahua ame Mr. J. H. Hao, i Okatoba 3, 1880, ua hoonaauaoia oia me ka maikai e Mr. David Kahaulelio Jr., ma ka olelo Beri tania, a i kona nui kupono ana, ua mare oia i ka wahine ia Mrs. Elikabeka Kahumoku, ua loaa mailoko mai o laua he elima keiki, ua make aku elua, ke ola nei ekolu kaikamahine, ua hala e aku hoi ma o ka wahine mua; ua loaa hou iaia he wahine, oia ka mea e kakau nei me ke kaumaha. Ua mareia maua e Mr. S. K. Kamaiopili i ka mahina o Augate 9, 1918, nolaila ua piha ia maua na makahiki 2 me 10 mahina a make aku la oia i lune 3, 1921. Ua noho hana oia me ka hui alahao mamua aku o ka mare ana me ka wa hine mua, ahiki i ko maua mare ana: nolaila ua piha iaia na makahiki he 18 o ka noho ana. Aloha no!

E Honolulu i ka ua kukalahale e, ua pau kona hehi hou ana i kou mau alanui. Aloha no!

E Kapalama e, kahi hoi a kuu kane e noho mau ai, ua pau kona hehi hou ana ma ia mau wahi, ua nalo loa oia mai a'u aku. Aloha no! E Moanalua e, kahi hoi iaia ka haki ke au, ua pau ka hoopulu hou ana o kou mau hunakai ma kona mau papalina aloha, no ka mea ua hala, ua nalo loa.

E Halama i ka ua waahila, ke kipu mai la i ka luna o Aiea, ua pau kou hoopulu hou ana ma kona helehelena aloha, no ka mea, ua nalo loa oia. Aloha no! E Ewa ika I'a Hamauleo e, ua pau kona ike hou ana ma kou mau aekai, ua hala, ua huna i na maka, ua nalo loa, aole e ike hou ia. Aloha no ka hoa pili he kane! E Waianae e, Waianae hoi, ua pau ka hehi hou ana o kuu aloha i kou mau nani i kaulana ai. Auwe kuu aloha e! E Makua e, i ke one opiopio, ua pau kona hehi hou ana ma kou mau kapakai aloha; auwe kuu kane, kuu hoa hele o ia wahi e; auwe kuu aloha e! E Kaena e, ka palena o na Kona ame na Koolau, ua pau kona kikaha hou ana ma kou mau alanui pali, ua hala, ua nalo aku oia i ke ala hoi ole maL E Kawaihapai, ke hapai mau nei no au i ko aloha, e hoonana ae ana i kahi e loaa ai, aole ikeia, ua hala ka mea i manaoia; auwe kuu kane e, kuu hoapili. Mokuleia i ka moena pawehe e, aole e hehi hou ana kuu aloha i kou moena makalii, no ka mea ua nalo na maka, ua hala i ke ala hoi ole mai. E Waialua i ke ehukai o Puaena, aole oe e hoopulu hou ana kou mau hunakai i kona mau papalina, no ka mea ua hala, ua nalo loa aku oia; aloha no! E Haleiwa e, me ke one wali o Maeaea, ua pau kona kikahakaha ana ma ko olua mau aekai, no ka mea ua hala, ua nalo loa aku oia. Auwe kuu makua o kuu kane e! E Kahuku e, ka aina lewa i ke kai, ua pau kona hehi hou ana ma kou mau alanui, a no ka mea ua huna i na maka, ua hala, ua nalo loa, aole oia e ma alo hou malaila. Auwe kuu kane, kuu aloha e! Nolaila ke haawi nei au i na hoomaikai a nui loa i na makamaka ame na hoaloha o kuu kane i hele mai me ka

lakou mau makana bo-ke pua, ame ka poe apau i ala pu me a 'u ame ko maua papa ame ka maua mau kaikuaana, ka poe apau i hele ma kona hoolewa, a ke noiia aku nei ko oukou oluolu e lawe aku i ka'u mau koomaikai apau, a na ke Akua e kau mai i na hoopomaikai ia oukou apau, a nana no e hoomama mai i na kaumaka, maluna o'u ame ka ohana ma ka inoa o Iesu. Owau no me ka oiaio, MRS. ALICE K. D. H. KAHALEHOE Kapalama, Oahu.