Ka Nupepa Kuokoa, Volume LIX, Number 25, 24 June 1921 — Page 1

Ka Nupepa Kuokoa

 

 

 

HE HOALOHALOHA NO KA MAKUA, WM. K. BACLE.

 

            O ka makua nona keia hoomanao ana, oia kekahi o na hoahanau kupaa a iwikuamoo oka Ekalesia o Koloa i Kauai, mai kona wa i lilo mai ai i hoahanau ahiki iho la i kona waiho ana mai i keia noho honua ana.

            Ua paepae mau mai oia i kona lima kokuo. me ka hoomohala mau ana mai i na manao aloha no kona ekalesia.

            O kekahi o na waiwai pookela loa ana i hiipoi mau ai iloko o na la o kona ola haipule ana, o ia no kona hoolaa ana iaia iho, e hoomanao mau i ka lulu mahina hou, me ka puuwai iini e hana ana no kona Makua iloko o ka lani.

            He oiaio no, o keia honua, o ke kumu no ia o keia kino, wahi a ka olelo maemae a ke Akua, nolaila i luhi wale ai a make keia kino.

            Nolaila, hoi no oia i kona kumu, he honua; aka nae, o kela kanaka maloko iho ona, oia ke kanaka, no ka mea, he mea ola, o ia ko ke Akua ano, puka no oia a hoi i kona kumu, he mea e ola mau ana, he Akua, aia ma ka lani.

            Wahi a ka Makua Laiana ma ka huke himeni “Ka Lei Alii,” aoao 152:

            Oia o ae la he aina laelae,

            A malaila Iesu i hana’i,

            I mau home makiai no kakou.

            Hui—Ao laelae, ao laelae,

                        Kahi e hui a oli ai,

                        Ao laelae, ao laelae,

                        Kahi e hui a oli ai.

            Ma o ae ma ia aina laelae,

            Kaui a mau na mele maikai,

            Pau e pau la ka lohe ana’e,

            I na leo haalo’u a uwe.

            Nolaila, e hooholoia, o makou o ka Ekalesia, ke Kula Sabati ame ka Ahahui C. E. o ka Ekalesia Makua i oleloia, ke pahola aku nei makou i ka makou hoalohaloha no ko makou hoa paahana i haalele mai i keia noho pu ana o makou.

            E hooholo hou ia, ke komo pu aku nei makou me oukou ka ohana, e kumakena pu, luuluu pu, a e kanikau pu hoi.

            E hooholo hou ia no, ke pule nei makou i ko kakou Makua ma ka lani, e hoomama ae ia oukou ka ohana, mai na luuluu ae a ke aloha kupuna, a makoa hoi, a Nana no e hookaawale ae i na waimaka mai ia oukou ae.

            E hooholo hou ia no, e hoounaia keia hoalohaloha no ka hoopukaia ma ka Nupepa Kuokoa, a malaila e ike ai na mea apau.

HENRY BLAKE,

Komite Eklesia;

MRS. HENRY BLAKE,

Komite Kula abati;

MRS. J. K. PIIMOKU,

 

O MAUA PU KEKAHI ILOKO O KE KAUMAHA.

 

            E ka Nupepa Kuokoa e, aloha nui: E oluolu mai oe, e hoike aku ia Mr. ame Mrs. Daniel P. Haleamu, ko maua mau hoahanau aloha, a pela pu hoi me ke keiki a makou, no ko maua komo po ana aku iloko o ke aloha ame ke kaumaha me laua ame ka ohana i hooneleia mai i ka mea aloha he keiki, o ia hoi o Miss Jessemine Haleamu.

            Oiai au ame ka’u aliikane e heluhelu ana i ka Nupepa Kuokoa o ka la 3 o Iune o keia makahiki no, ua hoopuiwaia mai ko’u noonoo i ke kahea ana mai o ka’u aliikane ia’u, e mama e. pane no hoi au, heaha keia hoopuiwa au? O kana i pane mai ai, o kela bebe kaikamahine a Cousin Maria Haleamau ma i hanau ai i Kileauea Light Station, ua make ia, eia ka hoalohalo ha a na makua la!

            O ko’u waiho aku la ia i ka’u aoao nupepa e heluhelu ana a huli ae la au ame ka’u aliikane, he hookahi ko maua heluhelu like ana, auwe no hoi ke aloha e. na ko maua mau waimaka no he helelei; a uwe ae la au me kuu kaukau ia olua e kuu mau hoahanau aloha.

            Hoomanao ae la ia mau wahi a kakou i noho malihini ai, hookahi kamaaina o ka hana. Aloha no o Baby Maina, oiai o olua a o maua waiho ana oia i keia ao malamalama, eia ka o kona ma’i ana keia e hoopokole mai i kona ola ana. Aloha no!

            Nolaila e ae mai olua, o maua pu kekahi e komo pu aku me olua iloko o ke kamakena pu ana, oiai ua kaawale lua he mokupuni okoa, kaawlae hoi maua he mokupuni okoa, a na ke kai i pale mawaena o kakou, nolaila ike ole aku kekahi i kekahi a ma ke kino lahilahi o ka Nupepa Kuokoa kakou e ike iho ai i na mea aloha i hala aku ma o.

            Nolaila, me keia mau manao aloha, ke hooki nei au me ko maua aloha aui no olua, ame na keiki, a ke pule nei nua na ke Aku ko kakou Makua iloko o ka lani e lawe ae i na kaumaha ame na luuluu mai ia olua ae, no ka olua mea aloha i hala aku ma o, o keia ka’u pule ma ka inoa o ko kakou Haku aloha Iesu Kristo, amene.

            O maua iho no me ke aloha,

LUTHER K. KALAMA,

MRS. ANNIE M. KALAMA,

 

MA KE KAUOHA

 

Na Kanawai Ahaolelo Kau o 1921.

 

KANAWAI 222

 

[B. S. Helu 67.]

 

HE KANAWAI

 

E HOOLOLI ANA I KA MOKUNA 37 O NA KANAWAI I HOOPONOPONOIA O HAWAII, 1915, E PILI ANA I NA HANA MAHIAI A ULELAAO, MA KA HOOLOLI ANA AE I KA PAUKU 477 O IA KANAWAI, ELIKE ME IA I HOOLOLIIA AI E KE KANAWAI 136 O NA KANAWAI O KE KAU O 1915, AME KA PAKU’I HOU ANA AKU I KA PAUKU 481 I EKOLU MAU PAUKU HOU A E IKEIA IHO LAKOU O NA PAUKU PAKU’I 9A, 9B AME 9C.

 

E Hooholoia e ka Ahaolelo o ke Teritore o Hawaii:

           

            PAUKU 1.      O ka pauku 477 o na kanawai i hooponoponoia o Hawaii, 1915, e like me ia i hoololiia e ke kanawai 136 o na kanawai o ke kau o 1915, ma keia ke hoololi hou ia aku nei a i heluhelu ai penei:

 

            “Pauka 477.     Ka luna hoohana o ka papa. O ka mana ame na hana i hookau ia mamua aku o ka la 25 o Aperila, 1903, maluna o ke komisina o nahana mahiai ame na ululaau, a mahope mia o ia manawa ua hoolilo ia mai a hookau ia mai maluna o ka peresidena o ka papa, ma keia ke hookau ia aku nei a ke hoomanaia aku nei maluna o ka luna nui hoohana o ka papa, a ua pap nei. me ke pono ana mai a ke Kiaaina, e hookohu aku ai, a iaia hoi e uku ia ai ka uku, mai kekahi manawa mai a i kekahi manawa, e like me ia e haawiia mai ana e ka Ahaolelo. Ua kuleana ka papa e hookohu i hookahi a oi aku mau luna hoohana kokua; a o ko lakou uku e haawiia mailoko mai o na waihona e hooholo ai, a o ka lakou hana o ke kokua a hoike aku i ka luna hoohana no na hana a ka papa maluna o na mokupuni mawaho aku ame na hana e ae no hoi e hookau ia aku ana maluna o lakou.

 

            PAUKU 2.      O ka pauku 481 o ua mau kanawai nei i hooponoponoia e oleloia nei, e like me ia i hoololi ia ai, na keia ke hoololi hou ia aku nei ma ka pakui ana aku me ia pauku i ekolu pauku pakui hou aku a i ikeia o na pauku pakui 9A, 9B, ame 9C a i heluhelu ai penei:

 

            “9A.    O ka agena o ka papa, ua hiki iaia i kela ame keia manawa me ka waiho ole ia aku o kekahi hoike i ka ona a mau ona e hoonee aku i kela ame keia pipi e loaa aku ana maloko o kekahi o na ululaau i hookaawaleia, a e paa a e malama ia mau pipi ma kekahi wahi kupono malalo o ka lilo o ka ona a mau ona o ua mau pipi nei, mahope iho o ka hoomaopopoia ana o na koi ame na kaki ame na lilo e hooakaka ia nei maloko o keia. O ka ona a mau ona o ia mau pipi e uku aku i ka huina o elima dala o ke poo hookahi no keia mau holoholona i hoonee ia mai ua ululaau nei i hookaawaleia, me ka hapa o na, lilo o ka hoonee ana mai ame ka malama ia ana o ua mau holoholona la, a o ia mau huina e lilo ia i mau koi maluna o ua mau pipi la a hiki i ka manawa e uku ia mai ua mau koi a mau kahi nei. Mahope iho o ka hoonee ia ana mai o ua mau pipi nei ame ka paa a malama ia ana e like me ia i hoakakaia ae la maluna e, e hoike ia aku ka lohe i ka ona a mau ona, ina ua ike ia ia mau ona, a e hoike pu ia aku ka huina nui o na kaki ame na hoolilo e ukuia mai ai i wahi e hookuuia aku ai o ua mau pipi nei. A o ka papa hoi, ina manawa a pau e ike ole ia ai ka ona a i ole e loaa ole aku ai ka ona. e hana ae lakou i hoolaha a e hoopuka a e hoopuka ae maloko o kekahi nupepa e holopuni ana maloko o ke kalana a kulanakauhale a kalana kahi a ua mau pipi nei e paa ia ana, a e hoike aku maloko o ia hoolalia i ke ano o na pipi ame ke kuni a mau kuni maluna o lakou o na pipi i hoonee ia a e paa ia ana e like me ia i hoakakaia mamua ae nei, a e hoike aku i ka ona a mau ona ame ka lehulehu holookoa ina aole e uku ia mai na kaki ame na hoolilo e ae e hoike ia aku ana ma ua hoolaha la mamua o kekahi la e hoike ia ana maloko o ia hoolaha, a o ia la hoi aole e emi iho malalo o elua pule mai ka hope aku o ka hoolahaia ana o ka hoolaha, alaila o n pipi e hoomaopopoia ana maloko o ia hoolaha e kuai ia aku ana no ia ma ke kuai kudala no ke kala kuike i ka maa koho kiekie loa i wahi e hiki ai ke uku ia ke koina maluna o ua mau pipi la no na lilo ame na kaki i hoomaopopoia maloko o ua hoopii la. O ua hoolaha la e hoopuka mau ia i hookahi manawa o ka pule no na pule kailike he elima (elima manawa e hookomoia ai). Ina o ia mau kaki ame na hoolilo e ae, ame na lilo kaulele mai i ili hou mai mahope iho o ka hoopukaia ana aku o ua hoolaha la, e uku ole ia mamua ae o ka la i hoike ia maloko o ua hoolaha nei, alaila ma ia la e kuai ia ua mau pipi nei e like ma ia i hoakakaia ae la maluna. a o na kaki apau ame na lilo e ae e lawe ia ae ia mai loko mai o na loaa o ia kuai ana, a o ke koena aku e haawi hou ia aku i ka ona a i ole i na ona o ua mau pipi nei. Ina aole e waihoia mai kekahi koi no ua koena nei iloko o kanaono la mahope aku o ka la ia kuai ia ai ua pipi nei, e waiho ia aku no ua mau dala nei iloko o ka waihona o ka lehulehu ma ke ano he waiwai no ka lehulehu, a o na koi apau a kela ame keia maluna o ua mau dala nei e lilo no ia i mea ole a ma keia ke hoopau loa ia nei ia kuleana.

 

            9B.      O kela ame keia kanaka, hui a ahahui e loaa aku ana o ka hoike mai ka papa komisina aku o na hana mahiai ame ululaau, a i ole mai kona agena a mau agena paha, he pipi a mau pipi ka ua kanaka hui a ahahui la ua loaa aku a e holo laula ana maloko o ua ululaau nei i hookaawale ia e like me ia i hoakaka ia maloko o ka pauku 9 o keia, koe keia o ka ona o ia aina ponoi, a i hiki ole a hoomaopopo ole ae maloko oumi la mahope iho o ka loaa ana aku o ua hoolaha la iaia e hoonee aku i ua pipi a mau pipi la mai ka ululaau i hookaawaleia, a i ole i pepehi ole a kipu ole i ua mau holoholona nei, e manao ia no ua ku ka hewa mikamina maluna ona a o lakou, a e hoopai ia ma ka hoopai dala no ka huina o umi dala no kela ame keia pipi ana i ona ai i loaa aku ai maloko o na ululaau la i hookaawaleia a i hiki ke hooia ia e holo ana maloko o ua ululaau nei i hookaawale ia i ka manawa ona i haawia ia aku i ka hoike no ia mea. Ina no hoi o ua pipi la i haawi ia aku ai ka ike i ka ona a mau ona, e like me ia i hoike ia maluna ae nei. mahope iho o ka hala ana ae o na la he umi mai ia hoikeia ana aku o ka ike, a aole e hoonee ia aku a e loaa aku ana no e holo ana maluna o ua ululaau nei i hookaawaleia alaila o ua papa komisina la o na aina mahiai ame na ululaau, a i ole o kona mau agena, ua hiki ia lakou ke hoonee aku ia mau pipi la a i ole ia kipu a luku wale aku ia lakou em ka noonoo ole ia ae e haawi aku i kekahi uku i ka ona o ia mau pipi. O na pipi apau loa e loaa aku ana e holo ana maloko o na ululaau i hookaawaleia, e hoike maka ana no ia he waiwai ia noua kanaka, hui a ahahui nei ka mea nona ke kuni e kau ana maluna o ia mau pipi ia manawa.

 

            9C.      O na hoopai dala apau, na koina ame na kaki e ae apau i hookauia a i ole ia i ohi ia mai malalo o na hoakaka ana a keia pauku e waiho ia ae ia iloko o ka waihona o ka puuku o ke Teritore no ka pomaikai o ua papa nei no ka hoohana ia ana maluna o na ululaau, a o na dala apau e hookomoia aku ana mamuli o na kauoha a keia kanawai ma keia ke hookaawale hou ia nei no ia mau hana.”

           

            PAUKU 3.      E mana keia kanawai mai kona la aku e aponoia ai.

 

            Aponoia i keia la 27 o Aperila, A. D. 1921.

 

C. J. McCARTHY,

 

KANAWAI 223.

 

[B. S. Helu 123.]

 

HE KANAWAI

 

E KUKULU ANA I KE KOMISINA KAUKANAWAI HAWAII, E HOOMAOPOPO ANA I KANA MAU HANA, A E HOOKAAWALE ANA I HAAWINA DALA NO IA KOMISINA.

 

E Hooholoia e ka Ahaolelo o ke Teritore o Hawaii:

 

            PAUKU 1.      I komisina e ikeia ana o ke Komisina Kaukanawai o Hawaii, a i eha lala o ia komisina, ma keai ke hookumu ia nei, a ekolu mau lala o ia komisina e wae ia mai ana e ke kiaaina mailoko mai o na lala o ka ahaolelo e ku nei i keia manawa, a o ka ha@ wae ia a e koho ia e ke kiaaina e like me ke kauoha a ke kanawai kumu. Hookahi o keia mau lala e koho ia i lunahoomalu no ua komisina nei.

 

            PAUKU 2.      O ua komisina nei i oleloia, mahope koke iho o ka pau ana o ka Ahaolelo, e hele koke aku lakou i Wakinekona, D. C.,.a malaila e kokua aku lakou i ka Elele mai Hawaii nei imua o ka Ahaolelo o Amerika Huipuia i ka waiho ana aku maloko o ia Ahaolelo i na kanawai apau i homaopopoia maloko o ka Olelo Hooholo Hui Helu 8, i hooholoia ai e ka Ahaolelo, a i hoakaka piha ia hoi ma ka pila kanawai i hoohui pu i aku me ua Olelo Hooholo Hui nei a ke Senate Helu 8.

 

            PAUKU 3.      O ka huina o umikumamaono tausani dala ($16,000.00) a i ole o ka huina e lawa pono ai na hoolilo, ma keia ke hookaawale ia nei mai na waihona kumau mai o ka lehulehu o ke Teritore no ka uku ana i na hoolilo o ke Komisina i oleloia oiai, e kaawale aku mai ke Teritore aku, a o ia mau huina e hoolilo ia mamuli o na bila kikoo i aponoia e ka lunakoomalu o ke komisina i oleloia. O ka uku la ame na lilo e ae o ua komisina nei i oleloia nei, aole loa ia e kaupalenaia e ma hoakaka ana a ka olelo hooholo helu 3 o ke kau o ka ahaolelo o ka ahaolelo o Hawaii o ka makahiki 1917.

 

            PAUKU 4.      E mana keia kanawai mai ka la aku o kona aponoia ana.

 

            Aponoia i keia la 27 o Aperial, A. D. 1921.

 

C. J. McCARTHY,

 

KANAWAI 224.

 

[B. S. Helu 126.]

 

HE KANAWAI

 

E Hoomaha Ae Ana Ia Lizzie K. Hiram.

 

E Hooholoia e ka Ahaolelo o ke Teritore o Hawaii:

 

            PAUKU 1.      Ma keia ke homana ia nei a ke kauoha ia nei ka Puuku o ke Teritore o Hawaii e uku ae mamuli o ka bila kikoo dala i hoopukaia a e e ka Luna Hooia o ke Teritore i ka huina o elua haneri me kanahiku dala ame kanaiwa keneta ($270.90) ia Lizzie K. Hiram no ka manao e hoihoi hou aku ia Lizzie K. Hiram i oleloia i kana mau dala auhau i uku hewa no ka makahiki 1901 a hiki mai a hui pu ia me ka makahiki 1909; a o ia huina dala e uku ia ana ke hookaawale ia nei mailoko mai o na loaa laula o ka waihona o ke Teritore.

 

            PAUKU 2.      E mana keia kanawai mai a mahope aku o ka la o kona aponoia ana.

 

            Aponoia i keia la 27 o Aperila, A. D. 1921.

 

C. J. McCARTHY,

 

KANAWAI 225.

 

[B. S. Helu 127.]

 

HE KANAWAI

 

E APONO ANA I KA WAHI E KU AI, A E HOOMANA ANA I KE KUKULUIA ANA O KEKAHI UWAPO MALUNA AE O KA MULIWAI O WAILOA, MALOKO O KA APANA O HILO HEMA, KALANA O HAWAII.

 

E Hooholoia e ka Ahaolelo o ke Teritore o Hawaii:

 

            PAUKU 1.      Ma keia ke haawiia nei ka mana i ke Kalana o Hawaii ehoala ae a e kukulu i uwapo mai kekahi aoao a kekahi aoao o ka muliwai Wailoa, maloko o ka apana o Hilo Hema, Kalana o Hawaii, ma ka wahi no a ku nei kela uwapo i hoikeia ae nei he kupono ole i ka hele ana a ka lehulehu, a ma keia ke apono ia nei ia ku ana malaila.

 

            PAUKA 2.      O na hoolala ana no ke kukuluia ana o ua uwapo nei e oleloia nei, a e paa ana hoi maloko o ekolu kii e waiho nei maloko o ke keena o ka eneginia kalana o ke Kalana o Hawaii, a’e hoomaopopo ia ana a e hooia ia ana maloko o ka pauku 3 o keia bila, ma keia ke aponoia nei e like me ia i hoikeia ae la maloko olaila, me ke koe no nae o ke kuleana e hoololi ia ae i kupono ai me ke kuhikuhi ame ka hoololiloli ana i ike ia ai he kupono a i ole e like me ia i hoomaopopoia malalo o na kanawai o Amerika Huipuia, ma keia ke apono loa ia nei.

           

            PAUKU 3.      O ke kiaaina o ke Teritore, o ka Peresidena o ka Senate, ame ka Luanhoomalu o ka Hale o na Lunamakaainana, ma kela ke hoomana ia nei e kakau kua iho maluna o ka pepa helu ekahi o ua mau palapala kii hoolala nei i oleloia i ke apono o ka ahaolelo o Hawaii i ka wahi e ku ai ame na kii e ae no ke kukuluia ana o ua uwapo la i oleloia.

 

            PAUKA 4.      E mana keia kanawai i kona la e aponoia ai.

 

            Aponoia i keia la 27 o Aperila

 

C. J. McCARTHY,

 

KANAWAI 226.

 

[B. S. Helu 128.]

 

HE KANAWAI

 

E HOOKUMU ANA I KE KOMISINA KUIKAWA IMI LIMAHANA O HAWAII, E HOAKAKA ANA I KANA MAU HANA, A E HOOMAKAUKAU ANA I MAU HAAWINA DALA NO KA PONO O LA KOMISINA.

 

E Hooholoia e ka Ahaolelo o ke Teritore o Hawaii:

 

            PAUKU 1.      He komisina i ike ia o ke Komisina Kuikawa Imi Limahana o Hawaii, o ekolu lala, e wae a e kohoia mai ana e ke Kiaaina, e like me ia i hoakaka ia e ke kanawai kumu, ma keia ke hookumu ia nei. Hookahi lala o ia Komisina e hookohu ia a e ike ia o ka lunahoomalu o ua komisina la e oleloia nei.

 

            PAUKU 2.      O ua komisina nei e oleloia nei, mahope koke iho o ka hooholoia ana o keia kanawai, e holo aku lakou i Wakinekona, D. C., a malaila e kokua aku lakou i ka Elele Lahui i ka Ahaolelo Makua mai Hawaii nei aku i ka waiho ana aku mamua o ka Ahaolelo o Ameirka Huipuia i na mea i hoakakaia maloko o ka Olelo Hooholo Hui a ka Hale Helu 38 o keia kau o ka Ahaolelo o Hawaii, a me ke koi ana aku i ka Ahaolelo i ka hoohiki wawe ana ae i ka hooholo ana i kekahi mau kanawai e hoopau ae i ke kupilikii o ka aina nei e liek me ia i hoakakaia ai maloko o ua olelo hooholo hui nei.

 

            PAUKU 3.      O ka huina o umikumamalima tausani dala ($15,000.00) a i ole ia o ka huina e lawa kupono ai na hoolilo, ma keia ke hookaawale ia nei mai na loaa laula mai o ke Teritore no ka uku ana i na hoolilo o ua komisina nei e oleloia nei i ko lakou manawa e kaawale akku ai mai ke Teritore nei, a oia mau huina e hoolilo ia mamuli o na bila kikoo e aponoia ana e ka Lunahoomalu o ua komisina nei e oleloia nei. O ka uku la ame na lilo e ae o na lala o ua komisina nei aole, loa ia e kaupalenaia e na hoakaka o ke olelo hooholo hui helu 3 o h=ke kau ahaolelo o Hawaii o ka makahiki 1917.

 

            PAUKU 4.      E mana keia kanawai mai kona aponia ana.

 

            Aponoia i keia la 27 o Aperila, A. D. 1921.

 

C. J. McCARTHY,

 

KANAWAI 227.

 

[B. S. Helu 129.]

 

HE KANAWAI

 

NO KA HOOMAHA ANA AE I NA KANAWAI I HOOKUU IA MAI KE KAHUA MA’I LEPERA MAI MA MOLOKAI.

 

E Hooholoia e ka Ahaolelo o ke Teritore o Hawaii:

 

PAUKU 1.      E hookaawale ia a ma keia ke hookaawaleia nei ka huina o elima tausani dala ($5,000.00) mai ka waihona mai o ke lehulehu no ka manao ana e kokua aku i na kanaka ilihume i hookaawale ia ma ka panalaau mai’i lepera, ma Molokai, a i nanaia mahope mai o ka la o Aperila, 1919, a ua ike ia iho ua pau loa ka ma’i lepera maluno o lakou, a ua kauoha ia aku e haalele i ka panalaau, a e unuhi ia keia dala, i kela ame keia manawa, e