Ka Nupepa Kuokoa, Volume LIX, Number 24, 17 June 1921 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

 

KANAWAI 220.

 

[ B. S. Helu 37.]

 

HE KANAWAI

 

E HOOMANA ANA I ELI PAA IA ANA O KA AUWAI LAWE WAI O WAIKIKI A E HOOMAOPOPO ANA I KA HOOPUKAIA ANA AME KA UKU IA ANA O NA BONA NO IA HANA.

 

E Hooholoia e ka Ahaolelo o ke Teritore o Hawaii:

           

            PAUKU 1. O ka hana a ka papap ola o ke Teritore i hana ai a i kukulu ai i ka aina i hoomapopoia o ka apana auwai lawe wai o Waikiki, e like me ia i hoike ia maloko o kekahi olelo hooholo aua papa la i oleloia i hanaia ma ka la 14 o Okatoba, 1920, a waiho nei hoi ma ka faila iloko o ke keena o ua papa ola la o ke Teritore ame ke keena o ka luna nui o na hana hou, ma keia ke hooia ake hoomauia nei a o ka hoopau loa ana aku i ua hana nei o ka auwai lawe wai o Waikiki ( a ke hana ia mai nei kekahi hapa ) ma ke kukulu ana i mau paia paa a mau papaku paa

A i ole o na wahi e ikeia ana e kupono e hanaia pela ma keia ke hoolahaia ae nei he mea pono ke hana ia i wahi e kahe a e holo pono ai o ka wai a i wahi hoi e hoomaemaeia ae ai o na aina a pau loa i komo aku maloko o ua apana aina nei i kaa aku malalo o ka wahi o ka auwai lawe wai o Waikiki.

 

            PAUKU 2.  Ke hookaawaleia nei ka huina o eono haneri tausani dala ($600,000.00) moiloko mai o na waihona apau e waiho la maloko o ka waihona o ke Teritore, a i ole e loaa mai ana ma keia mua aku iloko o ua waihona nei no ke kuai ia ana o na bona aie, a e hoopuka ia no hoi na bona e like me ia i hoomaopopoia ai e ke kanawai i hiki aku ka huina e lawe ai keia mau dala e hookaawale ia nei no ka hana ana a me ka eli paa ana, ke kukulu ana i na paia ame ka papaku, a i na wahi kupono o ka papaku e hana ia pela, o ka auwai lawe o Waikiki e like me keia e hoomaopopoia nei mahope aku.

 

            PAUKU 3. O ka luna nui o na hana hou ma keia ke hoomana ia nei a ke kauohaia nei oia e hoomakaukau i na kii apau loa ame na kuhikuhi apau no ka eli paa ana ame ka kukulu ana i ua mau paia ame papaku paa nei, a i ole ina wahi o ua papaku nei i ike ia e pono e hana e hana ia pela, o ua auwai lawe wai nei, a o ia mau kii ame na kuhikuhi ana apau loa e hoakaka pono mai lakou ma ke ano moakaka loa ka mea e hana ia ame ke ano o ka hanaia ana, ke ano o na pono e hoohanan ia ai, ka huin nui e koho ia ana e lawa ai ke kukuluia ana o ia auwai, a i ka manawa e aponoia ai e ke kiaaina ame ka papa ola o ke teritore, e like ka ikaika ame ka mana o ia mea me he mea la ua hooponopono ia no a ua hoopukai no mmuli o ka olelo hooholo mua a ua papa ola nei o ke Teritore e like me ia i hoakaka ia ma ka mokuna 71 o na kanawai i hooponoponoia o Hawaii, 1915, e like me ia i hoololiia ai.

 

            PAUKU 4. Mahope koke iho no oka pau ana o ia mau kii ame na kuhikuhi i ka hana ia ame ka hooponopono, e haawi koke aku ka luna nui o na hana i hoike i na mea kuleana aina a i ole poe noho aina apau e noho ana maluna o na aina o uaa apana nei i kono maloko o ka auwai lawe wai o Waikiki e like me ia i hoakakaia maloko oka mokuna 71 o na kanawai i hooponoponoia o Hawaii, 1915, e like me ia i hoololiia ai, e hai aku anan ia lakou i kona manao, mamuli o na kauoha a keia kanawai, e kukulu ae i na paia ame ka papahu o ua auwai nei, a i ole ia ina wahi o ua papaku la e pono ke hana ia pela.

 

            PAUKU 4. Oua palapala hoike nei e hai aku i ka mea ona aine i oleloia a i ole i ka mea e noho ana maluna o kela ame keia apana aina ma ke ano nui i ka mea e hana ia ana i hooholoia ai, ka huina i koho ia e auhau ia aku ana maluna o kona aina a apana aina maloko o ua apana aina lawe wai nei o Waikiki, a e kuhi aku me ka pololei maoli iaia i ka palapala aina, na kii ame na kuhikuhi e kau ana ma fa faila iloko o ke keena o ka luna nui o na hana hou e hoike maopopo mai ana i ke ano o ke kukuluia ana ame na lilo i kohoia e paa ai ia hana, a e hoike pu aku i ua

Mau ona nei ame ka poe noho aina o ua mau palapala aina nei, na kii ame na kuhikuhi ua hamama mau lakou no kona makaikao a noii anani na hora hana mau o ke keena.

 

            PAUKU 6. A o ua poe ona aina la a me ka poe noho aina, i ka manawa e loaa aku ai ia lakou keia hoike, e loaa aku no ia lakou ke kuleana e hoohalahala ai e like me ia i hoomaopopo ia e ke kanawai maluna o ka mea pono ke hana ia, ke ano ame ka nui o ka hana e hana ia aku ana ame ka mahelehele ana o na lilo e like me ia i kuhikuhi ia maloko o ka mokuna 71 i oleloia e like me ia i hooponopono a i hoololiia ai.

 

            PAUKU 7. i kekahi manawa kupono mahope koke iho o ka hoomaka ia ana o ka eli ana i ua auwai lawe wai la, e hoomaka koke aku no ka luna nui o na hana hou i ke kukulu ana i na paia paa ma na aoao ame ka papaku, a i ole na mahele o na papaku i manao ia e hana pela o ua auwai lawe wai nei i olwloia e like me ke kuhikuhi a ua mau kii nei i olelo mua ia ae nei.

 

            PAUKU 8. O ka eli ia ana o ua auwai lawe wai nei, ame ke kukuluia ana o na paia ame ka papaku, a i ole ia o ka wahi o ua papaku la i manao ia e kukulu, o ua auwai lawe wai nei, ma keia ke hoike ia nei a ke kalahea ia nei he mea pono ke hana no ka lawe pono ana i ka wai ame ka hoomaemae ana o na aina a pau i hoomaopopo mua ia mamua ae ua komo iloko o keia apana aina o ka auwai lawe wai e like me ia i hoike mua ia ae nei, a o ka lilo o ia eli ana ame ke kukulu ana e uku ia no ia e na ona waiwai maloko o ua apana nei a e kaana like ia ae mawaena o na apana aina apau maloko olaila e like me ka nui o ka aina o ka mea hookahi.

 

            PAUKU 9. O na lilo a pau no ka hana hou ana i keia mau mea apau e like me ia e hoike ia nei maloko o ka pauku 7 o keia kanawai i koike mua ia ae nei, a i mahelehele ia hoi e like pu me na kuhikuhi ana a keia kanawai, e lilo no ia i koi maluna o kela ame keia apana a mahele aina; a o ua koi la, e kau e ae no ia a e lilo no ia oia ka mua loa maluna o na koi i hoomaopopoia maloko o ka mokuna 71 i olelo mua ia ae nei e like me ia i hoololiia ai, a e mau aku ka mana o ia koi a hiki i ka manawa ona e uku piha ia ai a lawa pono. Ua hiki no i ua koi la ke kakau kope ia e like me ia i hoakaka ia maloko o ka mokuna 71 i olelo mua ia, a i hoololi ia, a ua hiki no ke paniki ia i kela ame keia manawa mahope iho o ka uku ole ia ana ma ke ano no ame ia no i hoakakaia ai maloko o ka mokuna 71 e oleloia nei e like me ia i hoololiia ai.

 

            PAUKU 10. i hui pu ia aku ne ka lilo o ka auhau ia ana aku maluna o kekahi aina a apana aina no ka eli ia ana o ka auwai e oleloia nei i kulike me ke kauoha a ua olelo hooholo nei e oleloia nei a ka papa ola ame ke kuhikuhi ana a ka mokuna 71 o na kanawai o Hawaii i hooponoponoia, 1915, a i hoololiia, e uku aku kela ame keia ona waiwai a noho aina i ke Teritore i kela ame keia makahiki no ka manawa o umikumamalima makahiki, i hookahi hapa umikumamalima o ka huina e auhau ia mai ana maluna o kona aina a apana aina maloko o ua apana nei o ka auwai lawe wai i oleloia, me ka ukupanee maluna o ka huina oa uku oke ma ka pakeneta e hoomaopopoia ana maloko o na bona e hoopuka ia aku malalo o ka manao o keia kanawai.

 

            PAUKU 11. O ka hoohaule ana i ka uku ana i na uku makahiik e like me ia i hoakakaia maloko o ka pauku 10 o keia, ina paha o ke kumupaa a i ole o ka ukupanee, i ka manawa e piha ai o ka manawa e lilo ana ia i mea e piha koke ae ai ka huina holookoa i uku ole ia a e lilo ia i mea e uku koke ia, a o ka huina nui o ka kumupaa ame ka ukupanee e lilo ia i huina aie e kau ana ka uku panee maluna ona no ka hookahi pakeneta o ka mahina hookahi a hapa mahina, a hiki aku i ka la o ke kukala ia ana e like me ia i hoomaopopo mua ia ae nei; aka nae, i kekahi manawa mamua iho o ka la o ke kuai kukala, ua hiki i ka ona ke uku i ka huina o na uku ana i kaa mahope a hui pu aku me ka uku panee no hookahi pakeneta o ka mahina hookahi a hapa mahina e like me ia i  olelo mua ia ae nei, ame na hoopai e ae apau i kau ia aku, a ia manawa e hoi hou ae no ia mea a ke kulana mamua a e loaa ke kuleana e uku hou i na uku makahiki e like no me he mea la aole i haule maope kekahi uku ana ona. O ka ona a i ole ia o kela ame keia mea noho maluna o kela ame keia aina, i haule iho kana uku ama mahope, ua hiki no iaia ke uku piha i ka auhau maluna o kona aina me ka huina uku panee apau loa, i kelaame kei ona e makemake ai e hana pela.

 

            PAUKU 12. O na huina dala apau e uku ia mai ana e like me ia ae la i ke Teritore, e waiho ia aku nno ia ma ka waihona hoihoi aie o ke Terotore a oia hoihoi i ka manawa e ukuia mai ai e manaoia ua hanaia ia hana e kulikeai me ka manao o ka hapa mua o pauku 1182 o na kanawai i hooponoponoia o Hawaii, 1915.

            PAUKU 13. i wahi e loaa mai ai ka huina dala e lawa ai ke kukulu ia ana o ua auwai lawe wai nei, e hoopuka he mau bona nona ka huina o eono haneri tausani dala ($600,000.00) e ka puuku, a oia nau bona e uku ia iloko o umikumamalima mau makahiki mahope aku o ka la o ka hoopuka ia ana, a e uku ana i ka ukupanee ma ka pakeneta aole e oi aku maluna o eono pakeneta no ka makahiki. Hookahi hapa umikumamalima o na bona a pau e hoopukaia ana e hookaa ia i kela ame keia makahiki, a o na bona apau e ukuia ana e hoomaopopoia lakou ma ka hailona ana.

 

            PAUKU 14. O na bona e hoopukaia ana malalo o ke kuhikuhi ana a keia kanawai ua hiki no ke hoolilo ia aku e ka luna nui o na hana hou, me ka apono ana mai a ke kiaaina, ma ka huina piha o ia mau bona , no ka uku ana aku ma ka uku pau a i oleia ma ka uku ana i kekahi hapa o ka uku aelike no ke kukulu ia ana o ua auwai paa lawe wai nei e oleloia nei.

 

            PAUKU 15. O kela ame keia huina e kaki ia ana malalo o na kuhikuhi ana a keia kanawai i kekahi o na aina i noho ona ia e ke aupuni maloko o ua apana aina nei o ka auwao lawe wai, e uku ia no ia mai na dala mai e komo aku ana iloko o ka waihona o ke Teritore mai ke kuai ia ana a i ole hoolimalima ia ana o na aina aupuni maloko nei o ke kulanakauhale a kalana o Honolulu, i ka manawa a e like me ke ano e hoakakai anei maloko o ka pauku 6 o keia kanawai.

            PAUKU 16. E mana keia kanawai i kona aponoia ana.

 

 

            Aponoia i keia la 27 o Aperila, A.D. 1921.

 

                                                              C.J. McCARTHY,

 

KANAWAI 221.

 

[B.S. Helu 38.]

 

HE KANAWAI

 

E HOOKUMU ANA I KA APANA HOOMAEMAE O WAKIKI A E

            HOOMAOPOPO ANA NO KA HOOMAEMAE IA ANA AKU O IA

            WAHI.

 

E Hooholoia e ka Ahaolelo o ke Teritore o Hawaii:

            PAUKU 1. O kela apana aina e waiho la maloko o ke Kulanakauhale a Kalana o Honolulu, a e apo ia e ke alanui Sheridan, alanui Moi, a alanui Waialae, alanui Kapahulu a me ke kai, ma keia ke hookumuia nei i apana hoomaemae no loko o ke Kulanakauhale a Kalana o Honolulu a e ike ia o ka Apana Hoomaemae o Waikiki.

           

PAUKU 2. i komisina i ikeia o ke Komisina o ka apana Hoomaemae o Waikiki, a i hoopihaia e ka luna nui o na ahna hou, o ke Teritore, ka Meia o ke Kulanakauhale a Kalana o Honolulu, ka eneginia kalana o ke Kulanakauhale a Kalana o Honolulu, a o lakou i mau lala hoohanohano no ia komisina ame elua mau lala e ae, e hookohu ia e ke kiaaina, ma keia ke hookumuia nei a ke kukuluia nei. O na lala apau o keia komisina e hana lakou i ka lakou hana me ka uku ole.

 

PAUKU 3. O na komisina la i oleloia me ke apono ana mai a ka papa luna kiai o ke Kulanakauhale a Kalana o Honolulu, ua hiki a ke hookuleana ia nei e kukulu aku i mau apana homaemae mahele iho maloko o ka apana hoomaemae e kukuluia nei malalo o keia kanawai.

 

            PAUKU 4. Ke hoomanaia nei a ke kauohaia nei ua komisina nei e oleloia nei e hoomakaukau a e apono i kekahi mau hoolala ana no ke kukulu ia ana o na alanui nunui bulewada ma na aoao a i elua o ka auwai lawe wai i hookumu ia i keia manawa a i hooholoia e like me ia i hoomanaia a i kauoha ia e na pauku 2 o ke kanawai 14 o na kanawai o ke kau o 1918, a e kukuluia nei i keia manawa, ame ke kukuluia ana aku o kekahi mau alanui e ae ae ana maluna o keia mau bulewada e oleloia nei e like me ka ke komisina i manao ai he kupono.

 

            PAUKU 5. Ke hoomana hou ia nei no hoi a ke kauoha ia nei ua komisina la i oleloia e hookaawale ae i wahi no na pala maluna o ua kii hoolala la i kekahi wahi o na aina i noho ona ia e ke aupuni e waiho ana maloko o ua apana hoomaemae nei e oleloia nei e like me ka lakou i manao ai he pono, a e like hoi me ka ke kiaaina e ae mai ai e waiho ia ae no ia hana.

 

            PAUKU 6. O ua kii hoolalal a mau kii hoolala nei e hoike ae ia me ka moakaka lea loa i ka wahi e holo ai o ua mau bulewada nei, na alanui a me na paka, ke ano o ke kukuluia ana o ua bulewada nei ame na alanui ame ka lilo i kohoia ai no ka hoopau ana i ka hana maluna o ia mau mea.

 

            PAUKU 7. i ka hooholo ia ana o na kii hoolala ame ka hooholoia ana o kekahi mau mea e ae malalo o ke kuhikuhi ana a keia kanawai, o ka balota o ka hapanui o ke Komisina oia ke mana.

 

            PAUKU 8. O ke kii holala a mau kii hoolala a ua komisina nei e apono ai no ke kukulu ana i ua bulewada nei ame na alanui maloko o ua apana hoomaemae iei a i ole o kekahi mahele o ua apaia hoomaemae nei a i ole ia no ke kukulu ia ana o kekahi paka a mau paka paha malpko olaila, e waiho mua ia ae i ka papa luna kiai o ke Kulanakauhale a Kalana o Honolulu no ko lakou apono ana.

 

            PAUKU 9. i ka manawa amahope iho o na kii koolala e oleloia nei no ke kukulu ana i na bulewada ame na alanui maluna a moloko o ka apana a mahele hooaemae e aponoia ai e ka papa luna kiai o ke Kulanaakuhale a Kalana o Honolulu e like me ia i hoakakaia ae la maluna ae, a i ka manawa a mahope iho o ua auwai lawe nei e pau loa ai i ka hana ia, alaila ma keia ke hoomana ia nei ua papa luna kaia i oleloia e kukulu ae a i ole e kauoha aku e kukuluia i na bulewada i oleloia malalo a mauli o ke kauoha a ka mokuna 112 o na kanawai i hooponoponoia o Hawaii, 1915, e like me ia i hoololiia ai.

 

            PAUKU 10. O ke koena aku i hoolilo ole ia o na daka i hookaawale ia malalo o ka hoomaopopo ana a ke Kanawai 231 o na kanawai o ke kau o 1917 ma keia ke hookaawaleia nei no ka pono me ka hoohana ana a keia komisina e oleloia nei a e hoolilo ia e lakou malalo o na bila i aponoia i aponoia e ka lunahoomalu o ia komisina no ka uku ana i na lilo o ka lakou hana i hana ai malalo o na kauoha a keia kanawai.

 

            PAUKU 11. E mana keia kanawai i kona manawa e aponoia ai.

 

            Aponoi i keia la 27 o Aperila, A.D. 1921.

                                                           

                                                            C.J. McMARTHY,

 

HE PUOLO WAIMAKA NO J.D.K. KEALAMOKUPOIKAHIKI.

            I ka Lunahooponopono o ka Nupepa Kuokoa, Mr. Sol. Hanohano, aloha kaua a nui loa:-Ke hoolauna malihini aku nei au imua o kou hanohano, e noi aku ana i kou oluolu i ka hookomo ana iho ma kahi kaawale o ka kaua hiwahiwa, ka Nupepa Kuokoa, i ka’u wahi puolo waimaka o ke aloha makua, i niau aku la me ka palanehe loa, ma ke ala o na mea hanu ola apau, i ike mai ai na kini makamaka, na hoaloha ame na ohana apau o kuu papa aloha, e noho ana ma kela kihi ame keia kihi o ka aina, mai ka hikina a ka la i Haehae ahiki aku i ka mole o Lehua, o kuu papa, Jno. David Keamokoilani, ua haalele mai ia makou kana mau humona, a hele kohana aku la i ke alaloa, kahi i hoomakaukuia ai no ka poe apau.

            Ua haalele mai kuu papa aloha ia’u ma ko’u home noho ma Wailuku, Maui, i ka hora 2 a.m. o ka Poaono nei, Mei 29, iloko o kona ma’ilolo a ihepa, no hookahi makahiki me na la keu he ehiku, me ka ikaika maikai no o kuu papa aloha, a loaa iho la i keia ano ma’i i ka la 24 o Mei, 1920, a pela oia i noho ai iloko o ka ehaeha, a hala wale aku la kuu papa. Auwe no hoi kuu minamina i kuu makua e!

            Ua hanauia kuu papa aloha ma Keoneoio, Honuaula, Maui, i ka la 21 o Maraki, 1846, mai ka puhaka mai o kona mama Keonialele ame Sam Kahu, a he elua wale iho no a laua mau keiki, kuu papa aloha i hala aku la ame kona kaikuahine, Lilia Kahu, e noho nei ma Honolulu, oia hoi o Lilia Kealoha i keia wa.

            Ua hala mua ko laua mau makua ma kela ao a imi aku la kuu papa aloha ia alahele hookahi no. Auwe no hoi kuuminamina, kuu ehaeha i kuu papa heleloa!

            Nolaila, ua piha iaia na makahiki he 75 me na mahina elua ame na la keu ewalu i ke ola ana o kuu papa ma keia ao mauleule. Ua hoonaauaoia no kuu papa ma Honuaula i ke kula Hawaii, a ua loaa no i kuu papa maikai ka naauao, a ua lilo no oia he kumukula no Honuaula no kekahi mau makahiki. Auwe no hoi kuu papa e!

            Ua mareia kuu papa ma kana wahine Makakehau Keamo a ua hanau maioloko mai o ko laua puhaka na keiki he lehulehu, ua pau aku lakou i ka make a koe au ame kuu mau pokii kaikunane he elua ame na moopuna, e noho u aku nei ma keia aoao o ka muliwai eleele nona.

            Ua haalele mua mai no ko makou mama ia makou ma keia ao i ka la 5 o Okatoba, 1917, a ua piha i kuu mama na makahiki he 3 ame na mahina 5 o kona moe ana i ka moe kau a moe hooilo. Auwe kuu ehaeha, kuu mina mina, kuu aloha i kuu mau makua e!

            He hoahanau a he lunakahiko kuu papa aloha no ka ekalesia o Keawakapu, ua noho hanaia e kuu papa na hana like ole o ko kakou Haku, e hele ana ma kela wahi keia wahi a kuu papa e koho ia ai; a no ka nawaliwali i loaa iaia i kaohi mai kana lawelawe hana ana.

            E Keawakapu e , ke o mai nei ka leo o ka bele, e ha’i mai ana i kuu papa heleloa, ua hala, ua pau, ua nalo na maka aole oia e maaloalo hou aku ma kou mau paia nani, aole hoi ma kou malumalu kiawe, i ka pehimau ia e ka ehukai.

            He keiki kupa kuu papa mai Kipahulu mai ahiki i ka Paniwai o iao, ahiki aku i ka la Lanihaahaa o Hana; ua hele wale ia no o Maui nei apuni e kuu papa aloha, no ka huli ana i ke ola o ka nohona ohana iloko o na pilikia he nui.

            E Maui Komohana e , aole oe e ike hou ana i kuu papa. E Maui Hikina, eia aku nei paha o Keamo, Kealamoku, ilaila kahi i holoholo ai. E Mauiwaena, ua ike lihi iho paha oe i kuu papa e hoi mai ana. Auwe no hoi e kuu minamina, kuu ehhaeha i kuu papa hele loa!

            Ke hooomanao ae i kahi a maua i pili pu ai me kuu papa aloha, mai kuu wa kamalii mai ahiki i ka loaa ana o ko’u makua ma ke kino, o ia hoi he kane; aloha wale, aloha na ala kikeekee ame na pohaku wela o ka piina o Kalualapa, kahi a kuu papa aloha e pii hoomanawanui ai e huli i pono no ka lehulehu o ka home, aloha na aina hoopulapula holoholona, a kuu papa aloha e hoomanawanui elemakule ai i pono no ka nohona o ka aina kulaiwi; aloha Puunaio, ka home mahiai o kuu papa aloha. E ke kai puainawele o Keoneoio e, aole oukou e lohe hou ana i kona leo, aole hoi i kona helehelena aloha, maluna o ka oukou mau keena, no ka wa mau loa. E Kihei e, kahi a kuu papa e hele ai i ai i ai no ka pojo o ka home, e ha’oha’o ana paha kou mau alaloa no kuu papa aloha, oiai, ua pau kona holoholo hou ana ma kou mau alahele no ka a mau loa.

            E noho no au a hoomanao ae ia oe e kuu papa aloha, e uwe no au, oiai ua oluolu i ka Haku ka Makua mana loa, ka lawe ana aku i kona ola uhane, a waiho iho la i ke kino lepa o kuu papa aloha na’u ame kuu mau pokii, na hunona ame na moopuna, ka lehulehu ame na hoaloha e kumakena aku nona. Pomaikai ke kanaka i hanauia iloko o Kristo, oiai o ke ala a kuu papa aloha i niau hele aku la, he ala loaa ia i na mea apau.

            Ke waiho nei au i ka’u mau hoomaikai palena ole i ka poe i hui pu mai me a’u i kuu mau hora o ka ehaeha makua, ame ka poe apau i haawi mai i na makana pua no ka hoohiwahiwa ana i ka he o kuu papa hele loa, a na ke Akua i piha i ka lokomaikai e hoonui mai i ka oukou mau loaa, a na lona mana lani e lawe aku i ke kaumaha ame ka luuluu mai ia makou ae.

            O malou iho no, na keiki i nele i ka makua; me na keiki oniuhua kepau o kau papapa’i ka welina.

            MRS. M.K. KAHALAWAILUA,

            W.O. KEAMO,

 

NA MEAHOU O KA EKALESIA O PAIA, MAUI.

 

            E Mr. Lunahooponopono, Aloha nui kaua: --E oluolu kou ahonui e hookono iho I na meanou o keia elalesia e nee nei i keia mau la pumehana, oluolu maikai iloko o keia kihapai; penei no ia :

            Ma keia Sabati iho la, Iune 5, 1921, i malama hou ia ae ai ka papa ahaaina a ka Haku e ke Kahu Moses M. Kahiapo ma kona kihapai e noho nei. He elima hoahanau komo hou ame eha keiki liilii i bapetizoia; maikai ke anaina haipule me ka piha pono.

            Ua haawi mai laka Hui Mahiko o Paia i hale halawai no na hana haipule, Kula Sabati ame C.E., no ka pono o na hoahanau e noho nei ma ka Apana o Haliimaile, Kaheka, Maui. Ua paa na kukui uwila, a o ke pena wale aku no koe aame na noho oloko. O keia apana o Haliimaile kekahi mahele keia o ka Ekalesia o Paia, ke nee nei na hana o keia apana imua, me kona mau alakai. Ka hoike ohana i malamaia iMei 15, 1921, he $90. Oka loaa lulu. Ka nui o na hoahanau e noho nei ma keia apana he 11.

            Holopono ka papa hana kukulu hale o ka Ekalesia o Paia, e alakaiia nei na hana kukulu e ke komite kukulu hale, Rev.M.M Kahiapo O keia hale no na hoahanau no ia, i nele i na home, o noho ana malalo o kekahi poe, a e hoi mai ana lakou a noho iloko o keia mau home i hoomakaukauia.

            Ka la o na keiki (Children’s Day). Ma ke Sabati, iune 12, e malamaia ae ai ka la o na keiki liilii ma ka home o ko kakou makuahine i aloha nui ia, Mrs. H.P. Baldwin, a e hoounaia aku na keiki liilii apau ma kona home ma Maluhia, Makawao, Maui, ma ke alakai ana a Mrs.Lum Ho, Mrs. Daisy Kalaaupa, me Mrs. L. Mashado.

            Hoomanao ka Ekalesia o Paia i ka la 11 o iune, ka la hanau hoi o Kamehameha i. Me keia mau manao pokole, ke haawi nei keia makapeni i ke aloha i na keiki o kou keena.

                                             Me ke aloha,

                                                                        J.L. FAUFATA,

 

NA MEAHOU MA KAHULUI, MAUI

            Solomon Hanohano, Esq., Aloha nui kaua:--E oluolu mai kou ahonui e hookomo iho i na meahou uliuli maikai me he mea la e hoopulu mau ia ana e na kilihune wai hu’ihu’i o ke kakahiaka e ka mana o ka Uhane Hemolele, pela ka nee ana o na hana maikai, e ikeia nei ma Kahului i keia mau la e nee nei.

            Ka nui o na hoahanau o ka Ekalesia o Paia i keia wa ma Kahului, ua hiki aku la ia ma kahi o 22 hoahanau. O keia ka hoike mai ke kikowaona mai o na hana misiona kuloko ame kuwaho mai ka ekalesia mai.

            Ma ia kumu ano nui, ua noonooia e ke komite o na hana misiona, he mea pono loa e kukuluia aku ana he hale halawai ponoi no lakou ma ka aoao o na hoahanau, a no ka mea he mau hoahanau lakou apau no ka Ekalesia o Paia.

            Aole keia mau hoahanau i hoikeia ae la maluna ae, he mau hoahanau no ka Ekalesia o Kahului, elike me ka mea e kamailioia nei; aka he mau hipa kahu ole keia, e hele wale ana aole he kahu; a i keia wa ua hoi mai lakou apau a komo iloko o ka ekalesia kala wina ma Paia, elike me ka ka Uhane Hemolele alakai ana ia lakou, a no ka mea he mau hipa e ae no ka’u, aole no keia pa.

            Ma ka aoao o na Hawaii e noho nei ma Kahului, e ike pono mai oukou, o ke kuokoa, ka lokahi, ka hoomanawanui iloko o keia au e n@e nei, akahi no a ikeia keia hana a ka uhane, o hoonee nei ma keia apana, ua ola makou. Eia na misiona kaahele o Paia ke komo kauhale nei ma keia apana, i kela ame keia pule, me ka loaa mai no o na leo kahea e hele hou mai, no ka mea, ua lohe i ka olelo maikai o ka Euanelio; a no ka mea, ina iloko o Kristo kekahi kanaka he mea hou oia.

            Me keia mau manao pokole ke haawi nei keia makapeni i ke aloha nui ia oe e Mr. Lunahooponopono ame na keiki oniu hua ko’u adieu.

            Me ke aloha.

                                    KIU HANU MEAHOU.

 

NUPEPA KUOKOA

 

No ka makahiki (one year) ………. $2.00

No eono mahina (six months) …… 1.00

            O na Dala ame na Hoolaha Apau o hoouna pololei mai i ka ADVERTISER PUBLISHING COMPANY, LTD., waia  no, P.O. Box 208, Honolulu, T.H. 317 Akanui Moi, ma ke keena o ka Nupepa Advertiser.

            Entered at the Post office Honolulu T.H., as Second Class Matter

 

            CHARLES S CRANE   LUNA NUI