Ka Nupepa Kuokoa, Volume LIX, Number 5, 4 February 1921 — Page 7

Ka Nupepa Kuokoa

KE KILOHANA POOKELA NO KA LAHUI HAWAII.

He Moolelo no

LELOA DALE

a i ole

Mai ke Kulana Nele a i ka Waiwai - Na

Aloha Elua i ka Ipo Hookahi.

 

         I ko laua hoea ana aku noloko o ke keena hookipa, lalau aku la no o Mrs. Wekela i kana mau lihilihi, a hoomaka aku la e hana, no ka hoohala ana i kona manawa o kela ahiahi. aia wale no hoi o Leola ke nana la ma o a maanei, me he mea la o ke ake nui wale no iloko o kona noonoo, o ia ka ike aku ia Kikila, a no ka manawa mua loa, mahope o kona lilo ana i haku no kela kakela, akahi no oia a ike iho i ke ano e maoli o kona noonoo.

         Lawe mai la ke kuene i ko laua mau pola ti, me ka hoopa ole aku no o Leola i ke ti, a no kona hoihoi ole mai la i kekahi mea. holoholo ae la oia maloko o kela keena, me kona hele ana aku a hoea ma kahi o ke bele kahea e waiho mai ana, aneane loa oia e hoopa aku i ka bele, no ke kahea ana i kekahi o na kauwa e hele mau i hoouna aku ai oia e hele e ninau ia Kikila ina paha ua eha oia, aka nae hoopau wale ae la no oia i kela manao on a, me ke nalu ana iho:

         "Ua eha anei oia i hele ole mai ai i ke kakela nei i keia la? Ina no hoi aole oia i eha, pehea la oia i hele ole mai a @ ninau no'u, ina no hoi he mau minuke uuku wale no kona @ noho iho ai ma ka kakele nei, e lilo ana ia i mea nana e hoomama mau ia'u."

         "Hele mai la ka hoi au a molowa, e komo ae au maloko o ka r@@i o ka piano e waiho mai la, no ka paani ana i ke kahi mau mele."

         "Ua pono kela, e hoohamama mai no hoi oe i ka puka, i lohe aku ai au i kau hookani ana mai i ka piano.

         Hele i'o aku la ua o Leola no kahi e waiho mai ana o ka piano, a hoomaka aku la kona mau lima e paani i na ki, eia nae. ke ike la oia, aia kona noonoo i kahi e loa, aole maluna o na huamele, nolaila waiho okoa iho la i ka piano me ka hele ana aku a ku mamua o kekahi puka aniani nui, o kona oili aku la no ia a ku ana mawaho o kekahi lanai nui.

         O kekahi no hoi kela o na po kala'e maikai, aia hoi ka mahina ke kuupau mai la i kona nani nui, me ke ku i ka nani o ka hiona ke nana aku i ka aina, e hoopuni ana i ke kakela.

         No kela konane maikai o ka mahina, kau ae la ua o Leola i kona kihei hoopumehana maluna o kona poohiwi, me ka hilinai ana aku i kekahi pou o ka lanai, a nana aku la iwaho. He meha pu wale no na wahi apau, aohe ona lohe nakeke aku, koe wale no ka puiwa ana aku o kekahi mau ope'ape'a o ka po, i ka ike ana mai i kona lole keokeo.

         Iaia no nae e nanea ana i ka noho, lohe aku la oia i ke pahupahu kapua'i wawae, i nana mai paha kona hana ilalo, e ku ana kekahi kanaka. malalo pono aku o kela wahi ana e noho ana. a iloko o ke ano pouliuli, aole oia i hoohewahewa i ua kanaka la, oia no o Kikila Kinikele.

         Me ka puuwai kapalili, i nana aku ai oia ia Kikila, me kona hoopiha loa ia mai la i ka hauoli i kela manawa. no ka hiki ana iaia ke nana aku ia Kikila, me kona ike ole ia mai, aka nae o ka mea paha nana i hoopiha loa aku iaia me ka olioli, o ia no ka hoea ana aku o ke kanaka a kona puuwai  i aloha loa ai.

         Ma ka Leola hoomaopopo aku, aia kekahi mea ano nui iloko o ko Kikila noonoo kahi i hana ai, a mahope iho o ke ku malie ana o ua kanaka opio nei no kekahi mau minuke me kela wahi, hookomo ae la oia i kona mau lima iloko o na pakeke o kona lolewawae, a anehe aku la e hele, o ka manawa nae ia a Leola i kulou aku ai ilalo a kahea aku la, ia wa i alawa ino ae ai o Kikila iluna, a i kona ike ana mai ia Leola, wehe mai la oia i kona papale, no ka haawi ana mai i kona aloha. me kona ku malie ana no nae ma kahi hookai, me he mea la e kakali mai ana oia o ke kamailio aku o Leola iaia.

         "Ea, he hana nui hoi keia au e Mr. Kinikele o ka hele holoholo ana mai nei o keia po. E hakilo ana nae paha oe i na ho-ku ea?" wahi a Leola o ke kamailio ana aku, ma ke ano hoolalau.

         Aole he maopopo ia Kikila o kana mea e pane mai ai, no kele mau olelo hoolalau a Leola, aka nae mahope iho o kona noonoo ana i kana mea e pane mai ai, ia wa oia i kamailio mai ai i keia mau olelo:

         "He keu maoli keia o ka po maikai! Pehea, ua eha anei oe ma kela ulia o keia la?"

         Minoaka ae la o Leola, no kela ninau a Kikila iaia, me kona pane ana mai:

         "Aole anei lakou i hoike aku ia oe, i kou wa i hoea mai ai i keia auwina la iho nei?"

         "Aole au i hoea mai i ke kakela nei i keia la," wahi a Kikila me kona kulou ana iho ilalo.

         "Ua maopopo ia'u, aole oe i hoea mai nei i keia la, no kau ninau nae ea, aole au i eha. Ea, e pii mai oe iluna nei kaua e kamailio ai, he nui maoli ko'u leo e kamailio aku nei, i wahi nou e lohe ai."

         Noonoo iho la ua o Kikila he mea maikai paha nona ka hooko ana mai i kela leo kona o kona haku, aole paha, alaila o kona haalele aku la no ia i kona wahi e ku ana, a hele ae la no kahi o ke alapii e moe ana, o kona pii mai la no ia, a ku ana ma ka aoao o Leola, aia hoi kona puuwii ke pana kapalili la.

         Nana pono mai la o Leola ma na maka o Kikila, o ka haikea o ka helehele@a kana mea e ike mai la, aka nae aia no ka hoihoi ke haiamu la ma na maka, a o ia ka ua kaikamahine nei o ke kamailio ana mai:

         "Ke hopohopo loa nei au, ua eha paha oe o kaua, o ke kumu ia o kou hele ole ana mai nei i keia la." alaila milimili wale iho la no ua o Leola i ka pua rose ma kona umauma.

         "Aole au i eha a o ke kumu o ko'u hele ole ana mai ea-" me ka hooki honua ana iho o kana kamailio ana mai, alaila i hou ae la: "He mea pono anei ia'u ke hoike aku i ke kumu oiaio loa?"

         "Ae, mai huna mai oe ia'u i kekahi mea, a ua makemake no hoi au e loho i na mea oiaio apau mai kou mau lehelehe mai."

 

MOKUNA XXIV

 

         Hilinai aku la o Leola i ka pou, me he mea la e kakali mai ana oia o ko Kikila kamailio aku i kana mea i manao ai, a oiai ke nana aku i ua kaikamahine nei mawaho, aole he pihoihoi o kona ano, eia nae ua hele oloko a piha me ka pihoihoi, i kau a mea o ke kapalili o kona houpo, i ke kokoke loa o ke kanaka ana i aloha ai ma kona aoao.

         Ua hiki ole ia Kikila ke kamailio koke aku, oia pu kekahi e hoonuu la i ka helehelena wahine u'i o Leola, i ka maalili ana iho nae o na manao haku'iku'i iloko ona, akahi no oia a pane ae: "Aole i maopopo ia'u ka mea e hana aku ai."

         He mea maa i na mea apau ka iini ana e loaa kekahi mau mea a lakou i makemake au, me ka hoike ole ae i ke akea a mamua o ka oili ana mai o ka mahina hou, e hookoia auanei kona iini, o keia ka'u mea i lohe ai i ke kamailio o na luahine."

         Neenee loa aku la o Kikila a kokoke ia Leola, hilinai aku la no hoi i ka pou o ka lanai, me ka pane ana mai:

         "Nou iho e kuu haku, aole au mea hou aku e makemake ai, no ka mea ua haawi mai ke Akua ia oe i na makana kiekie loa, mailuna mai. Eia no na mea nui loa i pili i ko kakou ola ana. o ia ka helehelena u'i, ka waiwai ame ka hanohano, o keia mau makana maikai apau, ua loaa ia ia oe e Miss Dale."

         "Ina aloe i'o he mea hou aku e pono e loaa mai ia'u, alaila ua hauoli i'o au," wahi a Leolo me ka minoaka ma kona mau papalina.

         "O ka mea oiaio maoli no ia, aia mau ka hauoli me oe i na wa apau."

          "Pehea hoi oe e Mr. Kinikele, aole anei i loaa ia oe ka hauoli?"

         "Aole ia mea he hauoli me a'u, a o ka mea oiaio no ea aole  he hauoli, iloko o kekahi mea i lilo he kauwa na kona mau iini hiki ole ke hookoia."

         "Alaila @a makemake anei oe e lilo i kanaka waiwai, i kanaka hanohano loa maluna o ka honua nei?"

         Luliluli ae la ke poo o Kikila, no ka mea aole i maopopo ia Leola kona manao maoli, a o ia kana o ka pane ana aku:

         "Aole o'u makemake ia mea he waiwai me ka hanohano. O ko'u mau manaolana apau, no ia mau mea, ua nalowale iloko o keia iini hookahi iloko o'u."

         Aole e hiki ia Leola ke uumi iho i kona akaaka, i kau a mea o ka pohihihi maoli no o ka Kikila mea e hoike aku nei iaia, me ka i ana mai:

         "He keu mai la ka hoi ko'u makemake e ike i keia iini nui ou! Heaha no hoi kou kumu hoike ole ae i ua iini nei, iloko o keia wa a ka mahina e kau mai nei, malia o hoea mai no i ka wa e hookoia ai, ma keia mua aku."

         Nana pono aku la ua o Kikila maluna o Leola, a e anehe aku ana oia e hoike i ka meahuna iloko o kona puuwai, ia wa nae i haupu mai ai oia no kona hoaloha, no ka Haku Baumina, ia wa i hele holoholo ak uai oia. a i kona hoi hou ana mai no kahi a Leola e ku aku ana, i mai la:

         "Anuhea oe e Leo, Miss Dale, ua hooholo au i ko'u manao, e haalele i ka noho ana maanei nei."

         Ua hookahaha loa ia aku ko Leola manao i ka lohe ana mai i kela hoakaka a Kikila, me ka hele no hoi o kona helehelena a haikea, aka nae aole oia i hoikeike wale mai, i kona kaumaha no ko Kikila kaawale aku, a no kona noho mumule loa nae me ka pane ole mai, ua hoomau aku la no o Kikila i kana kamailio ana:

         "O ka la apopo ka manawa a'u i manao ai e hele mai e hoike aku ia oe, e haalele ana au i ka noho ana ma ka aina holoholona, aka he nani hoi ia ke hui pu nei kaua i keia po, aohe a'u kakali hou ana aku, a oili mai ka la o ke kakahiaka."

         "Ke kaumaha loa nei au no kena mea au e kamailio mai nei," wahi a Leola me ke kulou ana iho ilalo, e hooponopono ai i kona kihei. "Ua piha i'o au me ke kaumaha no keia manao haalele mai ou i ka hana, e manao ana ka hoi au, ua loaa la ka noho hauoli ana ia oe maanei nei!"

         "Aole a'u mea e hoohalahala ai no ke ano o ka hana a'u @ lawelawe nei, pela hoi me na mea e ae e hoopuni ana ia'u, koe wale no nae keia, aole i loaa ia'u ka hauoli. Ma ko'u wa e waiho aku ai i ka hana, e loaa ana ia oe na mea apau me ka maikai, aia a hoea au no Enelani, ia wa auanei au e waiho aku ai i ka'u mau buke hoike apau imua o Mr Foda, kou loio, a nana e huli aku i kanaka hou ma ko'u wahi, aole ia he hana nui, no ka mea, he lehulehu wale na kanaka kupono i oi aku paha mamua o'u, e noho lunanui mai no kou mau aina hanai holoholona."

         "Aole o'u  kanalua no ka pololei o kau mau buke apau e loaa anei ia'u ka ae ia mai ke ninau aku ia oe, i kou wahi e hele ai, ke haalele mai i ka noho hana ana maanei nei?"

         "No ko'u wahi e hele aku nei, he ninau pohihihi na'u ka pane ana aku no kekahi wahi maopopo loa," me ka noke okoa ana ae o ua o Kikila i ka akaaka. "Aole a'u noonoo nui ana no ke ano o ko'u wahi e noho aku ai, aka malia o hoi hou aku no paha au iloko o ka nahelehele, no ka mea ua maa no au i ka noho ana malaila, mamua o ko'u oili ana mai i ke ao malamalama."

         "Ke hoike hou aku nei au i ka nui o ko'u kaumaha, no ka loaa ole ana o ka hauoli ia oe maanei nei, a me he mea la o ka Haku Baumona pu kekahi iloko o ke kaumaha nou."

         "He nui na mea e hoohauoliia aku ai ka manao o kuu haku, a hoaloha hoi o'u, na ia hauoli auanei e hoopoina ae i kona noonoo ana mau ia'u."

         "Ma ko'u manaoio, aole ka Haku Baumona he kanaka hoopoina no kona mau hoaloha, no ka mea o oe ka mea nui loa iaia, a ua noho aie oia malalo ou, ahiki i kona make ana."

         "Penei ka mea a kekahi kanaka haku mele kaulana i olelo ae ai: O ke kanaka i loaa iaia ka hauoli, hoopoina oia i na mea apau. E hoopoina ana ka Haku Baumona ia'u iloko o kona hauoli hou e kakali malie mai la imua ona."

         "No'u iho, ke noho pouliuli nei au, no kekahi hauoli e  kakali mai la i ka Haku Baumona," wahi a Leola me ke kahaha no ke ano o ka Kikila mau olelo.

         Aia ke pana kapalili la ka puuwai o Kikila i kela manawa, a ke ike iho la no hoi oia i kona hele a piha me ka pihoihoi me ka pane pololei ole mai nae i na olelo a Leola iaia, i ka i ana aku:

         "Elike no me ka'u mea i kamailio aku nei no ka Haku Baumona, pela no auanei ka maalahi o kou poina ana no'u."

         "Ma ia wahi e Mr. Kinikele, ua kuhihewa loa oe, no ka mea, aole loa au e hopoina nou, pehea ka nui o na hauoli e loaa ana ia'u," wahi a Leola, me ka hiki ole aku la iaia ke kaohi aku i kona ano pihoihoi.

         "O ka mea oiaio loa anei kena e Miss Dale? Ma kuu manaoio nae, e poina ana oe. no'u iho, e hoomanao mau ana au no keia kakela ame oe, oiai au e hiamoe ana malalo iho o na ho-ku o  ka lani, iloko o ko'u wa e hiaa ai o ka po. a iloko o ko'u wa e komo ai iloko o na hana pihoihoi. Aole loa e hiki ia'u ke hoopoina i na mea apau a'u i aloha ai; e hoomanao mau ana au nou, elike no me ia au e ku mai la ma kena wahi i keia po, me ka nani ame ke kilakila, eia nae ua mamao loa oe mai ia'u aku."

         "Eia no hoi au ua hele a o ka pili wale aku no koe ia oe, e nana mai no hoi oe la, ua hiki loa ia'u ke hoopa aku ia oe." me ka lalau okoa ana mai o kekahi lima o Leola ia Kikila.

         "Ae, ua kokoke i'o no oe ia'u. eia nae. aia he awawa kuhoho ke ku nei mawaena o ka haku wahine o Kakela Lome ame kana kauwa."

         "O ke kanaka nana i hoopakele ae i ke ola o ua haku wahine nei mai ka make mai, ua oi ae kona kiekie maluna o kona haku, elike me ke kiekie ana o ka moi, maluna o ke kaikamahine uwi waiu." wahi a Leola, me ka hoao mau ana e panipani mai i na olelo a Kikila.

         "Pela i'o no. aka nae e hoomanao mai oe. o ke awawa kuhoho a'u i olelo ae nei, he mea hiki wale no ia ia'u ke nana aku mai kekahi aoao a i kekahi, aole nae e hiki ke lele aku a kau ma kekahi aoao me ka maalahi."

         "Aole a@ei he uwapo e hiki ai ke hele maluna o kela awawa?" wahi a ua o Leola, me kona nana pu ana mai hoi ma na maka o Kikila, a ike mai la oia i ka hele a hiena. me ke komo ana aku o ka maka'u iloko ona, a o ia nae ka Kikila i pane aku ai, aole me ka leo o ke kanaka e kau ia mai ai ka weli, aka me kela ano mau no ona.

         "Aole he awapo e ae e hiki ke hoomoeia maluna o kela awawa, hookahi wale no o ke aloha," alaila hookokoke loa aku la oia ia Leola. "Me kela uwapo nae he aloha, he hana hiki ole i kuu mau wawae ke hehi aku maluna o kona mau papahele laahia loa."

         Kuemi aku la o Leola ihope no kela hele o na maka o Kikila a hulili, aole he hulili o ka inaina, a uluahewa paha o ka noonoo. aka he hulili no ka hele o ka puuwai a piha i ke aloha, me ka hoomau ana aku i ke kamailio ana:

         "O oe e Leola ka mea nana i kono mai ia'u e kamailio pu me oe i keia po, a ua hoolohe aku au i kau kono. Aia he hookahi wale no uwapo, e moe nei mawaena o ke awawa kuhoho mawaena ou ame a'u, o ia ke aloha, a owau nae ka mea i aa e hehi aku maluna o ua uwapo nei. He mea hoopau manawa wale no ko kaua kamailio ana no keia mea e Leola, e hookuu mai oe ia'u he hoi, malia paha aole kaua e halawai hou aku ana ma keia mua aku, aka ua hiki no ia'u ke hoomanawanui i ke aloa, a hoi pu aku me a'u iloko o ka opu o ka honua.

         "Ua aloha aku au ia oe e Leola me kuu puuwai apau, me kuu ike no nae he kulana kauwa aku ko'u noho ana ma keia wahi malalo ou. Mai kamailio mai oe, e hookuu mai oe e hua'i aku au i na mea apau iwaho, a mahope aku o ia manawa, e kipaku mai oe ia'u, me na manao hoowahawaha, e auamo no auanei au me ka hoomanawanui, i ka hoopa'i no ka'u mau hana hewa a kohu ole i ae ai e hoopulapula iloko o ko'u puuwai.

         "He mea kuewa wale iho no au maluna o ka ili o ka honua, a oiai au e ku ana maloko o ka paka, ma kela manawa mua loa o ka halawai ana aku o ka ike a ko'u mau maka me kou helehelena, ua hauulehia koke no au i ke aloha ia oe. He haku wahine oe no ke Kakela Leme, oiai au he mea i nele i na hoaloha ame ka inoa. Ua ike no au, he hana kohu ole loa na kekahi kanaka malihini, ke aloha ana aku i kekahi kaikamahine waiwai a hanohano me kuu hoololo ana iho i ko'u manao. e haalele au i keia aina, a huli hoi hou aku no kahi a'u i hele mai ai; aka nae he kanaka wale iho no au. he mea palupalu o ka noonoo, he mea hiki ole ke pale aku i na hoowalewale, nolaila hooholo hou iho la ko'u manao e noho au maanei.

         "O ka iini nui iloko o'u i kela manawa, o ia no ka loaa o ka hauoli ia'u. ma ka noho kokoke ana aku ia oe, e ike ai i kela ame keia la, a mai kahi mamao mai paha e hoonuu ai i kou helehelena nohea, nolaika, i kuu ike ana aia kekahi wahi hakahaka ma kou aina hanai holoholona, ike koke iho la au, ua kupono kela wahi no'u e noho hana aku ai, aole nae no kuu makemake maoli i kela hana, aka no kuu manao mamuli o ka lilo ana i kauwa malalo ou, he oi aku ia mamua o ko'u kaawale ana aku i kahi e, e ike hou ole mai ai i kou helehelena.

         "I ko'u hoi ana mai a noho ma kou aina hanai holoholona, me ka ike mau ia oe i kela ame keia la, ua pii mahuahua mau ae kela aloha mai ka uuku mai ahiki i ka mole maoli ana o kona mau aa, e hiki ole ai ke uhukiia me ka maalahi. Ia'u i nana aku ai i ke awawa kuhoho e moe ana mawaena o kaua, he mea maalahi wale no ka nana ana aku ma kekahi aoao, o ia hoi, ua loaa ia'u ka hauoli no kou kokoke mau ma kuu aoao i kela ame keia manawa.

         "Ua umeia aku ko'u mau manao hialaai i kou helehelena wahine u'i; ua like hoi kou leo, me he kani hone ana la na ka manu ma kuu mau pepeiao; na ia mau mea i hoomahuahua mau ae i kuu aloha nou, ahiki i ka hanini okoa ana, e hiki hou ole iho ai ia'u ke uumi, a o ia ka'u i olelo mua aku nei ia oe. he mea pono e haalele iho au i ka noho ana maanei nei. E nana mai e Leola ma kuu mau maka, e ike auanei oe, ua hele ke aloha a kupouli iloko o'u nou, o ka'u wale no nae e nonoi aku nei i kou oluolu, mai hoowahawaha mai oe ia'u, no keia mea a'u e hoike aku nei me ka hookamani ole. He mea oe i ike ole i ke aloha ame kona mau aoao apau, pela paha i hiki ole ai ia oe ke hoomaopopo mai i ka hohonu o ke aloha e loku hala ole nei i kuu puuwai.

         "Aohe a'u kakali hou ana aku ahiki i ka la apopo, ua loaa iho la no oe ia'u, a ua lohe mai nei no hoi oe i ke kumu o ka hiki hou ole ana ia'u ke noho iho maanei nei, nolaila o keia ko'u ike hope ana ia oe, i keia po, a i ka wehe ana mai o ka malamalama o ke kakahiaka ma ka la apopo, ua kaawale loa au, ma kahi e hiki hou ole ai ia kaua ke halawai kekahi me kekahi. Ia'u nae e haalele iho ai ia oe e Leola, e haalele iho ana au ia oe iloko o ka hauoli, ka waiwai ame ka hanohano, o ka'u leo kalokalo, e uhaiia kou ola  ana o keia mua aku, me na haawina pookela loa o ka hauoli.

         "Ina ua hana hewa aku au i kuu hoaloha, aole o'u kanalua no kona huikala mai ia'u, pela no hoi oe e huikala mai ia'u, pela no hoi oe e huikala pu mai ai e Leola. O oe e Leola ka wahine mua loa i haulehia ai au i ke aloha kupouli, a o oe no hoi ka wahine hope loa, aole he mea nana e pani ae ia makalua, ahiki i kuu hoi ana aku i ka opu o ka honua. E ae mai oe, e haalele au i ka noho hana ana aku malalo ou, me kekahi huaolelo ole e ahewa mai ana ia'u, pela hoi kou nana ole ana mai ia'u me ka hoowahawaha."

         Ua hele ka helehelena o k Kikila a haikea pu, iaia e noke aku la i ka hoike i ka nui o kona aloha imua o Leola, a i kena hooki ana iho, kau ae la i kona papale, me ka huli ana aku e hele, ua paa e aku la nae o Leola iaia, aole no hoi he paakiki aku o ua o Kikila i ka hele, aka ku hou mai la oua, ke ke kakali ana, o ka lohe i ke kumu o ko Leola kaohi ana mai iaia.

         "Heaha no hoi kou kumu e hele nei e Mr. Kinikele?" wahi a Leola me ka leo oluolu loa, me ke kulou ana nae o kona poo ilalo.

         Na kela leo oluolu o Leola i hoohikilele aku i ko Kikila manao, ia wa i hopu mai ai oia i ka lima o ke kaikamahine opio, nana mai la hoi ma kona mau maka, o kana mea e ike aku la, ua piha ka helehelena o Leola me ke kaumaha ame ka haikea pu, elike no me kona helehelena iho.

         "Pehea la oe i ninau mai ai ia'u i ke kumu o ko'u uhu ana e hele no kahi kaawale loa? Ua lohe aku nei no oe i ke kumu, ua haulehia au i ke aloha ia oe, aole he kumu e ae."

         "Ua aloha anei oe ia'u?" wahi a Leola, me kela leo olu waipahe mau no on a, aole hoi he pikanana, elike me ke ano o ka poe i kaokoa loa ka noonoo mai ko ke kanaka e hoike aku nei i ka nui o kona aloha.

         Ae, ua aloha aku au ia oe e Leola me kuu puuwai apau, ame kuu uhane apau, o keia wale no ke kumu nui hookahi e hiki hou ole iho ai ia'u ke noho pu me oe. O kou au'a ana ia'u e noho iho, a o ko'u ae ana aku hoi i kau noi, ua like ia me ko'u ola ana aku iloko o na hoehaehaia, no ka nana aku i ka hauoli o kekahi mea mawaho ae o'u. Ua makemake i'o anei oe e noho hou iho no au maanei nei?"

         "Ae, ua makemake loa au ia oe e noho mai, ina no kou ae, alaila e ike ana no oe, aole he mea nana e hoehaeha aku i kou noonoo."

         "Ea, heaha ka manao o kau mau olelo e kamailio ma nei ia'u?" me ka hopu hou ana aku o ua o Kikila i ka lima o Leola. "He hana kohu ole loa nau e Leola ka au'a ana ia'u e noho ma keia wahi, ke ole oe i haulehia pu i ke aloha no'u."

         No kela mau olelo a Kikila, akahi no a aea ae ke poo o Leola iluna, a nana mai la hoi ma na maka o Kikila, a ke kanaka opio e ike aku la me ka hoohewahewa ole. ua aloha i'o mai o Leolo iaia, o kona huki mai la no ia ia Leola a pili mamua o kona umauma, me ka nana pono ana iho no hoi @luna o ka helehelena o ua aloha nei ana e huli pono ae ana iluna, a pane hou iho la:

         "He oiaio anei, o oe pu kekahi e Leola i haulehia i ke aloha no'u?"

         Ma kela wahi i hiki hou ole aku ai ia Leola ke uumi i ke meahuna a kona puuwai, o kona puliki mai la no ia ia Kikila, a hooho ae la i keia mau olelo:

         "He oiaio loa. ua aloha aku au ia oe e Kikila, me kuu naau apau."

         Aohe hana hou aku mahope o kela manawa, i k@ Kikila lohe maopopo ana no i ka Leola pane. o kona puili aku la no ia ia Leola iloko o kona umauma, me ka noke ana iho i ka honi hoomaumau, oiai ua hookoia kona iini, a no ka pau o ke aho o Leola. me ka paa pu hoi o kona hanu, i kau a mea o ka hookuu ole ae o Kikila iaia, papale okoa ae la kekahi lima on a, i ka helehelena o Kikila, a o ia ka ua kanaka opio nei o ka i ana iho:

         "O, e huikala mai oe ia'u e kuu aloha, kuu moiwahine hoi, ua hiki ole ia'u ke kaohi mai i ka hua'i pau ana ae i ko'u aloha. mahope o kou hoike ana mai nei, o kaua like iloko o ia haawina hookahi," alaila hoomau hou iho la ua o Kikila i ka honi, a ia hoomaha ana ae, pane mai la o Leola i ka i ana mai:

         "Aole no anei oe i hoohuoi mua, no ko'u haulehia ana i ke aloha ia oe?" wahi ana i nana ae ai iluna o na maka o Kikila, o kana mea i ike ae ai, ma kahi o kela helehelena haikea, ua auhee aku ia. a ma kona wahi, o ka ulumahiehie, me ka lamalama o na papalina o ua kanaka opio nei ke nohoalii aku ana.

         "Aole loa he wahi manao hoohuoi iki iloko o'u. no kou haulehia ana i ke aloha no'u. E hoomanao iho hoi paha oe e Leola. he haku wahine oe no ke Kakela Lome, he wahine iluna o ka waiwai ame ka hanohano, he mea hiki ole loa i kekahi mea ma kou kulana, ka haulehia ana i ke aloha, no kekahi kanaka e noho kauwa aku ana malalo ou. Ua ku a hilahila maoli au, ka lunanui o kou aina hanai holoholona, no ko'u lilo ana i mea aloha aku ia oe.

         "Aole owau kou hoa e kohu ai, aka i mea elike me koo kulana, elike me ke duke, ua lohe nui au nono, aole ana manawa i ha'o ai ke kamailio mau ana nou; a aia no hoi ka Haku Baumona, auwe, he keu aku a ka nui o kuu eha eha, ke noonoo ae no ua hoaloha nei o'u, ka mea i noi mai @ lilo aku oe nana. Aole anei he mea nau e haaheo ai, ke holo aku ka inoa kaunawahine maluna ou, ma ka lilo ana aku i wahine na ka Haku Baumona?"

         "Iloko o ka hanohano, ka waiwai ame na kulana kiekie apau, me he mea la, aole a'u mea oi aku o ka makemake. mamua o ko'u kaheaia mai ma ka inoa o Mrs. Kikila Kinikele." wahi a Leola, , me kona pupue loa ana mai iloko @ Kikila.

         Ua hookahahaia aku ko Kikila manao no kela pane a Leola, a i ka nana ana ae a ua kaikamahine nei, i ka hele helena o ke kanaka ana i aloha ai, ia wa i minoaka iho ai o Kikila, me ka pane pu ana iho:

         "Pehea la, e hiki ana no anei ia oe ke ku aku imua o ke ao nei, a hoomanawanui i na kipehi ana mai o kela ame keia ano, no kou ae ole ana aku e lilo i wahine na ke duke, a na ka haku paha, aka koho aku la oe i kekahi kanaka o ke kulana haahaa?"

 

MOKUNA XXV.

 

         "Heaha auanei ke kuleana o na kanaka ma ka honua nei i ka'u mau mea e hana ai? Ina au o kela wahi kaikamahine nele a ilihune, e hoomanawanui ana i ka pololi a ka ai, ma nao anei oe, e noonoo ana lakou no'u?" wahi a Leola, me ka noho pono ana ae iluna, a nana mai la hoi ia Kikila, me ka minoaka ma kona mau papalina. "He mea liilii loa ia'u ka lakou mau mea e kamailio mai ai no'u i keia manawa, elike no me ko'u nana ole aku i ke kamailio mai a ko ke ao nei poe i ko'u wa e noho hoomanawanui ana, maloko o kekahi hale hoolimalima, me hookahi wale no wahi peni maloko o ko'u pakeke.

         "O ka mea nui wale no iloko o ko'u noonoo, o ia keia. a ke manaoio nei no hoi au, o ka mea pololei maoli no ia; ina ua aloha aku au i kekahi mea, a ua aloha mai hoi ia mea ia'u, malaila iho la no pau, me ka nana ole ma ke kulana a ma ka hanohano paha. He nui ka poe i ma@e, ma@@@@ mai o ke ake i ka hanohano, ka waiwai ame ka inoa, o na mare nae o kela ano, he mare ia i nele me ka aloha, a i ka wa e hoea mai ai o na hoowalewale, e lilo ana ka noho ana o ke kane me kana wahine i mea mokuahana. No'u iho ke hopohopo loa nei au, no ka nui palena ole o ko'u aloha nou e Kikila."

         "Aohe au mea e hopohopo ai e kuu aloha, wahi a Kikila. me ka hamohamo ana mai ma ka lae o Leola. "He k@u aku maoli no a ka mea kupaianaha, o ko kaua halawai malihini ana, me ko kaua haulehia like ana i ke aloha, me he mea la, pela iho la no ke alakaiia ana mai o ko kaua ola ana, eia ka, mai kela naele mai o Aukeke@lia ua @ hele ma ai a loaa oe ia'u i keia kakela nani."

         "He mea oiaio loa kena au e Kikila e kamailio mai nei, no ka mea ina aole oe i hoea mai, aole loa au e ike i kou helehelena @ Kikila. Ua like pu keia ola ana ia'u me he mea liilii loa la ahiki i ko'u ike ana ia oe. mai ia manawa mai i nana aku ai au iamua, me na manaolana hauoli. Ua maopopo no anei ia oe e Kikila, oiai oe e ku ana malalo o ka malamalama o ka mahina, me ka nana ana mai i ke kakela nei, ma kela po poina 'ole, e noho ana au ia manawa me ka mehameha, mamuli o ka nele i ka hoaloha?"

         "Ua hoopuniia au me ka waiwai, ka hanohano ame ke kulana, aka ia'u i nana ae ai, aole he mea hookahi i aloha mai ia'u, ua aneane maoli au e uwe ae me ka leo nui; aka nae, elike me kekahi hoku lele i oili ae mai ka lewa mai, pela no au i ike aku ai ia oe e ku mai ana mawaho o ka hale, a ua ike aku au i kou nana pono ana mai ma ko'u puka aniani. O, e Kikila, ke hoomanao nei no anei oe i kela nana ana mai au ma ka puka aniani?"

         "Aole i maopopo ia'u ke kumu o ko'u nana ana aku ma kou puka aniani, me he mea la, na kekahi mana a kaua i maopopo ole ai i kono mai ia'u e hana aku pela. Elike n@ me kou nele i kekahi mea e aloha mai ana ia oe, pela ih@ la no ko'u kulana oiaio; he mea malihini loa au ma ke@@ aina, he kanaka auwana hoi, me ka maopopo ole o ko'u wahi noho paa, a ia'u e hele ana me ka mopopo ole o ko'i hopena, aia hoi ua maalo ae la au mawaho o ke kahua keia kakela, me he mea la, e kono okoa ae ana ia ia'u e kipa mai.

         "Aole no o'u noonoo e ku loihi iho mawaho o ke kakela aka nae ia'u i lohe mai ai i kou leo himeni, ua umeia aku ko'u manao hoohihi, e ike i ka ona nona ua leo nei, pela iho la au i hoolalau wale ai no i ka holoholo ana mawaho o k@ kakela nei, ahiki i kuu ike ana mai i kou helehelena e ki@ ae ana mawaho o ka puka aniani. Auhea oe e Leola, ma kela po mai a'u i ike ai i kou helehelena ka hookawow@ia ana o ka anoano o ke aloha iloko o kuu puuwai, ahiki i k@ mole maoli ana e hiki ole ai ke uhukiia ae me ka maalahi.

         Paa ae la @a lima a elua o Leola ma na papalina o Kikila me ka nana pono ana ae no hoi ma kona mau maka, a ninau ae la: "O kena anei ka mea oiaio loa?" wahi ana me ka piha hoihoi. "Nawai no la e ole ko'u ano e, e ake mau an@ au e iki ia oe e hele mai ana i ke kakela nei; akahi no ho@ a maopopo ia'u ke kumu o ko'u hele mau aku i ka aina hanai holoholona, me ko'u piha hialaai loa, i ka noke mai @ Mrs. Tibeta i ke kamailio nou, a aole loa au i hoomaopopo i ko'u aloha ia oe ahiki i keia kakahiaka iho nei," me ka moe okoa ana mai o kona poo iloko o ka umauma o Kikila "Ea he oiaio anei ua honi mai oe ia'u i keia kakahiaka iho nei, me kou kahea ana iho ia'u, he ipo aloha nu?"

         I pane ma ko Kikila aoao, kulou iho la oia ilalo, a hon@ iho la ia Leola no kekahi mau manawa lehulehu, alaila pane iho la:

 

(Aole i pau.)