Ka Nupepa Kuokoa, Volume LVIII, Number 52, 24 December 1920 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

He Moolelo no

HALIAKA WANAWOKA

a i ole

Ka Huepauia Ana o Kekahi Meahuna

Pohihihi---Ka Lanakila Mau Ana o Ka Oiaio

 

            "Ina o oe ke kaikamahine o ka hanaiia ana ma Lanakila Hale, ma ka inoa o haliaka Wanowoka, alaila he oiaio loa, aole oe he kaikamahine ponoi na Wanawoka," alaila hooki iho la o Mele i kana kamailio ana mai, no ka mea ua komohia aku la ka manao aloha iloko on a, no ke kaikamahine e noho aku ana imua o kona alo.

            "Aole e hiki ia'u ke manaoio aku i kau mau olelo, me he mea la o keia kekahi o na mea pohihihi loa," wahi a Haliaka. "Ua aloha aku au ia Mrs. Wanawoka, elike me ke keiki i kona makuahine ponoi, pela no hoi oia i aloha mai ai ia'u, me kona malama pailani ana ma na ano apau, elike me ke ano o na makuahine i aloha i'o i ka lakou mau keiki. O ka poe apau i kamaaina i ko'u mau makua, ua hoike maoli mai no lakou ia'u pela, a ua ike iho no hoi au i ke kulike o ko'u helehelena me ko'u makuahine."

            "He mau mea pololoei i'o no kena au e kamailio mai nei e kaikamahine opio, a o ke kumu o ke kulike o kou helehelena me ko Mrs. Wanawoka, no ka mea he kaikaina @ ukou makuahine nona," i pane hou mai ai o Mele.

"Alaila he kaikamahine anei au na ke kaikaina o Mrs. Wanawoka?" wahi a Haliaka me ke kahaha. "Aole au i lohe iki, he kaikaina hoahanau kekahi on a, o keia ka manawa mua loa."

            "O ke kumu o kou maopopo mua ole ana no keia mea, mamuli no ia o ko Mrs. Wanawoka makemake ole, e kapa aku i kela wahine he kaikaina nona, oiai aole he maemae o kona ola ana, aka e noho ana oia ma ke ano huikau. O ka inoa o ua wahine nei, e like me ka'u i hoike mua aku nei ia oe, oia no o Judika Gilibati."

            "Aole he hiki ia'u ke hoomaopopo aku i ka pololei o kau mea e kamailio mai nei, no ka mea o ka inoa o ko'u makuahine oia o Emilia Daika," i pane aku ai o Haliaka no ke kupale ana no kona inoa maikai.

            "O Emilia Daika i'o ka inoa o Mrs. Wanawoka mamua o kona mare ana i ke kane a penei ka mea oiaio loa. I ka piha ana he hookahi makahiki ia Emilia, mai kona wa hanauia mai ai, ua make iho la kona makuakane, a he hookahi hoi makahiki mahope mai mare aku la kona makuahine, i kekahi kanaka wahine make o Gilibati kona inoa. No hookahi makahiki ko laua noho pu ana , ua hanau mai la na laua he kaikamahine an kapaia aku la kona inoa o Judita ka inoa o kekahi wane waiwai, he makuahine hanauna no Mrs. Wanawoka.

            "Ua ulu like ae la kela mau kakamahine a elua a i ka piha ana o na makahiki he umi-kumalima ia Judika, ua hoomaka mai la ka noho ku-ee o kela mau kaikamahine o ke kumu no ka lili o Judika i kona kaikuaana, mamuli o ka waiwai i loaa iaia, mai kona makuakane mai.

            "No kela maikai ole o ka noho ana o keia mau kaikamahine o ka hana pono wale no, o ia ka hookaawale ana ia laua, me ka hoihoiia ana aku o Judika ma ke kulanakauhale o Nu loa, e noho pu ai, me ka wahine nona ka inoa i kapaia mai maluna on a."

            "Ke makemake nei au e ninau aku ia oe, pehea i loaa mai ai keia moolelo ia oe au e hoakaka mai nei no ko'u ohan. Ma ka'u nana aku, ua kahiko maoli kela moolelo, me he mea la, e nuku ana no oe ia wa, e hiki ole ai ke hoomanao i kekahi mea elike me keia au e kamailio mai nei."

            "He hoahanau ko'u e noho ana ma Nu Ioka me ke kaikuahine o Gilibati, he mau makahiki lehulehu kona kahiko mamua o'u, ua maopopo loa oia i ka moolelo o kela mau ohana a elua, pela iho la i loaa mai ai ia'u ka ike i ka moolelo o kou ohana."

            --Ina pela, e hoomau aku i ka hoike ana mai i kau moolelo," wahi a Haliaka me ka nui ana iho o kona hanu.

            "Ma kela noho ana aku o Judika ma Nu Ioka, a elike me ka pii ae o kona kino, pela no ka uilani o kona mau manao, aohe hooloheia aku o na mea maikai e a'oia mai ana iaia, a i ka piha ana o na makahiki he umi-kumahiku ua holo mahuka aku la oia me ka lohe hou ole ia o kekahi mea e pili ana nona no kekahi mau makahiki lehulehu mahope mai.

            "I ka piha ana hoi o na makahiki he iwakalua-kumama0ha ia Emila, ua mare iho la oia i kana kane, ia Wanawoka, me ko laua hoi ana mai no Lanakila Hale e noho ai, a ia laua malaila, i hoi aku ai au e noho hana, ma ke ano he kaikamahine lawelawe no ko laua home, pela iho la i loaa ai ia'u ka ike no ka hanau ana mai o ka laua bebe."

            "Alaila ua noho pu oe me mama ea?" i hooho mai ai o Haliaka ma ke ano ninau, me kona piha pu hoi me ke kahaha.

            "Ae, he elua makahiki ka loihi o ko'u manawa i noho pu ai ma Lanakila Hale me ka ohana Wanawoka, a ma kela la i hamau mai ai o Mrs. Wanawoka i kana bebe, o ka la hookahi no ia i loaa mai ai kekahi palapala ia'u mai ia Judika Gilibati mai, e kauoha ikaika mai ana e hele koke aku au imua on a me kona papa pu ana mai. aole au e kamailio iki no ka loaa ana mai he leka mai iaia mai ia'u.

            "Ua kakauia kela leka ma ke taona hookahi no a makou e noho ana a e noho ana lioi o Judika maloko o kekahi hale he mile wale no ka mamao, mai Lanakila Hale aku. Ua hooko i'o aku la au i kela kauoha, a i ko'u hoea ana aku, e moe mai ana o Judika maluna o ka moe, a ma kona aoao, e moe pu ana he bebe o ka hanauia ana mai no ia he mau hora wale no ke kahiko. I ko'u wa i ike iho ai i ka bebe ua hiki ole ia'u ka uumi iho i ko'u piha me ke kahaha i kau a mea o kulike loa o kela bebe me ka bebe a kuu haku wahine.

            "I ka manawa a Judika i lohe mai ai i ko'u hooho ana ae, no ke kulike loa o kana bebe, me ka bebe a Mrs. Wanawoka ia wa i hopu mai ai oia i kuu lima, a olelo mai la ua pomaikai maoli oia no ka mea o ka manao nui o kana mea o ke kauoha ana mai ia'u e hoea aku no ka hoakaka ana aku no ia i na mea e pili ana i ke kaikamahine a kuu haku wahine.

            "Wahi ana i hoakaka mai ai ia'u no makahiki elua, kona noho pu ana me kekahi kanaka, ma ke ano kane a wahine, me ko laua mare ole ia, he kanaka hanohano keia, me ka nui o kona mau waiwai, aka nae he wahine mare no kana e ola ana. He ku i ka hilahila keia moolelo, aka nae aole e hiki ke alo ae, ua hookoia ka hewa, a ua paa ko Judika manao e hoomau aku i ka noho pu ana me kela kanaka, o ka pilikia wale no, aole on a makemake e malama pohoi i kana bebe, aka e hoihoiia aku ia ma kekahi home kupono e malama ai.

            "Ua hooili mai oia maluna o'u, i ke ko'iko'i o ka huli ana aku i home no kana bebe e noho ai, me kona hoakaka pu ana mai, e hoihoi au i kana bebe a waiho malalo o ka malu o Mrs. Wanawoka, a o ka bebe a kuu haku wahine, o ka'u ia e lawe ai e hoonoho aku ma kahi o na keiki makua ole.

            "I ko'u lohe ana i kona makemake, ua kau koke mai la ka weliweli ame ka maka'u ia'u me ko'u hoole ana aku imua on a aole loa au e hooko elike me kana i makemake ai, ia wa i minoaka mai ai ola, a olelo mai la, aole loa e hiki ia'u ke hoole aku i kona manao, ua hiki loa iaia ke hookomo aku ia'u iloko o ka poino mamuli o ka'u mau hewa i hana ai, oiai au e noho ana ma kekahi wahi okoa," alaila pu ae kana nana ana ia Akeneki, me he mea la, aia ka wiwo ame ka hilahila iloko on a no ka lohe mai o keia mau wahine opio i kona moolelo.

            "O ko Mele ano iho la keia i kekahi manawa, o ia ka puniwale aku i ka makemake o kona mau haku." i komo mai ai o Akeneki ma ka hoakaka ana imua o Haliaka.

            "Aohe a kaua kamailio hou ana nou, e hoomau aku i ke kamailio ana ae i ke koena aku o kau moolelo.' i pane mai ai o Akeneki ma ke ano hoomalielie, i ole ai e pikanana aku o Mele, a holopono ole hoi kana mau mea i makemake ai e hookau aku i na hoehaeha ana maluna o Haliaka.

            "Ke manao nei au, o oe kekahi o na wahine lokoino loa,"  i huli aku ai o Haliaka, a kamailio @ o Akeneki. "Aole loa ou kuleana e nuku wale aku ai i keia wahine imua o kekahi mea okoa ae, mawaho o olua," alaila huli mai la oia imua o Mele a i mai la:

            "Ma ka'u mea i hoomaopopo aku nei, ma kekahi o kau mau olelo o ke kamailio ana mai nei, ua hoakaka mai o Miss Judika ia oe, e hookau mai i na hoopilikia ana maluna ou, in a aole oe e ae aku ana i kona manao o ka mea pololei anei ia?"

            "Ae, ua kamailio aku nei au pela, a o kekahi ana i kamailio mai ai, in a au e ae ana e hooko i kona makemake, alaila e haawi mai ana oia i kekahi puu dala nui na'u, ka mea i loaa ole ia'u iloko o na makahiki elua, o ko'u noho hana ana; aka nae no ka hoopokole ana ae i kekahi moolelo lohi: aole au he wahine lokoino ma ka naau, aka e noonoo nui ana no au no ka pono o ko'u haku wahine, ma kela ano iho la ua hoomau aku no au i ka hoole ana imua o Judika, aka nae ma ka hope loa o ka maua kukakuka ana, akahi no au a haawipio okoa aku lamalalo o kana makemake."

            "Ua ae aku anei oe i kela manao hewa? He keu a ka mea hilahila!" i hooho ae ai o Haliaka me kona piha maoli i ka hoonaukiuki i na mea a keia wahine i hoike ae ai, a i hooko aku ai hoi.

            "Ua ike no au, he hana ku i ka hilahila, ka mea a'u i hooko aku ai, aka nae, pelia e hiki ai ia'u ke alo ae, oiai e hamama mai ana na puka o halepaahao imua o'u in a au e hoole aku ana i ka makemake o Judika." wahi a Mele me ka nana ana mai maluna o Haliaka me na manao aloha.

            "I ko;u haawi ana aku i ka ae ia Judika, ma kana mau mea apau i hoolala ai, ua hoohiki aku la au imua on a, e hoi mai au no Lanakila Hale, a aihue i kekahi lole, o ka bebe a Mrs. Wanawoka a ma kekahi la ae au e lawe aku ai a haawi iaia, me ka hookomo ana i kela lole i ka bebe a Judika, a owae ka mea nana e lawe mai i kela bebe, ma ke ano m-lu loa, no Lanakila Hale, a waiho aku ma kahi o ka bebe a kuu hakuwahine, me ke kuapo ana i na bebe elua."

MOKUNA XIX

            "O, e na lani," i hooho ae ai o Haliaka me ka piha hoowahawaha, " he keu aku keia a ka hana ku i ka lokoino!" me kona hoomaopopo ana iho i kona komo ana aku iloko o ka moolelo a Mele e kamailio mai nei. "Pehea la oia i hana ai i keia hana lokoino loa? Heaha la kona manao ma ka hooko ana i keia mea?"

            "Eia no ka manao, ma muli mai ia o ka lili i kona kaikuana. Ua hoike mua aku nei au ia oe i kona lili no ka nui o ke dala a kona kaikuaana, mai kona makuakane mai, nolaila i ka hanau ana o kana bebe, o ka iini wale no iloko on a, e loaa aku i kana bebe na hoonaauao kiekie ana, ame na pulama ana, a Mrs. Wanawoka, a e lilo ai no hoi kana kaikamahine i hooilina no na waiwai o Mrs. Wanawoka, ka mea ana i li'a mau ai, e holo aku iaia, ma kela manawa o kona holo mahuka ana mai Nu Ioka aku.

            "Alaila ua hooko i'o aku anei oe i ka manao o Judika? Ua lilo anei oe i mea kokua aku i wahi e holopono ai kela manao lapuwale ku i ka hilahila?"

            "Ae, ua hooko aku au i na hana apau i makemakeia mai ai na;u e hana aku aole nae no ko'u makemake maoli, aka ua nana wale ae no au no ko'u palekana mai ka noho ana aku maloko o ka halepaahao. Ua ike no au i ke ko'iko'i o ka hewa a'u i hana ai, aka nae, ua hele a kau ka weli ia'u no kela wahine, o ke kumu ia o ka hiki ole ia'u ke hoopaakiki iho."

            "O, pehea la i hiki ai ke holopono kela hana kolohe lapuwale?"

            "He hana maalahi loa kela, no ka mea i ka wa bebe loa o na keiki, aole e hiki ke ikeia ka like ole o kekahi ma kekahi aku ua like loa laua me na hua papapa iloko o ka wa-hi hookahi. Ma kela manawa a'u i lawe aku ai i ka lole o ka bebe a Mrs. Wanawoka, a haawi ia Judika, a i kona hookomo ana iho i kana bebe me kela lole, ua hiki loa ia'u ke ike aku o ka bebe maoli no ia a kuu haku wahine, aohe wahi lilo ma na ano apau.

            "Ua makaukau mua kekahi poho ie nui ia Judika, nolaila hookomo iho la maua i ka bebe maloko o kela ie, me ka hoohanuhanuia ana i ka laau hoohiamoe i ole ai e uwe no kekahi manawa loihi; a ua haawi mua aku hoi au i laau hoohiamoe i ka bebe a Mrs. Wanawoka, mamua o ku'u haalele ana aku i ka hale.

            "Hoihoi aku la au i ke ie, me ka bebe a Judika iloko o ka Lanakila Hale, a waiho aku la ma ka lanai o ka hale maluna loa, mawaho pono iho o ka puka aniani o ka rumi e ma lamaia ai ka bebe a kuu haku wahine. O ko'u auwina la kela e hele ai i ka holoholo, no laila aole he mea i hoohuoi iki ia'u, no ka'u hana ma kela la.

            Ke kakali malie la au, o ka loaa o ka manawa kupono a'u e kuapo aku ai i na bebe, a i ka wa i hoea ai i na hora o ke ahiahi, ua poeleele iho la i kela manawa, a i ka manawa o ka wahine malama keiki i iho mai ai no ka hale olalo e inu ti ai, ua kaa aku la ka malama ana o ka bebe ia'u ame ko'u hoohakalia ole iho, lalau koke aku la au i ka bebe a Judika, a hookomo mai la iloko, o kahi o ka bebe a Mrs, Wanawoka e waiho ana, a hapai aku la i ka lua o ka bebe a hookomo maloko o ke ie, e waiho la mawaho o ka puka aniani.

            "Ua palamimo loa kela hana ana a'u aohe no he wa a loaa pono no ka mea i hakalia no ia'u a noho iho ilalo, mahope o ko'u hapai ana aku i ka bebe a Mrs. Wanawoka, noloko o ke ie, o ka hoea hou mai la no ia o ka wahine malama keiki, me ka olelo ana mai, ua poina oia i ke kakau ana i kekahi mau kuhikuhi a ke kauka i kamailio mai ai, no kekahi laau no Mrs. Wanawoka, a oiai e hele ana o Wanawoka i kela manawa no ka halekuai laau, kauoha mai la oia ia'u e lawe aku i ka palapala ana i kakau iho ai, a haawi ia Wanawoka, me ka olelo pu ana mai, aole, au e hoi hou aku no ke keena o ka bebe i waiho ai, oiai aole on a pololi, ua hiki no iaia ke malama aku i ka bebe.

            "Ua hele maoli au a piha me ka maka'u no kela hoea koke ana mai o ka wahine malama keiki, ke naka  la ko'u kino me ka haalulu, aka nae ua hoopiha loa ia mai au me ka hauoli, i kona olelo ana mai, e iho aino ka hale olalo, a haawi aku i ka palapala ia Wanawoka, ma keia ano iho la e hiki ai ia'u ke kii i ke ie, i waiho ai o ka bebe a Mrs. Wanawoka, a lawe aku mamua o ka ikeia ana mai e kekahi poe.

            "Ua hooka'ulua iki ia nae au i ka wa i hoea aku ai no ka hale malalo, a i kuu haawi ana aku i ka palapala ia Mr. Wanawoka, kauoha mai la oia ia'u e holoi i kekahi omole laau kahiko, i ka pau ana nae o kela hana, o ko'u pii hou aku la no ia no ka hale maluna, me ka wehe ana i ko'u kamaa, i ole ai e lohe mai ka wahine malama keiki i ka nakeke.

            "Me ka palanehe loa ko'u kokolo hele ana aku, a hoea mawaho pono o ka puka aniani, ia'u i kiei aku ai iloko, e nanea ana ka wahine malama keiki i ka heluhelu i kekahi buke, a e moe malie ana no hoi ka bebe, o ko'u lalau iho la no ia i ke ie, a hapai ae la, me ka nihi hele ana aku ahiki i kekahi alapii mahope o ka hale, a oiai ua pouli loa i kela manawa, aole he poe ike mai ia'u, ahiki i ka haule ana ilalo o ka honua."

            "Aole loa au i lohe i kekahi hana ku i ka lokoino, elike me keia au e kamailio mai nei," wahi a Haliaka i ka manawa i hoomaha iho ai o Mele, i ka hoakaka ana mai i kana moolelo. "E olelo mai ana anei oe, owau kela keiki au o ka lawe ana mai ia Judika Gilibati mai, a waiho aku la ma kahi o ka bebe a Mrs. Wanawoka?"

            "Ina o oe ke kaikamahine o ka hanaiia ana maloko o ka Lanakila Hale, a laila he kaikamahine i'o oe na Judika Gilibati."

            "Owau ke kaikamahine i hanaiia maloko o kela home, a i ikeia hoi ma ka inoa o Haliaka Wanawoka? O pehea la e hiki ai ia'u ke hoomanawanui iho i ka ehaeha i kau mai maluno o'u ma o kau mea i hana ai e Mele?" me ka noke okoa ana iho o Haliaka i ka uwe.

            Ua ike no au i ke ko'iko'i loa o ka hewa a'u i hana aku ai, aka nae e ike iho ana no oe e ke kaikamahine opio, i ka wa e hamama mai ana na puka o ka halepaahao imua o'u he hookahi wale no ka hana e hoopakeleia ae ai au mai ka noho ana aku iloko o kela hale makamaka ole, o ia ka hooko ana aku i ka mea a'u i hana aku ai."

            E hoomau aku i kahaha'i ana mai i ke koena aku o kau moolelo, he mea makahewa wale no ka hoao ana e huna aku i na mea i koe!" i koi hou aku ai o Haliaka me ka palulu okoa ana ae i kona mau lima, ma na maka.

            "Aole au he mea a ae aku ana e ulu ae ka mauu malolo o ko'u mau wawae, elike me ka olelo a kahiko(55 me ka nui ana iho o ka hanu o Mele, iaia i ike aku ai i ka ehaeha maoli i kau aku maluna o Haliaka.

            "I kela hoea ana aku o'u noluna o ka honua paa me keie e waiho ana o ka bebe a Mrs. Wanawoka, o ko'u ho'omaka aku la no ia e hele me ka awiwi, aia ka pono o ka hoea koke aku no kahi o Judika Gilibati; a me he mea la i ka'u nana iho he keu aku  a ke ko'iko'i maoli o kekahi kumu paha hoi, uo ka nui o kaumaha o ko'u noonoo. Ia'u i hoea aku ai i ka hale, a wehe aku la i ka puka, ua hele ka helehelena o Judika a keokeo pu, o ia no oe o ka uhimoe keokeo e halii ana iluna o ka moe.

            "'Ua holopono anei kau hana?' i ninau koke mai ai oia ia'u me ka hele o kona mau lima a haalulu.

            "'Ae, ua holopono na mea apau.' i pane aku ai no hoi au me ka waiho ana aku i ke ie ma ka aoao o ka moe, a olelo aku la au iaia o kela ka bebe a Mrs. Wanawoka.

            "E haawi mai oe i ka bebe ia'u, i nana aku ai hoi au!" wahi hou ana a i kuu waiho ana aku i ke ie o ka bebe e waiho ana ma kona aoao, ua noke ae la oia i ka akaaka a pane mai la:

            "'Ea, e Mele." me kona piha loa i ka puiwa i ka wa i ike iho ai i ka bebe, a ua aneane no hoi e huli ke ie, 'ke manao nei au o keia no ka bebe hookahi au i lawe aku nei; auhe nae oe e Mele, in a oe e hoao ana e hana kolohe mai ia'u e ike ana oe i kou mihi me ka walania me kou olelo ana'iho, ua oi loa aku ka pono e hanau ole ia mai oe e kou makuahine,' me kona nana ana mai hoi ia'u me na maka i hele a hulili o ia no oe o kekahi o na wahine i loaa i ka pupule.

            "Mahope iho nae o kona nana ana i ka bebe, me ka lolelole ana iho ma kona wahi kino uuku akahi no a loli ae kela nanaina huhu on a, a nana mai la ia'u me na maka oluolu me ke kamailio pu ana mai no hoi me ka maikai i ka pane ana mai: 'Ke ike nei au aole keia o ka'u bebe: no ka mea ua omon au i kekahi kuipine eleele iluna o ka lole o kuu bebe i wahi e hiki ai ia'u ke ike i kou hooko pono i ka'u kauoha ame ka ole. Ke ike nei nae au, i loko o kou pupuahulu loa, ua poina oe i ka wehe ana i keia pine gula me keia mau huapalapala "milimili." E pono oe e hoihoi hou aku i keia pane o ha'oha'oia mai auanei, o ka loaa pono no ia o ka kaua hana kolohe. Ua like i'o maoli no keia mau bebe, me na hua papapa elike me kau i kamailio mai ai a ke hauoli loa nei au no ka holopono o kaumea i hana ai me ka ike ole ia!

            "E ha'oha'o i'o ana ka wahine malama keiki ke ike iho i kela pine eleele, a ke hopohopo loa nei au, e loaa pono ana ka'u hana kolohe.' i pane aku ai au imua on a, me ka naka o ko'u kino me ka haalulu.

            "'Aohe au mea e maka'u ai: aia oe a hoi aku, e pine ma-lu aku oe i keia pine i ka lole o ka bebe: a in a hoi no ka ninau mai o ka wahine malama keiki ia oe no kela pine eleele o kau kumupale o ia ka haule ana o ke pine omou o ke kaiepa, i kou wa i wehe ai, a oiai aole he pine hou ae iloko o kou wa o ka hoaa, pela oe i pine aku ai i ke kaiepa me ke pine eleele.

            "'O e kuu Miss Wanawoka,' i lohe aku ai au i kona kahea ana ae i ka bebe, me kona noke pu ana ae no hoi i ka akaaka. 'O ka puana i manaoia ai nou he manu okoa aku ana ka mea nana e hoopumehana, a e hele aku ana oe i keia ao akea, no ka hooikaika ana ma na ano apau i wahi nou e pono ai.

            "'Heaha kau mea e hana aku ana no keia bebe? i ninau aku ai au iaia, me ko'u hopohopo loa mai la i kela manawa, no ka hoopoinoia o ke ola o ka bebe, ma ke ano o kana mau olelo.

            "'He mea pono e maopopo ia'u, kau mea i manao ai e hana aku no keia bebe,' i pane aku ai au iaia, me ke kapae ana ae i ka maka'u ame ka hopohopo mailoko ae o'u. Ke makemake nei au e hoohiki mai oe, aole e kau aku kekahi poino maluna o keia bebe, o hoi pololei aku auanei au i ka Lanakila Hale, a hoike aku imua o na makua o keia bebe, no kau mea i hana ai.

            "Ua ano wiwo aku la o Judika mamuli o kela mau olelo a'u eia nae aole no ia he mea nona e ae koke mai ai, aka huli mai la oia imua o'u a pane mai la:

            " 'E aa ana anei oe e hoike ae i kau mea i hana ai?' wahi ana.

            " ' Heaha iho auanei ko'u kumu e hoike ole ae ai i na mea oiaio apau; no ka mea ua oi aku ko'u paa ana maloko o ka halepaahao mamua o kou ike ana iho aia mau ko'u lunaikehala, e hoahewa mau mai ana ia'u, no ko'u kokua ana aku i kou manao pepehikanaka maluna o keia bebe hewa ole.

            "Aole loa o'u wahi manao iki, e hoopaumaele i ko'u mau lima, me ke koko o keia bebe maemae, aole loa! Aole i lilo ka nui o ka'u mau hana hewa i lawelawe aku ai, i wahi no'u e loli ae ai i wahine pepehikanaka. Aole au hopohopo ana no keia bebe, e loaa aku ana iaia na malama maikai ana ahiki i kona nui kupono ana no ka hele kula, ia wa au e lawe mai ai iaia malalo o ka'u malama ponoi ana aku iaia.'

            "Akahi no a maha ku'u lunaikehala, i ka ike ana, aole he poino e kau aku ana maluna o ka bebe, eia nae, aole no i kaawale ae kekahi haawe kaumaha mai ko'u lunaikehala ae e mau ana no ka'u mau hoomanao ana no kela hana hewa loa, mai ia la mai ahiki i keia manawa a'u e hoike nei i kela moolelo."

            "Pela no ko'u manao, aole he mea nana e holoi ae kela kikohukohu o kau mau hana ekaeka, mai kou lunakehala ae." i pane aku ai o Haliaka me ka piha i ka honaukiuki.

            "O keia kekahi o na hana ku i ka lokoino maoli. O @ e mama, e mama!" alaila uwe okoa iho la o Haliaka me ka naau walania, no ka mea, mamuli o kana mau mea i lohe ai mai leia wahine aku.

            "Pehea la e hike ai ia'u ke hoomanawanui, ke hoomanao ae, eia ka aole oe o ko'u makuahine ponoi e mama, ka ea a'u i aloha aku ai me kuu puuwai apau: a pehea hoi e hiki ai ia'u ke alo ae mai ke komo ana aku iloko o ke kaumaha, ke hoomanao iho he wahi kaikamahine komohewa wale iho no au, ma kahi o kau kaikamahine ponoi ka mea i hooneleia i na hauoli o keia noho ulakolako aua ma o'u nei. Ua maopopo no anei ia oe ka hopena i kau aku maluna o kela bebe i kaa aku ai malalo o ka malu o Judika Gilibati?"

            "O ka mea i maopopo ia'u o ia no ka hoihoiia ana aku maloko o ka hale o na keiki makua ole ma ke kulanakauhale o Bdafoda. Mamuli o ko'u hele maoli ana no e huli i loaa ai ia'u me ko'u hele mau ana aku no hoi e ike aia i kela ame keia manawa kaawale e loaa ana ia'u, o ke kumu no aole o'u makemake iki e hoopilikiaia kela bebe hewa ole. I ko'u manawa hope nae o ka hele ana aku e ike, aole ua bebe nei, a hoikeia mai la ka lohe ia'u ua hoea aku no o Judika Gilibati, a lawe aku me ia e noho ai.

            " Ua hele okoa aku la au e huli ahiki i ka loaa ana o Judika ia'u, a koi aku la iaia e hoike mai oia i kahi o ka bebe i malamaia ai, ua noke mai la no nae oia i ka akaka, me ka olelo ana mai, e hele aku no au e huli no'u iho, aole oia e hoike mai ana. Ua hooweliweli aku la au iaia, me ka olelo ana aku e hua'iiia ae ana e a'u ka mea i hanaia no ka bebe a Mrs. Wanawoka, aole no nae ia he mea nona e hookomai ai i ko'u makemake, aka noke mai la kela i ka akaka ma ke ano pahenehene, a olelo mai la. aole e hiki ia'u ke hooiaio. no ka hanauia ana he elua mau bebe i ka manawa hookahi: a o ka hopena e kau mai ana maluna o'u, o ia no ko'u noho iloko o ka halepaahao.

            "Ma keia wahi la, ua noho hamau loa au, me ke kamailio ole ae i keia meahuna no kekahi mau makahiki loihi."

            "Nolaila, o kela wahine, a ke aloha ole, kela wahine i piha me ka lokoino, o ko'u makuahine ponoi anei ia e Mele?"

            "Ae, me ka ehaeha no nae o ka naau au e olelo aku nei ia oe, o kou makuahine i'o ia, aole o Mrs. Wanawoka. He makuahine u'i kou, aka ua pa-umi ae ka u'i o kou helehelena imua o kona. Ma kona mau maka, e hoike okoa mai ana ia i ke kolohe me ka eu, a ma kona mau ano hoi apau, he wahine oia, a kekahi kane e nele ole ai ke komo o ka manao hoohihi i loko on a."

            "Oiai o kuu makuahine ame oe e Mele, na mea i kau aku na ko'iko'i o ka hewa i hanaia, eia nae ua owili pu aku olua ia'u iloko o ia hewa hookahi, mamuli o ko'u noho ana iloko o na makahiki loihi, maloko o Lanakila Hale, e hoopuniia ana hoi e na mea a ka maka e hauoli ai, a e malamaia ana me ka hanohano loa e na mea a'u i nana aku ai o ko'u mau makua ponoi loa ia.

            "Ua nana maoli aku no au ia Mrs. Wanawoka o ko'u makuahine ponoi loa ia, ua hana mai oia ia'u elike me ka hana a ka makuahine, i aloha i kana keiki, aole loa he hookahi a'u makemake ana i hoole mai ai. O, pehea la i aeia ai e lanakila na hana hewa loa o keia ano ma ke ao nei? Nokeaha la i lilo ole ai na kanaka i poe maikai a oiaio?"

            "Malia paha, no ka loaa ole maoli no ia lakou o na ano maikai, e like me ia i loaa ia Miss Haliaka Wanawoka," i pane mai ai o Akeneki, me ka noke pu ana mai i ka akaaka pahenehene.

            Ke lohe la o Haliaka i kela mau olelo ku i ka hoohenehene a Akeneki e kamailio mai la aole no nae on a hoolohe aku aka huli mai la no oia imua o Mele, a i aku la:

            "Ua lilo oe e Mele i mea kokua aku ma keia hana karaima ekaeka loa: aole wale no maluna o'u i hana hewa mai ai oe aka ua oi aku ke ko'iko'i o ka hewa i hanaia maluna o kuu hoahanau."

            "Ua ike au i ka pololei o kau mau mea e kamailio mai nei e kaikamahine, a ua auamo no au i na haawina ehaeha mamuli o ka ike ana i ke ko'iko'i o ko'u hewa, a i kela ame keia makahiki, e ike maoli iho ana no au i na haawina ehaeha, ahiki i ko'u manao maoli ana iho no, ua oi aku ka make ana mamua o keia ola ana."

            "O, e hele aku ana au e huli i kuu hoahanau, oiai nae ua lohi loa keia manawa. Iloko o keia mau makahiki loihi, ua noho au iloko o ka hanohano, ua hauoli ma na ano apau i hiki i ka waiwai ame ke dala, ke haawi mai i ke kanaka, oiai nae me he mea komohewa wale no au, i ka mea i kuleana ole aku ai au ma kekahi ano, oiai hoi kuu hoahanau, e noho ana paha iloko o ka nele, ka ilihune ame ka hoomanawanui. Aia anei lokahi alahele e hiki ai ke hoomaopopoia kona wahi e loaa aku ai ia'u?"

            "Aole he mea hiki ia'u ke hooia aku ia oe i keia manawa no ka mea ua noho pouliuli no au no kona wahi i noho ai."

            "Nele ae la hoi ka maopopo ana i kahi o kuu hoahanau i noho ai, pehea e hiki ana anei ia oe ke kuhikuhi mai ia'u kahi o Judika Gilibati e loaa ai?"

            "Aole no i maopopo ia'u kona wahi e noho mai nei, a o ka mea oiaio, aole i loihi ko;u noho hana ana malalo o Mrs. Wanwoka, no ko'u hopohopo no o hoea mai auanei i ka wa e loaa pono ai ka'u hana kolohe i kou wa he eono wale no mahine, o ko'u haalele no ia i ko'u haku wahine, a mahope mai o kela manawa, he elua wale no a'u ike ana ia Judika Gilibati."

            "O, e hele aku ana au e huli iaia, me ko'u nana ole i ka pohihihi i ka alahele e loaa aku ai," i hooho ae ai o Haliaka me ka manaopaa.

            "Alaila ua hele anei ka makemake a nui iloko ou, e loaa kela wahine, a e kapa aku iaia, he makuahine ponoi nou?" i komo mai ai o Akeneki ma ka pane ana mai.

            "O kekahi wahine elike me ko Judika Gilibati ano, aole loa au e kapa aku ana iaia he makuahine no'u, in a no paha e hooiaioia ana, o ko'u makuahine ponoi loa ia. O ko'u makemake wale no e loaa kela wahine ia'u, o ia ka hookina ana aku iaia e hoike mai i kahi i noho ai o kuu hoahanau, i hiki ai ia'u ke hoihoi aku i kona mau waiwai apau iaia; aole loa e loaa ia'u ka maha, ahiki i kuu ike ana ua hookoia keia manao o'u."

            "Heaha iho la kou mea o ko koihoi ho ana aku i na pomaikai i ke Akua i haawi mai ai nou?" i kamailio hou mai ai o Akeneki. "Ina owau ma kou wahi, o ka'u hana o ia no ka noho hamau loa ana , me ke kamailio ole ae i kekahi mea. Ina aole i owaka ae ko'u waha, ame ko Mele, no keia mea alaila aole e loaa ana kekahi noonoo iloko ou, e hoihoi aku i na waiwai apau au e paa nei ma kou inoa, i kela kaikamahine."

            "Aole i maopopo iki ia'u ka manao o kau mea e kamailio mai nei e Akeneki." i pane aku ai o Haliaka, me kona ku okoa ana ae iluna. "He hookahi nae mea a'u e hoohewahewa ole nei ka koho aku i kou manao maoli, o ia no kou makemake ana e hoohilahila ia'u a e hoohaahaa iho hoi ia'u malalo o kou mau wawae. Ua ike au i kou mau no apau e Akeneki aole oe he wahine i loaa ka manao aloha no ha'i, aka ua piha oe me na manao haaheo me ka haakei, o kou pono wale no kau e noonoo nui ai i na manawa apau.

(Aole i pau)