Ka Nupepa Kuokoa, Volume LVIII, Number 51, 17 December 1920 — Page 7

Ka Nupepa Kuokoa

 

 

HE MOOLELO NO

Elese, ka U’i Nohea i Liliia

A I OLE

Ka Ipo Aloha a ke Kanaka Waiwai

----------

            Ua kakahiaka nui loa oia i ka manawa i hoea aku ai i ka hale o kona makuakane ua ala ae oia ua paa kona mau aahu i ke komo a ia ike ana mai a ka makuakane iaia pane mai la me ka hoihoi:

            “He mea hou anei kekahi au e Hale?”

            “Aohe a’u mea hou, e papa.  E hele ana au e ai a hoi aku e hiamoe no ka mea ua hele mai la ko’u mau maka a oolea i ke ala e nei po a o ke ao no ia.  Aohe au i hooluolu iki ahiki i nei manawa.  E hiki ana no anei ia oe ke haawi mai ia’u i kekahi mea i hiki ia ia’u ke hiamoe?”

            “Aohe a’u mea e ae e haawi aku ai o ka paula wale no a’u e lawe mau ai i na manawa i hala aku nei a’u e ke iho ai aohe loaa ia’u o ka hiamoe.  O, e Hale ke ike aku nei au ua nui maoli kou kaumaha no’u no ka hewa a’u i hana ai a e lilo ana paha auanei ia hewa i mea hoehaeha mau aku ia oe e hoohikiwweia aku ai kou mau la i ka hopena o ke ola ana ma keia ao.  O e kuu keiki e huikala mai oe ia’u no ka hewa a’u i hana ai no kou pono mahope iho o kuu hala ana aku ma kela ao!”

            Akaaka aku la o Hale a i aku la:  “Aohe mea hiki ia oe ke kokua mai ia’u e pau ae ai keia haawina ua hiki ia’u ke auamo i ke kaumaha elike me ka hiki ia’u”  i pane aku ai o Hale.

            O ke kani koke aku la no ia o ka bele ai ka hoea ana mai o ke kauwa kauoha aku la e hoomakaukau mai i ke kahi mau meaai no ka aina kakahiaka a ia makaukau ana mai noho iho la oia e ai oiai nae aohe ono mai la o kana ai aka no ka hoopiha ana aku nae i kona opu e mau ai ke aho ai nina wale iho la no oia i na mea ai e waiho mai ana a hala kekahi haoalua hora.

            Mahope iho o ka pau ana o kana ai ana lawe iho la i ka pauda hoohiamoe a ka makuakane o ka haawi ana mai iaia alaila hoi aku la i kona rumimoe maluna a haule aku la hiamoe.

            Aneane e kani ka aina awakea ma kona manawa i ala ae ai ua loaa iaia ka ikaika me ka oluolu o na maka.  Ua hoi mai la kona mau noonoo maikai me ia aka nae o ke kaumaha o kona naau me ka manaolana ole no ka holopono o kana mea i upu ai no ka palekana o ka makuakane a me ka hoi hou mai o kana aloha me ia oia mau no ka hoonalueaia o kona noonoo.

            Hele aku la oia e auau a kahiko iho la iaia me na aahu kupono oiai oia e noonoo ana no ka hele aku e halawai me Mabela no ke kuka ana maluna o kekahi kumuhana ana e noonoo ana.   O ka mea nui ana e noonoo ana ia manawa i kona wa e halawai aku ai me Mabela e hoike aku oia iaia i kona mau ano maikai a hoopono apau me he kanaka la i hana ole i kekahi hewa.

            “Aole au-e hoike aku ana i ko’u ano hoihoi i mea nona e noonoo ole iho ai ua aloha au iaia,”  wahi ana i nalu iho ai iloko ona.

            I kona makaukau ana oili aku la oia a kamoe pololei aku la kana hele ana no ka hale nani o Paulo Harisona a i ka hoea ana aku ilaila haawi aku la i kana pepa hoolauna i kekahi o na kauwa no ka lawe ana aku i ka hale maluna a haawi aku ia Mabela.

            E moe ana no o Mabela iluna o kona moe; ka hana no hoi a ka poe waiwai la he mau kauwa ka poe na lakou e lawelawe aku aka i ka manawa i haawiia aku ai ka Hale pepa i kona lima lamalama ae la kona mau maka poniponi a i mai la:

            “Olelo aku oe iaia e iho aku ana au ilalo maloko o kekahi mau minuke kakaikahi alaila hoi hou mai oe iluna nei no ke kokua ana mai ia’u ike komo i ko’u lole.  Lohe oe?”

            Aohe loaa o ke kahaha i ke kaikamahine lawelawe o ua o Mabela no kona hoomakaukau iaia e hui aku me Hale no ka mea ua laulaha loa ae la ka lono mawaena o na kauwa ua hoopalau oia me Hale Veona a ua kuapupule maoli no hoi ko lakou hakuwahine i ke aloha i ke keiki a ka hoahui o kona makuakane.

            Eia nae ua hauwawaua ae mawaena o na kauwa mai ka po mai mamua iho ua haulehia o Hale Venona i ke aloha me ka U’i Elese a no ke aloha o Hale ia Elese e haaleleia ana o Mabela i ke anu.

            O ka mea kupanaha i na kauwa me ia ike no o lakou o Mabela ko lakou haku ua makemake loa nae lakou e haalele mai o Hale ia Mabela a e mare aku oia ia Elese o ke kumu aohe o lakou makemake i ko lakou hakuwahine no ka hookano hookiekie a haakei ka mea hoi e rula aku ana maluna o lakou me ke aloha ole a he ku no hoi i ka makona kana mau hana.

            Aohe no hoi i liu loa aku ia iho ana a ke kaikamahine lawelawe o ua Mabela hoi hou mai la a kokua aku la ia Mabela i ke komo ana i kona lole.  Oiai ke kaikamahine lawelawe e hookomo ana i ka lole ua nui ka Mabela hana hoouluhua no ka lolohi loa o ka hookomoia ana kona mau pono o na mea ana e kauoha aku ai i ke kaikamahine i laweia mai a i kupono ole i kona makemake e kiolaia aku ana e Mabela a kauoha aku ana he me a okoa no ka mea he makemake o Mabela e kahikoia oia me na mea nani loa ia la.

            Ua like kela ame keia sekona ia Mabela me ka hora hookahi a ia pau ana o kona kahiko ana iaia iho a ku iho elike me kona makemake mahope o ke kilohi ana me o a maanei iloko o ke anoano i aku la i ke kauwa ana:

            “Ua ike anei oe i kekahi manawa a’u i kahiko ai i oi aku ka maikai mamea o keia?”

            “Aole e Miss Harisona; o keia no ka mua loa” wahi a ke kauwa oiai nae aia maloko o kona naau ka hoowahawaha a namunamu wale iho la no oia iloko iho ona:  “O ka’u e manao nei o ko Hale olelo mai ia oe aohe oe i kupono e palaki i na kamaa o Elese.”

            Aohe i ike mai o Mabela i ka manao i kana kauwa ua kuhi no oia he mahalo a Hale e kakali mai la nona no kona iho aku a ke hoihoi wale la na maka ame ka naau a ua o Mabela no ka ika aku i kana aloha.

            Iaia i komo aku ai ku ae la o Hale iluna a hele mai la e aloha i ua o Mabela ma ka lululima ana a i mai la:

            “Ke manao nei au e huikala mai ana no hoi paha oe e Mabela ia’u no keia hele ana mai la a’u i ka manawa i maa mau ole?”

            “O e huikala ia oe; ua hiki i ke kane hoopalau a kekahi wahine ke huikala ia aku no kona hele ana mai i ka wa ana e makemake ai; o ka pinepine o kona hele koke ana mai oia aku ka oi o ka pono a o ka oi aku no hoi ia o ka maopopo o kona hooiaio ana mai i kona aloha.”

            “O me ka mahalo!”  i pane aku ai o Hale me ka leo o ka mea i piha i ke kaumaha.  “Aole au e hoahewa aku ana ia oe no kou inaina ana ia’u ina he inaina kekahi iloko ou no’u no kau mea i ike ae i ka po aku la i hala.  Owau pu kekahi e loaa iho ana ia manao ina o oe ka i hana mai i kekahi mea a’u e inaina ai aka e kanu aku oe a nalo loa i ka mea i hala a e nana aku imua ma ka hoomaka hou ana i ano hou i hanau hou ia.”

            “Alaila ua kipaku a haalele mai nei ka paha ko kaikuahine hanauna ia oe?”  wahi a Mabela ma ke ano hoohenehene.

            “Aohe oia he kaikuahine hanauna no’u elike me ia a’u e hoomaopopo nei i nei manawa ua ike mua oe ia mea.”

            “Ae ua maopopo ia’u ua mea i kela po aku nei aole kela kaikamahine hana oloko o ka halekuai he kaikuahine kanauna nou he wahine oia nau.  Ua maopopo ia’u ke kumu o kou lawe ana mai iaia ianei no ka hoohaehae waleana mai no ia ia’u.”

            “No ia lawe ana mai a’u iaia inei ea ua hewa au e Mabela a e oluolu oe e huikala mai ia’u aka e hai aku au ia oe ua hana hewa oe no kou kapa ana aku ia Elese he kaikamahine i haule i ka hewa a he wahine manuahi oia na’u.  O kou lohe keia ua like kona maemae i keia la me kekahi o na anela o ka lani aole wahi kiko eleele o ka hewa maluna ona.

            “Aole oia he pio na’u a ke hauoli nei au i ka olelo aku pela.  Aka ea e Mabela no ka aha kau lawe mai iaia i mea na kaua e kamailio ae i nei manawa?  Aole hoi anei i lawa ina ae e noi aku ana i kau huikala ana mai no ka hewa a’u i hana aku ai ia oe?”

            Pupukuae la na maka poniponi o Mabela a i mai la:

            “Aole i lawa.  Manao anei oe e hiki ana no ia oe ke hapai mai i kekahi mea hoonaukiuki ia’u alaila hoopau koke ae au i ka manawa pokole no kou hele ana mai e mihi?

            “Alaila heaha ana kau mea e noi mai ana ia’u?”  wahi a ka Hale ninau.

            “Ua loaa mua ka ike ia Hale aole laua e hiki ana ke hoolauleaia me Mabela aka aole hiki iaia ke haalele iho ia Mabela a hele aku me kona hooikaika ole e lanakila oia.

            “I hele mai nei au e Mabela no keia kumu mahope iho o ka mea i hanaia ma ka po aku la i hala au i ike ai he mea pono ia’u ke hele mai a hoakaka aku ia oe i na mea apau; i hoopauia ae ai kou mau manao inaina kuhihewa a he mea pono ia e hanaia mawaena o kaua.”

            “Heaha ia mea?”  wahi a Mabela me ka pikanana.

            “Ua hana hewa hoi au a e noi aku ana i kau huikala ana mai.  No ka hoike ana aku ia oe i ka mea oiaio ua pau ka launa aloha mau ana mawaena o’u me Elese aole maua e hui hou ana ina nae e hoopau loa ana oe i kou manao huhu nona ame a’u no na mea i ikeia ma ka po aku la i hala a e  ae maikai mai ana oe e hoomauia aku ko kaua hoopalau elike me ia a kaua i aelike ai.”

            “He olelo hoohiki anei keia a’u e lohe aku nei no ke aloha?”  i ninau mai ai o Mabela ma ke ano hoohuoi.

            Ua pii ae la ka ula ma na papalina o Hale ia manawa eia nae oia mau no kona hookuoo a pane aku la:

            “Aole ia he olelo hoohiki no ke aloha no’u ia oe aka he hoike ana aku ia i ko’u kupaa mamuli ou.  Ina e lilo ana oe i wahine mare na’u aole loa e loaa iki ana ia oe kekahi kumu e kaumaha ai no’u no ko’u lilo aku i kekahi wahine e a mau wahine paha aka e pili mau aku ana au me oe i na la apau o ko kaua ola ana a na ka make wale no e hookaawale.”

            “A pehea ina e hoole aku ana au i ka mare ana aku ia oe?”  i ninau mai ai o Mabela.

            “Alaila ia manawa e apono aku ana au i kau hoole a o ko’u hele aku no hoi paha ia; heaha auanei ka mea e noho hou iho ai ua hoole mai la no oe.  Ia manawa au e noonoo aku ai i ka mea okoa no ke pani ana mai ma kou wahi.”

            “Ina pela e hoole aku ana au i ko’u lilo ana i wahine mare nau.  Aole au e ae ana e mare me oe he hoopakele ana aku ia ia oe mai ka poino mai.  Aohe o’u manao hou ana aku nou koe wale no a hookoia aku kuu makemake ma ke kau ana aku i kekahi hoopa’i maluna ou ame kale wahi kaikamahine hoohaehae no ka olua mau mea i hana mai ai maluna o’u ma ka po aku la i hala.

            “O kuu makemake e kau like ia na hoopa’i maluna ou ame kela wahi kaikamahine i hele pu mai ai me oe a o ka mea hoi i hoi pu aku me oe a me ke kanalua ole au e olelo ae ua hanaia kekahi hewa e olua.”

            “O he manao koho wale iho no kena ou me ka hoopunipuni ino loa he mau olelo au e hiki ole ai ke hooiaio mai.  I hai aku au ia oe i nei manawa ua like ka maemae o kela kaikamahine me kekahi o na anela o ka lani.  Ua oi aku kona maemae i ko’u a i kou pu a eia nae ua kaawale aku oia mai a’u aku no ka manawa i maopopo ole”  wahi a Hale o ka pane ana aku.

            “A e like me kou nele ana iaia pela no kou nele ia’u!”  i nee ae ai o Mablea i ka akaaka hoohenehene.  “A ke manaoio pu nei au e nele pu ana no oe i na mea apau.  Ua manao paha oe i kou nele ana ia Elese alaila hoi hou mai la oe me ka manao e mare me a’u no ka hoopakele ana i ko makuakane a ia oe pu mai ka hilahila mai.  O e ike mai oe ua maopopo ia’u ke kumu o kou hoi hou ana mai la me ka manao e mare mai ia’u no kou ike ana i kou pilikia a manao mai la oe o kou mare ana me a’u  ke kumu e pau ai ia pilikia ou.  O aole au e mare aku ana ia oe!”

            O ko Hale ku koke ae la no ia iluna no ka mea ua pa mai la i ka nele a hele pololei aku la no kahi o ka puka a oiai oia e hele ana i mai la nae:

            “Aole au e noho hou iho ana maanei oiai ua hoala aku la au i ka manao huhu iloko ou a ua ike aku la i kou mau manao ino aka me ia mau olelo kupono ole nae au apau ke huikala aku nei no au ia oe.  He oiaio ua hele mai nei au imua ou i keia la me keia manaolana e hoopakele ana la hoi oe i kuu makuakane no ka mea ua manaoio au he hana ia ma ko’u aoao e hana aku ai no kona pono.

            “E mahalo aku ana i kou hoole ana mai la i ka mare ana me a’u a no ka mea aohe no o’u ike ia mea he aloha nou ua lilo kuu aloha i ka mea okoa a ke manao pu nei au aole e oi aku ana kou hoowahawaha ana mai ia’u mamua o ko’u ahewa ana ia’u iho no ka mea a’u i hana ai.  O ka aloha no kou.”

            Ina paha i mahu’i mua o Hale ua haawi ua o Mabela i kona ae e mare ia Mokana ina la ua puka ia Hale aohe a Hale mea i mahu’i iki nolaila aole oia i hoopuka aku ia mea oia mau kona pouli no ia mea ia manawa.

 

MOKUNA XLIII-Weheia ka Uhimaka.

 

            Oiai o Hale e hoi ana me ka awiwi wale mai kela halawai ana a laua me Mabela aia iloko ona ka hauoli no ko Mabela hoole ana mai i ka mare me ia a ma ka olelo maopopo ana are hoi ua hoopauia ka hoopalau mawaena o laua ia manawa.

            Aka nae oiai oia e hauoli ana no ia kaawale ana o laua ua ulu pu ae la ka hilahila iloko ona no ka hopena e kau mai ana maluna o kona makuakane o konaa manaolana mau ina no ka ae maikai mai o Mabela e mre laua oia wale no ka puuhonua e pakele ai o kona makuakane me ia ike iho no nae ona i kona makemake ole ia Mabela; he oi aku ka maikai nona e mare aku me Mabela i alahele e hiki ai ke puka laelae aku kona makuakane mailoko ae i ka pilikia a e iho ole aku ai hoi oia iloko o kona lua kupapau me ka inoa hilahila no ke apuka a ina aole i ka lua kupapau hoopaahaoia aku paha no kekahi mau makahiki.

            Ua lilo keia manao i mea hooni loa ae i kona lunamanao e hana me ikaika ame ka hoomanawanui no ka hoopakele ana i kona makuakane mai ka pilikia mai.  Oiai oia e noonoo ana ke ike iho la no oia nona iho o Mokana i hui pu ia me Mabela ka i komo pu ma ka hana e hookomo aku ai i kona makuakane iloko o ka pilikia a iaia pu.

            “I ka nana iho ua huli ku-e mai na mea apau ia maua i nei manawa aohe kumu e ae i ala mai ai ia hana mamuli wale no o’u.  Ina aole ka noonoo nui o kuu makuakane no ko’u pono aole loa oia e aa ana e hookomo aku iaia iloko o keia pilikia aka ua nui kona aloha no’u e lilo ai i kanaka waiwai mahope o kona hala ana aku ma kela ao.”

            O keia kana i olelo iho ai iaia iho eoa nae iloko o keia mau hoahewa apau ana aia iloko ona kekahi manao inaina loa no Mokana ke kanaka nana i imi a e hoao mau ana e loa iaia kekahi kulana kiekie a e loaa pu hoi iaia na pomaikai ma o ka hoopoino ana mai iaia a i kona makuakane pu.

            Ua loaa mai iaia ka hoomaopopo ana no ko Mokana ano hookamani ame ke ake hanohano a waiwai a ke ike nei oia i nei manawa i ka lilo ana o kona makuakane ame ia pu i mau mea paani iloko o na lima o ke kanaka maalea a hoaloha oiaio ole.

            Ua wili iho la oia i ka ehaeha no ka hilahila ame ke kaumaha pa iaia i hoomanao ae ai no kana mau hana hewa loa i hana ai kona punihei wale ana no i na alakai hewa a Mokana a ina paha aole kekahi manaolana iki iloko ona no ka hoi hou mai o Elese kana aloha me ia ina la paha ua hoao oia e hana aku i kekahi hana hoopoino maluna o Mokana.

            No kekahi manawa kona hele ana ma ke ano me ke mea la aohe ana mea nui e ake aku ana e hana ua lilo oia he pio na kona mau noonoo uluahewa loa a i ka hala ana o kekahi manawa loihi iaia ma ka noonoo ana ala mai la iloko o kona noonoo ina he manaolana kekahi iloko ona no ka hoopakele ana i kona makuakane a i ole hana aku paha i kekahi mea e pono ai nona e pono e hoopau oia a i ole e kapae loa aku i na manao kaumaha a minamina no na mea i hanaia o ka wa i hala a e hana aku i kekahi hana i mea e hoopakeleia ai oiai aole no i hala loa ka manawa kupono no ia hana.

            Pehea nae la oia e hoomaka aku ai he ninau pohihihi koa ia iaia ia manawa a he liilii loa no ka manaolana iloko ona e haawi mai ana ka makuakane i kekahi manao hoakaka iaia no kana mea pono e hana aku ai me ka nana ole aku nae ia hooholo iho la oia e hele pololei aku imua o kona makuakane a e hoike aku iaia no kana mea i hana ai ame kana mea i ike ai e pili ana no ko Mokana manao ame kana hana.

            Me ia manao o kona hele aku la no ia me ka awiwi no ka halekuai a kono aku la iloko o ka rumi o Mokana me kona nana ole ae i ka nana mai o na kaikamahine hana iaia ma kela ame keia aoao o ke pakaukau; aohe wahi mea a leha iki wale aku a i ole haawi aku paha i ke aloha a i ole kunou aku la hoi ke oki loa oiai nae he mau kaikamahina punahele loa lakou iaia i na manawa mamua aku.

            Ua  oili mai o Mokana a e kuhikuhi ana i kekahi mau kaikamahine i ka lakou mea e hana ai iloko o ka halekuai a ia hookokoke ana aku o Hale huli mai la ua o Mokana a ike mai la.  Haawi aku la o Hale i kana kunou ma ke ano ohaoha ole aku aole no hoi he wahi minoaka iki ma kona mau papalina elike me ia i na la mamua aku.  Ua hoohaahaa o Hale iaia iho imua o Mabela aka no keia kanaka aole oia e hana aku ana pela oiai nae aia iloko o na lima o Mokana kahi i paa ai o ka poino o kona makuakane.

            Ia ike ana mai hoi o Mokana minoaka mai la oia alaila loli ae la a ke ano hoowahawaha a oiai o Hale e nana pono aku ana iaia ia manawa ke ike aku la no oia me ka hoohewahewa ole aia iloko o Mokana kekahi manao e hoike mai ana iaia he manao huna a e huaiia mai ana nae imua ona ia manawa.

            E noho ana no o Mr. Venona ma kona pakaukau kakau a e hoao ana me ka hiki pono ole no nae e hoihoi mai i kona noonoo maluna o kana hana me ka hiki pono ole no nae.  Ia Hale e nana aku ana iaia ua like kona helehelena me kekahi kanaka i kaa ma’i wale no kekahi manawa loihi a o kona mau lima haalulu me he mea la ua loaa i ka ma’ilolo.

            “Aloha ino no hoi kuu makuakane!”  wahi ana i noonoo iho ai me ka menemene loa nona.

            “Ihea oe e Hale?”  i ninau mai ai ka makuakane e hoike ana ma kona leo a ma keano o kana nana ana mai he manaolana nui kona no kona pono mamuli o ka ke keiki hooikaikkana.

            “E kuu makuakane aohe a’u mea hou hoolana manao i hoi hoi mai la no ka hoike ana aku ia oe.  O keia ka mea oiaio a’u e hoike aku ia oe a ke noi aku nei i hoi ahonui e kakoo ia oe iho a mai hoopau wale i kou manaolana.  Ua hele aku nei au e ike ia Mabela a ua hoole mai nei oia i kona mare mai ia’u o ka mea kaumaha loa a’u e hoike aku ai ia oe ua maopopo ia kela hewa apuka ou elike me kana i hoike mai nei ia’u.”

            “Pela no ko’u manao.  Oia ko kaua enemi ino loa i nei manawa i hoike aku au ia oe e kuu makuakane”  i pane aku ai o Hale.

            “Ae oia ka mea oiaio a oia no hoi ke kumu oiaio o ko’u poino ana mamuli o kana hoowalewale ana mai ia’u a hihia mauwale ana au iaia.  O no’u no kekahi naupo no ka puni wale ana aku no iaia!”  wahi a ka makuakane.

            “E kuu makuakane mai hookai aku oe i ke ahewa ana maluna ona.  E hookau iho no kaua ia mau ahewa ana apau maluna iho o kaua wale no aole ia ha’i aku a oiai ke ku nei ka pilikia e hooikaika no kaua ma naano apau i mea e puka laelae aku ai kaua mailoko mai o ka pilikia.  He manao hoakaka no anei kekahi a’u e ike aku ai no kekahi alahele e hana aku ai malia ma ia alahele e puka laelae aku ai kaua ma kela aoao a hala ae heia puu make mahope?”

            “Aohe o’u manao e Hale.  Ua kaukai aku au i ka holopono o na mea apau maluna ou.  I ka’u nana iho no’u i nei manawa me he mea la ua kaawale aku na noonoo maikai apau mai ia’u aku.  O e kuu keiki ke manao nei au he oi aku ka maikai no’u e hoopokole i ko’u ola ana ma keia ao he ole i hiki ole ke hana aku i kekahi mea maikai i kekahi mea ola a he ola hoi e kauo pu aku ai paha ia oe ilalo i ka manawa hope.”

            “O e kuu makuakane mai kamailio mai oe ia’u i kekahi mea o ia ano i nui aku ai ka leo a Hale.  “Halawai aku he alo a he alo me na hopena o kau mai hana malia he alahele no hoi kekahi e loaa ae ana ia kaua a o ko kaua palekana no ia.  O ka make aole ia he puuhonua; he hana hohewale loa ia e haawipio aku ai.  Mai haawipio oe ahiki i ka hopena.”  Maikai keia mau olelo hoolana a ke keiki.

            No ka maikai loa o keia mau olelo hoolana a ke keiki me ka hoike pu aku i kona maka’u ole a koa loa hoi ku okoa mai la ka makuakane iluna a hele mai la a apo i ke keiki a hoopili aku la i kona umauma a uwe iho la me ka haalulu a oiai e uwe ana i mai la:

            “O e hale kuu keiki ina aole oe e hoahewa mai ana ia’u no ka mea a’u i hana ai alaila ua hoomana loa mai oe i kuu noonoo aohe a’u nana ana aku i ka ha’i hoahewa mai ia’u.  E hana aku ana au i ka mea a kou lunaikehala maikai e a’o mai ai!  E hoike mai ia’u no ka’u mea e hana aku ai!”

            “Hookahi a’u mea i noonoo ai e kuu makuakane.  He hana hua ole ke noi ana aku ia Paulo Harisona no ka mea aole oia e aloha mai ana ia kaia a he hana hiki ole no hoi ka papa a hoike ana aku paha iaia e noho hamau loa hoi oia aole e hoike ae i kau mea i hana ae i ke akea.”

            “Ke ike aku la au ua pololei oe eia nae hoi he hoaloha maikai mau oia no’u la e Hale.  Ua loaa ia’u ka manao i kekahi manawa he oi aku ka maikai no’u e hoike aku iaia i ka mea oiaio a e waiho aku ia’u iho iloko o kona aloha mai ke aloha mai hoi a ina no hoi aole o ka pau ana no hoi ia o ka manao ana aku he palekana kekahi mai iaia mai.”

            “E waiho ia a mahope loa oia aku ka hana hope loa.  E noi mua aku kaua i ko Mokana oluolu; ina e ae mai ana oia malaila ih ola no pau aka i hoole mai oia alaila hoona ake ko kaua pono ia Paulo Harisona elike me kau i olelo mai la.”

            “Ia Mokana?  Ka!  He kanaka lokoino a aloha ole loa oia elike me kekahi tiga pololi!  A oiai nana ponoi no i hoike aku la i na mea apau ia Mabela i ka nana aku o ke kumu o ia hana ana ana pela ua huli ku-e mai oia ia kaua a ua hoolilo mai hoi ia kaua i mau enemi nona.  Mai hele aku oe e noi iaia!”

            “Me ko kaua nana ole aku i kona lilo ana i enemi no kaua e kauoha aku ana au iaia e hele mai maanei a nana ia e hoike mai i kona manao.  Ina e hoole mai ana oia alaila aole no kaua ia hewa.”

            Oiai no o Hale e kamailio ana o kona hookani aku la no ia i ka bele a i ka hoea ana mai o ke kupakako kauoha aku la iaia e kii ia Mokana no ka hele ana mai maloko o ia rumi.  Aohe i loihi ka manawa i hala no ke kakali ana aku iaia iaia i komo mai ai aia ma kona helehelena ia manawa a Hale e nana aku ana ka manaoino ka hoowahawaha ame ke ake hanohano.

            “I hoea mai la aku no kaolua kahea ana ae nei a me he mea la o ka wa hope loa paha keia aohe no nae he hewa o ka haawi ana aku ia olua i na olelo hooluolu aku i ko olua mau noonoo.”

            Nanahu iho la o Hale i kona mau lehelehe me ka manao iho la e lele aku e ku’i i ke kanaka a hina ilalo eia nae uumi wale iho la nooia me ka hiki pono ole no a i aku la:

            “Ua maopopo ia’u kou manao; ua hooholo mua oe e huli ku-e mai ia maua a he manao ka’u e waiho aku ana imua ou a nau ia e nana mai.”

            “Heaha ia manao ou la?”  wahi a Mokana o ka ninau ma aku.

            “A eia o na kea (mahele) o kuu makuakane nei apau iloko o ka hui e lilo ia apau loa nou o kela mau pepa i hanaia’ai a i hoopaaia ai hoi kuu makuakane nei e haawi mai oe.  Pehea la kou manao i keia?”

            “O ka’u i ike iho la oia no kau o ka haawi ana mai ia’u mamua a i hooleia aku ai e a’u.  Aohe hiki ia’u ke hana i kekahi mea o ia ano oia ka’u e hoike aku ia olua i nei manawa.  O na pepa aole iloko o ko’u mau lima i nei manawa aia i ka mea okoa.”

            “Alaila aia iloko o ko wai mau lima ia mau palapala?”

            “Ua haawiia e a’u ia Mr. Harisona mamuli o ko’u ike ana aohe kupono o ia mau palapala e paa loihi iho ai au iloko o ko’u mau lima.  Ua loaa ia’u keia manao ina au e paa loihi ana e lilo ana au i hoahui pu iloko o ke karaima a ko makuakane nei i hana ai.”

            Ua hiki ole ia Hale ke uumi hou iho i kona inaina ia manawa no keia mau olelo a Mokana a i aku la:

            “Ke kanaka ino hookamani a maalea!” o kona lele aku la no ia me ka manao e uuni i ke kania-i o Mokana eia nae ua maopopo mua ia Mokana ia manao ona nolaila mamua o ko Hale hoopuka ana aku i kekahi huaolelo ua ku mua ae la o Mokana iluna a emi hope aku la iwaho o ka puka me ka akaaka hoohenehene ana mai oiai oia e iho la a ke lohe aku la no hoi o Hale ma kona leo.

            “O keia iho la ka hopena,”  i pane mai ai ka makuakane ia Hale.

            “Aole aole keia o ka hopena a hiki i kuu hui ana aku me Harisona a kukakuka pu me ia mai hoopau koke oe i kou manaolana no ko kaua pono.  Ua hoea mai nei no anei o Harisona ianei i keia la?”

            Aole oia e hoea mai ana ianei Ua loaa mai nei kekahi lono ke ma’i kona a aia oia ke waiho mai ka me ia ma’i i ka hale.”

            “O ina pela e hele ana au i ka hale e ike iaia”  i pane aku ai o Hale me ka lana o ka manao ame ka ikaika no ka holopono o kana mea e noi aku ana ia Harisona.

 

MOKUNA XLIV-Kamailio na Keiki no ko Laua mau Makua

 

            Ua like ia mea i nei manawa me ka hakaka ana no ke ola.  Me he mea la i ka nana iho o na hunahuna o ko laua waiwai poino ua hoihoiia mai a kahi hookahi a oia wahi hookahi oia no p Paulo Harisona ke kanaka me kona mau ano ino apau.  oia iho la nae ka mea nana e paa ana na waiwai apau iloko o ka maemae me ke kina ole.

            E huikala mai ana anei oia i kekahi hana hewa i hoaoia e hoopoino i kona mau pomaikai?  Aole o Mr.  Venona e manao iki pela aohe no hoi o Hale i manaoio iki no kekahi mea o ia ano a eia nae ua hele hou aku la oia no ka hale o Harisona me ka makaukau e haawi aku i na noi apau ia Harisona no kona haawi mai i kona aloha i kona makuakane.

            No ke koikoi loa o ka pilikia e hookokoke mau mai ana e kau maluna o kona makuakane ua mamao loa aku la na manao e ae mailoko aku o kona waihona noonoo no kekahi manawa a iaia i hoea aku ai i ka hale nui a nani o Mr. Harisona me ka lima ikaika haalulu ole oia i lalau aku ai i ke kaula o ka bele a huki iho la.

            “He makemake au e ike aku ia Mr.  Harisona,”  wahi ana o ka i ana aku ike kauwa i oili mai e pane i kana bele o ka hookani ana aku.

            “Aohe maopopo ia’u kona ae mai eike ia oe ame ka ole a no ka mea ianei iho nei ke kauka a o ka hoi ana aku nei no ia a o ka pii ana aku la no hoi ia o ka loio iluna e ike iaia.”  wahi a ke kauwa o ka pane ana mai.

            He pane hoohuihe loa keia i ko Hale manao ikaika o ia hele ana mai la aka nae i hou aku la:

            “He pon oia’u e ike aku iaia.  E oluolu oe e lawe a haawi aku i ka’u pepa hoolauna iaia.”

            Hapai ae la ke kauwa i kona mau poohiwi iluna no kona manao ina no oia e lawe aku ana aohe no ke kanaka opio e aeia mai ana e ike i ka elemakule eia nae hopu mai la no oia i ka pepa a paa aku la.  Mai hopu ole mai paha ke kauwa aka no kona ike he kane hoopalau o Hale na ke kaikamahine a kona haku a he manao paha ko Hale o ia hele ana aku e kamailio no kekahi mea e pili ana ia Mabela pela wale no oia i hopu mai ai me ka hookanalua no nae.

            E moe ana ka elemakule maluna o ka moe.  Na kona kanaka lawelawe e malama ana iaia me ke kupono loa.  O ka hookomo ia ana aku no ia o ka loio iloko o ka rumi e Mabela oiai o Mabela kekahi i makemake e ike aku i kona makuakane mamuli o kona lohe ana mai he ma’i oia.

            Ia Mabela e haalele iho ana i ka rumi oia ka manawa a ke kauwa o ka oili ana aku me ka pepa hoolauna a Hale.  Hopu mai la o Mabela i ka pepa a heluhelu iho la oiai ka makuakane e ninau mai ana me ka uluhua i ka mea nana ia pepa i ka hoounaia ana aku.

            “Owai malalo?”  wahi ana.

            “O Hale Venona,”  i pane aku ai ke kaikamahine me ka hoopinana ana ae i kona lehelehe no ka hoowahawaha mai keia ia Hale no ka mea ua lilo kona noonoo apau aia maluna o Mokana i nei manawa.

            “Ina pela kauoha aku oe iaia e pii mai iluna nei.”

            O ke emi hope aku la no ia o ke kauwa no ka hooko ana i kana kauoha.  No Mabela hoi hoi hou aku ka oia a ku ma ka aoao o ka moe me ka hulili o kona mau maka.  Kulou aku la oia a pili ma ka pepeiao o ka makuakane a hawanawana iho la:

            “Mai poina oe i keia aole oia he kane mare ana na’u.  E hoomanao pu oe ua hana kona makuakane i kekahi hana apuka i kou inoa he hewa ino loa ana i hana ai.”

            “Alaila aole anei o’u hilinaiia mai no ka hiki ia’u ke hookele aku i ka’u mau hana.  E Mr. Sharp (ka inoa keia o ka loio); e oluolu oe e hookuu mai ia’u no kekahi manawa pokole.  E Mabela kuhikuhi aku oe i ka rumi a Mr. Sharp e hoi aku ai e noho ahiki i ka hoi ana aku o Hale.”

            E hoi hou mai ana no au e noho pu me oe e papa,”  i hawanawana hou iho ai o Mabela i ka makuakane.

            “Aia paha ia i kou makemake,”  wahi a ka papa.

            Nolaila i ka manawa i hookomoia aku ai o Hale iloko o ka rumi o Mabela pu keki e noho mai ana me ka makuakane a ke hoihoi ole loa ala oia ia manawa i kona ike aku iaia maloko o ka rumi e lohe wale mai ai oia i ka laua mau mea apau e kamailio ai.

            “E Hale aohe hiki ia’u kekamailio nui aka ke manao nei no nae au e hiki ana no ia’u ke holoholo aku mawaho i ka la apopo ke loli ole ae ko’u ano mai.”  i pane mai ai ka elemakule.

            “He makemake au e kamailio me oe wale no aole kekahi mea e ae e noho mau me kaua e Mr. Harisona ke ae mai nae oe.”  wahi a Hale o ka pane ana ako.

            “E papa mai kipako oe ia’o e hele iwaho he makemake ao e noho iho iloko nei,”  wahi a Mabela o ke noi ana ae me ka hoouweuwe i ka makuakane.”

 

(Aole i pau.)