Ka Nupepa Kuokoa, Volume LVIII, Number 47, 19 Nowemapa 1920 — KA MAUA KAIKAMAHINE ALOHA UA HALA. [ARTICLE+ILLUSTRATION]

KA MAUA KAIKAMAHINE ALOHA UA HALA.

Solomon Hanohano, ka Lunahooponopono o ke Kuokoa; Aloha kakou: - E oluolu mai kou hanohano i ka maua wahi puolo ukana luuluu e hoopili aku ma na papalina lahilahi o ka kakou hiwahiwa, a nana ia e hoike ae i ke akea i ike mai ai ka lehulehu ame ka ohana o ke kama nei no ka maua kaikamahine aloha i haalele mai ia maua ame kona kaikunane elua, na kaikuaana eha, ame kona mau kaikaina elua e noho u aku nona me ka luuluu ame ke kaumaha mahope nei. Aloha wale ka maua kaikamahine haalele makua. Ua hanauia o Miss Emma Kaaikaula ma Niolopa, Nuuanu, Oahu, mai ia Kaaikaula ame Kaohia aku, i ka la 9 o Sept., 1902, ua piha iaia ka 19 makahiki ame na ia keu o kona hanu ana i na ea o keia ola ana, a waiho iho la ia makou ame kana lei e paiauma aku nona me ke kaumaha. Ua hanau oia i ka bebe iloko o Oct. 15, a ua haalele mai oia i kana bebe ame makou i Nov. 12. Auwe ka mea ehaeha o ka naau! Ua hele oia i ke kula ma Kahehuna, a ua holomua kona naauao, a ua hoomanawanui aku au ahiki ole ma na hoolilo buke au i pilikia ai; ua oi aku ka pii o ke kumukuai o ka buke, o ia mau la, oiai he hana poola ka'u hana ia manawa, aole hiki ia'u ke hoolawa i na buke, nolaila ua wehe mai au iaia mai ke kula mai, a ua noho no oia me maua a nui, a na ka loaa kane iaia nee aku a noho ma ke alanui Kula ame Liliha, malaila oia i noho ai no ekolu makahiki, a no ke kokoke i kona wa hanau kauoha aku maua iaia e hoi mai no ka noonoo ana no na mea e pili ana i kona hanau ana, a ua holopono ia mau mea apau, a ma na ulia oia i pilikia ai. Luuluu wale ka maua kaikamahine!

E Nuuanu e, aole o Emma e honi hou ana i kou ea; e Niolopa, aole oe e ike hou ana iaia; e Palikea e, aole o Emma e noho hou ana maluna ou, oiai aia oia me Niolopua kahi i nanea ai! Auwe ko maua poina ole ia oe e! Ke hoomaikai ae nei i ke Akua ola, i Kona haawi ana mai ame kona lawe hou ana aku i Kana o ka uhane, waiho i ka maua o ka lepo, a ko iho la ka wanana e hoi ka lepo i ka lepo, a o ka uhane e hoi aku i ka mea nana i hana mai, a ke hoomaikai pu aku nei maua i na hoaloha apau i makana mai i ka lakou mau makana pua no ka maua leialoha ame ka ohana i akoakoa pu mai i ka la o ko maua ehaeha. Me ke aloha ia oe e ka Lunahooponopono ame na keiki hoonohohua kepau o kou papapa'i ko maua welina pau ole. MR. KAAIKAULA MRS. KAOHIA KAAIKAULA.

/MISS EMMA KAAIKAULA.