Ka Nupepa Kuokoa, Volume LVIII, Number 44, 29 ʻOkakopa 1920 — Page 5

Ka Nupepa Kuokoa

 

 

HE MOOLELO NO

 

Elese, ka U’i Nohea i Liliia

A I OLE

Ka Ipo Aloha a ke Kanaka Waiwai

 

            Hoko hoi o ka rumi hoahu buke keia wahi kanaka o ka olelo ana ae nei aia o Hale maloko olaila kahi i noho ai, eia ka hoi he rumi okoa ka keia wahi kanaka o ka lawe ana mai na ia’u.

            I ko laua hoea ana aku hoi i ka rumi hookipa. huli mai la kahi kanaka a kamailio mai la i ua o Elese i keia mau olelo:

            “He hoaloha maikai loa o Hale Venona no’u. Ua kauoha mai nei oia ia’u e hele aku e hoike ia oe ua loaa ka ike ia Mabela he kaikamahine hana ka oe ma ke ano he kupakako noloko o ka halekuai o Harisona & co., a ua hooholo oia i kona manao e waiho aku i kona manao hoahewa nou imua o ke ana ma i keia po.”

            He mau olelo pelo wale no keia a nei wahi kanaka e kamanio aku nei ia Elese; aole o Hale ma maloko o ka rumi hoahu buke, elike me na olelo pelo a nei wahi kanaka, aia laua ma ka nale o na mea kanu ia manawa; he mau hana wale no keia a nei wahi kanaka e hoowalewale nei ia Elese mamua o kona noaili ana aku iaia a lawe aku no kela hale a Harisona o ka @ do mua ana a e kakali mai la o ko laua hoea aku.

            Mohaluhalu ae la na maka o Elese ma keia manawa a kahi kanaka o ke kamailio ana mai a ninau aku la:

            “Heaha ka Hale hana i makemake mai ai ia’u e hana aku?”

            “I mai nei he makemake oia e hookaawale oe ia oe iho mai kahi aku o kekahi hana lapuwale e hanaia mai ana ia oe, a noi mai nei e hookomo oe i kou mau mea liilii a hoi koke aku i ka hale. E hele ae au e kii i kaalio nou e hoi aku ai. a e hui aku ana oia me oe maluna o ke kaalio mahope o ka hoonoho ana aku ia Mabela maloko o ka rumi hoahu buke ahiki i ko olua kaawale ana aku.”

            Aia he manao kanalua nui iloko o Elese ia manawa, a eia nae i mai la: “E hele aku ana au ina o kona makemake ia, aka nae, he oi aku ko’u pono e noho au maanei e kali ai nona ahiki i kona hoea ana mai.”

            “Aole; mai kali aku oe nona, ua kauoha mai nei oia e hele mua oe a kau iluna o ke kaalio a nana no ia e hele ae,” wahi a kahi kanaka piha maalea o ka noke ana aku i ke koi.

            No ka puni o Elese no nei mau olelo pelo a kahi kanaka aohe oia i kali hou iho. O kona holo aku la no ia no ka rumi maluna e kii ai i kona mau pono a pau. oia hoi kona koloka, ka papale ame na mikinilima, a he mau minuke helu wale no ma ia hope iho ua oili aku la oia iwaho mai ka hale aku, a ee aku la maluna o ke kaalio mahope o kona alakaiia ana aku e kahi kanaka a hookauia aku la maluna o ke kaalio i paa na aoao apau i ka pakuia.

            Mahope o ke pani ana aku o kahi kanaka i ke panipuka o ke kaa a paa, aiaila hoi ae la oia a ma kona wahi mamua o ke kaam, a he minuke mahope iho, oili hou mai la ua wahi kauaka la mailoko mai o kona wahi e noho ai me kekahi huahuakai i ho’uia me ka laau hoohiamoe, a wehe hou mai la i ke pani o ke kaa kahi a Elese e noho ana a hoohanu aku la ia Elese, o ko Elese manawa no ia i pau ae ai kona ike.

            Me ka limaikaika keia hana ana iho la a kahi kanaka ia Elese; ua hooikaika wale ae la no o Elese e pale i ka lima o kahi kanaka e hamo aku ana i kona helehelena me ka laau hoohiamoe aole nae he hiki, ua oi aku ka ikaika o kahi kanaka mamua o kona, me ia kulana iho la oia i laweia aku ai i kahi ana i maopopo ole ai, he ano hana lapuwale loa i hanaia aku la iaia.

            Ua oi aku ka ikaika o ka laau hoohiamoe mamua o ka ikaika @ loaa ia Elese. nolaila, iloko o ka manawa pokole loa, ua pau ae la kona ike ame kana hoomaopopo ana i na mea apau, a i ka ike ana o kahi kanaka ia haawina i loaa i kana pio, hoi hou aku la mamua o kona wahi o ke kaalio, a hoomaka aku la ka holo ana me ka mama loa, he mea hoike no ka holopono o na mea i hoolalaia no ka aihue ana ia Elese.

 

MOKUNA XXVIII—Ke Kailiia Ana o Elese.

 

            Me ka awiwi wale no ua wahi kanaka la o ka hapai ana aku la Elese, me ka nana mau mai o kona mau maka ihope no kekahi manawa no kona maka’u e hahaiia aku ana paha oia, a no kona lawe ana aku ia Elese a komo iloko o ka rumi hookipa, a a hoomoe iho la iaia maluna o ke koki, akahi no a loaa ka maha i ua wahi kanaka la.

            “Ua hoea mai la oia ianei, nolaila e hoi hou aku oe ihope a ka hale,” i hooho mai ai o Harisona me ke ala pu ana mai iluna mai kona noho nui mai. me ka haalulu no ka piha paha o ka hauoli ame na manao pihoihoi.

            Ia lohe ana aku a godina i kela kauoha a kona haku. o kona oili hou aku la no ia iwaho mai ka rumi aku. O Elese wale no maloko o kela rumi me ka elemakule ame ka wahine nona ka hale hookamakama. he wahine i ike ole iho i ka hilahila i ka hoohaahaa a hoolilo i na kama i like me ia i poe hoohaumiaia, a e lilo ai hoi i poe hoowahawahaia ma ia hope aku no ke kapaia mai i kekahi inoa e mau ai ke alina maluna o lakou.

            “Auwe no hoi ka u’i o keia wahi kaikamahine e!” i hooho ke ai o Harisona i kona manawa i ala ae ai a noho pono iluna o ka noho a nana mai la i ka waiho kahela aku o Elese maluna o ke koki, a o kona manawa no ia i hele mai ai a ku ma ka aoao o Elese a kulou iho la e nana me ka hoihoi o na maka.

            “Aha! loaa hou oe ia’u iloko nei. a o ko hana ana keia e maopopo loa ai kou lilo i pio na Harisona!” i pane mai ai kahi wahine poupou. ka ona nona ua hale hookamakama la o ka pane hoonaaikola ana iho.

            “Wehe ae oe i ke koloka ona i ike aku au iaia iloko o kela mau aahu nani ona e komo la,” i kauoha mai ai ka elemakule kekahi wahine lauhine.

            He hana maalahi loa ia o ka weheia ana ae ahiki i ka hemo ana no ka mea aohe onioni ae o Elese, ua lilo kona noonoo mai iaia aku. o ka waiho lolo wale iho no me he mea la e aneane aku ana i kahi o ka make i ka ua mea o ka ikaika o ka laau hoohiamoe. Aohe i emo ia wehewehe ana ae o kahi luahine i na lole o Elese ua hemo ae la ke koloka a ahuwale ae la ko Elese mau aahu, a ke waiho lahalaha la hoi ke kula o Mokuleia i ka la’i.

            “Ua ike no anei oe, e ka madame i kekahi mau lima nepupepu elike me kena au e ike iho la?” i ninau mai ai ka elemakule Harisona. “Nana iho oe i kona a-i ua like me ka momi ke aiai ame ka maemae! Aole oia wale no, aka, nana iho oe i kona helehelena, eh maemae i ke kai ka pua o ka hala!”

            “Ae no hoi, he nani mai hoi kau! O keia kekahi o na kaikamahine maemae loa a kekahi kanaka e nele ole ai ka hoohihi, ua kupono loa keia i ua kanaka,” i pane aku ai kahi luahine. “Aole anei ou manao ke lele awiwi loa nei ka manawa e pau ae ia ko ia nei ona ana i ka laau a o ko ia nei puoho ae no ia a holo hou aku, elike me kela lawe mua ana mai au a holo ai?”

            “Ke manao nei au ua pololei kau, ua pololei kau,” i pane mai ai o Harisona. “Ina pela e hapai aku hoi ha iaia iloko o ka rumi a wehewehe ae i kona mau aahu, o i hiamoe oia.”

            “Pela ko’u manao,” wahi a kahi luahine, o kona hookani aku la no ia i ka bele, a hoea ana no ka wahine Paele, o Sera, a ku ana ma ka aoao o ka luahine.

            “E Sera, e hapai aku oe i keia kaikamahine ahiki i ka rumi iluna mahope loa a hoomoe aku iaia maluna o ka moe.

            O ka hopu iho la no ia o Sera ia Elese a hii ae la me he wahi bebe la, a oiai oia e hapai ana, kamailio iho la ia Elese a Elese nae e lohe ole ae ana i kana mau mea apau e kamailio iho ana i ka i ana iho:

            “O kou hana ana keia pau kou holo mahuka hou ana. Na makou oe e malama maanei a e lilo ana oe i ipo aloha na Harisona, ke kanaka elemakule waiwai a hanohano loa o keia kulanakauhale. O kou holo wale ana iho no paha hoi la; mai lilo oe i kaikamahine waiwai, o ko hoonaukiuki mua ana ia Harisona, aka, ua hala aku la nae hoi ia manawa, a eia oe maanei i nei manawa. malia o aloha iho ka elemakule ia oe a loaa kou mahele waiwai. Mai hoao hou oe e holo; he hana hiki ole no nae ia ia oe i nei manawa, ua paa oe aohe ou wahi e pukapake aku ai.”

            O ka noke wahahee wale iho no a ka wahine Paele la i ke kamailio aohe lohe ae o Elese.

            Me ia ano iho la ka wahine Paele o ka hoomau ana i ke kamailio iho ia Elese ahiki i ke aku ana aku iluna o ka rumi, me ka hoomau aku no hoi o kahi luahine i ka hahai mahope ona, no Harisona nae aohe oia i hahai mai ia manawa, ua noho aku la no oia i ka rumi malalo, me ka anaanai mau i kona mau lima, a me ka holoholo ana hoi iuka a i kai o ka rumi, me kona uluhua loa i ke kali malalo.

            “Mai lolohi loa olua i ka wehewehe ana ae i kona mau aahu a hookomo iho i kapamoe po nona, a hoomeo aku iaia maluna o ka moe.” wahi a ua o Harisona o ke kahea ana mai i na wahine oiai laua e pii la no ka hale maluna. “E hoomanao olua aole e loihi loa ana ka ona o ka laau hoohiamoe a o kona puoho ae no ia a hooko ole ia hoi ko’u makemake.”

            “He keu no hoi kela a ka elemakule hiki ole ke hoomanawa nui iho.” i huli mai ai ka wahine luahine a pane mai la i ka wahine Paele: “O ke ano mau iho la no hoi ia o kela kanaka elemakule hupo, e olelo ae au pela.  E pono oia e hoomakaukau iaia no ka lua kupapau i nei manawa.” wahi hou a ka wahine luahine.

            “Ina aole na kanaka he poe hupo. alaila, pehea ana kou pono?” i ninau mai ai ka wahine Paele i ka luahine.

            “Oia no hoi, pehea ana la e loaa ai ko’u ola, aka aohe nae o’u olelo okoa aku mamua o ko lakou alo, ia’u wale iho no ia, a o oe hookahi iho la no hoi ka mea i lohe ia olelo a’u. Homoe aku iaia iluna o ka moe (ia Elese keia), alaila wehewehe ae kaua i kona mau aahu apau elike me ka hikiwawe e loaa ana iak aua.”

            He mea kupanaha no ke noonoo iho no ko na Lani hoouna ole ana mai i kekahi popo uwila a pa pono maluna o kela hale, a luku i keia poe apau maloko o kela hale. He alahele okoa no ka na Lani e hana mai ai maluna o keia poe, a he la no e hiki mai ana e halawai ai lakou me ko lakou popilikia. I keia manawa aohe mea e hana aku ai no ka hoopakele ana ae i ke kaikamahine maemae hala ole mai kona hoopoinoia ana iho, aka, nana aku nae i ka hana a ke au o ka manawa.

            I ke kau ana aku o Elese iluna o ka moe hoomaka iho la ua mau wahine la e wehewehe i na aahu apau o Elese, me ko laua haawi iho i na mahalo no na aahu apau a Elese a laua o ka wehewehe ana ae la. no ka mea, he mau lole kumukuai nui wale no ko ia mau mea apau a Hale o ka hoolako ana no Elese.

            I ka pau ana o na aahu o Elese i ka wehewehe, i aku la ka wahine luahine poupou, ka ona nona ia hale, “kii aku oe i ka lole moe po. Maemae maoli no ka oiwi o keia kaikamahine, aohe wahi puu aohe kee ke nana iho i kona kino mailuna a lalo; aole au i ike i kekahi kaikamahine nani o ka oiwi elike me keia iloko o ko’u mau la a pau o ke ola ana.”

            Oia mau no ko Elese waiho i ka ona a ka laau hoohiamoe i nei manawa, aohe wahi mea a onioni ae, aohe no hoi he mea hiki iaia ke hoomaopopo ae, a ke kilohi wale la nei mau wahine lapuwale i kona kino holookoa mai ke poo a na wawae, me ka hookani mau iho i ka nani o kona kulana oiwi.

            “Aiai elike me ka hau, a nepunepu no hoi me ka nelunelu o kona mau wahi apau! He hana hilahila loa na kaua ka haawi ana aku i nei kaikamahine e hoohaumiaia mai e kela elemakule, aole anei ou manao pela?” i ninau ae ai ka wahine Paele i ka luahine.

            “Haawi mai ia’u i mau kanaka hupo wale no elike me kela i na manawa apau. e Sera! Paa iki ae oe i ke poo iluna i hiki ke hookomo mai i ke kapa moepo. O, aole no hoi i ka nani o kona lauoho ehu piipii i kana mai, aeae hoi kau a hinuhinu no hoi elike me ke kilika! Minamina maoli no!”

            O ka olelo wale iho no nae ka ka luahine i ka minamina, a pela aku, aohe nae he imi i ka hana e pakele ai o Elese. Pehea auanei e hoao ai e hoopakele o kona ola ia o ka loaa mai o na dala he nui iaia mai a Harisona mai a loaa kona pono o ka noho ana.

            “He helehelena kona i like loa me ko kekahi anela,” i pane mai ai ka wahine paele, oiai oia e nana iho ana i ke kino nani pu’ipu’i o elese e waiho lahalaha oni ole ae ana.

            “Heaha kau mea i ike no na anela au o ke kamailio ana mai la. e Sera? Aole oe e ike iki ana i kekahi mea o ia ano, o na mea honua wale nei no kau mea e ike iho ana. E lawe aku oe i ka’u a’o, oia hoi, e hooikaika oe ma na ano apau e huli i kou mau pomaikai maluna o keia honua elike me ka hiki ia oe, no ka mea, heaha ka kaua nana aku i kela noho ana ma o, ua ike aku auanei kaua i kolaila noho ana, o ka loaa ae paha la o na pomaikai o keia ola ana, a make aku pau ae la ka hana ana.”

            “Aole o’u manao pela. Pehea la. e hoomoe iho anei au iaia ilalo i nei manawa, ua komo iho la hoi ke kapa moe po?”

            “Ae, hoomoe aku oe. O, ua lawa loa kona nani e hoowalewaleia ai kekahi kahunapule, aka e waiho kaua iaia na ka elemakule Harionsa. E hoi kaua ilalo a olelo aku i kela elemakule e pii mai iluna nei. He manaolana ko’u aole oia e pakele hou ana mai nei aku i nei manawa, a eia ka’u kauoha hope ia oe, e Sera, mai owaka iki kou mau lehelehe no keia mea a kaua i hana iho la, a ke manao nei au e malama ana no hoi au i ka’u hoohiki.”

            Oili aku la laua a haalele iho la i ke pio a laua oia wale no iloko o ka rumi. Ina he minamina ko keia mau wahine i ko Elese kino ame kona inoa hanohano e hoopoino oleia e Harisona, no keaha ko laua hana ole iho i kekahi hana e pau ae ai ka laau hoohiamoe. i pakele ai o Elese i ka poino e hanaia mai ana maluna ona?

            O, aole laua e hana ana i kekahi mea o ia ano. a no ka mea. o ko laua hoao ana e hana pela e nele ana laua i na pomaikai mai a Harisona mai, a i ole e hanaia mai ana kekahi hana e komohia aku ai laua iloko o ka poino. Haalele iho la laua ia Elese e moe ana no me he mea la aia oia iloko o kekahi hiamoe kulipolipo loa, e hapai mau ae ana kona umauma e emi iho la i kona manawa e hanu ae ai, ua hamama iki kona mau lehelehe, ke pukalaki la no hoi kona lauoho maluna o ka uluna, he ano i maa ole ka ikeia iaia i na manawa mamua aku, o keia wale iho la no.

            Aia hoi i ka hale malalo ka elemakule kahi i kakali mai ai o ka hoikeia aku, o kona manawa ia e pii mai ai i ka rumi kahi a Elese e moe ana no ka hooko ana i kona manao lapuwale, a i ka manawa i komo aku ai o ka luahine a hoike aku la iaia ua makaukau na mea apau nona, o kona manawa no ia o ka pii ana mai me ka haalulu o na wawae.

            “E pii aku anei au i ka rumi maluna i nei manawa?” wahi ana o ka ninau ana mai i ka manawa o ke komo ana aku o ka ona hale luahine.

            “Ae; o kou manawa keia e pii aku ai, ua makauaku na mea apau, i hakalia wale no i kou hoea aku,” i pane aku ia ka luahine. “E wiki aku oe, o pau e mai ka ikaika o ka laau hoohiamoe a hooke ole ia kou makemake.”

            O ka oili mai la no ia o ua elemakule nei a hoomaka mai la ka pii ana no ka rumi kahi a Elese e waiho ana me ka ike ole ae i kekahi mea e hanaia aku ana maluna ona.

            Me ka malie loa ia pii ana aku a ka elemakule ahiki i ke kau ana iluna, a komo aku la no hoi iloko o ka rumi, a iaia nae i kau loa aku ai iluna, nui iho la kona hanu no ke ano nnaenae.

            Ua haaleleia no ka puka kahi a Elese e waiho mai ana iluna o ka moe aohe i paniia, a no ia hamama ua lele mai la na kukuna o ka malamalama iwaho, me he mea la e kono okoa mai ana no iaia e komo aku, a ke hoihoi wale la no oia, o kona komo aku la no ia me ka hoihoi wale a ia ike ana iho i ka waiho o Elese me kela helehelena u’i a ka launa ole, hooho ae la oia i kekahi mau huaolelo mahalo:

            “U’i maoli no hoi kou helehelena e keia wahine opio! O kou hana ana keia aole e hiki ana ia oe ke kaawale mai a’u aku, a o keia no hoi ka manawa e hookoia ai o kuu makemake maluna ou! Aohe au ku-e ana mai i nei manawa, ua lolo oe i ka laau hoohiamoe, na’u ka hana maluna ou!”

            Ke moe la no kana pio me ka oni ole ae elike no me ia a na wahine o ka haalele ana iho, a no ia ike ana iho ona i ka waiho malie o elese ua houilaniia ae la ka makemake iloko ona no ka hooko aku i kona makemake. Ua poina ae la oia i kona mau ano kupono ole ua hele a haalulu. o kona hele mai la no ia e pani i ka puka a laka mai la a paa, a huli hou aku la no kahi o ka moe a Elese e waiho mai ana.

 

MOKUNA XXIX—Ka Hoopakele Ana i Kona Inoa Maikai.

 

            Ma kela manawa a ke kanaka elemakule lapuwale o ke kulou ana iho me ka manao e honi, me he mea la ua iho mai la kekahi anela mai ka lani mai no ka hoopakele ana ia Elese mai ka lilo ana he pio na nei lapuwale; me he mea la ia manawa o ka ikaika o ka laau hoohiamoe iloko ona ua mahia loa ae la, no ka mea. ua puoho ae la o Elese ia manawa a kaakaa ae la kona mau maka , a hoomaopopo ae la no hoi i ka mea ke ku iho ana maluna ona ame ka mea e hanaia iho ana iaia.

            Ua paa oia i ka pulikiia e na lima o ka elemakule ia manawa, a ke honi ae la hoi i ka hanu polopolona o ka elemakule, he hanu i aneane loa oia e luai ae ia manawa, a he helehelena hoi ko ke kanaka ana e nana ae ana mai oi aku kona hoowahawaha mamua o na mea ino e ae apau ana i ike ai maluna o keia honua. Ke ike ae la oia i ka mahanahana o ka hanu o ka elemakule ma kona mau papalina, a ke noke iho la no hoi i ke kamailio iaia me na huaolelo apau o ke aloha ma kona mau pepeia.

            Ia manawa he liilii loa kahi loa kahi manaoio iloko o ka elemakule ua hoi hou mai kela ikaika iloko o elese elike me kona ane mau, eia nae, iloko o kela manawa, me ko Elese ikaika apau ua pale mai ia oia i ka elemakule a hikaka mai la i kahi e. me he mea la he kane ioa ia manawa, a he wahi keiki bebe loa o Harisona.

            Ma ka olelo maopopo ana ae a o kahi i laki ai o Elese, aohe ikaika i loaa ia Harisona ia manawa e hoopapa aku ai ia Elese, a oiai ua loaa ole kekahi manao ia Harisona mamua e hanaia mai ana oia elike iho la me keia, aole oia i hoao e ku-e mai ia Elese, aka hele hikaka aku la oia no kekahi aoao o ka rumi ahiki i kona hooku’i ana aku i ka paia.

            Malaila kona wahi o ke ku ana. me ka haalulu o kona mau wawae ame ka naka hoi o kona kino holookoa, a huli mai la e nana ia Elese me ka holowai o kona mau maka, ka mea ana i manao ia e hoohaumia. Mai kahea ae paha oia ia manawa no kekahi kokua. ina he aho kekahi iloko ona ia manawa. aka no kela hikaka ana aku ona me ka hooku’i ana aku i ka paia me ka ikaika, ua pau maoli kona aho.

            Ma kela manawa ua ala ae la o Elese a e ku ana hoi maluna o ka papehele me ka nana ana ae ma o a maanei o ka rumi. a ke noonoo la oia pehea la i hoea mai ai oia ia hale.

            Oiai oia e ku ana a e nana aku ana hoi ia Harisona e ku mai ana, ike iho la oia ua kailiia mai ka oia a hoopaala maloko o ia hale, elike me kona laweia ana mai mamua, o ke ano nae o ka mea i hanaia maluna ona i hoea ai oia maloko o ia hale, aohe hiki iaia ke hoomaopopo.

            Nana iho la oia iaia iho ia manawa aohe ona mau aahu, he kapa moepo wale no ke paa ana ma kona kino, o kona mau aahu e ahu mai ana ma kahi e. alaila hoomanao iho la oia ua weheweheia ka kona mau aahu apau. a ua hookomoia he kapa moepo no ka homakaukau ana e hoopoino iho ka elemakule iai. Ua piha loa oia i ka huhu ame ka hilhila pu ia manawa. a ia manawa oia i kamailio aku ai i ka elemakule no ka hilahila ole a ni au aku la no kona mau lole.

            “Kuu mau aahu. auhea!” wahi ana me ka leo ko’iko’i o ka mea i piha loa i ka inaina.

            “Aia ke waiho mai la ma o. e kuu aloha!” wahi a ka elemakule o ka pane ana mai, me ke kuhikuhi ana mai ma kekahi kihi o ka rumi. “Ua kamailio aku au ia laua e hoakoakoa no i kou mau lole apau ma kahi hookahi. me he mea la nau ponoi i wehewehe a waiho malaila.”

            “Na na whaine o keia hale i wehewehe, e kuu aloha. No ko’u maka’u aole paha au e lilo i wahine lawelawe kupono nou, no ka wehewehe ana ae i kou mau aahu, pela au i kauoha aku ai i kela mau wahine e wehewehe i kou mau lole. O, e kuu aloha. mai maka’u oe no kou hanaia aku ma kekahi ano lapuwale e hoopoinoia aku ai kou mau aahu. Ua kauoha aku au ia laua e hanaia oe ame kou mau pono apau elike me ka laua e hana ai i kekahi kamaliiwahine. E loaa aku ana i wahine lawelawe ponoi nou. i home ponoi nou ame na mea no apau nou ponoi. mai kaumaha iho oe no ia mau mea.”

            O, noho malie oe e kela elemakule lapuwale. Puka koke aku oe iwaho mai keia rumi aku i nei manawa!” wahi a Elese me ka piha i ka huhu ia manawa. Akaaka wale mai la no o Harisona no nei mau olelo hookeke a Elese o ka pane ana aku. a ma kahi o kona hooko i ka Elese o ke kipaku ana aku iaia e hele aku iwaho. hele mai la ka elemakule no kahi a Elese e ku aku ana me ka pane ana mai:

            “Mai hoonaaupo oe ia oe iho, e kuu whai ipu u’i. Mai pono loa kou ku-e ana mai ia’u me kou mau manao koa a maka’u ole ina aole oe i haule i ka hewa me Hale a oia mau no hoi kou ano maikai he wahi kaikamahine i ike ole ia mea he hewa. aka, oiai ua noho pu oe me Hale no kekahi manawa a ua haulehia paha oe i ka hewa. ke manao nei au he manawa keia nou e noonoo iho ai.”

            “Noho pu me Hale? E manao ana anei oe i ko’u hele pu ana me Hale ua haule au i ka hewa a ua lilo aku ko’u inoa maikai mai a’u aku? O, aole o’u makemake e kamailio hou aku me oe, eia wale no ka’u e kauoha aku ia oe e puka koke aku oe mailoko aku nei o kela rumi i nei manawa; e haawi mai oe i manawa no’u e komo ai i ko’u mau aahu. aia a paa alaila ia manawa au e kamailio pu aku ai me oe, ina e manao ana au e haawi aku i manawa nou,” i pane eku ai o elese me ka piha loa i ka huhu.

            “Aole o’u makemake e hele iwaho, a aohe no hoi o’u makemake ia oe e komo hou oe i kou mau aahu. Ma ho’u manao, a o ia no ka’u e ike nei no’u iho o oe kekahi o na kaikamahine--,” a hooki pu iho la ka Harisona kamailio ana mai.

            Ia manawa ua oi aku ko Elese hoonaukiuki a ua uluahewa maoli kona noonoo no ko Harisona ae ole e oili aku iwaho mamua o ka hiki iaia ke hoomanawanui, ke nana iho la oia iaia iho he kapa moepo wale no kona e komo ana ia manawa. a oia hookahi wale no hoi ma kela wahi me kekahi mea kokua ole mai iaia, eia nae aole ona maka’u ia Harisona ina no ko laua lawelawe lima maoli, no ka mea, ua hoaaia ae ka inaina wela iloko ona, me kona ike pu iaia ia manawa ua lawa loa kona ikaika e paio aku ai me ka elemakule.

            Ua nohoalii ka inaina maluna o Elese ia manawa, aka, mahope o kona hooikaika ana e hoomama i kona noonoo, i aku la i ka elemakule me ka leo o kekahi mea mana, aole hoi ma ke ano he pio oia i ka i ana aku:

            “E ka elemakule hilahila ole, ua oi loa kou mau makahiki e kupono ai oe e lilo i kupunakane no’u. Aole ana anei oe’e oluolu mai ana e hele aku iwaho no kekahi manawa ahiki i ka paa ana ae o ko’u mau aahu i ke komo? Aole anei ou hilahila iho i ka noho mai iloko o keia rumi me kekahi kaikamahine olohelohe o kona kino?”

            “O, e kuu ipo a’u e manao nei na’u oe, aole o’u makemake e komo hou oe i kou mau aahu, no keia kumu, ke manao nei au o kena kapa ou e paa la ma kou kino oia kou aahu maikai loa e komo ai. Aole anei ou ike iho he nani kena lole o ka hana maiauia ana a i kupono loa hoi no kekahi kaikamahine u’i loa elike me oe?

            “E noonoo iho oe me ke akahele loa, aole e hiki ana ia Hale ke hoolako mai ia oe me na mea maikai loa au e makemake ai elike me ka’u e hoolako aku ana ia oe; aole loa e hiki ana iaia ke hoolako mai i ka hapa haneri o na mea a’u e hoolako aku ana ia oe.

            “Eia no hoi kekahi, aole i kupono loa ko Hale noho pu ana me oe, me kona ike no iloko o kekahi manawa pokole loa ma nei mua aku e mareia ana oia me kuu kaikamahine me Mabela Harisona.”

            “Aole o’u makemake e lohe hou aku i kau mau olelo e ka elemakule hilahila ole. Aole anei oe e ae mai ana e haalele mai i keia rumi?” i ninau hou aku ai o Elese.

            “Ua hiki ia’u ke ae aku i kou manao ma na mea e ae au e noi mai ai, aka, no kela noi au e hele au iwaho mai keia rumi aku, aole loa au e neeu iki aku ana i hookahi kapuai. E oluolu oe e hoopau i kou kukahalake ana mai. E kauoha ae au i omole waina no kaua a e inu like kaua no ke ola kino o ka wahine a Hale. Pehea ia ia i kou manao?”

            “E ae mai ana anei oe e haalele mai i keia rumi i nei manawa?” wahi hou o ka Elese ninau.

            “Ina au e hele aku ana hookahi no kumu a oia keia, e kauoha aku ana au i kela mau wahine maloko o keia hale e lawe mai i omole waina iluna nei no kaua, a i ole e lawe hou mai paha i laau hoohiamoe hou nou, i pau kou walaau ana mai elike me kena,” wahi Harisona o kona mau lala, ua haalulu kona mau wawae ame kona mau lima, nolaila, noonoo iho la oia ina no kona lawelawe maoli me Harisona e eha ana no oia iaia, eia nae, oiai oia e noonoo ana pela, ua ulu ae la kekahi manao akeakea o ke ano hilahila iloko ona, he hana maikai ole naha ka hoeha ana aku i ka elemakule i aneane e make.

            Eia nae ua hoomahuahua loa ia ae kona manao e hoao e hakaka, mamuli o kona lohe maopopo ana aku i ka Harisona o ke kamailio ana mai no kona kauoha aku i na wahine e noho mai ana malalo e lawe mai i laau hoohiamoe nona, nolaila hoolala iho la oia i kekahi hana no kona palele mailoko aku o kela hale ina e hike ana.

            Oiai oia e noonoo ana no kona alahele e pakele ai ua loaa koke no iaia ka ike, eia nae, me ka ikaika wale no oia e hana ai i hiki ai e hookoia ia manao ona, eia nae, ia manawa hookahi ke ulu pu la ka maka’u iloko ona ina no kona hooko aku, e lilo ana paha auanei i mea e poino ai ka elemakule a poino pu me ia.

            Ua paanaau loa iloko o kona noonoo a ua lilo hoi i mea maka’u loa nana kela mau olelo a Harisona e kauoha aku i na wahine malalo o ka hale, e lawe mai i laau hoohiamoe nona. Ua maopopo iaia ina no ke kauoha io aku o Harisona i na wahine, e hooko i’o ia mai ana kana kauoha, a i ka manawa e pii mai ai o na whaine, alila akolu lakou la ma kekahi aoao mai e ku-e mai ai iaia, a e loaa ole ana i manawa nona e hookaawale aku ai iaia iho mailoko aku o kela hale.

            Nolaila, i ka manawa i puka mai ai o kela mau olelo mai ia Harisona mai a ike pu aku la no hoi i ko Harisona nee ana aku no kahi o ka puka, me he mea la e oili aku ana oia iwaho no ka hooko ana i kana mea o ke kamilio ana mai e kauoha aku ana oia i na wahine malalo e lawe mai i laau hoohiamoe, o ko Elese hopu koke aku la no ia ia ka uluna mailuna mai o ka moe, a me ia uluna iloko o kona lima, o kona lele aku la no ia me kona ikaika a pau maluna o Harisona, me ka hoopili mau aku i ka uluna i ka waha o Harisona i hiki ole ia Harisona ke uwa ae, a ia manawa hookahi kula’i aku la iaia a hina iluna o ka papahele me kona ku pu iho maluna o ka elemakule me kona kaumaha apau, me ka hehihehi pu maluna ona.

            Iloko o kela manawa. no ka hikiwawe loa o keia hana ana aku a Elese maluna o ka elemakule, aohe mea hiki iaia ke aahu ae, na like loa kona hina ana iho me ka hina ana o kekahi bebe nawaliwali, a oiai ua paa loa kona waha i ka uluna a elese o ka nou ana aku mamua o kona mau maka, aohe leo puai iki o Harisona i loheia mai e na wahine e noho mai ana malalo o ka hale ia manawa.

            “Mai noho oe a walaau iki,” i papa iho ai o Elesee. “Aole o’u makemake e hoeha iho ia oe, aka nae, ina e uwa ae ana oe e pepehiia ana oe e a’u a make, aole au e ahewaia mai ana no ko’u haha ana iho ia oe pela.”

            Malia paha o ko Harisona manaoio maoli no ia ia manawa e pepehi iho ana o Elese iaia a make, no ka mea, ua moe malie loa oia me ka hoao ole ae e uwa, aohe no hoi oia i hoao iki ae e hookaawale i ka uluna e paa aku ana mamua o kona waha. oiai o Elese o ka holokiki hou ana aku no kahi o ka moe a hahae ae la i kekahi apana o ke kihei, a i ka loaa ana mai o ia apana iaia. me ia apana oia i hauhoa ai i na wawae ame na lima o Harisona ahiki i ka paa ana e hiki ole ai ia Harisona ke wehe ae iaia iho.

            “Ina e hoao ana oe e uwa, e hoopihaia aku ana ko waha e a’u me ka welu. lohe oe!” i pane iho ai o Elese me ka hulili o na maka ame ka nui pu o kona hanu ia manawa.

            Aohe oni ae o Harisona. aohe no hoi he hoao ae e uwa, o ka moe malie wale iho la no, a no ka mea, ina aole oia e hana ana pela e hooko aku ana o Elese i kona manao e hoopika aku i kona waha me ka welu. Ia manawa aole oia i manao e hiki ana i kekahi kaikamahine oloko o ka halekuai ke hakaka no kona inoa maikai, i ka manawa e lilo ai kona hoohaumiaia aku i mea nona e pomaikai ai.

            Hoohuli aoao ae la o Elese iaia a kukulu mai la i kekahi noho ma kona poo, me ka uhiia iho o kona poo a paa me ke koena o ka uhimoe ana o ka hahae ana, i hiki ole ai ia Harisona ke ike mai i kona manawa e komo ai i kona mau aahu, alaila hele aku la no kahi o kona mau aahu e ahu mai ana, a hoomaka iho la e komo me ka awiwi loa. o kela o keia. aia ka pono a paa oia! ka manawa kupono loa i loaa iaia.