Ka Nupepa Kuokoa, Volume LVIII, Number 42, 15 October 1920 — KE NOKE IA MAI NEI KA OKOLEHAO I KA HOPUHOPU. [ARTICLE]

KE NOKE IA MAI NEI KA OKOLEHAO I KA HOPUHOPU.

No ka nanea paha, me ka ohi nui ana i na pomaikai o ka hana puhi okolehao, ua lanakila maoli ke puhi ana a kekahi Pake, nona ka inoa o Chuek Pai, ouka ae nei o Kalihi i ka okolehao no kekahi manawa, eia nae, ua paa oia i ka hopuia e maluna oihana federala, ma ka Poalima aku nei i hala, a paa mai i ka hopuia, me ke kauia ana aku o ka hoopa'i maluna ona. i ka wa i hookolokoloia ai ma ka Poakahi nei, he elua haneri me kanalima dala. He kanu maia ka hana a kela Pake ma Kalihi, me ka hoao ana mai e pulapu i ua kanaka o ke aupuni, i ka wa i hoea aku ai i kona hale, eia nae, aole i lilo kana pulapu ana i mea manaoio aku na na kanaka o ke aupuni, me ko lakou hele okoa aua aku no e huli ialoko o kona pa, ame ka hale, a loaa aku la ua pahu o na mea i hoawaawaia, no ke puhi ana aku i okolehao, pela hoi kekahi mau galani okolehao. Ma ka manawa i hoea aku ai na kanaka o ke aupuni ma ka hale o kela Pake, ua hoikeike mai la ka oua nona kela wahi i kona mau ano hoihoi, me ka olelo okoa ana mai, aole ona puhi okolehao, a ua hauoli loa oia i ka hoea ana aku o kela mau luna oihana no kona wahi. no ka mea, aole e loaa ana ia lakou he okolehao malaila. Me kela mau olelo pulapu nae ma ka aoao o Chuck Pai, aole na kanaka o ke aupuni i hoolohe aku, aka hele aku la no lakou e huli ialoko o ka pa, he oiaio, elike me ka lakou i hoohuoi mua ai, ua loaa aku la he pahu barela, ua hunaia iloko o ka lepo malalo o kekahi paila wahie, mahope aku o ka hale. No ka loaa ana o kela pahu i piha i na mea i hoawaawaia, no ke puhi ana aku i ka okolehao, ua hoomau hou aku la no na kanaka o ke aupuni i ka huli ana, a loaa aku he mau pahu lehulehu iloko o ua ulumaia, ua hanaia me ka nalo loa, a nininiia aku la na mea apau mailoko aku o kela mau pahu. O ka mea nae nana i hookahaha loa aku i ka manao o kela mau luna oihana, o ia no ka loaa ole o ka ipuhao puhi okolehao ia lakou, aka nae, mahope iho o ka noke ana i ka huli me ka hoomanawanui i loaa aku ai kekahi hapa o ka ipuhao e waiho ana malalo o kekahi moe, a kaa mai la malalo o ka malu o na kanaka o ke aupuni. O kela minoaka o ke ano hewu ole maluna o ua Pake nei, ua auhee aku ia mai iaia mai, mahope iho o ka loaa pono ana aku o kana mau meapaahana ku-e kanawai, a paa mai la oia i ka hopuia, me kona laweia ana mai e hoopaa maloko o ka halepaahao, a i kona wa i hookolokolo maoli ia ai, ma ka Poakahi nei, i ae okoa aku ai oia no kona pili i ka hewa, me ka hoopa 'iia ana mai e uku oia i ka huina o elua haneri me kanalima dala.