Ka Nupepa Kuokoa, Volume LVIII, Number 28, 9 Iulai 1920 — HOOKUUIA HALOKO O KA MULIWAI HE 40,000 I'A HOPULAPULA [ARTICLE]

HOOKUUIA MALOKO O KA MULIWAI HE 40,000 I'A HOPULAPULA

Mahope o ka hookuaia ana aku he 40,000 a oi aku mau i'a (Rainbow Trout) maloko o na muliwai o /kauai ua hoi mai no Honolulu nei ke komisina iʻa ame manu o ke Teritore I. H. Wilson ma keia pule iho la. He 50,000 mau hua i'a trout i hoounaia mai i Hawaii nei mai Leadville, Colorado mai, ma ke ano he makana na; ka buro hoohanau i'a Amerika i keia Teritore, a o ia no hoi ka mua loa o ka hoounaia ana mai o na hua iʻa i keia Teritore. Ma ka la 1 o Inue i hala ka hoea ana mai o ia mau hua iʻa a ua paaia ma HOnolulu nei ahiki i ka la 3 mai maloko o kahi hoahu i hoohuihuiia me ka hau. Ma ka hoike a Wilson o ka hoihoi ana ae ia H. L. Kelly, ka mana hooko o ke komisina ia ame manu, he 7200 mau hua i'a i make iloko o

na la ekolu mamua o ka hoounaia aku i Kauai ma ka la 3 o Iune. E hoakaka pu ana maloko o ka hoike a Wilson he 35,000 mau hua i kiko ma Kauai mamua o ka hookuuia ana aku iloko o na muliwai, a he eha kaukani mau hua i-a i waihoia aku maluna o ka muliwai. No na hua i waihoia aku maloko o na muliwai he 2800 ma ka muliwai o Kokee, a he 500 pakahi maloko o na niuliwai o Kawaiakama, Kawaikoi, Waiakoalii ame Mohihi. Mahope o ke kiko ana o na hua a hooholoia aku maloko o na muliwai ua hakilo mau aku o Wilson i ko lakou holo ana no kekahi. mau la lehulehu, a iaia i haalele aku la ia Kauai ua ike aku oia i ke ola maikai o na i'a a ua like ka ka holo ame ke ola ana o na i'a maloko o kela muliwai elike me kahi o lakou i laweia mai ai. O ka lawelawe ana no ka hooholo ana aku i na iʻa noloko o na muliwai mai kahi hoopulapula i'a aku o ke aupuni ma Kokee. Ua waihoia aku na hua i'a maloko o ka muliwai o Kokee no ka hookiko ana ma ka la 6 o Iune, a mailaila i laweia aku ai a hooholo ma na muliwai e ae. Ma ka la 5 o lune i hoomaka ai na hua e kiko a pau ma ka la 12, elike me ka hoike a ke komiaina. Ma kela manawa i kiko na hua ua akahele loa ka malamaia ana me ka hoomaemae mau ia o na pua trout i kiko mai la. Ma ka la 19 mai i ikeia iho ai na iʻa e holoholo ana maloko o kahi hoopulapula i'a, a ma ks Poakahi, Iune 21, ua hooholoia aku kekahi mau i'a maloko o ka muliwai, he wahi mamao o elua ame hapa mile e hele aku ai ahiki ilaila. Na ke Senatoa Rice i hoolako ae i ke komisina me hookahi kanaka, elua mau lio kau ame hookahi hoki ukana, no ka lawe ana aku i na iʻa no kahi o ka muliwai, o keia mau hana apau ua lawelaweia me ka lilo ole o ke komisina, elike me kana hoike o ka hoihoi ana ae.