Ka Nupepa Kuokoa, Volume LVIII, Number 28, 9 July 1920 — Page 3
| This text was transcribed by: | Mahealani Fronda |
| This work is dedicated to: | Aunty Cheri & Uncle Jack Mandaquit |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, HONOLULU, T.H., POALIMA, IULAI 9, 1920
HAIOLELO A KA ELELE J.K. KALANIANAOLE ILOKO O KA HALE O NA LUNAMAKAAINANA
----------
(Hoomauia mai.)
(O ka eha keia o ka hoopukaia ana malalo o keia poo. O ka ekolu o ka hoopukaia ana e ikeia no ia ma ka aoao ewalu.-L.H.)
----------
Ke nalohia aku nei ka lahui Hawaii. A ina e mau ana ma kulana o keia la e nee nei o keia lahui kilakila ko’u lahui hoi e nalo mau loa aku ana lakou mai na papalina aku o ka honua.
I ka manawa o ka loaa mua loa ana o keia mau paemoku ia Kapena Cooke i ka 1778 na koho aku oia he 400,000 ka helunanui o na kanaka a ua ano leleoi aku paha ia koho ana he 250,000 paha ka helunanui pololei. O ka helukanaka nae a na luna aupuni i hoomaopopo ai iloko o 1832 he 54 makahiki mahope mai ua ikeia he 130,319 kanaka Hawaii koho piha i koa a o ia heluna like no na Hawaii koko hapa.
O keia kanawai e makemakeia nei no ka hoihoi ana aku i na Hawaii maluna o ka lepo o ko lakou mau kupuna i mea e hoomauia ai ke kulana o keia lahui kanaka ua hooi ia ae mamuli o na kaiaulu pookela o ia mau paemoku a e loaa io ana no he hoomauia ana aku o ka nani mau o ia lahui i na hanauna e hoea mai ana.
Ke manao nei au ma keia bila na ulu ae he kulana i kaokoa ae mai na mea maamau mai a malia paha he kuleana ko makou malalo o ke kanawai he oiaio nae he kuleana pilikino ko makou e koi aku e hookaawaleia keia mau aina. Aole makou e noi ana e haawi mai oukou ia mau aina ma ke ano he makana aka ma ke ano he hana kaulike a e kikoo mai i na lima kokua me ka lilo ole ma ka aoao o ke aupuni o Amerika Huipuia i ka lahui e hoao ana e hoopulapula ia lakou iho; he lahui kanaka i aloha i ke aupuni o Amerika Huipuia. He kumuhana keia ina e hookukuia me na kumuhana e aku e pau ana lakou i ka haule me ka nalowale loa no ka mea o ka makou hana mua o ia no ka hoao ana e hoopakele ia makou iho. E lilo no nae ka makou mau hooikaika ana i mea waiwai ole ina aole e hiki ia oukou ke paa aku i ka lima o ka mealuku e hoomake ana i ko makou lahui kanaka. Ke ike nei au i ke koikoi ame ke kaumaha o keia kumuhana i kau iho maluna o ko’u hokua aka he ukana e pono e auamo like ia e kakou mea nana i hana no ka hooko ole ana i keia hana ina kakou e hoi hope ana me ka hooholo koke ole me ka holopono i keia kumuhana no ka pono o na kanaka Hawaii.
O ke poo ekolu o keia bila e hoomaopopo ana ia i na hoololi i ke Kanawai Kumu o Hawaii.
I mea e hiki ai e ukuia na hoolilo i ulu ae no ka noho ana o ka poe kaukanawai i hele mai na apana owaho o na paemoku e lawelawe i ka lakou mau hana ma na kau o ka ahaolelo ua hoomaopopoia ma ka Pauku 301 o keia bila oka uku o na lala o ka ahaolelo e hoonuiia ae mai ka $600 no kela ame keia kau mau a i ka $1000 a mai ka $200 no kela ame keia kau kuikawa a i ka $500. A ma keia hoololi ua hoonui pu ia ae ka uku mile mai ka umi a i ka iwakalua keneka o ka mile hookahi no kela ame keia lala o ka ahaolelo no ka hele ana mai ame ka hoi ana mai ka ahaolelo aku. Ua ukuia keia mailoko ae o na wahona puuku o ke Teritore.
O ka pauku 302 o keia bila e hoomaopopo ana no ia no ka hoololi i ka pauku 55 o ke Kanawai Kumu o Hawaii malaila e makemakeia ana e aeia ake ke Teritore e hoonui ae i kona kuleana hoaie ahiki i ka umi pakeneka o ka helu waiwai o ke Teritore. Ua manao ke Teritore he mea pono e hoonuiia ae keia pakeneka hoaie i mea e hiki ai e hooneeia aku na hana ano nui e kukuluia nei a e manaoia nei e kukulu aku.
Ke makemake nei au e kuhikuhi aku i keia ahaolelo i keia mau mea o ia hoi o ka hapanui o na loaa i kupono no ka uku ana aku i na hoolilo o na aupuni i hala aku ua loaa mai no ia mai na loaa o ka hale dute haleleka ame banako haleleka aka mamuli o ka hoohuiaina ana na pau ka loaa ana mai o keia heluna dala ia manawa he hookahi hapalua o na loaa makahiki o ke Aupuni Hawaii. I mea e hiki ai e pani i keia heluna dala i hooneleia ua komo aku ke Teritore e hoomahuahua ae i na auhau ame ka hoopuka ana i na bona hoaie.
Ua hikiwawe ka ulu ana o Hawaii ma na oihana hooholomua ana a o na mea i makemakeia no ia ulu hikiwawe ana ua oi aku mamua o ka hiki e hoolawaia mamuli o ka auhau wale no a i mea e hoolawa ai i keia mau hoolilo mahuahua ua hookikinaia mai makou e hoopuka i na bona hoaie.
Oiai ke komo pinepine aku nei makou iloko o ka aie ua hooneleia nae makou mailoko ae o ka noonooia ana iloko o na bila lehulehu i hooholoia i mau kanawai maloko olaia e kokua ana ke aupuni federala i na mokuaina he lehulehu. I kumu hoohalike e lawe ae kakou a nana i kanawai alaloa maikai i hooholoia iloko o ka makahiki 1914. Aole pomaikai i haawiia mai no makou maloko o ia bila oiai nae ua hoolilo aku makou a mamuli o ia mea ua koi ia mai makou e kukulu i na alaloa i ano okoa ae mai na mea i maamau a kupono ia makou e hooakea ae a e hana i kahua manonoa loa me ke konokilika.
Pela no hoi na ua hooneleia o Hawaii iloko o ke kau ahaolelo i hala aku mamuli o kekahi mau huaolelo i hookomoia iloko o ka Bila Haleakala ua hoomanaia e hooliloia he heluna dala nui no ke kukulu ana i mau alaloa me ka huipu ana me na mokuaina i mea e hoolawa ai i hana na na koa i hookuuia mai ame na kela ame no koa maluna o na aumokukaua.
E ka Lunahoomalu ame na keonimana o keoa Hale ua hiki ia Amerika ke kuhikuhi aku me ka haaheo ia Hawaii ame kana mau hana iloko o ke kaua honua nui no ka pomaikai o na hoa-kanaka. I ka manawa i kuahauaia ae ai ke kaua e Amerika Huipuia ua piha mua na heluna koa kiai lahui o Hawaii i ka 8000 kanaka. Mamua o ka holo ana o ke kanawai e hookikina ana i na kanaka e komo iloko o na pualikoa ua komo mua aku he lehulehu o ko makou mau keiki opio iloko o na pualikou o na aupuni nui. Mawaho ae o keia poe he heluna nui o lakou i komo iloko o ke kaua no ko lakou aina ma kela aoao o ka moanakai a he elima o keia mau keiki Hawaii i heluia iloko o ka heluua o ka poe mua i haawi i ko lakou ola no ko lakou aina ame ko lakou hae. (Paipai nui ia).
Aka nae ua hooneleia makou mai ke komo pu ana aku iloko o na kanawai e hoopomaikai ana i na kela ame na koa i hookuuia. Ua hiki ia’u ke paku’i pu aku aole wale no o Hawaii i leleoi ake maluna o na heluna koa i makemakeia aka ua leleoi aku maluna o na koi dala ana no na hoaie lahui ana he elima a mawaho ae o ka Mokuaina o Nebraska o ia wale no o na Teritore ame na Mokuaina i leleoi aku maluna o na koi kuai pookela kaua. Mawaho ae o keia ua leleoi aku makou maluna o na koi kuai pooleka kaua. Mawaho ae o keia ua leleoi aku makou maluna o na koi kokua i ke Ke’a Ulaula ame na kokua ana i ka Ahahui Kokua Kaua i Hoohuiia. (Paipai nui loa ia.)
Ke makemake nei au e kuhikuhi pu aku i keia Hale ke manao nei paha kekahi poe lala o ka ahaolelo nui nei he Panalaau e o Hawaii aole wale no i na mea e pili ana i kona kulana oihana aka i kona poe kanaka a e hookomo aku ana iaia ma ka papa like me Porto Rico ame na Mokupuni o Pilipine. He okoa loa mai ia kulana aku e na keonimana ua komo mai o Hawaii malalo o ka malu o keia aupuni aole mamuli o ka lilopio ana malalo oke kaua aka mamuli o kekahi kuikahi hoohuiaina i aponoia a hooloia e keia aupuni ame ke aupuni o Hawaii. Mamuli o ia kuikahi ua hooliloia o Hawaii i Teritore piha no Amerika Nuipuia.
No 53 makahiki mamua aku o ka hoohuiaina ana ua loaa ia Hawaii he Aupuni Kumukanawai a ua ikeia e na mana nui o ke ao nei.
O na lawelawe aupuni ana ia manawa ua like no me ko keia aupuni a o na launa Amerika ana i hui pu ia me ke aloha kuokoa ame kaulike mau iwaena o na Hawaii ka mea nana i hooulu ae i na mea i lilo ai i mau hoololi liilii wale no i kupono ai oia e komo mai i Teritore Amerika. Ua hoomaopopo mai ke Kanawai Kumu o na kanawai o Hawaii e ku-e ole i ke kumukanawai ame na kanawai o Amerika Huipuia ame ke Kanawai Kumu e hoomaiua aku no lakou. Ua loaa mai keia hooholo ana pela mahope o ka noii ana a kekahi Komisina Ahaolelo i hoike mai ua lawa na hooia ana mamuli o na a’oia ana o na mea pili Amerika no na makahiki he 75 i hala ake mamua o ka hoohuiaina ana ua ulu ae he hooponopono aupuni ana i like loa me ko Amerika Huipuia a no ia kumu he mau hoololi liilii wale no ka i manaoia e hooko aku. Iwaena o na kanawai i hoopauia i paa maloko o ko makou mau buke kanawai no kekahi mau makahiki o ke kanawai Haleleka Banako ame ke kanawai Banakalupe eia nae he umi makahiki mahope mai ua hooholo iho la ka ahaolelo nui he mau kanawai i like me ia i loaa ia Hawaii mamua o ka hoohuiaina a i hoonauia o ke komisina. Ke welo nei ka hae Amerika maluna o na halekula i kukuluia malalo o na hooponopono ano Amerika ana no hookahi haneri makahiki a maloko olaila he olelo Beritania wale no ka mea e a’oia ana. Ke welo pu la no hoi maluna o na aha hookolokolo e lawelaweia ana na hana ma ke ano Amerika e hoomaluia ana e nalunakanawai a e lawelawe ana hoi ua loio i a’oia maloko o na kula kanawai o Amerika. Aole makou i Amerika wale no ma ka makou mau hana ame na a’o ana aka pela pu no iloko o ka hooulu ana o na hana akeakamai pili i na hana mahi; ke kukulu ana i na oihana holomoku a maluna ae o keia na auhau koikoi e ukuia nei iloko o ka waihona puuku lahui.
Ua pii mahuahua ae ko makou oihana kalepa me ka makou mau hana oihana. No ka makahiki 1919 ua hiki aku ko makou mau waiwai i hoopukaia mai i ka $88,000,000 a o na waiwai komo mai i ka $55,000,000. Ua ulu pu ae ko makou tona moku mai ka 1,800,000 tona iloko o 1902 a i ka 5,000,000 tona iloko o 1914.
Mai ka manawa mai o ka hoohuiana ua haawi mai o Hawaii i kela ame keia makahiki i ka heluna o $3,000,000 iloko o ka waihona puuku lahui mai na loaa auhau kuloko mai hale dute ame ka haleleka mai. Ua hiki ia’u e paku’i aku i keia i ka makahiki i pau i Iuna 30, 1919 ua uku mai ke Teritore o Hawaii he $19,000,000 iloko o ka waihona puuku a o ia ka helu 34 iwaena o na moku aine ame na Teritore e helu pu ana i ke Apana o Columbia nei no na loaa kuloko ame na auhau e ae. E hoomanao iho oukou e na keonimana e keia heluna maluna ae ia o na hoolilo apau o ke aupuni federala e uku nei. Ua hauoli makou i ka haawi ana mai i ko makou auhau no na hoolilo o ke aupuni federala elike me na mokuaina e ae aka e ku-e ikaika loa ana makou no ko makou hooneleia ame ka huipu ole ia iloko o na kanawai e kokua ana ke aupuni federala i ka mokuaina like ole ame na kanawai e hoohemahema nei makou ia makou iho a e hookauwa mau aku ana no no ke kukulu ana ame ka malama ana i ko makou mau alanui oiai nae e hoohana mau ia ana lakou e ka oihana koa. Ua loaa no ko makou kanawai no na limahana poio ke kanawai aohana ame ke kanawai hoaie i ka poe mahiai. Mawaho ae o keia ua hoolilo aku a oi maluna o ka miliona dala i kela ame keia makahiki no ka hoonaauao ana i ka poe o ko na aina e. I ka hooholo ana i keia mau kanawai aole makou i manao e kokuaia mai e ke aupuni federala no ka hooko ana ia mau kanawai aka ina ke aupuni e makemake ana e kokua i na mokuaina me na kanawai o keia ano alaila heaha la ke kumu i hooneleia ai o Hawaii mai na pomaikai mai o ia ano. (Paipaiia.)
Aole makou e noi ana i kekahi mau pomaikai kaokoa aka e ku-e ana makou i ka auhania o ko makou mau makaainana na ka pomaikai o na makaainana o na mokuaina e aku. O ka makou wale no e noi nei ka Pakipika imua o kakou ma na hana pili lahui. E pono o Hawaii e hanaia e maalahi kona alahele mai ka aina paa aku nei. E pono e hoohana hou ia ko makou mau awa kumoku a o ka makou mau hanahou e hooko ia. Ina e aeia ana keia hoonui ana ae i ke ana kiekie o ka palena o ko makou hoaie ana a hookoia na hana hou alaila e lilo io no o Hawaii aole wale no ma ka inoa aka me ka oiaio ke Alaloa Kea ame ka Paradaiso o ka Pakipika.
Mr. J.K. Mokumaia keia me na malihini Maori i pa’ikiia mamua ho o ke kii o Kamehameha oia o Mr. ame Mrs. Clark o Nu Kilani. O ka wahine he kaukaualii hope loa ioa a i huli mai i na hana pono ma ka hooikaika ana a na misionari o na L Hope Nei.
(…..PICTURE…..)
HE 30 MAU MA’I E HOOKUU IA MAI ANA.
----------
He kanakolu mau ma’i o ka halena ‘i o Kalihi i hooiaia ae ko lakou maikai no ka hookuuia ana aku o lako ue ka Papa Ola Teritore. Ua loaa ae keia hooia ana i ka papa mamuli o ka nana ana a na kauka o ka halema’i o Kalihi ka papa o ka poe na lako ua nana i na ma’i ma ka auwina la Poalua nei a ma ka halawai kuikawa a ka papa o ka noho ana ma ka Poaha nei i hooholoia ai ka hookuu na ia mau ma’i.
O kela mau ma’i e hookuuia mai ana he hoike hooiaio mai lakou no ka holopono o ka lapaauia ana me ka ai’a Chaulmoogra elike me ka hoakaka a na lunanui o ka papa ole o ka hoike ana ae ka poe na lakou i hooia ae ke kupono o ka hookuu ana mai i kela heluna o ka poe ma’i. A oiai aole lakou i makaukau e hooiaio loa ae no ke ola loa o ka ma’i hookaawale ohana i keia aila eia nae ua loaa ia lakou ka manao aole e hala ana kekahi manawa mamao loa ma nei hope aku e hooiaio loa ia ana ke ola o keia ano ma’i i kulike me ka makemake o ka poe na lakou e hooikaika mai nei e loaa ke ola i keia laau.
O ka aila Chaulmoogra i hoohanaia ai i na ma’i a hookaika mau ka peresidena o ke Kula Kiekie o Hawaii A. L. Dean e loaa ka mea oi ae o ke ola ma o ka imi ame ka hoololi mau ana a pela me ke Kauka J.T. McDonald na kauka na laua e hoao mau mai nei e oi aku ka holomua ma na ano apau o ka hoao ana i ka laau. O ka laau i haawila i na ma’i i nei manawa ua ieia kana hana maluna o na ma’i ma o ka loli hikiwawe ana ae o ko lakou maikai he pomaikai nui keia ina e loaa o ana ka laau e hoolaai ai keia ano ma’i ma nei mua aku. Ua manaoia ma ka halawai kuikawa a ka papa i noho ai ma ka la i nehinei e hooholo ana ka papa e hookuu malalo o ka hoomalu ana i na ma’i he 30 e hookuuia mai ana na ma’i e hoi aku no ko lakou mau home me ko lakou nana mau ia e na kauka no hookahi makahiki a oi aku paha.
NA LEKA KII OLE IA MAI AHIKI I IULAI 3, 1920.
----------
Aana, Mrs. Hattie Kalili, Lizzie
Apuna, Mrs Ellen Kapukui, Claude
Alani, Edw. K Keliikoa, Bany
Iopa, Mrs. Kekino,D
Hoino, Mrs K Kekahuna, K
Haluapo, A Ke, Jos.
Haili J P Manuwa, Henry
Kaimana, Jos. Manu, Chas
Kualiiki, Rebecca Naipo, A K
Kahulanui, Mrs E Waiwaiole, D
Kalauawa, Mrs D Waipa, Jno.
HOI HOU NA KEPANI OLOHANI I NA MAHIKO.
-----------
Ma ka Poakolu nei i maopopo loa ai ka hoi hou ana aku o na limahana Kepani olohani mua i na mahiko ma o ka hoi ana aku he 200 o lakou i ka mahiko o Ewa a he 24 i ka mahiko o Waimanalo me ko lakou mau ohana apau. O keia na ohana i noi aku i na mahiko i mau hale no lakou e noho ai a i maopopo loa ko lakou noho hou aku ma na mahiko.
HOOLAHA KUIKAWA.
----------
He KEKAKE i hoopaaia ma ka pa aupuni o Kaimuki e kuaiia aku ana ma ke kudala akea Iulai 15 ma ke awakea ke ole e kiiia mai e kona ona. 6408
KA OIAIO KEIA.
----------
E Mr. Lunahooponopono o ka Nupepa Kuokoa ame na keiki oniu huakepau aloha pumehana pu kakou: - E oluolu mai ko oukou ahonui e lawe aku i keia mau manao e kau ae la maluna no ka hoike ana i ka mea oiaio.
Oiai ma ka pepa o Iune 25, 1920 ma ka aoao 3, kolamu 4, a ma kekahi o na pauku pewahi’u o ke poomanao “Ko Kahuku Lawe Kulana,” ma kahi e olelo ana ke hoopuehuia nei na hoahanau o Laie i ka makani pau na lo’i i ka laweia. O ke ola iho la no ia ke holo nei i Lualualei i wahi aina hookuonoono o Mr. J. Mahiai e hoi aku ana me kona ohana. Ua hewa o Umiamaka i ka pihapiha o ka i’a a pela pu me ko J.A. Kahiona ohana aohe kalo e ola ai ka noho ana a pela aku.
O ka manao o keia ua hoopuehuia na hoahanau a holo i Lualualei i ka aina hookuonoono no ka laweia ana o na lo’i kalo a aohe kalo e ola ai; aole pela ka pololei.
Ua hookuku mua kekahi mau hoahanau no ka aina hookuonoono he mau makahiki ae nei i hala aia i Hamakua kekahi poe i Hilo ae kekahi i Oahu nei no hoi kekahi me Lualualei. Ua hele mua keia poe mamua o ka hoopuka ana o ke Konohiki S.E. Woolley i kona lawe i na wahi kanu kalo ma ka aoao mauka o ka alahao e holo nei i Kahana no ke kanu ko ana a hoihoi i na hoahanau ma ka aoao makai mauka iho o ke alanui aupuni hou.
Nolaila aole pilikia i hanaia me ka nahenahe wale no ia la no J. Mahiai i oleloia ua loaa kona lo’i kalo ma kela wahi hou a’u e hoike ae la.
Nolaila aole he pololei o ka mea e oelo mai ana no ka pau o ka lo’i kalo i ka laweia ke kumu e holo nei i ka aina hookuonoono a ma kekahi mamala manao no i hoopukaia e J.A. Kahiona o ia hoi ke ku nei oia kana mau keiki na moopuna aohe kalo e ola ai ka noho ana.
Owau kekahi mea mahiai kokoke loa iaia he kuauna wale no ka mea nana i pale ka makou mau lo’i malaila o na kalo ana i kanu ai aia no iloko o ka lo’i e ku la aole i lawe ke konohiki ia mau mea e ai a pau alaila pili aku ka aina i ke konohiki peia ko’u manao oiai owau no kekahi mea lo’i malaila e ai ana a pau ke kalo alaila pau ko’u kuleana ma ia wahi a pela pu no i ka lo’i a na mea apau malaila.
Nolaila e J. A. Kahiona e kii no e e uhuki i kau kalo apau aia no ke malama maikai mai la na honohono ai waena lo’i a kakou a ua oo pu no hoi na hua laiki hiki no ke lawe ia mau mea apau aole huhu ke konohiki no ka mea na kakou no i hooulu ia mau mea maluna o ka aina a no ke noi ana i ka lo’i ehia noi ana e loaa mai ai?
Hoomau aku no i ke noi ana o ia hoi ka olelo a ke Akua ma ka Baibala. E pule hooki ole. Nolaila e noi hooki ole. Mai paupauaho koke oiai ke noi mau nei kakou i ko kakou Makua maka lano a o keia hoi ko kakou mai makua i hoonohoia mai e hooponopono ia kakou ma keia honua ma ke kina a ma ka uhane malalo o ke a’o ana o ka Euanelio ka Ekalesia o Iesu Kristo i ka poe hoano o na la hope nei.
Aole keia he hoopilipili uwapo o ka oiaio maoli keia o na mea a’u i ike ai no ka mea:
Ua noho no a kupa i ko alo,
A kamaaina i ka leo;
Ka hiona a ka manao la ilaila,
Ianei ka waihona a ke aloha
Nolaila ea o Laie no ke Kanaana hou ma ka Paredaiso o Hawaii. Hoopau na manao nohohua no ka mea he pali nihinihi aku ia he kuhoho olalo. Eia no ka leo aloha o ka Makua ke hea mai nei ma kona mau kauwa la. He mai hoi mai hoi i ka poli o ka Makua o ka lokahi.
Me ka mahalo i ka Lunahooponoponopono a i na keiki ulelehua kepau o ka Hiwahiwa a ka lahui.
Kou a mau,
EVA B. MAKUAKANE.
PAA HOU O JOS. MINER I KA HOPUIA NO KA AIHUE.
----------
Ma ka Poalima aku nei o ka pule i hala na hoiheia ae la i ke keena o ka Makaikiu McDuffie ua aihueia kekahi mau Bona Kuokoa mailoko aku o ke keena o ka Loio Kuhina Harry Irwin no lakou ka waiwaii’o o $750 a maloko o na horaelima ma ia hope iho ua paa ae la o Jos. Miner he paahao mua a he $200 ka waiwaiio o na bona i loaa aku maluna ona a o ke koena aku ua kuaiia.
I Maui ka Loio Kuhina Irwin a i ka hoi ana mai ma kekahi manawa koke aku nei i hala i huli kahu hou a hoike koke ia ae ia nalowale ana i ke keena o ka oihana makaikiu. He kanaka hana o Jos. Miner no ke Kapitola ma ka manawa a ka Loio Kuhina i holo aku ai no Maui a he ekolu la mahope mai o ka hala ana aku o ka loio kuhina ua hookuuia mai o Miner mai ka halepaahao mai malalo o ka hoomalu ana.
Ma ka Poalima ka hoikeia ana ae i ka Makaikiu McDuffie no ka aihueia ana o na bona a ma ia po iho i loaa aku ai o Miner ma kuaaina ua paa oia i ka hopuia a ma ka huliia ana aku o kona kino elua mau bona o $100 i loaa aku o ke koena aku o na bona ua kuaiia.
HOOKOMO I KAU HOAHU DALA
ma kahi o ka hana hoopukapuka o 30 makahiki i hooiaoia ai ka hoohua mai i ka hua maikai-
He Ukupanee Kupono me na Waiwai Hoopaa Maluhia
Ua hoomaka makou i ko makou makahiki 31 me ka hana o ka makou papa hoike 83.
E KII KOKE AE I KAU BUKE PAALIMA.
Pioneer Building & Loan Association
Rumi 1, Kuea Campbell, Alanui Papu me Kalepa.
Ka Hui Halakahiki Hawaii
-----
KO MAKOU HALEAINA.
He nui ko makou haleaina hou me ka oluolu a he maemae na mea apau e hoopuni ana iaia. Ke hauoli nei makou e hoikeike aku imua o ka poe makaikai apau e kipa mai ana.
He kupono maemae a maikai na meaai e hanaia ana maloko o ko makou haleaina. E kani ana na pila i kou wa e ai ana.
He oluolu loa ka makou kaki no ka ai ana-5 a i ke 30 keneka. Aole he puka e loaa ana i ka Hui mai keia mau kaki mai. He haawi wale ia ka aina ahiahi ke hoohanaia ko makou mau limahana mawaho aku o ka mana maamau.
Ua manaoio makou i na mea elua o ia ka hana kaulike ame ka meaai maikai.
HAWAIIIAN PINEAPPLE COMPANY.
Ma o JAMES D. DOLE
Peresidena.
( O keia ka umi-kumamaono o ka papa o na hoolaha. )
PIONEER BUILDING & LOAN ASSOCIATION.
-----
Rumi 1. Kuea Campbell
Alanui Papu me Kalepa.
E malamaia aha ka Halawai Kumau o ka Poa Paa Mahele ma ke keena o ka Ahahui Poakahi Iulai 12, 1920 ma ka hora 7:30 P.M., no ke koho ana eha hoa o ka Papa Hooko ame kekahi mau hana e ae e waihoia mai ana. Ua makemakeia oe e hiki kino mai.
THEO F. LANSING.
Kakauolelo.
6408-Iulai 9.
KAHEA HALAWAI.
-----
E noho ana ka halawai makahiki o ka “Hui Kuai Aina o Peahi,” i ka la 31 o Iulai, 1920; ma ka Halepule Moremona ma Peahi Hamakualoa, Maui, hora 10 a.m.
Nolaila ua makemake na lala apau o ka Hui e akoakoa ae ma ia la ma ke kauoha o ka Peresidena o ha Hui no ka hooponopono ana i na mea e pili ana i ka Hui ame na hoike a na Lunanui o ka Hui.
J.K. SMYTHE.
Peresidena:
FRED WILHELM.
Kakauolelo
6408-Iulai 9, 16, 23, 30.
(…PICTURE…)
E hauoli ana oe ke nana i ka pa ani kinipopo ka paani oihana a paani hoolaule’a paha ke maikai kou kahikoia ana. Eia mai na paalole e kahiko ai oe ma ke kai la hou loa me ka oluolu o ke ka mukuai.
NA PAALOLE MA KA $15 A $65.
The Model Clothiers
1139-ALANUI PAPU-1141
“Ka Halekuai Hoemi Hoolilo”
Ka Hui Halakahiki Hawaii
-----
NA ULIA ME NA POINO.
Ua haawiia na makaalo loa ana no ka palekana o ko makou mau limahana mai na poino mai o ke kino maloko o ko makou halehana ma o kekahi mau mea hoopakele i hanaia ma na mikini apau. Ua hoao makou e imi i na alahele apau e paleia ae ai ka poino ma keia ano.
He kakaikahi loa na ulia kukonukonu i ikeia ma ko makou halehana ke manaolana nei nae makou aole he mau ulia e loaa ana ma keia mua aku.
Me kekahi keena haawi laau i lako pono a Keena Kokua Mua malalo o kekahi mea malama ma’i makaukau ua hiki ia makou ke malama akahele loa i kekahi mea e loaa ana i ka eha ma he ano ulia maloko o ka halehana. I ka manawa e noho ai o kekahi limahana mamuli mai o ka ulia e malama loa ana makou iaia a oi aku mamua o ka ke kanawai i kauoha mai ai.
HAWAIIIAN PINEAPPLE COMPANY.
Ma o JAMES D. DOLE
Peresidena.
( O keia ka umi-kumamahiku o ka papa o na hoolaha. )
NA UMEKE KOA NO NA MEAKANU OLOKO.
E lako na home apau me kekahi o keia mau Ipupua nani. Ua hanaia lakou $8.00
mai na KOA nani oni’oni’o mai, me ka maiau maoli o ka hanaia ana $9.00
Ua hoohinuhinu maiauia a he u’i ke nana aku me ke apo keleawe kinohinohi me ka iho i
uhiia me ka piula. $10.50
Na helu 8”, 9” 10 ½ ” ame 12”. $12.00
W.W. Dimond & Co. LTD.
“THE HOUSE OF HOUSEWARES”
53-65 KING STREET. HONOLULU