Ka Nupepa Kuokoa, Volume LVIII, Number 27, 2 Iulai 1920 — MAKE MA'UWALE IA OPIO HAWAII MA KE ANO ULIA. [ARTICLE]

MAKE MA'UWALE IA OPIO HAWAII MA KE ANO ULIA.

I kulike me kekahi lono i hoikeia, mai i hiki ke hilinaiia aku he oiaio, ua make kekahi o na keiki a Kahalewai Ke, o Kapahulu, ma kekahi mau la i hala mamuli o kekahi ulia, a maloko o ka Halema'i Moiwahine i haalele mai ai kona aho hope loa iaia. Elike me ka moolelo i hoikeia mai ma kekahi la ka o ka pule aku nei i hala, e hapai ana kela opio i kekahi pahu nona na paona kaumaha ma kahi o ka aneane i ke kanawalu, a mamuli o kekahi ano ua hooku'i aku la kona wawae i kekahi pauku hao e waiho ana ma kahi ana e hele aku ana me kona ike ole iho, ua hina aku la oia imua me ka pahu kaumaha ana e hapai ana, a ma kela wahi ka ana i hina aku ai he hao winiwini ke ku ana; ua ku ae la oia malalo pono o kahi kokoke i ka opea a komo pu ka hao iloko. Ma kela eha ana ka ona aole oia i hoike ae no ia pilikia i loaa iaia, ua hele aku la ka oia noloko o ka hale lua liilii a malaila kahi i wili ai i ka eha, a ua ma-u wale ia noho ana ma ia hope mai, i ka hele ana aku o kekahi o na kanaka o ka hale hana hao e waiho mai ana oia iloko a e wili ana i ka eha, Ua hoihoi koke ia aku oia no ka Halema'i Moiwahine, a no elua wale no ka la kona waiho ana malaila, ua haalele mai la oia i keia ola ana. He limahana oia no ka Honolulu Iron Works no kekahi manawa i hala aku, a ma ka oleloia ua nui kona minaminaia e kona mau hoahanau o ia halehana, mamuli o ka eleu ame ka hoolohe, eia nae, i ka la o ka make lilo ia mau ano maikai apau ona i mea ole. Ma ka oleloia he wahine ka ka keia opio me kekahi bebe e kauka'i mai ana i ko laua ola o ka noho ana maluna ona, eia nae, lawe aku la hoi ka make. E hahai mau ana ka make mahope o kela ame keia mea i na manawa apau.