Ka Nupepa Kuokoa, Volume LVIII, Number 27, 2 July 1920 — Page 7

Ka Nupepa Kuokoa

KE KILOHANA POOKELA NO KA LAHUI HAWAII.

 

Nuepa Kuokoa, Honolulu, T. H., Poalima, Iulai 2, 1920

 

He Moolelo no

MATE WILEMOTA

-------------

He Kaikamahine no Kekahi Halehana i Loaa

na Pomaikai

------------

 

1ST COLUMN:

            Elike ma ia i hoakaka mua ia ae nei ua paa ko laua mau lima ame na wawae i ka nakiikiiia me ke kaula a ua hukiia no hoi a paa loa, aole no e nele ana kou ike iho, e ka maka-maka heluhelu, he kulana kupilikii maoli ko laua ia mana-wa, aole e nele ana ka maeele o ko laua mau lima ame na wawae pu, e ake iho ai no kekahi mea i hoopaaia e hemo ae. Hookahi nae mea o laua i laki loa ai, aole i hoopihaia ko laua mau waha me ka welu, nolaila ua hiki ia laua ke kamailio mawaena iho o laua elike me ko laua makemake.

            Hakalia no a paniia aku ke panipuka nui o ka halelua, a meha mai la no hoi ka loheia ana aku o ka halulu o na ka-puai wawae o na kanaka, alaila olelo ae la o Hale ia Joe :

            "E Joe, pehea iho la kou manao no keia paa ana iho la o kaua?"

            "Heaha auanei ko'u manao, o keia wale no ka'u e olelo ae, ua paa iho la kaua i ka umii e hiki ole ai ia kaua ke hemo aku."

            "Pela no i ka nana iho, aka, he mea pono e hemo kaua mai keia wahi aku, a e hemo io aku kaua e pono ai iloko o kekahi manawa o keia po."

            "Ha, ha!" i akaaka mai ai o Joe. "Hemo mai keia wahi aku? He wahi olelo hoolana manao wale no ia ; ae, o ka ninau@ pehea kaua e hemo aku ai? He hana hiki ole loa ia ia kaua ke hana me keia paa no o kaua au no e ike iho la, a in a no ko kaua hemo i'o mai keia wahi aku, aole na kaua ia i hana, aka, mai kekahi mana lani mai."

            "O, e Joe, hoolana i kou manao. Aia ma kela ame kei@@ wahi he nui a lehulehu na kanaka okipuu, me ka nana ole maloko paha ia o na aina hihiu o ke Komohana, a i ole, maloko paha o kekahi kulanakauhale i piha i no kanaka. Aole pono ia kaua ke hoopau manawa wale maanei me ka noonoo ole i kekahi hana e hemo aku ai kaua ; e kaawaie aku kaua mai keia wahi aku e pono ai, o ka hana e hemo aku ai kaua oia ka kaua e noonoo ae ai i nei manawa."

            "He hana maalahi wale no ia o ka olelo ae e hemo mai keia wahi aku, aka o ka hana ana nae e hemo i'o aku ai, pehea? Ua paa loa ko'u mau wawae ame na lima i ka nakiikiiia e hiki ole ai ia'u ke oni ae a pela no me oe, a pe-hea iho la kaua la e hemo ai, elike me kau e olelo mai nei e kaawale aku kaua mai nei aku e pono ai."

            "Hoao ae no hoi oe e hoonioni i kou mau lima, maila o ko-o ae no hoi ke kaula."

            "Ha, o ka'u no hoi ia o ka hoao ana iho nei a aneane e mokumoku ka i'o o kuu mau lima he ole nae ke ko-o ae, a in a ua hiki ole i ka manawa mua pehea oe i mana ai e hiki ana ke hoao hou?"

            No kekahi mau minuke ka hamau ana iho o na opio, a iloko o ia manawa ke hoao la kela ame keia e hoonioni ae i ko laua mau lima he ole nae ke ko-o ae o ke kaula. He hana hua ole ia a laua o ka hoao ana iho, a i ka manawa hope ua hoopau wale laua, a oka maeele wale no o na lima o laua ka laua mau mea i ike iho la.

            "Aohe manaolana i koe no kaua," i pane mai ai o Joe, me ke kani ana iho o ka leo uhu a ka mea i piha Joa i ke kaumaha.

            "O, hoopau koke oe i kou namunamu ana me ka waiwai ole. Mai olelo oe i ka make ahiki i kou make i'o ana a pau hoi ka hanu ola iloko ou, elike me ka ka Makaikiu Tavara @ ka olelo ana mai ia'u," wahi a Hale o ka pane ana aku.

            "O, aohe hewa o ke kamailio ana," wahi a Joe, aka nae, i ha'i aku au'ia oe ke ike nei au i ko'u ma'i maoli iho la no keia hoopaaia ana."

            "O, hoopau koke oe i kou kaniuhu ana," wahi a Hale, "in a e kamailio mai ana oe i hookahi huaolelo i koe e hoe-haia aku ana oe e a'u ke hemo aku kaua mai keia wahi aku."

            "Uhu, e hemo i'o ana ia ou, o kou wahi iho no paha kena e waiho ai a pepehi hoomainoinoia mai ma ka la apopo," i keukeu mai ai o Joe.

            I ka hala ana o kekahi mau minuke o ko laua mumule ana o Hale o laua ka mea mua o ke kamailio ana ae:  "E Joe, pehea kou mau niho, he oi no nae paha?"

            "Ae, a he oolea no hoi elike me ka iwi o ke kukui, ai ke aha la?"

            "O, kanaka opio poo hakahaka maoli oe! Ina he oi kou mau niho me ka paakiki, aole anei ou manao iho oia ka pahi e hiki ai ke okioki i ke kaula i hoopaaia ai kuu mau lima? Ke maopopo mai la anei ko'u manao ia oe i nei manawa?"

            "Ae, ke maopopo aku la ia'u kou manao a ke koho nei no au e hiki pu ana no ia'u ke akiaki aku'i ke kaula o kou mau lima ahiki i ka moku ana."

            "O, maikai kela! Ina hoi ha pela e hoomaka mai oe e hana koke i nei manawa me ka hoohakalia hou ole aku."

            Akahi no a loaa ae la ia Joe ne manaolana no ko laua palekana, nolaila, me kona hoohakalia hou ole aku."

            Akahi no a loaa ae la ia Joe he manaolana no ko laua palekana, nolaila, me kona hoohakalia hou ole iho, o kona kakaa mai la no ia no kahi o Hale e moe ana, a i kona koko-ke ana mai ia Hale haawi aku la o Hale i kona mau lima i hiki ai ia Joe ke akiaki mai i ke kaula i hoopaaia ai na lima o kona hoahanau.

            Ua hala okoa kekahi manawa loihi ia Joe o ia akiaki ana mai ahiki i ka moku ana o kekahi mau maawe o ke kaula. a mamuli o ko Hale hooikaika pu ana ae i moku ae ai ke kaula i nakiikiiia ai kona lima a hemo ae la, ua hele nae'a uli pu no ka loihi loa o ka paa ana.

            I keia hemo ana ae la o ko Hale lima he hana maalahi loa nana ka wehewehe ana ae i na kaula i nakiikiiia ai kona wawae, a i kona hemo loa ana ae, alaila hoomaka aku la oia e wehewehe i na kaula i hoopaaia ai na lima o Joe, a pela hoi me kona mau wawae.

            I ka hemo ana ae la o na lima ame na wawae o na kanaka opio, hookahi a laua hana nui ia manawa o ka lomilomi i na, lima ame na wawae o laua i hele a maeele, aka nae, oiai ua hemo ae la, aohe o laua nana nui iho la no ia eha, o ka laua mea wale no e noonoo ana oia ko laua hemo aku iwaho mailoko aku o ia halelua me ka palekana.

            "E Hale, ua hemo ae la na lima ame na wawae o kaua, a pehea ana kaua e hemo aku ai iwaho mailoko aku o keia halelua lepo polopolona?"

            "Mai hoopihoihoi mau oe i kou noonoo, noho malie iho. aia a loaa ae ia'u ka noonoo maikai no ko kaua alahele e puka ai hoike aku au ia oe."

            Ua maopopo ia Hale kahi o ka puka, nolaila hele malie aku la oia no ia wahi. O ke kumu 'o keia loaa ana o ka ike iaia mamuli o kela oili ana aku o Dupona ma me ka ipu- kukui, a eia nae, ma kela manawa a Dupona ma i oili aku ai aole oia i lohe aku i ke kani o ka laka o ka puka.

            Noonoo iho la nae oia malia paha mamuli o ka laua lohe ole ana aku ke kumu o kona manao ana aole i lakaia mai ka puka.

            O ke kumu wale no nana i hoohakalia iaia mai ka hoao ana aku e hana no ko laua palekana oia no kona makau no Dupuna me Gomeza, malia, aia no laua iloko o ka hale, a ia lana paha e hoao aku ai e wehe i ka puka, a loheia mai ka nakeke, a oiai ua laweia aku ka laua mau pu mai la laua

 

2ND COLUMN:

            aku, e paa hou ana laua i ka hopuia, a o ko laua hana ana aku paha ia make, no ka mea aohe mea hiki ia laua ke ku-e aku, ua nele laua i ka mea hiki ke hoopakele ia laua iho ia manawa.

            Me ke akahele loa oia o ka nihi hele ana aku a hoea i kahi o ka puka o ka halelua, a hoopili aku la i kona pepeiao, i ka hakahaka o ka puka. Aohe on a lohe aku i ka hamumu a i ole nakeke mai hoi, nolaila kahea malie mai Ia oia ia Joe e hele aku, a he manawa pokole pili aku la o Joe ma kona aoao.

            "E hamau loa oe," i hawanawana mai ai o Hale.

            "Heaha ia?" wahi a Hale o ka ninau ana aku.

            Me ka akahele loa ame ka nakeke ole hoi hoao aku la o Hale e wehe mai i ka puka a hemo i'o mai la, a wehe malie ae la oia a hamama no kekahi mau iniha.

            Ia hemo ana ae ua komo mai la ka ea hu'ihu'i maiwaho mai a pa mai la ma ko laua mau maka, aohe nae o laua lohe akue i kekahi halulu a nakeke mai hoi, a oki loa aku hoi ka leo kanaka a i ole kekahi malamalama. He haawina laki loa no laua wahi a laua o ka noonoo ana iho.

            No ko laua manao aohe mea e ike a i ole e lohe mai ana ia laua, o ko laua komo kunihi aku la no ia ma kahi hama-ma o ka puka ahiki i ko laua komo ana aku i kekahi rumi okoa. Ja laua malaila ku iki hou iho la laua e hoolonolono i maopopo ia laua aohe laua e ikeia mai ana, ua meha wale no mai o a o o ka hale.

            Aneane e kani ka hora elua o ka wanaao i keia manawa. noonoo iho la laua ua kaia loa ia ka hakuhale ame kana wahine e ka hiamoe kulipolipo e lohe ole mai ai ia laua, a no Dupona hoi ame Gomeza ua hoi aku laua no ke kulana-kauhale me ka manao aole laua e hemo ana ahiki i ko laua hoea hou ana mai i ke kakahiaka ae.

            Oiai laua e ku ana malaila hoolohe, nanao iho la o Hale iloko o kona pakeke a lawe ae la i kekahi laau kukaepele ana o ka waiho ana malaila, a i poina hoi iaia ka hoolei ana aku.

            I ka loaa ana, i wale iho la no oia i ka laki, a o kona koe ae la no ia a hiki i ka a ana, a hoomalamalama aku la ma o a maanei o ka rumi, kinai hou iho la, a uhi hou iho la ka pouli maloko o ua rumi la.

            Aia laua ma kekahi holo ololi e oili aku ai, ana e hooma-nao la, ahiki i ka rumi mamua loa o ka papahele maluna o ka lepo.

            Mai kahi a laua e ku ana ahiki i kahi o ka puka he umi kapuai, a me na kaina wawae mama i hookokoke aku ai ia i ua puka la, a i ka hiki ana aku i ka puka, lalau aku la o Hale i ka laka a hapai ae la, me ke pale ana ae ma kekahi aoao. Aohe hemo mai o ka puka ia hoao ana aku ana e hemo, no ka mea, ua paa mai i ka lakaia.

            Ua lilo keia i mea hookaumaha ja laua, a he mea hoohoka mai hoi i ko laua hemo ana aku iwaho me ka maalahi. Ia manawa aole mea maloko o ko laua mau pakeke e hiki ai ke mahiki aku i ka laka maloko nei aku.

            "Heaha ana ka kaua mea e hana aku ai i nei manawa?" i ninau ae ai o Hale ia Joe me ka hawanawana.

            "Heaha auanei, e hemo kaua mailoko aku o keia rumi, oia wale no, in a e hiki ana." O ka rumi mamua aku o laua e huli aku ana kona alo i ke alanui. Aohe laka i hoopaaia ai, ia puka, ua hoopaaia mai nae me kekahi kua laau.

            "Hiki ia kaua ke wawahi i keia puka ahiki i kona hemo ana a i ole nahaha ana, o ko laua hele aku la no ia a ma kahi o ke kua laau i hoopaa ia ai hapai ae la i ke kua laau, a wehe mai la i ka puka, a oili aku la iwaho me ko laua alai ole ia mai e kekahi mea. Pehea iho la keia no kekahi hana a ka noonoo i hoohanaia iho la?" i ninau ae ai o Hale i ka hoahanau, i ka manawa a laua i oili loa aku ai a ku ana iwaho.

            "O, heaha auanei, he hana holopono no hoi paha, no ka mea ua puka lanakila mai la kaua iwaho nei."

            No ka ikaika loa paha o kela kula'i ana aku a laua i ke panipuka a hiki i ka haki ana o ke ami a hamama ka puka, laua, a ke hoomaopopo la laua ia manawa ua ala ka haku-hale, a nona ia halulu a laua e lohe aku ana.

            Hakalia no a oili laua iwaho o ka wehe aku la no ia o ka ee o ua mau opio maauhele la o ka po, elike me ka mama hiki i ko laua mau wawae ke lawe aku ia laua, pela laua i holo aku ai a mamao loa mai ka hale aku no kahi a kahii kahukaa o laua e kakali mai ana o ko laua hoi aku.

            Ia laua e holo aku ana no kahi o ke kaalio ke ulu mau la ka hopohopo iloko o Hale mamuli o ka loihi loa o ko laua hele ana ua kakali  mai paha kahi kalaiwa kaa, a no ko laua loihi loa ua hoi aku oia no ke kulanakauhale, a ua haaleleia laua.

            Eia nae aole pela, aohe kahua o kona makau ana, aka he laki, oia kana i olelo ai mahope iho.

            Ua loaa aku no kahi kalaiwa kaalio ia laua e kakali mai ana no ia laua, eia nae, ua kaia loa ia oia i ka hiamoe me ia kau no iluna o ke kaa a e noke ana no hoi no lio ana i ka hamu i ka mauu ma kahi a na lio e ku aua.

            I ka hoea ana aku a laua ua hoalaia aku la kahi kalaiwa hiamoe, a ia laua no a kau iluna o ke kaalio o ka hoohuliia ae la no ia o na lio a i ka hiki ana i ke alanui nui e holo ana no ke kulanakauhale o ko lakou hoi aku la no ia, a mamua iki iho o ka hora eha o ia wanaao i hoohiki aku ai laua i ka hale ; ia lele ana iho o laua alaila uku mai la o Hale i kahi kalaiwa me kekahi uku nui a hookuu mai la iaia e hoi no kona hale, a me ka hauoli, ua wahi kalaiwa la i haawi aku ai i ka mahalo ia Hale.

            Ia komo ana aku a Hale ma noloko o ka hale hele pololei loa aku la laua noloko o ka rumi waiho buke. Ma kela hoi ana mai a lakou ma ke alanui aole wahi huaolelo i hoopukaia mawaena iho o lakou. No Hale ma ua piha loa laua i ka hauoli no ka laua pakele ana mai kela hale mai, a mai ka make mai hoi i maopopo loa no laua ma kekahi kakahi-aka ae.

            Ia laua i haule iho ai e noho maluna o na noho i mai la o Joe :

            "Ea, e Hale, ua hele ko'u mau wawae a maeele, he eha wale no ko'u mau lima ame na wawae, ke ike nei au i ko'u nawali ame ka maeele mai o ko'u kino holookoa. A pehea oe?"

            "Ua like kaua a like. I eha loa nae hoi au mamuli o kela haule ana mai kela pali mai a kau pono iluna ou', a hui pu iho hoi me kela hoopaa ia ana o na wawae ame na lima o kaua maloko o kela halelua, aiwa loa aku ka eha. Ina he laau hamo kau e oluolu oe e kii aku a hamo ae i na lima ame na wawae o kaua," wahi a Hale o ka i ana aku.

 

MOKUNA XV.

 

Ka leka i Haule.

 

            Ua awakea loa o kekahi la ae ma ka manawa a Joe i hoea aku ai no kona keenahana kahi o kana hana. Iaia maloko o kona keenahana ke ike la no oia i ka mau o ka hui o kona mau lima ame na wawae mamuli o ka poino, i loa@ iaia i ka po mamua iho, eia nae, mamuli o kona hoolohe i na a'o a hale aole oia i kamailio iki ae i kekahi mea e pili ana ia eha, aole hoi i kahi mea e pili ana i ko laua halawai ana me kela poino ma ka po mamua iho.

            No Hale he kanaka opio oia i maa i ka halawai me na poino o keia ano mamua aku, nolaila aole i oi aku kona kuhalahala no kona eha mamua o ko Joe. Oia mau no ka eha o kona mau pulima i ke kaula i nakiikiiia ai, a pela no

 

3RD COLUMN:

            hoi me kona mau wawae, eia nae, aohe on a kamailio wale ae no ia eha, uumi malie wale ia iho no iloko.

            I kulike me kana hana i maa mau mamua aku oia hoi kona hele pu me Joe i ka Joe Halehana a mailaila aku i ka haleleka, no ka nana ana aku he leka mai paha kekahi nana mai ka ohana mai, a i ole mai kekahi hoaloha mai paha, pela no i keia kakahiaka.

            Iaia i hoea aku ai i ka haleleka a weheh mai la i kana pahu-leka, ua loaa aku la iaia kekahi mau leka lehulehu, hookahi leka i kuniia ma ka haleleka ma Kikako, a o kekahi mau leka mai Luisiana mai o mai kekahi mau kulanakauhale e ae mai. O ka leka i kakauia mai Kikako mai ua kakauia e kekahi mea i kamaaina ka limakakau iaia.

            "Ha!" wahi ana o ka hooho ana ae me ka olioli. "He leka hou no keia mai ka Makaikiu Tavara mai. Heaha la ka manao ano nui maloko o keia leka ana o ke kakau ana mai nei?"

            O kana leka mua ia o ka wehe ana ae me ka awiwi a nana iho la i na manao i kakauia maloko. He pokole loa na ma-nao i kakauia, a o keia malalo nei na mea i kakauia :

                                    Kikako, Ilinoi, Nov. 10, 1890.

E ka Hoahanau Hale:

            Mai ka manawa mai o ka leka hope a'u i kakau aku ai ia oe ua hoao au ma na ano apau e loaa ia'u ka ike no ko Sanaho Gomeza wahi o ka noho ana ame kana mau hana, a ua loaa nae ia'u kona meheu. Ua loaa ia'u ka ike no kana mau wahi apau o ka hele ana aku me ka nalowale ole o kona meheu, a me he mea ia ma ka manawa koke no e loaa aku ai o keia leka ia oe e hoea aku ai au i Manakaseta. O ka mea i oi aku ke kupanaha ua halawai mai me a'u kekahi mea hoohikilele oiai au e hookolo aku ana mahope o ko laua meheu, he mea a'u i ike ole ai iloko o ko'u mau la holookoa o ko'u ola ana. Ua loaa mai ia'u ka ike o ke kana-ka a kaua i ike aku ai ua make ua ola hou oia a ke hele mai nei oia me ke ola kino ikaika, a he oi aku ke debolo o kana hana e hana mai nei i nei manawa mamua o ko ka manawa i hala. Oia ke kanaka nana i hoouna aku ia Gomeza e holo aku i Manakaseta no ka huli ana aku mahope o kekahi kai-kamahine. No ke koena aku o na hana na'u ia e hoike aku ia oe ke hoea aku au ilaila. E hui mai oe me a'u ma ka hale hoolulu kaaahi.        Me ka awiwi loa,

                                                            JOHN TAVARA, Makaikiu.

            "O ka Makaikiu Tavana pu kekahi e hoea mai ana ianei. O, hauoli maoli, ke hoea i'o mai oia !" i hooho ae ai o Hale. Me he mea la he hana ano nui kana e holo mai ana ianei, e hookolo mai ana oia mahope o Dupona ame Gomeza, oia. Ma kana leka ke olelo nei e hoea mai ana oia ianei i ka ma-nawa hookahi e loaa mai ai o keia leka ia'u.

            "Ma ke kaaahi hea la oia e kau mai ai? E pono au e kiai aku i ke kaaahi e hoea mai ana i keia la. Hora ehia la keia? Alaila huki ae la oia i kana uwaki a nana iho la, o ka hora eiwa ia ; o, e ku mai ana ke kaaahi mai ka hema mai ianei i ka hora 10. E pii aku au e hoike ia Joe, alaila hoi loa aku i kauhale a mailaila aku e iho ai no ka hale hoolulu kaaahi.

            Oiai oia e kamailio ana iaia iho, hookomo iho la oia i ka leka a ua manao iho no oia ua komo ia leka iloko o ka pa-keke o kona kukua, ma ka mea oiaio nae aohe i komo ka leka iloko o ka pakeke, ua haule iluna o ka papahele me kona ike ole iho, a hoi aku la me kona ike ole iho i ka waiho.

            Aohe oia i nana iho ia luna o ka papahele iaia i hoi aku ai, he wahi mea ano ole wale no paha ia nona iho, aka nae, no kana hana, he mea ano nui ia, a e lilo ana kona hema-hema ma kona aoao i mea e loaa aku ai ka ike i kona enemi. Ka i no a hala.

            O ka aoao i kakauia ai ka wa-hi leka ua huli iluna, a iloko o umi minuke a emi mai paha ma ia hope iho, ua ike iho la na maka o kekahi o na kanaka e imi ana e hoopoino i kona ola, a pela me ko Mate Wilamota, i ka wa-hi leka me ka leka iloko, e waiho ana i ka papahele o ka haleleka, he haa-wina laki i loaa iaia, a o ua kanaka la oia no o Sanaho Go-meza, ka Mekiko.

            Ua hala aku o Hale he mau minuke ke kawa ma ka ma-nawa a Sanaho Gomeza i hoea ae ai i ka haleleka a hooko-mo aku la i kekahi leka iloko o ka pahuleka, a ia huli ana mai ana ua ike iho la oia i ka wa-hi leka e waiho ana iluna o ka papahele a nana pono iho la oia i ka inoa i kakauia maluna o ka wa-hi.

            He kanaka limakakau maikai o Tavara, a o ka moa Hale Lestera e kau ana maluna o ka wa-hileka he moakaka loa ke heluheluia iho e hoohewahewa ole ai kekahi mea ke he-luhelu iho. O ke kulou iho la no ia o ke kanaka Mekiko a lalau iho la i ua wa-hileka la, aohe nae oia i wehe ae i ka leka ia manawa, hookomo wale iho la no iloko o kona pa-keke a hoi aku la, a i ka hala ana mai o kekahi alanui okoa a hele pololei aku la no ka hale pahupahu a inurama, kahi no ana ame Hale o ka hakaka ana ma kekahi po mamua iho.

            I ko Hale hoea ana aku no ke keenahana o Joe Kerana-tona, haha iho la oia iloko o kona pakeke no ka leka ana i manao ai ua hookomoia no oia iloko o kona pakeke, eia ka auanei ua haule, i haawi aku ai oia ia Joe no kana heluhelu ana iho. Ua ike ae nei kaua e ka makamaka heluhelu i ka mea iaia ua leka la ia manawa Mamuli o ka hemahema ma ko Hale aoao e ikeia ana ka noahuna a laua me ka Ma-kaikiu Tavara e ke enemi.

            "Auwe no ka hoi ko'u lolo e!" wahi a ua o Hale o ka hooho ana ae me ka helehelena kaumaha.

            "Heaha keia hana lol au?" i ninau mai ai o Joe Kera-natona me ke ano kahaha.

            "Heaha mai auanei kau, he leka ka i loaa mai nei ia'u mai ka Makaikiu Tavara mai, ua heluhelu mai nei au a i ka pau ana ua manao au ua komo la hoi iloko o ka pakeke, eia ka ua haule aku nei," a ke noke la i ka huli i kona mau pa-keke a pau aohe nae he loaa.

            "He leka ano nui no nae paha ia?" wahi a joe o ka ninau ana mai.

            "Ae;e holo mai ana oia ianei, a in a e loaa ana kela leka ma kekahi ano ulia i kela kanaka e ike mua ana oia i ka pa-pahana a ka makaikiu, a e ike pu iho ana oia no ka holo mai o ka Makaikiu Tavara ianei."

            "Alaila ua lol maoli i'o no oe ma o kou hookomo ole ana ma kahi e haule ole ai," i pane mai ai o Joe.

            "Oia paha hoi." Alaila hoakaka aku la ua o Hale i ka manao nui maloko o ka leka a ka Makaikiu Tavara o ke kakau ana mai iaia, a o kona hele hou aku la no ia e huli ma kana mau wahi o ka hoi ana mai, me ka ha-lo ana ma o a maanei me ka manao e ike ana i ka leka, he ole nae ka ike aku; pehea e loaa ai iaia ua lilo aku la i ka mea e?"

            Mahope o kona hookolo ana ma na wahi apau ana o ka hoi ana mai a hoea wale i ka haleleka, hooholo iho la oia ua loaa ia leka i kekahi mea okoa a ua laweia aku, alaila pahola ae la ka ouli o ka hoka ame ke kaumaha ma kona helehelena iaia i noonoo iho ai malia o loaa aku ua leka la iloko o na lima o Dupona.

            "O, he hana hemahema maoli keia a'u o ka hana ana! Aohe mea e aku e hoahewaia, owau wale no, aka, malia aole no hoi paha e loaa aku ana ia leka ia Dupona, aka, e nana aku nae hoi i ka hopena. Ina e loaa aku ana ia leka ia Dupona e makaala loa ana o Dupona nona iho, a e lilo ana i hana nui a paakiki na Tavara ka hana ana i mea non ame kona hoahui e paa ai i ka hopuia. No'u keia kumu o ka hewa. O, no;u keia hewa hiki ole ke huikalaia mai, aka, o ka ulia iho la no paha ia o ka haawina pakalaki!"

            Mahope o kona noonoo ana iho no kekahi manawa alaila kamailio wale iho la no oia iaia iho, "o ka'u e makemake nei e ike ua loaa paha ka ike ia Dupona ma ua hemo mai maua

 

4TH COLUMN:

mai kela hale mai i hoopaaia ai, a aole paha, a heaha ana la ka hopena o ka laua hana? Aka, aole o'u manawa e hoopau wale ia ai; e hele koke au i ka hale hoolulu kaaah@ no ka nana ana aku o ka hoea mai o Tavara. Ke ike nei nae au i ko'u hilahila iho la i ka hoike aku iaia i ko'u hema-hema no ka haule ana o ka leka ana o ka hoouna ana mai ia'u."

            Me keia manao iloko on a, o kona kana aku la no ia hele ma ke alanui e hoea aku ai i ka hale hoolulu kaaahi, a he mau minuke helu wale no ia ana o ka hele awiwi ana aku hoea aku la ilaila.

            Iaia i hiki aku ai nana aku la oia ua piha owaho mai o ke kahua i na kaalio e kali ana no na ohua e hoea mai ana no hoi na kanaka ma o a maanei.

            O ke kaaahi mai ka hema mai o kona ku ana mai no ia a e holoke mai ana na ohua, na kahuakaa, na kanaka oluna o ke kaaahi ame na kanaka oloko o ka hale holulu, e hoo-makaukau ana kekahi mau ohua no ke kau aku ke ku mai ke kaaahi e holo mai ana a e loheia aku ana ke kanai mai o ke oeoe.

            He manawa pokole mahope iho o ke kani ana mai o ke oeoe ua ikeia aku la ke kino o ke kaaahi e holo mai ana, mahope o kona kaawale ana mai kekahi ahua mai nana i huna ae iaia, a he mau sekona pokole loa mahope iho ka-palulu ana ke kaaahi Kiaaina Snark iloko o ka hale hoolulu ahiki i kona ku ana iho.

            "Kulina i hoopahupahuia! Owai ka mea makemake i ke kulina i hoopahupahuia?" wahi a kekahi wahi kanaka kalewa makapo o ke kahea ana mai, he leo hoi i kamaaina mau ia ka lohe aku ma na manawa apau a ke kaaahi e ku mai ai, a i hiki ole hoi i na malihini ke hoopoina, ka poe e holo mai ana i ke kulanakauhale Moiwahine e makaikai.

            Ua lohe pu aku la oia i ke kahea a na kahukaa no na ohua e makemake ana no na Hale Manakaseta, ka Hokele Wina-soa, a ma na hale e ae i maa i na malihini i ka holo mai a noho no ka hoomaha ana, a e kahea aku ana no hoi kekahi mau kahukaa no na paiki no ka laweia aku ma na wahi like ole o ke kulana kauhale.

            "Eia ke kaalio maanei!" wahi a kekahi mau kahukaa @ ke kahea ana aku. "Hele mai maanei eia ke kaa maanei," wahi hoi a kekahi kahukaa.

            "Owai ka mea makemake i ka nupepa mai Bosetona mai? Eia ka nupepa ke Globe, eia ka Herald!" wahi hoi a kekahi mau keiki kalewa nupepa o ke kahea ana mai ia Hale e lohe aku ana. Aohe i lilo kona noonoo ia mau leo ana e lohe aku ana, no ka mea, o ka mea nui iloko on a oia kona ike aku i ka Makaikiu Tavara."

            Ke ike aku la oia i ka lele mai o na ohua, a ke halihali ae la hoi kekahi poe kahukaa i na paiki noluna o na kaa, a ke holoke la no hoi kekahi poe ma o a maanei, a ma ka hale hoolohe aku ua hoao kela ame keia e kamailio a e walaau a oi aku mamua o ka kekahi poe e holoke mai ana.

            Ke ku la o Hale nana me ka makaala loa o kona mau ma-ka maluna o kela ame keia kanaka e lele mai ana mailuna mai o ke kaaahi, me kona hakilo loa e ake aku ana o ka ike aku i kana kanaka i make make loa ai e ike oia hoi ka Ma-kaikiu Tavara.

            I ka pau ana mai o na ohua, na ekeleka ame na ukana i ka hooleleia mailuna mai o ke kaaahi, ua hoomaka hou aku la ke kaaahi e hoomau i kana holo ana ma kona alahele no ka akau.

            Ma ia manawa aohe wahi mea a ikeia aku o ka Makaikiu Tavara, a no ko ua o Hale ike ole aku iaia, hooholo iho la i kona manao aole no i kau mai ka Makaiku Tavara ma ia kaa, a he kaaahi hou aku paha kona e kau mai ai.

            Oiai no nae oia e ku ana, me ka nana ana ma o a maanei he ikena kana i ke kau ana iho o kekahi lima maluna o kona poohiwi, a ia alawa ana ae ana he kanaka ke ku ana ma kona aoao ana o ka ike ole ana aku i ka hele ana mai a pili ma kona aoao, a i mai la iaia :

            "E hiki ana no anei ia oe ke alakai aku ia'u ahiki i ka hokele maikai loa maloko o keia kulanakauhale?"

            No keia leo a Hale o ka lohe ana ae, huli ino ae la oia e nana a ike ae la i kekahi keonimana i kahiko ia me na aahu maikai loa, a he kulana o kekahi kanaka lawelawe oihana kalepa kona e koh uai ke nana aku.

            "Ua hoikeia mai ia'u o ka Hokele Winasoa ka ka oi aku o ka nani. E makemake ana au e hele aku no ia hokele ke ae mai nae hoi oe e alakai aku ia'u nolaila.'

            "O, no ia hokele ka kou makemake @ Ua hiki ia'u ke lawe aku ia oe ilaila me ka hoohakalia ole," i pane ae ai o Hale.

            "A, me ka mahalo," a ma kela manwa a ke kanaka i pane mai ai he minoaka ma kona mau papalina, akahi no o Hale a hoomaopopo iho o ke kanaka no ka ana e kali ana ke ku pu ana me ia, a e ninau mai ana hoi iaia no ka Hokele Winasoa.

            "Auwe, o Keaka Tavara no ka! Aole au i hoomaopop@ aku nei ia oe, a in a paha aole oe i kamailio mai nei ia'u aole au e ike aku ana ia oe, no ka mea, ua loli maoli no oe i ka'u nana aku," alaila lele aku la oia a puliki i ka lima o ka ma-kaikiu.

            "Ae ; owau no keia. E oluolu oe e alakai aku ia'u no kahi o ka Hokele Winasoa, a ia kaua nalaila, ea, he nui na mea a'u i makemake ai e kamailio aku ia oe ma na mea e pili ana i ka'u hana o ka holo ana mai la ianei."

            "O, me ka mahalo, ke hauoli loa nei au i kou hiki ana mai la a hui kaua ianei !"

            O ka hele koke aku la no ia o Hale e hoolimalima i ke-kahi kaalio e ku mai ana no laua e kau ai a holo aku no ka Hokele Winasoa, a i ka loaa ana mai kau aku la laua a holo aku la no kahi o ka hokele, a ua hala paha he hapalua hora o ia holo ana aku a laua hoea aku la i ka pahuhopu, kahi i makemakeia, a mahope o ke komo ana aku e hui me ke kupakako o ka hokele no ka hoolimalima ana i rumi no ka makaikiu e noho ai a paa aku la ka inoa, a loaa mai la ke tikiki no ka helu o ka rumi, pii aku la no ka rumi i kuhikuhiia ma ke tikiki.

            Ia laua i hiki aku ai no ia rumi, a i ka noho ana iho ilalo, i mai la ka Makaikiu Tavara ia Hale : "Ua hoea mai la kaua i kahi a'u i makemake ai e kuka me oe me ka lohe ole ia mai ; e hoike mai oe ia'u, oia ka'u e makemake nei, no kau mea i ike no Sanaho Gomeza mai kela manawa mai au o ke kakau ana ae nei ia'u."

            Aohe hoohakalia ana iho o Hale i ka hoike ana aku no ia noi, aka, hoakaka aku la ma ke ano nui, me na huaolelo pokole loa, no na mea i hanaia ma ka po mamua iho, e piii ana i ko laua hookolo ana aku mahope o Gomeza ma, ko laua halawai ana aku mahope o Gomeza ma, ko laua halawai ana  me ka poino, ko laua hoopaaia ana maloko o ka hale "Ka Umii," a pela aku, elike me ia i pau mua ae nei i ka ikeia e na makamaka heluhelu o keia nanea, a oiai o Hale e hoakaka aku ana i kana moolelo, ke noho malie loa mai la ka makikiu @oolono i na mea apau mai ka mua a i ka hope, a ma ka hapa hope loa o ka Hale mau mea o ka hoakaka ana aku oia ka mea e pili ana i ka haul@ ana o ka leka a ua o Tavara o ke kakau ana mai.

            "O, he nuhou maikai ole maoli kela au i @oike mai la i pane mai ai ka Makaikiu Tarava.             "Ina no ka loaa aku o kela leka ia Dupona, ke kanaka a'u i makemake loa ai, e paa oia ia'u maloko o keia kulanakauhale, e lilo ana ia i mea nona e makaala loa ai nona iho, a i ole, holo mahuka e aku mamua o ko'u hana ana aku i kekahi hana e paa ai oia i ka hopuia, he kanaka a'u i maopopo loa ai eia oia maloko o keia kulanakauhale i nei manawa.

*UPSIDE DOWN*

(Aole i pau.)