Ka Nupepa Kuokoa, Volume LVIII, Number 18, 7 May 1920 — Page 1
| This text was transcribed by: | Maryann Acker |
| This work is dedicated to: | Darien Hudson - To all of my precious children, lokepa, Lopaka, Sapphire & Samantha, Mommy loves you. |
Ka Nupepa Kuokoa
KE KILOHANA POOKELA NO KA LAHUI HAWAII.
HOOPUKAIA I NA KAKAHIAKA POALIMA APAU.
BUKE LVIII—HELU 18. NUPEPA KUOKOA, HONOLULU, T. H., PAOLIMA, MEI 7, 1920
NA HELU APAU, 6399
HOOKU’I HE MAU KAA MA KA ULIA A NUI NA POINO
O Kahi Nae o ka Pomaikai Aole he Mau Ola i Poino o na Kaa Wale no ka I Pilikia
HE NUI NA KUMU O KA LOAA ANA O KELA ULIA
Ili Nae Maluna o ka Poe i Ikeia ka Hemahema, o ka Uku Ana i na Kaa i Poino Loa
He pomaikai loa ka manawa e nee poe me ka loaa ole o kekahi mau ulia kaa. o kahi nae o ka laki, ma na ulia kaa o ka Poaono aku nai i hala, o ia no ka poino ole ana o kekahi ola, o na kaa nae i hooku’i ka i nui na poino, me ka lilo nae o ia mau poino, i mea hiki no ke hooponoponoia ae, ma ka ili ana aku o na ko’iko’i o ka uku ana ae i ka hana hou ana i na wahi poino, i ka aoao i pili i ka hewa.
O ka ulia mua loa i ikeia ma kela la ma ka hapalua no ia o ka hora ehiku o ke kakahiaka, mamuli o ka hooku’i ana he elua mau kaa otomobile me ke kua uwila, ma ke kihi o na alanui Emma. Uniona ame Beretania.
Ma ka olelo a ka poe i ike pono i keia ulia, ua hiki ole maoli no ke alo ae mai ka loaa ana o ka poino, no ka mea he elua mau kaa otomobile e holo ana make alanui Beritania, no ke taona nei a i ka hala hope ana aku o ke alanui Emma, ua oili ae la he keiki uaka, mamua pono o ke kaa otomobile mamua loa, a i wahi e hooku’i ole ia aku ai kela keiki, ua hoopaa iho la ke kiakaa o ka otomobile mamua i ka holo o kona kaa.
Eia no hoi ke kaa mahope aku ke holo aku nei, i ka wa i ku iho ai ke kaa otomobile mamua, ua hoopaa pu iho la ke kiakaa o ke kaa mahope aku i ka holo o kona kaa, me ka hoaui ana ae nae ma ka aoao hema o ke kaa mamua, o ka wa no ia i hooku’i aku ai me ke kaa uwila, o ke alanui Beritania, e holo ana nowaho o Punahou.
Ma ka hora ekahi hoi a oi o ka auwina la o kela Poaono no, mawaho ae nei o na alanui Beritania me Pensacola, he elua mau kaa otomobile i hooku’i me ke kaualakoia ana aku o ke kaa mamua. ahiki i ka paa ana ma kahi mamao me ka poino ole nae o ke ola, o na mea maluna o kela mau kaa a elua.
E holo like ana no kela mau kaa otomobile a elua. ma ke alanui Beritania no ka huli Punahou, a i ke kokoke ana aku i ke alanui Pensacola, i kulike ai me ka hoike a ka makai. i hoounaia no ka nana ana i kela ulia, ua kau ae la ka mea ma ke kaa mamua loa i kona lima e hoike ana no kona hoohuli i kona kaa ma ke alanui Pensacola, aole nae i kaawale aku kela kaa, o ka hooku’i aku la no ia i ke kaa mahope aku.
LEHULEHU NA OLELO HOOHOLO I KAKAUINOAIA E KA MEIA.
Ma ka halawai a ka papa o na lunakiai o ka noho ana ma ka po Poalua nei i hoikeia ae ai e ke kakauolelo a ka Meia Palmer P. Wood, imua o ka papa, ae aponoia ana ame ke kakauinoa ana o ke Meia Wilson i na kanawai, na olelo hooholo ame na bila elike ma ia manao nou
No ka hoolako ana no kekahi kokua pau nakahaka a ma ka halema’i o na aha poino. $115; hoonui ana ae i na ua a hoopaaia ai na ohana popoki maloko o ke zoo, $4000; hana hou ana i ke alanui o Puuloa, $8000; i uhi hou no kaupoku ka hale kinaiahi ma Kapalama. $2850; no ke kukulu ana i alahaka konakalika no ke kawahai o Anahulu, Haleiwa. $55,000; mau lako hale no na kula me kekahi haawina dala paku’i, $7000; mau lualiilii no na kula, $5000; huamana ana i ke kuai aku i na lio o ka ohana kinaiahi; kukulu ana i puoa wai ma ka Luawai Hookio Helu 1 ma Nuuanu, $4211; no na hoolilo, na bila o ke kuai ana a ke keena hoolako, $499; ana na hoolilo i ke kanawai “Hae Ulaula.”
OLOHANI KA HUI UNIONA O KA POE HANA KELEPONA
No ka Hoomahuahua Ole la Ae o ka Ukuhana ke Kumu o ke Ala Ana Mai o Kela Olohani
LOKAHI OLE NAE NA LALA APAU MA KELA OLOHANI
Koe no la Limahana o ka Hui Hana Uwila Aole i Haalele i ka Lakou Mau Hana me Ka Hui
Mahope iho o ka malamaia ana, o kekahi mau halawai lehulehu, e na lala o ka Hui Uniona Helu 545, o na kanaka hana uwila me kelepona, i olohani ae ai na limahana o ka Hui Kelepona Mutual, ma ke kakahiaka o ka Poakahi nei, me ka waiho ana aku i ka lakou maa hana, me ke komo ole mai nae o na limahana o na hui hana uwila e ae, iloko o kela olohani ana.
Ma ka halawai hope ana a na lala o kela hui uniona, ma ka po o ke Sabati aku nei i hala, i hooholo lokahi ia ai kela manao no ka olohani ana, me ka haawiia ana ae o ke kauoha e ka Peresidena H. N. Tyson, e waiho na limahana apau i komo iloko o kela hui uniona, i ka lakou mau hana, maloko o ka Hui Kelepona Mutual, ma ka Poakahi nei, aole hoi e hele hou aku i ka hana, ahiki i ka aeia ana mai o na kumu koi, ma ka aoao o na limahana, o ia ka hoomahuahuaia ae o ko lakou mau ukuhana.
I ka haawiia ana ae nae o kela kauoha, no ka olohani ana o na limahana, o ka hui keleona, ua haawi pu ia aku ke kauoha, aole lakou e hoopoino wale i na waiwai o ka hui, me ka manao, pela iho la e hookoia ai ka lakou mau kumu koi apau, aka e noho malie lakou, me ka lawelawe ole aku i kekahi mau hana, e hookomoia aku ai lakou iloko o ka poino.
He mea oiaio, he kakaikahi loa ka poe i hele ae i ka hana ma ka Poakahi nei, me ka haalele ole nae o na kaikamahine hana, o ka hui kelepona i ko lakou mau kulana, aka ma ka Poalua mai ua mahuahua hou ae na limahana, me ka hoopilikia ole ia o ka hui kelepona ma kekahi ano.
He mea hana o Mr. Tyson noloko o ka Hui Kelepona Mutual, eia nae, mamuli o kekahi mau mea ana i kamailio ai, ma na halawai i malamala e ku hui uniona, ana i noho peresidena aku ai, ua hoopauia mai la kona noho hana ana no kela hui, o ka hopena nae i oili ae, o ia no kona kauoha ana e hoalaia he olohani e na limahana i komo aku iloko o ka hui uniona.
Ma ka oleloia, ma na manawa i noonooia ai ka ninau olohani, ua koho ku-e na limahana oloko o ka Hui Hana Uwila, ka Hawaiian Electric, ma ke apono ana aku i ka olohani ana, mamuli o ko lakou ike, aole loa he pilikia i ikeia mawaena o lakou me na haku hana.
Me na Limahana e Hooponopono Ai
Ua hoakaka ae ka Hui Kelepona Mutual ma o kona puuku la, ua makaukau kela hui e hooponopono ma na ninau apau i pili aku i ka ukuhana o kona mau limahana, a mau pilikia e ae paha, i kela ame keia manawa, aole nae ma na lala o ka hui uniona; o keia manao hookahi no ko na lunanui o ka hui hana uwila, mamuli o ko lakou manaoio ana, he mea hiki wale no ke hooponoponoia na pilikia apau, mawaena o na limahana me na haku hana, me ke kuleana ole o ka poe mawaho mai e komo hokai wale mai ai i ka hana i kuleana ole ia lakou.
Ua waihoia aku ka ninau no ka hooponoponoana i kela pilikia o ka poe hana uwila, imua o Mr. Richard L. Halsey, ka lunanana poo o ke keena o ka oihana hoopae limahana maanei nei, ka mea i kohoia mai e ke aupuni o amerika no ka hooponopono ana i na pokikia o keia ano, me kona hoouna okoa ana mai he leka i ka hui hana kelepona, e koho i mau komite no ke kukakuka ana i na alahele apau e hoopauia ae ai ka pilikia, ua hoole aku nae ka hui kelepona i kela manao, koe wale no a waiho loa ia aku ka ninau hui uniona mawaho, a o na hooponopono ana apau ma ke ano no ia o na limahana me na haku hana, ma ia ano wale no e aeia aku ei, he hooponopono ani, no ka ninau hoomahuahua ukuhana.
Hoomanao na Kamalii i ka piha ana o na makahiki eha o ke kahua paani Kamamalu ma ka Poakolu nei. Malama lakou he mau meakuai i loaa ai he waihona no ke kuai ana i mau kii paani na lakou. Aia keia kahua paani o na kamalii ma ke alanui Papu me Kuia, me ka lilo i wahi no na kamalii o kela wahi e hoohauoli ai ia lakou iho i kela ame keia manawa.
(PHOTO BELOW)
E KIAIIA ANA NA LAINA UWEA KELEPONA.
Mamuli o ke noi a na luna o ka Hui Kelepona Mutual he 10 mau makai kauwai i hoonohoia aku e ka Makai Nui Rose no ke kiai ame ka malama ana i ka maluhia o na halehana kelepona ame ua uwea maloko o ke kulanakauhale. Ua maheleia na kanaka hana no ke kiai ana, he okoa ko ke ao a he okoa ko ka po ma ke keenahaua kikowaena a ma Kaimuki ame Kalihi.
Aohe mau hana hoopilikia i hana a i ikeia, aka nae, no ka maluhia no o ko lakou mau waiwai a no ka palekana hoi o na uwea kelepona, pela wale no i hooholo ai ka hui e hoonoho aku i mau kanaka kiai ma kela a ma keia wahi. O na kamaka hana o ka hui kelepona ua malama lakou ka maluhia me ka hoao ole e hoopilikia wale ae i na waiwai o ka hui, a ma ka mea oiaio no aohe no he hoopilikia e hanaia aku ana. Ua hoolohe na kanaka hana a ia hui i ke kauoha a ko lakou peresidena, H. S. Tyson, ka peresidena o ka hui uniona.
KAHEAIA KA OIHANA MAKAI NO KA LILO ANA O KA PALULE.
No ka hooko ana aku i kekahi kahea o ka loaa ana ae i ka oihana makai, e hoakaka ana he haunaele nui ka i ala ae, he elima mau makai kumau ame elima mau makaikiu i kau aku a holo maluna o ke kaa otomobile nui, ma ka po Poalua nei, i mea e hoea koke aku ai i ka apana e noho ana o na Pake mahope aku o kela apana aina o Halelana, ma Manoa.
O ke kahea i loaa ae me he mea la no kekahi mea i eha ma ke ano o ka leo a e noi ae ana e awiwi aku na makai, me he mea la ua pepehiia kekahi mea a ua make. I ka hoea ana aku nae a na makai, he wahi hoopaapaa wale no mawaena o kekahi kaikunane ame ke kaikuahine no ka nalowale ana o ka palule o ke kaikunane, a no ka maka’a o ke kaikuahine o pepehiia aku oia, ua kahea koke ae la oia i ka oihana makai no ka hoopakele ana iaia.
Ua manaoia, ma keia olohani ana o na limahana uniona o ka hui kelepona, e hoopilikiaia aku ana na hana o ka hui, he hookahi nae kumu o ka pilikia ole, mamuli no ia o ka hoomauana o kekahi mau limahana i ka hana, na limahana i komo ole iloko o ka hui uniona.
O ke kumu nui o ka hoalaia ana o keia olohani, no ke koi ana no ia o na limahana uniona e hoomahuahua hou ia ae ko lakou ukuhana, no ka mea wahi a lakou, aia he like ole nui, mawaena o ka ukuhana, e loaa nei i ka poe hana uwila ma Honolulu nei, me ka poe hana uwila ma Amerika.
O ka hoea mai i ka hopena o keia olohani ana, ke kau aku nei ka manaolana o ka lehulehu, e hoopauia ae ana no ia iloko o ka wa kupono loa, malalo o na hooponopono maikai ana.
PAKELE MAI KONA MAU KIAI MAI
Elike me ka hana a kekahi mau alakai o ka hui uniona o na Kepani, ka huna ana. i kekahi poe Kepani olohani o na mahiko, i ole ai lakou e hoi hou i ka hana, pela iho la ka mea i hanaia aku maluna o T. Muranaka, he Kepani limahana no ka mahiko o Kawailoa, Waialua, eia nae, mahope iho o kona noho pio ana, malalo o na kiai makaala loa ana a na alakai uniona, ua holo mahuka mai la oia mai ia lakou mai, ma ka po o ka Poakahi aku la i hala, me ka hoike ana ae i ka moolelo o na mea i hanaia aku maluna ona.
Wahi a kela Kepani, ma ka mahiko o Kawailoa, Waialua, oia kahi i noho hana ai, aka i ka manawa nae i hoalaia ai ka olohani, iloko o ka mahina aku nei o Ianuari i hala, oia pu kekahi i haalele aku i ka hana o ka mahiko, a mahope mai, ua makemake hou oia e hoi i ka hana, o ka mea wale no nana i kaohi mai i ka hooko ana aku ia ma nao, o ia no ka maka’u i na lala o ka hui uniona.
I kekahi la nae, iaia i lele aku ai mailuna aku o ke kaaahi, ua paa mai la oia i kekahi Kepani o Kojiwara kona inoa, he manao no ka kona e ku-e aku i kela Kepani, o ka nana ae nae, he mau Kepani eha kekahi ma kela wahi, nolaila, e lilo ana kona mau ku-e ana aku i mea waiwai ole, nolaila he hookahi no haua, ma kona aoao, o ia ka noho malie ana.
Ua hookauia kela Kepani maluna o ke kaa otomobile, a lawe pololei ia aku no ke keena o ka hui uniona o na Kepani ma Waialua, malaila i nokeia mai ai oia i ke kamailio, aole e hoi hou i ka hana, o ka mahiko, no ka mea ina e hookuli ana oia i kela kauoha, e kau aku ana kekahi poino maluna ona.
Aole ka malaila wale iho la no pau, na mea i hanaia aku iaia, aka ua hoihoi loa ia mai la oia no Honolulu nei, me ka laweia ana aku no ke keena poo o ka hui uniona, ma kela kulanakau hale, me kona noke ole ia mai nae i ka niele, aka o ka mea i a’oia mai iaia, o ia kona noho malie loa, a waihoia aku la oia malalo o ka malu o kekahi mau Kepani eha, me ko lakou lawe ana aku iaia, a hoonoho ma kekahi hale e kokoke ana i ke alanui Vinia, malaila oia kahi i noho ai me ke kiai mau ia i kela ame keia manawa; a i ka loaa ana iaia o ka wa kupono, e holo mahuka ai, mai kona mau kiai mai, ua holo aku la oia a waiho aku la i kona moolelo imua o ka oihana makai.
NEW YORK, Apr. 29.—Elua mau kanaka kopaa i hoopiiia ae ma ka la i nehinei e ke kiure kiekie federala no Nu Ioka ame Burukeline no ka huna i ke kopaa ma ke ano e imi pomaikai ponoi no laua wale iho no. Hookahi o na kanaka i hoopiiia ae, elike me ka hoakaka a na luna aupuni, i kuai he 5000,000 paona kopaa ma ka 14.60 no ke tona a ua kuai hou aku i keia huina ma ka $21.50 no ke tona.
HOOPIIIA O PABLO MANLAPIT NO KA HEWA LAWE AIHUE.
Ma ka auwina la poakolu aku nei o ka pule i hala i hoopiiia ae ai o Pablo Manlapit, ka peresidena o ka Ahahui Uniona a na Pilipino, a o ke alakai hoi o ka poe limahana Pilipino olohani, e ke kiure kiekie o ke Teritore no ka hewa lawe aihue i ka waiwai i haawiia ae iaia e malama. Ma ka olelo hoopii e ku-e ana iaia he $86.40 i haawiia ae iaia e kekahi mau Pilipino elua e manao ana e hoi aku i ko laua onehanau.
Ua hooiaio pu ia ae ko Pablo Manlapit lawe aihue ana i kekahi huina dala ma ka la 19 o Feberuari i hala, eia nae, aole i hookomoia ae kekahi hoopii nona ia manawa ahiki iho la i ka palua o kona hewa ana.
He alakai oia no ka peo limahana Pilipino olohani, a ma kekahi manawa i hala aku nei ua hauwawaia ae kekahi lono ua haawiia aku iaia kekahi huina dala nui e ka poe mahiko no kona hoopau ana i ka olohani ana a na pilipino limahana o na mahiko. Ua hauwawa pu ia ae kona powaia ana e kekahi mea a lilo aku kekahi huina dala nui mai iaia aku.
Ua hookuuia oia mamuli o kona bela ana ae he $1000 oiai e kali ana no kona hookolokoloia mai.
E KUAIIA AKU ANA KEKAHI MAU APANA AINA AUPUNI.
Ma ke kauoha a ke Komisina Aina C. T. Bailey, e kuaiia aku ana ma ke kudala kela apana aina, ke kahua mua kahi i ku ai o keia hale kahiko Honolulu Hale ahiki he makahiki a oi aku nei i hala, o ka waiwaiio i kohoia he emi iki iho malalo o ke $60,000, a nona ka iliaina he 7415 kapuai kuea e pili aku la i ka haleleka.
O kekahi mau aina e kuai pu ia aku ana oia keia malalo nei: Apana 11 ma ke kihi o na alanui Papu ame Halekauwila, nona ka iliaina he 5000 kapuai kuea, a i heluia ma ke $50,000 ka waiwaiio; ekolu mau apana pa hale ma Waiakea, Hawaii, 1.25 eka ka ili o ka apana hookahi.
U waiho ae ka mahiko o Honolulu he palapala noi no ke kuaiia aku o kela mau eka he 11 o ke aupuni ma Waimanu no ka hoomoeia aku o ke alanui kaaahi a auwaha a i kahua no ka luawai hookio.
HOOLE KA PAPA I KA AE ANA I KA WAIHO OIHANA
Makemake o Kauka Hanchett e Waiho i Kona Noho Kauka Ana no ke Kulanakauhale
NO KA MALIU OLE IA MAI O KA HOOHALAHALA KE KUMU
Hooko Aku Nae ka Papa i na Makemake o Kauka Hanchett ma Kekahi Mau Koi Ana Mai
He mau mahina ae nei i hala, ua waiho mai la o Kauka A. K. Hanchett i kana palapala haalele oihana. imua o ka papa o na lunakiai o ke Kulanakau hale a Kalana o Honolulu nei, a ma ka halawai a ka papa i malama ae ai ma ka po o ka Poaha aku nei o ka pule i hala, i hooholo ae ai kela papa, aole e ae aku i ka palapala haalele oihana; he hoike ana mai hoi keia, i ka minamina, o ka papa i kela kauka, i ikeia kona kupono loa, ma ke kulana i hookohuia aku ai oia.
Ua ala mai kela waiho oihana, ma ka aoao o Kauka Hanchett, mahope iho o kona waiho ana ae he mau kumu hoohalahala imua o ka papa, no kona ike ole i ka hooko pono o sonny Gay i kana hana, ma ke ano he lunanana waiu no ke kalana, a i ka manawa i hana ole aku ai ka papa, no kela mau kumu hoohalahala, ia wa i hoouna ae ai oia i kana palapala, e noi ana e aponoia aku kona haalele iho i kona kulana, ma ke ano he kauka poo no ka halema’i o na ulia poino.
Ma ka halawai nae a ka papa, ma ka po o ka Poaha aku nei i hala, i haawi aku ia kela papa ia Kauka Hanchett i ke apono e hookohu aku oia i kekahi kokua no ka halema’i o na ulia poino, no ka manawa, ahiki i ka huli hoi ana mai o W. F. Meyers, mai kona hoomaha mai o elua mahina, no ka uka mahina o $115.
Ua haawi pu aku ka papa i kona ae no ka hookaawale ana ae i ka huina o $499, no ke kana ana i ka poe make o ke kulanakauhale, i hiki ole i ko lakou mau ohana ke auamo i na hoolilo o ke kanu ana
Ma kela halawai ae a ka papa o Kauka Hanchett, me kona hoakaka ole ae nae i kona manao, no na mea a ka papa i hana aku ai no kana palapala haalele oihana.
WAHI A NA MAKAI HE “HEE” KA HUI KAA KIKANE.
O ka hoolohe ame ka hooholo ana a waiho mai i hoike imua o ka papa ka hana i waihoia aku iloko o kekahi mau kauaka ekolu no ka noonoo ana i ke kumukuai a ke aupuni kulanakauhale e uku aku ai i ka honolulu Draying Companu no ka pohaku i wiliia.
I kulike me ka Lunakiai Pacheco o ka hoakaka ana ae mamua o ka papa ma ka manawa o ka noho ana o ka halawai he “hee ka ka hui e hoao ana e puliki aku me kona mau aweawe i ke aupuni kulanakauhale.”
Ma ka Lunakiai McClellan hoakaka ma ia po. I ka manawa a ka hui i makemake ia e hoohui aku i 40 keneka no ke kapuai i=a hookahi i kana kumukuai e helu ana ia i ka pomaikai o aneane he 75 pakeneta maluna o ke $50,000 i hoomoeia ai, a aia wale no a loaa i ke aupuni ka pohaku me ke kumukuai kupono, a i ole, na pono ma ke koho ana, elike me ia i loaa ai i ke aupuni mamua, he oi aku ka pono i ke aupuni e kuai i kana pohaku ma na makeke e ae, o ka hana koke o ke aupuni kulanakauhale ia hana o ka huli ana i lua pohaku ponoi nona oia no ka oi aku o ka maikai. Ma kona manao o ka 20 keneka i hoopii hou ia ae maluna o ke kumukuai kahiko ua nui ia, no ka mea e loaa aku ana i ka hui he 37 pakeneta maluna o ke $50,000 i hoopukapuka ia.
Wahi hou ana ua loaa i ka hui kaakikane i ka makahiki i hala he $29,000 no kana lua pohaku.
No ka hoolohe ame ka hooholo ana maluna o keia kumuhana e hookohu ae ana ka Meia Wilson i kekahi kanaka, a hookahi na ka hui e koho, a o ke kolu o na kanaka na keia mau kanaka elua ae la e koho aku.
LAWE I KONA OLA IHO MA KA AI ANA I KA LAAUMAKE
Mamuli o ka Loaa Pono Ana o Morris Stratemeyer no ka Mahuka Pela i Lawe Ai i ke Ola
KOMO I KA LOLE WAHINE ME KONA MANAO E NALO
Loaa Pono Nae i ka Makai Iluna o ka Moku a Hoihoi Hou ia No Kahi o na Paahao
Mamuli o kona loaa pono ana, me ka hoohokaia ana hoi o kana papahana, no kona pakele, mai ka mana mai o ke kanawai, i lawe okoa ae ai he keiki Hawaii, he paahao e noho hana ana ma Hawaii, o Stratemeyer kona inoa, i kona ola iho, ma ka ai ana i ka laaumake, mahope o kona hopuia ana e kekahi o na makai. i hoonohoia no ka hookolo ana mahope o ka meheu o ka paahao mahuka.
He keiki opio o Stratemeyer i kamaaina i keia kulanakauhale, a mahope o ka lawelaweia ana o kekahi mau hana aihue lehulehu, i paa ai oia i ka hopuia, me kona ahewaia ana, e hoopaaia maloko o ka halepaahao, eia nae, he maumanawa kona o ka holo mahuka ana mailoko aku o ka halepaahao, a hoomau no i ka aihue ana maloko o kekahi mau home.
Ua hoounaia oia o Keaumoku, Waimea, Hawaii, kahi hoolulu o na paahao e noho hana mai la malaila, aole nae ia he mea e noho malie ai o keia keiki, aka ua holo mahuka aku la no oia, me ke komo ana i kekahi lolo wahine, a ma kona manawa i paa ai i ka hopuia, ua hiiki ole i kela lole ke huna aku iaia, aka ua paa oia i ku hopuia, n o kana hana hope loa, o ia ka inu okoa ana ae i ka laaumake, ana no i hoomakaukau mua ai, o kona make no ia, a paa no hoi kona hoomau hou ana akui kana mau hana aihue.
Ua manaoia, o keia kekahi o na kanaka opio aiwaiwa ma ka hana aihue, me kona maka’u ole, i kulike ai me na kanaka aihue o na aina mamao, ka mea hoi nana i hookahaha loa mai i ka manao o kona mau hoaloha lehulehu maanei nei.
Komo i ka Lole Wahine
Mahope iho o ka holo mahuka ana mai kahi mai i noho ai o na paahao ma Keomuku, ua komo aihue aku la o Morris Stratemeyer maloko o kekahi mau home o Waimea, Hawaii, me ka lawe ana mai i kekahi lole wahine. pela no me na lako e ae i pili i na wahine. Me kela mau lako i kahiko iho ai oia iaia a he kohu wahine maoli ke nanaia aku, e manao ole ai no kekahi poe, he kiuo kane kona.
I ka wa i hoea ai o ka Mauna Kea no Kawaihae, ma ke ahiahi o ka Poalima aku nei i hala, ma kona alahele no Honolulu nei, ua kau aku la oia maluna o ka waapa o ka mokuahi, me kona hoohuoi ole ia, koe wale no ka nana ana mai o na kanaka iaia, ma ke ano paha’oha’o, no kahi o kela wahine o ka hoea ana aku.
Aia nae maluna o ka mokuahi i kela manawa he makai no ka hakilo opono ana i kana laewhala; i ka wa i kau aku ai o Stratemeyer, noluna o ka oneki o ka Mauna Kea, ua hele pololei aku la oia, a komo maloko o kekahi o na rumi kapena, me ka ike ana mai nae o ke kanaka o ke aupuni iaia, ia wa i hele koke aku ai ka makai a komo maloko o kela rumi, he oiaio, ua ike aku la oia me ke kuhihewa ole, o kela kana paahao e huli ana, o kona hooko aku la no ia i ka mana o ke kanawai maluna ona.
Inu i ka Laau Make
I ka ike ana nae o Stratemeyer, aole i hiki i kona lole wahine ke huna aku iaia, ua unuhi okoa ae la oia i kekahi omole o ka laaumake, e waiho ana iloko o ka pakeke o kona oloe, o ka ina ae la no ia, a mailoko mai o ka rumi kona laweia ana mai, a ku ana imua o na ohua ame ke poe oluna o ka moku, me kona hoomanawanui ana i ka nui o ka ehaeha i loaa i kona opu, no ka mea ke hana la ka laaumake iloko ona.
Ua hookau hou ia oia maluna o ka waapa, a hoihoiia aku mouka o ka aina,
(E nana ma ka Aoao 4.)