Ka Nupepa Kuokoa, Volume LVIII, Number 13, 9 April 1920 — HE HOALOHALOHA. [ARTICLE]
HE HOALOHALOHA.
Oiai, ua oluolu loa i ka Mea Mana Loa ka lawe ana aku ia Mr. Daniel Puhi, kekahi o na hoahanau a hoapaahana o ka Ekalesia o Kawaiahao mai keia ola honua ana aku, a e hoomaikaiia aku no ka inoa o ka Mea Kiekie Loa, no ka mea, Nana no i hana a Nana no i lawe aku la. Ke komo pu aku nei ka Ekalesia o Kawaiahao ma ka u pu ana me oe e Mrs. D. Puhi, ka makuahine i hooneleia i kau mea aloha a o kou makua hoi o keia ola honua ana, o ka makou pule e hoomamaia mai kou mau luuluu, a no ka mea, o ke alahele ana i hele aku la o ke alahele like no ia o na mea apau e hele aku ana. Na ka mana o ke Akua e hoomalu mai ia oe a ia kakou apau. Na ka Ekalesia o Kawaiahao ma o ke komite la: J. K. NAKILA. J. H. S. KALEO, J. U. IOSEPA.