Ka Nupepa Kuokoa, Volume LVII, Number 51, 19 Kekemapa 1919 — Page 5

Ka Nupepa Kuokoa

 

                                                                             

He Moolelo no ka

MAKAIKIU MAKENEKI

a i ole

 

KA OHUA MAI KA PA KAPILIMOKU  MAI O SEKOTIA.

 

            “Alaila he hihia hoi ha keia ma ke ano hoohuoi me ka maopopo ole na kela makai o ke kaaahi i pepehi o Reminetona?”

            “Aole; he hihia maopopo loa kela nana i hana, no ka mea, na loaa ia makou ka pu panapana.”

            “Ua loaa aku nae maluna o ke kino o ka lawehela?”

            “Aole. Ina hoi ha i loaa aku kela pu panapana ma ke kino o kela kanaka aohe hoi he olelo ana, ina ua loaa ole ia makou kekahi manao kanalua no ka pili o ka hewa iaia.

            “Mamuli o ke koho ana ua hanaia kela karaima mahope iho o ka haalele ana aku o ke kaaahi i ka hale hoolulu kaaahi hope loa, oia hoi o Kareila, ua kauohaia aku na makai e huli ma na aoao elua o ke alanui kaaahi. O na makai kumau i kamaaina i na wahi apau o ka aina ua koho lakou ma kekahi wahi a lakou e huli ai, he wahi na lakou i manao malaila i kiolaia ai ka pu.

            “Ma ia ano i huliia ai na wahi apau ma kela ame keia aoao o ka lama mawaena o na kumulaau e ulu ana me ka pili pupuu loa mahai o ke alanui kaaahi, ma keia aoao a ma kela aoao aku o Kanatile.

            “A ma ia huliia ana i loaa aku ai ka pu? Ea, he hana eleu maoli ha ka kela i haania! Aka, eia ka mea pahaohao, no keaha i manaoia ai na ka makai Palani i hoonohoia e kiai maluna o ke kaaahi i pepehi i kela kanaka?”

            “A no ka mea hoi, o kela makai Palani ka mea i ikeia e kaalo mau aeana maluna o ka papa mahai o ke kaaahi no elua a ekolu paha manawa. mai mua a hala ihope, ma ka manawa mua o ka hoomaka ana mai o ke kaaahi e holo no ka nana ana i na tikiki o na ohua.

            “Oia kekahi hana ana, aka, aohe mea nana e keakea aku i kona hele ana imua a ihope o ke kaaahi elike ka nui o na manawa me kana e koho ai. Ma ke aumoe ana iho aohe ona ikeia aku e na ohua, aka nae, he hiki iaia ke ike mai me ka maopopo loa mawaho mai o kona wahi i hoonohoia ai, ia loko o na kaa a pau i hookuu ole ia iho na pale puka aniani ilalo.

            “O kela maku wale no ke kanaka i ike i keia ohua e noho hookahi ana maloko o kana kaa e kau ana. Ua hiamoeia kela ohu, a i ole ua upoi kona mau lihilihi maka. He kuleana ko kela makai o ke kaaahi e ninau hou aku ai no ke tikiki o ke kanaka kaahele, a mamuli o keia kuleana i loaa iaia ia loaa ai iaia ke kuleana e hele aku ai e kiei ma ka puka aniani o ke kaa a ka ohua e moe ana oiai ke kaaahi e holo ana me ka puahi loa, a noi aku i ka ohua e kala mai iaia no kona komo hou ana aku iloko o ke kaa a ka ohua e moe ana. ina no kona ikeia mai.

            “Alaila ua hana anei oia pela, alaila heaha ka hopena?”

            “E ki aku ana oia i kela ohua hiamoe me ka ike ole ia mai. me ka huli pu ialoko o na pakeke o kela ohua me ka eleu loa a hookaawale koke aku iaia.”

            “Aole o’u manao,” wahi a Topina o ke ku-e ana aku, @me kekahi manao mua i noonooia elike me kela e koho ana kekahi kanaka e lawe pu i pu panapana me ia no ka hooko ana aku i kona manao pepehikanaka.”

            “O. me ka maopopo loa e hana ana oia pela!” i pane mai ai o Mr. Hae me ke kalakala.

            “A pehea ke kani o kela pu, aole ana anei e loheia mai e kekahi poe ohua?”

            “Pehea auanei e loheia ai ke kani o ka pu no ka nui loa o ka nakeke o ke kaaahi. O kekahi no hoi o kela makai i hele a kamaaina i ka laina ua kamaaina pu oia i kahi o na alahaka e holo aku ia ke kaahi, a ma ia mau wahi e oi loa ae ana ka nakeke o ke kaaahi e hiki ole ia i kekahi mea ke lohe i ke kani o ka pu, ina no ke kiia ma ia wahi,” wahi a Monisua Hae.

            “Alaila, heaha ana kau hoakaka no kela apana pepa i owiliia i loaa aku ai maluna o ka papahele o ka rumi i loaa aku ai o Reminetona ua make—kela apana pepa me ka inoa Adelaide e kau ana maluna, malalo o ka malama ana a ka haleleka ma Ladana?” i ninau aku ai ka Makaikiu Topina.

            “Heaha hoi auanei ka mea pohihihi ma ia apana pepa, o ka mea maopopo loa ua hukiia ae ia me ka hikiwawe loa mailoko ae o ka pakeke, me kekahi mea e ae i huki pu ia ae. a kaua i maopopo ole aku ia, a ua haule iho nae me ka ike ole ia iho e ka mea nana i lawe ae.”

            Alaila haupu ae la ka Makaikiu Tpoina i ka like loa o keia hoakaka a Mr. Hae me ka ka Lunanana Baida i olelo mai ai iaia, aka nae. ua loaa i ka Lunanana Baida na kumu maikai a kupono no kona manao ana pela. Ma ko ka Lunanana Baida manao ua kuhihewa ka mea nana i pepehi o Reminetona aia ma ka pakeke maloko o ka puliki paha ke daimana a Wilemota i aihueia ai.

            Noonoo iho la ka Makaikiu Topina pehea la e hiki ai ia Mr. Hae ke hoakaka ae no ka huliia ana o ka pakeke maloko o ka puliki, oiai oia e noho ana me ka naaupo no kela hihia a Wilemota, a oiai hoi na mea e ae ma ke kino o Reminetona e paa ana no ma kona kino me ka hoopaa ole ia O keia ka Topina o ka ninau ana aku ia Mr. Hae.

            “Auwe,” wahi a Mr. Hae. “he mea maopopo loa ia i ka noonoo iho. Malia paha ua loaa mai i kela makai o ke kaaahi kekahi lono mai ka akau mai no ka aihueia ana o na daimana a Wilemota, a ina aole pela, alaila ua hana no kela makai mamuli o kona manao iho mamuli o kona ike he lawe pu na kanaka kaahele i kekahi mau waiwai makamae ma ko lakou mau kino, a ua hunaia ma kekahi wahi e hiki ole ai ke ikeia aku.

            “Heaha ka lakou mea i ike ai me keia hihia? He kika ame ke kuka hoopumehana i piho oleia. He pakeke maloko o ke kuka hoopumehana. No ka hoopokole ana i ka hana a ka mea aihue i kamaaina ia hana o ka lawelawe, ua nanao koke iho oia i ka pakeke maloko o ke kuka hoopumehana, me kona manao aia maloko olaila kekahi mea waiwai ani i kau nui ai. Ma ka nana aku me he mea la o keia wahi kana o ka huli mua ana mahope iho o kona ike ana i ka make o Reminetona. no ka mea, he maa mau kekahi poe i ka hookono i ka lakou buke pakeke maloko o ia pakeke me na bila dala banako a i ole mau pohako makamae paha,” alaila hooki iho la o Mr. Hae i kana kamailio ana.

            Noonoo iho la ka Makaikiu Topina he keu aku a ka hupo o ka mea aihue no ka hookoe ana iho i na komolima ma na lima o ka mea make no ka mea aole e nele ana ka nui o ke dala i hooliloia no kela mau komolima e waiwai ai ka mea aihue. ina no kona lawe nei. Alaila i ka ulu ana ae o kona manao no ka makai o ke kaaahi ninau aku la:

            “Ea, pehea e hiki ai ia oe ke hoohui aku i kela pu panapana i loaa ia a olelo iho oe na kela makai o ke kaaahi ia pu?”

            “No ka mea hoi paha aole i loaa ia pu ma ka laina mawaena o Kareila ame Parisa, aka ma kekahi wahi okoa ae. Ke hoomauia mai la no nae ka’huli ana a na makai ma na wahi apau e pili ana i ka laina alanui kaaahi i nei manawa, ma ke ano he hana i maa mau. Aka—“

            Ia manawa ua lohe like aku la laua i kekahi kikeke mawaho mai o ka puka, a no ka makemake ole o Mr. Hae e hele aku e wehe, kahea okoa aku la: “Komo mai,” me ka leo nui, a me he mea la aohe paha i lohe mai ka mea mawaho i kona leo, palua aku la kana kahea ana. He makai kauwai ka mea i komo mai a haawi ae la i kona aloha i ua o Mr. Hae.

            “Heaha keia hana nui au e Duvela i hoea mai la?” wahi a ua o Mr. Hae o ka ninau ana ae i ka makai.

            Alaila, hele mai la ka makai ekolu kaina wawae imua, a haawi mai la i kekahi palapala i kona poo ma ka oihana, a saluta mai la, alaila mei hou aku la ihope ekolu kaina wawae.

            Oiai no ua o Mr. Haae e hahae ae ana i ka wahi leka hoomau mai la no oia i kana kamailio ana i ka i ana mai: “O ka mea mua e huli aku kaua a nana ihope e pili ana i na makua o kela makai ame kona mau kupuna, he moolelo ino wale no ko lakou, o ka lua, o ka pu panapana i kani aku nei, ua loaa aku ia ua hunaia ma kekahi wahi o ka halenoho o ka lawehala. Alaila ia manawa e ala mai ana he ninau—“

            Ua nahae ae la ka wa-hileka ia manawa a hoomaka iho la ua o Mr. Hae e heluhelu i ka manao i kakauia maloko:

“Alaila e ala mai ana he ninau,” wahi hou a ua o Mr. Hae, “nana anei ia pu i kani aku ai? Nau e Topina e heluhelu aku i ke keona o keia aku ai? Nau e Topina e heluhelu aku i ke koena o keia leka,” alaila opiopi mai la oia i ka hapa maluna o ka leka a haawi mai la i ka Makaikiu Topina.

            Hopu aku la ka Makaikiu Topina a nana iho la ma kahi o ka laina a Mr. Hae i kamailio mai ai malaila e heluhelu iho ai. He hoike, pela ka Mr. Topina nana iho i ka manao. No elua manawa kana heluhelu ana iho, alaila hoihoi hou aku la i ka leka ia Mr. Hae me ke kani ana iho o ke uhu.

 

MOKUNA XIII.

 

            O ke kelekalapa a Mr. Hae i hoike mai ai ma ka manawa ana i kamailio mai ai ia Topina, ma ka mea oiaio. he kelekalapa ia e hoike mai ana i ka Lunanana Baida mai ke keena mai o ka oihana makai ma Ladana. E hoakaka mai ana ia i ka lunanana no kekahi hookolokolo ano nui e pili ana no Sanakelaea, ke kanaka i manaoia ai nana i aihue na daimana a Wilemota a i paa ai i ka hopuia ma Dova.

            Ua hooiaio mai o Sanakelea a hooiaio hou i kona hewa ole ma o kona mau hoike la, a ua noi mai e haawiia aku kekahi mau lako kakau iaia, i hiki ai iaia ke kakau iho i kona limakakau no ka nana ana a ka lunakanawai me ka hoohakalia ole, a ua hoole loa hoi oia i ka pane ana aku i kekahi mau ninau e waihoia mai ana imua ona.

            Aohe ana mau hoakaka hou aku i koe e haawi aku ai imua o ka aha; ua lawa loa kaua mau hooiaio ana no kona hewa ole. Ua lawe kokeia mai na lako kakau imua ona, eia nae aole oia i kakau iho,” a hoakaka mai la he makemake loa oia e loaa ke ekeleka hou e laweia aku ana mai Dova aku a i ka Ainapuniole.

            O ka leka ana o ka haawi ana aku i na luna aupuni ma Enelani, no ka hoouna ana i ka haleleka, e kau ana ka inoa Parisa mawaho. Ua hoounaia ua leka la, a ma ka mea i maa mau ia e loaa aku ana ia leka i Parisa ma ia ahiahi no. O kahi i hoounaia aku ana ia leka i Parisa ma ia ahiahi no. O kahi i hoounaia aku ai ka leka ma ke Alanui Makako, helu 95, malalo o ka malama ana a ka Madame Beterama. O ka mea nana ka leka i hoounaia aku ai na, Miss Nole. E oluolu anei ka Lunanana e huli aku i ka mea e pili ana i kela a pau iho la ka manao o ke kelekalapa malaila.

            Aole i liuliu loa mahope iho o ke kaawale ana mai o ka Makaikiu Topina mai ke alanui Makako mai, hoea aku la ka Lunanana Baida i ka halenoho o ka Madame Beterama, helu 95. “Aole ka Madame Beterama ma ka hale nei i nei manawa.” pela ka pane a kekahi kauwa iaia.

            “E pono no i ka Monisua e huli aku nou iha ialoko nei o ka hale ina e manaka ole ana oe i ka pii iluna o ka papahele elua. O ka rumimoe o Mrs. Beterama aia ma ka papahele elua, ua hiki ia oe ke pii iluna me ka pilikia ole, pela ko’u manao.

            “No ka Madame Nole? Ae; eia oia ianei e noho nei, he lede Pelekane opio o ka holo ana mai nei e ike ia Madame Beterama—o kona hoea koke ana mai nei no ia ianei mai Ladana mai, a nona nae, ke manao nei au aole no oia o ka hale nei; he hana kana o ka hele ana i ke ahiahi mamua aku nei aole nae oia i hoi iki mai no kekahi mea, me ka nana ole owai la ia mea e hoea mai ana ianei.”

            Mamua o ka haalele ana aku o ka Lunanana Baida i ka hokele ua hoomakaukau mua oia i kana papa hana, o keia haina i loaa mai la iaia mai ke kauwa mai mamuli no ia o kona haawi ana aku iaia i kekahi apana dala; o keia ke kumu o ka loaa koke ana mai iaia o ka aeia e pii aku oia noluna o ka papaheleelua a iloko hoi o na rumi o ka Madame Beterama.

            “No ka Lede Nole au i nanau mai nei ke hooia aku nei au ia oe i keia manawa aole oia ma ka hale nei i keia manawa,” wahi a ke kauwa o ka pane ana mai me ke kuio.

            “Ina pela e oluolu hoi ha oe e paa aku i ko’u pepa hoolauna a haawi aku ia Madame Nole ke hoi mai oia; mai haawi aku oe i ka Madame Beterama, no ka mea. o ka Maa dame Nole ka’u mea i makemake loa ai e ike. He huaka’i awiwi loa ka’u, eia nae. ua hiki no ia’u ke kali iki maanei oiai oe e pii aku ana i ka hale maluna.”

            “Aohe waiwai o kou kauoha ana mai ia’u e pii iluna, no ka mea. ua olelo mua aku nei hoi au ia oe ua hele o Madame Nole, aole o ka hale nei, aka no ka pau nae hoi o kou kuhihewa e hooko aku au i kou makemake,” a nalo koke aku la ua kauwa la ia minuke, a aole no hoi i liuliu loa ia nalo ana aku oili hou mai ana a i mai la:

            “O ka’u no hoi ia i olelo mua aku nei ia oe aole o Madame Nole o ka hale nei.”

            “Nani hoi ia ua nele ae la. e oluolu hoi ha oe e paa aku i kena apana pepa a haawi pololei aku ia Madame Nole ke hoi mai,” i hoomau aku ai ka Lunanana Baida i kana kamailio ana.

            “O, ua pono kela: na’u ia e haawi aku iaia ke hoi mai.”

            Ma ke ano o ke kauwa a ka Lunanana Baida e nana aku ana he hunahuna kona me ka hoike ole mai i ka mea oiao. me he mea la ua papaia mai oia aole e hoike i kekahi mea aia no iloko o ka hale na lede ia manawa; ia manawa i haawi aku ai ka Lunanana Baida i kekahi apana dala, me ke noi pu ana aku iaia e lawe aku no ka hala i maluna. Ua kunana ua kauwa la no kekahi manawa. aka i kona ike ana mai i ka hapaha ulaula a ka lunanana o ka haawi ana aku, a me ke kali ole iho, lawe aku la i ka lunanana no ka papahele elua.

            O keia kanaka e kamailio pu nei me ka Lunanana Baida o ke kanaka hookahi no ia i inurama like ai me ke kanaka kiakaa he elua hora mamua aku malalo o na lilo o ka Makaikiu Topina. Ua loaa iaia mai ia manawa mai he manawa e hoomakaukau ai iaia iho no na hana o ka la. a iaia e nana mai ana i ka lunanana mailuna a hala ilalo i na wawae, a oiai hoi he kulana maemae moli no ko ka Lunanana Baida ia manawa, ua manao mai la oia he kanaka waiwai a hanohano loa paha keia, elike me ke kulana o ka poe onamiliona.

            I ka holopono ana o ka ae mai ke kauwa mai e lawe aku iaia imua o na lede, alaila hookomo iho la oia i kona pepa hoolauna iloko o kekahi wa-he leka, he wa-hi leka e hikiwawe ai no ke weheia ae, a ia manawa hookahi kauoha aku la oia i ua kauwa laole e wehe ma-lu ae i ua leka la maloko o ka halekuke mamua o ka haawiia ana aku i ka lede o ka hale, no Miss Nole.

            No keia papa ana aku la a ka Lunanana Baida i ua kauwa la aole e wehe mua i ka leka, nana mai la ua kauwa la ma ke ano hoohuoi i ka lunanana, me kekahi mau huaolelo ku i ka hoowahawaha, i ia manawa i pane aku ai ka lunanana i kekahi mau olelo ikaika: “E manao ana anei oe aole au i maopopo i ka holo o na kauawa ame ka lakou hana?”

            Nanakee mai la ke kauwa i na aahu o ka lunanana ma ke ano kaholo no ka lua o ka manawa, alaila huli aku la hele.

            “He kanaka malihini kela no na aina e mai e Mareko, aia mawaho,” wahi ana o ka pane ana aku i ke kuke, iaia i komo aku ai iloko o ka halekuke. “Mai hea mai nae la oia aohe hiki ia’u ke ike i nei manawa. Ma kekahi amanawa e kamailio mai ana oia ma ka olelo a ko Maseile poe, a i kekalii manawa e kamailio mai ana ma ka olelo a ka lahui Suisa. Me he mea la ua olelo aku nei ka wahine malama hale eia no na lede iloko nei o ka hale, no ka mea, ua hoopaakiki loa mai nei no oia i ke koi ana e ike i na lede.

            “Heaha la ka hana pono e hana ai me keia pepa hoolauna ona ana o ka haawi ana mai nei? Ke manao nei au e huhu mai ana ka Madame Beterama ina au e olelo aku ana aia no kela kanaka malalo kahi i kali ai no ko’u hoi hou aku mahope o ko’u lawe ana mai nei i ka leka.”

            Heaha no kou mea o ka olelo ana aku nei i kela kanaka e kakali mai ia oe o kou hoi hou aku. He kauoha kau i hawiia mai ai, aole anei pela?”

            “Pela no, aka, pehea iho la la hoi keia ulia ana, aka, ma ka’u nana aku nei i kela kanaka, he kulana kiekie kona i like ole me kekahi poe apokaka o kakou nei. Ma ka’u nana aku nei iaia he kanaka kulana oia a he kanaka paa rula pu. Aole paha oia he kaukaualii a i ole he ona miliona a luna aupuni kiekie, aka, he kanaka kulana keonimana maopopo nae oia!”

            “Ia manawa i hoakaka mai ai o Mareko i kana mea pono e hana aku ai oia hoi kona lawe ana aku i ka leka e haawi i ka lede Pelekane opio, o ka hoi koke ana mai ka holoholo mai ma kekahi manawa aku i hala.

            I ka ike ana iho o Lidia Madoka, kekahi o na kauwa i ka inoa e kau ana mawaho o ka wahi leka ua hoike ae la oia i kona ano kahaha ia manawa, a ua hiki ole nae iaia ke hoakaka ae i kona manao, wahi ana. Aohe hiki iaia ke ike owai la ka malihini.

            O ka palapala e hoakaka ana he Inanana, o ia ka Baida i hookomo ai iloko o ka wahileka. O na huapalapala i kakauia maloko o ia palapala me he mea la na ka lahui Kaledea. koe nae no na maka o Likia Madoka, no ka mea ua ike koke iho la no oia ia manawa he manao ano nui aia maloko o ka leka.

            No kekahi manawa ko ka Lunanana Baida ku ana e kali me ka hoomanawanui, a no ka hakalia loa o ka loaa mai o ka pane mai ke kauwa mai, manao iho la oia ua pololei no ka ke kauwa o ka olelo ana mai, “aole maloko o ka hale na lede.”

            Ina mahope o keia kali ana ana e hoikeia mai ana “Aole na lede maloko o ka hale,” me ia hoiko aku no ona i kona kulana ma ka oihana, alaila aohe kahua ana e kanalua iho ai ua pololei ka olelo a ke kauwa. a ua hooiaioia no hoi kana mea i koho mua ai o Mr. Sanakelea i’o no ka mea nana i aihue na daimana a Mr. Wilemota, ke kakauolelo mua a Wilemota i nalowale honua ia he mau mahina mamua aku, a ua hana pu oia me kekahi mea ma ke ano hui. i maopopo ole iaia owai la ia mea, a ua loaa mai ia mau daimana i ka hoahui o Sanakelea, a na ia hoahui ona e hoolilo aku ma ke kuai i kekahi poe okoa aku.

            Ma ia ano he kanalua loa ka hiki ke olelo ae o Reminetona, i make ai maluna o ke kaaahi, ke kanaka nana i aihue ia mau daimana, aka nae ma ka hoomopopoia ana ma kekahi apana pepa, o leka mau daimana i aihueia ai ua hoounaia mai ma kekahi puolo e Sanakelea ponoi, a i ole e kona hoahui paha ma ia hana. i kekahi mea i maopopo ole ka inoa maloko o Parisa, kahi e loaa ai, ina no ka loaa nei.

            Ma keia manawa, ua loaa mai ka ike iaia ma o ke kelekalapa la ua huliia ke kino o Sanakelea ma Dova, a aohe nae he mau diamana i loaa maluna o kona kino a mloko hoi o kana paiki. Ma ke kapae ana ae ia noonoo no kekahi ma na wa o kela pepehiia ana o Reminetona maluna o ke kaaahi laweleka o ka po ame ka huliia ana o kona mau aahu, ma ka hoomaopopo aku he hana hua ole loa, ina o kela manao mua i kohoia ai oia ka pololei, a o kela puolo maloko oilaila na daimana ua hoouna mua ia aku ia Miss Nole, a i ole, helu 95. Alanui Makako, ka mea mua a Sanakelea i noonoo ai, mahope iho o kona hopuia ana, e kakau aku i kekahi leka.

            “Aole paha pela, no ka mea. mamuli o kana mau mea i kakau ai ma kana leka i loaa aku ai ka moali ike i na makai. He mea waiwai nona ke kakau ana aku i leka i ke Alanui Makako; aole anei oia i manaoia e hoea aku ana I Parisa ma ke kaaahi laweleka o ka po.

            Ina no kona hoouna aku i kekahi kelekalama i Parisa e hoohuoiia ana oia, ina hoi ma ka leka, malia, e pakele ana ia i ka ikeia. Ua loaa mai anei kela puolo i kekahi mea ma Parisa nei, a o Mess Nole anei ka mea i hoounaia mai ai ia puolo. Ina ua hoounaia mai kekahi puolo i kekahi mea maanei, malia he mea paha ia i ikeia e kekahi poe.”

            Oiai ka Lunanana Baida e noonoo nui ana no keia mea ua hoohikileleia ae la kona noonoo i ka hoea ana mai o ke kauwa i hela mua mai ai e pane i kana bele o ka hookani ana aku.    

            “He wahi onawaliwali liilii ko Miss Nole mamuli o ka loaa ana i ke anu ma ke ahiahi mamua aku nei, eia nae, ua ae mai nei no oia e hookipaia aku ke keonimana nana ka pepa hoolauna i hoounaia aku nei iaia.”

            “O. me ka mahalo!” i pane aku ai ka lunanana Baida i ke kauwa. He minuke ma ia hope iho ua hookipaia aku la oia i kekahi rumi hooluana akea, a iaia i komo aku ai. ku ae la kekahi mau lede elua iluna. O na lede elua no keia a ka Lunanana Baida i ike ai ma ka hale waiho o na kino make o ke aupuni i kekahi la mamua iho.

            “O Miss Nole anei oe?” i ninau aku ai ka lunanana me ka paa rula.

            “Ae: owau. a ina he manao kou e kamailio mai ana, e hoike mai oe ia manao imua o nei lede, o Mrs. Beterama keia, ka haku nona keia hale, a o kuu hoaloha oiaio hoi o nei aina malihini,” i pane mai ai ka lede opio o na wahine elua me ka leo oluolu loa.

            “O. me ka mahalo ia manao ou; aohe no ko’u he manao huna i hoea mai la, aka, he manao i hiki ia olua a elua ke hoolohe mai. O ka’u hana i hoea mai la oia keia, he hana i pili ia oe hookahi wale no, a ia oe no au e ninau aku ai, a e pane mai no hoi oe ma na ninau apau i kupono ia oe ke pane mai.

            “Ua loaa mai ia’u kekahi hioke piha mai ke kulanakauhale mai o Ladana maluna o keia kumuhana a’u e hoike aku ana ia oe. no ia loaa ana mai i hooholo iho ai au e hele kino mai a e hui pu me oe a kamailio pu maluna o ia kumuhana.

            “Ua maopopo ia’u ko;u kuleana ole e hele mai ai ianei ma ke ano komohewa. me ka loaa mua ole mai o ka aeia e oe, a i hoike aku no hoi au ia oe eia au imua ou mamuli o kou oluolu wale mai no. a ina no e kipaku mai ana oe ia’u e hele, aohe o’u aa e paa iho ai maanei.

            “Eia nae hoi. oiai hoi ua oluolu loa oe, ma ka hookipa ana mai la ia’u imua ou, e haawi hou aku ana au i ko’u mahalo. a e oluolu hoi oe e noi aku au, no kou mau pomaikai, pomaikai ponoi, i hoomaalahi ia ae ai hoi ka kaua hana. elike nae me ka hiki ia oe ke hana pela, a i mea hoi e loaa mai ai na haina kupono no ka’u mau ninau e waiho aku ana imua ou, he mau ninau i una mai ia’u mai ka oihana makai mai ma Ladena.

            “O keia hana a’u i hoea mai la imua ou no ka mea no ia e pili ana i kou kamaaina ia Ausetina Wotale Sanakelea, e paaia mai la e ka oihana makai, no ke kumuhoopii e ku e ana aia he aihue i na daimana a Wilemota.”

            “O. he lawehala o Sanakelea i hopuia mai la ma ke ano kuhihewa loa.” I hooho mai ai ka lede opio, me ka helehelena kaumaha. “He hopuia ana mai la kela o Sanakelea ma ke ano kuhihewa lapuwale loa! Aole i hawahawa iki kona mau lima i kela mau daimana, he hana hupo loa kela i hanaia mai la maluna ona a i ole—“ a hoomaha iho la oia, me ka owiliwili na ae i kona hainaka. “ a i ole he hana manaoino maoli, he hana lokoino haahaa loa o ka mea manaoino.”

            Alaila hiolo iho la kona mau waimaka.

            “O; e Adela, kuu keiki, mai hookaumaha i kou naau,” i hoonana aku ai ka lede aoo me ka nee ana aku a pili ma ko Adele aoao.

            Adela? O keia inoa ka ka lunanna i palua a pakolu iho ai ke kamailio ana, iloko wale iho no nae ona, me ka lamalama na ae la o kona mau maka i ka hauoli no kona lohe ana i  keia inoa, he inoa ana e hoomanao ana ua aneane loa elike me kela inoa Adelaide i ikeia ai maluna o ka apana pepa i loaa ai maluna o ka papahele o ke kaa i loaa aku ai o Reminetona ua make.

            No ka ike ana mai o ka lede opio i ke ano-e o ka helehelena o ka malihini, hoopau ae la oia i kana uwe ana , a huli mai la e nana i ka lunanana me ke kamailio pu ana mai me ka leo oluolu loa a maikai loa hoi ana i manao ai o ka maikai loa ia.

            “He mea maikai anei ia oe ke ninau mai ia Miss Nole nei? Aohe maikai o kona ola kino. elike no hoi me ia au e ike mai la, he mea pono anei ia oe ka hoehaeha ana mai iaia me kau mau ninau, me ia ike mai no ou i ke kupono ole iaia ke pane aku i kau mau ninau?” i komo mai ai ka Madame Beterama ma keia wahi.

            “Ke kaumaha nei au no ka lilo o na ninau a’u e waiho aku ana imua ona i mea nona e ehaeha ai, aka, ina he makemake no kona e hoopanee i ke kamailio hou ana a kahi wa aku aia no ia iaia.

            “Eia au malalo o ko olua mana—ina no ko olua olelo mai e hele au, o ko’u ku aku no ia e hele, a manao au he oi aku ka maikai, eh oi aku paha ka maikai—“

            “E hoopanee a kahi wa aku alaila oe kipa hou mai,” i pane mai ai o Madame Beterama. “aohe o’u makemake la e ike aku i nei kaikamahine e hoehaehaia ana ma keia ano.

            Ma na ano apau aohe no he kupono o kona hele ia ana ami e hoehaeha elike iho la me keia oiai oia e noho ana maloko o kuu hale, a malalo hoi o kuu malu, ame ka’u malama ana. Ke amopopo ole nei ia’u ke kumu i loaa aku ai ia oe ko;u wahi e noho nei ame ko’u inoa, a ke manao pu nei nohoi au aole i naauao iki ko maua hookipa ana mai nei ia oe ianei.”

            “Aole au e ku e aku ana, elke me kau i manao ai oia ka mea maikai loa e hanaia ai, he hooko wale aku no ka’u, e ka Madame,” i pane aku ai ka lunanana me ka hoohaahaa loa iaia iho. a o kona hoomaka ae la no ia e ku hou liuna no ka hoomakaukau ana e hele aku, elike me ia a ka hakuhale o ke ani ana mai i kona lima iaia nei e hele.

            Aohe mea pane leo ma ia hope iho. Kulou aku la ka lede aoo imua a nana aku la i ka lede opio e ha’uha’u uwe ana no ia manawa, a hawanawana aku la i kekahi mau olelo ma ka pepeiao, he mau olelo e hoonana aku ana i ka lede opio, pela ka ka Lunanana Baida nana aku, oiai no oia e ku ana iluna.

            No ka hoomau loa o ka lede opio i ka uwe, a no ka ike ana iho no hoi o ka lunanana ma kona aoao ka hewa no kona hoea ana aku, komo iho la ke aloha iloko o kana naau no ka lede opio. Emi mai la oia ihope elua a ekolu paha kaina wawae, alaila kakali hou iho la.

            “I ka wa hea au e hoea hou mai ai?” i ninau aku ai oia me ka leo malie i ka mea i kaumaha ka naau, a ma ka olelo ana ae i ka mea oiaio, ua komohia i’o iho la no iloko o ka naau o ka malihini ke aloha, no ka mea. me ka leo haalulu oia o ka ninau ana aku, a i mea e hoonalonalo iho ai i kona ikeia mai oia kekahi i ehaeha, kunu iho la oia a ikaika.

            “O. e ae aku oe i kela keonimana e noho mai, ke oluolu mai nae hoi oe,” i noi ae ai ka lede opio i ka lede aoo, me ka huli ana aku o kona alo i kahe e, me ka mau no nae o kona hamaka ma kona mau maka. “O. nawaliwali maoli no ma ko’u aoao no ko’u ae ana aku nei owau o Miss Nole.”

            “E hiki ana no nae ia oe ke hoomanawanui. e kuu keiki?” i ninau aku ai ka lede Beterama.

            “O, hiki no! Hiki no! E hoomanawanui no hoi paha au i hiki ai hoi e loheia aku ka manao o keia keonimana ame kana mau mea e hoike mai ana—O. ino maoli no kela poe i imihala mai la ia Sanakelea! Ino loa, ina loa!”

            Malia paha he hana opea wale no kela i ke kanaka opio hala ole,” i pane aku ai ka Lede Beterama.

            Alaila nana mai la ka lede opio i ka lunanana a imo mai la e hoi hou aku maluna o ka noho e noho ai. o ko Mr. Baida hoi hou aku la no hoi ia a noho iho la. a ke olu la oia ia manawa no ka aeia ana mai e papaleo oia me na lede, me kona kunu hou ana iho nae mamua o kona noho ana iho.

            “E oluolu oe e hoakaka mai ia’u i ka mea e pili ana ia Mr. Sanakelea,” i noi mai ai ka lede opio. me ka waiho ana iho i kona hainaka ilalo maluna o kona u ha, a nana pono mai la i ka Lunanana Baida me ka minoaka ma kona mau papalina.

            “Ua makemakeia oia e ka oihana makai,” i pane aku ai ka Lunanana Baida.

            “Heaha iho la ke kumu o kona makemakeia ana mai?”

            “No ke kumuhoopii hoi a’u i hoike mua aku nei ia olua.”

            “Kupanaha no ka! Leka mai nei hoi oia ia maua aia oia iloko o ka halepaahao, a mai ke kulanakauhale mai o Dova oia o ke kakau ana mai. Ma ka hale hoolulu kaaahi ma Dova kona wahi i paa ai i ka hopuia e na makai. Aole ka paha oe i lohe no ia hopuia ana ona?”

            “O, he oiaio, ua loaa oia i na makai? Mai Ladana ka hoike i loaa mai ai ia’u, eia nae, ma ka mea e pili ana i ka aihueia ana o na daimana ka pahanui o ka moolelo o ka hoikeia ana mai. Alaila ua loaa i’o anei oia ia lakou?”

            Ua maopopo no kela paa ana o Sanakelea i ka hopuia e na makai ma Dova i ka lunanana, he ninau hoomaoe wale aku no nae keia ana i ka lede.

            “Ua loaa oia!” i hooho like mai ai na lede i piha me ka inaina. “Aohe paha o Sanakelea i hupu iki e paa ana oia i ka hopuia me ka loaa ole o kekahi manao e huliia mai ana kana mau wahi apau e hele ai, o kona paa ana nae kana mea i ike? Oia ke kanaka hope loa e ninauia a e huliia ai hoi!” wahi a ka Madame Beterama o ka pane ana mai me ka piha inaina loa.

            “Ae, pololei la, oia ke kanaka hope loa e ninaninauia.” I komo pu mai ai o Miss Nole e kokua i ka manao o ka madame.

            “Ma ka po nei i loaa mai ai kana leka ia maua. Ua kakau mai oia mai Dova mai no ka hoike ana mai oiai oia e manao ana e holo mai no nei ma ka moku o ka po nei ia manawa oia i hopuia ai no kekahi kumu hoopii lapuwale no. oia hoi he aihue i na daimana a Wlemota, a no kona makemake ole e hoopuiwa mai ia maua, ua maka’u oia ma kana nana aku he ikaika loa ka manao ku-e iaia, a malia o lilo kela hihia i mea nona e komo aku ai iloko o ka halepaahao.