Ka Nupepa Kuokoa, Volume LVII, Number 45, 7 November 1919 — KUU UNCLE ALOHA MR. KAHIONA KA UA HALA. [ARTICLE]

KUU UNCLE ALOHA MR. KAHIONA KA UA HALA.

Mr. Solomon Hanohano, Aloha oe:—E oluolu mai kou ahonui no ka'u puolo luuluu he aloha, no kuu unele Mr. Kahiona Ka, i hala aku la ma kela ao mau loa, a nau hoi ia e aha'i mama aku ma na ipuka hale o kela ame keia home i ike mai ai na makamaka, na hoaloha ame ka ohana o kuu unele aloha. Ua haawe oia i na haawina ehaeha no na mahina ekolu i kaahope aku nei ma kona home aloha ma Kainaliu, Kona, Hawaii, a ua hoaoia no hoi ma na ano apau no ka huli ana i mea nona e pono ai, a ua hiki ole i ka ike o kolaila mau kauka e hoopakele ae iaia. Nolaila ua manao ae ka ohana ame kana wahine e hele mai no Honolulu nei i kahi nui o ka ike, a ua hana iho la ke kauka i ko lakou ike, a ua hiki

ole. Ua lawe aku la no ka Makua mana loa i kona kuleana o ka uhane, a waiho iho la i kona kino wailua na kana wahine ame ka ohana e auamo aku i na luuluu kaumaha. Ma ka home oia o Carrie Robinson kahi i noho ai, a mailaila aku oia i lawe loa ia ai no ka Haukapila Moiwahine, no na la pokole wale no he elima, a ua pauaho mai oia i keia ola ana ma ka po Poakolu nei, hora 3:15, Oct. 30. He hoahanau oia no ka ekalesia o Lanakila, Kona, Hawaii, a iloko oia o ka hana maikai a ka Haku a pauaho wale aku la no oia. E ka ekalesia o Lanakila e, ua pau ko oukou lohe hou ana i kona leo, ua hala oia no ka wa mau loa. Ua hanauia o Mr. Kahiona Ka ma Kawainui, Kona, Hawaii, ma ka la 18 o Iulai, 1864, mai ka puhaka mai o Mrs. Kailiakaale Ulii A. Ka, nolaila ua piha iaia na makahiki he 55 o kona hanu ana i na ea oluolu ma keia aoe a ma ke ahonui o ko makou makua Carrie Robinson, i hoihoiia aku ai kona kino wailua ma kona home aloha ma Kainaliu, Hawaii. Nolaila, ke haawi aku nei au ame ka ohana ame kana wahine aloha i ko makou hoomaikai palena ole ia oe e Mrs. Carrie Robinson, no kau mau hana maikai, a he mea i na makou e poina ole ai no ka wa mau loa; a na ke Akua e kokua mai ia kakou apau loa ma ka inoa o Iesu Kristo, amene. O makou iho no me ka luuluu, MRS. KAHIONA KA, MRS. LIZZIE K. AIU, CHAS. K. AIU, Honolulu, Oct. 31, 1919.