Ka Nupepa Kuokoa, Volume LVII, Number 45, 7 November 1919 — HE HOALOHALOHA NO MRS. LIMALOA MAKEA. [ARTICLE]

HE HOALOHALOHA NO MRS. LIMALOA MAKEA.

Oiai aole o kakou home e mau loa ana maanei. Pela iho la ka pahola ana ae o ka lono i ke kakahiaka Pakolu poniponi wale, o Mrs. Limaloa Makea, eia ka ua hala iho la. Mawaena o koonei mau mea luuluu, ua kuu iho la i na luhi o keia ola ana ma ka Poalua, Oct. 14, 1919, ma ko laua home, imua o kana mau mea aloha he kane, he kaikamahine ame na lei moopuna, a hele hookahi aku la i kela Edena mai, mala maikai, home e malu a oli mau ai, ma keia home honua, he mea kaumaha no, ke kau ana mai o ka lima mana o ko kakou Haku, a hookoo ae la i ka pili aloha ana me ke kane o na la opiopio, a pela hoi ke kaikamahine ame na lei moopuna, ka manaolana o na la hapauea. E ka makuakane, mai maka'u a mai kaumaha, na haumana a Iesu, kali me ka hooikaika, a mamuli maha no. O keia haawina iloko o kou home, nou makou e komo pu nei e kumakena, a oiai, ma ka aoao o ka Ekalesia, Kula Sabati ame ka Ahahui C. E, o Hanapepe, a ma o ko makou mau komite la, ke kumakena pu nei kakou no kau mea aloha, a no ka mea, ua hala ka malamalama o ka home, ua kau mai la ke ko'iko'i maluna o kou hokua, o na hoomanao ana o na la ame na makahiki i hala, ke hoihoi hou mai la ke au o ka manawa i na hoomanao ana o na la opio, na la o ka hauoli, aka, ke pa-e mai la ka leo aloha o ko kakou Haku mai o lilo loa mai. E ka mea luhi, hoi mai, ke kali a ke kiai nei Oia nou, a no'u nei. E ka mea huli hoi mai, e hoole anei i na pomaikai lani, pomaikai nou a no'u nei? E leha aku kou mau maka ina mauna, mailaila auanei ke kokua e hoea mai ai, nou, a no kau mau lei, aloha nui oe e Mr. Makea, ko makou hoahanau iloko o Kristo, a pela hoi me oe e ke kaikamahine makuahine ole, Mrs. R. Kaneheokalani Kaohi, me au lei keiki, a no ka mea o ka makuahine i hala he hoahanau oia no makou, he hoa paahana pu iloko o keia ekalesia, Kula Sabati ame ka Ahahui C. E. o na Makua, a maluna ae o na mea apau, na ka Haku no nona keia kino ame ka uhane e lawe aku i na luuluu ame na kaumaha, mai o oukou ae. Me ka mahalo nui i ka Lunahooponopono. O makou no na komite. FANNY SABO, LIZZIE PAUOLE. SAM MALIEKAI. Hanapepe, Oct. 26, 1919.