Ka Nupepa Kuokoa, Volume LVII, Number 41, 10 October 1919 — KO MAKOU PAPA ALOHA UA HALA [ARTICLE]

KO MAKOU PAPA ALOHA UA HALA

Mr. Solomon Hanohano, Aloha oe - E oluolu mai kou hanohano, e hookomo iho i keia puolo waimaka a ke aloha, hoopihaia a lawa, e kau ae la maluna, ma kahi kaawale o ko kakou Kilohana, no ko makou papa i aloha nui ia Mr. Ah Ke (Pake); ua haalele mai oia ia makou na keiki ma ke ahiahi Poalima Sept. 26, 1919, hora 4:30, a kikoo mai la na lima mana o ka Haku aloha i ka uhane o ko makou papa aloha, a hoonoho aku la ma ka home a ke Akua hoahu ai no na mea kino apaa. Aloha no, luuluu wale! Ua hanauia ko makou papa aloha ma Kina, i Oct. 23, 1821; i ka 24 a oi o kona mau makahiki haalele oia ia Kina, holo mai no Hawaii nei i ka 1845, mawaena paha o ka 1853 ame 1854, mare ia me Miss Kailimahuna Kapule@, ko makou mama i aloha nui ia, i ka 1868; lilo ko makou papa i kupa Hawaii a loaa pu hoi ka mana koho baloka. Mai ko laua mau puhaka mai he 16 ko makou nui, he 8 nae e ola nei, he 8@ ua hala mua ma kela ao ma o. Maiwaena ae o keia mau keiki ewalu i koe mai he 50 moopuna kuakahi, a 35 moopuna kualua, a waiho iho la oia ia makou na keiki me na moopuna mahope nei, e u aku me ke kaumaha o ke aloha makua. Iwaena nae o makou na keiki apau, o ko makou helu elima o ka hanauia ana mai, oia o Mrs. Kealoha Akimo, oia ke keiki imua o kona alo ahiki i na sekona hope loa o ko makou papa aloha i haalele iho ai iaia, a ia makou apau. Ko ae la ka olelo a ke Akua ma o Kekahuna la, "hele ke kanaka i kona hale mau, hele ka poe kanikau ma ke alanui, moku ke kaula dala, naha ke kiaha gula, naha ka pakeke ma ka punawai, naha hoi ke kaa ma ka luawai." O makou o na keiki, ke haawi aku nei makou i ka hoomaikai i na hoaloha ame na makamaka i ke komo pu ana mai i ka huaka'i hoolewa o ko makou makuakane i haalele mai i keia ola ana. Nolaila, ke hoomaikai ae nei makou na keiki apau i ka Haku mana loa, i Kona malama ana i ko makou papa aloha. O makou iho no na keiki iloko o ke kanikau, MRS. HIWAULI AKAKA, H. KAHALEWAI KE, MRS. KEALOHA AKIMO, MRS. ROSELINA WIKOLI, JOHN KE, DAVID A. KE, SIMEONA MAKUA KE, MRS. MARY LEAL.