Ka Nupepa Kuokoa, Volume LVII, Number 37, 12 September 1919 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

He Moolelo no OLIVA ESEKOTA

Mai ke Kulana Haahaa mai Ahiki i ke Kulana Kiekie - He Moolelo i Owili Pu Ia Iloko o ka Ehaeha ame ka Hauoli.

 

            "Aole au i hehena i keia manawa, akahi no a hoi pono mai ko‘u noonoo maikai," wahi a ka Haku Kale, me ka minoaka ma na papalina, he minoaka o ka hauoli no ka mea ua hoea mai i ka hookoia ana o kona iini. "Ua aneane maoli au e hehena, aka ua lilo nae kou kaikaina nei, ihoopakele no‘u. i ka manawa i kokoke loa aku ai au. e kaa ma kela aoao o ka pali kuhoho, e hiki ole ai i ka ike ame ke akamai o ke kanaka. ke hoopakele ae. E Kakalina, o kou kaikaina nei aku ana ka‘u wahine mare!"

            Kulou iho la ka Haku Kale a honi iho la ma ka lae o Oliva. iaia i hooki iho ai i kana kamailio ana mai, me ka hoopili loa ana aku i ke poo o Olva iloko o kona umauna, ka mea nana i hoopuiwa hikilele loa aku i ko Kakalina manao. a noho okoa aku la oia ilalo, e hiki ole ai iaia ke kamailio hou mai.

 

MOKUNA XXI.

            Me ka naau i hoopihaia me ka hauoli. i huli hoi aku ai ka Haku Kale no kona hokele, mahope iho o ka hoihoi ana aku i na lede opio no ko laua home. a o ka hana mua loa, ma kekahi la ae, o ia no kona hoouna ana aku he leka na kona makuakane, e hoike aku ana, ua hoopalau oia me Oliva, me ka nonoi ana aku i kona makuakane, e ae mai oia e hookipa aku i kana wahine. ma ke ano he kaikamahine nana.

            I ka wa i loaa aku ‘ai o ka leka i kona makuakane. he keu aku o kona huhu, a hui pu iho, me ka hoike a na nupepa, e haawi ana i na hoomaikai ana i ka haku opio. no kona laki i ka mare aku me kana wahine u‘i. ua hooi loa ia aku ka piena o ua makuakane nei. ahiki i kona hoohiki ana, a ole loa oia e nana hou mai ana i ka Haku Kale. ma ke ano he keiki ponoi nana.

            He mea oiaio, mai kinohi mai o ka ohana o ka Haku Hale, aole he hookahi iwaena o lakou i hoohaahaa ma ka mare ana me kekahi kaikamahine, a kanaka opio paha. aka ua mare wale no lakou, me ka poe i kulike me ko lakou kulana kiekie. nolaila ua lawa kela mare aku o ka haku opio me kekahi wahine, haahaa, i kumu e piena loa ai kona makuakane. elike no hoi me ka poe i nana mau i ko lakou kulana. he mea ano nui loa ia iloko o ko lakou ola ana.

            Mamuli o ke kukahala-ke loa o ka makuakane o ka Haku Kale. ua hoi hou mai la kona ma‘i kau, ahiki i ka hoouna okoa ia ana o na kauka e hele mai e nana i kona pilikia, a elike me kekahi pipi bulu i kupeeia na wawae, pela iho la ke kauka i hoomalielie aku ai i kana ma‘i. ahiki i ka maliu ana mai i kana mau a‘o ana.

            I ka hala ana o na mahina o kela noho ana o ka makuakane, me ka piha huhu no kana keiki, ua halihaliia mai la ka lono iaia, e kona mau hoaloha, e hoike mai ana no ka hauoli o ka haku opio. a ua kupono maoli no hoi kona koho ana ia Oliva i wahine nana, akahi no a akakuu mai ka manao huhu o ua makuakane nei, he hoomalolo wale no nae no ka manawa, no ka mea i ka hala hou ana o kekahi mau mahina. i ka wa i loaa mai ai o ka leka a ka Haku Kale, e hoike mai ana. no kona mare ana i kana wahine, a e hoihoi mai ana oia no kona home, ua hooi loa ia aku kona piena, me ka pane okoa ana aku i ke kauka, i ka wa i hele mai ai e nana i kona ma‘i.

            "Manao iho la paha keia keiki, he hoihoi au ke ike aku i kana wahine, a e hoolilo mai ia‘u me he kamalii la." wahi ana me ka noke okoa ana iho i ke ku‘iku‘i i ke pakaukau. "E waiho ia paha e kela keiki a hala aku au ma kela ao. alaila hoihoi mai oia i kana whine. nolaila, o ka‘u kauoha wale no ia oe e kuu kauka, e lawelawe mai oe i kau mau hana maluna o‘u, aia ka pono, o ko‘u hala e aku, ma kela ao, e ike ole aku au i wahine hanakeaka.

            "Ina aole e hiki ana ia oe ke hoopokole mai i ko‘u mau la, alaila e puhi okoa ia aku ana keia hale e a‘u i he ahi, he oi aku ko‘u ike ana aku i ka puulehu, mamua o ka hoolilo ana mai o kela wahine hana keaka, i keia home. i wahi nona e hoikeike ai i kana mau hana keaka, ku ole i ka hoihoi."

            "Mai hoopilikia i hou noonoo e kuu haku," i pane iho ai ke kauka me ka hoomalielie ana  ua haku aoo nei. "Ma ka‘u may mea i lohe mai ai mai ka nui mai o na kanaka, he hookahi wale no a lakou mea e akena nei. o ia no ka akena ana i ka laki o ka Haku Kale i kela wahine, a aia na manao lili no kau keiki, no ka laki o ka loaa ana iaia he wahineo kela ano. a o ia ka‘u e olelo ak unei ia oe. e hoopau kou manao huhu no kau keiki, ame kana wahine. aka e hookipa mai oe ia laua me ka maikai."

            Aole i‘o paha ko‘u hookipa mai i kela wahine!" i pikanana ae ai ua haku aoo nei. "O ke keiki i aa e hoohaahaa i ka inoa o kona ohana. ua kumakaia oia iaia iho. a ua paa na puka o keia home iaia. ame kana wahine. Ua hiki no i kela keiki ke hoihoi aku i kana wahine, no kekahi o kona mau hale e noho ai, me ka hoikeike ole mai i kona helehelena imua o‘u."

            "Malia paha no kou ike ole i ka wahine a kau keiki, pela oe i hoopaakiki loa ai aole e lawe mai iaia i hunona nana," i hoolalau aku ai ke kauka ma ke kamailio ana.

            "He oiaio. aole au i ike i kona helehelena, aka nou, ke ole au e kuhihewa, ua lu aku oe i kau mau dala, ma ka hele mau ana maloko o ka halekeaka, e nana ai iaia, o ke kumu no ia o kou mahalo i kela wahine. I ho makou mau la opio, in a he poe wahine u‘i kekahi, e haawi aku ana no makou i ka mahalo. aole nae makou e aa ana e hoohaahaa ia makou iho ma ka mare ana aku i kekahi o lakou i wahine," alaila hilinai mai la ua kanaka nei ihope, me ka hele o na maka a hulili i ka huhu.

            "Ke manao nei au e kuu haku, ua kuhihewa loa oe, no ka mea, ua loli ke au o ka manawa, he okoa loa ka noonoo o na kanaka o ko ouau, a lie okoa ka noo noo o na kanaka o keia manawa. aole a lakou nana ma ke kulana o kekahi wahine. aka ma ko lakou helehelelena ame na kalena i loaa ia lakou."

            "Aole loa e hiki ia oe ke hoohulihuli mai i ko‘u noonoo ahiki i ka manaoio ana aku he pololei kena manao ou. O ka Lede Polena ka‘u wahine i manao ai na ka Haku Kale, a ua makaukau loa kela wahine e haawi mai iaia iho, i na manawa apau, o ka pilikia wale no, aole kuu keiki i nonoi aku iaia."

            "Ma ia wahi e kuu haku. ua mare ia ka Lede Polena me ka Makuika o Elikona. a mahope aku ka Haku Kale i mare aku ai i kana wahine."

            "Heaha auanei ke kumu i mare aku ai ka Lede Polena me ka makuika, mamuli wale mai no o ke opulepule o kuu keiki, a ua pomaikai maoli kela lede, i kona lilo ole ana i wahine na kekahi kanaka pupule, a no kela kaikamahine hana keaka ka‘u minamina, i kona lilo i mea pauaka wale ia e kuu keika paakiki."

            "Ua heluhelu nae paha oe i ka haiolelo a ka Haku Kale o ka haawi ana ae ma ka aha ike a ke kuhona Italia ea? O kela kekahi o na haiolelo maikai loa."

            "Aole o‘u makemake e heluhelu i ka haiolelo a kekahi kanaka pupule, a in a e noke mai ana oe i ka pai i ka Haku Kale, alaila e hoopauia aku ana kou kamilio no kela keiki lapuwale," o ka noho kamau no hoi ia o ke kauka, aole he kamailio hou aku no ka Haku Kale, no kona ike he hoo mahuahua wale ana aku no ia i ka piena ame ka inaina o ka haku aoo.

            Iloko no nae o kela huhu me ka hoowahawaha o ka makuakane i kana keiki, no ka mare ana i ka wahine. i hoihoi ole ia eia, aia no iloko o ka pohai o ka poe hanohano a lalawai o ke kulana kiekie, a e ike mau ana no hoi oia i ka noke ia o ka wahine a kana keiki i ka pai i kela ame keia manawa.

            Ma kekahi manawa nae a ke kauka o ka hele hou ana mai e ike i kana ma‘i ua hoohele hou aku la ka laua kamailio ana ahiki i ka hoala hou ia ana mai o kela kumuhana kahiko, e pili ana i ka Haku Kale ame Oliva, a ia wa i piena hou mai ai ua haku aoo nei, me ka i ana mai.

            "Ua like pu keia wahine a kuu keiki, me kekahi kii mabala. a o na wahine oloko o na halekeaka. ua noke wale i ka hamo i ko lakou helehelena a keokeo i ka panda, o na wahine o kela ano, ua like lako me na pua hoou‘iu‘i wale iho no. aole nae he ala onaona iloko o lakou."

            "No kou hele mau ole maloko o na halekeaka, o ke kumu iho la ia o kou noho pouliuli i ka loli loa o na wahine hanakeaka o keia manawa. i ko na wahine i maa i kela hana o ke au kahiko. no ka mea aole o ka Haku Kale wale no ka mea i hoohihi ia Oliva, aka aia pu he lehulehu o na kanaka opio hanohano e kau aku nei na maka maluna o Kakalina, kona kaikuaana."

            "Ke ice nei au, aia oe ma ka aoao e kokua ana i ka Haku Kale no Laila o oe no kekahi e hoomakaleho nei i na wahine kana keaka. mai noho oe a kamailio hou mai i na wahine o keia ano me ka pai ana i ko lakou mau ano maikai. no ka mea ua kamaaina au i ko lakou mau ano he ake wale no i ka waiwai. ka hanohano me ka inoa o ka poe kiekie. e kau aku maluna o lakou. E noho maile oe aole e noke mai i ka pai ia‘u i ka wahine a kuu keiki o kauoha aku ananei au ie oe@e haawi mai i laaumake ia‘u ua oi aku ia. mamuu o kou hoehaeha mau mai i kuu noonoo."

            Aole no hoi he hooluhua wale aku o ke kauka. aka ua noho hamau loa oia, a hiki i kona hoi ana no kona wahi aka he mau la kakaikahi wale no nae ma ia hope mai, no loohia iho la ua haku nei i kekahi ma‘i ikaika. ahiki i kona hoouna ana aku i ke kauka, e hele koke mai e ike iaia, a me ka leo oluolu, o ka mea i piha i ke kaumaha, i aku la.

            "Auhea oe e kuu kauka, iloko ae nei o na manawa i hala, aole loa he lihi hoihoi iki iloko o‘u e ike i kuu keiki, aka nae mamuli o ka ikaika ame ke ko‘iko‘i o keia ma‘i i loaa ia‘u ua konoia mai au e hoike aku ia oe, ua makemake au e ike i ka Haku Kale."

            Me ka hoohakalia hou ole iho. hoouna koke aku la ke hauka he kelekalapa i ka Haku Kale, e hoike aku ana no ka makemake o kona makuakane e ike iaia. a iloko o ka hapaha hora wale n oo kona kakali ana, loaa mai la ka pane, mai ka haku opio mai. e ninau mai ana in a paha ua ma‘i loa i kona makuakane, ino aole alaila he hana paakiki nana ka haalele ana aku i kana wahine mahope, a oia hookahi wale no ke huli hoi mai no ka ike ana i kona makuakane.

            I ka lohe ana o ka haku aoo i ka pane a kana keiki, kulou iho la kona poo ilalo, me ka namunamu liilii ana, aole nae he hoike ae e kauoha aku i kana keiki, ame kana wahine o lava like no ke holo mai e ike iaia, aka noke wale iho la no oia i ka wili i o a ia nei, a oiai he hoa kula no keia kauka no ka Hau Kale, a o keia no hoi ke kauka hookaki o kela ohana, me ka ike i na ano apau i pili aku i ka makuakane o Kale, nolaila kelekalapa malu aku la oia i ka Haku Kale, e kauoha aku ana e holo pu mai no oia me kana wahine, no ka mea ua manaoio loa kela kanaka, i ku no ka huhu o ka makuakane i ke keiki, i ko laua noho kaawale, aka in a no e ike aku ana i na maka o kana keiki, o ka hoi mai no ia o na manao aloha, a auhee wale aku no ka inaina ame ka huhu mai iaia aku.

 

MOKUNA XXII.

            I ka manawa i loaa aku ai ke kelekalapa i ka Haku Kale, a ke kauka i hoouna aku ai iaia, ua holo awiwi mai la oia me ka piha hoihoi. no kahi a Oliva e moe ana iluna, o ka ahamaka. ma ko laua home ma ke Kuea Gorova; e hooluolu wale ana no o Oliva, oiai he aha hulahula no ko kela po, a e hele aku ana laua no lea aha hulahula.

            I ka hoea ana aku o ka Haku Kale imua o kana wahine, hooho ae la oia m@ ka pane ana aku: "I lawe mai la au e hoike aku ia oe i kekahi nuhou hoohauoli i ko kaua noonoo," wahi ana, me ke kulou ana mai imua, a honi aku la i kana wahine. aka nae i ka manawa a Oliva i ike mai ai i ke kelekalaoa i ka lima o ka Haku Kale, maopopo e mai la no iaia, mai ka makuakane ai kela kelekalapa, ua pii koke ae la ka ula ma kona mau papalina, no kona hopohopo no, aia kekahi mea maikai ole a ka haku aoo i makemake ole ai i kana keiki.

            "He kelekalapa mai nei keia na kuu makuakane," wahi ana me ka hoiekike ana mai imua o Oliva, no ka heluhelu maoli ana iho i na mea i kakauia maloko.

            O ka eono keia o na mahina o ka noho mare ana o ka Haku Kale, me kana wahine. me ko laua ike maoli iho no i ko laua hauoli aka i ka ike ana aku o Oliva i kela kelekelapa, aole on a makemake iki e lilo ia i kumu e hookomoia aku ai laua iloko o ke kaumaha.

            Ua lehulehu wale na manawa a ka Haku Kale o ka noke ana aku i ke kamailio imua o Oliva, no na ano o kona makuakane, a ua pipili paa maoli no ka makua, me ka hoikeike ole nae o ua hau opio nei, i kela leka uahoa a kona makuakane, o ka hoouna ana mai iaia no kona ike, oia hookahi wale no ke kuleana e auamo ai i na haawina ehaeha aoau, aole hoi o kana wahine kekahi e ike i ke ku e ikaika loa o ka makuakane o kana kane, nona; oiai no nae, ua kamailio aku no ka Haku Kale ma ke ano hoomama i kona manao, i he mau manawa no hoi ka Kakalina i a‘o mai ai iaia e hoomanawanui, no ka mea e hoea mai ana no ka wa, e hookipa aku ai ka haku aoo iaia me ke aloha.

            I ka heluhelu ana nae o ua o Oliva i ke kelekalana a maopopo ka makemake ana o ka Haku aoo, ia laua e huli hoi aku ai imua o kona alo, a i ka home aloha hoi o kana kane, ua hoomama loa ia mai kona manao, me ka hopohopo no nae aole e loaa ana iaia na hookipa ohaoha ana, elike me ka mea, in a he kulana kiekie kona.

            Ma kela ahiahi iho, ua hoea aku la laua nei noloko o ke keena o na hana hulahula e malamaia ana aia wale no na maka o ka lehulehu maluna o laua nei, i kau a mea o ke kupono maoli no o ka wahine me kela kane, he mau mea u‘i like no, a he opiopio like no hoi, ka mea ano e wale no, he kulana haahaa ko Oliva, a he kulana kiekie hoi ko ka Haku Kale, eia nae, aole i nana ia mai laua ma ke kulana aka ma ko laua mau kulana hiehie.

            Ma cela âme kiea la, e hoea mau aku ana na palapala kono no ko laua nei home, a ua lilo no hoi i hana paakiki ka noho malie ana i ka hale, i hookahi po, e hele mau ana laua nei e hooko i kela mau kono, aole keia mamuli o kekahi kumu e ae, aka mamuli no ia o ka makemake o ka poe kanokano e hoolauna aku ia Oliva iloko o ko lakou pohai, no ka mea, he wahine mare oia na ke kauna aku ana o Liva moa, a me ka Makuika o Pilika; aole nae malaila wale iho lan o lakou i hoopoi mai ai ia Oliva, aka m ke ano, oia ka helu ekahi a lakou i ike iwaena o na wahine kana keaka apau.

            Aole nae malaila wale iho la no pau na mea nana i ume aku i na manao hoohihi o na mea apau ia Oliva, aka o kekahi mau ano lehulehu e ae i pili aku iaia, kekahi mau mea nana i kono mai ia lakou e olelo ae, e hoea mai ana he la e lilo ai o Oliva, i wahine hanohano loa, a i wahine kaulana hookahi maloko o Ladana.

            Ia laua i hoi aku ai no ko laua home ma kela ahiahi, akahi no ka Haku Kale a ninau maoli aku i ko Oliva manao, ma ka pane ana ae:

            "Manao anei oe e kuu aloha e loaa ana ke koa iloko ou, no ka hele pu ana me a‘u e ike i kuu makuakane?" wahi ana me ka honi ana mai i kana wahine, a puili aku la iloko o kona umauma.

            "Ma kau wahi e hele ai e kuu haku, o wau pu no kekahi," wahi a Oliva, me ka minoaka ma kona mau papalina.

            "Aole au i haupu, ua loaa ka manao hoihoi loa ia oe, no ko kaua hele koke ana aku e ike i kuu makuakane, a ke haawi aku nei aku nei au i ko‘u mahala kiekie loa ia oe, mailoko aku o kuu puuwai."

            "Ae, ua makaukau au, no ka hele ana aku e ike iaia, ma ka la apopo, a peha, manao ana no anei oe, e noke mai ana oia i ka nuku ia‘u?" i ninau hou aku ai o Oliva, ma ke ano kookolohe i kana kane.

            "Aia no kaua a hoea aku, alaila maopopo kana mea e hana ma ai, e hele ae au e kelekalapa a houna mai la i ka lohe i kona makuakane, e hoea aku ana kaua ma ka la apopo nolaila e hoi e hooluolu," o ka hele mai la no ia o ka haku opio no ke keena kelekalapa a honua mai la i ka lohe i kona makuakane, no kona hoea mai me kana wahine.

            "I ka loaa ana mai o kela kelekalapa i ka makuakane o ka Haku Kale, ua haawi koke aku la oia i ke kauoha i na kauwa e hoomakaukauia kekahi mau rumi oloko o kona home no kana keiki ame kana hunona, na rumi nani loa o ua home nei, no ka mea o kela aloha no me ka makee o ka makuakane no kana keiki, pela oia i makemake ai e hana aku i na mea apau e hoohauoliia ai ka manao o ke keiki me kana wahine.

            Ma ke‘a la holookoa, maloko wale no ka haku aoo o kona rumi kahi i noho ai, me kona makemake ole e komo pu mai ke kauka, i ka manawa e hoea mai ai kana mau keiki, o lilo auanei kela kauka i mea hoohenehene mai iaia nei.

            I ke kokoke ana ae i ka manawa e ku mai ai ke kaaahi i ka kale hoolulu, hoouna aku la ua haku nei i kona kaa okana me ke kalaiwa ame ke kauwa lawelawe, a hoi ae la oia noloko o ka rumi hokipa, me ke kakali ana aku o ka hoea mai o kana mau keiki.

            Hoko o kona noonoo, he hookahi wale no ana mea e hoomanao la o ia ka ike aku i kekahi wahine, i kahikoia me na lole o ka poe hana keaka, no ka mea, ua kamaaina loa oia i na wahine o kela ano a ua hoowahawaha hoi ia lakou, aka nae, aole e hiki iaia ke hoowahawaha aku i keia wahine malihini, no ka mea, o ka wahine ia i mareia me kana keiki, he pono no iaia ke hookipa mai me ka maikai, a o kona mau manao hoowahawaha apau, e uumi malie no oia me ka hoomanawanui iloko on a.

            E nanea ana no nae ua elemakule nei, ke ana no ke kaa mawaho o ka puka-pa, a lele mai la ka Haku Kale, me ke hopu ana aku i kana wahine, a kuikuilima pu mai la, me ke komo pololei ana mai noloko‘o ke keena hookipa, kahi a ha kahu opio i noonoo mua ai. e loaa ana no kona makuakane iaia, maloko o kela keena.

            He oiaio, ia laua i komo aku ai, e noho aku ana noko makuakane, aia hoi na waimaka ke haalele la i ka lihilihi me ka haawi ana mai i kona lima imua o kana keiki, alaila huli ae la a haawi mai la i ka lima i kana hunona me ka pane leo ole; aole mamuli o kona piha i ka hoowahawaha, a hoihoi ole i kela wahine, aka ua hele oia a piha me na haawina o ke kahaha, no ka ike ana mai, i ke kaokoa loa o keia wahine mai na mea ana i koho wale ai.

            Haawi mai la no hoi o Oliva i kona lima, no ke aloha ana aku i kona makuahunowai, me ka hopu ana mai o ka haku aoo, a nana mai la ma na maka o kana hunona, me na manao mahalo a hoohihi iloko on a, alaila i mai la.

 

MOKUNA XXII

            "Ke hauoli nei au i ka halawai ana me oe e kuukaikamahine." wahi ana me ke kakali ana aku e lohe i ka leo o kana hunona.

            "O ka haawina hookahi i loaa ia oe e kuu makua, o ka haawina hookahi no ia i loaa ia‘u," wahi a Oliva, me ka hoao ana mai e minoaka, na kela pane nae ma ka aoao o Oliva, i hoopau loa aku i na manao maikai ole mailoko aku o kona makuahunowai.

            "Ua hamama na ipuka o keia home ia olua e a‘u mau keiki; e kala mai oe e kuu kaikamahine, he kanaka au i elemakule i keia manawa, ua elemakule mai ka noonoo, aka nae aohe au mea e hopohopo ai, ua noa na mea apau o ko olua makua nei, e hana aku elike me kou makemke," wahi hou a ka elemakule, me ka lilo o kela mau olelo hookipa i mea e halo‘ilo‘i mai ai na kulu waimaka, ma na lihilihi o Oliva, me ka hapai ana ae i ka lima o ka haku aoo i kona lehelehe.

            "E hoi e wehewehe i ko olua mau lole kaahele e a‘u mau keiki, he nui loa ka manawa no ke kamailio ana," me ke hauoha ana mai i ka Haku Kale, e hoihoi aku i kana wahine e hookamaaina i ko laua ma rumi i hookaawaleia, me ka lalau ana mai no hoi o ua haku opio nei i ka lima o Oliva, a kaha aku la hele, o ko laua oili aku no hoi koe noloko o ke keepa e waiho mai ana o ke alapii e pii ai no ka papahele elua, kahea hou aku la ua elemakule nei:

            "Mai noho loihi loa aku olua e kuu mau keiki, e kakali aku ana no au ia olua ma keia keena," aohe nae o laua nei pane aku, ke hoomau la no laua i ka hele aia ka pono o ka ho@a aku no ko laua mau rumi.

            I ka hoa ana aku no ka rumi i hookaawaleia no Oliva, ninau aku la ka Haku Kale iaia i ka i ana mai: "Pehea kou manao i keia manawa no kuu makuakane, ua pau anei kou maka‘u me ka hopohopo iaia?"

            No ka pane ma ho Oliva aoao, kunou wale aku la no kona poo, aia nae i loko o kona puuwai ka maha o ka noonoo, mamuli o kona ike pono ana, aole he inaina a he huhu iloko o kona makuahunowai, elike me kana mau mea i lohe mua ai, no ke ku-e iaia nei i ka mare ana me kana keiki.

            Ua hoohalia kekahi mau hora e na keiki me ko laua makuakane ma kela ahiahi ma ke kamailio ana, me ka oluolu, me ka hoomahuahuaia ana e hoi o na manao hoohihi me ka mahalo iloko o ka haku aoo no kana kaikamahine, a ma ke kakahiaka ana ae o kekahi la, imua o ke alo o na kauwa aoau o kela home, i kukala aku ai ua haku nei, maluna o na mea‘apau o Oliva ka haku o kela home, a o kona mau makemake ka lakou e hooko mai ai.

            No ka pule hookahi keia noho pu ana o lakou, ua auhee loa na manao maikai ole o ka haku aoo, no kana hunona, o ka mea i kanuia aku ma kahi o kona mau manao hoowahawaha mamua, o ia no ka hoohihi, ana ponoi no e ike la, aole e loaa iaia ka hauoli, aia wale no a noho kokoke aku o Oliva ma kona aoao a mana wahi hoi pau a Oliva e hele ai, e kau mau ana kana nana ana maluna on a.

            Ma ke kakahiaka o ke kolu o na la o kela noho ana o Oliva ma ke home o kana kane, e hana ana oia i kekahi lihilihi, oiai hoi ka haku aoo e heluhelu ana i kekahi buke, iaia i ike mai ai i ka kana o kana hunona i ka lihilihi, hooninau wale mai la no oia i ka i ana mai:

            "Aole anei oe i manao e kuu kaikamahine, ua kahiko loa keia home, a ua alu‘a na lako hale i kupono ole i kou kulana?"

            Leha ae la ka Oliva nana ana, mai kana lihilihi mai, a pane mai la: "Ke manao nei au e kuu haku, he ma lako hoonani nani maoli ko keia home, me ka loaa ole he mau hoohalahala ana iloko o‘u no kekahi o kela mau lako hale."

            "Ua manao au ua kahiko a apulu keia hale, me kona mau lako hoonani apau, i kupono wale no, no makou ka poe oo, aole i kupono nou e ke kaikamahine," me ka nana ana mai o ua haku aoo nei maluna o kana hunonawahine me ka minoaka ma na papalina.

            "Ua kupono key home me kona mau lako hoonani apau i ko“u makemake he mau hana hoonui lilo wale aku no, ke kuai ana i mau lako hoonani hou," wahi a Oliva, me kona panai pu ana aku no hoi i ka minoaka i kona makuahunowai.

            "Ina o kou manao ia ea, alaila ua pau ae la no, aka nae e hoomanao oe e kuu kaikamahine, in a he mau mea kekahi au i makemake ai e hoololioli ma keia home nei e kamailio mai oe ia“¨e hokoia aku no ia iloko o ka manawa pokole loa."

            "Aole a‘u mau hoohalahala ana ma kekahi ano i keia manawa, aka he mahalo wale no, me ka oluolu o ka manao."

            "Pela no ka‘u hoomaopopo aku i kou ano, a me he mea la, ua loaa mau ka nohona hauoli ana ia oe, a nawai ole no e hoohihi kuu keiki ia oe, i ka maikai maoli no o kou mau ano apau. He mea makemake ole na ka‘u keiki ka wahine, o ka‘u nae i olelo aku ai iaia, in a e ike ana oia i kekahi wahine, i ku i kona makemake, e pupule loa ana oia, elike me ia a‘u i ike aku ai i ke ano o kona noho ana me oe. Ihea ua haku nei o kaua i hele aku ai i keia kakahiaka?"

            "Aole ola i kamailio mai nei ia‘u i kana wahi e hele ai, nolaila ua hiki ole ia‘u ke pane aku i kau ninau," wahi a Oliva.

            "Ua maopopo mai la ia‘u kana wahi i hele aku nei, no ka nana ana no ia i kela lio au i mahalo nui loa ai."

            "Auwe! Heaha iho la kana mea e hana ai me kela lio?" wahi a Oliva me ke kahaha.

            "I hele aku nei oia no ka hui pu ana me ka I laku Piapona, no ke kuai ana i kela lio, owau no ka mea nana i kamailio aku i ko kane e hele e kuai i kela lio nou. Ma kau mau mea apau i makemake ai, e loaa ana ia ia oe, he hookaki no loaa ole mai, o ka ae ole o kela haku e kuai hoolilo mai kela lio. O ka mea oiaio e kuu kaikamahine, in a ua makemake oe e hoi aku a noho i loko o ka mahina, he hana hiki loa ia ia‘u ke hooko aku," alaila noke ae la ua haku aoo nei i ka akaaka, e hoike mai ana, aole he wahi lihi hoowahawaha iki i koe iloko on a no keia kaikamahine hana keaka o ka mare ana me kana keiki.

            I ka huli hoi ana mai o ka Haku Kale he hora a oi mahope mai, ua lawe pu mai la oia i ka lio a Oliva i hoohihi loa ai, aole he poe i maopopo i ka nui o na dala a ua haku opio nei i uku aku ai, ma ka olelo maopopo ana ae nae, ua lilo mai kela lio me na dala makua, heaha nae ia mea he dala i ka Haku Kale me kona makuakane, he mea liilii loa ia, no ka mea ua nui hewahewa ke dala ia laua, me ka nui pu o ko laua waiwai.

            I ka lohe ana aku hoi o na ohana lehulehu e noho ana ma na kuaaina , i kamaaina i ka ohana o ka makuakane o ka Haku Kale, no ka huli hoi ana mai o ka haku opio me kana wahine huapala, ua nui ko lakou makemake e hele mai e ike, nolaila, hoolala iho la ka haku aoo, e haawi i kekahi aha hoohauoli a hoolaule‘a no kana mau keiki, me ka i ana aku o ua haku nei ia Oliva i kekahi la:

            "No ko‘u elemakule mai paha, pela no e elemakule ai ko‘u noonoo, ua palaka maoli au, i kekahi hana nui e pono ai e hookoia aku, o ia no ke kono ana aku i ko‘u mau hoaloha lehulehu, e hele mai, no ka ike ana ia olua e a‘u mau keiki. Ua kulike loa keia kakela me ke kakela maloko o na moolelo kupua, i ka hiamoe o na mea apau, he oiaio loa kela, ua hoea mai nei oe e kuu kaikamahine, a hoala ae i ka poe apau e noho nei maanei, nolaila e haawi ana au i kekahi aha hoolaule‘a nui no ko olua hanohano."

            O ka Haku Kale kekahi e noho pu ana ma ka manawa a kona makuakane i hoopuka ae ai i kela mau olelo, a o ia kana i pane mai ai: "Aole anei oe i manao e kuu makua, o keia kekahi o na hana nui, e hoopilikiaia aku ai oe ma kekahi ano? Manao oe e kuu keiki ua hala ko‘u mau la, aka e hoikeike aku ana au imua oko‘u mau hoaloha kahiko, eia no au i ko‘u mau la o ke kanaka opio," a noke okoa ae la ua haku aoo nei i ka akaaka.

            "He mau makahiki loihi loa keia, pehea la ka loihi, aole e hiki ia‘u ke hoomaopopo, aole he malamaia o kekahi anaina hoolaule‘a ma na kuaaina nei, aole no hoi he mau aha hulahula, i keia manawa nae, ke makemake nei au e hoea hou mai kela mau la, e malamaia ana na hana hoohauoli ma ke kakela nei. E haawi aku i ke kauoha e kuu keiki i ke kuene nui, ia Poka, e hoomakaukau mai oia i kekahi ahaaina nui, pela no hoi i ka wahine malama hale, e hoomakaukau i ka home nei, no na malihini, a e hoolimalima aku i mau kauwa lehulehu, i pono ai keia hana nui."

            Ke ike la o Oliva, o keia mau hana a kona makuahunowai, no ka hoohanohano wale ana no ia i ka mareia ana o kana keiki i ka wahine, a ke lelele wale la no oloko on a, i ka olioli, me ha pihoihoi pu no ka mea e piha mai ana oia i kikowaena na lakou e nana mai ai, elike no hoi me hela manawa mua loa o kona komo ana aku iloko o ka hana keaka.

            No ka hooko ana aku i kela manao o ka haku aoo, ua haawi aku la oia i ke kauoha i ka Haku Kale, e kuai i kaa kou no kana wahine, me na paalio maikai, kuaiia aku la no hoi he mau lio me na kaa hou, a hoopihaia ae la ka halelio, no ka mea aole i makemake ua haku nei, e hoea mai @ mlihini me kona hemahema.

            Hoounaia aku la ke kauoha i na kanaka pena ame na kamana e hele mai e hooponopono hou i kekahi mau wahi o ke kakela, a i ka wa keia i hoounaia aku ai o na palapala kono, ua piha loa o Oliva, i ke kaliaha, me kona hooho okoa ana ae:

            "Ina penei iho la ka nui o na kono e hoounaia aku ana i ka lehulehu, alaila e akoakoa mai ana na kanaka apau o ka honua nei ma keia kakela."

            "O ka nui o ka poe e hoea mai ana, o ka mea ia e nui ai ko kakou hauoli. Ua noho malie loa aku iloko o keia mau makahiki loihi, a ia oe auanei e ke kaikamahine, akahi a pau kuu noho malie ana, a e ike mai ana no oe, aole au he kanaka elemakule, aka he kanaka opiopio i like aku me ke oukou mau ano, a he mea hoi i piha me na hana hoohauoli he nui.

            "Ina he poe kekahi au i makemake ai e kono e kuu kaimahine, e hoouna aku i mau palapala kono no lakou," wahi a ka makuakane ia Oliva, me ka hana ana aku hoi o Oliva i kana kane, oiai e heluhelu ana i kekahi nupepa me ka hooluliluli ana i kona noho imua a ihope.

            "He hookahi wale no a‘u mea i makemake ai e kono aku iaia, oia no o Kakalina Hadine, he hoaloha no‘u, ka mea n@e a‘u e olelo ae ai, ua oi aku oia mamua o ko‘u kaikuaana ponoi."

(Aole i pau.)