Ka Nupepa Kuokoa, Volume LVII, Number 34, 22 August 1919 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

KAROLINA METTI

Ka Makaikiu Wahine Hoopahaohao

a i ole

O Dude Dana, Ke Ahikanana Mahope o ka

Meheu o ka Poe Hana Dala Apuka.

 

            "Ina e hiki ana ia oe ke hana ahiki i ka paa ana o ia kanaka oia ana kekahi o na hana kaulana loa i hanaia e oe ; oia ana kekahi o na hana kaulana loa i hanaia e kekahi makaikiu iloko o keia au, nolaila o ka holomua o ia hana ame ka holomua ole ke waiho aku nei au iloko o kou mana."

            "Pela no ka paa o kuu manao, no ka mea, ua loaa ia'u na inoa o na lutanela a lakou, he poe akamai no kela ma ka hoohalua ana e like no me ko kakou akamai, a maloko o ka hora hookahi mai keia manawa aku e haumanana mai ana lakou ma o a maanei no ka huli ana i i ko kakou poe poe a e imi mai ana ma na ano apau e pau loa ai kakou i ka paa a i ka make ia lakou.  Ma keia manawa a kaua e kamailoi nei ke ole au e koho hewa, aia kekahi o lakou maluna o na alanui kahi i huli mai ai ia'u, no ka mea, ua ikeia au e lakou a ua mapopo au ia lakou he makaikiu e hana aku ana mahope o ko lakou meheu.  Pehaea ia i kou manao?"

            "O, he mea nui a koikoi no ia e noonoo aku ai, aka, imua a mai hoi hope, e hana me ka maalea loa ame ka makaala pu!"

            "Auhea oe, a haalele iho au ia oe ea, e hakilo ae oe mahope o'u, i ikemake oe i ka lakou mau hana ; ma na wahi apau a'u e hele ai e kauoha aku oe i ou mau kanaka e makaala loa i ka hookolo ana ae mahope o'u, no ka mea, aole e hala ana keia olelo a'u i hoike aku la ia oe.

            "E hana aku ana au i kekahi mea e hoopahaohaoia aku ai ko lakou mau noonoo.  Ua ike au i ka lakou mau mea apau e hana aku ana, ua lohe au i ka lakou mau papahana o ka hoolala ana, ua makaukau lakou e hoouna aku ma o a maanei i na dala pepa apuka a lakou ma na huina nui.  Ua pau ka lakou mau papahana i hoolala ai i ka hoomakaukauia, nolaila, iloko o kekahi mau la kakaikahi, i ka manawa a lakou e hoomaka aku ai e hooko ia hana a lakou i hoolala ai, oia ko'u manawa e lele aku ai maluna o lakou."

            "Ua maopopo ae la kau mea e hana aku ai e like me ia au i hoakaka mai la, nolaila hana aku oe e like me ka maikai loa au e ike ana oiai oe e hana ana a e nee ana hoi imua, e makaala aku no hoi au ma ko'u aoao no ke kokua ana aku ia oe."

            "O, me ka mahalo.  Iloko o kekahi mau la kakaikahi mai keia la aku e hele mai ana au e hoike aku ia oe no ka nee mua o ka hana ame ka ole, ia manawa e hoike maopopo aku ai ia oe i na mea ano nui apau e pili ana i ka hana."

            Haawi ae la laua i ko laua aloha kakahiaka a kaha aku la ka makaikiu Dana e hele no kana misiona.  Ma ia hele ana aku la ana ma ke ano hoikeike oia iaia iho i hele aku ai, aole ma ke ano hoanoe.  Hoomau aku la oia i ka hele ana ahiki i ke alanui Borodawe, a ia manawa i hookokoke mai ai kekahi lede iaia.  Ua paa na maka o ua lede la i ka uhimaka, a i kona kokoke loa ana mai i ka makaikiu Dana ninau mai la:

            "O Mr. Dana anei keia a'u e hui pu nei?"

            Ua hookahahaia mai la ka makaikiu ia manawa no kona ninauia ana mai la e kekahi lede ana i kuhihewa aku ai o Metti, eia nae, ua pane aku la no oia i ka haina o ka ninau a ka lede i ka ninau ana aku:

            "E ae mai ana anei oe e ninau aku au no ke aha oe i ninau mai ai i ko'u inoa?"

            "I ninau aku la hoi au i maopopo ia'u in a hoi o ka Makaikiu Dana oe, ea, alaila he hana hoi ka'u i manao ai nau no kou kokua ana mai ia'u."

            "Pela io ka ; a ina e manao wale iho kaua owau ia, alaila heaha ia hana ano nui au i makemake mai ai na'u e hana aku nou?"

            "Alia au e hoike e aku ia oe ia hana, aka, e noi aku ana au ia oe, e oluolu mai oe e hahai mahope o'u ahiki i kahi a'u i makemake ai e hoakaka aku ia oe no ia hana?"

            "Kahaha! kupanaha no ka hoi kau noi.  Ka i no paha he hana kau i makaukau mua, o ka hoike wale mai no la kau, eia he koi pu mai e hahai aku pu aku au mahope ou, ua ikeia aku auanei kau imihala ana mai o ko'u komo no ia iloko o ka pilikia.  Aole au e hahai aku ana."

            "Alaila ua kuhihewa ka paha au.  Ua manao au he makaikiu la oe oia hoi ko'u mea o ke noi ana aku la ia oe e haele pu ae kaua no kahi o ka hana a'u i makemake ai nau e hana."

            "Ina io owau keia o Dana, a he makaikiu hoi, alaila heaha iho la kou manao?"

            "Ina io ohi paha he makaikiu oe ea alaila o kau hana hoi keia o ka hoolohe mai i ke noi a kekahi mea e hoea mai ana imua ou no kau haawi ana mai i na kokua ia mea elike me ia a'u i hoea mai la imua ou i nei manawa."

            "Hoomau aku i kau kamailio ana, ke hoolohe aku nei au."

            "He mau kumu no ka'u i makemake ole ai e hoike aku ia oe ma kahi akea elike me keia, no ko'u hopohopo malia, he mau pepeiao paha hoi kekahi ma kekahi wahi kokoke mai maanei a lohe wale ia ae hoi ka'u mea huna i manao ai o oe a owau wale iho no ke ike ia mea a nalo iho."

            "Ua piha akamai no oe e ka wahine maikai, o kaua wale no hoi keai maanei, nolaila, heaha iho la kou mea o ka maka'u ana? "He mau hana hoapaapa wale no keia a Dana, o ka Dana manao nui ma keia manawa e ana aku ana oia i ke ano o ka wahine e ku mai ana mamua on a.

            "ihea oe i makemake mai ai ia'u la e hele aku me oe?"

            "Ma kekahi wahi akea no hoi e piha mau ia ai e ka lehulehu kahi e hiki ai ia kaua ke noho iho ilalo, i hiki ia'u @e hoakaka aku ia oe i ka'u mau mea i makemake ai e hoike aku no ka pilikia i loaa ia'u.  Ia manawa oe e hooholo iho ai nou iho a e lohe pu aku ai hoi no ko'u makemake loa i kau kokua ame kau oleloa'o.  No ko'u hoikeia ana mai o oe wale no ke kanaka hiki ke hoopau ae i keia pilikia o'u. @ela iho la au i hoea mai la imua ou no kau mau kokua."

            He mau olelo pahele wale no keia a ka wahine e pelo mai nei i ka makaikiu a Dana no e ike aku ana o kekahi oia o na mea paahana a ka poe haihai kanawai o ka hoolimalima ana e hele mai imua on a no ka lawe ana aku iaia i kahi a lakou i makemake ai malaila ka makaikiu e @@@ ai a e lilo ai hoi i pio na lakou, aka, i mea nae e hiki ai iaia ke ike aku ia hopena, hooholo iho la oia e ae aku i ke noi a ka wahine.

            "Nawai i kena mai ne i ia oe e hele mai imua o'u?"

            "Na kekahi hoaloha i maopopo ia oe amekou ano."

            "Owai ka inoa o ia hoaloha ou?"

            "O Miss Lama," wahi a ka pane a ka wahine.

            He inoa keia a ka makaikiu Dana i maopopo mamua, no ka mea, nana kekahi hihia ana o ka hana ana mamua ahiki i ka pau ana, a no keia pane a ka wahine, ua hoopouliuliia ka noonoo o ka makaikiu.

 

MOKUNA VII.

 

Hanaia Kekahi Hana Kamahao Loa e na Makaikiu.

 

            Mamuli o na olelo a ka wahine ua koiia mai ka makaikiu e noonoo me ka hikiwawe loa, a e loaa pu hoi i manawa lawa loa nona e noonoo ai.

            "He inea oiaio anei ia au i kamailio mai nei na Miss Lama oe i hoouna mai nei e hele mai imua o'u?"

            "Ae.  He oiaio loa keia."

            "E hoakaka mai ana oe i kekahi mau mea e pili ana nona, oia hoi, kona halawai ana me kekahi pilikia mamua a e ole au pakele ai oia mailoko mai o ia pilikia.  Eia hou, he hoaloha io anei oe no Miss Lama?"

            "Ae ; he hoaloha oiaio loa oia no'u, he hoaloha pilipaa, a no kekahi mau makahiki i kaahope aku nei ko maua kamaaina ana kekahi i kekahi.  He wahine piha aloha a oluolu oia, a he wahine hoi e ola ana me ka hanohano ame ke kuonoono."

            "A nana oe i hoouna mai nei e hele mai imua o'u, oia anei ka mea oiaio?

            "Aohe oiaio e ae, o keia wale no a'u i hoike aku la ia oe."

            "He makemake io oe la e hana aku au nou?"

            "Ae, oia hoi ko'u kumu o ka hele ana mai la imua ou." wahi a ka wahine i piha me ka maalea.

            "Auwe, he kanaka piha loa au la me na hana like ole, e ka madame, a oia ka'u e kanalua nei i ka hooko aku i kou makemake."

            "Malia paha e loaa ana no hoi i manawa nou e haawi mai ai i kekahi mau olelo a'o ia'u i mea e pono ai ka'u hana i hele mai la imua ou."

            "O ka'u oleloa'o wale no nae kau i makemake ai e loaa aku ia oe?"

            "Oia ka mea ano nui i ko'u noonoo," wahi a ka wahine.

            "O ka oleloa'o kupono no hoi au e ike iho ana mahope iho o kou lohe ana aku i ka'u moolelo."

            Ia manawa noonoo iho la ka kakou koa no kana mea e hana aku ai.  Hooholo iho la oia e hele pu me ka wahine a e ae aku hoi iaia e hoike mai iaia i kana moolelo, no ka mea, elike me ia iho la ana e ike ana ia manawa aohe mea maopopo ana e hooholo iho ai no kana mea e a'o aku ai iaia.

            "Ihea kaua e hele aku ai la i kou manao?" i ninau aku ai ka makaikiu Dana.

            "E hele kaua i kekahi haleaina, kahi e piha mauia ai e ka poe kiekie o ka aina.

            "E ka madame, mamua o kuu ae ana aku e hele pu me oe, e oluollu oe e hoikeike mua mai ia'u i kou helehelena mao ka wehe ana ae i kou uhimaka ; he uluhua ko'u la e noho aku la i ka ike ole aku i kou helehelena, malia paha he wahine huapala no hoi oe, eia nae, ia'u paha e noonoo iho ai e koho hewa iho ana hoi au he wahine ihu ole oe."

            "Aohe no he kumu e huna iho ai i ko'u helehelena, aole nae i nei manawa, e kali oe i kou makemake ike mai i ko'u mau maka a hoea aku kaua i ka haleaina a'u i kamailio aku nei ia oe.  Ia manawa e hoike aku ai au i ka'u moolelo, he moolelo kamahao loa a'u i halawai ole ai mamua a e ike iho ana no oe nou iho ke pau aku ia moolelo i ka loheia e oe.

            "Ua maopopo ia'u e lilo ana ia moolelo i mea nui i kou noonoo, a ke maopopo pu nei no hoi ia'u e hana mai ana oe no'u in a e ae mai a@a oe i manawa no'u e hoike aku ai ia moolelo ia oe."

            "E loaa aku ana i manawa nou e hoike mai ai i kau moolelo ke hoea aku kaua i kahi au i olelo mai nei," i pane aku ai ka makaikiu.

            "Pela no ka Miss Lama mea o ka olelo ana mai ia'u, oia hoi, e haawi aku au i ka'u hilinai ana maluna ou no ka holopono o ka'u hana, no ka mea wahi ana, he kanaka oluolu a lokomaikai loa oe, he aloha i ka poe popilikia elike me a'u nei i hoea mai la imua ou.  Mamua o kuu hoike ana aku ia oe i ka'u moolelo e noi mua aku ana au i kou oluolu in a hou lawelawe aku ia hana a ike oe e owili pu ia aku ana au iloko o ka pilikia, e oluolu oe e hookaawale ae ia'u mailoko ae o ka pilikia, a e uku no au ia oe i kekahi uku makana nui, eia nae, me ke akamai wale no, ka maalea ame ke ahonui e hiki ai e hookaawale ae ia'u mailoko mai o ia pilikia."

            "E ka madame maikai, aole au e haawi mua aku ana i ko'u ae no kena mau noi au apau i noi mai la mamua ae o ka manawa, aka, e ae aku ana nae au e hele pu me oe a e hoolohe aku hoi i kau moolelo kamahao, wahi au. He kanaka au i makaukau e haawi aku i na kokua i ka poe i pilikia io, aole nae au e ae aku ana e hooluhi wale ia'u no ka hana i maopopo mua ia'u e hookomoia aku ana au iloko o ka pilikia i ka manawa hope."

            "Ua hoike pu ia mai ia'u he kanaka maka'u ole oe, he koa, he hikiwawe ka noonoo a he keonimana oiaio ma na ano apau," wahi a ka wahine

            "Minoaka iho la ka makaikiu no keia mau olelo pai a ka wahine a i aku la :

            "Ina he hilinai io kou ia'u na'u hoi ha e koho ka kaua wahi e hele aku ai?"

            "Aia ia i kou oluolu mai," wahi a ka wahine

            "Aole o'u maka'u ; ma kahi kokoke no hoi paha mai nei aku e hiki ai ia'u ke hoike aku ia oe i ka'u moolelo a e hiki ole ai hoi i kekahi mea ke lohe mai o oe wale no, e hoike mua aku no au i keia mea ia oe e hana aku ana au i kekahi hana nui oiai oe e hana mai ana no'u."

            "O, maikai kela manao ou," ipane aku ai o Dana.

            I ka holo ana o keia manao mawaena iho o laua haele like aku la o Dana me ka wahine e paa mau ana na maka i ka uhimaka, no kekahi haleaina i ike nui ia ka piha i ka poe hanohano.  Alakai aku la ka makaikiu iaia a hiki ma kekahi pakaukau mamao loa e pili kokoke aku ana i ke kihi a hoonoho iho la iaia iluna o ka noho, a ia laua i haule like iho ai @ oka noho ana, ia manawa wehe ae la ka wahine i ka uhimaka mai kona mau maka ae, a i ka nana aku a ka makaikiu he wahne huapala maoli ka oia.

            He wahine Amerika oia i ka Dana nana aku ma ke ano o kona hiohiona a ma ke ano o kana kamailio ana, eia nae, aia no he mau kumu hoohuoi iloko on a no ka hana a ia wahine, ua mao iki ae nae ia ikaika loa o kona hoohuoi i ka manawa ana i ike aku ai i ka ui o ka helehelena.

            Ke noho la ka makaikiu kakali o ka puka mai o ka manao o ua wahine la, heaha ana la kana mea e hoakaka mai ana iaia, a ke ulu mau ae la ka ninau iloko on a no ka hana a ka wahine e haawi mai ana nana e hana.

            "Ke ninau la paha oloko ou no kau wahi o ka ike mua ana ia'u, ea?  Ua ike no oe ia'u mamua?" i ninau mai ai ka wahine.

            "Oia hoi ka'u e au ae la in a paha ua ike mua au ia oe a aole paha.  Aole pela ka paa o ko'u manao," i pane aku ai ka makaikiu.

            "Ina pela, alaila ua koa no hoi kekahi mea malihini loa ia oe, e like me a'u nei, o ka hele ana mai a mahaoi aku ma ka hoolauna ana ia'u iho imua ou, ea, aole anei pela?  Aole ka hoolauna wale ana aku no aku, o ke @oi pu ana aku kekahi i kou lokomaikai e hana mai i kekahi hana no'u, aka, e ike mai no nae hoi oe i keia, he hana ano nui loa ka'u i makemake ai nau e hana, i hoopauia ae ai ko'u pilikia, he pilikia hiki ole i kekahi holona ke hana, koe wale no oukou na makaikiu, ka poe i kamaaina i ka huli ana aku i na mea pohihihi apau.

            "He nui no ka poe a'u i lohe ai no ka hiki ke hana i ka mea a'u i makemake ai aka, aole hookahi o lakou a'u i haawi aku i ko'u hilinai, o oe wale no, mamuli o ka Miss Lama mau mea o ka hoakaka ana mai ia'u."

            "He oiaio kena au e kamailio mai nei la he hilinai io oe ia'u?"

            "Ae ; he oiaio loa keia, oia hoi ko'u kumu o ka hoea kino ana mai la imua ou"

            "Ea, e ka madame maikai, e oluolu oe mai pai loa mai ia'u mamuli o na olelo a Miss Lama, e pono oe e kali ahiki i kou ike ana ua pau kou pilikia, a i ole ua hookoia aku kou makemake.  E oluolu oe e hoakaka mai i ka hana au i makemake ai e hana aku au nou, mai hoohala manawa wale oe, no ka mea, he hana okoa aku no kekahi a'u, a he mea nui no hoi ka manawa."

            "Ua maikai kou manao i hoike mai la, a eia hoi ka'u noi ia oe, mamua o kuu akaka ana aku i ke ano o ka'u hana ia oe e hoohiki mua mai oe aole e huai wale ae ia mea i ke akea."

            "Ea, e ka madame, ke kuhi nei au he lede oiaio la oe, eia ka he meahuna kau au i makemake ole ai e ike wale ia i ole e loheia ae paha.  Auhea oe, he makaala loa au i ka'u hana ana i kekahi hoohiki me ko'u nana ole aku he lede paha ia mea a i ole he keonimana hanohano loa paha ; he weliweli au ia mea he hoohiki i lohe oe," i pane aku ai ke makaikiu me ke kuoo.

            "Ua ike no au ia mea, ma kou ano he makaikiu aole oe e ae ana e hana mua i kekahi olelo hoopaa me kekahi mea ma ke ano kuwaho, aka nae hoi, e ike mai oe i keia he pilikia nui keia o'u, a he hana kamahao loa no hoi e noanoa ae ai i kela ame keia."

            "Heaha kau mea i makemake ai ia'u la e hoohiki mua aku ai au?"

            "He hana ano nui a kamahao loa keia a'u e hoike aku ana ia oe : me he mea la o ka oi aku no paha o na mea huna i hoikeia ae au e lohe aku ana iloko o ka manawa holookoa au i noho hana ai ma ke ano he makaikiu.  He hana keia e koiia aku ana kau lawelawe ana me ka eleu ame ka makaala loa ma kou aoao, a he hana hoi e lilo ai oe i makaikiu kaulana loa mamua ae o na makaikiu apau o ke ao."

            "E hoike maopopo mai oe i ke ano o ia hana ame ia mea huna a'u e huli aku ai, i hiki ia'u ke hoomaopopo a ke noonoo iho i ka mea kupono a'u e hana aku ai," i koi okoa aku ai ka makaikiu.

            "E hoomanawanui iki oe apau aku ka'u hoakaka ana. E komohia pu ana kekahi pe kiekie iloko o keia hana a'u e hoike aku nei ia oe, he poe kiekie a waiwai iloko o ka aina, he poe i kaulana a e laweia mai ana nae mai ko lakou mau wahi mai, mai ko lakou noho ulakolako ana, a e lilo ana lakou i mau pio na ke kanawai, ke paa i ka hopuia.

            "O ka'u e makemake loa nei e hana aku oe i keia hana me kou ike apau ma kau oihana, me ka nana ole i ke kiekie a hanohano o kekahi mea in a he mea haihai kanawi ia, a iwaena o ia poe hookahi a'u kanaka e noi aku ana ia oe e hoopakele hoi oe iaia, a e noi mua aku ana au e hoohiki mua ma oe e hoopakele ana oe ia kanaka hookahi, oiai nae me he mea la oia paha ke kanaka oi loa aku o ka hewa i ko ka nui ae o ka poe haihai kanawai."

            He oiaio, i ka pau ana o ka ka wahine hoakaka ana mai, ike io iho la ka makaikiu he hana nui a koikoi ka i hoikeia mai la iaia nana e hana aku ahiki i ka pau loa ana o ka poe haihai kanawai i ka hopuia.

            "Ua lohe aku la oe i ka hana a'u i makemake ai nau e hana, e ae ana anei oe e hoohiki mai?" i ninau mai ai ka wahine.

            "Aole hiki ia'u ke hoopaa ia'u iho ma kekahi hoohiki elike me ia au e koi mai nei," i pane aku ai ka makaikiu.

            "No ke aha hoi?  Ua pau aku la na mea a pau i ka hoikeia ia oe.  Ina pela e hoopaa loa ana au i ko'u mau lehelehe aole e owaka hou ae i kekahi mea e pili ana i keia hihia."

            "Ke kaumaha nei au, aka, aole hiki ia'u ke hoohiki aku imua ou elike me kau i koi mai nei e hoopakele ae i kekahi kanaka hana karaima.  E lohe mai oe i keia, ma kuumanawa i lawe ai i ka hoohiki oihana ua hoopaa au ia'u iho e hooko aku ia ka makemake ame na mea apau i koiia mai ai au no ka hanohano o ka'u oihana e hooko wale aku no i ka makemake o ke kanawai a e honu aku hoi i na kanaka apau e ikeia ana he poe haihai kanawai i mea e kauia aku ai ka hoopai a ke kanawai maluna o lakou."

            "Ina pela, alaila elike no me ia a'u o ka hoike ana aku nei ia oe e sila ana au i ko'u mau lehelehe me ka hoike ole aku ia oe i kekahi mea e pili ana i ka hana a'u i makemake ai nau e hana."

            "Nou ia kuleana, aka, e hoomano nae oe, i kou aua ana aku la i kekahi mea a ke kanawai i makemake mai ai ia oe e hoike ae, e owili pu ia aku ana oe iloko o ka hihia hookahi elike me ko kela poe haihai kanawai au e huna mai la.  Eia hou, heaha kou pili i kela kanaka au i noi mai nei aole e hopu iaia oiai nae he kanaka hana karaima oia i kupono ole e hookuuia mai ka hoopaiia ana aku no kana mau hana hewa?"

            "He kaikunane oia no'u. Ae, he oiaio keia, a ia'u i hoea mai la imua ou a hoike aku la i keia mea, ua kumakaia au i kuu kaikunane ; a no ka hoopakele ana ae hoi iaia mai ke karaima ana i hana aku ai pela hoi au i hele mai nei imua ou e noi aku i kou oluolu o ka poe e ae apau kau e hopu ai a koe hoi oia.

            "Ina hiki ole ia'u ke hoopakele ae iaia aole hiki ia'u ke kumakaia iaia, aka nae ua noonoo au i ka manawa a'u e hoike ai ia oe i na hana i hoolalaia e kela poe ame na inoa ame na ano o lakou apau, e loaa mai ana la hoi mai a oe mai kekahi hoohiki no kou hoopakele ae i kuu kaikunane, oia wale no, a o ke koena aku o lakou e hana aku oe e like me kou makemake."

            "Ua ike aku la au i kou manao, eia nae, a elike no me ia a'u i olelo mua aku nei ia oe aole hiki ia'u ke noopaa e ia'u iho ma ke@kahi hoohiki, aole no hoi e hiki ia'u ke hoakaka maopopo ae e ae aku ana au i kou makemake ;  aia wale no ke kaukai ana aku no ka hookoia o kou manao ahiki i ka ikeia ana aku o ke ano o ka mea huna e huliia aku ana.  E oluolu mai ana anei oe e hoike mai i ke ano o ka hana a kela poe e hana mai nei?"

            "E hoike aku ana au."

            "Hoike mai hoi ha me ka hoohakalia hou ole aku," i koi aku ai ka makaikiu Dana.

            "Eia iloko o keia kulanakauhale i keia la he ahahui na na kanaka haihai kanawai akamai loa maluna o ka honua, ke ku nei ia me ka ikaika no ka mea, o na lala o ia ahahui he mau kanaka waiwai a kiekie loa kekahi iloko o ka aina.  No ka holopono o ka lakou kukulu ana me ke a'o ia o kela ame keia lala ma na mea apau e pono ai ia hui, ke hoomaopopo aku ma na hana apau i lawelaweia, ua like ka hoolohe o kela ame keia lala i na alakai me ke a'oia ana o na koa iloko o ka oihana koa.

            "No na makahiki lehulehu i hala aku ke ku-e me ka paio ana aku o keia ahahui i ka oihana makai ; ke hana mai nei lakou i na hana ku-e kanawai i oi aku ka hoopoino i ka oihana kalepa o ke ao a i ke aupuni pu i ike ole ia ka lua me ia iloko o ka moolelo o ke ao.  O kuu kaikunane a'u i olelo aku nei ia oe he lala oia no keia ahahui, a nona au e kaumaha nui nei a i noi aku nei hoi ia oe, in a he mea hiki ia, e hoopakele ae hoi oe iaia mailoko ae o ka pilikia e hiki mai ana a'u i maopopo loa e hiki mai ana ia hopena maluna on a i kekahi la.

            He keonimana oiaio oia, aka nae, i kona manawa i halawai ai me kekahi poino ua koiia mai la oia e lilo aku i lala no kela ahahui a'u i hoakaka aku la ia oe i mea e hoopauia ae ai ia ilikia on a, a iloko o na minuke o kona nele ana i ka manaolana no kona palekana ua ae aku la oia e lilo i lala no ia ahahui.

            "He kanaka waiwai loa oia ia aha@@@ no ka mea he kanaka oia i kamaaina i na hana e pono ai ia ahahui a he akamai hoi i ka hookele ana ma kekahi mau alahele e pono ai ka ahakui.  Ia'u wale no oia i hoike mai ai i na mea huna apau e pili ana i keia ahahui mamuli o kona hilinai mai maluna o'u aole au e huai ae ana i kekahi mea i pili loa aku ia hui a lakou.  Ua hoike mai oia ia'u i na mea apau, a mahope o ko'u noonoo ana me ke akahele loa, me ka nui pu no hoi o ko'u kaumaha nona, me ka hakoko nui no'u iho pehea la au e hana ai no kona pono, hooholo iho la au e hoopakele iaia, in a e hiki ana ia'u ma o ke kumakaia ana iaia ame kona mau hoahui ma o ka hoike ana ae i ka lakou mau hana imua o ke akea.

            "No ka hoopakele ana ae iaia i paa ai kuu manao e hele mai imua ou a huai aku i keia mau mea apau imua ou, he hana hoi a'u o ka hoomakaukau ana ame ka hoolala ana no kekahi manawa loihi ahiki i ko'u hooholo ana i ko'u manao.  E ka hoaloha e lilo ana oe i kanaka kaulana loa ma nei hope aku ; e hanaia ana e oe kekahi hana kaulana loa ma kou ano he makaikiu a loaa ka lanakila, he mea i loaa ole aku i kekahi o na makaikiu kaulana mamua, ke ae mai oe i ka'u e lawelawe koke aku i keia hana me ka hoohala ole.  He hana no keia i hanaia e kekahi poe makaikiu mamua o ua hiki ole nae ia lakou ke hana, ua pau kekahi poe o lakou i ka make mamuli o ko lakou nele i ka makaukau ame ka makaala.

            "E lilo ana kau hana i mea e hoopakeleia ae ai ka aina mai o a o a e lilo ana no hoi kau hana i mea e pomaikai ai ke aupuni he hana i hana ole ia e kekahi makaikiu mamua, hookahi no uku nui o keia meahuna a'u e hoike aku nei ia oe oia ka hoopakeleia ae o ke ola o kuu kaikunane, a no kona ola au e noi aku nei ia oe a i komo io aku oe iloko o ka hohonua o keia hana, mai poina hoi oe i kuu kaikunane."

            "No ke aha no hoi kou mea koi ikaika ole aku i ko kaikunane e hookaawale iaia mai kela hui aku a mai ka lilo ana hoi he mea hana karaima iloko o ka aina?"

            "Ua hoao aku no hoi au no na manawa lehulehu me ke noi aku iaia e hookaawale mai kela hui mai, aole nae he ae mai ; ua noi aku au a noi aku me na waimaka no kekahi mau manawa aohe no nae he maliu mai.  Ua piha loa oia me ka huhu ia'u mamuli o kona manaoio kokoke loa ka manawa a hoea mai e lilo ai oia he kanaka waiwai loa mamuli o na kokua a ka hui iaia, a ole ma ke ano e loaa mai ai ia waiwai me ka hanohano aka me ka hana haihai kanawai ino loa.  Ua hele kona noonoo a piha loa me ke akenui i ka waiwai koke ae.  Ma ke ano nui ke kamailio ae ua ku a pupule maoli kona noonoo no ka loaa mai o ka waiwai loaa hewa."

            "He makemake au e hoopakele ae iaia mailoko ae o ka poino o ke alahele wale no e hiki ai ia'u ke hana pela oia no ka huai ana ae i ka mea huna a kona mau hoahui ame ka lakou mau hana apau i hoolala ai, elike me ia i hoikeia mai ai ia'u mai kuu kaikunane mai."

            I ka lohe ana aku o ka makaikiu i keia mau mea apau mai ka wahine mai ua hookahahaia oia, a ua loaa hoi he kumu nana e noonoo ai me ke akahele loa.

            "Wahi au i olelo mai ne i o ko kaikunane wale no kau i makemake ai e hoopakele, oia anei?"

            "Ae."

            "A ua huli pu aku oia me keia hui o ka poe hana karaima?"

            "Ae."

            "A nana ponoi i hoike mai ia oe i keia mau mea ae la apau au i hoike mai nei?"

            "Ae , nana ponoi."

            "A ua makemake oe e huaiia ae ka mea huna a kela poe hana karaima, oia anei?"

            "Ae, ua makemake au."

            "No ke aha oe i makemake ai e hana pela?"

            "I mea hoi e hoopakeleia ae ai o kuu kaikunane."

            "Aohe au kumu e ae?"

            "Aohe, o keia wale no."

            "A eia nae, wahi no au i olelo mai nei he uku makana nui ke loaa mai ana ia'u, no ke aha ia makana?"

            "Ae, ua olelo aku nei pela; i uku hoi no kau hana."

            "Aohe o'u makemake ia makana, no ka mea, he uku nui ko'u eloaa mai ana mai ke aupuni mai.  Ke maopopo ole aku la ia'u kou manao la.  Ua haawi ke aupuni he uku makana nui no ka paa o kela poe i ka hopuia ame ko lakou ahewaia, a i makana aha ia au e manao iho ai e loaa mai ana ia'u.  Pehea i loaa ai ia oe na mea oiaio no keia hui ame ka hana a na lala o ia hui?"

            "Ua hoike mua aku nei hoi au ia oe na kuu kaikunane i hoike mai ia'u i na mea apau."

            "E hoakaka hou mai oe i kekahi mau mea e pili ana nou iho, ke maopopo ole aku la kou ano ia'u la."

            "He ae no au i kena noi au, malalo nae o kekahi kumu."

            "Heaha ia kumu?"

            "E hiki ana nae ia'u ke manaolana aku?"

            "Manaolana ma ke ano hea?"

            "E ae mai hoi oe e hoopakele ana oe i kuu kaikunane ame--" a hooki koke iho la ka wahine i kana kamailio ana.

            "Hoomau aku i kau kamailio ana, ke ike aku nei au he mea hou aku no kekahi i koe au i makemake ai e kamailio mai."

            "Ae, ua pololei mai la kau koho ana."

            "Hoakaka mai ana oe."

            "Hiki ana anei ia'u ke manaolana aku e hoopakele ana oe i kuu kaikunane ma kekahi ano, a e mahele like ana i ka uku makana me a'u?  No ka mea ke ole ka'u kokua aole e loaa mai ana kela uku makana ia oe.  Ma ko'u manao he kuleana ko'u i ka akahi hapakolu o kela makana."

            "E auhea oe, ina mamuli kau ike i haawi mai ai ia'u e loaa mai ai kela makana, ke hoohiki aku nei au imua ou e mahele like ana au i ka makana e loaa mai ana me oe, no ka mea e ole oe loaa ia'u ia pomaikai"

            "A pehea ana kuu kaikunane?"

            "He ninau paakiki no kena au, aka nae, malia paha o loaa iaia ka hookuuia mamuli o keia kumu, ma kekahi manawa in a e lilo ana ko kaikunane i hoike ma ka aoao o @@ aupuni e hookuuia ana no oia."

            "Aole kuu kaikunane he kanaka hana karaima," wahi a ka wahine o ka pane ana mai me ke kuio.

            "Kupanaha no ka ; oelo mua mai nei hoi oe oia kekahi o na kanaka i hui pu aku me ka poe hana karaima, a in a oia kekahi lala o kela hui alaila mahea iho la ka hiki iaia ke kaawale ae mai kona kapaia ana aku he kanaka hana karaima?"

            "He lala io no oia no ka hui a ka poe hana karaima, aka aole oia he kanaka hana karaima."

            "Pehea iho la e hiki ai iaia ke kaawale ae mai ke kapaia ana aku mai ia inoa oiai oia kekahi lala o ia hui a ua ohi pu hoi i na pomaikai mai ia hui mai.  Aole anei pela? Pehea ana oe e hoakaka mai ai e haawale loa ae ai oia mai kela inoa mai?"

            "A eia ; iloko o kona minuke o ka pilikia me ka loaa ole o ka manaolana no kona palekana mailoko ae o ia pilikia, a oiai hoi oia e hou hewa ana i o a ianei no kahi e loaa ai iaia ka lanakila, ia manawa oia i koiia mai ai e lilo aku i lala no kela hui, aka he kanaka hanohano oia a he kanaka opio hoi i lawa ka makaukau no kekahi hana ike.  Ina aole kela pilikia ona aole loa oia e manao iki ana e hoohuli aku i kona ike kamahao no na hana a kel@ poe kanaka ino."

(Aole i pau.)