Ka Nupepa Kuokoa, Volume LVII, Number 28, 11 July 1919 — AHAI O HILO I HILO I KE EO O NA HEIHEI WAAPA. [ARTICLE]

AHAI O HILO I KE EO O NA HEIHEI WAAPA.

Iloko o na paio hahana ana mawaena o na hui heihei waapa, ka Makala, ka Healani ame Hilo, ma ka la Pokiulai aku nei ma Hilo, ua aha'i ae ka hui o Hilo i ke eo o na heihei waapa apau, a haule hoi na keiki o Honolūlu nei, na keiki o na hui waapa, i lawe mau i ke eo, iloko o na heihei waapa o na makahiki aku nei i hala. Ma ka heihei waapa o ka papa ekahi, mawaena o na hui ekolu, ua aha'i ka hui o Hilo, i ke eo me ka hoopaapaa ole, ua like pu me hookahi waapa a oi, ka mamao, mai ka Makala aku; ua aha'i hou no o Hilo, i ke eo ma ka heihei waapa o ka papa elua, me ka hahani loa nae o ka Makala mahope, he ekolu wale no kapuai ka oili o ko Hilo waapa mamua. Ma ka heihei waapa mua o ka papa ekahi, he eha mau waapa i komo, he elua o ka hui Makala, o ka Healani no hoi, ame ko Hilo. I ke kani ana o ka pu hoailona, no ka hoomaka ana e heihei, ua oili mua na waapa o Hilo me ko ka Healani, ua ulolohi na waapa o ka Makala. Ma kela hele ana aku o na waapa, ua kau like mau ka Healani me ko Hilo a hoea i kahi e huli mai ai, ia wa i oili liilii ai ka waapa o Hilo mamua. me ka mau no o na waapa o ka Makala mahope. Ma kela huli hoi ana mai nae no ka pahu eo, ua hoomahuahua mai la na keiki o ka Healani i ka ikaika o ka lakou hoe ana, a ia ike ana aku hoi o na keiki o Hilo, ua hooikaika pu aku la lakou i ka hoe ana, pela no hoi me na keiki o ka Makala. Ma ia hele ana mai o na waapa, aia mau no ka waapa o Hilo mamua kahi i alakai ai, aka e oni mau aku ana ka wapa o ka Makala imua, ahiki i ka haule ana o ka waapa o ka Healani mahope, a hele no hoi a hoea i ka pahu eo, ua like me hookahi waapa, ke kaawale o ka waapa o Hilo mamua, a kaa i ka Makala, ka helu elua. Ma ka heihei mai o ka papa elua, o kekahi ia o na heihei i piha me ke pihoihoi, no ka mea kinohi mai o ka hoomaka ana o na waapa e holo ahiki wale no i ka pahu hopu, e pili mau ana ka waapa o ka Makala me ko Hilo i kahi hookahi, a he ekolu wale no kapuai ka oi o ko Hilo mamua. he eo nae i hiki ole ke hoopaapaaia. O ka panina hope o na heiliei ma kela la, he heihei o na waapa mokuahi, he elua mau waapa no ka mokuahi Kaiulani i komo ma kela heihei, a ua kaa ke eo i ka waapa helu 3. Ua hoohauoli maoli ia aku ko Hilo poe, i ke kaa ana, o ke eo o na heihei elua i na keiki o Hilo, aole nae ia he mea na ko Honolulu nei poe e nuha ai oiai, o ka hopena iho la no ia, ma na hana heihei apau, he wa e kaa ai ka lanakila i kekahi aoao, a he manawa no hoi e haule ai.