Ka Nupepa Kuokoa, Volume LVII, Number 15, 11 April 1919 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

He Moolelo no

MAGURETA

a i ole

Iloko o na Wiliau a ke Aloha. He Moolelo i Piha me na Haawina o ka Ehaeha

_______

 

            Ua pololei keia manao o ke kauka opio o ke kumu nui hookahi wale no ia, nana i hoehaehe aku i ko Magureta noonoo, oiai aia mau no kela hiona o na hana kumukaia a Noela Kauwila maluna on a, ke ku mau la, ana i manaoi ai, ua like loa ka epa ame ke apuhi o na kanaka apau.

            No kekahi manawa loihi, aole he hookokoke iki mai o Magureta, ma kahi o kana kane e moe malie ana iluna o ka noho loihi, a no kona manao nae, ua moe paha o Reginola, nolaila hele mai la a ma ka aoao o ka noho, pane iho la in a paha ua makemake oia e hoi noloko o kona rumi, a ua lawa ka noho ana maluna o ka oneki.

            Hoike aku la no hoi o Reginola i kona makemake e hoi noloko o kona rumi, ia wa i hele aku ai o Magureta e kii i kekahi kuene no ke kokua ana aku i kana kane noloko o ka rumi.

            I ka hoea ana aku hoi o Reginola noloko o kona rumi, aole i loihi ma ia hope mai, komo ana no o Magureta, ua waiho aku oia i kona kuka koloka hoopumehana, a he buke hoi ke paa ana iloko o kona lima, me ka pane ana mai:

            "Ua loaa aku nei ai'u keia buke, iwaena o na ukana a Nele o ka hookomo ana maloko o kuu paiki, a manao au, e hauoli ana no oe, ke heluhelu aku au i na mea i kakauia maloko nei, ke ole nae ia e lilo i mea hoouluhua aku i kou noonoo."

            Nana mai la o Reginola maluna o na maka o kana wahine, me ka oluolu, hoike pu mai la no hoi i ka nui o kona mahalo, a pane ae la:

            "Ke hauoli loa nei kuu uhana, in a oe e heluhelu mai ana ai'u, a e hoolohe aku no au i na huaolelo apau, aka nae e ae mai oe e lawe mua aku i ka'u mahalo, no kou hele ana mai la, me ka manao e hana mai i kekahi mea no'u e pono ai."

            Wehe ae la o Magureta i ka buke a hoomaka aku la e heluhelu, aole i pau kana helulu ana, a piha okoa ka hora hookahi, o kona manawa wale no e hoomaha ai ka heluhelu ana, o ia ka wa e hoakaka aku ai no kekahi mau mea, a i ole ninau okoa aku paha ia Reginola, no kona manao maluna o kekahi mau mea maloko o kela buke.

            Mamuli o ka poeleele us hiki ole ia Magureta ke hoomau aku i ka heluhelu ana, aka waiho aku la oia i ka buke ilalo, a hoomaka aku la e kamailio ma ke ano nanea me kana kane, a ua hoohalaia he mau minuke e laua ma ke kamailio ana, ahiki wale no i ke kani ana mai o ka bele  no ka aina ahiahi.

            "Ina hoi paha no kou pilikia ole, in a he hookahi no ko kaua hele like ana iloko o ke keena aina, ua ike maole iho no au i ko'u mehameha, aole no hoi he wahi hoihoi iki iloko o'u, ma na manawa a'u e hoea aku ai no ke keena aina, mamuli o ko'u noonoo mau, aole o oe pu kekahi me a'u malaila."

            Ua lilo kela mau olelo i kamailioia aku e Magureta i mea nana e hookomo aku i na manaolana hauoli iloko o ke kauka opio, no ka hoea mai i ka manawa e haawipio okoa aku ai o Magureta iaia iho malalo on a, a o ia kana o ka pane ana mai:

            "Ke lana loa nei kuu manao, e loaa ana ka oluolu maikai ia'u ma ka la apopo, a o kuu iini nui no hoi, o ia ka hele pu ana aku me oe noloko o ke keena aina, oiai, he poe malihini wale no na ohua maluna nei o keia moku ia kaua, ua nele oe i na hoaloha, e kohu ai ka nanea ana iho.

            "Ina ua manao oe e Reginola, ua hiki ia oe ke noho pono Eluna me ka pilikia ole, alaila he hana hiki loa ia'u ke kauoha ana aku i ke kuene e lawe mai i wahi pakaukau uuku maloko nei, a i hookahi no ko kaua ai like ana, aole hoi au'u hoi ana aku noloko o ke keena aina, kahi a ka nui o na ohua e ai ai. Ua hiki ia'u ke koku aku i ke kuene, ma ka hana ana i na mea apau, e lilo ai keia keena, i mea kupono no kekahi kanaka ma'i."

            "Aole au i makemake e hookomo aku ia oe iloko o na hooluhi wale ana e Magureta," wahi a Reginola, oiai no nae aia iloko o kona uhana, ka olioli,  no ka ike aku, e hana mai ana kana wahine, i na mea apau, elike me ka kekahi wahine i makee i'o no kana kane.

            "He wahi mea ano ole loa keia a'u e manao nei e hana aku uou e Reginola, a in a oe e haawi mai ana e hana aku au elike me ka'u i manao ai, alaila ua makaukau keia mau lima i na manawa apau e hooko aku i na mea a'u i ike ai he pono nou. E lawe mai anei au i kau mau meaai maloko nei o kou rumi?"

            "Ae, aole he mea hauoli e ae iloko o kuu uhane, o ka ike wale no e ai pu ana kaua maluna o ke pakaukau hookahi," i pane aku ai o Reginola me ka hoike okoa ana aku ma kona helehelena i kona apono no na mea a kana wahine i hoolala ai e hana mai.

            Me ka hoohakalia hou ole iho, o ke ku ae la no ia o Magureta e hele aku la e ike i ke kuene, me ka hoakaka ana aku i kona makemake, o ia ka lawe ana mai i na meaai maloko o ka rumi o kana kane, me ka haawi pu ana aku he hapalua iloko o ka lima o ke kuene.

            "Ina o kou makemake ia e ka madame, ke haawi aku nei au i na hooia ana, e hoea aku ana ka olua mau meaai maloko o ka rumi o kau kana," wahi a ke kuene me kona haawi koke ana aku i na kauoha i knoa mau kokua, e lawe mai i kekahi pakaukau uuku noloko o ka rumi o Reginola, a iloko o ka hapalua hora mahope me, aia ke kana ame kana wahine, ma ka aoao o kekahi wahi pakuaku kahi i ai ai, no ka manawa mua loa, mahope mai o ko laua mare ia ana, a me he mea la, o kela no hoi ka manawa mua loa a laua i hoomaopopo iho ai i ko laua kulana oiaio, kekahi me kekahi.

            No ke koena mai o ka huakai aumoana, ua kaawale aku ka ma'i mai ia Reginola mai, a ua pau kona noho paa ana maloko o kona rumi, aka e holoholo mau ana oia maluna o ka oneki me Magureta, me kona hoikeike ole aku nae, ma kana hana a ma kana mau huaolelo paha, i kekahi mau mea e hoehaehaia aku ai ka noonoo o kana wahine.

            Iloko o na pule elua o ka mokuahi ma ka moana, ku aku la ma ke kulanakauhale o Ladana, ua hoohala ia he mau la lehulehu e Reginola me kana wahine ma kela kulanakauhale, ma ka hele makaikai ana, i na wahi kaulana a ano nui o kela kulanakauhale.

            Ma kekahi auwina la nae, ia laua o ka huli hoi ana mai no ko laua hokele, e waiho aku ana he mau leka lehulehu na Reginola, o ka hoouna pololei ia ana aku i Ladana, iwaena o na leka lehulehu, he hookahi leka me ke kelekalapa mai i Kanani mai: hookomo iho la oia i ka leka maloko o kona pakeke, a no ke kelekalapa nae, wehe koke ae la oia, e nana i na mea maloko, a i kona heluhelu ana iho, i na mea i kakauia, ua hoopihaia mai oia i ke kaumaha ame ka ehaeha, me ka naka ana ae o kona kino, pehea hoi e hiki ai ke alo ea, no ka mea, he lono kaumaha ia, no ka make ana o kona mau makua, ma ka ulia kaaahi, a penei iho kela kelekalapa:

            "Ua halawai o Mr. ame Mrs. Alika me ka make ulia mamuli o ka hooku'i ana o na kaaahi elua i kahi hookahi, ma ka la 22 o Feberuari. Ma ka la apopo e kanuia ai ko laua mau kino-- Noela Kauwila."

            O keia kekahi puupuu ikaika loa i hala ai aku me Kauka Alika, ka mea ana i moeuhane mua ole ai, e hoea koke mai ana kekahi lono kaumaha o keia ano, a o ka mea oi aku o ke kaumaha, o ia no ka hiki ole iaia ke hoi aku e ike hope i na helehelena o kona mau makua, oiai, aia oia i ka aina mamao kahi i noho ai.

            Alawa iho la oia i ke kuni o ka leka a Kanani, o ka la umi, ka la o ke komo ana maloko o ka haleleka, ka la mahope mai o ka hookoia ana o ka mare maluna on a me Magureta, nolaila maopopo koke iho la no iaia ka manao o kela leka, he pane no kana leka i kakau aku ai i kona kaikuahine, no kona manao ana e mare aku ia Magureata, a holo no Parisa.

            O ka mea nui loa nae ana e hopohopo la, me ke kaumaha pu no hoi o kona noonoo, o ia no ka hoea mai o na nupepa o Amerika, me ka moolelo piha no ka maopopo aku ia Magureta, he meahuna kekahi ana i huna ai mai kana wahine mai, he keu aku a ka mea maikai ole a e nui hou ana kana hana, ma ka imi ana i wahi e loaa ai ka oluolu i kana wahine.

            O kahi nae o ka laki, aole o Magureta pu kekahi me ia, ma kela manawa ana e heluhelu ana i kela mau leka, ua hoi pololei loa aku no o Magureta noloko o kona rumi, ma ko laua manawa i huli hoi mai ai mai ka hele makaikaai ana; aia ua o Magureta ke wehewehe mai la i kona lole holoholo, a komo mai i lole hou, no ka hui pu ana aku me na malihini o ka hokele i ka wa e kani mai ai ka bele aina o ke ahiahi.

            O kela hoi pololei loa ana o Magureta noloko o kona rumi, ua lilo ia i mea hoomama mai i ka manao o Reginola, in a paha no ka noho aku o kana wahine ma kona aoao, aole loa e hiki ana iaia ke uumi iho i kona mau manao, kaumaha, a e kono okoa ia mai ana hoi oia, e hoike aku i na mea oiaio o kona kaumaha ana.

            Aole no he manawa a Reginola i hoakaka aku ai imua o Magureta no kona mau makua a ohana paha, a ina paha no kona hoike aku, o ka lono kaumaha o ka loaa ana mai iaia nei, o ia no ka halawai ana o kona mau makua me ka make, aole ana e nele ka niele aku o Magureta iaia, ahiki i ka loaa pono ana he kaikuahine ponoi o Kanani no ia nei, o ke hele hou no ia i ka pilikia.

            Ma ka Reginola mau mea i hoomaopopo aku ai no Magureta, ua hauoli maoli kana wahine, mahope mai o ko laua mareia ana, nolaila he mea maikai ole hoi ka hookomo hou ana aku ia Magureta iloko o ke kaumaha, ke lohe aku oia i na mea e pili ana no Kanani, eia nae, he hana paakiki loa na ua kauka nei ka uumi ana i kona mau manao kaumaha no kona mau makua.

            "Ke hooholo nei au i ko'u manao, aole e hoike aku ia Magureta i na mea e hookaumaha hou ia ai kona noonoo," wahi ana i hooho ae ai. "E hoomau aku no au i ka hunakele ana i ko'u lilo ana he kaikunane no Kanani, pela wale no e hoomauia aku ai ka hauoli iloko o Magureta, no ka mea aole loa o'u kanalua, e hoea mai ana no i ka manawa e auhee loa aku ai na mea maikai ole apau mai iaia aku.

            "Pehea nae ka nui o keia kaumaha i kau mai maluna o'u, no ka make ana o kuu mau makua, he mea pono ia'u ke hoomanawanui, a e hoike mau aku au ma ko'u mau ano apau mawaho, aole loa he pilikia i kau mai maluna o'u," alaila haehae ae la oia i ke kelekalapa a liilii a lawe aku la e hookomo iloko o ke kapuahi hoopumehana.

            Lalau iho la oia i kekahi leka okoa, a wehe ae la e nana, me ka lilo pu no o na manao maloko o ua leka nei, i mea hookaumaha mai i kona manao, a o ia kana o ke kamailio wale ana ae no iaia iho:

            "O keia no ka mea a'u i hopohopo mau ai, no ka holopono ole o keia oihana a'u i hookomo nui aku ai i ka'u mau dala, no ka hoopukapuka ana. Ina he manawa kekahi e ike aku ai au no ka pii ae o kela hui ma ke kulana maikai, e hoolilo hou ia aku ana e a'u ko'u mau kuleana apau iloko o ka hui."

            Oiai nae aole he oili koke mai o Magureta, manao iho la o Reginola, ua hiamoe paha kana wahine, no ka hooluolu ana mai na luhi mai o ko laua hele holoholo ana, nolaila hele aku la oia noloko o ke keena puhipaka, a mahope o ka ho-a ana ae i kona ciga, lalau iho la i ka leka a Kanani i kakau mai ai, a heluhelu ae la, me kona hopohopo ole no ka ike mai o Magureta.

            He mea oiaio, o ka manao nui o kela leka a kona kaikuahine, o ia no kana mau mea i koho mua ai, he pane no ne mea e pili ana i kona mare ana ia Magureta. E hoakaka mai ana o Kanani i kona apono ole i ka mare ana o kona kaikunane ia Magureta, ma o ka maikai ole o ka noonoo o kela kaikamahine, aka nae he maikai wale no kana mau mea apau i kakau mai ia no Magureta, aole i lilo ka uumiia ana aku o kona a-i e keia kaikamahine i mea e hoalaia mai ai ka inaina ame ka hoowahawaha iloko ona, oiai aole mamuli maoli iho o ko Magureta manao ia hana, aka no kona opulepule mai, o kana mea wale no nae i kahaha loa ai, o ia ke kumu o ko Magureta huhu iaia.

            "Aole a'u mau hoahewa wale ana aku maluna o Magureta," pela kekahi mau olelo maloko o ka leka a Kanani. "Ka lana nei ko'u manao, aole loa oia e hoomaopopo ana i kana mea i hana mai ai maluna o'u, a e noonoo mau aku no oia, me he mea la he moeuhane, elike me ia au i kakau mai ai. He keu aku nae a ka mea kupaianaha loa, o ko'u lilo ana i mea nana e lili loa ai, a ua hoopohihihi loa ia mai hoi ko'u noonoo ahiki i keia manawa.

            "He nani nae ia ua paa kou manao e Reginola e lawe mai iaia i wahine mare nau, o ka'u wale no e kalokalo ae nei, e uhaiia kau mau hooikaika ana, me ka holopono, a e hoea mai hoi i ka la e auhee aku ai na ano maikai ole apau mailoko aku o kona noonoo.  

            "Oia kekahi o na kaikamahine huapala, me ka loaa o na kalena kiekie loa iaia, a in a he manawa kekahi ma keia hope aku, e hoi hou mai ai kona mau ano hauoli apau, aole he mea i hooi ia aku ka hauoli, elike la me kou kaikuahine nei, no ka loaa ana ia oe o kekahi wahine u'i, e haaheo ai ka naau nona."

            "Ua hiki ole ia'u ke kaohi mai i ka haawi ana aku i ka'u mau mahalo kiekie ana no kuu kaikuahina," i pane ae ai ke kauka opio, iaia o ka opiopi ana iho i ka leka a Kanani a hookomo iloko o ka wahi, me ka halo'ilo'i pu ana iho hoi o kona mau waimaka, no ke aloha i na makua ame kona kaikuahine.

            "He kakaikahi loa na wahine i like aku me ko Kanani ano, ka lilo ole o na mea i hanaia aku maluna one i kumu e hoalalai mai ai ka manao, e hoikeike aku ana kana kane i na mea apau e mau ai kona noho hauoli ana, a e lilo pu ana hoi oia i mea hoomama aku i ka manao o kana wahine, iloko o ka wa o keia kaumaha i kau aku ai maluna on a, no ka make ana o na makua o maua."

            No kekahi manawa loihi ka noho hookahi ana oo Reginola ma kela rumi, e noonoo ana hoi i kela mau mea ana i ike ai maloko o kana mau leka, alaila kiola aku la oia i na manao kaumaha apau, a hele mai la e huli i kana wahine, malia aia paha ke hoaa mai la no kona wahi i nalowale ai.

 

MOKUNA XVIII.

 

            O kela manao o Reginola e huna aku i kona mau manao kaumaha apau i wahi no Magureta e ike ole aku ai, ua hiki ole loa ia ke nalohia ae mai kona helehelena aku. O ka make ana o kona mau makua, na makua na laua i malama a i pulama iaia mai kona mau, la kamalii mai ahiki i ke kanaka makua ana, a i kokua aku ma ka hoonaauoa ana iaia, ahiki i kona olelo ana ae, nona iho kona ike ame ka makaukau ma ka oihana lapaau, a nona iho kona inoa ame kona mau waiwai; he mea ehaeha no kona noonoo, ka hoopoina ana ka laua mau hana.

            Ua hoomaopopo o Magureta i kela ano o kana kane, oiai no nae e hooikaika mau ana o Reginola e hoikeike aku i kona mau ano oluolu apau i kana wahine; aka ma ko Magureta aoao nae, aole oia i niele wale mai, e hoikeike mai ana no oia, i kona mau ano makee apau no kana kane, a e hana mai ana hoi ma na mea e hooluluia aku ai kona manao.

            Ua kuhihewa o Magureta o kela kaumaha o ka helehelena o kana kane ana'e ike mai ana maluna on a, uua hoea mai no ia mamuli o ka maikai ole o ko Reginola ola kino, a kauoha mai la iaia e hoopau ka hele nui ana i ka makaikai, aka e noho laua no kekahi mau la no ka hoomaha ana.

            He elua nae pule mahope mai o ka loaa ana aku o ka lono kaumaha no ka make ana o kona mau makua, ua loaa maoli aku la he leka iaia, e hoakaka piha ana i ke ano o ka ulia poino, i halawai ai kona mau makua me ka make.

            Ma ua leka nei, e hoakaka mai ana oia i ka holo ana o Mr. ame Mrs. Alika maluna o ko laua kaaahi no Pasadena, no ka hui pu ana aku me Kanani ame kana kane, a i ko hoea ana o ke kaaahi ma kekahi uwapo kiekie ma ke ala kuahiwi, ua hooku'i iho la no kaa a elua i kahi hookahi, me ka hiolo ana o ka uawpo, a haule aku la na kaa apau ilalo, ma kahi he haneri kapuai ke kiekie.

            He nui ka poe i halawai me ka make ma kela ulia poino, a i ka wa i loaa aku ai ka lono kaumaha ia Kanani, ua maule okoa kela kaikamahine, a ua lilo no hoi ia lono i kumu nona e ma'i ai:

            He mau leka hou ae no kekahi o ka loaa ana mai iaia, maloko o kekahi o na leka, e hoakaka ana i ke poho ana o kekahi hui kaaahi, ka hui kaaahi i hookomo nui ia aku ai na dala a kona makuakane, pela hoi me na dala a Noela Kauwila ame ka ua o Reginola mau dala, nolaila alua mau kumu hookaumaha i kona noonoo, a ke ike la ke kauka opio, oia kekahi o na kanaka ilihune, mawaho ae o na haneri o ka poe i poho ka lakou mau dala maloko o ka hui kaaahi.

            Ua lilo keia nuhoa o ka loaa ana aku iaia, i kumu e papalua ia iho ai kona kaumaha, a o kela ikaika iloko on a, e huna aku i kona ehaeha, ua hiki ole loa ia i kona mano ke hana aku, nolaila i ka wa a Magureta i komo mai ai, a ike i kona noho aku, maloko o ke keena hookipa i hookaawaleia no laua, me ka helehelena i hooi loa ia ae ke kaumaha, i ko na manawa aku mamua, hele pololei loa mai la o Magureta a noho aku la mamua o kona kane me ka pane ana aku:

            "Aole loa o'u kanalua, aia kekahi mea nana i hoopilikia loa aku i kou noonoo e Reginola. Heaha keia mea nui nana i hookaumaha ia oe? No ka pule ae nei a oi, ua hoohuoi au i ka makai ole o kou noonoo. Manao no anei oe, he kuleana ko'u e komo pu aku ai i ka auamo ana i kou mau pilikia apau?"

            Leha ae la ka Reginola nana ana ma na maka o kana wahine, a hoao mai la e minoaka. Ina ua hiki ole iaia ke hoike okoa mai i ka nui o kona makee ame ke aloha no kana wahine, ma o kana mau hana la, alaila ke hoike okoa mai la kona mau maka ia mea, a o ia kana i ae okoa mai ai ma ka pane ana mai:

            "He oiaio, ua hoopilikiaia mai ko'u noonoo ma kekahi ano, a no ko'u manao, he mea maikai ole paha na'u ka hookaumaha wale ana aku no i kou manao, pela iho la au i auamo hookahi ai i keia pilikia."

            "E hoomanao oe E Reginola, he wahine mare au nau. Ua haawi aku au i ka'u hoohiki paa imua o ke kahunapule a imua ou, pehea ka nui o na pilikia e halawai mai ana me oe, owau pu kekahi iloko olaila," no kela pane, ke lelele wale la no ka oili iloko o Reginola, no kona piha i ka olioli, no keia mau olelo o Magureta, no ka mea, o kela ka manawa mua loa a Magureta i hooia aku ai i kona kuleana, he wahine mare, na ke kanaka ana i ike ole ai ia mea he aloha, ma ke ano he kane mare. "He pilikia anei keia ma kahi o ka oihana?"

            "Ae, o ke ano maole ia o keia pilikia," i pane mai ai o Reginola, mahope iho o kona noonoo akahele ana he oi aku ka pono o kona kamailio ana mai i ka mea oiaio, a he kumu no hoi ia e nalowale aku ai kona manao kaumaha no ka make ana o kona mau makua, mai ka ike wale ana aku a Magureta. "O ka'u mau dala apau i hoahu ai, a'u hoi o ka hookomo ana aku iloko o kekahi hui alahao, pela me kekahi waiwai nui a'u i kau aku ai i na manaolana, e ili mai ana maluna o'u, ua lilo ia i mea poho mmuli o ke poho ana o ka hui."

            "E olelo mai ana anei oe e Reginola, aole he manaolana i koe no ka loaa mai o kau mau dala?" i ninau aku ai o Magureta, me ka hoike pu ana aku no hoi no kona komo pu aku me kana kane iloko o na manao kaumaha.

            "Eia no ia'u na pepa kuleana apau, no ka'u mau dala i hookomo i iloko o ka hui kaaahi, aka heaha nae ka waiwai o ia mau pepa, oiai ua poho ka hui kaaahi? He hookahi wale no kumu e lilo ai keia mau pepa kuleana i mau mea waiwai, aia wale no a hoohana hou ia kela hui, a ina no ka halawai nei me ka holomua, o ka manawa ia a ka pee paa mahele e kauka'i aku ai no ka hoihoi hou ia mai o ka lakou mau dala."

            Ku ae la o Magureta iluna, me ka noonoo ana no kekahi mau minuke, no na mea a kana kane o ka hoakaka ana mai imua ona, oiai hoi o Reginola e mihi la no kona kamailio ana mai i kona pilikia, aku i ka hala ana nae o kekahi mau minuke, noho iho la o Magureta ilalo, a kamailio aku la:

            "Ina o ke dala ka mea nana i hoopilikia aku i kou noonoo, alaila he mea maalahi wale no ka hoopau ana aku ia pilikia, mamua o na mea e ae," me ka paa ana aku o kekahi lima o Magureta maluna o ka poohiwi o kana kane.

            "Ae, o ka halawai ana o kekahi mea me ka poino, mamuli o ke poho ana o kana mau dala, he hana hiki wale no ia ke hoopauia ae, mamuli o kona hele hou ana i ka hana e hooikaika ai, i wahi e loaa hou mai ai ke dala iaia, a o ia ka'u e noonoo nei, he mea pono ia'u ke hele i ka hana, ma ka wehe ana aku i keena kauka no'u."

            "Alaila e huli hoi hou aku anei oe no Amerika, no ka lawelawe ana i ka oihana lapaau?"

            "Aole au i manao pela," wahi a Reginola me ka nana ana mai ma na maka o Magureta me ka oluolu. "He oiaoi ma ko'u aina hanau ponoi ka holopono loa o ka'u oihana, aole nae au i manao e hoi hou aku ihope, aka aia a loaa he wahi kupono no kaua e noho paa iho oi, ia wa au e wehe ai i kekahi keena oihana no'u, a kau aku i ko'u inoa mawaho o ko'u keena."

            Ku hou ae la o Magureta iluna, me ka hele ana mai a pili ma ka aoao o Reginola, a pane aku la: "Aole au i makemake e wehe aku oe i keena oihana nou, no ka mea eia ka iini iloko o'u, e hoea mai i ka hookoia ana o ka hana nui au i holo mai ai no keia aina mamao, o ia ka imi hou ana aku i ka ike ame ka makaukau ma kau oihana. Ua nui ke dala ia'u, a ke waiho aku nei au ia mau dala apau, malalo o kau hoohana ana aku, no ko kaua pono."         

            "Aole e hiki ia'u ke ae aku i kena manao ou e Magureta. He hana maikai ole loa na kekahi kanaka ke kauka'i ana aku maluna o na dala a kana wahine, me kona hele ole i ka hana, no ia kumu la, ua hiki ole i ko'u lunaikehala maikai ke hoopa aku i hookahi keneka o kau mau dala."

            "E hoopoina loa kou noonoo ana no na mea au i kamailio mai la e Reginola, no ka mea ai'u i haawi aku ai ia'u iho, i hapa no kou ola ana, ua haawi pu aku au i na mea apau i kuleana ai au," a no ka hoike okoa ana aku i ka oiaoi o kela mau olelo, kau aku la kekahi lima ma ka poohiwi o ke kauka opio.       

            "Alawa ae la ka Reginola nana ana iluna o na maka o Magureta me ka pane pu ana ae:

            "Aole oe i haawi holookoa mai ia oe iho e Magureta i hapa no kuu ola ana," wahi ana me ka leo o ka mea i piha me ke kaumaha. "Iwaena o na waiwai makamae apau maka honua nei, he hookahi wale no a'u mea nui e upu aku nei, o ia kou hooko mai i ka iini a kuu puuwai." ua lilo nae kela mau hoakaka a Reginola i mea e haikea ai ka hele helena o Magureta, aka paa koke ae la o Reginola i ka lima e kalele ana maluna o kona poohiwi, me ka wikiwiki ana ae i ka pane ana:

            "Ke nonoi aku nei au i kau mau huikala ana mai ia'u e Magureta, ua pupuahulu loa au ma ka hoopuka ana aku I kela mau olelo: au paha e manao iho ai, ua uhaki au i ka'u hoohiki i hoopaa aku ai imua ou. He oiaio, he mea hoehaeha loa mai i ko'u manao, ka noho wale  no, me ke kauka'i ana aku, o kau mau dala, ka mea nana e hoopau ae i ko kaua mau pilikia o ka noho ana aku."

            "E hoomanao hoi paha oe, ua noho aie au ia oe, no ka nui o kau mau hana maikai ia'u__ ua haalele aku oe i kau oihana no ko'u pono wale no, a ma ka mea oiaio maoli, he kuleana pu kou e komo mai ai iloko o na hauoli ana, no na mea apau i loaa ai'u."

            "Me kuu naau apau, ke haawi aku nei au i na mahalo ana he nui, no kena mau hoakaka au, e hoike mai ana hoi i ka nui makee iloko ou, no ka hooko ana mai i ka mea au i ike ai he pono: aka nae ua hiki ole loa ia'u ke lawe mai he hookahi keneka o kau mau dala, no ke kumu, e ahewa mau mai ana ko'u lunaikehala ia'u i ke ao ame ka po, no ke kauka'i wale ana aku i ko kaua pono maluna o kau mau dala. O kekahi no hoi, aole e loaa ia'u ka hauoli ma ka noho wale ana, aia no a lawelawe i ka'u oihana kauka."

            "Ke hoomanao nei au, ia kaua i haalele aku ai ia Amerika, ua paa loa kou manao. aole au mau lapaau hou ana. koe wale no ka a'o ana aku i na makaukau hou no ka oihana kauka." wahi a Magureta me ka maikai ole o kona noonoo.

            "E hoao kaua e hoopoina i keia mea, a mai hoopilikiaia hoi kou noonoo e kuu Magureta, a na keia mua aku no e lawe mai i na mea apau e loaa ai ka noho hauoli ana ia kaua," i hoao aku ai o Reginola e hoolalau i na kamailio ana.

            "He hookahi mea nui loa iloko o kuu noonoo, he mea hoi a'u i manao ai, ua hoea mai i ka manawa e hoakaka aku ai imua ou, o ia no keia: Ina aole au i mare aku ia oe, ua koiia mai au mahope iho o kau mau lapaau noeau ana i ko'u pilikia, e uku aku i kekahi huina dala mahuahua no kou lohi. Ina paha he mea ma'i okoa ma ko'u mahi, i hele pu mai ai oe ma keia huka'i, me ka haalele ana aku i kau oihana mahope, kou waiwai ame kou kaulana, aole ana e nele ka loaa he uku kiekie loa ia oe. Oiai nae owau kau wahine, owau ka mea au i lapaau ai, a i lawe mai ai no keia aina mamao no ka huli ana i na mea e pono ai au, aole anei hoi, e kaana pu kaua i ko'u mau mea apau?"

            "Auhea oe e Magureta, ke nonoi aku nei au i kou oluolu, e hoopau ko kaua kamailio ana maluna o keia kumuhana." me ka hoao ana mai o ua o Reginola e minoaka. "Mawaena ou ame a'u, aole a kaua mea e kamailio ai no ia mea he uku, a he aie paha. He wahine mare oe na'u, nolaila, ua ili iho maluna o'u ke ko'iko'i o ka malama ana aku ia oe ma na ano apau. No ka hoololi ana ae nae i ka kaua kumuhana e kamailio ai, e lilo ana anei i mea hoopilikia aku i kou noonoo, ina e hoopau ana kaua i ka hele makaikai ana no na wahi aku i koe, a e holo koke aku kaua no Parisa me ka hoohakalia hou ole aku?"

            No kekahi mau sekona, aole e hiki ia Magureta ke pane koke mai, oiai ua hoehaehaia aku kona noonoo, no ka ae ole o Reginola e kaana pu me ia ma ka hoolilo ana i kana mau dala ponoi, aka nae mahope o kona hoomanawanui ana i kona mau manao maikai ole apau, ia wa i aea mai ai kona mau maka a nana mai la i kana kane me ka i ana mai:

            "Aole a'u mau ku-e ana aku, in a ua manao oe, he oi aku ka maikai no ko kaua holo koke ana i Parisa," wahi ana me ka leo oluolu.

            "Me ka mahalo a nui no kena pane au e Magureta, a pehea e makaukau ana anei oe, no ka la mahope aku o ka la apopo?"

            "Aole he hana nui ka hoomakaukau ana e Reginola, ua hiki loa au ke makaukau iloko o ka hora hookahi. Ina e kokua mai ana o Nora ia'u, he hana liilii wale no ka hookomo ana aku i ko'u mau ukana apau maloko o ka pahu lole."

            "Ina pela iho la ka hikiwawe o kou hoomakaukau ana ea, alaila ua hiki loa ia kakou ka haalele iho i keia auwina la. a e hele aku hoi au e hooponopono no ko kakou alahele," alaila hookuu aku la oia i kana paa ana i ka lima o Magureta, eia nae ke mau la no ka puliki ana a ua kaikamahine nei i ka lima o kana kane, a i mai la:

            "He hookahi a'u mea i koe i makemake ai e kamailio aku ia oe e Reginola, mamua hoi o kou hele ana aku ma kau mau hana, o ia keia a malia aole no paha oe e ku-e mai ana: I ko kakou wa e hoea aku ai ma Parisa, aole anei he mea maikai ka hoi ana aku a noho maloko o kekahi hale hoolimalima, mamua o ka noho ana ma ka hokele? He oi ae ka oluolu o ka noho ana ma kou home ponoi, mamua o ka noho huikau ana iwaena o na malihini."

            Hoike okoa mai la ka helehelena o Reginola i ka hoihoi, no kela ninau a Magureta iaia; me ka i ana mai hoi: "He mea oluolu i'o no ka manao ka loaa ana he home e noho ai; aka nae e hoomanao oe e kuu wahine, aole o'u makemake e hookau aku i kekahi pilikia maluna ou ma ka makaaia ana i na mea e pono ai ka noho ana o ka home."

            "O keia hookahi ka mea a'u i makemake nui ai o ia no ka makaala ana no ka pono o ka home, aia a paa mau ko'u manawa me kekahi hana, e loaa auanei i kuu uhane ka hauoli. O e Reginola, e ae mai oe i keia manao o'u. ma ke ano hoao a in a no hoi e holopono ole ana ka noho ana aku ma kela ano, alaila e hoi kaua maloko o kekahi hokele maikai e noho ai."

            "Ina o kou makemake ia, alaila ke haawi aku nei au i ko'u ae," wahi a Reginola, no ka hooluolu ana aku i ka manao o kana wahine, a no kona ike ana iho no hoi kekahi. o ke kupono maoli no ia o ka noho ana ma ke ano he kane a he wahine.

            "Me ka mahalo a nui ia oe e Reginola," i pane mai ai o Magureta me ka hoihoi loa, ka mea a Reginola i ike ole ai pela mamua. "E hele aku au a hoike ia Nora, no ko maua hookomo ana i ko'u mau ukana maloko o ka pahu, a kakali aku no ka hoea mai i ka manawa, a kakou e haalele iho ai i ka hokele nei."

            "Akahi no au a ike i kou makaukau maoli no e Magureta, ma ka hoolala ana i ka holomua o ka kakou huakai nolaila e hele aku au e hooko i ka'u mau hana liilii, a me keia auwina la e haalele iho ana kakou ia Ladana nei," o ka hookuu aku la no ia o Reginola i ka lima o Magureta a hele mai la no na wahi ana i makemake ai e hele ma ia la.

            Ma kela po ana iho, aia lakou nei ma Parisa kahi i hoola'i ai a iloko hoi o na pule mahope mai, ua loaa he home no lakou, ma kekahi wahi maikai ma kela kulanakauhale, a elike no me ko Magureta maa i ke ano o ka hoonani ana i na hale o na kanaka Amerika, pela no oia i hoonani aku ai i ko lakou home, aole hoi elike me ke ano o ka noho ana o na kanaka Palani.

            Ma ka hoolako ana nae i ko lakou home, ua kaa wale no na hana ma ka aoao o Magureta, o kana wale no i koi mai ai ia Reginola, o ia ka nana ana i na rumi o ko lakou hale hoolimalima, ame ka lawe ana iaia e hoike maloko o na halekuai o na lako hale; aole i ae aku ua o Magureta ia Reginola e hele pu mai me ia, aka e hele no oia makekahi mau hana e ae.

            No ka piha hoihoi loa o Magureta no ka loaa ana he home ame kana kane e noho ai, ame ka lawe ana ae i na ko'iko'i apau o ka hoolako ana aku i ua home nei, ua hookuu loa aku o Reginola i kana wahine, e hana elike me kana i ike ai he pono, me kona manaolana, he mea kokua nui mai ia i ka noonoo o ka wahine opio, oiai hoi ua o Reginola, e hoohala ana i kona manawa, ma ka hele ana e hui pu me ke kauka, hookahi ana i kau aku ai i na manaolana ana, no ka lapaau ana mai i ka pilikia o kana wahine.

(Aole i pau)

_______________________________________________________________________________________________