Ka Nupepa Kuokoa, Volume LVII, Number 14, 4 April 1919 — KOHO KAHU NO KA EKALESIA O KEALAULA O KA MALAMALAMA O KA HOOMANAO NAAUAO O HAWAII. [ARTICLE]

KOHO KAHU NO KA EKALESIA O KEALAULA O KA MALAMALAMA O KA HOOMANAO NAAUAO O HAWAII.

E ike mai auanei na hoahanau apau i kuleana i'o, no ka Ekalesia o Kealaula o ka Malamalama o ka Hoomana Naauao o Hawaii, ma Koula, Honolulu, Teritore o Hawaii, e koho ana oukou i kahu no oukou, a no ko oukou Ekalesia, mahope koke iho o ke anaina pule nui o ka la 6 o Aperila, 1919, elike me ia i aponoia mai ai e ka papa kahu waiwai o ka Hoomana Naauao o Hawaii, ma ka la 23 o Maraki, 1919. Nolaila, ma ka aoao o ka Ekalesia ke kauohaia aku nei oukou na hoahanau apau i kuleana i ka Ekalesia e akoakoa mai ma kahi i hoikeia ae nei maluna, no ko oukou waiho ana mai i na inoa o na kahu e makemakeia ana e koho i kahu, ame ke koho ana i ke kahu a oukou i makemake ai. Ke kauoha pu ia aku nei na kahunapule haieuanelio apau o ka Hoomana Naauao o Hawaii, ma ka Mokupuni o Oahu nei i kuleana ma keia koho kahu ana, e hiki kino ae ma kahi i hoikeia ae nei maluna. Ke hoike pu ia aku nei no hoi ma keia, o kela ame keia hoahanau i kakauinoa i ka palapala kahea kahu kuleana aole, a i aponoia e ka ekalesia no John Kekipi Maia i kahu, a ia Eli Kekipi Maia i hope kahu, a i kakoo pu i na hana hoohaunaele iloko o ka ekalesia ma ko lakou manao ana, e malama pu iho i ka lakou anaina pule, oiai ka ekalesia e malama ana i kona anaina haipule elike me ka mau, a e hoao pu nei e malama kuleana ole i na anaina haipule maloko o ka hale kahu ma na Sabati, a maloko o ka luakini ma na po Poakahi, me ka ae ole ia aku eka ekalesia, a i ike ia ko lakou kumu hoopii i lawe ia mai ai i ka papa kahu waiwai, he hewa kipi ekalesia, a ma ia mau kumu i lawe ae ai ka papa kahu waiwai a hoahewa aku ia lakou, a kau pu aku i ko lakou hoopa'i ma ko lakou okiia ana aku, mai ko lakou nohona hoahanau ana no ka Ekalesia o Kealaula o ka Malamalama, a ma na ano kuleana e ae apau iloko o ka Hoomana Naauao o Hawaii, no ka mea ua lehulehu wale na manawa i ikeia ai o na hana i hoikeia ae nei maluna, a e nele pu ana no hoi i na kuleana o keia koho kahu i hoikeia ae nei maluna. Ma ke kauoha a ka Papa Kahu Waiwai o ka Hoomana Naauao o Hawaii. ROGERS KEKUEWA, Kakauolelo o ka Papa Kahu Waiwai o ka Hoomana Naauao o Hawaii. Aperila 1, 1919.