Ka Nupepa Kuokoa, Volume LVII, Number 5, 31 January 1919 — Page 8

Ka Nupepa Kuokoa

KE KILOHANA POOKELA NO KA LAHUI HAWAII.

CLOTHING

FOR MEN & YOUTHS

ON CREDIT THE MODEL

            Teritore o Hawaii,            )

Kuianakauhale a Kalana  )SS

            o Honolulu.                      )

            O W.H. CAMPBELL, mamua o kona hoohikiia ana.  ua hoakaka ae me ka olelo ana, oia ka Mea Uku Dala o ka The First American Savings and Trust Company of Hawaii, Limited, a o ka papa hoike malalo iho nei, he hoakaka piha, oiaio a pololei ia o na hana o ka The First American Savings and Trust Company of Hawaii, Limited, ahiki me ke komo pa o ka la 31 o Dekemaba 191@ o ua papa hoike nei, ua koiia mai ia ka Pauku Helu 3327 o na Kanawai Hooponopono Hou ia o ka 1915, o ke Teritore o Hawaii.

            O ke kumuwaiwai mahele i hoamanaia o ka Hui, he $200,000.00, i mahelehelela iloko o 2,000 kea no ka waiwaiio o $100.00 pakahi.  O ka heluna o na ka i hoopukaia, he 2000, o ke kanahiwa kumamalima pakeneka no ia mea, ua like pu me $140,000.00 no ka ukuia mai, e ko ana he $60,000.00 no ka ukuia mai i ka wa e kaheaia ai.  Na loaa aie o ka hou ma ka la 31 o Dekemaba, 1918 o ia iho keia:

            Kumuwaiwai i Ukuia…….$   140,000.00

            Na Puka i Mahele Ole ia….      33,748.51

            Na Hoahu Dala……………    841,011.89

            Na Hoemi i Hoomaopopoia.        2,714.98

                                                            __________

                                                         $1,047,475.38

W.H. CAMPBELL,

Mea Uku Dala.

Hanaia a Hoohikiia imua o’u i keia la 9 o Ianuari, 1919

J.H. ELLIS.

Noteri no ka Lehulehu, Apana Hookolokolo Kaapuni Ekahi, Teritore O Hawaii

            Ke hooia aku nei au ma keia o ka hoike maluna ae he kope oiaia a pololei ia o ka papa hoke kumu i waihoia aka maloko o ke keena o ka Puuku o ke Teritore o Hawaii.

10. H.  ELLIS,

Noteri no ka Lehulehu, Apana Hookolokolo Kaapuni Ekahi, Teritore O Hawaii

HOOLAHA LULU MANAWALEA.

-------

            Ke hoikeia aku nei ma keia i na lala apau o ka Ahahui Makua ame na Ahahu Lala o ka Ahahui Kokua a Hookuonoono o na Wahine Oiwi Hawaii, e lulu mai i ka lakou manawalea o Hookahi Dala no ko lakou hoahanau i make, Mrs, Maryann Lee Richards, a e haawi ae ia lulu ma ka lima o ke Kakauolelo Ohi Dala, Miss Allen, ma Kapalama, Oahu.

MRS. MAIKAI KALEO.

Kakauolelo Moolelo o ka Ahahui Oiwi Wahine.

HE HOOMAIKAI NUI

-----

            I ka Nupepa Kuokoa, Aloha oe:--E oluolu oe e hookomo iho ma kahi kaawale o kou kina lahilahi, i kela poomanao e kau ae la maluna.

            Mamuli o ke kipa ana mai o ka anela o ka make ma ka home noho o ko maua mau pokii i aloha nui ia, Mr. ame Mrs.  Mawae, a kaili ae i ka hanu ola o ka makou lei aloha he keiki, oia hoi o Miss Hattie Keahiulaahinuilapalapa Kapaku; nolaila, ke haawi nei makou i na hoomaikai kiekie loa i ka poe apau i launa a i hui pu mai me makou i na hora o ke kaumaha ame ka luuluu, ame ke ala pu ana no hoi me makou a ao ka po a e haawi pu ana hoi i na kulu waimaka aloha oiaio no ka makou lei aloha e moe malie ae ana no ka wa mau loa.

            Pela pu no hoi ma ka poe apau i haawi makana aloha mai i na po ke pua no ka hoohiwahiw ana iaia oia oia e moe ana i ka home o kona mau makua ma Waiakamilo Road, ahiki i kona laweia ana no kona home hou no ka wa mau loa ma ka ilina o Nuuanu.

            Nolaila e oluolu oukou e lawe aku i ka makou mau hoomaikai he nui me ke aloha; a maluna ae o na mea apau, na ko kakou Haku aloha e hoomaikao mai ia kakou apau.

            O makou iho no me ka luuluu,

NA KA OHANA.

KUU WAHINE ALOHA UA HALA.

-----

            Mr.  Sol.  Hanohano, Aloha nui kaua:

--E oluolu hoi oe e hookomo iho ma kahi kaawale o ka kaua hiwahiwa, ka Nupepa Kuokoa a nana hoi ia e hii hele aku ma na kihi eha o Hawaii aloha, i ike mai ai na kini ame ka ohana o kuu wahine aloha i hala ma o.

            Ma ka hora 11 o ka po Poaha, Jan. 9, 1919, i lalau mai ai na lima menemene ole o ka make a lawe aku la i ka uhane mai ke kino aku o kuu wahine aloha, Mrs, Sarah Mahihila, a waiho iho la ia’u e noho aku me ka u ame ke kaumaha ame ka mokumokuahua o kuu naau no kuu wahine aloha i haalele mai ia’u.

            E Kau i ka Ua Haao e ku aina hanau o kuu wahine aloha aole oia i kiei hou aku ana i kona home nana i hoohanau mai iaia.

            Ua hanauia kuu wahine heleloa mai ka puhaka mai o Kauahi (k) ame Kii (w) ma Waiohinu, Kau, Hawaii, i Maraki 17, 1843.

            Ua hoohuiia maua ma ka berita o ka mare e Rev. J, Kauhane ma ka luakini o Kauahaao, Waiohinu, i ka 1880, ma ka la 3 o Maraki.  I ka 1890 ua hoi aku la maua no Honolulu, a komo aku la au i ke Kula Kahunapule, ua noho maua malaila no elua makahiki ua a’oia mai la e ka Rev. C.M. Hyde ame Rev. H.H. Parker na kumukula ia manawa a ma ka 1892 ua loaa mai la ia’u ka leo kahea no ka lawe ana aku i ka Euanelio i na aina Kilipaki a ma ka la 18 o Iune o ia makahiki no ua kau aku laau ame ka’u wahine  aloha maluna o ka moku Hoku Ao; aloha ia aina malihini a’u i hele ai me kuu wahine ka mea a’u i aloha ai.

            I ka hiki ana aku ma kela aina malihini ua hui aku la maua me ka Rev. Lono ame na kamaaina o ia aina a hoonohoia iho la maua ma Maiana, Kilipati.  O ka maua hana mua loa o ia no ke a’o ana i ka olelo o ia aina a i ka loaa ana o ka olelo ua ha’i aku la maua i ka olelo a ke Akua ma ia aina apuni me ka holomua.

            No na makahiki he 12 a oi ka ha’i ana i ka Euanelio ma ia aina malihini, ua loaa hou ae la ka leo kahea e hoi mai ma ka la 23 o Mei 1864; haalele aku la maua ia Kilipati a hoi mai la no Hawaii nei.  Auwe ka ehaeha ame ka luuluu no kuu wahine e!  Ua noho maua ma Honolulu no hookahi makahiki; ua loaa hou mai la no ka leo kahea mai ka Ekalesia mai o Hanalei, Kauai ma ka la 15 o Mei, 1905.

            Haalele hou iho la ia Honolulu a hoi aku la a noho ma ke kihpai o Hanalei, a lawelawe i ka hana a ke Akua malaila no 11 makahiki a oi a no ka nui o ka nawaliwali o kuu wahine ua waiho aku i ka ke Akua hana.

            Ma ka la 10 o Iulai, 1916 ua hoi mai la maua a noho no ma Honolulu.  Hoomaha malaila no elua makahiki, a ma ka mahina o Iulai ua loaa mai la no ke kauoha ia’u mai ka Papa Hawaii mai e hoi i kahu no Kalaupapa ame Kalawao ma kahi o Rev. D. Kaai i waiho mai; a ma ka Poalua, Iulai 30, 1918 ua kau aku la maua maluna o ka Mikahala a hehi aku ko maua kapuai ma ke awa o Kalapapa a hui malihini iho la me ka lunanui o ke kahuama’i J.D. McVeigh, ame ka Rev. D. Kaai a hoolaunaia aku la imua i na luna o ka Ekalesia, oiai lakou ma ka uwapo.

            Ua noho maua ma keia aina malihini me ka imi ikaika ana i na mea o holomua ai ka hana  a ke Akua aka ma ka mahina o Sept., ua loaa iho la kuu wahine i ka ma’i nawaliwali ua hoao ke Kauka Goodhua e hoopakele i ke ola o kuu maa aloha aole hiki o ka loihi o na la o ko maua noho ana ma keia aina he elima maina a oi a hala wale aku la kuu mea aloha a o na la apau o kona ola ana ma keia ao, he 75 makahiki 9 mhina a haalele mai la oia ia’u e auamo hookahi i ka hana a ke Akua.

            Ma ka Poalima, Jan. 10, ua laweia ae kona kino lepo ma ka luakini o janana Hou a malaila i malamaia ai kona anaina haipule e na luna o ka Ekalesia J.K. Kainuwai, M.K. Makaena, A.J. Kauahihao.  Ua hoopihaia kela anaina e na hoahanau na ohana o ka mea i make ame na hoaloha o keia aina.

            Ua weheia ke anaina halawai aoao 38, H. A. N., pule mai ia J. K. Kainuwai mai pau ia, heluhelu ma Kinohi, mok. 23; pau ia himeni hou aoao 131; ku mai o M.K. Makaena wehewehe mai oia i ka moolelo o ke Sara make ana ame ka Aberahama mea i hana ai no kana mea aloha; ku mai o A. J. Kauhaihao mai iaia mai kekahi mau manao e pili ana no ka noho kaumaha ana ma keia ao aka ma-o he hauoli mau loa no ka poe apau e manaoio ana ia Kristo a he nui aku na mea maikai i hoa kakaia mai.  Pau ia ku mai o J.K. Kainuwai a hoakaka mai oia i ka moolelo o ka mea e waiho ana maloko o ka pahu kupapa’u elike me na mea i hoikeia maluna ae ame na manao hoolana imua o ke anaina i akoakoa mai.

            Ua malamaia ke anaina haipule me ka eehia.  Hookuuia ke anaina haipule me ka himeni aoao 191, H. A. Na me ka pule a J.K. Kainuwai, alaila ka’i aku la ka huakai no ka pa ilina o ka Ekalesia ma Papaloa, kahi e waiho ai kona kino lepo.

            I ka hiki ana malaila ua haawiia mai he mau manao paipai pokole me ka himeni aoao 179, H.A.N. me ka pule mai ia J.K. Kainuwai mai a hookuuia aku la kona kino lepo e moe no ka wa mau loa.

            Me keia mau manao apau i hoikeia ae la maluna ke hooki nei au me ka manaolana ua kipa aku ka uhane o kuu wahine me Kristo ma kela home nani ma-o.

            Ka lani kuu home e maha mau ai,

            Pokole paa ole kuu noho maanei;

            No keaha e ohumu ke kau paapu mai,

            No eha na luhi na kaumaha e!

            Nolaila ke haawi aku nei i ko’u mahalo ame ko’u hoomaikai a nui i ka poe na lakou na bo’ke pua i hoowehiwehi iho i ke kino lepo o kuu wahine a pela pu hoi i ua mea apau i ukali pu aku ma ka huaka’i hope loa o kuu mea aloha.

            Ma na keia oniu hua kepau o ka papapa’i ko’u aloha.

HAINA NINAU BAIBALA

-------

            Solomon Hanohano,  Aloha oe:----Eia mai na haina o na ninau New Year a ke Kaikamahine o ka Paia Aala o Puna, i uwila ia mai ma ka nuku o ka mano Oo kiko pua lehua o ka aina ua lu lehua o Hilo o ia hoi ka Nupepa Ke Ola o Hawaii o ka la 16 aku la o Ianuari nei, 1919, aoao ekolu kolamu eha hapa hope a penei ka uwo ana mai a ua eueu la o Puna:

            Owai ke keiki i hanauia mamua o ka hanaia ana o ka lani ame ka honua me he keiki hiwahiwa la ma o’u nei i hookumu iho ia o Iehova i ka honua a i kau aku ai i ka lani o ka mea o’u e loaa ai ua loaa iaia ke ola a ma keia mau manao ae la i kukulu iho ai ua eueu la o Puna i na kumu lehua ekolu a penei iho na mahelehele ana o lakou ekolu ka pauku poo ka pauku waena ame ka pauku hi’u.

            Ninau ekahi:  Owai ka inoa ua keika la?  A eia iho no hoika’u haina: O Naauao.  Ma o keiki la a ke Akua i hookumu ai ke Akua i na mea apau aole nae oia nei ke keiki hiwahiwa elike me Iesu Kristo a Ioane e olelo nei ma loa. 1:18 aka oia nei pu me Iehova me he keiki hiwahiwa la.

            Olelo iho la ka mea nona ka manao ma ka hapa hope:  O ka mea o’u e loaa ai, ua loaa iaia ke ola.  He mea oiaio loa ia o ka mea e loaa ai o ka naauao o ke Akua, e loaa no iaia ke ola o keia na olelo a Naauao nona iho i hoikeia ma No Solomona 8:12 hoomaka mai 22, 30-35.

            Ninau elua:  Ma keaha i hookumu ai o Iehova i ka honua?  Haina:  Ma ke akamai i hookumu iho ai o Iehova i ka honua.  Na Solomona 3:19, hapa mua.

            Ninau ekolu:  Ma keaha hoi i kau aku ai Oia i ka lani?  Haina:  Ma ka ike i kau aku ai i ka lani.  Na Solomona 3:19, hapa hope.

            E Mrs. Anelani, o keia inoa au i ake mai la e loaa ka inoa o ua keiki la he mea maikai a ke Akua ka inoa i loaa ai ka inoa o ko hoomana e ku la malalo o ka hooponopono ana a O. Z. W.  Waikalai, me ka poe kanaka i ulu ae ka manao e kukulu Ekalesia mahope iho o ke kaua mua a Wilioki, a maloko o ka halepule o ka Hoomana Poaono i hapaiia ai ka noonoo ana, i inoa no ka Ekalesia oiai o ko Halawale ame ko Kekipi mau inoa ka i manaoia i inoa no ka Ekalesia a ma ka Waikalai mau hoakaka ana no keia mau keiki elua, oia hoi o Naauao ame Iesu a loaa ai ka inoa o ko Ekalesi la!

            O keia ae la ka’u kui ana i au mau pua e ke Kaikamahine o ka Paia Aala o Puna no kau mea hoohauoli o keia New Year; a auhea oe e Mrs. Anelani, me ka lana o kuu manao aole no ko Honolulu nei kini ke kaona mele, aka no ko Hilo kini no; heaha la hoi o ke aloha no kou a nui.,

            Me ka mahalo i ka Lunahooponopono o ke Kilohana ame na keiki o ka papapa’i ka’u welina.

Owau mau no,

C. K. KEALOHA.

-------

KAKOO KE KIAAINA I NA WAHINE E LOAA KA PONO KOHO.

-------

            Ina no ka hooholoia e ka ahaolelo o ke Teritore o Hawaii e noho mai ana o ke kanawai i hoomakaukauia a i hoolalaia e kekahi poe oloko nei o ke kula nakauhale e haawi ana i ka pono koho balota i na wahine e haawi ana ke Kiaaina i kana apono ana ia kanawai o ka hoike ana ae ma ka Poalua iho nei.

            O ko ke Kiaaina manao he mea pono i na wahine e koho balota elike me ka mana i loaa i na kane.  O na wahine kekahi poe makemake loa i na hana  e pono ai ke aupuni a he manaoio no kona ua lawa loa ka makaukau i na wahine e lawelawe ai i na hana o ke aupuni elike me ko na kane.

            He elua alahele hamama e hiki ai e loaa ka pono koho kaulike maloko o na mokupuni wahi ana.  O ka mua ma o ka ahaolelo la a o ka lua ma o ke koho balota laula ana a na makaainana.

            Ua hooholoia e ka ahaolelo lahui kekahi bila kanawai ma kekahi manawa kokoke i hala aku nei e pili ana i ka pono koho balota kaulike maloko o ke Teritore o Hawaii, oia keia malalo nei:

            “Ma keia ke haawiia nei ka mana i ka ahaolelo o ke Teritore o Hawaii ma na koho balota apau i hoamanaia e ke kanawai kumu o ke Teritore o Hawaii e malama ana o na makaainana wahine i loaa na hookupono like ia ana me ko na makaainana kane e loaa no ia lakou ke kuleana e koho balota.

            “Ua haawi pu ia ma keia i ka ahaolelo i olelo mua ia ae la ka mana e waiho aku ai imua o ka poa koho balota o ke Teritore o Hawaii i ka ninau no ka hiki a hiki ole i na makaainana wahine o ke Teritore o Hawaii ke hoamanaia e koho ma kekahi mau manawa koho balota e malamaia ana malalo o na kanawai o ke Teritore o Hawaii.

HOOLA I KELA KUNU.

-----

KA MAUA LEI ALOHA UA, HALA.

-----

Ma ko Iesu mau lima,

Ma Kona poli no;

Malaila au e malu,

A maha maikai pu.

Hamau! he leo lani

Ke mele ia mai,

Ma o na puu nani

Mai kela ao maikai.

            Mr. Lunahooponopono o ke Kuokoa ka hiwahiwa a ka lahui; Aloha oe:-E oluolu mai kou ahonui i kekahi wahi rumi kaawale o ka kaua hiwahiwa, ka elele lawe olelo hoi nana e hii hele aku i ka maua puolo waimaka o ko aloha no ka maua lei aloha he kaiki i haalele mai ia maua i kona mau makua ame kona mau keikuahina e u ana e kanikau aku i ka maua Peter Naleieha i nalo no ka wa mau loa i iko mai ai ka ohana no kini makamaka e noho ana mai ka puka ana o ka la i Haehae ahiki i ka napoo ana o ka la i ka welona olu i Lehua.

            Ma ka hora 2 a. m. poniponi o ka Poaono nei la 11 o keia mahina i niau palanehe aku ai ka uhane maemae o ka maua lei aloha he keiki ma kela ao, a haalele iho i ke kino puanuanu no ka mea ua hala ka uhane ka mea e pumehana ai ke kino na maua e u aku me ke aloha keiki no ka maua Peter Naleieha hele loa.  Auwe, minamina e!

            Ua hanauia kuu Peter Naleieha Jr. ma Kahana, Kaanapali, Maui, i ka la 15 o Feb., 1914, nolaila ua piha iaiahe 4 makahiki, 10 mahina ame 26 la o kona hanau ana i na ea hu’ihu’i o keia ao mauleule.

            E puaaluu e, ke onehanau o kuu lei, ame ke kai nehe mai i Kalaeiliili, kahi a makou e pili aloha ai me ka lei a maua ua pau ko olua lohe hou ana i ka leo o ke kamahele a olua e wawalo hou ana ma ko olua mau aekai a pela hoi ko olua mua ehukai e hoopulu hou ai maluna o ka ili o ka maua lei aloha hele loa.

            E Hiluna ame Kalaeokai’a e, kahi a maua me ka lei a maua e holoholo ai, ua pau ko olua ike hou ana i ka maua Peter e maaloalo hou ana mamua o olua.

            E Kaopala ame Keonenui e, kahi a maua me ka lei a maua e pili ai ua pau kona kakaa hou ana i ko olua ano hu’ihu’i.

            E Alaeloa ame Houokeana, kahi a maua me ka lei a maua e holoholo ai ua pau ko olua ike hou ana i ka maua Peter e maaloalo hou ana ma ko olua mau owawa uliuli.

            E Napili e, kahi a makou me ka lei a maua e luana pu ai ua pau kou lohe hou ana i ka leo o ka maua Peter e wawalo hou ana ma kou mau kualono.

            E Lahaina e kahi a maua me ka lei a maua e holokaa otomobile ai ua pau kou ike hou ana i ka lei a maia e holokaa ana ma kou alanui pahee.

            E Mikihala e, ka mea nana e hii i ka maua lei aloha no Pukoo, ua pau kou hii hou ana i ka lei aloha a maua. E Pailolo e ke kai hoi a ka lei a maua e au ai no ka pono o ke aupuni o Kristo, ua pau kou hoopulu hou ana me kou ehukai i ka ili o ka maua lei hele loa.

            E Ahaino i Molokai e, kahi a maua me ka lei a maua e noho ai ua pau kou ike hou ana i ka lei a maia e holoholo hou ana mamua o kou alo.

            E Imanuela e, ka halelaa o Iehova ka hale hoi a maua me ka lei a maua  i hoomanawanui ai ahiki i kona ku ana, ua pau kou ike hou ana i ka lei a maua e kihei hou ana ma kou mau paia eehia.

            Ke hoomaikai pu aku nei maua i na mea a pau i akoakoa mai no ka anamo pu ana i na kaumaha me maua a pela pu hoi me ka lakou mau makana pua no ka maua lei aloha hele loa.

            Ke hoomaikai pu aku nei maua i kekahi o ko maua makua i kona kokua pu ana i kekahi mau hemahema o ka mau lei aloha a pela pu hoi me na makamaka i kokua ia maua no ka eli ana i ka lua ame ke kanu ana i ka maua lei aloha hele loa.

            Ua piha ka maua lei aloha me ka maemae aloha makua heahea iloko no o kona wa liilii ma na ano no apau ua piha oia me ka maikai a ka naau e aloha aku ai.  Pela i ko ai ka olelo a ka buke Nui i hoike ia ma Ioba 14:1.  O ke kanaka i hanau ia e ka wahine he hapa kona mau la a ua piha i ka popilikia.

            Me ka Lunahooponopono ame na keiki o kou papapa’i ko maua welina.

O maua no me ke kaumaha,

PETER NALEIEHA, SR.,

MRS. PETER NALEIEHA.

------

HE UMI-KUMAMAONO POE I HOPUIA NO KA PILIWAIWAI.

------

            Ua lilo maoli ka piliwaiwai i mu a i ole i ma’i kuluma e laha nei iwaena o kekahi hapa o ka lahui i keia mau la, he ma’i i ikeia ke ola ole i ka lapaauia e na hoopa’i koikoi a ke kanawai.

            Ma ke Sabati iho nei malalo o ke alakai ponoi ana a ka Makaikiu McDuffie, he umi-kumamaono ka nui o na Pilipino ame na Kepani piliwaiwai i paa ae i ka upena nae a na makaikiu a ka’ihuluhuluia ae i ka halewai a ma ke kakahiaka Poakahi iho nei i hooloheia ai ko lakou mau hihia.

            Maloko o kekahi mau hale hoolimalima keia poe i hopuia ai iloko o ka hale mua he elima mau Kepani i paa ae i ka hopuia; a ma ka lua mai o ka hopuia ana ma kekahi hale okoa mai he umi-kumamakahi poe ka nui o na lahui like ole i paa ae.

KA EUANELIO LOLI OLE A IESU KRISTO NO KE KAULIMA.

------

            No ka hoopomaikai ana i na keike penei i hoomhu’i a hoohana mau ia ai ma ke kaulima ana ma ke poo mai kela wa kahiko loa mai no ahiki aku ma ka la ame ka hora a Emanuela e hiki hou mai ai me ka umi tausani o kona poe anela.  A e nohoalii a e hoomalu pu me ka poe hoano kana poe keiki ka poe hoi e hoolohe piha ole ana i ka hoomau e like loa ana me kana kauoha maloko o ka Buke o na Buke.

            A ike la o Iseraela i na keiki a Iosepa o ninau aku la ia, “Owai laua nei I mai la o Iosepa i Kona makuakane, “O laua nei na keiki a’u, “a ke Akua i haawi mai ai na’u ma keia wahi.  I mai la kela:   “E hoonoho oe ia laua imua o’u a e hoomaikai aku au ia laua.”  Kaumaha no ua maka o Iseraela no ka elemakule, aole hiki iaia ke nana a hoonoho mai la kela ia laua imua ona a honi aku la oia ia laua a puliki iho la. I ae la o Iseraela ia Iosepa: “Aole au i manao e ike aku i kou maka aia hoi ua hoike mai ke Akua ia’u i Kau mau keiki.”  A Lawe mai la o Iospea ia laua mawaena mai o Kona mau kuli a kulou iho la ia me ka maka ilalo i ka honua.   Lawe iho la o Iosepa ia laua a elua ia Eparaima i Kona lima akau ma ka lima hema i Iseraela ia Manase i Kona lima hema ma ka lima akau o Iseraela, a hoonoho iho la ia laua imua ona.  Hohola aku la o Iseraela i Kona lima akau a kau iho la ma ke poo o Eparaima o ia hoi ke kaikaina a i Kona lima hema hoi ma ke poo o Manase kau akamai no ia i Kona lima no ka mea o Manase ka hanau mua.

            Hoomaikai mai la oia ia Iosepa i mai la:  Na ke Akua ka mea a ko’u mau makua o Aberahama ame Isaaka i hele ai imua Ona na ke Akua nana au i malama mai, mai ko’u wa uuku ahiki loa mai i neia la:  Na ka anela i hoopakele mai ia’u mailoko mai o na hewa apau, e hoomaikaiia kau keiki a e heia ko’u inoa maluna o laua ame ka inoa o ko’u makua o Aberahama ame Isaaka a e laha loa laua i poe nui loa iwaena o ka honua.

            A ike aku la o Iosepa ua kau aku kona makuakanu i Kona Lima akau ma ke poo o Eparaima ua hewa ia i Kona maka; hapai ae la ia i ka lima o Kona makuakane e hoihoi ae mai ke poo ae o Eparaima a i ke poo Manase.  I aku o Iosepa i kona makuakane:  Aole pela e ko’u makuakane, o ke kaikuaana keia. e kau oe i kou lima akau maluna o kona poo.  Hoole mai la kona makuakane i mai la:  Ua ike au e kuu keiki ua ike oe.  E lilo no hoi ia lahui kanaka a e nui no ia aka o Kona kaikaina e kela aku kona nui mamua o keia a e lilo ana ia i lahui kanaka nui loa.  Kin. 48:8-19.

            Alaila laweia mai la i oua la na kamalii e kau aku ai ia i na lima maluna o lakou a e pule aku a papa aku la ka poe haumana ia lakou.  I mai la o Iesu:  E kuu mai oukou i no kamalii me ka papa ole oa lakou i ka hele mai i O’u nei; no ka mea no ka poe elike me lakou nei ke aupuni o ka lani.  A kau iho la ia i na lima maluna o lakou a hele aku la. Mat. 19:13-15.

            Halihali aku la lakou i kahi mau keiki lili Iaia i hoopa mai Oia ia lakou; papa ae la kana poe haumana i ka poe nana i lawe aku.  Ike mai la o Iesu, alaila, huhu iho la Ia i mai la ia lakou: E ae aku oukou i na kamalii ke hele mai i O’u nei mai papa aku hoi ia lakou; uo ka mea elike me lakou nei aupuni o ke Akua.  He oiaio ka’u e olelo aku nei ia oukou.  O ka mea aole e launa i ke aupuni o ke Akua me he keiki uuku la aole loa ia e komo mai ilaila.  Hiipoi iho la Oia ia lakou kau ae la i Kona lima iluna o lakou a hoomaikai mai la ia lakou.  Mat. 10:13-16.

            Kahea aku la o Iesu i wahi keiki uuku, hoo-ku ae l aiaia iwaenakonu o lakou.  I mai la:  He oiaio Ka’u e olelo aku nei ia oukou ina aole oukou e hoohliia ae a elike me na keiki uuku aole loa oukou e komo iloko o ke aupuni o ka lani.

            O ka mea launa aku i kekahi keiki elike me keia no ko’u inoa oia ke launa mai ia’u.  Aka, o ka mea hoohihia aku i kekahi o keia poe mea uuku o ka poe manaoio mai ia’u, e aho nona ke nakinakiia ka pohaku wili palaoa ma Kona a-i a e hoopoholoia oia i kahi hohonu o ke kai.     Mat. 18:2-6

hana hoilikole i nei mau ka o kekahi poe mawaho iho o na pa papa a mawaho iho kekahi o ua halekuai.  He hana ha’iha’i kanawai keia e hanaia mai nei ma ka ano laula he ma’i aai iloko o ka lahui e pono ai e kinai loa ia no ka mea o na keiki kekahi e hana pu mai nai i keia hana hooilikole, a e lilo aku ana lakou i poe aihue powa a pepehikanaka paha i ko lakou wa e kanaka makua ae ai i ka manawa e halawai ai me ka nele o keia ka manawa kupono e o’u ai i ka wauke o i opiopio.

------

HOOMAKAUKAU NO MUA AKU NEI

E Hoao e Hoomakaulii Ano…E Malama i ke Dala e wehe i Buke Banako Hoahu me ke

CHINESE-AMERICAN BANK

A NANA AKU I KA ULU IO KAU DALA

NA PAHU DALA                                 $1.00 no ka Wehe                             Kihi o ke Alanui

Kela Laau Kamahao

B.B.C.

I Aponoia e na Kauka Kaulana he nui ame na Kanaka iloko o na oihana a ka lehulehu.

            He loina akeakamai i kaawale mai na waiawa minerals mai.  He mea ia i hoohuihuiia o na Meaulu Laau Lapaau e hana pu ana me ke Akua, hoomaemae a hooikaika i ka mikini holookoa oloko o ke kino; e kiola ana i ka nawaliwali ame ka ma’i e hoolilo ana iaia i mea hulili me ka mimo ame ka mana o na aalolo.  Nana e hoomaemae i ke koko-hoola i ka Opu, ke Akepaa, ka Puupaa ame ka Puumimi.  He Laau Hoonaha maikai me ka hohemo i ke ko-e.

            O ka B. B. C. ka mea nana e hoopiha mai i ke kino me ka ikaika wikani o ke ola kino me ka ikaika o na la opio.  Ua hoopomaikaiia ka poe nawaliwali, nananakea emi pu me ka haalulu, mahope o ka hoao ana he mau pule kakaikahi wale no.

            O ka B. B. C. ka laau maikai loa ma ke ao nei.

KUAIIA MA NA WAHI APAU.

Keena o ka B. B. C. 161 Alanui Moi

Honolulu, Hawaii

KakelameKuke

(KAUPALUNAIA.)

Poe Kalepa mai ke Komisina

- A HE -

Pa Hale Kuai

-------

            $1,500-Hale me 6 rumi ame hookahi eka aina ma Kalahi-uka.  Hookahi mile mai ke Alanui Moi aku.

            He wa maikai loa keia e loaa ai kekahi hale ame ka apana aina nui e hiki ai ke mahiai i kekahi mau meaai, me hanai holoholona pu.

            He mea hiki no ke hooponopono ia ke ano o ka uku ana.

            Heaha la ka mea hiki ia oukou ke uku mua ia’u no keia mea maikai.

            Hele koke mai e ike ia’u.

--------

PAULO KALAUKA

(@ E. R. Strauch).

NUPEPA KUOKOA

------

No ka makahiki  (one year) ………. $2.00

No eono mahina (six months) …….   1.00

            O na Dala ame na Hoolaha Apau e hoouna pololei mai i ka ADVERTISER PUBLISHING COMPANY, LTD., wale no P.O. Box 208, Honolulu, T.H.

            Entered at the Post Office a Honolulu, T.H., as Second Class Matter.

HOIKE NO KA HOOLOLIIKA INOA

------

Ma keia ke hoike aku nei ka

HAWAIIAN GAZETTE CO., LTD.

mahope aku a ma ka la mua o Ianuari, 1919 e hoololiia ana ka inoa o ka Hui i oleloia i ka

ADVERTISER PUBLISHING COMPANY, LIMITED.

He o ia mau no ka oihana a ka Hui ma ke ano he Poe Pa’i, Hoopuka, Humu Buke.  Pa’ikii me Kahakii a Hana Kuni.

HE PUOLO WAIMAKA ALOHA NO KUU POKII UA HALA.

-------

            Mr Sol. Hanohano, Welina pu kaua: - E oluolu hoi oe, no’u kahi rumi kaawale o ka kaua wahaolelo, ke kukui malamalama nana e uwila aku apuni na moku i ike mai ai o’u mau kini makamaka ame ka ohana pu no i ke poomanao e kau ae la maluna.

            Ua haalele mai i keia ola ana kuu pokii oia hoi o H. Mana Kaaikuoha, i ka la 26 o keia mahina, maloko o ka pa hoomalu o Kalihi.

            Ua hanauia kuu pokii kaikunane mai ka puhaka mai o Malina (w) ame D.W. Kaaikuoha ma Puuhane, Kohala Akau, Hawaii i ka makahiki 1871, Maraki 14, ua piha iaia na makahiki he 47 me 10 mahina.

            Ua hoonaauaoia kuu pokii ma ke kula apana o Honomakau malalo o J. Kaimana ame kana ewa, Kaupena Kapaona a nolaila ua waiho iho oia mahope nei a noplaila ua waiho iho oia mahope nei he wahine kanemake ame na kaikuahine ekolu e paiauma ana iaia ma keia aoao o ka muliwai eleele o ka make.

            Ua paa aku kuu pokii ma ka pa hoomalu o Kalihi i ka la 16 o Novemaba, 1917 nolaila ua piha iaia hookahi makahiki a oi o kona noho ana ame ka hanu ana i na ea oluolu o ia wahi.

            Ua hoouiia kuu pokii me Malaea Moluhi, i ka la 14 o Augate, 1911, nolaila ua piha ia laua he 7 makahiki a oi o ko laua noho oluolu ana me ke aloha.

            He kanaka puuwai hamama heahea i ke poe apau e kipa aku ana ma ko laua home he kaikunane aloha kaikuahine, he aloha i ka lehulehu apau nolaila ua pau kana hana maanei ua kuu ka luhi.

            He 17 ko makou nui ua ohi aku la no hoi ka po he 14, koe makou ekolu kaikuahine, Mrs. A.F. Kalama, Mrs. D.E. Kanaina e noho mai la i ka ainahanau ame na ohana apau; aloha oukou apau loa.

            Kuu pokii i ka makani apaapaa o ka aina mai ka ihu o ka lio la e kikala ko iwa ua iwa aku la kuu pokii kau i ka lewa.  E Puehuehu i ka lau o ke ko ame ke Aeloa o Kapaau, aole kuu okii e hehi i kou mau huna lepo kuu kaikunane mai ka ai haaheo o ka aina mai na i’a milimilima o Kaiopihi aloha ino no hoi kuu pokii kuu kaikunane mai ka ohu hali ma ke kuahiwi nolaila mawaho ae o na mea apau ke haawi nei au i ka’u mau hoonaikai palena ole i na ,akua hookanaia o kuu pokii o ia home ehukai.

            Ia oe e ka mama maikai ka makua hou o ia wahi ame oe e D Alapai, aloha oukou a pau.  Ua wehe mai olua i ka olua puuwai hamama e hooluolu mai ana i ka mea luuluu elike me a’u nei a ke pule nei au i ke Akua Nana no e kau mai i na hoopomaikai maluna o olua a pela no hoi me ka wahine kane make o ka Haku ka mea nana e hoomama mai i na kaumaha ame oe e ka Luahooponopono o ka Nupepa Kuokoa ko’u aloha ame na keiki hoonohoua ko’u anoai.

            Owau iho no me ka oiaio,

MRS. E.K. McGIFFIN.

1951 Colburn St., Kalihi, Honolulu.