Ka Nupepa Kuokoa, Volume LVI, Number 51, 20 Kekemapa 1918 — KUKULUIA HE AHAHUI KAMEHAMEHA MA KAUAI. [ARTICLE]

KUKULUIA HE AHAHUI KAMEHAMEHA MA KAUAI.

Mahope iho o ka hoohala ana i kekahi mau la ma ka Mokupuni o Kauai, i huli hoi mai ai o Joseph K. Kanepuu ame William Chung Hoon, Jr., ma ka Poakolu aku nei o ka pule i hala, me ka hoike ana ae i ke kukuluia ana o ka Ahahui Kamehameha ma Kauai, ma ke kohoia ana o na lunanui o kela ahahui hou, e nee aku ai imua ma ke kahua paa. He hope aliiaimoku o Joseph K. Kanepuu no ka Ahahui Kamehameha, a he kakauolelo hoi o William Chung Hoon, Jr., a o ka manao nui o ka laua huakai no Kauai, no ke kukulu ana no ia i ka Ahahui Kamehameha malaila, a ua ku mai nei ma ka inoa Kaumualii, Ahahui Kamehameha Helu 3. O na lunanui o keia ahahui hou o ia iho keia: J. Mahiai Kaneakua, kaukaualii; Nicholas Hoopii, laaualii; William Werner, kakauolelo; Abraham G. Kaulukou, kuauhau; Samuel A. Amalu, aipuupuu; R. Puuki, kahuna; Joseph Huddy, kuhikuhipuuone; John Hano, pukaua nui; Enoch Lovell, pukaua iki; S. W. Meheula, kiailoko; H. Castro, kiaiwaho. No ka hanohano o na malihini mai Honolulu aku nei, na laua i kukulu i kela ahahui hou, ua haawi ae na lunanui o kela ahahui i kekahi paina luau maloko o ka holo o Kapaa ma ka po o ka Poakahi; me ka hoohalaia ana o kela ahiahi ma ka himeni ana, a ma ka haiolelo ana. O ka wehi o ka poe apau i hoea ae ma ka paina o kela ahiahi, he lei hala, kekahi o na lei punahele i na Hawaii.