Ka Nupepa Kuokoa, Volume LVI, Number 49, 6 December 1918 — HE HOALOHALOHA NO MRS. MARYKINA NAINOELUA [ARTICLE]

HE HOALOHALOHA NO MRS. MARYKINA NAINOELUA

Ua pouli ka la, ua pouli ka mahina, Ua pouli na hoku ame ka malamalama, Ua hoi mai na ao mahope o ka ua, Ua moku ke kaula kala: Ua naha ke kiaha gula, Ua naha ka pakeke ma ka punawai, Ua naha ke kaa ma ka luawai. A no ka mea, hele ke kanaka i kona hale mau, a o ka uhane, e hoi aku no ia ike Akua, i ka mea nana i haawi mai. Ma ka la 21 o Novemaba, 1918, hora 5:30 p.m., ua kipa ae la ka anela o ka make, a lawe aku la i ka hanu ola o ko kakou makuahine iloko o ka pono i aloha nui, ia, Mrs. Marykina Nainoelua, a waiho iho la i ka puolo o ke kaumaha ame ka luuluu na ke kane ame na keiki ame na moopuna ame na hoa paahana iloko o na hana a ke Akua, kahi ana i ku ai e auamo i keia puolo o ka ehaeha ame ke kaumaha, me ka mokumokuahua o ka naau. Ua pio ke kukui o kona hale kino lepo, a ua pau hoi kana hana, a ko ae la ka olelo a ka Palapala Hemolele, he mahu ko kakou ola ana a ualo iho la. O Mrs. Marykina Nainoelua, he hoa hanau oia no ka ekalesia o Waianae, he lala Kula Sabati, he komite kiai, a he komite haipule no ka Ahahui C. E. o Waianae, he komite malama ola no na lala pilikia o ka ahahui i oleloia. He makuahine hoomanawanui, e komo pu ana iloko o na pilikia o ka poe ma ka haipule pu ana. He inoa maikai kona iloko o ka aina, maemae, a ua piha no iaia na makahiki o kona hanu ana i na ea oluolu o keia ola ana i ke 52, ahiki iho la i ka hookoia ana o ka olelo luli ole a ka Palapala Hemolele, he lepo oe, a e hoi aku no oe ika lepo. Walohia wale! Nolaila, o makou o na hoahanau o ka Ekalesia Hoolepope o Waianae, na lala o ke Kula Sabati, na lala o ka Ahahui C. E. ma o ko makou mau komite la, ke komo aku nei makou e auamo pu i na ehaeha ame na kaumaha i kau iho maluna o oukou. Nolaila, e hooholoia, ke pule nei makou i ka Mea Mana Loa, e hooluolu mai i na naau i piha me ka luuluu, no ko kakou makuahine i aloha nui ia. Nolaila, e hooholo hou ia, e hoouna ia i hookahi kope o keia hoalohaloha i ka Nupepa Ka Puuhnua, hookahi kope i ka Nupepa Kuokoa. Na Iehova no i haawi mai a nana no i lawe aku. E hoomaikaiia ka inoa o Iehova. O makou iho no na komite, S. W. KEKUEWA, SAMUEL MAPU, M. K. LELEO, MRS. AUG. KEAWEKANE, MRS. S. W. KEKUEWA. Waianae, Nov. 24, 1918.