Ka Nupepa Kuokoa, Volume LVI, Number 49, 6 Kekemapa 1918 — O HON. IOELA NAKALEKA UA HALA. [ARTICLE]

O HON. IOELA NAKALEKA UA HALA.

I ka Lunahooponopono o ke Kuokoa, Solomon Hanohano, Aloha oe: - E oluolu mai oe no'u kekahi wahi kaawale o ka kaua milimili, ka hiwahiwa pookela hoi a ka lahui, ka ahailono nana e hoike aku i ka nuhou kamahao, a e ha'i aku ana i ka lono kaumaha imua o na hoaloha ame na kini makamaka o kaaina, mai ka la puka ma Kumukahi ahiki aku i ka welona a ka la i Lehua, a e ha'i aku ana imua o ka lehulehu, o Hon. Ioela Nakaleka ua hala, ua moe i ka moe kau, moe hooilo; ua kuu ka luhi a hoi aku la me kona Haku aloha. Ua hanauia o Ioela Nakaleka i ka la 29 o Sept., 1871, mailoko mai o ka puhaka o J. Kanikau (k) ame Mrs. Moohila (w). He nui no lakou, aka, ua hala mua no kekahi poe o lakou, a koe iho laua elua me kona kaikuahine, a i kela mau mahina i hala aku nei i make ai kona kaikuahine i ka ma'i kuhewa. He mau mahina wale no ka nalo ana aku nei o kona kaikuahine, a hahai pu aku la kona kaikunane ma ia meheu hookahi. Aloha no! He keiki papa oia no keia aina, mai ka wai kaulana o Moaula, a i ke kai

nehe i ke one o Maalaea, mai ka wai lelehuna o Wailewa a i ka ulukukui i kaulana o Lanikaula. Maloko o keia mau wahi oia i holoholo ai i kona mau la kamalii, a ma Halawa nei no oia i hoonaauaoia ai iloko o ia mau la. Mai Halawa aku nei, komo i ke kula nui o Lahainaluna, a malaila i hoona auaoia ai no eha paha makahiki, a puka mai oia mailaila mai noho kumukula no Kaluaaha me David Kahaulelio. Pau ka noho ana i ke kula ilaila, holo i Honolulu a noho me J. M. Kaneakua i ke a'o kanawai, a mailaila aku holo i Kauai, malaila loaa ke koko olua a huli hoi mai i ka aina nei. Mahope mai oki me ia wahine, a mare he wahine hou a make no ia wahine: mare hou me ke kaikamahine o ka Ehukai o Puaena, a hanau mai ka laua keiki, a make ia wahine, a mare hou i ka wahine he kaikamahine no no ka aina nei, a o kana wahine hope loa ia a moe aku la. Ua haalele iho oia mahope nei he makuahine, a haalele pu iho hoi i kana mea aloha he wahine, a noho ana iloko o ke kaumaha me na waimaka helelei, a e paiauma aku ana ma keia aoao o ka make me ka ehaeha o ka naau. E hoonana ae ana i ke aloha aole e nalo. Kaumaha luuluu ka manao, ua hala ke kane, ka lima kokua e pono ai ka noho ana. He lunakahiko oia no keia ekalesia, he kanaka makee i ka pono, a he lima kokua no hoi no keia ekalesia, a o ka luakini o Halawa nei ke ku nei ia he kiahoomanao no kana mau hana maikai, a oiai nana no i huli ke dala a paa keia luakini. He mau kau kona i komo ai i ka ahaolelo kuloko o kakou, a eia no kona mau hoa i komo pu ai ke noho mai nei. O kana oihana hope loa i paa iho nei, oia no ka hope makai nui, no Molokai nei, a na ka make i hoopau iaia mai ia oihana mai. He kanaka heahea, he puuwai hamama, he oluolu, a he hookipa. Ua hala ia, hala kana mau hana apau. Me ka minamina nui au e hoike aku nei imua o oukou e ka lehulehu, oiai ua hala ia lima kokua o ka ke Akua hana iloko o keia ekalesia. Nana no i haawi mai a Nana no i lawe aku. E hoomaikaiia ka inoa o Iehova. Pomaikai hoi ka poe make he make iloko o ka Haku. Ma neia hope aku, wahi a ka uhane, i hoomaha lakou i ko lakou luhi, a e hahai ana na ka lakou hana mahope o lakou. Owau iho no me ka luuluu, J. KAALOUAHI, Kahu o ka Ekalesia o Halawa W. S. S.