Ka Nupepa Kuokoa, Volume LVI, Number 46, 15 November 1918 — Page 5

NUPEPA KUOKOA, HONOLULU, T. H., POALIMA, NOVEMABA 15, 191@

 

HE MOOLEO WALOHIA

 

No ka Imi Ana i ka Moku

 

"Ka Manaolana Poho"

 

Ka Huli Ana a ka

 

MAKAIKIU KA-TA

____

 

            "Ina oia e hana mai ana pela, e hoomaka'uka'u aku ana an iaia ma o ka olelo ana aku e hoopii ana au iaia i mea e kauia mai ai ka hoopa'i ko'iko'i maluna ona no kona ake'ake'a mai i ka hana a ka oihana makai.
            "Ina oia i hoi mai ianei me ia manao, ke manao nei au, e hiki ana no ia kaua ke ike aku ma ke ano o kana mau hana ke hoole mai oia i ko kaua manao."

            "O ka mahelehea  o keia hana ka'u apana hana e hana aku ai e Ka-ta?"

            "Makemake au ia oe e hakilo loa i ko Kaila Esekina mau ano apau oiai au e huli ana ia loko o ka hale."

            "O, maikai! Owau kou kanaka!"

            "O kahi o ka Hale Seletanuka i ku ai aia ma kahi ha mau mile lehulehu ka mamao ma k e komohana ae o ke Awakumoku Sega.  I ko lau komo ana aku iloko o ke kahua akea o ka hale ma ka puka0pa aku e hamama mai ana, hoomau aku la no laua i ka holo ana o ke kaa no hapaha mile a ku iho la mamua pono mai o ka lanai o ka hale, e aa mai ana no na kukui a e lele mai ana ka malamalama iwaho ma na puka aniani.

            I ka hooki ana iho o ke tutututu ana a ke kaa otomobile, lohe aku la lakou i ka hamumu mai oloko o ka hale me ka maopopo loa, me he mea la he hakaka koloko.

            He hana nui koloko, pela ka manao o na makaikiu, o ko laua lele koke iho la no ia a pii awiwi aku la ma ke alapii pohaku ahiki i ke kau ana i ka lanai.
            O ko Ka-ta kaomi aku la no ia i ke pihi uwila. No ka loaa ole mai o ka pane ua kaomi hou aku la oia no ekolu a eha paha manawa me ka hoolohe pu aku ia manawa me ke ano kuaki a uluhua, oiai nae ke lohe aku la no oia i ka haluku mai oloko.

            Mahope ua wehe hoaikiia mai la ka puka, me ka mau no o ka paa o ke kaulahao oluna o ke pani puka.  He kanaka aoo ka i kiei mai a Ka-ta no e ike aku ana o ke kuene ia, a ninau mai heaha la ka makemake.

            Ma ka hoomaopopo aku a Ka-ta ua piha ke kanaka aoo i ka maka'u, no ke mea, he helehelena haikea la kona.  Aole oia wale, aka, ua makaukau oia e ku-e mai i kekahi mea a mau mea paha e makemake ana e komo aku, no ka mea ua ike aku la ka makaikiu i ka hulali mai o ka waha oka pu panapana malalo iho o kona auwae.

            "Owai oe?" wahi ana o ka ninau ana mai.  "Heaha mai nei kau o ne'i ma keia manawa o ka po?" wahi a ke kanaka.

            "Mai Nu Ioka mai la makou, a eia ko makou kaa mawaho nei kahi i ku ai. I holo mai nei makou e ike ia Kaila Esekina.  Eia no anei oia ianei?  He hana nui a ko'iko'i ka makou o keia hiki ana mai la e ike iaia, a no ko makou lohe ana mai nei eia oia ianei, pela makou i holo mai la ianei.

            "Heaha keia pilikia nui maanei?"  i hoomau aku ai o Ka-ta i kana kamailio ana i ka manawa ana i ike aku ai i kekahi mau kauwa ma ka hakahaka aku o ka puka maluna aku o ka poohiwi o ke kanaka.  "Healia keia kumu o ka pioloke ana maanei?"

            "He kauaka aihue ka i komo iho nei iloko nei, oia ke kumu o ka makou pioloke ana iho nei," a ia wa, no ka ike ana mai o ke kuene aoo he mau keonimana na kanaka e ku aku ana, wehe loa ae la i ka puka a hamama.  "O ko makou ike koke ana iho nei no ia i ua kanaka aihue la."

            "Aha, he kanaka komohewa,ea?"  i hooho ae ai o Ka-ta, a o kona komo koke aku la no ia iloko me ke kono ole ia mai, a o Kita aku no hoi mahope.  "heaha ka mea i wahiia, he pahuku kakau paha, ea?"

            "E pololei maoli kau koho ana mai la.  He pakaukau kakau.  Pehea i loaa aku la ia oe ka ike oia ka mea; wawahiia?" i ninau mai ai ke kuene me ke ala ana ae o kekahi manao hoohuoi iloko ona.

            "Aohe a'u mea i maopopo mua, lie koho wale aku nei no ka'u, eia ka oia i'o no ka mea i wawahiia," i pane aku ai o Ka-ta.  "Mai noonoo hou aku oe no ia mea.  E oluolu oe e hele aku e hoike i ko haku eia maua maanei."

            Aohe hele koke aku o ke kuene e kii i ka haku ona, a i ole hoike aku paha he mau kanaka ka i makemake i ike iaia.

            Alala huli ae la o Ka-ta a hawanahwana iho la ia kita: "Ke hopohopo nei au ua lohi loa kaua a ua lele mua aku nei ka manu me na palapala."

            Kunou wale aku la no Kita, aohe pane aku, no kona mau maka nae ke lewa wale la no ma o a maanei e au ai.

            Ia manawa ua hoahewa loa ke kuene nana i kii mai e wehe i ka puka no ka ae ana e komo aku na makaikiu iloko, a ua hoao mai la oia e ke'ake'a i ko na makaikiu nee hou ana aku imua.

            No ko Ka-ta ike aku i ko ke kuene hooko ole i kana kauoha, huli mai la oia a me ka leo kalakala i mai la:  "E ke kanaka, ahea oe hooko i ka mea i kauohaia aku nei ia oe; Owau keia o Nike Ka-ta, ka makaikiu, a o Kita keia ko'u kokoolua ma ka hana.  He makemake maua e ike aku i ko haku i keia manawa, he manao ku maua iaia.  E hele koke aku oe o hoike aku iaia eia maua maanei kahi i kali ai nona.  E wiki!"

            I ka lohe ana aku o ke kuene o ka Makaikiu Ka-ta ka ke kanaka e ku aku ana imua ona, he mae hoi kau o kona helehelena.

            "O, ke kaumaha nei au no ko'u hoao ana aku nei e ku-e ia oe, e kala mai oe ia'u," wahi ana.  "Aole no hoi aunanei e hiki ia olua la ke kali a kahi wa aku? Manao au e hauoli ana no o Kaila Esekina e ike ia olua ina i ka wa okoa aku olua e hele hou mai."

            "Aohe maopopo ia'u kela," i noonoo iho ai o Ka-ta.

            "ia manawa ani aku la ka lima o ke kuene i piha i ka maka'u i na kauwa apau e hookaawale aku ma kahi e alaila alakai aku la i na makaikiu elua no kahi o ka rumi kakau ma kekahi aoa oaku no ka holo.

            Ukali aku la no na kauwa mahope o lakou me he pu-ahipa la a ku puuluulu nui iho la ma ka puka, oiai o Ka-ta ame Kita e mana ana ma o a maanei ialoko o ka rumi.

            He pakaukau kakau nui o ke ano paikini kahiko ke ku mai ana ua wawahiia, a o na ukana i waihoia ai iloko olaila na kuekaaia a lele liilii i o ianei, a e mokaki mai ana no ho iluna o ka  papahele.

            Maluna o ka papahele a e kau liilii ana ma o a maanei he mau kea lehulehu kahiko, a hookahi wa-hi leka nui loihi.

            He puka aniani Palani, oia hoi, he puka aniani pio, ke ku ana mahope aku, he mau iniha wale no ke kaawale mai ke pakaukau aku, ua weheia a hamama o he puka popoe ka i okiia o kekahi makaaniani.

            Ua pololei loa ka weheia ana mai o ka puka aniani e ke kolohe a ma kahi e loaa koke mai ai kahi i manaoia aia maloko olaila na palapala, a mamuli o ia komo ana mai a ke kolohe maliala i manaoia ai na kekahi o na kanaka hoolimalimaia e Kaila Eskina i ohi i ka puka aniani i wawahi i ke pakaukau.

           

MOKUNA X.

 

Ka Huli Ana i ka Mea Kolohe.

 

            I na makaikiu i komo aku ai iloko o ka rumi kakau he mau minuke i hala ia laua ma ka nana a ma ka noonoo ana.  Alaila hele aku la a ma kahi o ka puka aniani a nana aku la i kahi i okiia ai mawaho mai, a ia pau ana hele mai la a ma kahi e waiho mokaki ana o na leka i hoakaka muaia ae nei, a nana pakahi iho la me ka hoohala ole i kekahi.

            Oiai aia e nana ana ia mau palapala a i ka loaa ana iho o kekahi palapala ana i makemake loa ai o loaa, lamalama ae la kona helehelena.

            Alaila huli mai la oia me ka helehela huhu, me he mea la ua loaa ae la iaia kekahi manao hou a ninau mai la i ke kuene:

            "Ea, e ke kanaka, auhea ko haku?"

            "Aia no oia ma ka rumi maluna kahi i hiamoe ai," wahi a ka pane a ke kuene.  "i hakalia no a pau kona aina ahiahi o ka hoi aku nei no ia iloko o kona rumi maluna, a manao au aia no oia ke hiamoe mai la, no ka mea, ma kana mea o ka olelo ana mai ia'u ua loaa ka oia i ke anu i ka manawa o ka hoolewa o ka makuakane."

            Ka iho la o Ka-ta i kona lima ilalo no keia olelo a ke kuene o ka pane ana aku la, alaila hookomo iho la i ka leka ana o ka lalau ana iho iloko o kona pakeke.

            "Ua maopopo loa ia oe la aia oia iloko o kona moe kahi i moe ai?"  i ninau hou aku ai ua o Ka-ta i ke kuene.

            "Pela ko'u manao.  Aohe i liuliu loa aku nei, me he mea la he umi paha minuke, iloko aku nei au o kona rumi, he ti wela ka'u i lawe aku nei nona, a pela au i maopopo ai aia no oia iloko o kona rumi."

            "A i ka manawa hea oe i ike  ai i keia komoia ana mai la o keia hale a wawahiia ke pakaukau kakau?"

            "I ka manawa a'u i'hoi mai ai ahiki ilalo nei mai ka rumi mai o Kaila Esekina."

            Ua hooki koke iho la ke kuene i kana kamailio ana no kona ike ana aku ia Kaila Esekina o ka iho ana mai a ku ana ilalo me kona lole moe po no e paa ana.

            Iaia'i ike mai ai ia Ka-ta ame Kia e ku aku ana, kunou wale mai la no ia laua a ninau:

            "Heaha iho nei keia hana maanei?" wahi ana i ke kuene. "Ua loaa iho nei anei kekahi mea o oukou i ka ma'i?"

            Ma ka Kita hoomaopopo mai i ka leo o ua o Kaila Eskina iaia i ninau ae ai i ke kuene, aohe leo o ka mea i loaa i ka ma'i anu nana i hoihoi koke aku iaia iloko o kona rumi e hiamoe ai, o kona leo ikaika no mamua aku oia no ia manawa.

            Alaila, kuhikuhi aku la ke kuene i ke kumu o ko lakou uluaoa ana i kahi o ka puka aniani i okiia ai, a pela hoi me ke pakaukau i wawahiia ame na leka e mokaki ana iluna o ka papahele.

            "ua komoia iho nei oloko nei e kekahi kanaka wawahi hale, e kuu haku," wahi o ke kuene, "o keia mau mea au e ke mai la na mea na lakou e hooiaio aku ia oe."

            "Ua komoia oloko nei?  Nawai?  I ka manawa hea?  A no ke aha?"

            "NO ke aha la, aole au i ike, No kekahi mau leka paha loko o ke pakaukau kakau, no ka mea, e nana mai no hoi oe la ua wawaahiia ke pakaukau, ua kuekaaia na mea apau oloko, a ke mokaki nei na leka ame na pepa iluna o ka papahele.

            "No ke kauaka i komo mai ai aohe a'u mea i maopopo, a no kona manawa i komo mai ai aohe no a'u mea i ike, no ka mea, ia'u i hoi mai ai ilalo nei ko'u ike ana i keia mau mea i hanaia, a me he mea la ia'u paha i pii aku ai iluna i kou rumi oia ka manawa i komo mai ai ka mea wawahi hale.

            "Eia hou, he mau mea e ae paha kekahi oloko nei o ka hale i lilo a aole paha, aohe a makou manawa e hele aku ai e nana ma na wahi e ae oloko nei o ka hale."

            "Alaila o kou ike koke ana iho nei no anei ia?"

            "Ae, e Mr. Kala, ia'u i hoi mai ai ilalo nei mahope iho o ko'u lawe ana aku i pola ti wela nou.  Ia'u no a haule ilalo nei ia huli ana mai a'u e mokaki ana na pepa iluna o ka papahele, he malamalama kukui nae ka'u o ka ike ana mai i ka owaka ana ae iloko o ka rumi kakau malalo o ke pani puka a he aku kanaka ka'u o ka ike ana mai e hele ana.

            "Ua maopopo ia'u aohe mea e ae oloko olaila, no ka mea ua hoi mua oe e hiamoe mahope o ka pau ana o kau ai ana, a ia manawa i haupu koke ae ai au he kanaka komohewa kela a'u o ka ike ana mai, o ko'u holokiki mai la no ia a wehe i ka puka.

            "He wahi manawa uuku loa ko'u o ka ike ana aku i ke kanaka laia i lele aku ai iwaho ma ka puka aniani a nalowale aku la iloko o ka pouli."

            "Alaila, e olelo mai ana anei oe ua kokoke loa aku oe iaia ea, aohe nae oe i hahai aku mahope ona.  Oia anei?" wahi a Kaila Eskina o ka ninau ana mai me ka piha loa i ka huhu.

            "E hoi," i pane aku ai o Poka, oia ka inoa o ke kuene.  "Ua ike au he hana hiki loa ia ia'u ke hana aku, aka nae, mamuli o ko'u ike ana i ke pakaukau ua wawahiia a hemo ke pani, a me na pepa like ole e waiho mokaki ana iluna o ka papaheloe, ua hoopouli ia ae la ko'u noonoo makai, aohe a'u noonoo iho la ia manawa no ka hahai aku mahope ona, hookahi wale no mea iloko o ko'u noonoo o ke kahea aku i na kauwa; he keu keia a ka hana kupanaha loa i ko'u noonoo ana, hakalia no ka i ke kiaaina a make aku la @ ke komo aihue koke ia iho la no ia o nei hale.  He hana pohihihi no mahope aku o keia i ko'u noonoo iho."

            "Heaha ia mea pohihihi au o ke kamailio ana mai la mahope aku o keia, a heaha kou kuleana noonoo wale aku no no ia mea, e kena kanaka lapuwale hiki ole ke hilinaiia?

            "O, ua hoehaeha loa ia mai ko'u, noonoo!  O ka mea wawahi hale he mea wawahi hale wale no oia, aohe mea e ae, a he mea pono e paa oia i ka hopuia, eia nae, hookuuia aku la oia e oe e hele laula.  He kanaka maka'u wale maoli no oe!"

            Hoopepe wale iho la no ke kanaka me he mea la ua ku'i a mai la oia a cha, a ia manawa huli ae la o Kaila e nana ia Ka-ta a i mai la:

            "O keia no ka pilikia nui o ka malama ana i na kauwa naaupo a maka'u wale iloko o ka hale." me kona hoolauna ole mai iaia iho imua o na makaikiu ma ke ano maikai.

            "Mai paa paha hoi kela kanaka aihue i nei manawa ia Poka la, o ka maka'u wale ana hoi ona aohe hahai aku nahope oiai a ka manawa kupono aku lano kela e hahai ku ai a paa kela kanaka aihue."

            "Malia paha o paa aku no ia kolohe," i pane aku ai o Ka-ta.

            "Oia maoli ka mea pono e hana koke ia."  Mahope o ka @ala ana o kekahi manawa i hou mai la ua o Kaila Eskina: "E oluolu ana anei oe e kokua mai ia'u ma ka hahai na aku mahope ona i mea nona e paa ai?"

            Ke hauoli nei au ia hana no ka hooko ana aku i kau noi,"  pane aku ia o Ka-ta, "no ka mea, e ike mai no oe eia maa@ei ko'u kokua, ua hoea mai i ka manawa kupono loa no ka hana i makemakeia."

            "He mea oiaio ia au e Ka-ta i kamailio mai la.  Oia ke kanaka kokua loa a'u i makemake ai no keia hana.  No'u @o'u pihoihoi loa no ka mea i hanaia iho nei maloko o keia hale i nei po, ua palaka loa au i ka ninau ana aku ia olua no ka inoa o kou kokoolua, a pela hoi me ka olua hana o ka hoea ana mai nei ianei e ike ia'u ma nei manawa o ka po."

            "He wahi hana ano kupanaha no ma kou aoao i ka maua nana aku oia kou hoolauna mua ole ana mai ia oe iho imua o maua ma ka manawa au i iho mai nei, aka e huikalaia aku no nae oe no ia ano@ou he hana no a maua o ka hoohuoi ana iho.

            "E ike mai oe i nei manawa o ko'u kokua nui keia ma ka hana, o Kita Ka-ta keia, ka mea a'u e noi aku ana i nei manawa e hele aku a ma kela puka aniani a puka aku malaila nowaho, oiai ua loaa mai la hoi ka leo noi ia oe no ko maua haawi ana aku i ke kokua ia oe, i hoomaka ka hanu koke ana mahope o ka meheu o kela palaualelo me ka hoopau manawa hou ole iho.

            "No maua iho aole a maua hoahewa ana aku i ko kuene no kona hahai ole ana aku mahope o kela kolohe, ina no o oe kekahi a pela kau ike ana, aia iho no ia oe kekahi kumana mamuli o ka piha i na manao pihoihoi e maopopo ole ai kau mea e hana aku ai.

            "E Kita, e hahai koke aku oe mahope o ka meheu o kela kanaka me ke kali hou ole iho, a mahope aku au e ukali aku ai ia oe.  Ina he mea kekahi au o hoik mai ana hoi hou mana oe ianei, mahope o kou ike ana i kekahi mea, a i ole loaa aku paha kela kanaka aihue ia oe.  Ua maopopo ia'u a ae mai ana no o Kaila nei e haawi mai i kahi rumi o keia hale i wahi no kaua e hoaumoe ai i nei po."

            Mamua o ka hiki ana i Kaila ke pane mai i hookahi huaolelo ua kunou mua mai la o Kita he mea hoike mai no kona hauoli no ka haawi ia ana aku la o ka hana iaia a oili aku la me ka palanehe loa ma ka puka aniani Palani.

            I ka mao ana ae o na manao pihoihoi mai ia Kaila ae, huli mai la oia ia manawa me ke helehelena minoaka a i mai la ia Kita:

            "Ua lilo kau ano hana i mea hookahaha nui mai i ko'u noonoo," wahi ana me ka leo oluolu o ke ano hoopalaimaka aia no nae ka ino iloko kahi i noho ai.  "Ke ike nei au me ka homaopopo aole ou makemake e ulu ka nahelelele malalo o kou mau kapuai.  O pololei loa kela; ke hooia aku nei au imua ou i ka pololei loa o ia manao ou.

            "No'u iho, he makemake au e huaiia ae ka mea pohihihi a pili ana i keia hana, a ua ike au i ko'u naaupo no ko'u huhu ana aku nei i ke kuaene no ka hahai koke ole ana aku mahope o kela kanaka aihue oiai he hana loaa ole no ia o ka manaolana ka hoao ana aku e hana i kahi mea i keia po, oiai he kanaka holona kela kuene ma keia hana.

            "Ke manao nei au e hana ana ko hoaloha i ka hana e loaa aku ai iaia ka mahalo ia nona iho. No ko olua hoaumoe iho maanei i nei po ua hamama ka ipuka o nei hale no olua.  O ka'u no hoi ia e manao ana e noi aku ia olua loaa e ma nae hoi ia manao ia oe.  Ua pau ia.

            "No ka olua hana o nei hoea ana mai nei iane i nei ma nawa o ka po, heaha ka manao, e Ka-ta?"

            "Heaha mai auanei kau, e Mr. Esekina.  I hoea mai la maua no ka hana like me ia a--e hoomau aku nei kaua i ke kapa ana iaia he kanaka aihue a wawai hale?"

            "Ke mohala ole aku la ia'u la kou manao, e Mr. Ka-ta," wahi a Kaila.

            "Eia no ka manao, i hoea mai la maua ianei no ke noi ana aku komo maloko o keia hale no kekahi mau palapala a'u i manaolana ai eia ianei kahi i waiho ai, he mau palapala e hiki ai ke hokahuaia ka Hale Toda mau koi."

            "Ea, e Mr. Ka-ta, ke manao nei au ua oi loa aku ka mana au i lawe ai no keia hana mamua o ke kupono mamuli o keia hoea ana mai la ou, me ko ike maopopo iho no i ka aku kekahi hapanui o ko'u waiwai mai a'u aku."

            Ua koho au no'u iho e lawe i keia mana iloko o ko'u lima no ka mea, ua ike no au i ka pololei," i pane aku ai o Ka-ta.

            Aneane loa o Kaila e hoopuka mai i kekahi mau olelo pakike, no kona hilahila paha, hooikaika iho la e uumi, a ninau mai la nae ma kahi o kona pakike mai:

            "Heaha ka pili o kau hana me ka kela kanaka aihue?  I hoakaka mai oe i kou manao i maopopo aku ia'u."

            "O, he hana maalahi loa ia ma ko'u aoao.  O kela kanaka aihue ina oia kona inoa pololei au e kapa aku ai iaia, oia pu kekahi i kii mai la i ua palapala a lawe aku la, a ke ole au e koho hewa, ua kauoha maoliia aku no oia e hana mai pela."

            "O kou manao maoli anei ia?" wahi a Kaila o ka ninau ana mai me ka leo koikoi.

            "Ae: o ko'u manaopaa ia, elike me ia a'u i hoike aku la ia oe."

            Ia manawa huki koke ae la o Ka-ta mailoko ae o kona pakeke i kekahi mau palapala elima ana o ka lalau ana iho maluna o ka papahele, a hoomaka iho la e hookaawale i kekahi palapala mai kekahi ae.
            "Heaha kena mau palapala au e paa la?" i ninau mai ai ua o Kaila me ka nee koke ana mai imua, me ka manao paha e hopu mai, eia nae, ua loaa mua ka ike i ka makaikiu no ia manao ona.

            "O kekahi keia o na palapala a kela kanaka aihue o ke kuekaa ana a hoomokaki iho iluna o ka papahele a'u o ka lalau ana iho a hookomo iloko o ka pakeke o kuu kuka, i ka manawa a Poka i wehe ae ai i ka puke.

            Ma ka'u nana iho, me he mea la ua poeia keia mau palapala apau iloko o kekahi pu-a pepa nui, a nakii ia me kela lipine ulaula e waiho mai la ma kahi o ka noho.

            "Aole paha i wehe iki ia kela pakaukau no kekahi manawa loihi.  Aole anei pela?"  i ninau aku ai o Ka-ta.

            "Aohe i'o no hoi i wehe iki ia no kekahi mau makahiki loihi i hala aku nei.  Ma ko'u manao iho, me he mea la, o ke kumu paha o ka wehe ole ia ana no ka haule ana o ke ki i kuu anakala, a no ia kumu aole oia i hoao e wehe hou.  He palapala waiwai no anei kena e Ka-ta?"

            "O ka hapanui o lakou, aka o kekahi he palapala waiwai loa.  O keia leka la mai Inia mai ke kakau ia ana e lilo ai i mea waiwai nui ka heluhelu ana ke ae mai nae oe.

            "O kekahi o keia mau palapala ua kakauia mai i ke kiaaina he kanakolu makahiki a  oi ku e kana wahine ame kana keikikane, i ka manawa o ka wahine ma ka aina e a o ke keiki hoi iloko o ke kula."

            Hoomaha iki iho la ka Ka-ta kamailio ana, alaila wehe ae la i ka palapala loihi ana o ka lalau ana iho me na leka e ae iloko o kekahi wa-hi leka nui loihi, he leka ana o ka huna ana iho kekahi poe i ike ole mai ai akahi no nake oia or hoike ae.

            "Eia nae, no keia palapala la ea, e Kaila, he mea ano nui loa eia iloko o keia no ko Hale Toda pono.

            Aa ae la na ma o Kaila ninau koke mae la me ka anehe ana mai e lalau.  "Heaha ka mano nui oloko?" wahi ana.

            "He palapala mare keia i hanaia i iwakalua-kumamako'u makahiki i hala hope aku nei; e hoike ana keia i ko Hal@ Eskina mareia ana ia Helena Tenana e kekahi kahuna@ule o ka Ekalesia Emanugela, ma Hameseda, ma ka Mokupuni Loihi."

            He hoike hoohikilele loa aku keia ia Kaila, aohe nae ana pane aka nae, ma kona helehelena a Ka-ta e nana aku ana, ua hele a pii ka ula i na papalina a ke hakilo pono oa aku la ka makhikiu ia ano ona ia manwaa, me ka i ana ho iloko ona: "A, eha aku la oe, ea?"

            "E, he palapala hoohikilele loa mai kena ia'u, a'u e ike nei no'u iho he mea ku-e loa mai i ko'u pono, e ike mai oe i keia, a ke hoike aku nei au ia oe ia mea me ka huna ole iho.