Ka Nupepa Kuokoa, Volume LVI, Number 45, 8 November 1918 — HOOMAIKAI KA ELELE KALANIANAOLE I NA MANA KOHO. [ARTICLE+ILLUSTRATION]

HOOMAIKAI KA ELELE KALANIANAOLE I NA MANA KOHO.

I ka loaa ana mai o na hoike piha, no ka aha'i hou ana o ka Elele Kalanianaole i ka lanakila i keia kau koho baloka, i elele na Hawaii i Wakinekona, ua hiki ole iaia ke kaohi iho i ka nui o kona mahalo ame ka hoomaikai i kona lahui ponoi, ame na lahui e ae, i haawi aku iaia i na hilinai ana i keia kau, a o ia kana i hoike ae ai imua o ka nupepa Advertiser, ma kela po Poalua, i keia mau olelo: "He hookahi wale no mea nui loa nana i hoohauoli mai ia'u, o ia no ke kakoo ana mai o ko'u lahui kanaka ponoi ia'u, i kakoo pu ia mai hoi ena haole. Iloko ona hooikaika uluahewa i wahi e aiakoia aku ai lakou itia ke ku-e ana mai ia'u, ua ku mai lakou me a'u, me ka nani ole i ka aoao kalaiaina, a ke haaheo loa nei au. no ka mea a kuu lahui i hana mai ai no'u. "E hoike mai ana keia, o lakou kekahi i komohia loa aku ka hoomaopopo ana iloko o ko lakou puuwai, ua ku mau au, ma ko'u ano he kanaka Hawaii mahope o ko'u lahui ma ka home nei, a ma Wakinekona. "He koho ana keia o ka hilinai i hoike mai ai na haole me na Hawaii i ko lakou hilinai ia'u. "Ua kikoo aku ko'u mau hoa paonioni ilalo o ka hohonu o na hana e alakai hewa ana i na mana koho, o ka oi loa aku nae i na Hawaii, e hoinoino ia'u, ka'u mau hana ame ko'u moolelo. "Ua ku au maluna o ka moolelo o ka'u mau hana, no na mea i loaa mai ka ahaolelo lahui mai, iioko o na makahiki he umi-kumamaono a'u i hana aku ai no na kanaka o Hawaii nei. "Aole a'u mea e hilahila ai. Aole i manaoio na mana koho i na hoopunipuni i pu-a ia aku iloko o lakou e ko'u mau hoa paonioni. Ua hele aku au imua o na mana koho, ma ke ano he Amerika o 100 pakeneka, a ua koho na Amerika o 100 pakeneka ia'u, e hoi hou aku i ka ahaolelo lahui. "Aole i manaoio na mana koho i ke ano kalaiaina hoopunipuni i kipehiia aku imua o lakou, mai na haiolelo kihi alanui aku a na Demokarata. "Ua maopopo no i na mana koho, ua kupale au i ko lakou mau pono ma Wakinekona, a ua hoike mai ka lakou koho ana, ua ku-e aku lakou i ka hooikaika ana a na Demokarata e hua'i ae i ko lakou mau kuhihewa ame ka lakou mau hoohiki olohaka, maluna o'u. "Ke haawi aku n|i au i ko'u mahalo i na Hawaii ame na haole pu, no ka lakou paio ikail*a ana i haawi aku ai i ko'u mau hoa paonioni."