Ka Nupepa Kuokoa, Volume LVI, Number 42, 18 October 1918 — Page 8
| This text was transcribed by: | Dana K. Apana |
| This work is dedicated to: | Disney Aulani |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, HONOLULU, T. H., POALIMA, OKATOBA 18, 1918
CLOTHING
FOR MEN & YOUTHS
ON CREDIT THE MODEL
FORT ST. NEXT TO CONVENT
HOOLAHA I KA POE PAA AIE O KA HAWAIIAN ISLANDS PACKING COMPANY, LIMITED.
Ma keia ke haawiia aku nei ka hoolaha i ka poe paa aie apau o ka Hawaiian Islands Packing Company, Limited, e waiho mai i ka lahou mau koi i na mea no iaua na inoa malalo iho nei ma ke keena oihana o ke California Packing Corporation, Iwilei, iloko o kanaiwa la mai ka la 27 aku o Sepatemaba, 1918, a o na koi apau e waiho ole ia mai ana pela e hoole mau loa ia aku no.
ALFRED W. EAMES,
DAVID I. WITHINGTON.
Kahuwaiwai no ka Poe Paa Aie ame ka Poe Paa Mahele o ka Hawaiian Islands Packing Company, Limited.
6315 – Sept. 27; Oct. 4, 11, 18, 25.
AOLE KOMOHEWA.
Ma keia ke haawiia aku nei ka hoolaha aole kekahi mea, a poe paha e aeia e komo a e lawe i kekahi mea mai ka aina aku i ikeia na mahele o Kaianui ame Lupeau, maloko o ke Ahupuaa o Kawela, Molokai.
MRS. ELIZA HAAHAA IAEA.
Kaluaaha, Iulai 24, 1918.
6309-Aug. 16, 23, 30; Sept. 6, 13, 20, 27; Oct. 4, 11, 18, 26; Nov. 1, 8, 15.
HOOLAHA HOOKAPU KAI LAWAI’A
Ua papa loa ia ka lawai’a ana ma ke kai lawai’a o Honuku, Mokauea.
E hopuia no ke komohewa kela ame keia e loaa aku ana.
Owau o,
EN YATE PUNG, Trustee.
Mea Paa Hoolimalima.
6317-Oct. 11, 18.
OLELO HOALOHALOHA NO L. J. MUNDON.
He hoalohaloha na ka Ekalesia Hawaii mua o Kapaa ame kona mau mahele. i ka wahinekanemake ame na keiki makua ole, Mrs. Lahapa Mundon, no L.J. Mundon i hele loa aku.
O ka olelo a ka haku halehu, “I kona make ana, aole ana mea e lawe pu ai; aole hoi e iho kona nani mahope ona.”
He olelo oiaio keia. I ka wa ola o ke kanaka, ua hana aku oia i na hana maikai e mahaloia ai oia i kona wa e ola ana. aka i ka hiki ana mai o ka make, aole ana mea e lawe pu aku ai i ka luakupapau, aole hoi kona mahaloia, aka na@@ua kukulu iho oia i ua mau mea maikai la a mahaloia i kiahoomanao no ka poe ola aua.
O ke kanaka opiopio, L.J. Mundon, i hele loa aku la, he 37 wale no mau makahiki ona ame na malama 8, ua hana nae oia me kona noonoo, na kokua ana. a i ua hana maikai no hoi apau no kona Ekalesia, Kula Sabati, na Ahahui C.E., a pela wale aku.
E hooholoia, o makou na hoahana”@”o ka Ekalesia i oleloia, na haumana K”@” Sabati, na lala me na hoa o na Ahahui C.E. ekolu, ka Ahahui Aloha o na Wahine, ame ka Ahahui Kaahamanu, ke komo pu aku nei me ka wahine kanemake ame na keiki makua ole iloko o na kaumaha, ka u, ame ua luuluu no ke kane ame ka makua i hala loa aku la, me ka makou mau leo pule i ke Akua ka Makua Mana Loa, e hoomama a hoomana mai no i na naau luuluu, a e hoomaikai mai no hoi ia lakou apau, a e malama mai no ia lakou elike me ka makua aloha oiaio.
@ Hooholo hou ia, e hoopaaia keia Olelo Hoalohaloha ma na buke moolelo o na mahele apau o ka Ekalesia i oleloia. a e hoolahaia aku hoi keia mau olelo hoalohaloha hope maloko o na nupepa e hiki ana.
O makou no mua o na komite la, Ekalesia Hawaii mua o Kapaa, ma o
L.K. Kaauwai, Kahu Ekalessia; J. Opio, Luna Ekalesia a Puuku; Kaia Sabati o Kapaa, ma o J. Mahiai Kaneakua, Kahu Kula Apana; Ahahui C.E. Makua, ma o J. Opio, Peresidena; Ahahui C.E. Kuweana, ma o Mrs. Julia Kekaula, Peresidena; Ahahui Aloha o na Wahine, ma o Mrs. Flora Kailikea, Peresidena; Ahahui Kaahumanu, ma o Mrs. E.K. Kanealua, Lunahoomalu, Kapaa.
Kapaa, Okatoba 13, 1918.
R. Mrs. Lahapa Mundon,
Wahine kanemake me na keiki.
W.S.S.
HE HOOMAIKAI.
I o’u mau haku makaainana o Manokalanipo, mai Hanalei a ka pahapaha lei o Polihale, Aloha oukou: Oiai o ka la 5 o Oct. ua hala aku la, a no ka poe apau i haawi mai i ko lakou kakoo ana ia’u ma ka haawi ana mai i ko oukou mau balota no ka pono ou e ke kanaka ilihune, ke haawi aku nei au i ko’u mau hoomaikai a nui no oukou, a no kakou apau, pela no na lani e kokua mai ai ia kakou, a nana aku ia mua.
Aia no he wa e hoea mai ana no kou pono, a no na mea apau, ka poe e hoope’a wale ia nei e na enemi, a ma ka hooki ana ae i keia, ke haawi hou aku nei au i ko’u aloha no oukou apau.
Owau no ka oukou kauwa,
IOSUA E. KUAPUHI.
Hanalei, Kauai, Oct. 11, 1918.
HAINA NANE.
Mr. Lunahooponopono o ka Nupepa Kuokoa, Aloha nui oe: -E Oluolu mai hoi oe no ke kaikamahine o Na Hau o Maihi kekahi rumi kaawale o ka hiwahiwa a ka lahui no ka’u haina o ka nane a ke kaikamahine o ka aina nona ke mele kaulana:
Ua maikai no ka noho a Waialua,
Aohe wahi hooewahewa ia ka Uanaulu.
He nani okoa no mai Kaena a Waialua, Elua o’u po i ai ia ai e ka hauliuli, I hoi hou aku ka hana pau kauna pau pu me ka nele,
Aohe hoi he kuko o ka hale i ka po nei, Kaula’i iho la ke aho a ua lawai’a nei, Hoopa’u ka a a ka lawai’i paoa, Hooanuanu ili e ka helemaunu.
Eia mai au o ua he opua hoohaehae naulu. Elua maua i hanauia mai e ko maua mau maukua. Owau ka mua i hanauia i Waialua; o kuu pokii hanauia i ke kikowaena o Honolulu. I ka hoohuiia ana o na inoa o maua a hookahi, ua lilo ae la i ipo aloha na ka lahui.
1. Owai au i hanauia i Waialua Haina: Ua. 2. Owai ka inoa o kuu pokii i hanauia i Honolulu Haina: Kuka lahale. E loaa no i ke kikowaena o Honolulu. 3. Owai hoi ka inoa pololei a ka lahui i lilo ai i ipo aloha na lakou, i ka wa e hoohuiia ai ko maua mau inoa a lilo i hookahi Haina: Ua Kukalahale.
Auwe-e-hene, eha oe ia’u.
Me na keiki hoonoho hua ka anoi, a o kuu aloha nui pau ole me ka Lunahooponopono.
MRS. ANNIE KEKUIAPOIWA KE A WEIKEKAHIALII.
Keena Oihana o Uwese i ka Hope o ke Kilauea.
Honalo, Kona Akau, Oct. 10, 1918.
Hauhili mai la ka ai a ke kawele a, ua hihia na makau a ka lawai’a i Waialua. Hanaia mai ka palu a maikai i pololei aku ai ka lihi a ke kaikamahime o na hau o Maihi a na lehelehe o ka pihi nui, hiu kela a lilo i ke ku e o Lehua. Huli hou ia mai! – L.H.
w.s.s.
HAINA NANE.
E ka Lunahooponopono o ka Nupepa Kuokoa, Sol. Hanohano, Aloha nui: - E oluolu hou mai oe i kau wahi kaawale o ka hiwahiwa a ka lahui, no ka lua o ko’u manawa no ka haina o ka nane a ke Kaikamahine o ka Ehukai o Puaena, e noho mai la i ka olu o Haleiwa, o ia iho keia malalo:
Ka mua o laua, hanauia i Waialua, aia no i Waialua kona inoa. Haina: Hale.
Ka lua o laua, o ke kikowaena o Honolulu kona onehanau. Haina: Leta. I ka hui ana o na inoa o laua loaa no he ipo aloha na ka lahui, Haleleka.
Ke lana nei ko’u manao ua loaa pono aku la ka inoa piha o ke Kaikamahine o ka Ehukai o Puaena i ke keiki kui leilehua o Puakalehua.
Ko’u no a mau,
NA LEHUA O PINAONAO.
Kona, Hawaii, Oct. 9, 1918
Paewa mai la kau kui ana i na pua hala o ka lei o ke kaikamahine o Waialua, aole ilaila ke koiikoi a ka makemake. Kui hou ia mai! – L.H.
w.s.s
HAINA NANE.
E Mr. Solomon Hanohano, Lunahooponopono o ka hiwahiwa a ka lahui, ka Nupepa Kuokoa; Aloha oe: - E oluolu mai oe e hookomo iho i ka’u haina o ka nane a ke Kaikamahine o ka Ehukai o Waialua, a nona ka hooheno ana:
He elua laua i hanauia mai ai, o ka mua o luau, o Waialua ke onehanau; o ka lua o laua o ke kikowaena o Honolulu kona onehanau, a ma ka hoohui ana i ko laua mau inoa i kahi hookahi, i lilo ai laua i ipo aloha na ka lahui, a o ia ka uakaikamahine la e hiu mai nei i ka mea eha o ka umauma.
Owai au i hanauia i Waialua? Haina: Hale. Aole ka ia he hale e aku, o ko hale no keia e hooipo la me ke aloha.
Owai ka inoa o kuu pokii i hanauia ma Honolulu? Haina: Leta.
Owai hoi ka inoa pololei a ka lahui i lilo ai i ipo aloha na lakou, i ka wa i hoohuiia ai ko maua mau inoa a lilo i hookahi? Haina: Haleleka. Eia iho no ke ku kikakila ae la i ke kikowaena o ke hale kulanakauhale o Honolulu, a mai nei hele aku e loaa ai na leka a ka lehulehu, ame kau leka pu kekahi e kuahine.
I ka loaa ana mai o kau lakea e kuahine mai keia haleleka aku, mai wehe mua oe i kona wa hi, aka e kanaenae ae oe i keia wahi mele:
Ma ka leka kuu ike ana,
I na olelo nahenahe,
Kulukahi iho kuu waimaka,
I ke kai aloha o Hawaii:
Ko welo ko hae Hawaii,
I ka ilikai a o Mamala,
Malamaia iho ke aloha,
I hoa pili no ko kino.
Ea, loaa pono aku la oe i ka haina a ke keiki o ka la’i o Kona, ke ike nei au i ka naka o kuu kino, a hoomanao ae la au i keia mau wahi huamele no kaua e kuahine:
Ke ne ae nei o kunane,
I ka mea nui a kuahine.
Me ka Lunahooponopono ko’u welina.
W.N. NA HALE O NAUA.
Pakele mai la no ke kaikamahine o Waialua aole i lihi launa mai la ke keiki o Kona, i ka hu’a o ka palekoki o Hiiaka i ka poli o pele. I nui ke aho umia ka hanu, i komo i ke aupuni o ka lani! – L.H.
KUU POKII ALOHA UA HALA.
Mr. Lunahooponopono o ka Nupepa Kuokoa, Aloha oe: - E oluolu oe no’u kauwahi kaawale o kou mau kolamu no ka’u puolo, o ia hoi keia poomanao e kau ae la maluna, i ike mai ai na makua, na kaikuaana, na kaikunane, na kaikaina, na keiki ame na ohana apau o maua e noho ana mai kala puka ma Kumukahi a ka welona a ka la i Lehua.
Oiai ma ke kakahiaka nui o ka Poalua, Oct. 1, 1918, ua oluolu i ke Akua ke kii ana mai i ka uhane o kuu pokii aloha, Mrs. Koleka Anderson, a kaawale mai ke kino aku a waiho iho la he kino lepo na’u e u aku ame ka ohana.
Ua hanauia mai o Mrs. Koleka Anderson mai ka puhaka mai o Kuhaulua (k) ame Makaweli (w) ma Kanahena, Honuaula, Maui, a ua piha iaia he 29 makahiki o ka hanu ana i na ea hu’ihu’i o keia ola ana, i piha me na popilikia.
I kona mau la opio, ua hoonaauaoia ma ke kula hele la o Ulupalakua, a he kaikamahine hoolohe oia i ka leo o ko maua mau makua, a ua lilo no hoi ko maua mau makua he mea nui iaia, a i kona nui ana, ua mare oia ia Mr. Anderson, a ua noho laua me ka hauoli ahiki i ka make ana o kana kane, a mahope iho o ia mau la ua hoi mai la kuu pokii aloha, a noho pu me a’u kona hanaumua, ame na keiki a maua ma Wailuku, Maui; aloha wale ia wahi a maua i noho ai!
Ma ka la 1 o Iune, 1916, ua lalau mai la na lima o ka papa ola a lawe aku la i kuu pokii aloha mai kuu alo aku, no ka pama’i o Kalihi, a malaila oia i noho ai no eono mahina; i ka pau ana o kona manawa, ua lawe loa ia aku oia no ke kahua ma’i o Kalaupapa, a noho ma ka Bihopa Home, malalo o ka malama ana a na makuahine vilikina.
I kona noho ana malaila, ua komo oia he hoahanau no ka Ekalesia Hoolepope o Kalaupapa, i ka wa o Rev. D. Kaai, he kahu, a na ku oia malaila ahiki i kona moe ana aku la; a ma ka la 24 o Augate. 1918, ua haalele aku oia ia Bihopa Home, me kona nawaliwali, a hoi mai oia a noho pu me ke kaikuaana ohana o ko maua makuahine Mrs. K. Kalaau, a no ka nui o kuu aloha i kuu pokii ua leka aku au ia J.D. McVeigh e ae mai ia’u e hoi aku au i kokua no kuu pokii, ua loaa mai la ka paue ia’u, e hele au e ike i kuu pokii ma ka hale kokua; i ko’u hiki ana mai a noho ma ka hale kokua, ua hui aku au me Dr. W.J. Goodhue, a nonoi i kona oluolu e kelekalapa aku ia McVeigh, e lilo au i kokua no kuu pokii, ua ae mai oia a ma ke ahiaki Polima, Sept. 27, 1918, ua loaa mai la ka pane a ka papa ola e apono mai ana ia’u e hoi au i kokua no kuu pokii aloha.
Nolaila, ua haalele aku la au i ka hale kokua, a hoi aku la a noho pu me kuu kaikaina no ekolu la wale no, a haalele mai la oia ia’u ame kona makuahine, e noho aku iloko o ke kaumaha ame ka luuluu nona.
Ma ka hora 3 p.m. Okatoba 1 i maneleia aku ai kono kino lepo ma ka luakini o Kaanaana Hou no ke malamaia ana o kona anaina haipule e ka Rev. D.P. Mahihila; ua malamaia kona anaina haipule me ka eehia o na olelo hoolana ia u ame na hoaloha apau i akoakoa mai no ka ike hope ana iaia, a i ka pau ana o ke anaina haipule ua laweia aku kona kino lepo a hoomoeia aku ma ka pa ilina ma Papaloa.
Nolaila, ke haawi aku nei au i ko’u mahalo a nui I kona mau hoaloha I hele mai e ike i ke kino lepo, me ka lakou mau makana pua no ka hoowehiwehi ana i ke kino wailua, a pela no hoi i no hoaloha e ae apau i akoakoa mai no ka ukali ana aku i ka huakai. Malohia wale!
Ke haawi pu aku nei au i ko’u mahalo piha i ka Lunanui McVeigh, ame Dr. Wm. J. Goodhue, a’i ka Makua W.P. Mahihila ko’u hoomaikai a nui loa, no kana mau mapuna wai meli e hanai mai ana ia’u ame ke anaina apau.
Nolaila e oluolu oukou e lawe aku i ka’u mau hoomaikai, a na ke Akua mana loa e hoomama ae i na kaumaha i kau iho maluna o’u ame oukou apau.
Me keia mau mea apau i hoikeia ae la maluna, ke hooki nei au maanei, me ke aloha i na keiki hoonohohua o kou papapa’i.
MRS. MARY KAHIKO
Kalaupapa, Oct. 8, 1918.
w.s.s.
KOMO I KA HANA OHI KIAWE
Solomon Hanohano, Aloha kaua: -E oluolu hoi oe ina he rumi kahi o kau ahailono, ke Kilohana, ka Nupepa Kuokoa, a nana hoi ia e aha’i hele aku apuni na paemoku aloha o Hawaii, o ia keia:
Ma ka la 24 o Sepatemaba i loaa mai ai i ka’u aliikane he hana kiawe, ma ka aina o Kauka Raymond, a nee aku la mana no kahi hana mai ka lae o Maahi, me ko maua mau pokii eha me elua keiki, ma ka uku hana o 35 paona i ka 25 keneka, o ka mea nui no o na paona nui no ke dala, oiai elike me ka ike ame ke akamai o ka hana o ko’u haku kane pela i hilinai mai ai na haku i kana mea e lawelawe ai me ka holopono ame ka mahaloia o kana mau hana.
Eia no makou ke hana nei e pau ana paha i keia mahina, oiai ua kaahope loa ko makou hana ana, ua uuku mai na hua kiawe i koa, he ma’u wahi meahou ia o ka aina hulilua a ka Moae.
Owau no a mau,
MRS. B. KAUWEKANE.
MOOLELO O KA HALAWAI A KA AHAHUI EUANELIO O KA MOKU PUNI I OAHU, OCT. 2, 1918.
(Koena mai kela pule mai.)
La Hana Elua, Poaha, Oct. 3, 1918.
Malamaia ka hapalua hora haipule ma ka hora 9 a.m. e ka Rev. S.W. Kekuewa. Manao alakai: Ioane 12:3. Ka poni ana o Maria i na wawae o Iesu.
Noho ka halawai hana a ka Aha ma ka hora 9:30 a.m. James Davis, luna hoomalu, ma ka noho. Kahea inoa, he 33 ka nui o na lala i hiki mai.
Na J.P. Erdman he noi e hookomoia ka inoa o Hori ma kahi o O.H. Gulick o ke komite ninaninau i hiki ole mai ia Manawa i mea hoi e hoohikiwaweia ai na hana o ia komite, a aponoia.
Heluheluia ka moolelo o ka halawai o Oct. 2 a aponoia. Na J.P. Erdman, ua hoikeia aku no anei ma ka palapala i na Ekalesia Iapana ame Pake i kahi ame ka Manawa e noho ai o keia ahai Pane, aole. Nana no, he mea pana e hoopaaia ma ka moolelo o keia aha o ke kumu i hiki ole mai ai o na kahu amen a elele o keia mau ekalesia, mamuli no ia o ka hoike ole ia ana aku ia lakou o kahi ame ka Manawa e noao ai o keia aha, a e lilo i hana na ke kakauolelo o keia aha e hoike aku i keia mau ekalesia ma keia noho hou ana mai o ka aha; aponoia.
Na ke kakauolelo i heluhelu mai i ka palapala hoopii mai Makua mai, a waihoia i ke komite o na ekalesia pilikia a hoike mai i keia kau ae.
Na ke kakauolelo no i ka palapala kahea a ka Ekalesia o Kawaiahao ia Akaiko Akana I kahu no ia ekalesia, mahope iho o ka ninau ana i ka mea i kaheaia, ua hooholo lokahiia.
Na J.H.S. Kaleo e koho keia aha i komite nana hoonoho i ke kahu o Kawaiahao, a o ka Manawa e hoonoho ai e waihoia no ia na ka ekalesia e hooholo; aponoia.
Na ka lunahoomalu o ke komite o ua ekalesia pilikia oia no ke komite nana e hoonoho.
Na J.P. Erdman e kapaeia na rula, a e aeia aku o N.S. Schencke e hoakaka mai maluna o ke kumuhana, “Kea no e malama ai i ka Ahaaina a ka Haku,” aponoia. Na Schenek, 1, e hoomanao ia Iesu; 2, e hoohaahaa; 3, e hoolio ia anaina i anaina hemolele.
Ka hoike a na keiki a ke Akua. Na Wm. H. Thornton i kana hoike, ua ko mo ia eia he 8 ohana, he 35 ka nui o ka poe i Ioaa aku, a he 11 manawa i komo ia ai ma keia mau home.
Na J.K. Kanepuu, e waihoia keia hoike ma kahi o na palapala o keia aha, a aponoia.
Na J.P. Erdman i ka hoike a ke komite o na ekalesia pilikia: 1. Ka Ekalesia o Kawaiahao, ua paa kou komite ma na hana o keia ekalesia iloko o keia 6 mahina, ma ka haiolelo ana ame ka malama ana i ua halawai hoeueu ma na ahiahi Sabati, a pela pu no hoi me na hooponopono kuloko o keia ekalesia; a i keia Manawa ua waihoia aku na hana o keia ekalesia ia Rev. Akaiko Akana ma ka hoomaka ana o ka mahina o Sept..
2.Ua hoonoho aku ke komite ia Rev. S.K. Oili i kahu no ka Ekalesia o Waialua ma ka la 14, Iulai, 1918; aponoia.
Na J.P. Erdman no i ka hoike a ke komite ninaninau, e noi mai ana e poniia o Mr. Kamide, a e lilo no hoi ia komite I komite nana e poni aku; apo noia.
Na J.P. Erdman i kana hoike puuku o ka aha. Na loaa he $17.87; no lilo he $17; koena ma ka lima he 87 keneta, a aponoia.
Na Wm. Kamau, kekahi o na lala o ke komite mahelehele no ka haawina kokua a kela ame keia ekalesia no ka waihona o ke komite o na ekalesia pilikia, he noi e aeia aku ia komite ma na nupepa, a ma na leta e hoike mai ai i ka mahele no kela ame keia ekalesia, a aponoia.
Na J.P, Erdman i ka hoike a ke komite o na palapala hoopii. 1. E ae ia aku ke noi a Kahuku-Hauula no ka hoomau ana aku ia G.M. Kauaulalena i komite no ia ekalesia no 6 mahina.
2.O ka poe hoahanau apau i kakauinoa ma ka palapala hoopii mau Kaumakapili mai, e kapaeia aku lakou no ka Manawa, aole e oki loa; a e haawi hou ia mai i Manawa hou no ke komite e hookaulike hou ai i keia ninau, me ka oe pu ia mai e keia aha e hoomahuahua hou ae i hookah lala hou no keia komite, a aponoia.
Na ka lunahoomalu i ka inoa o S.K. Oili i lala no ke komite ninaninau.
Na J.H.S. Kaleo he noi e koho keia aha i komite no ka imi ana i na buke waiwai o na ekalesia apau o keia mokupuni, a aponoia.
Na J.H.S Kaleo no o ke komite o na palapala hoopii oia no ke komite no ka imi ana i na buke waiwai o na ekalesia, a aponoia.
Lulu aala na ka waihona o ka aha. Luluia a loaa he $9.45.
Kahi ame ka Manawa e noho ai o keia aha. Na Mrs. Mawae e noho hou keia aha ma keia kau ae ma Kalihi i ka Poakolu mua o Aperila, 1919, ma ka hora 9 a us hooholoia.
Na J.P. Erdman, e noonoo keia aha I komite hookipa no ka aha paeaina e hiki mai ana; na J.K. Kanepuu, e waihoia no na ka Ekalesia o Kaumakapili e koho i na lala o ke komite; aponoia.
Na S.K. Kamaiopili, e haawi aku ke kakauolelo o keia aha i ka hoomaikai a keia aha i ka Ekalesia o Kalihi-Moanalua; aponoia.
HAINA NANE.
Mr. Lunahooponopono; Aloha kaua: -E oluolu oe e hookomo iho i ka’u haina o ka nane a ke kaikamahine o ka Ehukai o Puaena, ana i hoike ae ai i na wahi like ole, o laua i hanau ai me kon pokii, o ia hoi keia malolo iho:
Hanau ia kona pokii i Honolulu, aia alua kona inow: Haina: Iwi.
Hanau ia kona pokii i Honolulu, aia ka inoa o ka pokii ona i ke kikowaena o ke kaona, he ipo honihoni na ka lahui, loaa iho la ke mele a ka poe haku mele, penei:
Kuu ipo, kuu lei,
Kuu milimili e.
Haina: Lei.
Pili pono aku la i na kaua 6 o uwehone, 6 no pua lawa kuu lei; i ka hooholo loa ana o ka inoa piha o olua: Iwilei. He ipo aloha ia wahi na ka lahui.
Loaa pono aku la paha oe e ke kaikamahine o ka Ehukai o Puaena i ke kiina a ke keiki o ka hale kukui, owaka i ke aouli, i ka piko waena o Waialealo, kuahiwi kaulana o Manokalanipo.
Ua lawa keia hooheno ana, me ka inisi hole maile, ke huli hoi nei ke keiki o ka lei Mokihana.
Me ka Mahalo,
PETER KAMANO SR.
Kilauea Light Station, Oct. 12, 1918.
Hiki ole mai la i ka malamalama hoolele o ka hale ipukukui o Kilauea ke noii nowelo i ka no’ahuna a ke kaikamahine o Waialua, ua ala’iia ae la e ka noe a paa na maka o ke keiki o ka lei mokahina. Hoonui hou ia mai ka ikaika hoolele o ka ipukukui kupua i pau na pali paa i ka ikeia, a ahuwale na pae opua. Huli hou ia mai! – L.H.
w.s.s.
HE HOOMAIKAI.
I o’u mau Haku o ke Kalana o Maui ame Kalawao; Aloha oukou: -Ke haawi nei au i ko’u mau hoomaikai a nui loa no na kakoo a oukou i haawi hou mai ai ia’u ma ka la wae moho aku nei; he aie hoi e hiki ole ai ke ukuia; nolaila lawe aku i kuu aloha a hoopaa ma ko oukou puuwai, me ka manaolana no hoi e haawi lokahi hou mai ana no oukou i ka oukou mau ka kakoo ana ma ka la 5 o Novemaba; a i lanakila hou ka oukou kauwe, e hoao no au elike me ka ikaika i loaa ia ‘u e hana i ka pono kaulike.
Owau no ka oukou Kauwa,
J. BROWN, JR.,
Moho Lunamakaainana, aoao Republika, Apana 3, Kalana o Maui ame Kalawao.
Wailuku, Maui, Oct. 9, 1918.
w.s.s
HAINA MOEUHANE.
Mr. Solomon Hanohano, Honolulu; Aloha oe: -E eluolu oe e hookomo iho ma kahi kaawale o ka kaua hiwahiwa, no ka’u haina o ka mouehane a D.K. Kupihea o Waianae, a i hoopukaia ma ke Kuokoa o ka Poalima, Oct. 14, 1918, a ma ua moeuhane la e olelo ana:
O ke keikialii ka mea paahae ma ke poo o ka huaka’i, a e welo ana hoi ka hae Amerika, a e himeni ana ke keikialii i keia mele, “Eia Hawaii ua lanakila”
Nolaila, ina he moeuhane oiaio keia mai ka po mai, pela no e loaa aku ai ka haina, a ke hooia aku nei au iloko o na mahele elua penei:
1.Lanakila oe e Hawaii ma o na aupuni hui no keia kaua, kokole loa ka wa no ia mea; o ke keikialii, o oe no ia e ka lahui, a oiai ka hune, ka nele ame ka pilikia e hapapa nei ma kou mau paia e ka lahui, ke hoomanao ae nei au, ua kokoke loa mai ka manawa e hookoia ai kela kauoha a ka Aha Paeaina i noho ai ma Kawaiahao iloko o Iune i hala aku la, a o ua kauohi la, e lilo ke Sabati hope o ka mahina, i la no na ekalesia apau mai Hawaii a Niihau, e pelu ai na kuli, a nonoi aku i ka oluolu o ka Alihikaua Nui ma ka lani, no ke kokua ana mai ia kakou, no keia kaua nui e pahola nei maluna o na Aupuni Huiia, a maluna o ke kumuhana a ka Aha Paeaina i hooholo ai, o ia hoi: Ka kakou hana no keia wa o ke kaua, ano, ua kokoke mai ka Manawa.
2.Lanikila Hawaii ma ka pahu balota i Novemaba e hoea mai ana, oiai heaha la keia lono a kakou e loho nei, he makani wale no, aole maopopo kona ano, nolaila, e ala e ka I, ka Mahi, ame ka Palena, no kou lanakila; ua kokoke loa mai.
Me keia mau hoakaka, ke manao nei au ua lawa, a ke haawi aku nei i na hoomaikai i ka mea nana i haawi mai i keia moe, ina ua kulike ka’u mau mahele me kana, a no na keiki ulelehua kepau ko’u welina hope.
IOSUA E. KUAPUHI.
Hanalei, Kauai, Oct. 11, 1918.
Na Wm. Kamau, e hoopaneeia keia aha, a aponoia.
Hoopaneeia ma ka himeni L.H.N., aoao 196, ame ka pule a Rev. Akaiko Akana.
JAMES K. LOTA,
Kakauolelo Aha Mokupuni o Oahu.
KA LAAU HAMO A CHAMBERLAIN
Aole he mea oi aku o ka maikai, no ka rumatika o na aa, ka ma-ui, ka lolo, ka huki o na aa, na pala pu ame na eha o ia ano like, elike me ka laau hamo Pain Balm a Chamberlain. E ola ana ia i ka manawa pokole, mamua o kekahi laau e ae. Eia ke kuaiia nei e ka poe kuai laau lapaau apau, o Benson Smith & Co., Ltd., na akena no Hawaii. – Hooaha.
HOOMAKAUKAU NO MUA AKU NEI
E Hoao e Hoomakaulii Ano ---E Malama i ke Dala e wehe i Buke Banako Hoahu me ka
CHINESE-AMERICAN BANK
A NANA AKU I KA ULU O KAU DALA
NA PAHU DALA $1.00 no ka Wehe Kihi o ke Alanui
@o ka Hoolimalima Ana i ka Hoahu Moi me Nuuanu
Kela Laau Kamahao
B.B.C
I Aponoia e na Kauka Kaulana he nui amen a Kanaka iloko o na oihana a ka lehulehu
He loina akeakamai no ke kumu mahalo nui – he palekana mai na waiawa mineral mai. He laau o na launahele i huiia nana e hoomaemae a e hooikaika i na meapaahana holookoa o ke kino, hoomaemae i ke koko, hoola i ka ma’i o ka opu ame na aalolo, ke akepaa, na puupaa ame ka puumimi, e hooikaika ana ia i ke kino a oi ae mamua o na ma’i e hoopoino mai ana. He laau hoonaha maikai, a he laau hoopau i ka lepopaa, ke @@ hoohikiwawe i ka elemakule ame na ma’i e ae. O ka poe nawaliwali a haalulu e hoopomaikaino ana lakou mahope o ka inu ana no kekahi mau pule kakaikahi. E hookomo ana ka B.B.C. iloko o ke kino i ka ikaika hao ame ka ikaika o na la opio. Ua hoolaia e ka B.B.C. na ma’i piwa, ke grippe, ke ann. a i ole ka piwa ha’iha’i iwi.
Aohe I hoopilia ae ke kumu@@ - Oia mau no $1.00. Ma na halekuai apau a ma na halekuai mahiko e loaa ai.
Keena Kuai Laau o ka B.B.C ma ka Makeke Kuai I’a, 161 Alanu Moi.
KAUKA & WONG
ANA AINA – SURVEYORS
Hooponopono ame ka Huli Ana i na Aina i Nalowale
Keena Hana, aia ma ka Palekai Hou o Kahului.
Pahu leta Helu 11, Kahului, Maui.
6300-6 mns.
WEHEWEHE MOEUHANE.
Sol. Hanohano, Aloha oe: -O kou ha awina maemae he mahaloia, ame ka malu: -E oluolu i ka mokulele uwila, hooni i na eheu o kuu Nupepa Kuokoa a ka lahui Hawaii, Aloha oe.
Manuli o ka moeuhane a Kupihea nolaila ulu mai la ua mea ano nui a ka lolo e hana i na hoike ha’i ano, i meahuuna hoike manawa kuhi pono a kuhihewa.
Ma ka Poaono a.m. ua ha’iolelo hoikeike aku au i na hoa, o ia keia: E puka ana o Likana Eliwai i keia koho mua; a i ke koho hope puka mai ke Keikialii Kuhio Kalanianaole, me ka hae nui Amerika.
Hoike ana o ka moe: Na Kristiano ma ke poo o ka puali kaua lio; na anaina kanaka (congregation) aloha aina Kristiano oiaio; na puali anela o ka lani me ka honua, a ha’i ana, po nui hoolakolako, e hoike ana ao nui hoohemahema, ouli a ka moe.
Na hoina elua – Ka mua, ke ano e hiki mai; ka hopena pili pono i ka moe, a kona lanai, e kahua, i kona mau mahele elua o kona mau mahele pili i kekahi ame kekahi.
Pili mua, (a) ka hana pono; (b) ke aloha aina; (c) malamalama Kristiano oiaio; moe Balauwini amen a paahae a ke Keikialii Kalanianaole, na kahua “maikai Kauai.”
Na loina hope – poino na kanaka, ke ole e loaa mai kekahi hoike ana mai ka Haku o na mea ola apau.
Ke hoomaikai nei i na keiki lima uwila o ka papapa’i.
Me ke aloha,
S.D. NUUHIWA.
Koolauloa.
w.s.s.
NA MEAHOU O KE KAHUA MA’I.
I kuu Mr. Solomon Hanohano, Aloha kaua: -Eia mai na meahou o ka aina o ka Ehaeha e noho ae nei: -Mai ka la 4 o Augate mai ahiki i ka la 6 o Okatoba o keia makahiki, ua hookomoia iloko o ka ekalesia he 15 hoike manaoio, i manaoio i ka inoa o Iesu, ka Mesia, i Akua no lakou, a penei na mahele ana:
Hookahi i komo ma ka palapala, 1 i hoihoiia mai ma ka hoike manaoio, 1 i bapetizoia, a o ke koena iho i koe ma ka hoike manaoio wale no lakou apau, a mawaho ae o keia he hookahi keiki liilii i bapetizoia, o ia na hua i loaa ia’u no keia mau mahina elua wale no.
Nolaila e ahonui mai oe e hoike mai iloko o ka kaua Nupepa Kupkoa o ko Hawaii paeaina, na ka Haku kaua e kiai mai a hui hou aku.
Owau no me ka haahaa,
REV. D.P. MAHIHILA,
Kahu Ekalesia o Kanaana Hou.
KakelameKuke
(KAUPALUNALA)
Poe Kalepa ma’
Ke Komisina
A.H.
Poe Agena no na Mahiko
Lehulehu
Pa Hale Kuai
$950.00 – Hale (4 rumi) ame ka pahale nui 17,515 kapuai kuea ma Palolohila. Aole loihi loa mai ke kaa uwila ame ka Halekula Liliuokalani aku. $100 uku mua a $15 o kela ame keia mahina. He kulana kiekie kau iluna, a oluolu maikai ke ae. He home me ke kumukuai oluolu no kekahi kanaka limahana a hoahu i kahi kenikeni uku hoolimalima. He wahi maikai i ka hanai moa. Kipa mai ma ko’u keena.
PAULO KALAUKA
(I E.R. Strauch).
Waity Bldg. Helu 74 Alanui Moi.
NUPEPA KUOKOA
No ka Mahakiki (One Year) ……..$2.00
No Eonio Mahina (Six Months) ….$1.00
O na Dala ame na Hoolaha Apau e Hoouna Pololei mai i ka HAWAIIAN GAZETTE COMPANY, LTD. Wale no P.O. Box 208, Honolulu, T.H. Enteered at the Post Office at Honolulu. T.H., as Second Class Matter.
CHARLES S. CRANE ….LUNA @@
HOOKU’I ME KA POU KELEPONA A MOKU KA IKI POO.
Ma ka hora eha ame hapa o ka auwina la Sabati nei o kekahi o na Kepani hou loa i ohiia ai i koa a nona ka inoa o Murakami, ka i halawai me ka eha ma uwale mamuli o ka hooku’i ana o kona poo me kekahi o na pou kelepona ma ke alanui Moi oiai oia e ku ana ma ka papa mahai o ke kaa uwila, a haule ilalo.
Ua ikaika loa kela hookui ana o kona poo i ka pou oiai ke kaa uwila e holo ana me ka ikaika, a ua hookahahaia ka poe a pau e kau aua iluna o ke kaa no kona pakele ana mai ka make mai. Ua laweia ae oia no ka halema’i o na ulia poino, a ma ka nanaia ana o kona wahi i eha he moku wale no ma ka ilipoo ka eha a mahope o ka humuhumuia ana a paa ua hookuuia aku oia e hoi no Leilehua no ka hui ana aku me kona puali.
Mai Kona mai keia Kepani o ka laweia ana mai, a ma ka oleloia aohe ana hoahewa i ka Hui Kaa Uwila, nona no ka hewa no ke kiei loa ana o Kona poo a oioi loa iwalo ma kahi e pa mai ai i ka poe apau e kau ana ma ka aoao Makai o ke kaa Uwila e pili loa mai i ke ka anole e hoomamao i ke ku ana iwaho no ka mea he kokoke loa ke kaa uwila i kahi o na pou kelepona.
w.s.s.
KANAWALU EKA KO I A IA E KE AHI.
Ma ka Poakolu o ka pule aku nei i hala, i a ae ai ke ahi, i ekahi aina ko ma ka mahiko o Waimanalo ae nei, a pau na eka he kanawalu, me ka nui o ke pono e kau aku ana maluna o ka mahiko, ma o kela poino.
He hookah kumu o ka a ia ana o ke ko e ke ahi, o ia no ka lele ana o na hunahuna lanahu mai ka puka uwahi aku o ke kaaahi, e hoohikihiki ana i na kaa ko, a hoomaka aku la e a i na ko e ku ana, a mamua o ka hiki ana e kinai aku i ke ahi a pio, ua hiki aku ma kahi o ke kanawalu eka i a ia.
Oiai aia ma kahi o ka umi la, a elua pule, e wili ia ai kela ko i pau i kea hi, e emi mai ana na tona kopaa e loaa i kela mau eka, no ka mea i ka waiho ana o ke ko no ekolu la, e emi mai ana kona momona, pela hoi e emi pu mai ai kona waiwai.
Ua nui maoli kea hi o ka holapu ana ae i kela mau eka ko mahuahua, a ua ike maoli aku kekahi poe o Honolulu nei, aole nae i manaoia, he ahi ia e holapu ana i kekahi mau eka ko mahuahua, eia ka auanei he poino ka i kau aku maluna o ka mahiko o Waimanalo.