Ka Nupepa Kuokoa, Volume LVI, Number 21, 24 Mei 1918 — POWAIA HE KEPANI MA MAUI E NA PILIPINO. [ARTICLE]

POWAIA HE KEPANI MA MAUI E NA PILIPINO.

Ma ka Poalua, o ka pule aku nei i hala, i kulike ai me ka nuhou o ka loaa ana mai Maui mai, ua powaia ae he Kepani o Motobayashi ka inoa, e kekahi poe Kepani ekolu, a lilo aku he eiwa dala mai iaia aku. He Kepani ohi dala kela no ka nupepa Kepani o Wailuku, a o kona wahi i powa ia ai, ma ke alanui aupuni no ia, mawaena o Spreckelsville me Wailuku, ma kahi he hookahi mile ma ka hikina aku o Kahului. I hele kela Kepani i ka ohi dala no ka nupepa, eia nae ua haule oia i ke kaaahi, o kela ahiahi, aka no kona makemakeloa e hoea no Kahului, ua hoao mai la oia e helewawae, aia ka pono o o ka hoea koke i kauhale. Iaia ka i haalele aku ai i ke Camp Helu 1, a oiai e nanea ana i ka hele ma ke alanui o ka manawa iho la ia i oili mai ai he ekolu mau Pilipino mailoko mai o ka nahelehele, a kau mai la i ka pu panapana imua ona, me ke kauoha okoa ana mai iaia e hele aku iloko o ka nahelehele e kaawale ai mai ke alanui aupuni aku. He hookahi ka o kela mau Pilipino e kau mai ana i ka pu panapana imua ona, a o ka hana a kekahi mau Pilipino okoa aku elua, o ia no ka huli ana i na pakeke o kona lole, a lawe aku la i kana mau dala mai, iaia aku. Mahope o ke ko ana o ka manao powa o kela mau Pilipino, ua noke mai la ka i ke peku iaia no kekahi mau manawa lehulehu, alaila kauoha mai la e huli hoi no kona wahi i hele mai ai. Mawaena o ka hora eono ame ka hora ehiku o ke ahiahi i powa ia ai kela Kepani, i ka wa no e holo mau ana na kaa otomobile ma ke alanui.