Ka Nupepa Kuokoa, Volume LVI, Number 20, 17 May 1918 — Page 7

Ka Nupepa Kuokoa

KE KILOHANA POOKELA NO KA LAHUI HAWAII.

Hoahanau Ekolu

Ai ol'e o

Hawila ke Koa, a o Magarita ka

U'i ka manu Nunu Ahiu

E lele oe me ka hoomanao mau ana, aia ke kahoaka o ke ke'a o ka welau hema mamua pono ou, a ke ike la no hoi oe i ka pa ana mai a ka makani kamaaina no ia o kou aina hanau nei, ma ia mea e hiki ai ia oe ke ike, a'ole oe i kaawale aku mawaho o na kaiaulu o kou aina aloha.

Ina nae oe e ike ana, ua huli ano e ka pa ana a ka makani, au no e ike iho ai, me he mea la e hoohuli okoa ia ae ana kou poo ihope, ia wa e hoohulie ae ai kou alahele no ke kaei o @riona, o ka aina au e lele aku ana ma ia wahi, o ka aina o Romulo.

Ke hiki nae oe i ka palena o Austro, ame ka aina o Romulo, alaila e huli ae oe i kahi e kau mai ana o ka huihui hoku o Pelelade. Penei nae oe e ike ai i kou hoea ana i ka palena ponoi o Austro ame ka aina o Rumulo (italia), e ike ana oe i ka hulilua o ka pa ana a ka makani, a e amio ana ma kekahi pe'a o na kakai mauna, a he hookahi e huli ana i ke kukulu aina e waiho ana ma kou aoao hema, a ke huli oe imua o ke kukulu e kau mai ana o Paleiada imua ou, alaila e hoomau aku oe i ka lele ana imua, ahiki i ke kau pono ana o ke kahoa'a lani o ka huina-ha like o Pigasa, alaila o ka pae kuahiwi uliuli e waiho pono ae ana malalo ou, o' na kuahiwi iu ano ia o Rokenekai.

O ka hale mua loa no au e ike aku ana, e ku ana hoi ma kapa o kekahi muliwai nui akea, e moe pololei ana mai ke knaliwi mai a hoea i kekahi kulanakauhale nui akea, o ka pahuhope iho la ia o kau huakai, ma ia wahi oe e hookuu iho ai i kou lele ana, a komo aku maloko o ua hale nei, a e lawe pololei loa aku oe a haawi i keia leka i ko haku kane, ua ike no oe iaia, aole au hoohewahewa ana nona.

I kela manawa, honi iho la o Monika, i kana wahi manu elele, me ka i hou ana iho, me keia mau olelo: "Ke 'hoouna nei au ia oe e hele ma ka misiona a ko haku wahine, a mai huli hoi mai oe me ka nele, aka e lawe pu mai oe me on a wahi puolo a ke aloha," o ka hookuu aku la no ia o Monika i kahi manu nunu, e lele no kana wahi i hoounaia aku la e hele me kana ukana makamae.

Ua ike pu ae la no kaua e ka mea heluhelu i na mea i hanaia ma ke, kakahiaka o kela la, i hoea aku ai o Hawila me kona hoa no Rokenekai, e na luahine ame na kaikamahine opio, maloko o ke Kakela Melodiana, ua ike pu ae nei no hoi kaua i ka hoounaia ana o kahi manu nunu Cicilia, mailaila mai me ka palapala a Magarita ia Hawila.

O kela manawa a kaua e ka mea heluhelu o ka haalele ana aku ia Hawila ame ke Kiaaina Benekona Mamiano, e nanea ana, a e noke ana no hoi i ke kamailio, ia wa i ku ae ai ka wahine me ka aahu eleele, oia o Leidenale iluna, kau a la hoi i kona lima akau, me he mea la, e haawi aku ana i kekahi hoailona ia i lawila e noho hamau, a ia manawa hookahi no hoi, i hoopuiwaia ae ai o Hawila ame ka poe apau maloko o ke keena hoookipa i ke kapalulu ana mai o kekahi wahi manu maiwaho mai a haule pono iho la imua o ke alo Hawila.

Lalau iho la o Hawila i kahi manu a hapai ae la iluna, ma kana hoomaopopo maoli iho no iloko o kela manawa, aole ka hanu ola i koe iloko on a, aia hoi ma ka a-i o ua wahi manu nei, e paa ana he leka, i nikiiia me ka lipine ulaula, a ia wa i haupu koke ae ai oia, no kahi manu nunu, nana i lawe aku i kekahi leka, iaia, oiai oia ame Malavalia e noho ana maloko o ka halealii o ka Moi o Hunegaria.

Ke ha'oha'o loa la o Hawila i ka onioni ole ae o kahi manu, ia hoohuli ana ae i ke alo iluna, aia hoi ua pili na maka ia wa i haikea koke ae ai ka helehelena o ua o Hawila, a pane iho la i keia mau olelo kaukau:

"E ka elele aha'ilono,

Mai na kaiaulu mai o Urania,

He oiaio, ua hooko oe i ke kauoha,

A ka mea nana oe i hoouna mai,

Ua mauna mai oe i kou ola,

Ae-ua hala ma kela aoao,

Ma kela ka'e o ka muliwai po,

Ano, ke wehe nei nae au,

I kau ukana i lawe mai nei,

A e ike i kona puuwai

Ka mea hoi a'u i aloha ai."

I kela manawa, i wehe ae ai o Hawila i ka lipine i hoopaaia ma ka a-i o kahi manu, me ka wehe pu ana ae e nana i na manao i kakauia maloko o ka leka; a i kela manawa hookahi no hoi i hele mai ai ka Lede Leidenale a ku iho la ma ka aoao o Hawila a pane mai la:

"E kuu keiki, e oluolu oe e haawi  mai i kahi manu ia'u e paa ai, ma ko'u manao kho, aole 'o ia i make, "aole no hoi a Hawila au a ana iho, a hoole aku paha i ke noi a ka wahine,  aka haawi aku la no oia me ka noke ana iho i ka heluhelu i na manao i kakauia maloko o ka leka.

O ka heluhelu hoi ia o ua o Hawila mai Kinohi mai ahiki i Hoikeana, a ma ka mokuna hope loa, o ka episetole a Magarita i ko Rokenekai, hoholo ae la ka ula ohelohelo ma na papalina o ua koa opio nei, alaila huli aku la a kamailio mai la imua o kona luau'i, makuakane:

"E kuu luau'i makuakane, " alaila huli aku la imua o ke Kiaaina Benekona, me ka hoomau ana aku, "a imua hoi ou e kuu makua Benckona, e ae mai olua e komo pu me a'u iloko o nahauoli ana, i keia manawa, no ka mea, he lono hauoli mai la ka'u mai ia Magarita mai.

Eia kana palapala i kakauia ma ka hora ewalu o keia kakahiaka, maloko o ke Kakela Melodiana, aole no he mea nui e ae maloko o keia palapala, o ka haawi wale ana mai nei no i ke aloa ia kakou apau, a he maikai kona ola kino e noho mai la ma kela wahi.

He hokahi wale no a'u mea e kaumaha nei, ua make loa paha kahi manu nunu nana i hookauwa mai nei ma ke no he elele lawe leka ke kauwa hoomanawanui hoi o ka alo ana mai nei iloko o na wiliau ahiu a na makani e pa ana me ka iakaika iluna o ka lewa. a no ua wahi kauwa hoolohe nei, ka'u i minamina nui loa ai.

I kela kuu ana iho no nae o ko Hawila leo, o ka wa no ia i kau iho ai o kahi manu nunu maluna o kona poohiwi akau, a i lalau ae paha kona hana, o kahi manu lawe leka no, nana i lawe mai i kela leka, aole hoi i make, elike me kana i manao kuhihewa ai i kinohi, o kona hopu ae la no ia i ua wahi manu nei, a noke iho la i ka honihoni ma ke poo, alaila waiho iho la mamua o kona alo, me ka hoomau hou ana aku i kana kamailio ana;

Ke hauoli loa nei au, aole ka i make kahi manu elele, nolaila e hoolohe mai olua i ka episetole a magarita i hoouna mai nei ia kakou," o ka hoomaka aku la no ia o Hawila e heluhelu i ka leka, mai ka mua mai ahiki i ka pau ana, me kona una ole io he hookahi huaolelo, oiai ua makemake maoli no a o Hawila e maopopo mai i kona makuakane, a i ka makuakane hoi o Magarita ka hohonu ame ke kiekie o ko Magarita aloha iaia nei.

O na manao ano nui no maloko o kela leka a Magarita i kakau mai ai ia Hawila, o ia no ka hoike ana mai o ua kaikamahine nei, i ka nui o kona aloha ame na hoomanao poina ole ana no Hawila, plea hoi ka loaa ana o ka hihi'o moeuhane iala ma ka po mamua aku, kona haha'i ana i ua hihi'o la imua o ke Kilokilo Sidia, ma kela kakahiaka, no ka hiki ole iaia ke hoomanawanui iho i ka nui o kona aloha no ua o Hawila, pela me ka hoakaka a ke kilokilo no ka manao o kela hihi'o, a e olelo pu mai ana no hoi ua o Magarita maloko o kana leka, in a no ko ia nei hoea i Rokenekai, me ka maalahi loa, alaila aole e hoopoina i ka ele ana mai e kilohi i na paia o Mamiona Kakela, a i kahi kumulaau wilou hoi, kahi a laua i hoopaa ai i na maawe kaakolu o ko laua mau aloha.

Mawaho ae o kela mau mea a Magarita i hoakaka mai ai maloko o kana leka, ua kauoha pu mai la no oia ia Hawila, aole e hoopoin'a i ka hele ana mai e kilohi i na paia o Mamiona Kakela, a i kahi kumulaau wilou hoi, kahi a laua i hoopaa ai i na maawe kaakolu o ko laua mau aloha.

Mawaho ae o kela mau mea a Magarita i  hoakaka mai ai maloko o kana leka, ua kauoha pu mai la no oia ia Hawila, aole e hoopoina i ka hele ana mai e ike i ke Kiaaina Benekona, a hoakaka aku imua on a, i ke ano o  ka noho ana o kan kai-kamahine maloko o ke Kakela Melodiana, a e hoolana aku i ka manao o ua kiaaina nei, no ka hoea mai o ka la ana e ike hou ai i na maka o kana kaikamahine aloha.

Ma ka hope loa o ka palapala a Hawila e heluhelu ana, ua noi mai o Magarita, e hoike piha aku ua o Hawila i na mea e pili ana i kana huakai, pela hoi me ka hui pu ana me kona makuakane.

Ia hoea ana aku o ka Hawila heluhelu ana i ka leka i kona hopena, ia wa i hekau iho ai ka meha maluna o kela anaina, no ka mea ua hoopihaia aku na mea apau me na manao ilihia, i hoakakaia mai e Magarita maloko o kana leka.

Nolaila e ka mea heluhelu, ua hooko pololei loa kahi manu nunu elele i kana misiona; elike me na kuhikuhi a ka luahine Monika. Ua haalele aku ua wahi manu nei i ke Kakela Melodiana ma ka hora elua o ka auwina la, a iloko o na hora eha wale no, o kona lele ana mai o kela loa, ua hoea aku la oia o Hawila ma, elike me ia a kaua e ka mee heluhelu i ike mua ae nei, he mama lua ole hoi i leleia e kela manu, me ka hele maoli a pau ke aho, a o ke kumu nui no ia o kona maule ana, imua ponoi o ke alo o Hawila.

I ka nalohia ana ae hoi o kela hiona eehia mai ke anaina aku ia wa huli mai ai o Kiaaina Mamiona imua o Hawila a pane mai la i keia mau olelo: "Malia paha e pane aku ana 'oe e kuu keiki i ka leka a Magarita?"

"Ae, ke kakali mai la paha oia o ka huli hoi hou aku o ka elele, me kahi lau olivia a ke aloha," alaila ku ae la o Hawila iluna, a hoi aku la maloko o ka rumi kakau o kona makuakane, no ke kakau ana iho i leka na kana aloha hoomanawanui.

Aole no i loihi loa ia kakau ana iho a Hawila i kana leka, o ka paa no ia, alaila puka mai la iwaho, aia hoi e paa ana ka wa-hi leka ma kona lima, me kekahi lipine i hoopaaia, no ka nakiikii ana aku ma ka a-i, a hoopuka ae la i keia mau olelo kaukau:

"E ke kauwa hoomanawanui, nana i lawe mai i kekahi waiwai makamae a hoea i Rokenekai nei, mai ke Kakela Melodianamai kahi a ke aloha e walea mai la, ke hoihoi hou aku nei au ia oe, imua o kou mau haku ; a ma ke alahele au i alo hoomanawanui mai nei iloko o na inea, ma ia alahele hookahi no oe e huli hoi hou aku ai ; a in a e hiki ia oe ke kamailio aku me na huaolelo moakaka me he kanaka la, alaila e haawi aku i ko'u aloha a nui i ko haku wahine.

"Eia maloko o ka leka a'u i kakau iho nei, a o ka ukana nui hoi au e hoi hoi aku ai imua o ko haku wahine, aia maloko olaila na mea apau e hiki ai iaia ke ike iho no ko makou noho ana ; nolaila ke hookuu aku nei au ia oe e hui hoi imua o kou mau haku, a i kou aina hanau hoi, " o ka hookuu aku la no ia o Hawila i kahi manu eleele, me ka hoomaka ana aku o ua manu nei, e lele mailoko aku o kela rumi, a nalo aku la ma kona alahele huli hoi no kona home.

Ia hala ana aku hoi o ka elele a ke aloha, ia wa i huli mai ai o Hawila imua o Kiaaina Benekona, a i mai la : "Aoe no he mau mea ano nui a'u i kakau aku la maloko o ka'u leka ia Magarita, koe wale no, ko'u hoike ana aku nei iaia, ma ka manawa o kahi manu eleele i hiki mai ai me kana ukana makamae, o kakou apau ke akoakoa like ana i kahi hookahi, a ua ike hoi i kana elele, me ka lohe i kana mau mea apau o ka hoike ana mai nei, ma kana leka ; ua hoakaka aku la no hoi au i na mea apau a kakou o ke kamailio ana iho nei, me ka lana o ko'u manao, e lilo aku ana na mea ana e heluhelu iho ai i mau mea hoohauoli aku i kona manao."

Ua hoohala hou ia aku la kekahi manawa loihi, ma ke kuka'i olelo ana mawaena o lakou, a i ka aneane ana e piha ka hora hookahi ma ia hope mai, ia wa i ku mai ai o Kiaaina Benekona Mamiona iluna, a i mai la:

"Ua lawa paha keia nanea ana o kakou e Hawila, kuu keiki, a ke nonoi aku nei au ia oe e hookuu mai ia'u e huli hoi ae no ke kulanakauhale, me ko'u mau hoahele, o ka'u kono nae ia oe, mamua o kou haalele hou ana iho i kou home nei, ma ke alahele huli ia magarita, e iho ae oe no Mamiona Kakela i keia ahiahi, a malaila kaua e kukakuka hou ai i kekahi mau mea e pono ai kau huakai hele, a no na mea no hoi e pili ana no ko olua pono, ma keia mua aku."

"Ke minamina loa nei au no kau kono e kuu makua kiaina, no ka hiki ole ia'u ke hooko aku, no ka mea in a no e holopono ana ka'u mau mea i manao ai, alaila ma keia wanaao koke no au e huli hoi hou aku ai no Hunegaria, he huakai awiwi loa keia, e hiki ole ai ia'u ke ae aku i kau kono lokomaikai, a ke nonoi e aku nei no hoi au i kau mau huikala ana mai ia'u o ko kaua ike hope ana iho la no paha keia a hui hou aku no ka manawa e hoea mai ana."

Aole no he hoonui olelo wale mai o ke Kiaaina Benekona. aka haawi mai la i kona lima no ke aloha ana, me ka honi pu ana mai ma ka papalina o Hawila, elike me ke aloha ana a na kanaka Palani, a ia pau ana hoi o kela lumilumi ana mawaena o Hawila me ka makuakane o kana aloha, haawi aku la ke Kiaaina Benekona i kona aloha ia Lomeliano, o ka hemo aku la no ia iwaho, i ukaliia aku e kona mau hoahele o ka pii ana mai o kela uka iuiu,

O ka mea apiki nae, ma kela wahi i hala aku ai o ke Kiaaina Benekona me kona mau hoa, a koe iho la o Hawiia me kona makuakane maloko o ka rumi hookipa i alawa aku paha ko laua hana ma kahi a ka wahine me ka lole eleele e noho mai ana mamua aku aole ua wahine nei ua nalowale oia me he uhane hoopahaohao la.

Aole a kaua mea nui e ae e ka makamaka heluhelu e ka mailio hou ai ma keia manawa aka e kikoi aku kaua imua, ma ka hore eiwa o kela ahiahi ana iho ka manawa a Hawila, kona hoaloha hoi o Oto Beriana ame Lomeliano e kamailio nui ana maloko o ke keena hookipa me he mea la he kumuhana ano nui loa ka lakou e kukakuka ana iloko o kela manawa anoano o ka po.

Ua piha paha ka hora hookahi a oi o kela nanea ana o lakou nei ia wa i komo aku ai o Hawila maloko o kona rumi more a hemo mai la me ka paa ana he ihoiho kukui maloko o kona lima akau a he eke kapolena keokeo hoi ma kona lima hema.

I kela wa i komo ou mai ai o Hawila noloko o ke keena a kona makuakane e noho aku ana me Oto Beriana ia wa i ku ae ai o Lomeliano iluna a i aku la: "Auhea oe e kuu keiki ua meha ke kula i keia manawa, nolaila e hele noloko o ka luahuna waiwai, a lawe mai i ka olua mau mea apau i makemake ai ; a e hoomanao mau e kuu keiki i na rula apau o ka hele ana oloko o ka luahuna, elike me kau i ike ai, o halawai auanei olua me na poino.

"Mai maka'u a hopohopo i ka lawe ana mai i ka olua mau mea apau e makemake ai no ka mea nou ia mau waiwai e kuu Hawila he kuleana kou maluna o kou mau waiwai ponoi ua like no hoi oe i ka'u mau mea apau i hana ai e hoohalike aku me ia e lilo auanei na meapaahana apau i mau kauwa hoolohe malalo o kou mana."

Ua maopopo ia Hawila ka manao nui o na mea a kona makuakane i kamailio mai ai iaia o kona hele mai la no ia a komo maloko o kekahi rumi o ka puka e iho aku ai moloko o ka luahuna a elike no hoi me kana i ike ai ia Lomeliano meapaahana apau iaia, elike me kau e ka makamaka heluhelu i ike mua ai.

O ko laua nei iho aku la ia a hoea noloko o kahi i hoahuia ai ke daimana ke gula ame na waiwai o na ano like ole nana aku oe ia Oto Beriana ua hele oia a piha me na manao pihoihoi owai hoi ia mea pihoihoi ole i kau a mea o ka nui o ka waiwai o kela ka makamua loa a Oto Beriana i ike ai i ke ahua o ua daia gula na daia maoli no ho na dala pepa pe a me ke daimana ame na pohaku momi kumukuai nui aole no nae on a kamailio wale ae i ka mea ilo o o kona noonoo koe wale no ka hooko ana aku elike me ka Hawila mau mea e kauoha mai ai ia a.

Ia laua nei maloko okela keena haawi mai la o Hawi'a i ke eke ia Oto Beriana e oaa ai a hele aku la ua o Hawila, e ohi mai i na dala pepa a ku ka paila hookomo mai la iloko o ke eke pela no hoi me na daia gula ame na dala maoli a i ka lawa ana elike me kana i manao ai ia manawa i ka mailio mai ai imua o kona hoaloha:

"He nani hoi ia ua ike iho ia no oe i keia mau mea apau a koe keia mau mea au e ike nei aia wale no a haawi aku au i ka ae ia oe ia manawa auanei e hiki ai a oe ke hoike ae i ke akea i kau mau mea apau i ike ai maloko o keia luahuna mamua ae la o kela manawa ua paa oe malalo o ka olelo hoohiki aole loa oe e kumakaia ia oe iho."

Ua haawi aku la no o Oto i kono ae me ka hooia ana aku aole loa he mana malalo iho o ka la i hiki ke hookikina aku iaia ahiki i kona hoike ana ae i kana mau mea apau i ike ai no kela luahuna waiwai a Hawila.

Oiai ua lawa ae la no ko laua nei makemake o ka iho ana aku noloko o ka luahuna o ko laua nei huli hoi hou mai la no ia noluna ma ke'a alaheie no a laua o ka iho ana aku a loaa aku la no o Lomeliano ia laua nei e kakali mai ana maloko o ke keena hookipa a i ka ike ana mai ia Hawila halo ilo'i mai la kona mau waimaka me ka pane ana mai nae ma ke ano paupauaho:

"Ua hoi mai la ka oe e Hawila kuu keiki aloha." me ka hooki ana iho o kana kamailio ana mai ke ailiili wale la no kana hanu ana me ka lele ana aku o Hawila e paa ma na lima o kona makuakane a ninau aku la:

"E kuu makua, heaha keia pilikia nui i loaa ia oe?" Aole nae o Lomeliano i pane koke mai i ka ninau a kana keiki no ia kumu me ka piha pihoihoi loa iloko o Hawila ua ninau hou aku la no oia no ka lua o ka manawa me ke koi paakiki ana aku iaia e haha'i mai i ke kumu o kona ano e ana akahi no a loaa he manawa kupono ia Lomeliano e pane mai ai i ka i ana ae:

"Heaha mai auanei kau e kuu keiki ua pomaikai kaua ua huli hoi mai la oe no ka mea he hihi'o moeuhane iho nae ka i loaa ia'u he hihi'o ku i ka weliweli me kuu manao loa ua halawai aku nei la oe me ka poino eia ka aole nou ka manao o kela hihi'o.

"O ke ano o ka hihi'o i loaa iho nei ia'u o ia no ka ike ana aku nei o ko'u uhane i kekahi kula akea palahalaha ua hele a ula pu i ke koko a e lele pohai ana hoi na tausani o na tausani o na manu koraka maluna o ka lewa e uhi pu ana i kela kula palahalaha.

"oiai no nae ko'u uhane e ike aku la i kela hiona ku i ka weliweli aia hoi ike aku la au i kou oili ana mai kuu keiki e kau ana oe maluna o kekahi lio eleele nui a ma kou lima akau e paa ana kau ko'i kaua a lele aku la oe iloko o kela moana koko nui a e ukali aku ana mahope pono ou kou hoaloha nei.

"Ma kela manawa a'u i ike aku ai i ke komo ana aku o ko olua mau uhane iloko o ke kula koko e au mai ana me he wai la o ka manawa koke no ia i oili ae ai he elua mau have eleele aia hoi maluna o kekahi have ua kakauia ka inoa "Alepine" a ma ka lua hoi o ka have e kau ana ka huapalapala "H."

"No ko'u piha loa i ka maka'u o ko'u puoho ae nei no ia eia ka he hihi'o moeuhane wale no o ka mea kupaianaha nae e naka ana ko'u kino me ka haalulu a ua piha hoi au me na manao pihoihoi ahiki wale i ko olua hoi ana mai nei a ike i ko'u mau ano i ka lohe ana aku o Hawila i na hoakaka a kona makuakane ia wa i kulu iho ai kona mau wai maka no ka mea kau koke mai la iloko o kona noonoo ia wa kekahi hiona ku i ka weliweli loa no ka hooukaia ana o kekahi kaua hahana maloko o ka ululaau o Urania mawaena o ka poe o ke Kakela Melodiana ma kekahi aoao ame na powa o na Mauna Alepine ma kekahi aoao a o ka have me ka huapalapala "H" o ka hae no ia o ke aupuni o Hunegaria a o na kanaka o kela aupuni ka poe e paio ana no ka pono o na kaikamahine opio ame na luahine maloko o ke Kake'a Melodiana.

Ua loihi no kela kulou ana iho o Hawila ilalo e hookahe ana hoi i kona mau waimaka o ke aloha no kana Magarita alaila aea ae la oia iluna a pane mai la imua o kona makuakane:

"Auhea oe e kuu makua ke manao nei au he hoike oiaio loa kau i ike ai maloko o kau hihi'o moeuhane o ia no ka hooukaia ana o kekahi kaua hahana loa i ku i ka weliweli, mawaena o na kanaka a'u i hoonoho aku ai e kiai ia Magarita ma ame na powa o na mauna Alepine.

"Ina nae aole i hooukaia ke kaua i keia manawa aole hoi i hookaheia ke koko alaila ua kokoke loa mai ia i ka manawa e hooukaia ai ka mea no hoi a'u i hopohopo mau ai i na wa apau e hoea mai ana he hookahekoko ana mamua o kuu hoea hou ana aku a ike i na maka o kuu aloha e noho mai la me ka hoomanawanui maloko o Melodiana Kakela.

"He hookahi wale no manaolana iloko o'u no ka palekana o Magarita ame kana aikane me Perekila o ia no ka hoea ana aku o Malavalia ame kona mau kanaka aole no nae ia he kumu e kaa ai o ka lanakila ma ko lakou aoao ahiki i ko maua hoea kino ana aku no ka haawi ana i na kokua ma ko lakou aoao.

"E hoomanao oe e Lomeliano kuu makuakane o kela have eleele i kakauia me ka huaolelo Alepine o ka have no ia o na kanaka powa o na Mauna Alepine e noho hoomalu ia ana e kau keiki hiapo o Buliona ka mea i kapa iaia iho ka Weli o na Mauna a o ka have me ka huapalapala H, o ka have no ia o ka lahui Hunegaria.

"Ma ko'u manao koho wale no mamuli o ke ano o kau hihi'o moeuhane me he mea la ua hi pu aku na kanaka o Hungegaria me na kanaka powa ma ka lele kaua ana aku i ke Kakela Melodiana ; o ka mea wale no a'u e hauoli nei e kuu makua oia ka hoike e ana mai o ke akua ma ou la i keia mea iloko o ka wa pono loa a nolaila aole au e noho hou iho ana, aka e haalele koke iho ana au ia oe iloko o keia manawa no ka hoopakele ana i kuu aloha e noho mai la me ka hoomanawanui.

"Ia'u nae e haalele iho ai ia oe e kuu makua aia mau no ka manaolana iloko o'u. e hoea mai ana no ka la no kaua e halawai hou ai in a aole ma keia ao alaila ma kela ao ma o aole nae ia kaua ia kuleana aka i ka Mea wale no Nona ka mana ame ke aloha e hana mai ai elike me Kana i ike ai he pono."

MOKUNA XXXI.

"Aole au i manao penei iho la ka awiwi o ka kaua huakai'i e kuu hoaloha," i huli mai ai o Hawila, a kamailio imua o Oto Beriana, "eia ka, e haalele koke iho ana no kaua i keia manawa me ka hoohakalia hou ole aku. Nolaila, e hele aku oe e hoomakaukau mai i na lio o kaua."

Me ka hoohakalia hou ole iho hele koke aku la o Oto Beriana, e hooko i na kauoha a kana aikane, a iaia hoi i hala aku ai, i huli mai ai o Hawila a kamailio hou mai la imua o kona makuakane:

"E kuu makua aloha aole anei he kanaka e noho nei malalo o kou malu a i ole kanaka e aku paha au i kamaaina ai, i ike i ke alahele pokole mai nei aku a hoea i Hunegaria, maloko o na mauna?"

Ua hoole aku la o Lomeliano ho kona ike ana i kekahi kanaka kamaaina i na ala hele mauna a oiai nae ua hoonoho mai ke Kiaaina Benekona i kekahi mau koa no ke kiai ana i ka home o Lomeliano ua ui mai la ka makuakane i kana keiki e hele mai e ninau i na koa o Benekona malia pha, he kamaaina kekahi iwaena o lakou i ike i na alahele mauna.

Hele i'o aku la o Hawila e ninau i na koa kiai he hookahi koa i loaa mai iaia e holoholo ana, ma kona wahi ku kiai, a ninau aku la o Hawila iaia:

"He ninanao ko'u o ka hoea ana mai la, a ke makemake nei au e hoike mai oe owai la iwaena o oukou i kamaaina i na alahela mauna mai keia wahi aku a hoea i Hunegaria?"

"Ke mano nei au he hookahi wale no o makou kanaka kamaaina i hele a lewa na alahele pohihihi o na mauna ua hiki iaia ke heluhelu paanaau mai i na alanui like ole o na mauna. me he mea la, e heluhelu ana oia i na hua pi-a-pa, o kona inoa oia o Mafelia a o kona lahui he Hunegaria."

"E hele aku hoi ha oe e kii i kela koa a lawe mai imua o'u, i lohe pono aku hoi au i kana mau hoakaka no kona kamaaina i na alahele mauna!" O ka nalo aku la no ia o kahi koa aole no hoi i emo iho, ku hou ana imua o Hawila, me ke kanaka kamaaina ana i lawe mai ai me ka i ana mai o ke koa imua o Hawila:

"E ka haku maikai ua hele aku nei au e huli i kekahi kanaka i kamaaina i na alahele hihipe'a o na mauna a eia oia me a'u i kei manawa. Iwaena o makou apau, aole he mea i oi aku kona kamaaina i na alanui ame na moali alahele o keia mau owawa e waiho mai nei ame na kualono a hoea iluna o ka piko o na kuahiwi ua like pu ia mau alahele pohihihi me he mau huapalapala la imua o kona mau maka"

I ko Hawila lohe ana i na hoakaka a kahi koa ua hoopiha loa ia aku oia me ka olioli o ke ano ia o ke kanaka ana i makemake ai e lilo i pailaka no ka laua huakai a o ia ka ua o Hawila i ninau okoa mai ai:

"Ke ole au e kuhiewa o oe anei o Mafelia ke kanaka a ke koa nei i hoike mai ai ia'u he kamaaina no keia mau mauna e waiho mai nei?'

"Ae, e kuu haku o ko'u inoa ia a ua makaukau hoi e hooko i na kauoha apau au e haawi mai ai ia'u" I pane aku ai no hoi ua kanaka nei.

"Ae he hana ka'u i makemake ai nau nolaila e hahai mai oe mahope o'u" oka huli mai la no ia o Hawila hoi noloko o ka hale aia no hoi o Mafelia ke ukali la mahope aku on a.

Ia laua i komo aku ai maloko o kekahi rumi kauoha mai la o Hawila ia Mafelia e noho iho ilalo a o ka hoomaka koke mai la no ia o ua o Hawila e kamailio:

"Ua hoikeia mai ia'u e Mafelia o oe ka ke kanaka hookahi i kamaaina i na alahele pohihihi o keia mau mauna e waiho mai nei eh mea oiaio anei ia?"

"Ae e kuu haku o na mea i hoikeia aku ia oe he mau mea oiaio wale no ia."

"O ko;u aina hanau no keia, a ua kamaaina no au i na alanui pohihihi oloko o ke kuahiwi o Rokenekai nei aka no ke alahele e hoea aku ai no Hunegaria ua pohihihi loa au i ke alanui pokole e hoea ai ilaila o ke kumu iho la ia a'u i makemake ai e loaa he alakai nana au ame kuu hoa e alakai aku hiki i ka pahuhopu o ka mau huakai."

"Ae, he mea oiaio no ia au e kuu haku i kamailio mai la he kamaaina oe ma kou aina ponoi iho a ua alahula na alahele pohihihi o kou kuahiwi aka no'u nei la ua lewa keia mau kuahiwi ia'u ka heleia e a'u iloko o ko'u mau la opio, no ka mea o ka'u oihna he powa no ia. e hele ana mai kekahi wahi a i kekahi.

"Nolaila, e kuu haku maikai e kau mai i kou mau hilinai ana maluna o'u nei, no ka hiki ia'u ke alakai ku ia oe ame kou kokoolua me ka maalahi loa ma ke alahele pokole mai keia wahi aku a hoea i ka olua wahi i makemake ai."

"Ua hoohauoli loa mai oe i ko'u manao e Mafelia mamua o ka mea hiki ia'u ke kamailio aku imua ou me na huaolelo kupono o ka'u wale no nae e kauoha aku nei ia oe e hele e hoomakaukau ia oe iho a e kii i kou lio no ka liuliu ana ma keia huakai a kakou.'

"E kuu haku o ke alahele a'u e alakai aku ana ia olua he alahele ia e hiki ole ai ia kakou ke hele ma na lio, he alahele nihinihi ia aka he alahele pokole loa nae e napoo ole ai ka la hoea kakou no Hunegaria."

He mea keia na Hawila i manao mua ole oiai ua kauoha aku oia ia Oto Beriana e hoomakaukau i ko laua mau lio alaila ku ae la ua o Hawila iluna a ninau mai la :

"He oiaio anei, aole e hiki i na lio ke hele ma keia alanui au e alakai aku ana ia kakou?"

"Ae in a o kou makemake e kuu haku o ka hoea koke no Hunegaria. He mau alahele e ae no kekahi eia nae he mau alahele kakakii e nui ai ka manawa e hele ai alaila hoea aku i ka pahuhopu o kau huakai."

I kela manawa nae i komo mai ai o Oto Beriana iloko a hoike mai la ia Hawila ua makaukau na lio o laua i hakaha wale no i ko laua hele aku a kau aka nae ua hoike aku la o Hawila e waiho ana ko laua mau lio a e helewawae aku ana laua malalo o ke alakai ana a Mafelia.

Ma Kela wahi i hemo aku ai ua o Hawila me Oto Beriana no ka wehewehe hou ana i na noho o ko laua mau lio. aole no hoi i emo iho ua komo hou mai la iloko o ka hale me ka hele ana aku e kii i ka laua mau meakaua a komo mai la no oi i kekahi kapa kila a i ko laua makaukau ana hele loa aku la o Hawila a komo iloko o ka rumi o kona luaui makuakane e noho mai ana no o Lomeliano me ke kaumaha honi aku la o Hawila i kona luaui makuakane a i aku la :

"E hoolana i ka manao e kuu makua e hele ae no au a hoi mai pehea hoi e hiki ai iau ke nanamaka wale aku i kuu aloha e nanea mai la i ka olu o Melodiana Kakela e hele au a hoihoi mai iaia i ka poli aloha o kona makua Benekona Mamiona. O ka'u wale no e nonoi ku nei ia oe e kuu papa aloha mai au'a oe ia'u aka e hookuu mai oe i kau keike nei me ka manao maikai e huli ae i ka mea i eha ai kuu naau i ke aloha."

"Ae ke hookuu aku nei au ia oe e kuu keiki e hele me ka manao maikai a ke kalokalo ae nei hoi ma ka inoa o ke Akua oiaio loa. Nana no e kiai a e hoopakele ia oe mai na poino mai a hui hou kaua."

Ua ike hou ae la ka makua me ke keiki pele no hoi o Oto Beriana i hele mai ai e haawi i kona aloha ia Lomeliano o Ko lua nei oili aku la no ia iwaho o kahi pupupuhale o lakou nei a aia hoi o Maieha ke kakli mai la o ka hoea aku o kona mau haku no ko lakou hele ma ka lakou huakai.

O keia manawa a Hawila me kona mau hoa o ka haalele ana iho i ka hale o ka hora elua ponoi no ia o ka wanaao nolaila aia ke alaula o ke ao ke hoomakaukau mai la e wehe ae i kona ipuka nani a ke hookuene pono ae la hoi ka pawa o ke ao no ke alahele o na kanaka opio e olino koke mai ai na kukuna alohilohi o ka la ma kekahi kakahiaka mai.

Aia ke alakai ana o kela huakai malalo o Mafelia he alahele no nae i kamaaina ia Hawila oiai oia no lakou i ke kuahiwi o Rokenekai ne a o ia ka Hawila i pane aku ai i ko laua alakai :

"E Mafelia he alanui keia i hele a kamaaina ia'u mai ko'u mau la kamalii mai ahiki wale no i ke kanaka makua ana. Ke ole au e koho hewa o keia wahi moali alanui a kakou e hele nei e moe pololei ana ia ahiki i kekahi ana, malalo pono iho o kekahi kakai pali nihinihi laumania.

(Aole i pau).