Ka Nupepa Kuokoa, Volume LVI, Number 19, 10 May 1918 — HE LEO POLOAI. [ARTICLE]

HE LEO POLOAI.

E Mr. Lunahooponopono o ka Nupepa Kuokoa, Aloha kaua:—E oluolu hoi oe no'u kekahi kolamu kaawale o ka kaua nupepa. Mamuli o ka lokomaikai ame kona aloha ua kauoha mai nei o Mrs. Emma Maka o Kalaupapa, Moloki, ia'u, ma kana leka e haawi aku i kona aina kope e waiho ana ma Alanapo, Keei, Kona Hema, no ka pono o ka poe ilihune. He aina keia nona na eka eha ame ka hapa, a ua piha i ke kope. He aina keia e haawiia ana i ka poe ilihune wale no o ka poe Hawaii wale no; aole o na lahui e aku. Oiai, ua hoopau aku oia i ka hoolimalima me na Kepani, a ua lawe mai i ka aina, oiai, he mau dala nui ka uku hoolimalima, eia nae aole i nanaia aku ia mau dala. Nolaila, ke konoia aku nei oukou ka poe pilikia a nele, aole ae ia ka poe waiwai a loaa ma keia. E loaa no au ma ko 'u home noho ma Napoopoo nei. E ohi ana oe i ke kope nou ponoi, a hoolilo aku a kuai aku i dala nau, me kou hoihoi ole mai i hookahi keneka i ka mea waiwai. Hookahi no uku o ka hoomaemae i ka aina kope, i maemae no ia, eia aku no ua makahiki. Aole i papaia ka poe mawaho loa, oiai no ka poe ilihune keia waiwai. E hele mai oukou, ka poe luhi ame ka poe kaumaha, na'u oukou e lioomaha aku. O ka lesu keia; nolaila, ike iho la no i ka leo a ke aloha a na ka bipi no e hele i kahi o ka wai. Z. P. KALOKUOKAMAILE, Mea malama aina, a hoohana aku. Nāpoopoo, Kona Hema, Mei 6, 1918,