Ka Nupepa Kuokoa, Volume LVI, Number 19, 10 May 1918 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

HE MOOLELO NO

TAZANA

A I OLE

Ka Hiena o na Ululaau Anoano

o na Kapakai o Aferika

 

 

            " Heaha kena mea au e kamailio mai nei?" i wikiwiki mai ai ka Polopeka Pota i ke kamailio ana.  "Ua hehena ia anei oe.  Aole loa o'u manaoio ua hiki i kekahi kanaka ke hoihoi hou mai i kela pahu dala i piha me ke gula."

            "O ua pahu dala nei i lilo ai i mea hookaumaha aku i kou noonoo, a o ka waiwai no hoi au i manao ai, e hookaa aku i kou mau aie apau, owau ponoi ka mea nana i lawe mai kahi mai i hunaia ai e na kanaka luina o kā moku powa, me ko'u maopopo ole nae i ka waiwai maloko o kela pahu, a pela hoi me ka ona @ kela waiwai.  Ua ike au i ke kanu ana o na kanaka luina i kela pahu iloko o ka lepo, a oiai he noonoo wale no ko'u o ke ke keko ia manawa, ua hana wale aku no au elike me ka'u i ike ai i kela poe kanaka , o ia no ka hu-e ana i kela pahu, mailoko mai o ka lua, a lawe aku e kanu hou ma kekahi wahi okoa loa, me ko'u wehe ole e nana i ka waiwai oloko.

            " I ka manawa nae a ka Lukanela Anola i kamailio mai ai ia u i ka waiwai maloko o o kela pahu, ame ka lilo ana o ia waiwai i mea nui loa ia oe ua kii aku au i ua pahu nei ma ka'u wahi i huna ai, a lawe pu mai la me a'u ia maua i hoi mai ai i ke ao malamalama.  He manao no ko'u e lawe maoli mai nei i kela pahu dala a waiho aku imua ou, aka ua ku-e ikaika mai nae ka Lukanela Anola me ka olelo ana mai he hookomo hou ana aku ia hana iloko o ka poina, a iloko paha o na hana karaima elike me ia au i ike pono ai i halawai aku me oe, ame kou mau hoa, nolaila, ua waiho aku maua i kela pahu dala mahalo o ka malu o kekahi hale banako, a o ka buke wale no ka'ui i lawe mai nei, a eia mai ua buke banako la." me ka unuhiana ae he wa-hi leka loihi a haawi aku la i ka Polopela Pota, a me na maka i piha i ke kahaha, i nank koke iho ai ko Poropeka Pota a ike i ka huina o elua haneri me kanaha-kumamakahi kaukani dala.

            "Mamuli nae o ka manao ana o ka Lukanela Anola malia aia he mau hoohuoi iloko ou no ka huina oiaio maoli o na dala maloko o kela pahu ua kii okoa oia i kekahi poe kanaka akamai loa i ka nana ana i ke ano o ke dala, a o kena ka lakou huina oiaio i hooholo ai aka nae, ina no ua makemake oe ma kela mau dala gula oloko o ka pahu e pono ai e haawiia aku ia oe ua hoopaa aku oia me ka banako i kekahi huina dala i like ka nui me kena no ka uku hou ana aku i ka banako ke manao oe e kii aku i kela pahu waiwai a lawe mai malalo o kou malu."

            O kela manao huhu o ka Polopeka Pota, kela ano pika-nana iloko ona no ke komo hokai wale ana aku o Tazana, ma ke ake'ake'a ana no ka hookoia aku o ka mare mawaena o Mr. Kenela ame Jene Pota, ua auhee aku ia mai iaia aku, a hekau iho la kekahi haawina ilihia o ka mahalo me ka hoo-maikai i keia kauaka a ke kupaianaha maoli a o ia kaha o ka pane ana mai.

            "No kau mau hana kokua a hoopakele ia makou mailoko mai o ka poina ame ka make a makou i hiki ole ai ke uku aku ia oe eia au ke ike nei he maka no he maka i kekahi hana i oi ae a'u e hiki ole ai ke pana'i aku me na huaolelo kupono no ka nui palena ole o ko'u hauoli no keia nuhou au o ka halihali ana mai nei.  He oiaio e Tazana ua hoopakele mai oe i kuu inoa kuu hanohano ame kuu kulana mai ka hookomoia ana aku iloko o kekahi kulana e kau like aku ai au me na kanaka makilo o na alanui."

            I kela manawa nae i komo mai ai o Mr. Kelekona, no ka mea ua puka aku oia i waho o ka hale ma kela wa a Mr. Kenela o ka hele ana aku e kau maluna o kona kaa otomo-bile a me ka maopopo ole iaia o ka laua nei mau mea e ka-mailio ana pane koke mai la no oia.

            "E huikala mai olua e na keonimana ia'u no ke kahamaha ana aku i ka olua mau kamailio aka he mea pono nae ia olua e maliu mai o ia hoi e pono kakou e haalele koke iho i keia wahi i keia manawa me ka hoohakalia ole a e holo pololei aku kakou no ke kulanakauhale e loaa ai ke kaaahi o kei po ia kakou no ka haalele koke ana iho i keia wahi, a holo aku no kahi e palekana ai.  O ka hala ana aku nei no ia la o kekahi kanaka maluna o kona lio a wahi ana i hoike mai nei ia makou mai ka akau mai nei oia a ke iho mai la ke ahi ma ke alahele e hoea mai ai ianei, o ko kakou pale-kana wale no o ia ke kaawale koke aku i ka wa kupono, mamua o ka a'e ana ae o ke ahi ma ke alanui a kakou e holo aku ai."

            No keia mau hoakaka a Mr. Kelekona, ua oki pu ae la na kamailio mawaena o Tazana me ka Polopeka Pota, o ko lakou nei oili koke aku la no ia iwaho o ka hale a kaheaia aku la o Jene Pota me kana kauwa Paele e hele mai nolaila aole i loaa he wa no Tazana e hoike aku ai i kana mau mea i manao ai imua o Jene Pota.

            Aole a lakou nei hooponopono hou ana iho, aka hele pololei aku la lakou no kahi na kaa otomobile e ku mai ana a o Mr. Kelekona.  Jene Pota, ka Polopeka Pota ame ka wahine Paele koluna o kona kaa, a o Tazana hoi me Mr. Pilipo koluna o ko laua kaa.

            "Iwaena o na mea kupaianaha apau a'u i ike ai ma ke ao nei o oe e Tazana ke kanaka kupaianaha loa." i kamailio ae ai o Mr. Pilipo ia Tazana oiai laua e holo ana ma ko laua kaa.

            "I ka manawa mua loa a ko'u mau maka i halawai ai me oe maloko o ka ululaau O Aferika, he kanaka ahiu loa oe, i like aku kou mau ano apau me ko na holoholona, i keia manawa nae he kulana keonimana kou, a o oe ka mea nana e lawe nei ia'u maluna o kou kaa otomobile, ma na alanui o Wisikonasina."

            "Owai hoi ia mea uiha ole me ke kahaha, elike me kau e hoike mai nei ia'u aka e Mr. Pilipo, ke hoomaopopo nei no anei oe i na mea e pili ana i ka loaa ana aku o na iwi kanaka maloko o kuu hale a i kanuia ai hoi e oukou, ma na rula o keia au malamalama?"

            "Ke hoomaopopo nei au i ka'u mau mea apau i ike ai, a i hana ai hoi no kela mau iwi." i pano aku ai no hoi o Mr. Pilipo me kona noonoo ole nae i ka manao nui iloko o Tazana no kela mau iwi kanaka.

            "Ma kau ike ame ka hoomaopopo ana i kela mau iwi apau, ua like loa no anei a i ole, aia paha he paewa iki ko kekahi mau iwi i kekahi." me ka nana pono loa ana mai o Tazana, maluna o na maka o Mr. Pilipo.

            "Heaha la ke kumu nui o kou ninau ana mai nei ia'u no keia mea?" wahi a Mr. Pilipo.

            "Aia he mau mea ano nui loa i pili aku no kela mau iwi, a in a e hiki ana ia oe ke hoakaka mai i kau mau mea oiaio apau i ike ai malia he mea ia e hiki ai e akaaia ae kekahi meahuna pohihihi a in a no hoi aole alaila e mau aku ka waiho ana o ia meahuna."

            "No na mahina ae nei elua i hala, he nui ko'u noonoo e pili ana no kela mau iwi, a ua makemake au e haawi mai oe i kau pane me ka oiaio loa elike me kau i ike ai.  O kela mau iwi apau au i ike ai a i hoakoakoaia mai ai hoi i kahi hookahi me ke kanuia ana aku mawaho o ka hale, he mau iwi kanaka anei lakou apau?"

            "Aole, o na iwi nunui apau loa, he mau iwi kanaka ia, aka o na iwi liilii e waiho ana maluna o kekahi ahamaka, he iwi ia no kekahi keko liilii o keia na mea oiaio loa a'u i hoomopopo no kela mau iwi."

            "Ke haawi aku nei au i na mahalo ana he nui ia oe e Mr. Pilipo no kena pane au," wahi a tazana, me ka haawai ana ae i kona lima akau no ka lululima u ana me Mr. Pilipo. 

            Aia ko Mr. Kelekona kaa mamua kahi i holo ai, a he nui hoi na mea iloko o Jene Pota e noonoo la.  Ke hoomaopopo la oia i ka makemake o Tazana e kamilio pu me ia no kekahi mau minuke, nolaila he mea pono e loaa iaia kana pane kupono, in a e loaa he manawa hou no laua me Tazana e kamailio ai.

            O kela ano o ua o Jene Pota, ma ka manawa pokolo o kona kaa ana aku malalo o na hoopakele ana a Tazana, oiai laua maloko o ka ululaau, aole ia kulana me ua kaikamahine nei i kela wa, aka nae aole he hiki iaia ke ike iho, in a paha he aloha kona i ua o Tazana, aole paha, a oiai oia e noho hoola'i ana maluna o ke kaa otomoile, leha iki mai la kana nana ana maluna o Mr. Kelekona, me ka hoala ana mai i keia mau ninau iloko o kona noonoo:

            Aole anei he kanaka o Mr. Kelekona i kulike maime kona ano, ka loaa o na hoonaauao maikai ia? Ke hoomaopopo la oia, o ke aloha o kekahi kanaka elike me ko Mr. Kelekona ke ano, he aloha ia, a kekahi wahine Amerika e haaheo ai, elike me kona ano.

            Ua aloha aku amei oia ia Mr. Kelekona? Aole he mau kumu kupono ma kona aoao ana i ike ai, e hikiole ai ke aloha aku i kela kanaka, no ka mea he waiwai kona, he ohana hanohano, a he haku no Enelani, nolaila o ka wahine e lawe mai ana i keia kanaka i kane nana, oi kekahi o na wahine e hapaiia ae ana mai kona kulana haahaa mai, a i kekahi kulana kiekie loa, e nui ai na hoaloha ame na makamaka o ka poai hookahi.

            Ke hoomanao ae nae oia ma kekahi ano i ke kanaka nana i puili aku iaia iloko o kona poli maloko o ka ululaau ma Aferika, a i kaili aku hoi i kana hoohihi ana i kela kanaka, a i hoopakele ou no hoi iaia mai ka poino mai ma kela la, ua aneane e hiki ole loa iaia, ke ike i kana wahi e koho ai, o kana wale no o ka i ana iho iloko ona, in a aole i hoea hou mai o Tazana ma kela la, a apo mai kela mau lima ikaika iaia, a lawe aku maluna o na kumulaau, mai ka poino mai i ke ahi, o ka mea maopopo loa e palaka ana kona noonoo no kela kanaka, a e hoopoina loa ana hoi oia iaia. 

            Ua ume ia aku kona mau manao hoohihi no Tazana, mamuli o ke kilakila o kona kulana kona koa me ka ikaika, a ina no kona mare aku me kela kanaka, mamuli iho la o ia hoohihi wale aku no, e hoea mai ana i kona manawa e pakuwa ai, a e hoowhawaha okoa aku ana oia i kekahi manawa no ke kulike ole o na hana ame ke kulana o Tazana me kona.

            Alawa hou aku la kana nana ana ia Tazana, he keonimana oia ma na ano apau a he kanaka u'i no hoi, e haaheo ai oia,ke mare aku me ia, a oiai aia o Jene Pota ma ka aoao o Mr. Kelekona kahi i noho ai, a oiai no hoi ua kaikamahine nei e nalu la no kana mea e koho ai i kane nana, oiai ua kaawale loa aku la o Mr. Kenela mai iaia aku e hoopikilia hou ole mai ai, ma ka noke hoomano ana mai i ke koi iaia e mare aku me ia, akahi no a loaa ia Mr. Kelekona he manawa e kamailio mai ai, i ka pane ana ae:

            "Ua pomaikai oe e Jene Pota, a pomaikai like no hoi kakou apau, mamuli o ka lilo ana o Tazana i mea nana e hookaawale loa aku ia Mr. Kenela mai ka hoouluhua ana mai ia oe.  I keia manawa, ua kaawale loa oe mai iaia mai, o ka'u ninau wale no e ae mai ana anei oe, e lilo au i mea nana e hoohauoli aku i kou mau la o ke ola ana?"

       "Ke manzo nei au, ua hoea mai i ka manawa a'u e haawi aku ai i ko'u ae, no ka mea ua ike au, ua aloha oe ia'u," i pane aku ai o jene Pota me ka leo malie loa.

            Ua hele no hoi a na hora o ke ahiahi, hoea aku la ko lakou nei mau kaa otomobile no ke kulanakauhale a oiai he nui no ka manawa i koe, alaila hoea mai ke kaaahi, hele aku la lakou noloko o ka hokele, e ai ai i ko lakou aina ahiahi, a mai ka hokele aku ko lakoou hele ana no ka hale hoolulu no ke kakali ana o ke ku mai o ke kaaahi a kela ahiahi.

            Oiai nae maloko o ke keena hookipa o ka hale hoolulu kaahi, i ka wa i ike aku ai o Tazana i ka noho hookahi o Jene Pota ma kona aoao, a kamailo aku la:

            "Ua kaawale oe e Jene Pota i kena manawa, a nou wale no i haalele aku ai au i kuu home ululaau, a i ka noho ana o na kanaka hihiu, no ke kii ana mai ia oe-ou wale no Jene, i haalele aku ai au i ko'u ano kahiko o ke ola ana, a lilo ae la i kanaka i loaa ka hoomalamalamaia-–––no kou pono wale no e Jene, i au mai ai au i na moana ame na aina nunui a loaa oe ia'u i keia la, ma ka'e o kekahi poina nui, a i hooopakele hoi ia oe, mailoko mai o ka malu, o ke kanaka i noho aie aku ai kou makuakana––no kou poho wale no e Jene, e ae mai oe e hoolilo aku au ia oe i wahine hauoli loa, iloko o ka pohai au i makemake nui ai e hui ou aku me lakou.  E ae ana anei oe e lilo mai i wahine mare na'u?"

            No ka manawa mua loa, akahi no o Jene Pota a ike i ke kuhohonu maoli o ke aloha o keia kanaka nona; o kela loli hikiwawe ana o kona mau ano apau, aole ia mamuli o kekahi kumu e ae, aka no ke aloha wale mai no iaia, a me ka walania maoli o kona naau, huli aku la kona poo i kahi e, palulu ae la hoi i na lima ma kona mau maka.

            Ua pupuahulu loa kona haawi koke ana aku i kona ae ia Mr. Kelekona e mare aku me ia, o ke kumu mai no, o ia kona maopopo ole i kana mea e hana ai, ma ia mea nae, i ike ai oia i kona hewa loa, he hewa nae e hiki ole ai iaia ke huikala iaia iho, alaila me ka huna ole iho i kekahi mea, hoike aku la ua o Jene Pota i kana mea i hanaai, me ka ae ana aku e mare me Mr. Kelekona i kona wa i noi mai ai iaia nei e lilo aku i wahine nana.

            "Alaila heaha la ka kaua mea e hana ai?" i hinau mai ai ua o Tazana, ma hope o kona lohe pono ana i na mea oiaio apau mai ia Jene Pota aku, no ke poho wale o kona mau manaolana, a ua lilo hoi kona hooikaika ana me ka au ana mai o ke kai loa i mea makehewa.  "Ua hoike okoa mai nei oe imua o'u i ka nui o kou aloha ia'u; a owau no hoi ka'u i ike iho i ka nui maoli o ko'u aloha ia oe, aka ua hoho pouliuli nae au i na rula e pili ana i na kanaka, o ko na holoholona mau ano apau ka'u i maopopo.

            "Ke manao nei nae au, o oe hookahi no ka lunakanawai nana e koho i ka mea no kaua a elua e pono like ai, a ke waiho aku nei au ia oe me ko'u hooluhua hou ole aku maluna o keia kumuhana.

            "He mea pohihihi loa keia ia'u e Tazana, no ka mea ua aloha pu mai o Mr. Kelekona e lilo i wahine nana, aole loa e hiki ia'u ke hoikeike ae i ko'u helehelena imua ou, a ima hoi o na kanaka hoopono apau."

            "Heaha la hoi e hoomanawanui no au i ko aloha, a o ka'u noi wale no, e kokua mai oe ia'u, ma ka auamo like ana i keia haawina ko'iko'i, a me he mea la o keia paha ko kaua po hope loa e ike ai kekahi i kekahi a ma keia hpoe aku, aole kaua e halaeai hou ana."

            Ma kela wahi o ka laua mau kamailio, i komo mai ai ka nui o lakou iloko o kela ululaau o Aferika, a ke kau okoa mai la kana hoomanao ana i kela ponaha a laua o Jene Pota e hoohala ana i kekahi mau hora, e ai ana i na huaai, a e hoonuu ana hoi ua o Tazana i ka helehelena u'i o jene Pota, o kela na hora ana i ike maoli iho ai no i ka hauoli o kona ola ana.

            E ku maile ana no nae oia nana iwaho ua hoopuiwaia oia, i ka pane ana aku o ka akena kuai tikiki o ke kaaahi mahope o kona kua: "O oe anei ke keonimana ma ka inoa o Tazana?"

            "Ae, o ko'u inoa ia, a owalu hoi ka mea au e ninau mai nei," i pane mai ai o Tazana me ka huli ana mai imua o ka akena.          

            "Eia he kelekalapa nau, o ka hoounaia ana mai nei mai Bolatimoa mai, a mai Parisa loa mai nei keia kelekalapa," me ka waiho ana mai o ua akena nei he wa-hi leka iloko o ka lima o Tazana.

            He kelekalapa kela na ka Lukanela Anola i hoouna mai a i ka wehe ana ae o Tazana i ka apana pepe mailoko ae o ka wa-hi, o keia kana mau mea i heluhelu iho ai:

            "Ua nanaia na ma-ka manamanalima maloko o ka buke hoomanao me na ma-ka o kou mau manamanalima ponoi, a ua ikeia me ka hoopaapaa ole, o oe ka Haku Kelekona, nolaila e Iawe aku i ka'u mau hoomaikai ana, no ka hoauheeia ana ae o na ao poluluhi o ke kanalua no kou mau makua."

            O ka pau ana ae no ia o ka heluhelu ana a Tazana i na olelo o ke kelekalapa, komo ana no o Mr. Kelekona, a hele pololei mai la imua on a, me ka haawi ana mai i kona lima.

            " O keia ke kanaka e paa la i ka inoa pololei e pono e kau aku maluna o Tazana, ke kanaka hoi iaia ka waiwai nui hewahewa o kona makuakane, a o ke kanaka hookahi no hoi e mare aku ana me Jene Pota, ke kaikamahine hookahi a ua o Tazana i aloha ai.  Ina no he mau huaolelo uuku ka Tazana e kamailio mai ai e pili ana i ke kelekalapa ana o ka heluhelu ana iho e kaawale koke aku ana kela inoa Kelekona mai keia kanaka opio aku, pela me na aina ame na waiwai he nui ame kona kakela nana, a e kaawale loa ana hoi oia mai kona koi ana mai ia jene Pota e lilo aku i wahine nana.

            "Akahi no a loaa ia'u he manawa e haawi aku ai i ka'u mau hoomaikai aua he nui ia oe e Mr. Tazana, no kau mau mea apau i hana mai ai no makou.  Aole loa he kanalua no ka palekana o ko makou mau ola mamui o kau mau hana hoopakele ma Aferika, a iloko o ko makou wa o ke kupilikii maanei nei o oe pu no ka mea nana i hoopakele ae ia makou mai ia mau kulana mai.

            "He nani hoi ia, ua hoea mai nei oe i Amerika nei, ke lana nei ko'u manao, e mau aku ana ko kakou ike ana kekahi i kekahi.  O ka mea wale no nana i hoopohihihi loa mai i ko'u noonoo, pehea la oe i hoea ai i kela ululaau kanaka ole?"

            "O ko'u wahi no ia i hanauia ai, o ko'u makuahine hemapu, a ua maopopo no ia oe ke ano o ka mapu, aole o lakou hoomaopopo i kekahi mea nolaila ua noho pouliuli maoli au i ko'u moolelo, a no ko'u makuakane, aole au i ike iaia."

            Ma keia wahi, i hoea mai ai kaua e kuu makamaka heluhelu i ka pau ana o ka buke ekahi, a no ke koena aku o ka moolelo e pili ana ia Tazana e ike ana kaua maloko o ka buke elua.

BUKE II––MOKUNA I.

HUI HOI NO PARISA.

 

            Oiai ua hiki loa ia Tazana ke hoike ae, oia ponoi ke keiki a Keoni Kelekona, ka mea i kuleana i na waiwai ame na mea apau a Mr. Kelekona e hookohukohu la nona ia mau aiwai apau, ma o kela kelekalapa o ka hoounaia ana mai iaia e ka Kukanela Anola, aka he hookahi mea nana i kaohi mai i ka hoopuka ana aku i hookahi huaolelo e hoehaeha aku ai i ka manao o kela kanaka opio, o ia no ka nui makee an@e ke aloha o ua o Tazana no Jene pota, nolaila uuni wale iho la no oia, me ka koi ole aku i kona kuleana i na waiwai ame ka inoa o kona makuakane.

            I ka hoea ana mai hoi o ke kaaahi, ua hele aku la o Mr. Kelekona ame Tazana no ke kau ana maluna o ke kaahi, a oiai aia no ke kelekalapa i loko o ka lima o Tazana kahi i paa ai, ua nanea maoli oia, me ka ike ole i ka haule ana mai kona lima aku, aka ua ike mai la nae o Mr. Kelekona i ka waiho i luna o ka papahele o ke kaa; a lilo aku la iaia.

            Ua holo pololei aku la ke kaaahi a hoea no Bolatimoa, alaila lele aku la lakou nei, me ka huli hoi pololei ana aku no ka home o ka Poropeka Pota, a no na la elua ko Tazana hoohala ana me lakou, ua kau aku la oia maluna o kekahi mokuahi, e huli hoi pololei ana Parisa, me ka maikai ole no nae o kona noonoo, no ke poho wale ana o kona mau manaolana apau, o ka holo ana mai no Amerika.

            Aia hoi maluna o kela mokuahi hookahi a Tazana i kau aku ai, he nui na ohua e ae, he kauna Palani kekahi me kana wahine, a he nui ae no hoi kekahi poe ohua o ke kulana kiekie a hanohano maluna o ka moku.

            Ma kekahi auwina la, he ekolu la mahope o ka haalele ana aku o ka mokuahi i ke awa o Nu Ioka, aia he elua mau ohua hanohano e nanea ana maluna o ka oneki ma ko laua mau noho, o ua mau ohua la, o ia no ke Kauna de Kode me kana wahine, a o ke kauna wahine nae ka mea i pane ae:

            "He keu aku maoli o ka nani," alaila nui iho la kona hanu, ka mea hoi nana i hoopuiwa aku i ka manao o kane kane, e noho ana ma kona aoao a ninau mai la:

            "Heaha keia mea ku i ka nani au i hooho ae la?" wahi a ke kauna de Kode, me ka nana pono ana mai ma na maka o kana wahine.

            "Heaha mai auanei kau, e noonoo wale ae ana no au i na hiona o ke kulanakauhale o Nu Ioka, a kaua i hoohala ai no kekahi mau pule, a no ia hoomanao la, i puka okoa ae nei ka'u mau huaolelo i kau a mea o ka nani o na hiona i halawai mai me ko'u mau maka," alaila noho pono ae la ke kauna wahine maluna o kona noho, me ka hopu ana aku no hoi i kana buke moolelo, a hoomau aku la i ka heluhelu ana.

            He buke moolelo no ka ke Kauna de Kode e heluhelu ana, lalau iho la oia i kana buke a hoomaka aku la e heluhelu he hapaha hora wale no paha ia heluhelu ana iho, ia wa i waiho aku ai i ka buke maluna o kekahi noho kaawale, a pane mai la i ke Kaunawahine Olaga:

            "Hele mai la ka hoi au a molowa i ka heluhelu i keia buke moolelo, e hele ae paha au e holoholo, malia o loaa aku ia'u kekahi poe ahua, i makemake e paani me a'u me ka pepa hahau i hoohalaia ae ai kekahi manawa molowa."

            Ua maopopo ia'u aole ou laki i ka paani pepa hahau, aka hoi, malia he mea ia e pau ai kou molowa, nolaila ke hookuu aku nei au ia oe e hele e huli i mau hoa lealea nou," i pane mai ai no hoi kana wahine me ka manao maikai.

            I kela hala ana mai hoi o ke Kauna de Kode, a noho hookahi aku la hoi ke Kaunawahine Olaga, aole oia i hoomau aku i ka heluhelu ana i kana buke moolelo, aka au hele aku la kana nana ana iluna o ke ao, a pela hoi maluna o ka moku, ia wa ike aku la oia i kekahi keonimana e moe lolo mai ana maluna o kekahi noho kapolena, aole no i mamao loa mai iaia aku.

            He iwakalua na makahiki o ke Kaunawahine Ologa de Kode a he kanaha hoi makahiki o kana kane, a iloko no nae o ka like ole o ko laua mau makahiki, ua lilo no ke kauna i mea nui i kana wahine opio, a oiai aole nana ponoi i koho i kana kane nolaila aole oia i uluahewa i ke aloha kupouli no ke kauna, aka nae ua hana aku oia elike me kekahi wahine i makee i kana kane, me ka hoolelepau hoi i kona noonoo maluna on a, me ka hana pu ana aku i na mea apau e hoohauoliia aku ai kana kane.

            Ma kela halawai ana aku nae o ka ike a ua kaunawahine nei me ke keonimana e moe lolii mai ana, ua komohia koke iloko on a ka manao mahalo, aole he hoohihi i kela kanaka, aka ua mahalo oia i kona mau ano apau, elike no hoi me ka poe apau e ike aku ana i kekahi mau mea a lakou i haawi aku ai i na mahalo ana.

            Iloko nae o ka nanea o kela keonimana i ka moe hoololo, a i kona nana ana mai, a ike e kau aku ana na maka o keia wahine opio maluna on a, o kona ala ae la no ia, a hoomaka aku la e hele holoholo no kekahi aoao o ka moku.

            Aia ka makemake ame ka iini iloko o ke Kaunawahine de Kode e loaa iaia ka inoa o kela kanaka malihini, a ia ka manawa i maalo ae ai kekahi kuene ma kona wahi e noho ana, ua ninau koke aku la oia:  "Ea, ua maopopo no nae paha ia oe ka inoa o kela keonimana i hele aku nei ea?"

            "O kona inoa, ma ka papainoa o na ohua e paa nei o ka moku, oia no o Tazana o Aferika." i panai mai ai no hoi ke kuene.

            Noonoo wale iho la no ke Kaunawahine Olaga, malia o kela kekahi o na kanaka waiwai a kuonoono o Aferika, a ke nana aku i na wahine nei, ua komo maoli mai la no iloko on a ka manao hoohihi no ke kulana o kela kanaka, aka nae oia wale no ka mea i kuleana i kona mau makemake apau.

            Ua ike mua o Tazana i kekahi mau kanaka elike me kela maloko o na halekeaka ma Parisa, a hoomanao mai la oia malia o ua mau kanaka nei no kela, a heaha nae ka laua mau hana kolohe e hoolala la oluna o ka moku?

            Komo aku la o Tazana iloko o ka rumi puhipaka me kona noho ana iho ma kekahi wahi kaawale, i mamao mai ka nui mai o kekahi poe keonimana e noho ana maloko o kela keena.  ʻAole he hoihoi mai la o ua o Tazana e kamilio pu me kela poe kanaka, aka noho maile wale iho la no oia a hoolele aku la i kona noonoo, no na mea i halawai mai me ia iloko o na pule aku i hala.

            I kela ame keia manawa, e hoala mau mai ana oia i ka ninau iloko on a in a paha ua pono kana mea i hana aku ai. ma ka haalele ana i kana mau koi apau i ka inoa ame ka waiwai o kona makuakane.  He mea oiaio, aole ana ku-e ana ia Mr. Kelekona, ma kekahi ano, aku ua makemake no oia i kela kanaka opio eia nae he ninau okoa loa kona makemake, ame kona kuleana oiaio i kona waiwai ponoi.

            Aole no Mr. Kelekona ponoi iho ke kumu o ka haalele ana aku o ua o Tazana i kana mau koi i kona waiwai ame ka inoa o kona makuakane, aka no ka pono wale no o ka wahine ana i aloha ai a o ka wahine hookahi no hoi haulehia pu ai o mr. Kelekona i ke aloha a mamuli wale no o na ulia pakalaki i kaa ai ka lanakila maluna o Mr. Kelekona, a hoka hoi oia.

            O ka hoike okoa ana aku o Jene Pota i ua o Tazana, ua aloha oia i keia kanaka, ke kumu paakiki loa, e hiki ole ai i ua o Tazana ke hoopoina i kela kaikamahine, aka ua ike no oia, aole ana mea hou ae e hana aku ai, o kana mea wale no i hoike okoa aku ai imua o Jene Pota maloko o ke keena hookipa o ka hale hoolulu kaahi.

            Iloko o kela manawa pokole, o ka hoomaopopo ana o Tazana i ke ano o ka noho ana o na kanaka o ke au malamalama, in a aole he dala a ua nele hoi i ke kulana, aole e loaa piha ana i kekahi mea ka noho hauoli ana.

            Ua hanauia mai o Jene Pota me kela mau ano a elua ke kulana ame ka waiwai a in a e kaili ana ua o Tazana i ka wai wai ame ke kulana mai ke kanaka mai ana e lawe ae ana i kane nana, alaila aole he mea e aku e kau aku ai o  na haawina o ke kaumaha ame ka hoehae haia aka maluna no ia o Jene Pota.

            Aole loa he wahi noonoo iloko o Tazana in a e ku olohelohe iho ana o Mr. Kelekona alaila e hoowahawaha ana o Jene Pota iaia o kana wale no e manao kuhihewa la in a ua hooholoia ka mare mawaena o kekahi mau mea, mamuli o ko laua aelike ana alaila he mea ole na mea e ae, aka he hookahi mea nui, o ko lau hooko aku i ka laua aelike, elike me ka manao hoopono a ua o Tazana e ike la nona iho.

            Ia Tazana i hoomanao ae ai no kela manawa pokole o kona noho ana me na kanaka o ke au malamalama a nana aku hoi me ka ano o kona noho ana iloko o na ululaau oilili hou mai la ka makemake iloko on a e huli hoi hou aku no kona aina hanau eia nae e loaa ana anei iaia he mau hoaloha maloko o ka ululaau ana i noho ai no na makahiki he iwakalua-kumamalua? He hookahi wale no on a hoaloha i maopopo iaia oia ka elepani, no na holoholona ahiu e ae, a hoea aku i na mapu he poe enemi wale no lakou nona elike me kana i ike maoli ai no i kela poe mapu, i kona wa e noho pu ana me lakou i na ma i hala.

            Ina aole he mea a ke au malamalama i hoopomaikai aku ai i ua o Tazana, he hookahi ana mea e ike la, aia wale no iwaena o kona lahui ponei e loaa ai he mau hoaloha nona aole hoi me na holoholonoa; ala ua like pu nae oia me kekahi kanaka iloko o ka rumi pouli, i maopopo ole kona ano o ka noho ana aku omua.

            Oiai nae ua o Tazana e hilinai ana ihope o kona noho, a e puhi ana hoi i kona paka cigarita, iaia i alawa ae ai kana nana

  ana iluna, ike aku la oia i ke kii o kekahi poe eha e noho ana ma ka aoao o kekahi pakaukau uuku, a e noke nui ana i ka paani pepa hahau.

            Iwaena o kela poe kanaka apau cha, he hookahi no mea i loaa ka inoa ia Tazana, on a ke Kauna de Kode, no ka mea ua haha'i aku he kuene iaia i na ano apau e pili ana i ke kauna, he kanaka hanohano oia, a he kulana ko'iko'i hoi kona, iloko o ka oihana kaua o Palani.

            Oiai no nae o Tazana e nana hoomau ana iloko o ke aniani kilohi, ike aku la oia i ke komo ana mai o na kanaka elua i loaa mai ai iaia e hawanawana ana mawaho o kela keena puhipaka he hookahi o ua mau kanaka nei i hele pololei ae a ku mahope o ke kua o ke kauna, me ka alaalawa ana ae ma o a maanei oloko o ua rumi nei, eia nae aole oia i ike mai i ka nana o Tazana maloko o ke aniani.

            Aole i loihi ke ku malie ana o kela kanaka mahope o ke kua o ke kauna ua unuhi ae la oia mailoko ae o ka pakeke o kona kuka, i kekahi mea, aole nae o Tazana ike aku, oiai aia iloko o ka lima kahi i hunaia ai, a me ka palamimo loa hookomo iho la ua kanaka nei i kona lima, iloko o ka pakeke o ke kuka o ke kauna.

            Ke paani la ke kauna me ke kokoolua o ke kanaka e ku pono la mahope o kona kua, a no ka hapaha hora ko laua paani ana, aia wale no ka laki ma ka aoao o ke kauna, alaila ike aku la o Tazana, i ka awihi ana aku o ka maka o ke kanaka e ku ana iluna i kona kokoolua ma kekahi aoao mai o ke pakaukau, o ka manawa no ia o ke kanaka i haawiia aku ai ka hoailona e kona hoa hui, i ku ae ai iluna a kuhikuhi mai la kona manamanalima imua o ke kauna a kamailio mai la i keia mau olelo oolea :

            "Ina i maopopo mua ia'u, he kanaka apuka kiekie loa oe e ke kauna, in a aole loa au e hele mai nei e paani pu me oukou maluna o keia pakaukau."

            Iloko o kela manawa i ku koke ae ai ke Kauna de Kode me kekahi mau kanaka hou ae elua iluna, ua hele hoi ka helehelena o ke kauna a haikea, no kela kapaia ana mai on a i ke apuka, a o ia kana o ka pane ana mai :

            " E hoakaka mai i ka manao o kau mau olelo," wahi a ke kauna, me ke ku'iku'i ana iho i kona mau lima maluna o ke pakaukau.  "Ua maopopo no anei ia oe ke kanaka au e hoahewa wale mai nei?"

            "Ua maopopo ia'u ka'u mea e kamailio aku nei, he kanaka apuka loa oe, e kupono ole ai o oe pu kekahi iwaena o ka pohai o na kanaka keonimana."

            Me ka haawi hou ole aku i manawa no ua kanaka nei e kamailio mai ai, o ke kulou mai la no ia o ke kauna imua, a pa'i aku la i ka waha o kela kanaka me ka ikaika, a e ole wale no ke komo ana mai o na kanaka elua e uwao, ina ua hele oko kela hana i ka nui.

            "Manao au, ua kuhihewa loa kou hoahewa wale ana aku nei i ke kauna i ke apuka." i kamailio mai ai kekahi o na kanaka e paani pepa pu ana.  "O ke Kauna de Kode keia o Palani, he kanaka kulana hanohano, a he inoa i hapala ole ia me kekahi o na ano au i kapa aku nei maluna on a."

(Aole i pau)