Ka Nupepa Kuokoa, Volume LVI, Number 17, 26 April 1918 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

He Moolelo No Tazana

Aiole Ka Hiena o na Ululaau Anoano o na Kapakai o Aferika

            @he ae la ke kanaka o ke aupuni i kekahi aniani hoonui @ mailoko mai o kona pakaukau, a hoomaka iho la e nana pakahi i na maka maluna o na manamanalima. e waiho @ ae ana imua o kona alo, maluna o na pepa keokeo, a no ka manawa mua loa, akahi no a oaa aku ka ika ia Tazana, o @ ka ka manao mui a kona hoaloha i makemake ai e ku@ ko laua mau manamanalima, i wahi e maopopo ai, oia @ ka mea nona kela mau manamanalima maloko o ka @ke noomanao a Keoni Kelekona, i ka wa bebe loa o ua o Tazana.

            "Auhea oe e Anola kuu hoaloha, aole anei ou manao, no @ makahiki he iwakalua ae nei i hala ka make ana o ka mea nona kela mau manamanalima liilii maloko o kela buke hoomanao. a ua ike pono au i kona mau iwi i ka waiho maloko o ka hale o kona makuakane, me na iwi o kona mau makua."

            No ka lohe ana mai hoi o ke kapena o ka oihana makai i na olelo a Tazana i kamailio ae ai, aea mai la kona poo iluna me ka nana ana mai ma kahi a laua nei e noho aku ana. a o ia ka wa a ka Lukanela Anola, i pane aku ai iaia: "E hoomau aku i kau nana ana, a mahope au e hoike aku ai i na mea apau. ke lilo nae ia i mea ku-e ole mai na kuu hoaloha nei."

            "Aohe mea loaa ma ka noke ana aku i ka hoohalikelike i na kaha o ko kaua mau manamanalima, me na kaha maloko o kela buke hoomanao i hanaia e na manamanalima. ke waiho mai la iloko o keia manawa, ma na kapakai o kekahi makupuni ma Aferika."

            "Aole he kulike iki o ko'u manao me kou e Tazana," i pane mai ai ka Lukanela Anola. "Ina aole oe he keiki na Keoni Kelekona. alaila ma ke ano hea oe i hoea ai iloko o kelaululaau kanaka ole. no ka mea aole he kanaka iki keo-keo i hoea mua aku no kela wahi, o Keoni Kelekona hookahi wale no me kana wahine me Alika i noho ai?"

            "E hoomanao hoi paha oe, o Kala ko'u makuahine," i pane mai ai o Tazana.

            "O kau no ia i noke mau mai ai i ke kamailio iaʻu, o Kala kou makuahine. eia nae, aole loa he wahi lihi kuleana iki o ka mapu maluna ou, he kanaka oe i like loa me koʻu ano nei." wahi a ka Lukanela Anola. me ko laua ke ana ae, a hele aku la no kahi o kekahi puka aniani nui e hamama ana.

            No ka hoike ole mai o ke kapena makai i kana mea i ike ai no kela mau kaha o na manamanalima, huli mai ia ka Lukanela Anola nana i ke kanaka o ke aupuni, a o ka mea nana i hookahaha aku i kona manao, ma kahi o ka nana o ua kanaka nei iloko o na apana pepa keokeo, i kau aku ai na kuni o na manamanalima. e noho hoola"i mai ana oia i luna o kona noho, a e heluhelu ana hoi i na mea apau i ka kauia maloko o ka buke hoomanao a Keoni Kelekona.

            I wahi nae e loaa ole aku ai ka hoohuoi ia Tazana. no ka heluhelu o kela luna aupuni i na mea maloko o ka buke hoomanao. kunu wale iho la no ka Lukanela Anola. ia wa i huli mai ai ke kapena makai nana iaia, ua kau ae la o Anola i kona lima iluna. e hoike aku ana i ka makai, aole e heluhelu i kela buke. a o ia ka ua kanaka nei o ke aupuni i pane mai ai:

            "Auhea olua e na keoniimana, i mea e loaa ole ai kekahi mau kuhihewa ma koʻu aoao, ke noi aku nei au i ko olua oluolu. e waiho mai i keia hana iloko o kuu lima. aia hoi a huli hoi mai ke kanaka loea ma keia hana. alaila, waiho aku au i keia hana malalo o kana noii ana. a manao au. he mau la helu wale no koe. o kona hoea mai no ia."          "He mea maikai ole ka keia, no ka mea ua makemake loa au e hoauheeia ae na pohihihi apau i ka meahuna i pili aku i ka mea nona keia mau manamanalima, maloko o kena buke: o ke kumu o koʻu makemake loa ana e ike e haalele iho ana o Tazana ia Parisa nei ma kana huakai no Amerika."

             "Ina pela. he hana hiki no ia ia oe. ke kelekalapa aku ia Tazana. no ka hopena oiaio i loaa ma ka huli ana aku a ko makou kanaka loea ma na mea pili i na kaha o na manamanalima. me he mea la iloko o na pule elua e pau ai keia ninau pohihihi i ke kuekaa ia.

            "Aia no he mau aweʻawea o ke ano kulike loa o kekahi me kekahi, aka e hoomanawanui no nae kakou, o lilo auanei koʻu hoike e ana ae i kaʻu mea i ike, i kumu e hookaumahaia ai ko kakou mau manao, eia ka auanei he okoa loa ka mea oiaio. paa kuhihewa nae ko kakou manao no kekahi mea okoa."

Mokuna XXII.

Hoea o Tazana no Amerika

            Elike me na mea i hooholo mua ia ma waena o ka Luka-nela Anola ame Tazana. mahope iho o ko laua haalele ana aku i ke keena o ke kapena o ka oihana akai, ua kamoe pololei aku la ko laua alahele no ke keena o ka hui mokuahi. a kuai aku la o Tazana i tikiki nona e kau aku ai no ka holo ana i Amerika. elike me ka leka kono a Jene Pota iaia.

            Ma kekahi la ae, haalele iho la o Tazana ia Parisa a holo aku la maluna o kekahi mokuahi lawe ohua no Amerika, a no hookahi pule ke kakali ana ma ka moana hoea aku la ka moku no ke awa mua loa o Amerika. a ia lele ana aku no a Tanaka nouka o ka aina, aole oia i hoohakalia wale iho, aka hele aku la oia i ka hookele ana i ka otomobile, iloko o kela mau la pokole a laua i noho ai ma Parisa, e hele mau ana oia i ka holokaa i na manawa apau.

            I ka loaa ana o kekahi kaa nui kupono iaia. a mahope o ka nana ana aku maloko o ka buke o na makaainana e noho ana ma ke kulanakauhale o Bolatimoa. i maopopo ai iaia ka inoa o ka Poropeka Pota ame kahi i ku ai o kona hale.

            E nanea ana no ka poe oloko o kekahi hale nui o ke ano kahiko. e ku ana mawahi aku o ke kulanakauhale o Bolati-moa. aia hoi mawaena o ka hora uni o ke kakahiaka ame ka hora umikumamakahi; ua hoea aku la kekahi kaa a ku ana mawaho o ka hale. a lele aku la he kanaka ilalo me ke komo ana aku noloko o ka hale. me a i ana aku:       "O ke aloha kakahiaka no kou e Mr. Pota," wahi ana me ka haawi ana aku i kona lima akau no ke aloha ana.

            "Ae, o ke aloha no kou e Mr. Kanala," i pane mai ai no hoi ka Poropeka Pota. "Nawai oe i ae aku nei e komo mai iloko?"

             "Na Emarada i kii ae nei e wehe i ka puka, pela i maalahi ai kaʻu komo ana mai la, eia no ka oe i ka hale nei," i pane aku ai ke kanaka malihini.

             "Alaila ua hele loa aku la no ka paha o Emarada e hoike ia Jene no kou hoea ana mai nei."

             "Aole au i hoike aku nei ia Emarada no koʻu makemake e ike ia Jene Pota. aka nou no koʻu manao o ka hele ana mai la i keia la."

            "Alaila e hanohano nui keia i loaa iaʻu i keia la. a heaha keia manao nui ou e kuu hoaloha?"

            "He hookahi no manao nui o kaʻu huakai, no ka hoomaopopo pono ana no ia i na mea e pili ana no ko Jene lilo mai i wahine naʻu. Ke hoomanao nei au, ma kela kukakuka hope ana a kaua. ua hoike okoa mai oe i kou manao, ua kupono au e lilo aku i hunona nau, a pehea la, ke paa nei no paha ia manao ou pela a i ole ua loli ae nei paha. oiai aole a kaua mau mea maopopo loa i hooholo ai e pili ana ia maua."

             Ua hoopuiwa loa ia aku ka Poropeka Pota i ka lohe awa i ka manao o kela huakai a Mr. Kenala. a ke pupue wale la no oia i kona noho paipai, me ka pane ole mai, a o ia ka ua kanaka nei o ka hoomau hou ana aku no i ke kamailio ana:

            "Ua lehulehu no na manawa aʻu i hui kukakuka pu ai me Miss Jene Pota, e hoopaneepanee mau mai ana nae oia i ko maua wa e hooliloia ai i hookahi, a ma koʻu hakilo pono loa aku i kona mau ano. me he mea la i koʻu wa e makaukau ai e haalele iho iaia. e ike aku ana au i ka mohala maikai o kona mau maka, a ke noho aku hoi au me ia, he keu a ke kaumaha ke nana aku. o ia no oe o ka mea aole he wahi lihi hoihoi iki iloko ona noʻu."

             "Mai kanalua iki oe no kuu kaikamahine. no ka mea he hoolohe loa oia ma kaʻu mau mea apau e kauoha aku ai iaia e hana. nolaila in a ua hookaumaha ia kou noonoo ea, e hoopau loa oe ia ano ou e lilo aku ana o Jene i wahine nau."

            "Alaila ke kau aku nei au i koʻu manaolana no ka holopono o na mea a kaua i kukakuka mua ai maluna ou e kuu poropeka, aole anei pela?" me ka nui ana iho o ka hanu o Mr. Kenela. elike me ka ano o ka poe i hoomama ia aku ko lakou manao.

            "E haawi aku ana au i kaʻu mau hooikaika ana ma na ano apau, no ka hoea mai i ka wa e lilo aku ai kuu kaikamahine he wahine nau. Pehea la i loaa ai na manao kanalua iloko ou no ka hooko ole ia o ka mare mawaena o olua?"

             "Eia wale no koʻu manao kanalua, malia paha aia ka noonoo nui ana o kau kaikamahine maluna o Mr. Kelekona, no ka mea e pinaʻi mau mai ana kela kanaka opio no kou wahi nei. a e ike mau ana no hoi au iaia me Miss Pota. No keia kumu la ea, ua kupilikii maoli koʻu manao, a owai hoi ia mea kaumaha ole, ke noonoo ae, malia o ke kumu houlolohi mau ia o Jene i ko maua hoolilo koke ia i hookahi."

            "Alaila heaha kau i makemake ai iaʻu e hana aku?" i ninau mai ai ka Poropeka Pota, me ka noho pono ana mai iluna.

            "Ke makemake nei au e hookikina aku oe ia Jene Pota. e mare koke ia maua, ua lawa keia manawa loihi o ke kakali ana. a mahope aku o kela manawa, aole oʻu nana, no ka mea e kuleana aku ana au maluna ona, e hiki ole ai iaia ke hana elike me kona makemake."

             "Ua hoike kahiko aku au iaia i koʻu manao, no ko olua mare ia me ka hikiwawe loa. no ka mea aole oʻu makemake e hooloihi aku i ka noho ana ma keia wahi, in a no ko olua mare. a hoi aku olua no ko olua wahi e noho ai. alaila aole aʻu hoolimalima ana i na kauwa lehulehu no ka malama ana mai i keia hale nui. aka e waiho ia aku ana e aʻu i ka hoolimalima i ka poe e makemake mai ana."

             "Ia oe i hoike aku ai i kou makemake no ko maua mare koke ia, heaha ka Jene Pota i pane mai ai no ia manao ou?"

            "O kana i pane mai ai, aole ka oia i makaukau no ka mare koke ana i ke kane i keia manawa, a ua hiki no ia maua ke haalele i keia wahi, a hoi aku a noho ma ka aina mhiai o kona makuahine ma Wisikonasina akau, i waiho iho ai nona.

           "He aina waiwai no kela. a ua loaa no ka pomaikai i na hoa-aina e noho nei malaila, a i kela ame keia makahiki. e hoouna mau ia mai ana no he mau dala mahuahua ia Jene, ma ke ano he mau loaa no ka aina. a he uku hoolimalima no hoi.

            "Ua paa kana mau hoolala ana no ko makou hoi aku a noho malaila ma ka la mua o keia pule ae. a ua hala e aku o Mr. Pilipo ame Mr. Kelekona ilaila. no ka hoomakaukau e ana i na hemahema o ka hale mamua o ko maua hoea ana aku. Ma ka manao o Jene. ua nui maoli ko maua aie ia oe, a i wahi e hooi ole ia aku ai ia aie. pela oia i hooholo ai i kona noonoo, he oi ae ko maua noho ana maluna o kona waiwai ponoi. me ka uuku loa o na hoolilo."     E hoomakaukau aku ana o Mr. Kenela e pane ma kona aoao, ua lohe aku la laua i ke pahupahu mai o kekahi mau kapuai wawae maluna o ke alapii, a iloko o ka manawa po-kole loa. komo ana no o Jene Pota iloko o ka rumi, a i ka ike ana mai i kona makuakane ame Mr. Kenela, ua kueini aku la oia ihope me ka i ana mai nae:

            "E kala mai olua iaʻu, no koʻu manao mai nei o oe wale no la e papa, pela au i hele mai la me ka pupuahulu. eia ka he hoa kamailio kou. ua pau ae la no, aia a loaa kekahi manawa kaawale, alaila kamailio aku au ia oe i koʻu manao."

            "Owau wale no keia me papa maloko nei e Jene," i pane mai ai o Mr. Kenela me ke ku okoa ana mai iluna. "Aole anei oe e komo mai iloko nei. a i hookahi ka hui pu ana iloko o na kamailio pili i ka ohana hookahi? E kamailio ae ana no maua nou. o kou hoea koke mai nei no ka ia."

             "Me ka mahalo a nui e Mr. Kenela," i pane aku ai ua o Jene Pota me ke komo ana aku iloko o ka rumi. he hana rula ole hoi nona, ka hoopaakiki ana aku aole e komo aku e hui pu me kona makuakane. ame ke kanaka i manao ia ai i kane nana.

            Hele pololei aku la ua o Jene Pota a noho iho la maluna o kekahi noho a Mr. Kenela o ka panee ana mai imua on a, a hoomaka koke aku la no oia e kamailio:

            "He makemake wale no koʻu e hoike aku ia oe e papa, e hoea mai ana o Tobe i ka la apopo mai ke kula nui mai, no ka hoakoakoa ana i kana mau buke. nolaila e hoomaopopo pono oe i kau mau buke apau i manao ai e lawe no Wisiko-nasina, aole hoi o ka paakiki e lawe no i ka pahu buke ho-lookoa, elike me kau i pookiki ai e lawe i Aferika, a e ole wale no koʻu ku-e. pela i lawe ole ia ai keia pahu buke nui."

            "Eia anei o Tobe ia nei?" wahi a ka Poropeka Pota me ke kulou ana mai imua o kana kaikamahine?"

             "Ae, o kona hoea koke ana mai nei no ia la. a haalele aku nei au, aia me Emarada kahi i kamailio ai mahope o ka hale."

            "E hele koke aku ka hoi au e ike iaia," me ke ku ana ae o ka Poropeka Pota iluna. "Ehookuu mai olua iaʻu e kuu mau keiki, aole no au e loihi aku, alaila hoi hou mai au nolo-ko nei o ka rumi," o ka oili aku la no ia o ua elemakule nei, a koe kokoolua iho la o Mr. Kenela me Jene Pota.

            Ke kakali malie la nae o Mr. Kenela ahiki i ka maopopo ana iaia. ua hala loa aku ka Poropeka Pota ma kekahi aoao o ka hale. ia wa oia i huli pono mai ai imua o Jene Pota. a kamailio mai la:

            "Auhea oe e Jene, pehea la ka loihi o kou hoopaneenee mau ana i ka hookoia o ka mare wawaena o kaua? Aole oe i hoole mai i ka mare ana me aʻu, eia nae aole ou hoike maoli mai i kekahi manawa maopopo loa no kaua e mareia ai.

             "O kaʻu i hooholo ai. o ia no ka hele ana e kii i palapala ae mare no kaua i ka la apopo, a iaʻu e hoi mai ai me kela palapala, o ko kaua mare ia no ia. me ka nui ole o na hoo-hiwahiwa hihimanu o ke ano waiwai ole, a manao au, ua kulike no ko kaua manao ma ia mea."

             Aohe wahi mea a pane iki aku o Jene Pota. aka ke nana mai la no oia me ke kuoo imua o keia kanaka ana i hooholo ole ai i kona manao e lilo mai i kane nana. a o ia ka ua o Mr. Kenela. i hoomau hou aku ai i ke kamailio ana"

            "Ke hoomanao nei no oe, na kou makuakane ponoi no keia makemake e lilo au i kane nau aole e hiki ia oe e Jene ke hoole mai ia mea."

            "Ua maopopo ia mea iaʻu. aka mae auhea oe e Mr. Kenela, ua loaa aku anei ka ike ia oe. aole ia malalo o kekahi kumu okoa ai. aka ma ke ano wale no. ua noho aie kuu makua-kane malalo ou? No na wahi dala mailuilu. a kuu makua-kane o ka aie ana aku ia oe, a i hiki ole hoi iaia ke hookaa aku. owau anei ke mohai aku i kuu hauoli ame kuu ola no kou manao epa e keia kanaka?

            "Ua maopopo no ia oe, ma ka manawa au i haawi aku ai i kekahi huina dala mahuahua i kuu makuakane, no kela huakai huli waiwai i Aferika, e kaa ana kuu makuakane ilo-ko o kau mau umii ana, me ko manao pela iho la kana kai-kamahine e lilo aku ai i wahine nau. Ina aole na ulia pa-kalaki, in a ua ku oe e keia kanaka i kahi o ka hoka, aka nae aole pela, ua huli hoi mai kuu makuakane me ka nele, pela wale no i hiki ai ia oe ke hooweliweli aku iaia. a ke koi mai hoi me ka paakiki iaʻu. e ae aku e lilo i wahine nau.

            "Ua ike no oe, aole he waiwai o kuu makuakane e hoopaa aku ai malalo ou, no ka huina dala ana i makemake ai e aie aku ia oe, aka nae he kanaka hoopukapuka waiwai oe i piha i ke akamai ame ka maalea, nolaila he mea liilii loa kekahi mea hoopaa no kau mau dala, o ka mea nui iloko o kou noo-noo. o ia no ka inoa hanohano o koʻu ohana. aia kou hilinai nui ana maluna o'u no ka uku ana aku i ka aie i hanaia e kuu makuakane."

            "Me koʻu nana ole i kau mau mea e kamailio mai nei iaʻu e Miss Pota, e mare aku ana no au ia oe, nolaila he wa keia nou e ike ai, he mea makehewa wale no ka hoopaakiki ana," wahi a Mr. Kenela me ka hookuoo wale ana ae no.

            Ma kela manawa a Jene Pota e noke mai ana i ke kama-ilio, e hoahewa mai ana iaia no ke ano o kana hana ana aku i ka Poropeka Pota, e hauhoa ana iaia a paa malalo o kekahi aie kaa ole koe wale no ka ae ana mai e lilo kana kaikama-hine i wahine na keia kanaka. i hoopakeleia ae ai kona inoa maikai mai ka hilahila mai, ua hele ka helehelena o ua ka-naka nei a haikea, aka nae iaia i hooki iho ai i kana kama-ilio ana. pahola ae la ka minoaka ma kona mau papalina, a i hou aku la:

            "Ua hookahaha loa mai oe e MIss Pota iaʻu i keia la, ma kau mau olelo. e manao ana au la i kekahi kaikamahine elike me kou ano, e oi ana kou makee i ka inoa maikai o kou makuakane, e hiki ole ai ia oe ke kamailio mai i ka mea aʻu i hana aku ai iaia. Ua pololei kau mau mea apau i kapa mai nei iaʻu, ua kuai maoli aku no au ia oe, me kela huina dala mahuahua a ko makuakane i aie mai ai iaʻu, aka me ka nana ole ia mau dala, he hookahi aʻu mea e olelo ae ai, ua hoea mai i ka manawa e hookoia ai kuu makemake maluna ou."

            No ka piha loa o Jene Pota i ka hoonaukiuki ia Mr. Ke-nela. ua ku okoa ae la oia iluna. a haalele iho la ialoko o kela rumi, a aole oia i hoikeike hou mai iaia iho, mahope mai ahiki wale i ka huli hoi pololei ana aku o Mr. Kenela no kona home. No ke koena aku o na la o kela pule i koe, aole ua kanaka nei i hele hou aku no kahi o ka Poropeka Pota, nolaila aole he mare i hookoia mawaena on a ame Jene Pota. ahiki wale no i ka haalele ana iho o ua kaikamahine new me kona ma-kuakane no Wisikonasina.

            Ma ka hale hoolulu kaaahi nae, malaila i halawai hou ai o Mr. Kenela me Jene Pota, aole nae he lihi hoihoi iki o Jene Pota iaia, he mea ole no nae ia i ka manao o ua kanaka nei, a iaia i haawi hope aku ai i kona aloha ia Jene Pota, oiai ke kaa e hoomaka ana e holo, hoike aku la oia i kona manao, e hoea aku ana oia no Wisikonasina. iloko o na pule elua. a ia wa e hookoia ai ka mare mawaena o laua.

            I ka hoea ana aku hoi o ke kaaahi no Wisikonasina. ua hoea mua ae o Pilipo me Kelekona maluna o ke kaa otomo-bile nui no ka hale hoolulu, nolaila o ko lakou holo pololei loa aku la no ia no ka aina mahiai o Jene Pota. a ia lakou i hoea aku ai i ka hale, ua hoopiha loa ia ke kaikamahine opio me ke kahaha. iaia i ike aku ai i na hoololiloli hou i hanaia e Mr. Kelekona. iloko o kela mau pule ekolu wale no.

            Mai ke kulanakauhale aku na kamana, na kanaka pena a hoomoe paipu a Mr. Kelekona i hoolimalima ai. a iloko o kela mau la pokole wale no, ua nani maoli na mea apau i hanaia, me he hale hou loa la. a ua hoolako pu ia hoi me na pono hale hou loa.

            "Heaha keia mea au e Mr. Kelekona o ka hana ana?" wahi a Jene Pota, i kona ike pono ana aku i na mea i ha-naia no ko lakou home mahiai. "Ua nui maoli kou hoolilo i ku ai keia hale i ka nani ame ka maemae."

            "Mai kamailio nui ae oe, o lohe mai auanei kou makua-kane. Ina aole oe e hoike aku ana iaia. manao au aole no oia e manao iho ana, he mau hana hou kekahi i lawelaweia no keia home. No ka pono o kou makuakane, e noho ha-mau loa oe e Jene; oiai i ko maua hoea ana mai me Pilipo, a ike i ke kulana o keia home, ua kupono ole loa ia i kou makuakane, pela maua i awiwi ai i ka hooponopono ana. ahiki no hoi i ka paa ana o na mea apau e kupono iho ai ko olua noho ana."

            "Ua ike no oe e Mr. Kelekona, he kulana nele ko maua e noho nei, aole loa e hiki ana ia papa ke hookaa aku i kau mau dala. o ka hoolilo ana no keia home. Ua hookomo aku oe iaʻu ame kuu makuakane iloko o kekahi kulana kupilikii."

             "Mai kamailio iki oe e Jene no ia mea he hoolilo ; ina nou wale iho no. aole no au e hana aku i keia mau mea, aka i koʻu ike ana. ua kupono ole maoli no ia i kou makuakane, no ka mea he wahi hale uuku loa keia i kinohi, pela wale no au i hoonui hou ae ai i ka hale. me ka hoomaemae pu ana hoi e oluolu ai ka noho ana. E oluolu anei oe e Jene Pota e manaoio mai, ua hana wale aku no au i keia mau mea no ka hooluolu ana i ka manao o kou makuakane ; a e lilo hoi kou hooia mai i mea e loaa ai ka maha iloko o kuu uhane?"

             "Ke manaoio aku mei au i kau mau ea apau i hoike mai nei iaʻu e Mr. Kelekona no ka mea he kanaka oe i hooko wale aku no i na mea apau i kulike me kou puuwai oluolu. O e Mr. Kelekona, ina no hoi paha e hiki ana iaʻu ke hookaa aku i ko maua aie ia oe elike me kau i makemake mai ai!"

             "No keaha no hoi ka mea hiki ole ia oe ke hana mai pela?"

            "No ka mea ua aloha aku au i ka mea okoa."

             "O ua mea la au i haawi aku ai i kou aloha, o Mr. Kenela anei ua kanaka nei?"

            "Aole ia, he mea okoa no."

            "Mamua o kuu haalele ana aku ia Bolatimoa. ua hoike maoli mai no oia iaʻu, e mare ana oia ia oe i wahine nana."

             I pane ma ko Jene aoao, kunou wale ae la no kona poo, alaila kamailio hou aku la no o Mr. Kelekona:     "Ua lako au i ke dala ame ka waiwai, aole loa he make-make i hiki ole ke hookoia, heaha iho la ke kumu e loaa ole ai oe iaʻu? Ua emi iho anei koʻu mau ano, ame koʻu kulana imua o kela kanaka?"

            "O ke kumu nui no ea, aole oʻu aloha ia oe e Mr. Kele-kona, aka nae o kaʻu mau mahalo ana nae he nui. aia ma-luna ou, aka nae aole e hiki iaʻu ke hoohilahila iaʻu iho ame koʻu ohana. ma ka ae ana aku e lilo i wahine na kekahi ka-naka, koe wale no ka mea aʻu i aloha ai, a ina aole ia, alaila me ke kanaka aʻu i hoowahawaha loa aku ai, ka mea hoi aʻu i kuai aku ai i kuu kino no ke dala."

            "Me aʻu nei e loaa ai ia oe ka noho hauoli ana, ina no ia aole no ke aloha. aka no kou mahalo wale mai no iaʻu elike me kau e kamailio mai nei," wahi a Mr. Kelekona o ka hoao ana mai e lohe i ko Jene Pota manao maoli.       "Ua maopopo no ia oe e Miss Jene Pota, ua aloha aku au ia oe, iloko o keia manawa loihi o ko kaua hele pu ana ma na wahi apau, a i kou hoole ana mai e lilo mai oe naʻu, aka na ke kanaka au i aloha ole ae, a i kuaiia aku ai oe me ke dala e kou makuakane, aole aʻu mea e ae e hana aku ai. o ka nana wale aku no ia oe me ka manao hoowahawaha. e hoalaia mai ai ka manao lili iloko oʻu e hana aku i kekahi mea. e lilo ole aku ai oe i kela kanka."     Aole o Mr. Kelekona i hoomau loa aku i kana kamailio ana maluna o kela kumuhana, aka aole no nae kaua e hoo-hewahewa aku ana e ka makamaka heluhelu, no ka manao pepekikanaka iloko o Mr. Kelekona.

             He hookahi pule mahope iho o ka hoea ana aku o Jene Pota ma, no ka aina mahiai ma Wisikonasina, ua hoea aku lo o Mr. Kenela. maluna o kona kaa otomobile nui; a he hookahi pule okoa ia o ka noho ana o Mr. Kenela ma kela wahi, me ka hoihoi ole nae o Jene Pota no ka noho aku o kela kanaka, a oi loa aku hoi o Mr. Kelekona. no ka mea aia mau iloko ona, na manao hoowahawaha no ke kanaka. nana e kaili aku ana i ke kaikamahine hookahi ana i aloha ai.

            No Mr. Kenela nae, e koikoi mau ana oia ia Miss Pota e mare koke laua, a e hooikaika mau aku ana no hoi oia i ka Poropeka. e lilo i mea kokua nui mai no ia manao ona. a mamuli no o na hooikaika pauaho ole ana a ua o Mr. Kenela. ua hooholoia iho la ma kekahi la mai e holo oia no ke kulanakauhale e kii ai i palapala ae mare na laua, a e lawe pu mai me kekahi kahunapule nana e hoohui ia laua iloko o ka mare.

            No kela hooholo koke ia ana o a mare o Jene Pota me Mr. Kenela. ua hoike koke ae la o Mr. Kelekona i kona ma-nao. e huli hoi koke aku no kona wahi ma Enelani, aka nae, mamuli no o ka auʻa paakiki loa o Jene Pota. iaia e noho mai, ua hoopau okoa ua o Mr. Kelekona i kela manao e haalele iho i ka aina hanai holoholona, me ka maikai ole no nae o kona noonoo.

            O ka mea wale no nana i hookanaaho aku i na manao lili iloko o Mr. Kelekona, malia paha o oili ae kekahi ulia laki, o ka hoopauia no ia o ka mare ma waena o Mr. Kenela ame Jene Pota. o ka hoomamaia no ia o kona noonoo. aka ina aole pela, alaila e kakali aku ana no oia. o ka oili iki mai o kekahi wahi hunaahi liilii, o kona ninini okoa aku no ia i ka aila e hooi loa ia aku ai ka ikaika o ka a ana a ke ahi.

            Hakalia no a pau ka aina kakahiaka. ma kekahi la mai. o ke kau ae la no ia o Mr. Kenela maluna o kona kaʻa otomo-bile nui, a holo aku la no ke kulanakauhale e kii ai i pala-pala ae mare no laua. a e lawe pu mai hoi i kekahi kahunapule.

            Aia hoi ma ke kukule hikina mai kahi o ko lakou nei hale i ku ai. kekahi ahi kahi i a ahi no hookahi pule holo-okoa. a e pa mai ana no hoi ka makani ma ke kukulu komo-hana aku, nolaila. aole loa he wahi hopohopo, no ka hoo-kokoke mai o kela ahi i ka aina mahiai.

            E kokoke ae ana i ka hora uni-kumamalua o kela la. ua hele aku la o Jene Pota i ka holoholo, aole oia i koi mai ia Mr. Kelekona e hele pu aku me ia, aka ua makemake no ua kaikamahine nei. e loaa he manawa nona e hoonana ai i kona mau manao kaumaha oia wale no maloko o ka ululaau.

             Aia no ka Poropeka Pota ame Pilipo maloko o ke keena hookipa kahi i kamailio ai, elike me ko laua ano mau, ma-luna o kekhi ninau pili akeakamai. aia hoi o Emerada ma-loko o ka halekuke kahi i lawelawe ai i kana mau hana, a no Mr. Kelekona hoi, mamuli o ka loaa ole ana he hiamoe maikai iaa ma ka po aku i hala, ua haule aku la oia maluna o kekahi koki, o ka lilo aku la no ia, oiai ua hiki ole i kona mau maka ke kaakaa ae.

            Ma kela haalele ana mai nae a Jene Pota i ka hale, ua loli ano e ae la ka pa ana a ka makani, me ka huli pono ana mai ma ke kukulu hikina. a iloko o ka manawa pokole, ua punohu ae la ka uwahi eleeie iluna o ka lewa. a hoomaka mai la ka nee ana o ke ahi no ke kukulu komohana.

            He la hele ia no ka poe hoolimalima e noho ana maluna o ka aina mahiai o Miss Pota i ka makeke, nolaila aole he poe na lakou ehele mai e hoike. i ka poino nui e nee mai la; a he mea oiaio, aia ke ahi ke hele la i ka loa ame ka laula o ka aina. a hoea loa aku i ke kukulu hema, nolaila aole e hiki ia Mr. Kenela, ke huli hoi mai ma ke alanui ana i holo aku ai, aia aku la ke ahi ma ia wahi. a aʻe ma kekahi aoao o ke alanui.

            Iloko nae o keia manawa a ke ahi e nee nei ma na wahi like ole me ka malie, o ka manawa ia o kekahi kaa nui o ka holo ana mai, ma ke kukulu komohana. a ku ana mamua pono aku o ka puka-pa o ka hale o Miss Jene Pota, alaila lele ae la kekahi kanaka kino loihi mailuna aku o ke kaa. a holo pololei aku la no ka lanai o ka hale. Oiai aole he mea i loaa aku iaia mawaho o ka lanai. ua komo pololei loa aku la no oia noloko o ka hale, a i ka ike ana ilio ia Mr. Kelekona e hiamoe ana iluna o ke koki, ua puiwa hikilele ae la oia no ka puiwa. aka hooluliluli aku la ma na poohiwi o Mr. Kelekona, me ka pane ana iho:

             "O, e Mr. Kelekona, ua pupuleia anei oe i hiamoe lealea ai oe, me ka ike ole ai i ka poino, ua kokoke loa mai imua o kou alo? Ua kokoke loa oe e hoopuniia e ke ahi. he wahi uuku wale no koe. Eia ihea o Miss Jene Pota?"

            Me ka puiwa hikilele, ala ino mai la o Mr. Kelekona iluna. aole nae ona hoomaopopo mai i ke kanaka e kamailio aku ana iaia, aka holo aku la oia nowaho o ka lanai o ka hale ; a iaia i ike iʻo aku ai i ke ahi e nee mai ana me ka hiki-wawe. noke ae la oia i ke kahea me ka leo nui:

             "E Jene, e Jene, eia iho nei oe ihea?" a no kela leo kahea o Mr. Kelekona i holo awiwi mai ai ka Poropeka Pota, me Pilipo ame ka wahine Paele. "Eia o Jene Pota ihea/" i ni-nau hou aku ai o Mr. Kelekona me ka lalau okoa ana aku i ka lima o ka wahine Paele.

            "Ua hele aku nei oia i ka holoholo, aole oia i hoi iki mai nei," wahi a Emerada me ka piha i ka haalulu. o ka manawa koke mo la o Mr. Kelekona i haalele iho ai i ka lanai o ka hle, a holo aku la mahope o ka hale, me ka ukali pu ana aku o ka Poropeka Pota ame Pilipo mahope ona, aohe noonoo ia mai o keia kanaka malihini o ka hoea ana aku no ka hale.

             Ia lakou hoi o ka hala ana aku me na manao pihoihoi, no ka huli ana ia Jene Pota,, ia wa i huli mai ai ke kanaka mali-hini a ninau aku la i ka wahine Paele :

            "Mahea aku nei ko haku i hele aku nei? Ma keia alanui no oia i hele aku nei, a koe aku nae ka maopopo ana iaʻu, ina paha ua pelu hou ae nei kana hele ana ma kekahi alanui okoa?" me ke kuhikuhi ana aku o ka wahine Paele i kona lima ma ke kukulu akau, kahi a ke ahi e nee mai ana.

             I kela manawa nae i oili hou mai ai o Mr. Kelekona, me ka piha i ke pihoihoi, ia wa i kamailio aku ai ke kanaka malihini: "E kau koke oe ame kou mau hoa maluna o kena kaa otomobile e ku mai la. a holo aku no kahi o ka pale-kana, aka no koʻu kaa, e waiho malie no ma keia wahi. owau ke hele aku e huli ia Jene Pota, a ina oia e loaa aku ana i ka wa pono, alaila maluna maua o koʻu kaa e holo aku ai, a ina e lohi loa ana au, alaila aole no he waiwai o keia kaa." i kela manawa i ike aku ai lakou, i ka hele ana ae o Jene Pota ma kahi mamao, ua ike oia i ke ahi. a e holo ae ana no kahi o ka ululaau. i mamao loa mai ke ahi mai.

            I kela ike ana aku no o ke kanaka malihini i ke kaikama-hine opio. o kona lele koke aku la no ia mailuna aku o ka lanai o ka hale a ku ana iluna o ka honua. o ka hoomaka aku la no ia e hele no kahi e hoea koke aku ai oia imua o Jene Pota.

            "Owai hoi kela kanaka malihini/" i huli mai ai ka Poro-peka Pota a ninau ia Mr. Kelekona.

            "Aole i maopopo iaʻu kona inoa, o ka mea apiki nae ua loaa koʻu inoa iaia, a ua loaa pu no ko Jene inoa. a ua lohe mai ni au i kona kahea ana mai nei ia Enerada ma kona inoa, o koʻu wahi nae i ike mua ai iaia aole he maopopo iki."

            "Aia kekahi mau ano aʻu e hoomanao nei, ua halawai mua au me keia kanaka, aka nae ke hoohiki nei au. aole au i ike mua iaia," i pane mai ai o Mr. Pilipo me ka luliluli ana iho o kona poo.

            "Ua like no ko kakou pohihihi apau no keia kanaka. aka me he mea la nae iloko oʻu, aole loa he wahi hopohopo iki, a manao kanalua paha, no ka hiki i kela kanaka ke hoopakele ia Jene," wahi a ka Poropeka Pota.    "He mea makehewa wale no ko kakou noke ana i ke ka-mailio no kela kanaka. oiai ka poino ua kokoke loa mai ia kakou, aka no koʻu manao nae, ua kulike no ia me kou e kuu poropeka. no ka palekana o Jene. o kaʻu wale no e kauoha aku nei ia oukou apau. e hele ae kakou e kau iluna o kuu kaa otomobile. a holo aku no kahi o ka palekana. a e waiho aku ia Jene malalo o ka hoopakele ana a kela kanaka malihini."

                                                                                    (Aole i pau)