Ka Nupepa Kuokoa, Volume LVI, Number 2, 11 January 1918 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

He Moolelo No Na Hoahanau Ekolu A I Ole O Hawila ke Koa, a o Magarita ka Uʻi ka Manu Nunu Ahiu

            "Ua pono! Akola oe e kena keiki a ka hilahila ole, ua laki oe i ka loaa ana mai la o kou uku. Ua ike no aohe ikaika, heahea aku nei no la kana o ka hoonahoa ana aku la@" a he nui aku na olelo e ku okoa iho ai no kaua e ka makamaka heluhelu i ka hilahila, in a ia kaua ia mau olelo i kamailioia mai ai.

            No keal kaanini ana aku o ke alo o Feriana iluna o ka honua, ia manawa i phoa mai ai ka leo o kona makuakane i ke kauoha ana ae i na naita e ku mai ana, i ka i ana aku @

            "Ma ka mana i loaa iaʻu, ke kauoha aku nei au ia oukou e na naita o Roma nei, e hopu koke i keia kanaka me ka hakalia ole! E hopu iaia, a e hookau koke aku i ka hoopai kupono loa maluna ona."

            Me ka leo o ke kanaka i piha i ke koa ame ka makaʻu ole@ haka pono mai la ka nana ana a Hawila imua o ke kiaaina o Roma, alaila nana aku la maluna o kona mau hoaloha, a pane aku la i keia mau olelo @

            "E na makamaka, a e na hohanau hoi iloko o ka oihana hookahi, mamua o ko oukou hoao ana mai e hooko i ka leo kauoha o ke kiaaina o Roma nei, e hoomanoa iho oukou, owau no keia ka mea i kapaia ka Naita Pahaohao o ka Luahuna Waiwai, a imua o ke Akua mana loa, e mihi oukou i ka nui o ko oukou lawehala ana ma keia ao, a e haawi hoi i ko oukou aloha hope, imua o ko oukou mau ohana, no ka mea, ma kahi aʻu e ku nei, he lua pele ia no oukou e luma'iia aku ai a pau i ka make, ke hoao kekahi e lalau mai kona mau luma ia'u, ame kuu aloha nei."

            Aole i hooloheia mai kela leo o ka kakou koa opio, aka ua oili mai la he elua mau naita o ke Keikialii Feriana, me ka manao e hopu mai ia Hawila, a o ia ka Hawila o ka pane ana iho i kana aloha.

            "E kuu aloha, e hoi ae oe mahope oʻu, a e aʻo aku hoi au i keia mau wahi keiki omo waiu i ke ano o ka paani ana. Aole no ka paha lakou i ike i na la aku nei i hala @ koʻu ano @ o ka mea nae ia e loaa hou aku ai ka hoomaopopo ana@ o wau iʻo no ka keia na Naita o ka Luahuna Waiwai;" alaila hehihehi kulana pono iho la o Hawila, a me he olapa ana la na ka uwila, aia kana mau puupuu elua ke kau pono la imua o kona mau maka, a he poha ka mea i loheia aku, hili kaanini ana ke alo o kela mau naita elua iluna, a o ka manawa hoi ia i noke hou mai ai na kanaka i ka huro, me he mea la he hana lealea loa na lakou ka ike mai i ka pau o na kanaka o ke kiaaina o Roma, i ka hoohokaia e ke kanaka a lakou i haawai aku ai i na mahalo kiekie ana i na la aku i hala.

            I kela hina ana aku o na naita elua o Feriana ilalo, ua hoopuni koke ae la na naita he kanakolu ia Hawila, a pane aku la kekahi o lakou i ke koena aku i koe o na naita o Feriana e ku mai ana@

            "E lohe oukou apau, he mau hoaloha makou no keia kanaka opio, a ua paa hoi ka makou hoohiki, e hoopakele no makou i kona ola mai ka poe apau e hoopilikia wale aku ana iaia ; a o ia kaʻu e olelo nei imua o oukou, ina oukou e hoao ana e hooko aku i ke kauoha a ko oukou haku, kela kauoha o ka piha me ka puuwai eleele, ame ka hilahila ole, alaila, e kau aku no auanei maluna o @ inaina, o keia ka leo o ke ola, a mai hoao kekahi e hookiekie mai."

            Oiai no kela mau naita e papaleo ana, o ka manawa no ia i loheia aku ai ke pohapoha mai o kekahi pu puhi, a ma kahi e ku pupupu ana o na hale lole, i welo pulelo ae ai he have i ka makani, a maluna hoi o ua have la, ua kahakahaia keia mau huaolelo@

            "No Magarita ka uʻi, Me Hawila ke koa."

            I ka meha ana iho o ka leo o ka pu pukhi, ia wa no i ikeia aku ai ka oili ana mai o kekahi puali kaua kaulio nui, hewa ua mea he kanaka ke nana aku, a ua lako hoi lakou me na meakaua o kela ame keia ano, a e anapa ana hoi ko lakou mau kapa kila i ka malamalama o ka la.

            Holo pololei mai la kela puali nui a ma kahi he iwakalua kapuai ke kaawale mai kahi aku a Hawaila ma e ku ana, ia wa i oili mai ai ko lakou alakai a ku ana mamua loa o ka huakai, a pane mai la i keia mau olelo@

            "Aole loa e kau ka lima o kekahi mea maluna o Magarita ka Uʻi ame Hawila ke koa, o ka mea e ku-e mai ana i keia kauoha, he make wale no ka hoopai kupono maluna on a." Alaila noke nui ae la ua poe kanaka nei i ka huro no ekolu manawa, e haehae ana hoi ko lakou @ i ka lewa, a e hoauhee ana i ka meha anoano eehia i kau iho maluna o kela anaina kanaka nui.

MOKUNA XXVI

            Ia kuu ana iho o kela mau leo huro o na kanaka maluna o ko lakou mau lio, ia wa i pane mai ai o Hawila i ka i ana mai, i ka poe e hoopuni ana iaia ame kana aloha @

            "Auhea oukou e oʻu mau hoaloha, aole au i hoohewahewa i ka oukou hana no koʻu pono i keia la, aka nae e noi aku ana au i ko oukou oluolu, e hookaawale ae i wahi noʻu e hemo aku ai iwaho, a hoakaka aku i koʻu mau manao imua o ke kiaaina maikai o Roma nei."

            Elike me kela leo kauoha, pela iho la na naita i hookuene pono ae ai, a haawi mai la i wahi no Hawila ame kana aloha e oili aku ai, a he oiaio, me ke kulana hiehie nui i puka aku ai oia a ku ana imua o ke kiaaina o Roma me ka poe maka hanohano, aia no hoi kana Magarita ke kuikuilima pu la me ia, aohe nae he wahi mea a owaka iki mai o ka waha o ke kiaaina o Roma a i ole o ka makuakane paha o Magarita, he kukule hoi kau@ i ka ike mai paha hoi kekahi i ka hele o na hoaloha o Hawila, a have, me ka makaumakau loa e hookau aku i kekahi hoopaʻi weliweli loa maluna o ka poe na lakou i imihala i ko lakou hoaloha.

            "E ka Makua Kiaaina o Roma nei," i hoomaka aku ai o Haila e kamailio iaia i ku okoa aku ai imua o ka mea nana i hoopaa iaia iloko o ka halepaahao, "e hooko aku ana au i kou mau makemake apau e ke Kiaaina, no ka mea ua ike no au, he kanawai kau mau olelo apau, a he hana haahaa loa naʻu ka hoao ana e ku-e aku i kou makemake, aʻu hoi e kanalua ole nei ke olelo ae, o ka makamake maoli no ia o kau keiki.

            "Ke ike mai la oe i keia poe kanaka i lako me ka lakou mau meakaua, ua makaukau loa lakou e hoopakele ae iaʻu mailoko mai o kou mana, a e hoolilo i ke kulanakauhale o Roma nei i moana koko, iloko o ka nono hoomalu ana maluna o kou aupuni, aka nae @ aole au i ae aku i ko lakou manao.

            "Ua kuhihewa ko keiki haakei, he hana paani wale no iaia ka hahao ana aku ia'u maloko o ka halepaahao, malalo o na hana epa haahaa loa o ka hilahila ole, a e hookoia hoi kona manao puuwai eleele maluna oʻu, ame ka mea a kuu puuwai i aloha ai, ma ka hookau ana iaʻu maluna o ke kua o ka lio ahiu ma ke ano hoomaewaewa ; i lohe pono oe e ke kiaaina ea, ua lako au me ka ikaika ma na ano apau ; i hakalia wale no @ kuu leo a pane ae, e ike auanei oe ame kou mau makaainana, iloko o ka imo ana a ka maka, e oili mai no koʻu poe kanaka i loko pono i na meakaua o na ano apau, mailoko mai o keia uluaau a i hooia no ka pololei o keia mau olelo aʻu, e nana aku i kela puali nui o koʻu mau kanaka, maluna o ko lakou mau lio," alaila kuhikuhi aku la o Hawila i na kanaka e ku mai ana me ko lakou mau kahiko kaua maluna o ko lakou mau lio@ a o ka manawa hookahi no hoi ia a ua poe kanaka nei i noke mai ai i ka uwa@

            "E ola mau ka Naita Pahaohao o ka Luahuna Waiwai! E haawi mai i ke kauoha, ua makaumakau loa makou e molia aku i ko makou mau ola no kou pono!"

            Ia kuu ana iho hoi o na leo o kela poe maluna o na lio, ua olowalu like ae la na naita he kanakolu e ku akoakoa ana i kahi hookahi : @ "O makou kekahi i makaumakau loa i keia manawa e ko makou haku. E kauoha mai, a na makou e hoopakele aku ia oe, mai ka mana mai o kou enemi, kela keiki hilahila ole a ke kiaaina."

            "Ke lohe pono mai la no oe e ka Makua Kiaaina o Roma nei i na olelo a koʻu mau hoaloha, he heluna uuku wale no nae keia ; aia ma na wahi like ole oloko o keia ululaau e waiho mai nei, he mau kaukani o na kaukani o koʻu mau hoaloha, i makaukau, me ia ikaika apau i loaa iaʻu, aole loa au i makemake e ku-e aku i kau kauoha ame ke kanawai o kou aupuni.

            "O kaʻu wale no nae e nonoi aku nei imua ou me ka maikai, e haawi mai oe i manawa nui kupono noʻu, e kaana pu ai i na ehaeha me ka mea a kuu puuwai i aloha ai, ka hana nana i hookomo aku iaʻu iloko o keia haawina kupilikii o ka ehaeha, aia a maalili ae ko maua mau aloha, alaila waiho aku au iaʻu iho, iloko o ka poho o kou lima, no ka hooko ana mai i ka makemake o ko keiki hookano o ka haakei ; @aka i hoole mai oe i keia noi aʻu ea, alaila me ka ikaika wale no, ame ka hookahe ia hoi o ke koko, e hiki ai ia oe, ame kou poe kanaka, ke kaili aku i kuu Magarita mailoko aku o kuu mau lima wikani punahele."         

            Ma kela wahi i hoomaha iho ai ka Hawila kamailio ana aku imua o ke kiaaina o Roma, alaila haalele iho la o Magarita i ka paa ana mai mahope o kana aloha, nee pono ae la oia a ku ma ka aoao o Hawila, hoomaka aku la e kamailio :

            "E kuu makuakane aloha, aole anei hoi, e hiki ia oe ke hoihoi hou aku i kou manao paa, no ko'u hooko aku i ka makemake o kela keiki @ ole a ko@ kaua Makua Kiaaina o Roma nei? Ua hoike mua aku au ia oe, ua nele loa au i ke aloha no Feriana, no ka mea ua lilo mua loa kuu puuwai i ka mea e ku pu nei @ aʻu, ma ke kahua o ka hoomaewaewaia.

            "O oe ponoi no e kuu @  , me na naita kakaikahi o Roma nei, na malihini @ hano hoi au o ka hookipa ana ae ma ko kaua home, ka hoike oiaio loa, no kou noho aie ana i keia kanaka opio, no ko kaua mau ola, a no ka noho kiaaina hoi o Rokenekai ; eia ka o oe ponoi no ka mea nana e hoomaewaewa i ko kaua hoopakele, he keu no la na ka mea okoa aku.

            "Ua makee aku oe i kou kulana, i kou hanohano, a i ko kaua mau waiwai hoi, a hoole mamawaino mai la oe i ka hooko ana i ka uwalo aku o kau kaikamahine nei me kuu mau waimaka, no kou maliu ana mai, e hoohuiia au me kuu mea i aloha ai iloko o ka berita o ka mare ; aole nae pela, paa mai oe i ka uahoa, i ka naau lokoino he aloha ole, a owau ka luahi o kou mau manao makee waiwai e kuu makua, a pale ae la oe i ke aloha o kau keiki, he nana makuakane wale ae no, aole oe e loaa e kuu Benekona aloha.

            "He nani nae ia ua punihei aku oe i na pahele a ka alopeka, a ua makemake hoi oe e hoolilo aku iaʻu i wahine na ke keiki lapuwale a ko haku kiaaina, ke hoike aku nei au imua ou, a imua oi o keia aha kanaka nui, aole loa au e kapa hou aku ia oe he makuakane noʻu, a pela hoi oe e nana mai ai iaʻu he kaikamahine nau ma keia hope aku.

            "Ma ka manawa e kaawale aku ai kuu mea i aloha ai mai aʻu aku, e hele naauauwa aku auanei au i ke aloha nona ma na wahi aʻu i maopopo ole ai, a o ka make wale no ka mea nana e hoopau ae i kuu aloha nonoa," alaila puliki mai la oia @ Hawila, na kona mau kulu waimaka no e hiolo makawalu mai kona mau lihilihi aku, a nona hoi ka uwe, he hookahi ke kupenui ana me ka aha kanaka nui e noho mai ana owai hoi ia mea hiki ke paa aku na waimaka, i ke ku maoli no o kela hiona me ka walohia.

            Iloko o ka walohia o kela mau olelo a Magarita i kamailio mai ai i kona makuakane, he mea kau la a loli ae kona mau ano uahoa, a komohia iho la hoi ke aloha no kana kaikamahine hookahi wale iho no, he ole loa no ma na ano apau, @ua oi aku kona makee i ka waiwai, ka hanohano ame kona kulana, no ke kailiia mai iaia aku, in a no kona maliu mai, e hooko i ka makemake o na opio, mamua o ka makee no kana keiki ponoi.

            I ka pau ana hoi o ka Magarita hoakaka ana aku i kona mau manao imua o kona makuakane, ua kauoha ae la ke kiaaina o Roma i kona mau luna aupuni e akoakoa mai i kahi hookahi, no ka noonoo ana i ke noi a Hawila, e haawiia aku i manawa nui kupono nona ame kana aloha e kaana hope ai i ko laua mau ehaeha ; a ma ka lakou kukakuka ana, i hooholo ae ai ka hapanui o lakou, he oi aku ka pono e ae i kela noi, he alahele ia e ala ole mai ai kekahi haunaele nui, aka no Feriana Semioleta nae, oia hookahi ka mea i hoole paakiki, me ka piha kuaki maoli, aole e ae aku i kela noi, a oiai oia hookahi wale no@ma kona aoao, ua ku oia i kahi o ka hoka, me kona hele nae a piha kuaki maoli.

            I kela holo ana ae, ma ke kukakuka ana o na luna aupuni ua aeia ke noi a Hawila, ia manawa i ku mai ai ka ilamuku iluna, a me ka leo nui moakaka, pane mai la :

            "E Sa Naia, mamuli o ka hooholo ana iho nei o ka aha kuka, o ke Alii Kiaaina o Roma nei, no na mea e pili ana i kau noi, ua loaa iaʻu ka hanohano e hoike aku imua ou, ua aeia kau noi, a ma ke kauoha i haawiia mai iaʻu, ke kukala aku nei au, he hapaha hora ka manawa e haawiia aku nei nou e hui pu ai me Magarita elike me kou makemake.

            "He umi-kumamalima minuke a olua e hui pu ai, a e kamailio ai no olua iho, a mahope aku o ia manawa, e hookauia aku ai ka hoop@aʻi i kau ia nou, a ma koʻu aoao nae, ke haawi aku nei au i ko'u aloha kuiʻo ia oe, a ke kalokalo pu ae nei hoi i na mana lani, na ke Akua no e hoopakele mai ia oe mai na poino mai," alaila haawi mai la oia i kana kunou ana, a hoi aku la a noho maluna o kona noho i hookaawleia.

            No kela hoike mai ka ilamuku mai, ua apo hou ae la na opio i kahi hookahi, oiai he mau minuke kakaihahi wale no a laua e kuwili pu ai, alaila wehe ka laua pili, no ka maopopo ole o ko laua hui hou me na kino ola.

            Hala ae la he umi minuke a he elima wale no minuke i koe a Hawila ame kana aloha e lulumi ai iloko o ko laua mau aloha hoonipo kupouli, aia hoi iloko o ka hikilele o na mea apau, ua loheia aku la ke kani kapalili ana mai o ka leo o kekahi manu, a iloko o ka manawa pokole, ua piha ae la oluna o ka lewa, o kela wahi a Hawila ma e ku ana, i ka pohaiia e na manu he nui, a e kani kikiko'u ana hoi ko lakou mau leo, me ka piha olioli loa.

            E kuu makamaka heluhelu, o ka mea nona ka leo manu mua loa i loheia aku e ke anaina kanaka, no Hawila no ia, a o ka mea hoi nana i kahea aku i ka nui manu o ka ululaau e pohai ae maluna o ka kaua koa opio, au no e hoomanao nei, o keia kekahi o na kalena kiekie loa i loaa iaia, ke kalena hoi ana i pahele aku ai i ke kupaa o ka Uʻi Magarita a haulehia kona kupaa, ma kela po mua loa o kona hoea ana no ke kulanakauhale o Rokenekai, i na kanaka akamai i ka hookani pila o kela kulanakauhale, e noke ana i ka hookani i ka lakou mau pila, me ka manao he mea ia no lakou e ike lihi aku ai i ka helehelena nohea o ka man@ Nunu, he neo nae ka mea i loaa ia lakou, a e ke keiki o ka uka waokele, nana i kii aku i ke kupaa o ua manau nunu nei, a mama ana na wawae i ka holo no kahi o ka puka aniani, a kiei mai la iwaho, i ka mea nona kela leo ok ananai i ka himeni.

            Oiai hoi ka leo o na manu e kani ana, o ka manawa no ia i kapae ae ai o Hawila i kona mau manao kaumaha apau mahope o kona kua, alaila hoomaka ae la oia e mele i keia himeni i ku i ka walohia penei:

            Kuu aloha, kuu ipo hoi,

            Kuu lei i kui ai a lawa,

            E lei no oe lei pu kaua,

            I ke aloha hoi o kaua.

            Ano, e kuu aloha e@

            Hooko o ka pili a kaua.

            Noho oe a hoomanao ae,

            Aia ke aloha ua hala,

            Ua kau i ka lio ahiu,

            I hoa kakele no ka wao.

            Ia nei oe, ia nei au,

            Papahi ke aloha hope.

            Eia kuu hora o ka ehaeha,

            I eha ai mamuli o ko kino,

            Ke hookokoke palanehe mai ne@

            A heaha la, heaha la hoi !

            E au ae hoi au i ka ino,

            E alo i ka nui leo o na manu ;

            E wa nei i ka aina,

            Hui hou a hui hou kaua,

            Ma o ma kela aina laelae,

            O kuu ike hope paha keia ia oe,

            Ahea la halawai hou ?

            Nani kuu ehaeha,

            Ke hoomanao ae nou,

            Kaanini au i ka eha lima ole,

            Aole paha au e ike hou ana,

            I kou maka e kuu aloha.

            Ke hevee nei nae au e kuu aloha,

            Na ke Akua e kokua ia kaua.

            I hookahi mu-ki hope ana,

            A haalele iho au ia oe."

            E kuu hoa uhaiaholo o keia nanea, aole anei o kaua pu kekahi e komohia iho iloko o na haawina eehia o kela mau leo mele, a ka kaua koa e kaukau la nona ame kana aloha ? A mae wale ka hoi ka lau o ka palai i ka pehia e ka Uanoe, pakela loa aku paha hoi keia, he leo no ka mea uhane, no laila aole he puuwai i nele me ka pauma ia me ke aloha ke puaʻi la na mapunawai o Kulanihakoʻi i ka lihilihi.

            I ka wa a kela mapuna leo e hone ana i ke aheahe lau makani, me ka walohia nui, aia hoi, ua ikeia aku la na punawai o ke aloha e hoohanini ana i na kiahawai o ka mokumokuahua, aka nae o na maka wai i panikuia e na mea alalai he nui, o ia no ke kiaaina o Roma, kana keiki Feriana ame ka makuakane o ka Uʻi Magarita, ua nele ka hoike ana mai o ko lakou mau helehelena uahoa ia mea maikai he aloha, aka ke nohoalii la ka mako-na ame ka inaina iloko o lakou pakahi ; o ka lakou wale no e kakali mai la, o ka hiki mai i ka manawa e hookauia aku ai ka lakou pio maluna o ka lio ahiu.

            Ke kokoke loa ae la e pau na minuke elima i koe o ka manawa i haawiia aku ai no Hawila e ike hope ai i kana aloha, a na ka pu puhi o ka o-le i hoolele ae i ka hauoli o na mea apau, me he mea la e hoike okoa mai ana ka leo o ka pu o-le :

"Hamau e na hoa,

Ua hiki mai i ka manawa,

E kauia aku ai,

Ka naita pahaohao,

Maluna o ka lio ahiu."

            Iloko o kela manawa i hoaahu hou ia iho ai ke anaina holookoa me ke koloka o ka eehia no ka ike aku i kekeahi hiona ku i ka menemene, me he ao naulu la ka hele a lele pioo i ka lewa, a iloko no hoi o kela manawa, aia ke haka pono la ka nana ana a na mea apau maluna o ka ilamuku, ke kanaka i haawiia aku ai, nana e hooko aku i na hana hope maluna o ka kakou koa opio.

            I ka leo o ka pu o-le e wawalo hele ana i ka lewa, o ka wa no ia a Magarita i lele aku ai a puili paa i ka mea a kona puuwai i aloha ai, aia hoi kona mau papalina ua hele a kiheʻaheʻa i na omaka wai o Koolihilihi.

            Aole o ka Manu Nunu Ahiu wale no ka i hoohanini iho i kona mau wa@maka o ka ehaeha iloko o kela mau sekona ikiki o ka luuluu, aka o ka lehulehu pu no kekahi iloko o ia haawina hookahi, a me he mea la, o ka naau pu kekahi o kona luaui makuakane, i komohia aku na haawina o ka ehaeha no kana kaikamahine, aole nae he hoike o ia mea, ma ka helehelena o Kiaaina Benekona, o ka uahoa mau ke nohoalii la maluna ona.

            Ua komohia iʻo no ke aloha mokumokuahua iloko o Kiaaina Benekona no kana kaikamahine, aole nae e hihi, @ haawi mua aku oia i kona ae e lilo kana kaikamahine i wahine mare na Feriana, pela iho la i hiki ole ai iaia ke hoi hope, ma kana mea i hoopaa ai, me kona manao kuhihewa la, aole i lilo kahiko ka puuwai o kana Magarita i ka mea okoa, akahi nae oia a ike maka, eia ka ua lilo kona mana ame ke kauoha a ke kiaaina o Roma, i mea ole i ka manao o kana keiki, a o ia kana i mihi iho ai me ka walani loa, no kona pupuahulu me ka wikiwiki loa, ma ka haawi e ana i kona ae, me ka hui a kukakuka mua ole ana me kana kaikamahine.

            Ua ike maoli iho no ka makuakane i kona hoohokaia ana e kana keiki ponoi, ka mea ana i hilinai ai, aohe he akamai, nana e hoohina i ke kupaa o kana kaikamahine, ka mea ana i kapa aku ai ka Manu Nunu Ahiu, hei ole i ka upena kuu a ka Lawakua.

            Oiai hoi ka Uʻi Magarita e puliki paa la i kana aloha, ia manawa i ku ae ai ka ilamuku iluna, a haalele aku la i kona wahi e noho nana, alaila hele pololei mai la oia no kahi a Mgarita e lulumi la ma ka a-i o kana aloha, a hoopa aku la ma kona poohiwi, me ka pane ana aku i keia mau olelo :

            "E ka lede maikai, ka mea hoi i hoopihaia me ka naau ehaeha loa, no kau mea i aloha ai, ma ka mana o ka oihana i hookauia iho maluna oʻu, ke nonoi aku nei au i kou oluolu e ae mai hoi oe, e hooko aku au i kaʻu hana, ma kou hookaawale ana ae mai kau aloha mai, pela iho la e hiki pono ai iaʻu ke lawelawe aku i na hana i pili i kaʻu oihana maluna o ka opio, a kou puuwai i hoolele pau aku ai i kou aloha.

            "E kuu lede maikai, me ka hookamani ole, ke hoike okoa aku nei au imua ou, o ka haawina ehaeha i kau i kau iho maluna ou, oia haawina hookahi no ka mea i loaa iaʻu, a me ka naau kaumaha a luuluu i ke aloha no ka mea i eha ai o kou puuwai i ke aloha, pela au e lawelawe nei i kaʻu hana, i kulike ai me ka oihana i hooiliia mai maluna iho o koʻu mau poohiwi.

            "Ke nonoi hou aku nei au i kou lokomaikai e kuu lede, e huikala mai oe iaʻu, no ka mea aole e hiki iaʻu ke pale ae i ke kauoha i haawiia mai naʻu e hooko aku, a mai manao iho hoi oe, aia kekahi manao lokoino a piha i ka mako-na iloko oʻu no kau aloha, aole pela, eia wale no au ke hooko nei i kaʻu oihana, nolaila e ae mai oe me ka manao maikai e hooku ae i kau puili aloha hope ana, ua lawa loa keia ao olua."

            I ka hoomaha ana iho o kela mau olelo ku i ka oluolu ame ke aloha o ke kanaka o ke aupuni, aole e hiki ia Magarita ke pane ae he hookahi huaolelo, no ka mea ua hele ola a piha loa me na manao kupouli o ke aloha, aka nae kulou @ ola o Hawila ilalo, a hawanawana aku la ma na pepeiao o kona aloha i ka pane ana iho :

            "E kuu loha hoomanawanui, ka mea hoi i hawele a paa i ke aoloha o kaua, ano ua biki mai i ka hora o kuu ehaeha, a e kaawale aku ana au mai ia oe mai, aka nae, o kuu aloha nou, aole loa ia e mokuhia i na waikahe he nui. Nolaila e hookuu mai oe e kuu aloha, e alo ae au i na inea o na hana hilahila ole a ko kaua enemi.

            "He mau sekona ho[e loa keia o kaua e hoikeike nei i ka ehaeha o ko kaua mau puuwai pakahi aka nae i hoike aku au ia oe e ke aloha, e alo aku ana au i na inea me ka @ ole, a o kaʻu wale no e kalokalo ae nei i ka lokomaikai o @ Lani, e ukaliia kaʻu alahele me na manaolana o ka palekana, a e olino mai auanei ka manaolana me ka hauoli mau loa maluna iho o kaua, a e hoea mai ana no ka la, a kaua a elua e nohoalii ai mai na hana hoehaeha a hoomewaewa mai a ka enemi o ka hilahila ole.

            "O na minuke polole au e nana ae ai iaʻu e kau ana maluna o ke kua o ka lio ahiu, he mau minuke ia o ke kaumaha ame ka ehaeha, aia nae au a nalo mai ka ike an@ aku a kou mau maka, alaila e komo aku iloko o ka hauoli me ka poe e olioli ana, a e lealea pu hoi me lakou, me he mea la aole he haawina hookaumaha i hookauia mai maluna iho oʻu, a na ke au no auanei o ka manawa e hoohalawai hou ia kaua iloko o ka hauoli oi aku, a kaua e luakaha aku ai iloko o ka hopena o na la o ko kaua ola ana.

            "Aole no keia manwa, he pio kau aloha iloko o ka luna o ko kaua mau enemi, i hoike aku nae au ia oe me ka oiaio loa, e hoea mai ana ka la au e nohoalii ai maluna o ka luahuna waiwai pahaohao, a e hoolio aku no au ia oe i moiwahine no ka waiwai ma ka honua apuni, a ia manawa hookahi auanei e hiki ai iaʻu ke nohoalii maluna o koʻu mau enemi."

            Ia hooki ana iho o Hawila i kela mau olelo hope i kana aloha, o ko laua haawi ae la no ia i na mu-ki hope, ana @ mawehe ae la no hoi i na puili ana o ka ipo i ka ipo, a ke nana aku i ka Uʻi Magarita, ua hele a pulu-pe i ka wai o ke aloha, e naka ana hoi kona kino holookoa me ka haalulu i ka wa i kaawale ae ai ua mau opio la.

            I mau mapuna leo hope loa hoi ma ko Magarita aoao, leha ae la kona mau maka iluna me ka piha i ke aloha, a i aku la :

            "E ke aloha, ka mea nona ka leo i oi aku ka nanahe kapa lili imua o ko na manu, a o ka mea hoi nona na manamanalima pananehe i kikoni iho i na maawe kaula o ke gita, i @i aku ka maiau ame ka mikioi mamua o na leo hookani pila apau aʻu i ike ai, ka mea hoi nana i hoohiolo iho i ka uahoa o kuu puuwai a weluwelu liilii, a hawele iho la i ka hoohihi ame ke aloha, e pulama mau aku i ke ao ame ka po nou, e kuu hoa haʻihaʻi olelo hoi o ka malu wilou : aohe no a'u mea nui e ae e haawi aku ai ia oe, e ka leo momi o kuu puuwai koe wale no koʻu hooia mau ana aku imua ou, a imua hoi o na lani, ua laa keia kino nau, a nau hookahi wale iho no, mai kela manawa mua loa mai a kaua i hilo ai i na maawe kaa-kolu o ko kaua aloha ahiki i ka hopena o ka honua nei, aohe mea nana e akaa ae.

            "He nani hoi ia, ke hooko nei oe i ka hana lokoino a ko kaua mau enemi, e noho no au me ka hoomanawanui ana i ke aloha o kaua, a in a he huakai kena au no koʻu hiki hou ole ke ikeaku ia oe ma keia ao, alaila e hui hou aku ana no kaua ma kela ao ; aka hoi, i hele no oe ma ke alahele o ka hoomaewaewaia, a i loaa ia oe ka palekana maluna o ka make, alaila i huli hoi hou mai oe me ke ola imua oʻu, e loaa mai ana no au ia oe, he o ia mau no koʻu kupaa mahope ou, a ehia ka hoi mea oi aku o ka hauoli, o ka ike hou aku i kou mau maka nohea e kuu aloha."

            Oiai ke oi wale aku la na minuke imua, mamua o ka manawa i aeia aku ai no Hawila ma e ike hope ai, ua haawi ae la ka ilamuku i ke kauoha i na paniolo, e hoohina i ka lio ahiu ilalo, a e kupee hoi i kona mau wawae a paa, he manawa pokole, aia na paniolo ke lawelawe mai la i ka lakou hana, i hele a lehia, a hina ana ua lio nei ilalo, a paa i ke kupeeia, a ke lawe mai la hoi kekahi mau kanaka i na kaulahao i hoomakaukauia no ka hauhoa ana aku i ka kaua koa, maluna o kona halepaahao o ke ehaeha.

            I ka ike ana aku o ka ilamuku, ua makaukau ka lio ame na mea apau e hoopaaia aku ai o Hawila, ia wa i huli mai ai oia imua o ke kanaka opio a pane mai la :

            "E Sa Naita, e ae mai oe e hooko aku au i kaʻu hana maluna ou, a o ia kaʻu e kauoha aku nei ia oe, e wehewehe ana oe i kou mau lole apau, a me kou kino olohelohe, koe kou lole pili aku i ka ili, me ia ano iho la au e hauhoa aku ai ia oe a paa iluna o ke kua o ka lio ahiu, o kou halepaahao ia, i kulike ai me ka olelo hooholo ku i ka manaonao i haawiia e ke kiaaina, ka helu ekahi hoi o na hoopaʻi ehaeha loa, i ike ole ia kona lua ma keia kulanakauhale mamua aku nei, a aole no paha e ike hou ia ma keia hope aku.

            "Ma koʻu aoao, ka mea i waihoia mai naʻu e hooko aku i keia hana ku i ka menemene, ke haawi aku nei au i kaʻu mau mahalo kiekie ana no kou kulana o ka naita oiaio, ma ka ae ole ana e kupale nou iho, no ka mea in a he kanaka okoa ma kou wahi, pela ka lako i na kaukani o na kanaka, i lako pono i na meakaua, ina aohe nao ai i ka paapa, e moanawai koko nui, ke ikeia ma keia kahua i keia Ja, a e ku olohelohe ana hoi ke kulanakauhale poo o Roma nei, aole nae pela kou manao, ua waiho mai oe ia oe iho, e hookoia kela hoopaʻi maluna iho ou.

            "I koʻu hooko ana aku nae i keia hana, aole ia ma ke ano, ua kulike koʻu manao me ko na kiaaina ame ko Feriana, aka me ka ehaeha no o ka naau, ame na lima haalulu au e hooko aku ai i kaʻuhana maluna ou ; aole nae owau hookahi wale no ka i loaa ia manao ehaeha, aka o keia anaina holookoa pu kekahi e kakali mai nei me na manao pilihua, au no e ka naita hopo ole e hoohewahewa ole ai, i na leo olowala o na naita hopo ole e hoohewahea ole ai, i na leo olowala o na hoahea ana maluna o ke kieki a ke Kiaaina o Roma nei, i puanaia mai e ko lakou mau lehelehe.

            "Nolaila, e ka naita maikai, ke kiamanu akamai hoi, nana i pahele i ka Manu Nunu Ahiu i kaulana i ko Rokenekai aohe kiamanu akamai e hei ai, ua hoea mai ka hora aʻu e hookau aku ai i ka hoopaʻi maluna ou."

            "E ka ilamuku maikai," i loheia aku ai ka leo o Hawila i ka pane ana mai : "e hooko aku i ka hana a kou haku i makemake ai, a ua makaukau au me ke ku-e ole aku ia oe," alaila ikeia aku la ka hiolo mai o na waimaka ma na papalina o ka lehulehu, i kau a mea o ka nui o ko lakou aloha no ke kanaka a lakou i mahalo aku ai.

            Me na lima haalulu lalau aku la ka ilamuku i na lole o Hawila, a wehewehe ae la, a koe kona mau lole e pili la i ka ili, a ke nana aku i ke kino o ka kakou koa opio, he maikai he molale nepunepu, e lamalama ana i ke alo o Hihimanu.

            I ka makaukau ana o ka ilamuku i kana hana, alakai aka la oia ia Hawila no kahi i kupeeia ai ka lio ahiu, a malaila i wehe i ka paleili olalo, ia manawa i holo okoa aku ai o Magarita, a uwalo aku la imua o ka ilamuku me ka pane ana aku :

            "Ina he aloha kou i ka mea e hoomaewaewaia aku ana ea, alaila ke nonoi aku nei au ia oe, e ae mai, mamaua o kou hookuu ana ae i kona kino i mea makaikaiia mai e ka lehulehu, e hoaaliu aku oe i keia kihei silika eleele maluna on a, aka nae o ka mea oi loa aku nae o ka maikai, ke ae mai kou lokomaikai, owau ponoi no ka mea nana oia e hoaahu aku me keia kihei."

            "No kau noi e ka lede opio, ke haawi aku nei au i koʻu ae me ka manao maikai, e hana aku oe i ka hana ku i ke aloha hoa-kanaka, a o na ahewa ana apau, no koʻu ae ana aku i kau noi, maluna iho ia o kuu poo."

            Me na waimaka o ke aloha kuʻio no kana mea i aloha ai i hoouhi aku ai o Magarita ia Hawila me kona kihei @ eleele ponoi, alaila huli mai la imua o ka ilamuku a pane mai la :

            "He hookah aʻu noi hope ia oe, a o ka pau no ia, o ia hoi, o keia mau wahi lole, i pili loa kau i kona ili, e ae mai oe me aʻu ia e waiho ai, a o ka nui aku o kona mau lole, e @ aku oukou a malama."

            "E hana aku oe i kau mau mea apau i makemake ai, a o ka hope loa no hoi, o ia no koʻu hoopau pono ana aku i kaʻu mau hana," wahi a ka ilamuku, me ka nana aloha ana mai maluna o Magarita.

            (Aole i pau.)