Ka Nupepa Kuokoa, Volume LV, Number 50, 14 Kekemapa 1917 — HOOKUUIA KEKAHI MAU PAAHAO ELIMA. [ARTICLE]

HOOKUUIA KEKAHI MAU PAAHAO ELIMA.

Mahope iho o ka noho hana ana i ko lakou hoopa'i maloko o ka halepaahao no' kekahi manawa, i hookuuia mai ai he elima mau paahao mailoko mai o ka halopaahao mamuli o ke kauoha a ke kiaaina, me ko lakou hele mau mai nae e hoike i kela ame keia manawa, a lakou e noho lanakila ana mawaho nei. O na inoa o kela mau paahao, oia o Juan Pedro, ua ahewaia oia ma ka la 17 o Iulai, 1916, maloko o ka aha kaapuni eha, no ke karaima hoeha me ka moaeha ku i ka make, a o kona hoopa 'i aole e emi iho malalo o na makahiki elua, a aole hoi e oi aku mamua o na makahiki elima.

O Emiterio Ayala, ua ahewaia oia ma ka la 21 o Dekemaba, 1916, maloko o ka aha kaapuni ekahi, no ka hewa kaili ma-lu, a kauia kona hoopa'i, e noho maloko o ka halepaahao, aole e emi iho malalo o na mahina he umi-kuma-malima, a aole hoi e oi aku mamua o na makahiki elua. O Yee Bong Nee, ua ahewaia oia ma ka la 10 o Mei, 1916, no ka hewa aihue ma ke degere ekahi, malōko oka aha kaapuni eha ;a o kona hoopa'i i kauia, o ia no ka noho ana maloko o ka halepaahao no ka manawa, aole e emi iho malalo o na makahiki elua, aole hoi e oi aku i na makahiki he umi. O Moon Hyung Sik, ua ahewaia oia ma ka la 15 o Mei, 1915, maloko o ka aha kaapuni ekolu, no ka hewa wawahihale, ma ke degere ekahi, o kona hoopa'i aole e emi iho malalo o na makahiki elua me ka hapa, e noho ai maloko o ka halepaahao, aole hoi e oi aku i na makahiki he umi. O Sinproso Mariano, ahewaia ma ka la 1 o Mei, 1916, iloko o ka aha kaapuni ekolu no ka hewa aihue, ma ke degere elua, a hoopa'iia e noho maloko o ka haiepaahao, aole e emi iho i na makahiki elua, aole hoi e oi aku maniūa o na makahiki he umi.